Siusinaartumik pensionisiat pillugit Namminersornerullutik Oqartussat nalunaarutaat nr. 13, 27. juni 2007-imeersoq

Siusinaartumik pensionisiat pillugit Inatsisartut peqqussutaanni nr. 4-mi, 7. maj 2007-imeersumi §12-imi imm. 3 aamma § 14-imi imm. 2 naapertorlugit makkua aalajangersarneqarput:

 

Ulloq unnuarlu paaqqinniffimmi allami najugaqarnermi pensionisiat tunniunneqartarnerat

§ 1. Qaammammi nuuffiusumi qaammatillu tulliani siusinaartumik pensionisiat allannguuteqartinnagit tunniunneqassapput tamatumali kingorna siusinaartumik pensionisiat 20 %-ii tunniunneqartalissapput siusinaartumik pensionisialik imatut pippat
1) Kalaallit Nunaanni ulloq unnuarlu paaqqinniffimmut allamut nuutsinneqarpat § 12, imm. 1, siusinaartumik pensionisiat pillugit Inatsisartut peqqussutaat malillugu,
2) Kalaallit Nunaanni avataaniluunniit napparsimavimmut unitsinneqarpat,
3) tarnimikkut nappaatillit napparsimavianni imaluunniit pinerluuteqarsimasunik isumaginnittoqarfiup iluani paaqqinniffimmi Kalaallit Nunaanniittumi imaluunniit Danmarkimiittumi pineqaatissinneqarnermigut inissinneqarpat imaluunniit,
4) eqqartuussiveqarfimmit pineqaatissinneqarluni tigummigallagassanngortitaasimappat.
Imm. 2. Siusinaartumik pensionisianik pisartagalik siusinaartumik pensionisiat saniatigut pisortanit pisartagaqarpat, soorlu kaasarfimmiussinneqarsimalluni, akissarsisinneqarsimalluni imaluunniit sulinersiuteqarsimalluni siusinaartumik pensionisiaminik ilanngaaffigineqassaaq, siusinaartumilli pensionisiassani sinneruttut minnerpaamik siusinaartumik pensionisiatut pisartakkat 20 %-iinik annertussuseqassapput.
Imm. 3. Meeqqanut tapinik pisinnaatitaaffeqarneq allannguuteqarani atuutiinnassaaq taamalu siusinaartumik pensionisiallip ataasiakkaatut pisariaqartitsinermik naliliineq tunngavigalugu inummut tapinik pisartagaqarsinnaatitaanini attatiinnassavaa, tassunga ilanngullugit inissinneqarnerup nalaani inigisap tigummiinnarnissaanut aningaasartuutinut matussutissanut pisartagaqarsinnaatitaaneq.
Imm. 4. Siusinaartumik pensionisialik angerlartinneqarpat iperagaappalluunniit siusinaartumik pensionisianik pisartagaqarsinnaatitaaneq atuutilersinneqaqqissaaq qaammatip nuuffiusup ulluisa aallaqqaataaniit atuutilersumik, takuuk siusinaartumik pensionisiat pillugit Inatsisartut peqqussutaanni kapitali 3.

 

Meeqqanut tapit

§ 2. Meeqqanut tapit qaammatikkuutaartumik tunniunneqartassapput meeqqanut akilersuutit nalinginnaasut Inatsisartut aningaasanut inatsisaanni ukiumoortumik aalajangersarneqarsimasut amerlaqataannik angissusilerneqarsimallutik, takuulli imm. 3.
Imm. 2. Pilersuisussaatitaasut tamarmik siusinaartumik pensionisianik pisartagaqartuuppata meeqqamut ataatsimut tamarmik immikkut meeqqanut tapinik tunineqartassapput.
Imm. 3. Siusinaartumik pensionisialik meeqqamut akilersuisussaatitaappat meeqqanut tapit ukiup affakkuutaartumik tunniunneqartassapput, piffissami akilersuisussaatitaaffiusumi allatut isumaqatigiissuteqartoqarsimanngippat imaluunniit allamik aalajangersaasoqarsimanngippat. Meeqqanut akilersuutit ukiup affaanit sivikinnerusumik sivisunerusumilluunniit tunniunneqartarpata meeqqanut tapit piffissamut tamakkiisumut atuuttut ataatsikkut tunniunneqassapput.
Imm. 4. Meeraq siusinaartumik pensionisialimmi najugaqarani allami najugaqarpat siusinaartumillu pensionisialik meeqqamut akilersuisussaatitaalluni, meeqqamut akilersuutit pisinnaatitaaffilimmut tunniunneqassapput.

 

Naammagittaalliuuteqarsinnaatitaaneq

§ 3. Nalunaarut una naapertorlugu aalajangersaanerit isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni aalajangersakkat malillugit Isumaginninnermi Naammagittaalliuuteqartarfimmut naammagittaalliuutigineqarsinnaapput.

 

Atortuulersitsineq

§ 4. Nalunaarut una atortuulersinneqarpoq ulloq 1. juuli 2007-imi.

Namminersornerullutik Oqartussat, ulloq 27. juni 2007-imi

Finn Karlsen

/

Martha Lund Olsen