7. maj 2006

UPA 2006/98

 

Uunga siunnersuut: Inatsisartut Naalakkersuisullu pillugit Inatsisartut inatsisaata allanngortinneqarneranik Inatsisartut inatsisaat nr. xx. ulloq xx. 2006-imeersoq.
(Aktieselskabit Namminersornerullutik Oqartussanit tamakkiisumik ilaannakuusumilluunnit pigineqartut pillugit Inatsisartut paasitinneqarsinnaatitaanerat)

 

§ 1.

Inatsisartut Naalakkersuisullu pillugit Inatsisartut inatsisaanni nr. 11, 20. oktober 1988-imeersumi, kingullermik Inatsisartut inatsisaatigut nr. 18, 11. december 2003-imeersukkut allanngortinneqartumi, makku allanngortinneqassapput:

1. § 16-ip kingorna ilanngunneqassapput:
"§ 16 a. Aktieselskabini Namminersornerullutik Oqartussanit tamakkiisumik ilaannakuusumilluunniit pigineqartuni aningaasaliinissamik qularnaveeqqusiinissamilluunniit siunnersuutinik qinnuteqaatinilluunniit ataatsimiititaliap suliarinninnerani atugassatut ingerlatseqatigiiffimmit pineqartumit, pisariaqarpat aktieselskabit pillugit inatsimmi ingerlatseqatigiiffiulluunniit malittarisassaani periarfissiissutaasut atornerisigut, paasissutissanik erseqqinnerusumik nalunaakkanik pissarsiniarnissamik Aningaasaqarnermut Ataatsimiititaliap Naalakkersuisut peqqusinnaavai. Ataatsimiititaliap kaammattuineratigut paasissutissat Naalakkersuisut pissarsiatik kinguarsaanertaqanngitsumik ataatsimiititaliamut atugasiissutigissavaat.
Imm. 2. Paasissutissat ataatsimiititaliamit pisariaqartutut nalilerneqartut tigunissaasa tungaannut siunnersuutinik qinnuteqaatinilluunniit imm. 1-imi taaneqartunik suliarinninnini ataatsimiititaliap unitsikkallarsinnaavaa.
Imm. 3. Paasissutissat isertuussassatut tunniunneqarsimappata ataatsimiititaliami ilaasortat allallu ataatsimiititaliap oqaluuserinninnerani najuuttut imm. 1 naapertorlugu ataatsimiititaliami ilisimalikkaminnik isertuussinissaminnut pisussaatitaapput. Nutaatut ilaasortanngortoq kinaluunniit pisussaaffimmik tamatuminnga eqquutsitsinissamik uppernarsaalluni atsiussaaq."

2. § 17-ip kingorna ilanngunneqassapput:
"§ 17 a. Kalaallit Nunaanni Namminersornerullutik Oqartussat aktiaatilittut soqutigisaannik Naalakkersuisut isumaginninnerannik Landskarsip Naatsorsuutaasa Kukkunersiorneqartarnerannut Ataatsimiititaliaq aamma nakkutilliisuuvoq.
Imm. 2. Aktieselskabit Namminersornerullutik Oqartussanit tamakkiisumik ilaannakuusumilluunniit pigineqartut ingerlatsivigineqarneranni aningaasaqarnikkut innimigisassanik Naalakkersuisut naleqquttumik qulakkeerinninniarsimanersut ataatsimiititaliap imm. 1 naapertorlugu nakkutilliinerminut ilaatillugu nalilersorsinnaavaa.
Imm. 3. Aktieselskabini Namminersornerullutik Oqartussanit tamakkiisumik ilaannakuusumilluunniit pigineqartuni Kalaallit Nunaanni Namminersornerullutik Oqartussat aktiaatilittut soqutigisaannik ataatsimiititaliap nakkutilliinermini atugassatut ingerlatseqatigiiffimmit, pisariaqarpat aktieselskabit pillugit inatsimmi ingerlatseqatigiiffiulluunniit malittarisassaani periarfissiissutaasut atornerisigut, paasissutissanik erseqqinnerusumik nalunaakkanik pissarsiniarnissamik Naalakkersuisut peqqusinnaavai. Ataatsimiititaliap kaammattuineratigut paasissutissat Naalakkersuisut pissarsiatik kinguarsaanertaqanngitsumik ataatsimiititaliamut atugasiissutigissavaat.
Imm. 4. Ataatsimiititaliami ilaasortaq kinaluunniit aalajangiiffigisassatut siunnersuummik Naalakkersuisut aalajangiiffigisassaannik imm. 2 3-lu naapertorlugit saqqummiussisinnaavoq. Inatsisartunut ilaasortat ikinnerpaamik 2/5-liisa siunnersuut isumaqatigalugu taasippata siunnersuut akuersissutigineqartutut isigineqassaaq. Siunnersuummut allannguutissatut siunnersuummik saqqummiussisoqarsinnaanngilaq.
Imm. 5. Paasissutissat isertuussassatut tunniunneqarsimappata ataatsimiititaliami ilaasortat allallu ataatsimiititaliap oqaluuserinninnerani najuuttut imm. 1 naapertorlugu ataatsimiititaliami ilisimalikkaminnik isertuussinissaminnut pisussaatitaapput. Nutaatut ilaasortanngortoq kinaluunniit pisussaaffimmik tamatuminnga eqquutsitsinissamik uppernarsaalluni atsiussaaq. Pissutsinik Kalaallit Nunaanni Namminersornerullutik Oqartussat aktiaatillittut soqutigisaannut tunngassunik Inatsisartut ilisimatitsissuteqarfigineqarnissaat ataatsimiititaliap pisariaqartutut isigiguniuk ataatsimiititaliaq immikkuullarissumik isumaliutissiissuteqassaaq. Isumaliutissiissut paasissutissanik isertuussassanik imaqarpat matoqqasumik ataatsimiinnermi oqaluuserineqassaaq."

 

§ 2.

Inatsisartut inatsisaat atuutilissaaq ulloq 1. januar 2007.

Namminersornerullutik Oqartussat ulloq xx.xx. 2006

Hans Enoksen

/

Kaj Kleist