25. oktober 2006

UKA2006/18

 

Inatsisartut Naalakkersuisullu pillugit Inatsisartut inatsaata allanngortinneqarnissaanut Inatsisartut inatsisissaattut siunnersuut
(Aktieselskabit Namminersornerullutik Oqartussanit tamkkiisumik ilaannakuusumilluuniit pigineqartut pillugit Inatsisartut paasitinneqarssinnaatitaanerat)

pillugu

Inatsisartut Inatsisit Atortinneqarnerannut ataatsimiititaliaata

Isumaliutissiissutaa

siunnersuutip aappassaaneerneqarnerani saqqummiunneqartoq

Inatsisartut Inatsisit Atortinneqarnerannut Ataatsimiititaliaat sulliarinninnermini ukuninnga inuttaqarpoq:

Inatsisartunut ilaasortaq Olga P. Berthelsen, Inuit Ataqatigiit (siulittaasoq)
Inatsisartunut ilaasortaq Vittus Mikaelsen, Siumut
Inatsisartunut ilaasortaq Agnethe Davidsen, Siumut
Inatsisartunut ilaasortaq Otto Jeremiassen, Siumut, sinniisussaq
Inatsisartunut ilaasortaq Lene Knüppel, Demokraatit
Inatsisartunut ilaasortaq Jens B. Frederiksen, Demokraatit, sinniisussaq
Inatsisartunut ilaasortaq Godmand Rasmussen, Atassut

1. Siunnersuutip tuniliaqutaa:

Landskarsip naatsorsuutaanut suliffeqarfinnullu nammineertitanut malittarisassat atuuttut malillugit Kukkunersiuinermut Ataatsimiititaliaq kisimi paasissutissanik pissarsisinnaatitaavoq. Aktieselskabilli Namminersornerullutik Oqartussanit pigineqartut Kukkunersiuinermut Ataatsimiititaliap nakkutigisaannut ilaanngillat. Taamaattumik suliffeqarfiit pisortanit pigineqartut 90-ikkunni aktieselskabinngortiterneqarnerat ilutigalugu Namminersornerullutik Oqartussat naliliutai pillugit Inatsisartut paasissutissinneqartarnerat kigaatsumik annikilliartorsimavoq.

Inatsisartut aningaasaliisinnaassuseqarlutillu qanorlu atorneqarnersut nakkutigisinnaammatigit, 2000-imi ukiaanerani ataatsimiinnermi Kukkunersiuinermut ataatsimiititaliaq nalunaarusiamik saqqummiussaqarpoq, tassani ataatsimiititaliamit oqaatigineqarpoq tamat oqartussaaqataanerannut tunngavissarititaasunut nalinginnaasumik akuerineqartunut tamanna naapertuutinngilluinnartoq. Tamanna tunngavigalugu Kukkunersiuinermut Aataatsimiititaliap oqartussaassuseqarnerata annertusineqarnissaa Kukkunersiuinermut Ataatsimiititaliamit ujartorneqarpoq. Ataatsimiititaliaq ukiaanerani 2001-imi ataatsimiinnermi ajornartorsiut taanna malitseqartillugu aalajangiiffigisassatut siunnersuummik saqqummiussivoq.

Kukkunersiuinermut Ataatsimiititaliap aalajangiiffigisassatut siunnersuutaata suliarinerani Kukkunersiuinermi Ataatsimiititaliap tunngaviusumik isummersuutaanut Inatsisartut tapersiippuut. Aktieselskabit Namminersornerullutik Oqartussanit pigineqartut ingerlanneqarneranni misilittakkat takutippaat, Namminersornerullutik Oqartussat aktie-nik piginnittutut soqutigisaasa aallunneqarnerat nukittorsarneqartariaqartoq, inatsisartoqarnikkut nakkutilliinerit pitsanngorsarneri kiisalu Naalakkersuisut aktietilittut isumaginninnerannut sinaakkutit pitsanngorsarneqarneri aqqutigalugit.

Inatsisartut ukiaanerani 2004-imi ataatsimiinneranni Inatsisartut Naalakkersuisullu pillugit Inatsisartut inatsisaata kiisalu aktieselskabit Namminersornerullutik Oqartussanit tamakkiisumik imaluunniit ilaannakuusumilluunniit pigineqartut pillugit Inatsisartut paasitinneqarsinnaatitaanerat pillugu (UPA 2004/51) allanngortinneqarnerannik Inatsisartut inatsisissaattut siunnersuutinik Kukkunersiuinermut ataatsimiititaliaq annertunerusumik malitseqartitsilluni saqqummiussivoq.

