Utoqqalinermi pensionisiat pillugit Namminersornerullutik Oqartussat nalunaarutaat nr. 14, 27. juni 2007-imeersoq
Utoqqalinermi pensionisiat pillugit Inatsisartut peqqussutaanni nr. 3-imi, 7. maj 2007-imeersumi § 8-mi imm. 4, § 11-imi imm. 3, § 13-imi imm. 2, § 14-imi imm. 3 kiisalu § 15-imi, imm. 5 naapertorlugit makkua aalajangersarneqarput:
Ulloq unnuarlu paaqqinniffimmi allami najugaqarnermi pensionisiat tunniunneqartarnerat
§ 1. Qaammammi nuuffiusumi qaammatillu tulliani utoqqalinermi pensionisiat allannguuteqartinnagit tunniunneqassapput tamatumali kingorna utoqqalinermi pensionisiat 20 %-ii tunniunneqartalissapput utoqqalinermi pensionisialik imatut pippat
1) Kalaallit Nunaanni ulloq unnuarlu paaqqinniffimmut allamut nuutsinneqarpat § 11, imm. 1 utoqqalinermi pensionisiat pillugit Inatsisartut peqqussutaat malillugu,
2) Kalaallit Nunaanni avataaniluunniit napparsimavimmut unitsinneqarpat,
3) tarnimikkut nappaatillit napparsimavianni imaluunniit pinerluuteqarsimasunik isumaginnittoqarfiup iluani paaqqinniffimmi Kalaallit Nunaanniittumi imaluunniit Danmarkimiittumi pineqaatissinneqarnermigut inissinneqarpat imaluunniit
4) eqqartuussiveqarfimmit pineqaatissinneqarluni tigummigallagassanngortitaasimappat.
Imm. 2. Utoqqalinermi pensionisianik pisartagalik utoqqalinermi pensionisiat saniatigut pisortanit pisartagaqarpat, soorlu kaasarfimmiussinneqarsimalluni, akissarsisinneqarsimalluni imaluunniit sulinersiuteqarsimalluni utoqqalinermi pensionisiaminik ilanngaaffigineqassaaq, utoqqalinermili pensionisiassani sinneruttut minnerpaamik utoqqalinermi pensionisiatut pisartakkat 20 %-iinik annertussuseqassapput.
Imm. 3. Meeqqanut tapinik pisinnaatitaaffeqarneq allannguuteqarani atuutiinnassaaq taamalu utoqqalinermi pensionisiallip ataasiakkaatut pisariaqartitsinermik naliliineq tunngavigalugu inummut tapinik pisartagaqarsinnaatitaanini attatiinnassavaa, tassunga ilanngullugit inissinneqarnerup nalaani inigisap tigummiinnarnissaanut aningaasartuutinut matussutissanut pisartagaqarsinnaatitaaneq.
Imm. 4. Utoqqalinermi pensionisialik angerlartinneqarpat iperagaappalluunniit utoqqalinermi pensionisianik pisartagaqarsinnaatitaaneq atuutilersinneqaqqissaaq qaammatip nuuffiusup ulluisa aallaqqaataaniit atuutilersumik, takuuk utoqqalinermi pensionisiat pillugit Inatsisartut peqqussutaanni kapitali 3.
Meeqqanut tapit
§ 2. Meeqqanut tapit qaammatikkuutaartumik tunniunneqartassapput meeqqanut akilersuutit nalinginnaasut Inatsisartut aningaasanut inatsisaanni ukiumoortumik aalajangersarneqarsimasut amerlaqataannik angissusilerneqarsimallutik, takuulli imm. 3.
Imm. 2. Pilersuisussaatitaasut tamarmik utoqqalinermi pensionisianik pisartagaqartuuppata meeqqamut ataatsimut tamarmik immikkut meeqqanut tapinik tunineqartassapput.
Imm. 3. Utoqqalinermi pensionisialik meeqqamut akilersuisussaatitaappat meeqqanut tapit ukiup affakkuutaartumik tunniunneqartassapput, piffissami akilersuisussaatitaaffiusumi allatut isumaqatigiissuteqartoqarsimanngippat imaluunniit allamik aalajangersaasoqarsimanngippat. Meeqqanut akilersuutit ukiup affaanit sivikinnerusumik sivisunerusumilluunniit tunniunneqartarpata meeqqanut tapit piffissamut tamakkiisumut atuuttut ataatsikkut tunniunneqassapput.
Imm. 4. Meeraq utoqqalinermi pensionisialimmi najugaqarani allami najugaqarpat utoqqalinermilu pensionisialik meeqqamut akilersuisussaatitaalluni, meeqqamut akilersuutit pisinnaatitaaffilimmut tunniunneqassapput.
Tapit aningaasanut atugassiissutinut tunngasut
§ 3. Tapit aningaasanut atugassiissutinut tunngasut kommunalbestyrelsimit aalajangersarneqartassapput, najukkami inuuniarnermi atugassarititaasut tunngavigalugit kiisalu eqqarsaatigineqassalluni utoqqalinermi pensionisiallip najukkami innuttaaqataasunit allanit pitsaanerusumik atugassaqartitaalinnginnissaa.
