3. oktober 2006

UKA 2006/26

 

Kommunalbestyrelsit, nunaqarfinni aqutsisut il.il. pillugit Inatsisartut inatsisaata allanngortinneqarnera pillugu Inatsisartut inatsisissaattut siunnersuut

pillugu

Inatsisartut Inatsisit Atortinneqarnerannut Ataasimiititaliaata

ISUMALIUTISSIISSUTA

Siunnersuutip aappassaaneerneqarnerani saqqummiunneqartoq

Inatsisartut Inatsisit Atortinneqarnerannut Ataatsimiititaliaa suliarinninnermini ukuninnga inuttaqarpoq:

Inatsisartunut ilaasortaq Olga P. Berthelsen, Inuit Ataqatigiit (Siulittaasoq)
Inatsisartunut ilaasortaq Vittus Mikaelsen, Siumut
Inatsisartunut ilaasortaq Agnethe Davidsen, Siumut
Inatsisartunut ilaasortaq Lene Knüppel, Demokraatit
Inatsisartunut ilaasortaq Godmand Rasmussen, Atassut

Inatsisissatut siunnersuut UPA 2006/56-imik suliarinninnermi Inatsisartut aalajangernerannut tamakkiisumik naapertuuttuummat Inatsisartut Inatsisit Atortinneqarnerannut ataatsimiititaliaata oqaatigissavaa.

Inatsisissatut siunnersuut KANUKOKA-mut tusarniaassutigineqarsimasoq Inatsisartut Inatsisit Atortinneqarnerannut ataatsimiititaliap ilanngullugu oqaatigissavaa. Kommunalbestyrelsini ataatsimiititalianilu ataatsimiinnerit oqarasuaatikkut ataatsimiinnertut ingerlanneqartalenissaannut inatsisitigut tunngavissamik kommunit naliginnaasumik kissaateqarnikuusut KANUKOKA-p tusarniaanermut akissuteqaammini ilisimatitsissutigaa. Aaqqissuusseqqinnermut ataatsimiititialiap inassuteqaataannut siunnersuut naapertuuttuummat aammattaaq KANUKOKA-p maluginiarpaa. Taamaammat siunnersuut kattuffiup tapersersorpaa. Kiisalu Nunaqarfinni aqutsisut ataatsimiinneri oqarasuaatikkut ataatsimiinnertut ingerlanneqarsinnaasariaqartut KANUKOKA-p siunnersuutigaa. Siunnersuut taanna maleruagassani atuuttuni ilaatinneqareersoq Inatsisit Atortinneqarnerannut Ataatsimiititaliamit oqaatigineqassaaq.

Tamanna tunngavigalugu siunnersuut Inatsisit Atortinneqarnerannut ataatsimiititaliamit ilassilluarneqarpoq kiisalu Inatsisartut upernaakkut ataatsimiinnermi aalajangiussaat Naalakkersuisut sukkasuumik malitseqartitsissimammassuk nuannaarutigineqarpoq.

Taama oqaaseqarluni Inatsisit Atortinneqarnerannut Ataatsimiititaliap isumaqatigiittup siunnersuut akuerineqassasoq inassutigaa.

 

	Olga P. Berthelsen Siulittaasoq
Vittus Mikaelsen		Agnethe Davidsen
Lene Knüppel		Godmand Rasmussen