Namminersornerullutik Oqartussat Piginnaasat ineriartortinnissaat pillugu siunnersuisoqatigiit pillugit nalunaarutaat nr. 3, 8. marts 2007-meersoq
Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaat nr. 2, ulloq 31. maj 1999-imeersoq § 7, imm. 2 aamma § 49 naapertorlugit aalajangersarneqarpoq:
Siunnersuisoqatigiit siunertaat suliassaallu
§ 1. Naalakkersuisut inuussutissarsiutinik ilinniartitaanermi piginnaasat ineriartortinnissaat aammalu suliffeqarnermi inuussutissarsiutinullu ilinniartitaanermi pilersinneqartut ataatsimut aaqqissugaanerisa nukittorsarneqarnissaat anguniarlugu Piginnaasat ineriartortinnissaat pillugu siunnersuisoqatigiinnik Naalakkersuisunik siunnersuisartussanik pilersitsipput.
Imm. 2. Siunnersuisoqatigiit inassuteqaateqartassapput suliassani Naalakkersuisunit saqqummiunneqartuni. Siunnersuisoqatigiit namminneerlutik suliassani suliassaqarfimminnut attuumassuteqartutut isigisaminni suliaqarsinnaapput.
Imm. 3. Siunnersuisoqatigiit inassuteqarnerminni tikkuaasinnaapput pissutsinut atuuttunut misissuqqissaarnissamik takussutissiortitsinissamillu pisariaqartitsiviusuni, tamatumunnga ilanngullugit ajornartorsiutit piffinni ataasiakkaani nunallu immikkoortuini pisut.
Imm. 4. Siunnersuisoqatigiit ukiumoortumik kingusinnerpaamillu 1. maj Naalakkersuisunut suliniutitik pillugu aammalu suliassaqarfimmi iluani ineriartorneq pillugu nalunaaruteqartassapput.§ 2. Siunnersuisoqatigiit sulinerminni:
1) Inuussutissarsiutit ineriartortinneqarnerisa, suliffeqarnerup inuussutissarsiutinullu ilinniartitaanerup suliamik ingerlatsinermi illuatungeriit akornanni ataatsimut aaqqissugaanissaat imminnullu attuumassuteqarnerisa eqqanaarneqarnissaat peqataaffigissavaat.
2) Inuussutissarsiornerup uummaarissup pilersinneqarnissaata ineriartortitsinikkullu suliffeqarnerup eqaatsumik ingerlasuunissaasa aqqutissiuunneqarnissaat anguniassavaat, aammalu inuussutissarsiutinik ilinniartitaanerup immikkuullarissumik nalinginnaasumillu piginnaasanik ineriartortitsinermik eqqanaarisup pilersinneqarnissaa aqqutissiuutissallugu.
3) Suliffeqarnermi ilinniartitaanermilu piginnaasanik ineriartortitsinermi piffissami sivikitsumi atuuttussanik siunissarlu ungasinnerusoq eqqarsaatigalugu atuuttussanik pisariaqartinneqartut aaqqiivigineqarnissaat anguniassavaat.
4) Suliniutinik inatsisiliornikkullu ilusilersuinernik siunnersuusiortassapput, taakku aqqutigalugit sulianik ingerlatsinermi illuatungeriit pisortallu piginnaasat ineriartortinneqarnissaannut pisariaqartitsiffiusuni aningaasaleeqataanissaannik kajumilersinneqaqqullugit.
5) Siunnersuinerminni inuuneq naallugu ilinniarnermik oqartarnerup naleqquttumik pilersitsinikkut imaqartinneqarnissaa anguniassavaat.
6) Nunami tamarmi inuussutissarsiornikkut ineriartortitsineq, inuussutissarsiutinik ilinniartitaanermi suliffeqarnermilu suliniutit malittarissavaat, suliffeqarnerup inuussutissarsiutinullu ilinniartitaanernut eqaatsumik iluseqartinneqarnissaat aqqutissiuutissallugu aammalu sulisut tamarmik piginnaasaannik ineriartortitsinissap eqqanaarneqarnissaa peqataaffigissallugu.
7) Inuussutissarsiutinik ilinniartitaanerup ineriartortinneqarnera malittarissavaat, ilinniartitaanerillu pitsaassusaat, ineriartortinneqarnerat, naleqqussarsinnaassuseqarnerat ilinniakkallu ataasiakkaat immikkoortuini ataqatigiissaarineq pillugu innersuussisassallutik.
8) Ilinniartitseqqittarnerni piginnaasallu ineriartortinnissaat pillugu pilersinneqartut ilusilersorneqarsimanerisa nakkutigineqarnerat peqataaffigissavaat siunnersuiffigisassallugulu.
9) Apeqqutit pitsanngorsaataasinnaasut pilersitsinernullu siuarsaaneq sulinerminni ilanngutissavaat, ilinniartitaanerup iluani pilersinneqartut pingaartuutillugit.