Inatsisartut Naalakkersuisullu pillugit Inatsisartut inatsisaata sukumiinerusumik nutarterneqarnissaata pisariaqassusaa nassuerutigalugu, Inatsisartut ukiaanerani 2004-imi ataatsimiinnermi Inatsisartut Naalakkersuisullu pillugit Inatsisartut inatsisaannut siunnersuusiortussanik suleqatigiissitamik suliaqartussamik pilersitsinissaq aalajangiuppaat. Suleqatigiissitap suliakkerneqassutaani aalajangersarneqarput, UPA 2004/51-imi tunngavissarititat ilanngunneqarnissaat sapinngisamik suleqatigiissitamit qulakkeerniarneqasssasut.

Suleqatigiissitamut suliakkiissutip allanngortinneqarnissaa Inatsisartut ukiakkut 2005-imi ataatsimiinnermi aalajangiipput. Aktieselskabit Namminersornerullutik Oqartussanit tamakkiisumik ilaannakuusumilluunniit pigineqartut pillugit Inatsisartut paasitinneqartarnissaannut tunngasunut ajornartorsiutit sukkanerusumik suliarineqartarnissaat suleqatigiissitamit salliutinneqassasut suliakkiissummi allanngortinneqarsimasumi ilaatinneqarpoq.

Taamaalilluni tassunga naapertuuttumik suleqatigiissitap upernaakkut 2006-imi ataatsimiinnermi inatsisissatut siunnersuut siullermeerneqartoq suliaraa.

2. Siunnersuutip pingaarnertut imarisai:

Kukkunersiuinermut Ataatsimiititaliap suliaasa pisinnaatitaaffiisalu annertusineqarnissaat siunnersuutip nassataraa. Taamaalilluni Namminersornerullutik Oqartussat aktie-nik piginnittutut soqutigisaannik Naalakkersuisut ingerlassinerata nakkutigineqarnera Kukkunersiuinermut Ataatsimiititaliap aamma suliassarilissavaa.

Kukkunersiuinermut Ataatsimiititaliaq periarfissaqalissaaq - nakkutilliinermut tassunga ilanngullugu – aktieselskabit Namminersornerullutik Oqartussanit tamakkiisumik ilaannakuusumilluunniit pigineqartut ingerlanneqarneranni aningaasaqarnikkut mianerisassat, qanoq annertutigisumik Naalakkersuisunit naammaginartumik qulakkeerniarneqarsimanersut nalilersuisinnaanngussalluni. Naliliineq ingerlatsinermik kukkunersiuinertut isikkoqarpoq, ingerlatseqatigiiffiilli ingerlanneqarnerannut toqqaannartumik sammitinneqarani Naalakkersuisulli ingerlatseqatigiiffiit ingerlatsinerini (aktie-tililittut) nakkutilliinerannut sammitinneqarluni.

Namminersornerullutik Oqartussat aktietilittut soqutigisaasa Naalakkersuisunit isumagineqarnerannut Kukkunersiuinermut Ataatsimiititaliap nakkutilliineranut atugassatut, Kukkunersiuinermut ataatsimiititaliaq aktieselskabit (tamakkiisumik ilaannakortumilluunniit pigineqartut) pillugit paasissutissanik aalajangersimasunik pissarsinissamik Naalakkersuisunut peqqusisinnaalersinneqarpoq. Paasissutissanik kissaatigineqartunik aktieselskabit nammineerlutik tunniussiumanngippata, aktieselskabit pillugit inatsimmi imaluunniit ingerlatsiviup malittarisassaani tunngavilerneqartumik periarfissat matumani atorneqarsinnaasut atorlugit aktieselskabit misilillugu pinngitsaaliniarneqarnissaannik Kukkunersiuinermut Ataatsimiititaliap Naalakkersuisut peqqusinnaavai. Namminersornerullutik Oqartussat aktietilittut aalajangiisuusumik sunniuteqarnerannut tamanna Naalakkersuisunit piviusunngortissinnaanersoq apeqqutaavoq. Aktieselskabini Namminersornerullutik Oqartussat kisimiillutik aktie-teqarfigisaanni Naalakkersuisut tunngaviusumik paasissutissanik killeqanngitsumik pissarsisinnaapput. Illuatugaatigulli aktieselskabinit Namminersornerullutik Oqartussat ilaannakuusumik piginneqataaffigineqartunit atortussanik paasissutissanillu pissarsiniarsinnaaneq Naalakkersuisut tamatigut naammassisarsinnaanngilaat. Tamanna piginneqataasut allat soqutigisaannut akaarinninnermik tunngaveqarpoq.