Imm. 2. Tapit aningaasanut atugassiissutinut tunngasut tassaapput utoqqalinermi pensionisiallip akileraarutit ilanngaatigereerlugit isertitai, aningaasartuutit makkua ilanngaatigereernerisigut sinneruttut:
1) Inigisamut akiliut, ineqarnermut tapi ilanngaatigereerlugu.
2) Imermut innaallagissamullu aningaasartuutit.
Imm. 3. Tapit aningaasanut atugassiissutinut tunngasut tunniunneqarnissaannut tunngavissat allannguuteqarpata, utoqqalinermi pensionisiallip tapit aningaasanut atugassiissutinut tunngasut pisartagai iluarsiivigineqassapput, allannguuteqartitsinissamut tunngavissat pissutissaqartippassuk utoqqalinermi pensionisiallip tapinik aningaasanut atugassiissutinut tunngasunut pisartagai allannguuteqartariaqartut.
Inummut tapit
§ 4. Kommunalbestyrelsip utoqqalinermi pensionisialik inummut tapinik pisartagaqalersissinnaavaa aningaasaqarniarnikkut pissutsit atuuttut aallaavigalugit utoqqalinermi pensionisiallip tapit aningaasanut atugassiissutinut tunngasut kommunimit aalajangersarneqareersimasut inuussutigisinnaanngippagit, aningaasartuutit nalinginnaasuunngitsut aningaasartuutiginissaat pissutigalugu imaluunniit utoqqalinermi pensionisiallip aningaasartuutissai allat aningaasartuutissaannut nalinginnaasunut naleqqiullugit pingaarutilimmik amerlaneruppata.
§ 5. Utoqqalinermi pensionisiallit annertuumik innarluutillit atortutigut ikiorsiissutinut aningaasartuutinut tamakkiisumik ilaannakortumilluunniit ikiorserneqarsinnaapput inummut tapinut malittarisassat naapertorlugit qanorluunniit aningaasatigut inissisimanerat immikkut illuinnartuutigigaluarpat. Aningaasartuutit assersuutigalugu makkuusinnaapput:
1) atortutigut ikiorsiissutinik pissarsiniarnissamut,
2) tapersersortimik atorfinitsitsinissamut,
3) utoqqalinermi pensionisiallip innarluuteqartup angerlarsimaffiani ulluinnarni isumaginnittuusut oqilisaanneqarnissaannut,
4) siunnersorteqarnermut,
5) utoqqalinermi pensionisiallip innarluutillip inigisaanik aaqqissuussinermut allanngortiterinermulluunniit,
6) utoqqalinermi pensionisiaqartup innarluutillip ulluinnarni atugarisaanik oqilisaassinissaq pitsanngorsaanissarlu siunertaralugu qanigisaasunik allanilluunniit ilinniartitsineq pikkorissartitsineq il.il.,
7) utoqqalinermi pensionisiallip innarluutillip sulinngiffeqarluni angalanissaanut imaluunniit pissutsit immikkut ittut atuutsillugit qanigisaasumut utoqqalinermi pensionisiaqartup innarluutillip angerlarsimaffiup avataani paaqqinniffimmiitinneqarallarneranut atatillugu.§ 6. Inigisamik aaqqissuussinissamut imaluunniit atortutigut ikiorsiissutinik pissarsiniarnermut aningaasartuutinut immikkut ittut inummut tapitut aatsaat tunniunneqarsinnaapput aningaasartuutissat utoqqalinermi pensionisiallit allat innarluuteqartuunngitsut nammineq atuinerminni, inuussutissaqarniarnerminni imaluunniit inigisaminnik aaqqissuussinerminni aningaasartuutaat nalinginnaasut qaanginngippatigit.
Imm. 2. Biilitaarniarluni aningaasartuutissanut inummut tapinik tunniussisoqarsinnaanngilaq, biililli innarluutilimmut tulluarsarneqarnissaanut aningaasartuutinut inummut tapinik tunniussisoqarsinnaalluni.
Naammagittaalliuuteqarsinnaatitaaneq
§ 7. Nalunaarut una naapertorlugu aalajangersaanerit isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni aalajangersakkat malillugit Isumaginninnermi Naammagittaalliuuteqartarfimmut naammagittaalliuutigineqarsinnaapput.
Atortuulersitsineq
§ 8. Nalunaarut una atortuulersinneqarpoq ulloq 1. juuli 2007-imi.
Imm. 2. Ilutigitillugu pisortanit pensionisiat pillugit Namminersornerullutik Oqartussat nalunaarutaat nr. 19-i, 21. november 2003-meersoq atorunnaarsinneqarpoq.
Namminersornerullutik Oqartussat, ulloq 27. juni 2007-imi
Finn Karlsen/
Martha Lund Olsen