4. august 2006 UKA 2006/26
Inatsisissatut siunnersuummut nassuiaatit
Nassuiaatit nalinginnaasut
1. Aallarniut:
2006-imi upernaakkut ataatsimiinnermi Inatsisartut isumaqatigiissut aalajangerput kommunalbestyrelsit, nunaqarfinni aqutsisut il.il. pillugit Inatsisartut inatsisaat nr. 20, 3. november 1994-imeersoq (aqutsinissamut inatsit) kingusinnerusukkullu allannguuteqartinneqarsimasoq allanngortinneqassasoq taamaalilluni kommunit ataatsimiititaliaasa ataatsimiinnerini peqataaneq oqarasuaat atorlugu pisinnaanngorlugu.
Taanna aallaavigalugu aammalu aaqqissuussaanermut ataatsimiititaliap isumaliutissiissutaa tunngavigalugu Naalakkersuisut isumaqarput attaveqaateqarnermi teknologiit nutaat atorlugit ataatsimiinnerit ingerlanneqarnissaannut kommunit qularnaarunneqartariaqartut.
Taamaattumik Naalakkersuisut siunnersuutigaat kommunit ataatsimiititaliaanni kommunalbestyrelsinilu ilaasortat oqarasuaatinik nalunaarasuartaateqarnermilu attaveqaatinik allanik, soorlu assersuutigalugu video atorlugu ataatsimeeqataassutaasinnaasut, internet il.il., atuinissamut qularnaarunneqassasut.
2. Siunnersuutip immikkoortui pingaarnerit
Siunnersuutikkut anguniagaq pingaarneq tassaavoq nalunaarasuartaateqarnermi attaveqaatit atorneqarnerisigut akikinnerusumik, sukkanerusumik eqaannerusumillu naalakkersuinikkut suliassanik suliarinnittalernissamik kissaateqarnerup naammassineqarnissaa, ilaatigut nunami sumiiffinni isorartussutsit teknikkikkullu periarfissat pissutigalugit.
Kommuninik aaqqissuusseqqilluni sulinermi ingerlanneqartumi kissaatigineqarpoq innuttaasunik sullissinermi kommunit periarfissaat pitsaanerulersinneqassasut ilaatigut IT-teknologii atorlugu, tamatumuunalu kommunini ataasiakkaani suleriutsit nutaat aqutsinissamut inatsisikkut killilersorneqarunnaarnissaat. Taamaattumik inatsisissatut siunnersuutip siunertaraa kommunini siulersuisut sulinerminni periarfissaasa siunissamut naleqqussarneqarnissaat. Siunnersuutikkut aqutsinissamut inatsit malillugu nammineq najuunnikkut ataatsimiinnermi peqataanissamik maleruagassaq pingaarneq attatiinnarneqarpoq, taamaalilluni nalunaarasuartaateqarnikkut attaveqaatit atorlugit ataatsimiinnermi peqataanerit qaqutiguinnaq pisartussanngorlugit.
Nalunaarasuartaateqarnikkut attaveqaatit atornissaannut kommunit periarfissinneqarnerisigut paasisimalikkat tunngavigalugit aqutsinissamut inatsisip tamakkiisumik iluarsaanneqarnissaanut atatillugu maleruagassamik allannguinissamut tunngavissat isummerfigineqarumaarput.
3. Aningaasaqarnikkut allaffissornikkullu pisortanut kinguniusussat:
Naalakkersuisut siunnersuutaat kommunit aningaasartuuteqarnerulernissaannik kinguneqassangatinneqanngilaq. Ataatsimiinnermi peqataanissamut nalunaarasuartaateqarnikkut attaveqaatinik atuinissamut periarfissat pillugit siunnersuut kommunalbestyrelsimi aamma ataatsimiititaliani ilaasortat angalanerinut aningaasartuutit killiliiffiginerisigut kommunini ileqqaaruteqarnissamik nassataqarsinnaavoq.
4. Aningaasaqarnikkut allaffissornikkullu inuussutissarsiutinik ingerlatalinnut kinguniusussat:
Inatsisissatut siunnersuut atorluaanerunissamut periarfissiissaaq suliassanillu suliarinnittarneq pilertornarnerulersissallugu.
5. Avatangiisinut pinngortitamullu kinguniusussat:
Tassunga oqaaseqaatissaqartoqanngilaq.
6. Allaffissornikkukt innuttaasunut kinguniusussat:
Inatsisissatut siunnersuutip allaffissornikkut kingunerisassaanut aalajangiisuussaaq nalunaarasuartaateqarnikkut attaveqaatinik atuinissamut periarfissamik kommunit qanoq annertutigi-sumik atuinerat. IT-teknologiip nutaap atornissaanut periarfissat nassatarisinnaavaat aalajangiiniarnerup pilertornerulerlunilu eqaannerulernissaa, tamatumalu nassatareqqissinnaallugu suliassanik suliarinnittarnermi allaffissornikkut atorluaanerulerneq tamatumalu nassatarissalluguttaaq innuttaasunik sullissinerup pitsaanerulernera.
7. Kinguniusussat pingaaruteqarnerit allaasinnaasut:
Tassunga oqaaseqaatissaqartoqanngilaq.
8. Naalagaaffeqatigiinnermut namminersornermullu tunngasut:
Tassunga oqaaseqaatissaqartoqanngilaq.
9. Oqartussaasunut kattuffinnullu tusarniaanerit:
Inatsisissatut siunnersuut kommuninut aamma kanukoka-mut ulloq 2. junimiit ulloq 20. juli 2006 tungaanut tusarniaassutigalugu nassiunneqarsimavoq.