Taakku paasissutissat Naalakkersuisunit aaneqarsinnaasut Ataatsimiititaliamut ingerlaannaq ingerlateqqinneqassapput.

Ikinnerussutillit illersorneqarnissaanik siunnersuut imaqarpoq.

Aktieselskabinik Namminersornerullutik Oqartussanit pigineqartunik Naalakkersuisut nakkutiginninnerat pillugu ingerlatsinermik kukkunersiuinissaq Kukkunersiuinermut Ataatsimiititaliami amerlanerussuteqarfigineqanngippat, ataatsimiititaliami ilaasortaq ataaseq ingerlatsinermik kukkunersiuinissamik kissaateqaruni, inatsisartunut tamarmiusunut siunnersuummik saqqummiussisinnaavoq. Inatsisartuni ilaasortat ikinnerpaamik 2/5-iisa (tassa inatsisartuni ilaasortat 13-init) isumaqatigippassuk siunnersuut akuersissutigineqartutut isigineqassaaq.

Periarfissamuttaaq tunngatillugu, aktieselskabinit Namminersornerullutik Oqartussanit pigineqartunit paasissutissanik Naalakkersuisut pissarsiniaqquneqarsinnaanerannik periarfissaqartoqarpoq. Paasissutissanik pissarsinissamik Naalakkersuisut peqquneqarnissaannut Kukkunersiuinermut Ataatsimiititaliami amerlanerussuteqartoqanngippat, ataatsimiititaliamut ilaasortaq ataaseq inatsisartunut tamarmiusunut siunnersuummik saqqummiussisinnaavoq. Inatsisartuni ilaasortat ikinnerpaamik 2/5-iisa sumaqatigippaasuk siunnersuut akuersissutigineqartutut isigineqassaaq.

Aktieselskabinut Namminersornerullutik Oqartussanit pigineqartunut tunngatillugu paasissutissat pissarsiarinissaat pineqartillugu, ikinnerussuteqartut illersorneqarsinnaanerat atuuttoq eqqarsaatigalugu siunnersuummi ikinnerussuteqartunik illersuisinnaaneq ajorneruvoq. Kukkunersiuinermut Ataatsimiititaliap Landskarsip naatsorsuutaanik misissuataarinninnermini, Kukkunersiuinermut Ataatsimiititaliami ilaasortaq ataaseq malittarisassat ullumikkut atuuttut malillugit paasissutissanik atortussanillu pissarsiniartoqarnissaanik piumasaqarnissamut periarfissaqarpoq – aamma paasissutissanik pineqartunik aallertoqarnissaa pisariaqanngitsoq ataatsimiititaliami amerlanerussuteqartut isumaqaraluarpataluunniit. Aktieselskabit pillugit paasissutissat pineqarpata pisinnaatitaaffik taanna ilaasortanut ataasiakkaanut atuutinngilaq.

Niuernermi periutsitsini paasissutissat isertuussat unammillertinut anngukkaagata aktieselskabinut akornusisinnaapput. Taamaammat siunnersuut aalajangersakkamik imaattumik aamma imaqarpoq: Kukkunersiuinermut ataatsimiititaliami ilaasortat (kiisalu allatsi oqalutsilu il.il.) paasissutissanik ataatsimiititaliamut isertuartumik tunniunneqarsimasunik isertuussinissamut pisussaatitaapput. Namminersornerullutik Oqartussat aktietilittut soqutigisaannut pissutsinut tunngasut pillugit Inatsisartut paasitinneqartariaqartoq Ataatsimiititaliaq isumaqarpat tamanna isumaliutissiissusiornikkut ingerlanneqassaaq, isumaliutissiissullu paasissutissanik isertuussassanik imaqarpat Inatsisartunit taanna matoqqasumik suliarineqassaaq.

