7. maj 2006 UPA 2006/98
Nalinginnaasumik nassuiaatit
1. Siunnersuummut tunuliaqutaasut
Inatsisartut Landskarsip Naatsorsuutaasa Kukkunersiorneqartarnerannut Ataatsimiititaliaat (matuma kingorna „Inatsisartut Kukkunersiuinermut Ataatsimiititaliaat"-nik imaluunniit „Kukkunersiunermut Ataatsimiititaliaq"-mit taagorneqartup) maleruagassat maanna atuuttut malillugit Landskarsip nuaatsorsuutaanut sullivinnullu nammineertitanut tunngassutilinnik taamaallaat paasisaqarsinnaatitaavoq. Namminersornerullutilli Oqartussat aktieselskabiutaat Kukkunersiuinermut Ataatsimiititaliamit nakkutilliisuuffigineqartussaanngillat. Taamaammat Namminersornerullutik Oqartussani 90’ikkut ingerlatilernerini suliffeqarfiit pisortanit pigineqartut arlallit aktieselskabinngortiterneqarnerat malillugu Namminersornerullutik Oqartussat pigisaannik nalilinnik Inatsisartut paasitinneqarsinnaatitaanerat annikilliartuaarsimavoq.
Inatsisartut 2000-imi ukiakkut ataatsimiinneranni Inatsisartut Kukkunersiuinermut Ataatsimiititaliaata nalunaarummini maluginiaqquaa tamanna Inatsisartut aningaasaliissuteqartartuusutut pissaaneqarnerannut aningaasaliissutigineqartunillu nakkutilliisuunerannik inuinnaat naalakkersueqataaneranni nalinginnaasumik akuerisaalluni tunngaviutinneqartumut naapertuulluanngitsoq. Tamanna tunngavigalugu Kukkunersiuinermut Ataatsimiititaliap oqartussaassuseqarnerata annertusineqarnissaa Kukkunersiuinermut Ataatsimiititaliamit ujartorneqarpoq, ataatsimiititaliallu ilaasortai 2001-imi Inatsisartut ukiakkut ataatsimiinnerisa nalaani aalajangiiffigisassatut siunnersuummik saqqummiussinermikkut tamatumunnga malitseqartitsipput.
Aalajangiiffigisassatut siunnersuutip suliarineqarnerani Kukkunersiuinermut Ataatsimiititaliap tunngaviusumik isummersuutai Inatsisartunit taperserneqarput. Tassunga ilassutitut Inatsisartunit tikkuarneqarpoq inatsisartutigoortumik nakkutilliinermi killissarititaasut pitsanngorsarneqarnerat kisat aqqutiginagu aammali aktiaatilittut inissisimanermik Naalakkersuisut ingerlatsineranni killissarititaasut pitsanngorsarnerisigut Namminersornerullutik Oqartussanit aktieselskabit pigineqartut ingerlatsivigineqarneranni Namminersornerullutik Oqartussat aktiaatilittut soqutigisaannik isumaginninnerup patajaallisaavigineqartariaqarneranik pisariaqartitsineq ulluinnarni misilittakkat takutikkaat.
Aktieselskabit Namminersornerullutik Oqartussanit tamakkiisumik ilaannakuusumilluunnit pigineqartut pillugit Inatsisartut paasitinneqarsinnaatitaanerat pillugu Inatsisartut Naalakkersuisullu pillugit Inatsisartut inatsisaata allanngortinneqarneranik Inatsisartut inatsisissaattut siunnersuummik Kukkunersiuinermut Ataatsimiititaliaq Inatsisartut 2004-mi upernaakkut ataatsimiinneranni tamatuma malitsigisaanik oqaluuserisassanngortitsivoq (UPA 2004/51).
Inatsisartut Naalakkersuisullu pillugit Inatsisartut inatsisaannik annertunerusumik nutarterinissap pisariaqartinneqarnera nassuerutigalugu Inatsisartut Naalakkersuisullu pillugit Inatsisartut inatsisissaannik siunnersuusiortussamik suleqatigiissitamik pilersitsinissaq pillugu aalajangiiffigisassatut siunnersuut Inatsisartut 2004-mi ukiakkut ataatsimiinnermi akuersissutigaat. Tunngaviit UKA 2004/51-imi pineqartut sapinngisamik annertunerpaamik ilanngunneqarnissaat suleqatigiissitap qulakkeerniassagaa suleqatigiissitamut suliakkiissummi aalajangersarneqarpoq.