Tusarniaanermut akissutini takuneqarsinnaavoq, kommunalbestyrelsit ataatsimiititaliallu ataatsimiinnerini ilaanakuusumik tamakkiisumilluunniit oqarasuatit atorlugit ataatsimiissinnaanerinut inatsisitigut tunngavissaqarnissaq kommuninit nalinginnaasumik kissaatigineqartoq. Taamaattumik kattuffiup allannguutissatut siunnersuut isumaqatigisinnaavaa.
Kanukoka aamma isumaqarpoq, allannguinermut nunaqarfinni aqutsisut ataatsimiittarneri aamma ilaasariaqartut, aammattaaq siunnersuut Aqqissuussaanermut Isumalioqatigiissitap inassuteqaataanut naapertuuppoq.
Aqutsineq pillugu inatsimmi § 50-mi takuneqarsinnaavoq, nunaqarfinni aqutsisut sulinissaannut maleruagassat nunaqarfinnut aqutsisut suleriaasissaanni kommunalbestyrelsimit aalajangersarneqassasut. Aammattaaq takuneqarsinnaavoq, kapitali 2-mi kommunalbestyrelsimut maleruagassatut aalajangersakkanik allaasumik maleruagassanik aalajangersaasoqarsinnaanngilaq makkunani, ataatsimiinnerit allaganngorlugit imaqarniliorneqarnissaannut pisussaatitaaneq, suliassani aalajangersimasuni aalajangeeqataasinnaatitaannginnermut maleruagassat aamma ikinnerussuteqarluni oqaaseqaatit imaqarniliami allanneqarinissaannik piumasaqaateqarnissamut pisinnaatitaaffik.
Taamaalilluni allannguutissatut siunnersuutigineqartumi, nunaqarfimmi aqutsisut sulinissaannut maleruagassani nalunaarasuartaateqarnikkut attaveqaatinik ataatsimiinnerni pisariaqartitsineq malillugu atuisinnaanermut periarfissanut kommunalbestyrelsi aalajangersaasinnaalissaaq.
Inatsisissatut siunnersuummi aalajangersakkanut ataasiakkaanut nassuiaatit
§ 1-imutNr. 1-imut
Aqutsinissamut inatsit maannakkut atuuttoq malillugu aalajangersagaavoq kommunalbestyrelsip ataatsimiinnerini ataatsimiinnermi peqataaneq nammineq najuunnikkut taamaallaat pisinnaasoq.Allannguutissatut siunnersuutigineqartoq kommunalbestyrelsimi ilaasortat nalunaarasuartaateqarnermi attaveqaatit, soorlu assersuutigalugit video atorlugu ataatsimeeqataassutaasinnaasut, internet il.il., atorlugit kommunalbestyrelsip ataatsimiinnerini peqataasinnaanerat pillugu aalajangiinissamut tunngavissiivoq. Tamatuminnga ilaasortat ataasiakkaat qinnutiginninnerat malillugu pisuni ataasiakkaani kommunalbestyrelsi nammineq aalajangiisassaaq.
Nalunaarasuartaateqarnermi attaveqaatit atorlugit ataatsimiinnerni peqataanissamut periarfissanik kommunit atuisut qularnaassavaat kommunalbestyrelsip suleriaasissaata pisariaqarnera malillugu naleqqussarneqarnissaa.
Nr. 2-mut
Aalajangersakkakkut aalajangiinernut imaqarniliat ataatsimiinnermi peqataasunit, matumanittaaq oqarasuaat imaluunniit nalunaarasuartaateqarnermi attaveqaatit allat atorlugit peqataasimasunit, atsiorneqarnissaat borgmesterip qularnaassagaa aalajangersarneqarpoq. Tamanna assersuutigalugu faxi, atortoq digitaliusoq allaluunniit atsiornerup eqqortuuneranik takutitsisoq atorlugu pisinnaavoq.Nr. 3-mut
Aqutsinissamut inatsit maannakkut atuuttoq malillugu aalajangersagaavoq ataatsimiititaliat ataatsimiinnerini ataatsimiinnermi peqataaneq nammineq najuunnikkut taamaallaat pisinnaasoq.Allannguutissatut siunnersuutigineqartoq ataatsimiititaliami ilaasortat nalunaarasuartaateqarnermi attaveqaatit, soorlu assersuutigalugu video atorlugu ataatsimeeqataassutaasinnaasut, internet il.il. atorlugit ataatsimiititaliap ataatsimiinnerini peqataasinnaanerat pillugu aalajangiinissamut tunngavissiivoq. Tamatuminnga ilaasortat ataasiakkaat qinnutiginninnerat malillugu pisuni ataasiakkaani ataatsimiititaliaq nammineq aalajangiisassaaq.
Nalunaarasuartaateqarnermi attaveqaatit atorlugit ataatsimiinnermi peqataanissamut periarfissanik kommunit ataatsimiititaliaat atuisut qularnaassavaat ataatsimiititaliap suleriaasissaata pisariaqarnera malillugu naleqqussarneqarnissaa.
Nr. 4-mut
Aalajangersakkakkut aalajangiinernut imaqarniliat ataatsimiinnermi peqataasunit, matumanittaaq oqarasuaat imaluunniit nalunaarasuartaateqarnermi attaveqaatit allat atorlugit peqataasimasunit, atsiorneqarnissaat ataatsimiititaliap siulittaasuata qularnaassagaa aalajangersarneqarpoq. Tamanna assersuutigalugu faxi, atortoq digitaliusoq allaluunniit atsiornerup eqqortuuneranik takutitsisoq atorlugu pisinnaavoq.
§ 2-mutInatsisartut inatsisaat atortuulerpoq ulloq 1. januar 2007.