Aktieselskabimut Namminersornerullutik Oqartussanit tamakkiisumik ilaannakuusumilluunniit pigineqartumut Namminersornerullutik Oqartussat aningaasaliissuteqassatillugit kiisalu sulianut assigusunut qularnaveeqqusiinissanut suliassani ataatsimiititaliap isummerfigisassaanni suliassani Ataatsimiititaliap isummerfigisassaanni Aningaasaqarnermut Ataatsimiitialiap paasitinneqarsinnaatitaaneranik siunnersuut aalajangersakkamik imaqarpoq.

Aalajangersagarli Aningaasaqarnermut Ataatsimiititaliap pisinnatitaaffiisa pioreersut annertusinerannik kinguneqassanngilaq, kisiannili tamakku ersarissarniarlugit taamaalilluni aningaasaliissutinut qularnaveeqqusiinernullu attuumasutilinnut Inatsisartutigut nakkutiginninnerup imminermini nukittorsarneqaataassallutik.

Aktieselskabit Namminmersornerullutik Oqartussanit pigineqartut (tamakkiisumik ilaannakuusumilluunniit) pillugit paasissutissanik aalajangersimasunik ujarlernissamut Naalakkersuisunut peqqusisinnaasutut aalajangersagaq Aningaasaqarnermut Ataatsimiititaliaq pisussaaffiliivoq. Paasissutissanik kissaatigineqartunik aktieselskabit nammineerlutik tunniussiumanngippata, Aningaasaqarnermut Ataatsimiititaliap Naalakkersuisut peqqusinnaavai, aktieselskabit pillugit inatsimmi imaluunniit ingerlatsiviup malittarisassaani tunngavissaqarpata aktieselskabinut pinngitsaaliilluni periarfissarititat atorneqarnissaat. Tamanna Aningaasaqarnermut ataatsimiititaliap isummerfigisassaanni aktieselskabimut pineqartumut Namminersornerullutik Oqartussat aningaasaliissuteqassatillugit kiisalu sulianut takkununnga assigusunut qularnaveeqqusiisussaatillugit, suliassanut eqqaaneqarsimasunut taamaallaat atuuppoq.

Taakku paasissutissat Naalakkersuisunit pissarsiarineqarsimasut Aningaasaqarnermut Ataatsimiititaliamut ingerlaannaq ingerlateqqinneqassapput.

Aningaasaqarnermut Ataatsimiititaliap ataatsimiititaliami suliarinninneq unitsissinnaaga paasissutissat kissatigineqartut saqqummiunneqarserlugit aalajangersakkami ilanngullugu naqissuserneqarpoq. Tamannali nutaarsiassaanngilaq - periarfissaq ataatsimiititaliamit pigineqareermat. Periarfissarli inatsimmi ersarissumik tunngavissaqarpat, aalajangiussinissamut tunngavissanik naammanngitsunik tunngaveqartumik sukkasuumik aalajangiussisussaatillugu Aningaasaqarnermut Ataatsimiitialiap tatineqarsinnaanera annikinnerulissaaq.

Naggataagut Aktieselskabit Namminersornerullutik Oqartussanit pigineqartut pillugit ataatsimiititaliamit pissarsiarineqartut, paasissutissat tunniunneqartut isertuussasaatillugit, Aningaasaqarnermut ataatsimiititaliami ilaasortat (allatsi aamma oqalutsi il.il.) isertuussisussaatitaammata aalajangersagaq pisussaaffiliivoq.

3. Kukkunersiuinermut ataatsimiititaliamit kiisalu Aningaasaqarnermut Atatsimiititaliamit oqaaseqaatit pissarsiarineqarsimasut.

Kukkunersiuinermut Ataatsimiititaliamit kiisalu Aningaasaqarnermut Ataatsimiititaliamit oqaaseqaatinik Inatsisit Atortinneqarnerannut Ataatsimiititaliaq pissarsisimavoq. Ataatsimiititaliat taakku marluk oqaaseqaataat uunga isumaliutissiissummut ilanngussatut ilanngunneqarsimapput.

3.1. Kukkunersiuinermut Ataatsimiitialiap akissuteqaataa:

Siunnersuut maanna ilusimisut iluseqartoq Kukkunersiuinermut Ataatsimiititaliamit taperserneqarpoq.