Tamatumali kingorna 2005-imi upernaakkut ataatsimiinnermi suleqatigiissitamut suliakkiissutip allanngortinneqarnissaa Inatsisartut akuersissutigaat. Aktieselskabit Namminersornerullutik Oqartussanit tamakkiisumik ilaannakuusumilluunniit pigineqartut pillugit Inatsisartut paasitinneqarsinnaatitaanerat pillugu apeqqutit pilertornerusumik suliarineqarnissaannik suleqatigiissitap salliutitsinissaa suliakkiissutip allannguutaanut ilaavoq, taamaalilluni tamanna pillugu immikkut inatsisissatut siunnersuutissatut missingiusiaq 2005-imi ukiakkut ataatsimiinnermi suliarineqarnissaminut piareerneqarsinnaaqqullugu.
Inatsisissatut missingiusiaq suleqatigiissitamit suliarineqartoq siunnersuummut matumunnga tunngaviusoq Kukkunersiuinermut Ataatsimiititaliap siunnersuutaa annertuumik tunngavigalugu suliarineqarpoq.
Inatsisartutigoortumik nakkutilliinermut killissarititaasut pillugit Inatsisartunit saqqummiunneqartut siunnersuutikkut malitseqartinneqarput.
Suliniutit arlallit aallartinneqareersut Naalakkersuisullu aktiaatilittut ingerlatsineranni killissarititaasut patajaallisaavigineqarnissaannik siunertaqartut siunnersummit ilassuserneqarput. Ilaatigut Ingerlatseqatigiiffinnut Aqutsisoqarfiup, aktiaatilittut isumaginninnermi allaffissornikkut ingerlatsisuusup, aningaasaliissutitigut sulisoqarnikkullu patajaallisaavigineqarsimanera taaneqarsinnaavoq. Kiisalu Kalaallit Nunaanni ingerlatseqatigiiffiit pitsaasumik siulersorneqarnissaat pillugu kaammattutinik Naalakkersuisut suleqatigiissitaaliasa ilaat saqqummiussaqarpoq. Aktiaatilinnut ingerlaavartumik nalunaarusiortarnerup patajaallisaavigineqarnissaa kaammattuutigineqartut ilagaat. Kaammattuutit ingerlatseqatigiiffinnut nassiunneqarput.
Tamatuma saniatigut aktieselskabit pillugit inatsisip nutaap aammalu ukiumoortumik naatsorsuutit pillugit inatsisip nutaap kingullertut Kalaallit Nunaannut atortuulersinneqartut ilaatigut nassatarisaannik aktieselskabit Namminersornerullutik Oqartussanit pigineqartut (aktieselskabit naalagaaffimmit pigineqartut assigalugit) maleruagassat immikkut ittut malillugit ukiumoortumik naatsorsuusiornissamut aammalu ingerlatseqatigiiffiup ineriartornera ineriartornissaatullu naatsorsuutigineqartut pillugit nassuiaammik kiisalu ukiup affaani pineqartumi siulersuisut aalajangigaat pingaaruteqartut pillugit paasissutissiinermik imaqartussamik ukiup affakkaartumik nalunaarusiornissamut pisussaaffilerneqarput. Ukiumoortumik naatsorsuutit ukiullu affakkaartumik nalunaarusiat tamanit pissarsiarineqarsinnaammata inatsisip Kalaallit Nunaannut atortussanngortinneqarneratigut Naalakkersuisut aktiaatilittut ingerlatsinerminni sinaakkutissaat, taamatullu inatsisartutigoortumik nakkutilliinermi sinaakkutissat patajaallisarneqarput. Aktieselskabit Namminersornerullutik Oqartussanit pigineqartut immikkut pisussaaffeqarnerisa aktieselskabinut Namminersornerullutik Oqartussanit pigineqartunut angisuunut akunnattumillu angissusilinnut taamaallaat atuuttussanngortinneqarnissaat pillugu siunnersuut Inatsisartunut ukiamut kingusinnerusukkulluunniit saqqummiunneqassaaq.