10) Sumiiffinni ataasiakkaani, nunallu immikkoortuini attuumassuteqartut peqatigalugit, inuussutissarsiutinut ilinniartitaanermi suliniutit aaqqissuunneqarnerannut siunnersuuteqartassapput, aammalu piffinni ataasiakkaani nunallu immikkoortuini suliniutit nuna tamakkerlugu suliniutinut tulluarsarneqarnerat peqataaffigissallugu.
Siunnersuisoqatigiit inuttalersugaanerat inissitsiternerallu
§ 3. Siunnersuisoqatigiit ilaasortaqarput siulittaasumik Naalakkersuisunit toqqarneqartumik aammalu matuma kinguliani taaneqartunit kattuffinnit pisortaqarfinnillu sinniisumik kingoraartissamillu toqqarneqartunik:
1) Kalaallit Nunaanni Sulisitsisut Peqatigiiffiannit (GA).
2) Sulinermik Inuutissarsiuteqartut Kattuffiannit (SIK).
3) KANUKOKA-mit.
4) Inuussutissarsiutinut ilinniarfinni Brancheudvalgiini siulittaasut akornannit.
5) Inuussutissarsiutinut ilinniarfinni forstanderit akornannit.
6) Ilik.
7) NUSUKA.
Imm. 2. Taakkua saniatigut Ilinniartitsisut Meeqqat Atuarfianneersut Kattuffiat (IMAK), Peqqinnissaq Pillugu Kattuffiit, Perorsaasut Ilinniarsimasut Peqatigiiffiat (P.I.P.), Atorfillit Kattuffiat (AK) Tusagassiortut Peqatigiiffiat (TP) aamma Ilinniagartuut Kattuffiat (ASG) Siunnersuisoqatigiinnut sinniisunik 2-nik kingoraartissaannillu 2-nik ataatsimoorussaminnik toqqaassapput.
Imm. 3. Siunnersuisoqatigiit qinigaaffimmi ukiunik 4-nik sivisussuseqartumi atuutissapput.
Imm. 4. Siunnersuisoqatigiit akunnerminni siulittaasup tullissaanik qinersissapput. Siulittaasup tulliata siulittaasoq ataatsimeeqataanngippat ataatsimiinneq aquttassavaa.
Imm. 5. Uku aalajangersimasumik taaseqataasinnaanngitsunik peqataatitaqassapput:
1) Ilaqutariinnermut Pisortaqarfik.
2) Inuussutissarsiornermut Pisortaqarfik.
3) Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik.
4) Kalaallit Nunaanni Naatsorsueqqissaartarfik.
Imm. 6. Siunnersuisoqatigiit imm. 5-mi taaneqartut saniatigut immikkut ilisimasalinnik aammalu ataatsimiinnermi suliarineqartut ataasiakkaat pillugit paasisimasalinnik taaseqataasinnaanatik ataatsimeeqataasunik peqataatitaqarsinnaapput.
Ataatsimiinnerit
§ 4. Siunnersuisoqatigiit ukiumut minnerpaamik 2-riarlutik ataatsimiittassapput.
Imm. 2. Siunnersuisoqatigiit immikkut ittumik ataatsimiittassapput
1) Naalakkersuisut piumasarippassuk,
2) siulittaasup pisariaqartippagu, imaluunniit
3) ilaasortat amerlanerussuteqartut siunnersuutigippassuk.
Suleriaasissaq
§ 5. Naalakkersuisut Siunnersuisoqatigiit suleriaasissaat aalajangissavaat.
Allattoqarfik
§ 6. Suliffeqarnermut Inuussutissarsiutinullu Ilinniartitaanermut Pisortaqarfik Siunnersuisoqatigiit allattoqarfigissavaat.
Imm. 2. Allattoqarfiup suliassai Inuussutissarsiornermut Pisortaqarfimmut aamma Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmut ataqatigiissarneqassapput.
Aningaasalersorneqarnera
§ 7. Siunnersuisoqatigiinnut ilaasortaaneq akissarsiaqarfiunngilaq. Siunnersuisoqatigiit suliaannut, tamatuma ataani angalanermi, tassungalu atatillugu najugaqartinneqarnermi, aningaasartuutit Suliffeqarnermut Inuussutissarsiutinullu Ilinniartitaanermut Pisortaqarfimmit akilerneqartassapput.
Atortuulersitsinermik atorunnaarsitsinermillu aalajangersakkat
§ 8. Nalunaarut 8. april 2007 aallarnerfigalugu atortuulersinneqarpoq.
Imm. 2. Ilutigalugu Namminersornerullutik Oqartussat Piginnaasat ineriartortinnissaat pillugu siunnersuisoqatigiit pillugit nalunaarutaat nr. 5, 22. marts 2004-meersoq aamma Namminersornerullutik Oqartussat Sulisitsisut inuutissarsiutinut ilinniartitaanermut akiliutaat pillugit ataatsimiititaliaq (AEB-nævn) pillugu nalunaarutaat nr. 4. 22. marts 2004-meersoq atorunnaarsinneqarput.
Namminersornerullutik Oqartussat, ulloq 8. marts 2007
Siverth K. Heilmann/
Palle Frederiksen