3.2. Aningaasaqarnermut Ataatsimiititaliap akissuteqaataa:

1) Aktieselskabit Namminersornerullutik Oqartussanit pigineqartut pillugit Inatsisartut paasitinneqarsinnaasariaqarnerat Aningaasaqarnermut Ataatsimiititalimit isumaqatigineqarpoq – tamat oqartussaaqataanerat kisiat eqqarsaatiginagu aammali ingerlatseqatigiiffiit akisussaassusilimmik Naalakkersuisunit ingerlanneqarnersut nakkutigineqarnissaat qulakkeerniarlugu.

2) Namminersornerullutik Oqartussat ingerlatseqatigiiffimmut pineqartumut aningaasaliissutai imaluunniit ingerlatseqatigiiffimmut qularnaveeqqusiisutai pillugit, aningaasaliissuteqarnissamik suliassanik suliarinninnermut tunngatillugu Aktieselskabit Namminersornerullutik Oqartussanit pigineqartut pillugit Aningaasaqarnermut Ataatsimiititaliap paasissutissanik pissarsisinnaanera inatsisissatut siunnersuutikkut (Naalakkersuisut aqqutigalugit) periarfissinneqarpoq. Ataatsimiititaliaq taama pisinnaatitaaffeqareersoq pissarsisinnaanerlu taanna (allassimanngitsoq) inatsisissatut siunnersuutigineqartumit annertunerusinnaanera Aningaasaqarnermut Ataatsimiititaliap akissuteqaammini oqaatigaa. Aalajangersagassatut siunnersuutaasut minnerpaaffittut aalajangersakkatut isigineqartariaqarput, tassa Aningaasaqarnermut Ataatsimiititaliap paasissutissanik pissarsisinnaanera tamatigorluinnangajak annertunerusussaammat.

3) Aktieselskabit Namminersornerullutik Oqartussanit pigineqartut pillugit ataatsimiititaliap paasissutissanik pissarsisinnaatitaanera aningaasaliinissanut qularnaveeqqusiinissamilluunniit suliassanut taamaallaat atuuttussatut killilerneqassanngitsoq Aningaasaqarnermut Ataatsimiitiliap oqaatigaa. Namminersornerullutik Oqartussat aktieselskabinut aningaasanik tapiinissamut allanik periarfissarpassuaqareerput – asserssuutigalugu tunisinermi tapiissutit aqqutigalugit. Ingerlatseqatigiiffimmut pineqartumut pissutsinik qulajaanissaq taamaalilluni pinngitsoortinneqarsinnaavoq, aningaasat ingerlatseqatigiiffimmut kissaatigineqartutut nuunneqartussat, ingerlatseqatigiiffimmut allamut ingerlatinneqarpata aningaasaliineq qularnaveequsiinerluunniit atunngikkaluarlugit.

4) Paasissutissanik pisariaqartutut isigisaminik pissarsinissami tungaanut (aningaasaliissuteqarnissamik qularnaveeqqusiinissamilluunnit) suliamik ataatsimiititaliap unitsitsisinnaanera pillugu aalajangersagaq Aningaasaqarnermut Ataatsimiititaliamit naammgisimaarneqarpoq. Periarfissaq tamanna ataatsimiititaliamut atuuttuarsimavoq, maannakkulli Inatsisartut inatsisaanni allassimalernissaa ataatsimiititaliamit naammagisimaarneqarpoq.

5) Ataatsimiititaliami ilaasortat isertuussassanik allanut tunniussinnginnissaannik qulakkeerinnittussatut inatsisissatut siunnersuummi aalajangersakkat Aningaasaqarnermut Ataatsimiititaliamit naammagisimaarneqarput.

6) Namminersornerullutik Oqartussanit aktieselskabit pigineqartut pillugit Kukkunersiuinermut Ataatsimiititaliami/Inatsisartuni ikinnerussuteqartut paasissutissanik pissarsinissamut periarfissaqarnerannik qulakkeerinnittumik inatsisissatut siunnersuut aalajangersakkamik imaqarpoq: Aktieselskabit pillugit paasissutissanik pissarsiniarnissamik ataatsimiititaliami ilaasortap siunnersuutaanut Kukkunersiuinermut Ataatsimiititaliami amerlanerussutillit akerliuppata, ataatsimiititaliami ilaasortaq Inatsisartunut tamarmiusunut siunnersuutiminik saqqummiussisinnaavoq. Inatsisartunut ilaasortat 2/5-iilisa (tassa Inatsisartunut ilaasortat 13-it) siunnersuut taperserpassuk siunnersuut akuersissutigineqartutut isigineqassaaq.

Aalajangersagarli taanna taamaallaat Kukkunersiuinermut Ataatsimiititaliamut atuutissaaq. Aningaasaqarnermut Ataatsimiititaliamut tunngatillugu tassunga naapertuuttumik aalajangersagaliortoqartariaqartoq Aningaasaqarnermut Ataatsimiititaliaq isumaqarpoq.

7) Inatsisartut Naalakkersuisullu pillugit inatsisip tamakkiisumik nutarterneqarnissaa pillugu siunnersuuteqartoqarnissaa suli Inatsisartunit utaqqineqarpoq. Aningaasaqarnermut Ataatsimiititaliap suliassai missingersuusiortarnermi inatsimmi aammattaaq malittarisassaqarmata uunga nutarterinermut atatillugu Inatsisit Atortinneqarnerannut Ataatsimiititaliap eqqumaffigisariaqarai Aningaasaqarnermut Ataatsimiititaliap kaammattuutigissavaa. Aningaasaqarnermut Ataatsimiititaliaq pillugu malittarisassat inatsisini assigiinngitsuni arlalinni inissisimanerat Aningaasaqarnermut Atatsimiititaliap tamanna pissusisamisuunngitsutut isigaa.

4. Inatsisit Atortinneqarnerannut Ataatsimiititaliap isumaliutersuutai inassuteqataalu:

Kukkunersiuinermut Ataatsimiititaliap oqartussaassuseqarnerata annertusarniarneqarneranut atatillugu Inatsisit Atortinneqarnerannut Ataatsimiititaliamit oqatigineqassaaq inatsisissatut siunnersuutip maanna saqqummiunneqartup ilusilerneqarnerani inatsisissatut siunnersuut Kukkunersiuinermut Ataatsimiititaliamit ukiaanerani 2004-imi ataatsimiinnermi saqqummiunneqartoq annertuumik toqqammavigineqarmat. Siunnersuutip sapinngisamik amerlanerpaanit tapersersorneqarnissaanik kissaateqarneq aallaavigalugu tusarniaanermi akissuteqaatit tiguneqarsimasut sapinngisamik annertunerpaamik ilanngunniarneqarsimasut inatsimmi nassuiaatini takuneqarsinnaavoq. Siunnersuut maanna ilusimisut iluseqartoq Kukkunersiuinermut Ataatsimiititaliamit taperserneqarpoq.

Aktieselskabit Namminersornerulutik oqartussanit tamakkiisumik ilaannakuusumilluunniit pigineqartut pillugit Aningaasaqarnermut Ataatsimiitialiap paasitinneqarsinnaatitaanera pillugu siunnersuummi aalajangersakkanut tunngatillugu siunnersuutip immikkoortuini marlunni Aningaasaqarnermut Ataatsimiititaliaq allannguinissamik kissaateqartoq Inatsisit Atortinneqarnerannut Ataatsimiitialiap paasivaa:

Aktieselskabit Namminersornerullutik Oqartussanit pigineqartut pillugit ataatsimiititaliap paasissutissanik pissarsisinnaatitaanera aningaasaliinissanut qularnaveeqqusiinissamilluunniit suliassanut taamaallaat atuuttussatut killilerneqassanngitsoq Aningaasaqarnermut Ataatsimiitiliap oqaatigaa. Aningaasaqarnikkut iluaqutissiisinnaasut allat, aktieselsakabit Namminersornerullutik Oqartussanit tamakkiisumik ilaannakuusumilluunniit pigineqartut aningaasaqanerannut annertuumik pingaaruteqarsinnaasut pillugit aningaasaliissuteqarnissamik qinnuteqaatitut suliassat ilanngullugit paasitinneqarsinnaatitaanerup annertusineqarnissaa Aningaasaqarnermut Ataatsimiititaliamit kissaatigineqarpoq.

Inatsisit Atortinneqarnerannut Ataatsimiititaliap isumaqatigiittup tamanna tusaatissatut tiguvaa taassungalu naapertuuttumik allannguutissatut siunnersuummik Naalakkersuisut saqqummiussinissaat kaammatussallugu.

Tamatuma saniatigut ikinnerussutillit illersorneqarnerat inatsisissatut siunnersuummi Kukkunersiuinermut Ataatsimiititaliamut aalajangersarneqartup assinga Aningaasaqarnermut Ataatsimiititaliamit kissaatigineqarpoq.

Inatsisit Atortinneqarnerannut Ataatsimiitialiami amerlanerussuteqartut Siumumeersut, Inuit Ataqatigiinneersut kiisalu Atassummeersut Aningaasaqarnermut Ataatsimiititaliap kissaataata taassuma akuersaarneqarnissaanut naammattumik tunngavissaqanngitsoq isumaqarput. Ukiup ilarujussuani Inatsisartut ataatsimiinneq ajorput. Ikinnerussuteqartut illersorneqarnissaannik siunnersuutigineqartoq aamma Aningaasaqarnermut Ataatsimiititaliamut atuutissappat aningaasaliissuteqarnissamik suliassat Inatsisartut ataatsimiinnissaannut tullermut siullermut kinguneqarluniluunniit (tamannalu pissusissamisoortuunavianngilaq ingerlatseqatigiiffik pineqartoq aningaasaliissutinik tassanngaannaq pisariaqartitsilissagaluarpat) Inatsisartulluunniit immikkut ataatsimiigiaqquneqarsinnaanerat peratarsinnaavoq tamannalu aningaasartuuteqarnerulernermik kinguneqartussaavoq.

Inatsisit Atortinneqarnerannut Ataatsimiititaliami ikinnerussuteqartupt Demokraatineersup Aningaasaqarnermut Ataatsimiititaliap kissaataa tusaatissatut tiguaa tassungalu naapertuuttumik allanngutissatut siunnersuummik Naalakkersuisut saqqummiussaqarnissaat kaammattuutigalugu. Aktieselskabinut Namminersornerullutik Oqartussanit pigineqartunut aningaasanik nuussinissaq pillugu Aningaasaqarnermut Ataatsimiititaliap aningaasaliissutisssanik suliarinninnerminni atugassaanik Naalakkersuisut pisinnaanerat naapertorlugu Naalakkersuisut paasissutissanik pissarsiniaqqullugit Inatsisartuni ilaasortat ikinnerussuteqartut 2/5-iisa peqqusisinnaanissaat pillugu kissaateqarneq Aningaasaqarnermut Ataatsimiititaliap isumaqatigiittup saqqummiussimavaa.

Aktieselskabinut Namminersornerullutik Oqartussanit pigineqartunut aningaasanik nuussiniarnermik il.il suliassat pillugit Aningaasaqarnermut Ataatsimiititaliap nalilersuineranut pissutsit sunniuteqarsinnaasut qulaajanngitsoornissaannut partiit naalakkersuisuutitaqartut sinniisaasa Aningaasaqarnermut Ataatsimiititaliami amerlanerussutillit amerlanerussuteqarnertik atorsinnaassappassuk pitsaasuunavianngilaq. Tamat oqartussaaqataaneranni isiginninneq kisiat aalaavigiinnarnagu aammali inuiaqatigiit aningaasaqarnerat annertuumik eqqarsaatigalugu. Inatsisartut Naalakkersuisullu pillugit Inatsisartut inatsisaat matumani eqqarssaatigineqartariaqartoq Demokraatit isumaqarput.

Inatsisit Atortinneqarnerannut Ataatsimiititaliami amerlanerussutillit Siumumeersut, Inuit Ataqatigiinneersut kiisalu Atassummeersut ataatsimiititaliamit isumaqatigiittumit allannguutissatut siunnersuutigineqartut ilanngullugit siunnersuut akuersissutigineqassasoq inassutigaat.

Inatsisit Atortinneqarnerannut Ataatsimiititaliami ikinnerussuteqartup Demokraatineersup ataatsimiititaliami ikinnerussuteqartup allannguutissatut siunnersuutai ataatsimiititaliallu isumaqatigiittup allannguutissatut siunnersuutai tunngavigalugit siunnersuut akuersissutigineqassasoq inassutigaa

 

	Olga P. Berthelsen Siulittaasoq
Vittus Mikaelsen		Agnethe Davidsen
Lene Knüppel		Godmand Rasmussen

---

Ilanngussaq 1 (pdf-format)

Ilanngussaq 2 (pdf-format)