2. Siunnersuutip siunertaa pingaarnertullu imarisai
Siunnersuut una aqqutigalugu Kukkunersiuinermut Ataatsimiititaliap oqartussaassuseqarnera annertusillugu Namminersornerullutik Oqartussat aktiaatilittut soqutigisaaannik Naalakkersuisut isumaginninnerannik nakkutilliinermik ilaneqarpoq.
Aktieselskabini peqataanerup saniatigut Kalaallit Nunaanni Namminersornerullutik Oqartussat ingerlatseqatigeeriaatsini allani ullumikkut peqataanngillat. Ingerlatseqatigeeriaatsinili allani aktieselskabiunngitsuni imaluunniit aningaasaateqarfinni inuussutissarsiutigalugu ingerlataasuni assigissaanniluunniit Kalaallit Nunaanni Namminersornerullutik Oqartussat kingusinnerusukkut ilanngutissagaluarpata Inatsisartut inatsisaannik nutarterinissaq pisariaqarsinnaavoq, taamaaliornikkut taakkunani piginnittutut soqutigisat Inatsisartut aamma inatsisaannut ilanngunneqarsinnaaqqullugit.
Naalakkersuisunut ilaasortat akisussaanerat pillugu Inatsisartut inatsisaat tunngavigalugu Naalakkersuisut Namminersornerullutik Oqartussat aktiaatilittut soqutigisaannik illersorneqarsinnaa-sumik isumaginninnissamik pisussaaffeqarput. Pisussaaffik tassaavoq nakkutilliinissamut akisus-saaffeqarneq: Ingerlatseqatigiiffiup aningaasaqarnerata pingaarnertut ineriartorneranut malinnaanissamut pisussaaffik aammalu – inatsisitigut killissarititaasut atuuttut, tassunga ilanngullugu aktielskabit pillugit inatsisip iluani – Namminersornerullutik Oqartussat ingerlatseqatigiiffimmi aningaasaataasa ulorianartorsiortinneqarnerannik kinguneqartumik aningaasaqarnikkut ineriartornermut akulerussinnaaneq.
Inuiaqatigiinni inuuttaqqortuuni niunernermi nukiit aktieselskabinut naalagaaffimmit imaluunniit Namminersorullutik Oqartussanit pigineqartunut ingerlatsinerminnik annertusaanissamut aningaasaqarnikkullu pisariaqartunik innimiginninnissamut kajumilersitsisarnerat inuiaqatigiinni innuttakinnerusuni killilimmillu unamillerfiusuni atuutinngimmat nakkutilliinissamik piumasaqaat sakkortunerusumik atuussorinarpoq. Tamanna minnerunngitsumik atuuppoq ingerlatsinikkut pitsaanngitsumik angusaqarnissap pisortat tapiissuteqarnerisigut aningaasaliiffiginninnerisigulluunniit annikillisinneqarnissaanut periarfissalinni.
Taamaammat Namminersornerullutik Oqartussat nalilinnik pigisaasa akisussaassuseqartumik aqutsiviginissaasa nassatarissavaa Naalakkersuisut aktiaatilittut inissisimanerminnik pimoorullugu tigusinissaat, tassa imaappoq, selskabit Namminersornerullutik Oqartussanit pigineqartut sunniutilimmik nakkutilliivigalugit, Namminersornerullutillu Oqartussat selskabimi nalilinnik pigisaat aarlerinartorsiortinneqalissagaluarpata akulerunnissamut periarfissamik pimoorullugu atuillutik.
Ingerlatseqatigiiffimmut tunngasumik aktiaatillit assigiinngitsutigut qisuariarnissaannut aktieselskabit pillugit inatsit arlalinnik periarfissiivoq. Namminersornerullutik Oqartussat aktiaatilittut soqutigisaannik ingerlatsisutut (Namminersornerullutik Oqartussat aalajangiisuusumik siunniuteqarsimappata) Naalakkersuisut assersuutigalugu ataatsimeersuarnerni siulersuisunik taakkuluunniit ilaannik atuukkunnaarsitsinissaq aalajangiussinnaavaat.
Kiisalu Naalakkersuisut (Namminersornerullutik Oqartussat aalajangiisuusumik sunniuteqarnerat apeqqutaatilugu) ataatsimeersuarnermi sulianut aalajangersimasunut tamanut akuliussinnaallutillu suliaq taanna pillugu siulersuisunut aalajangersimasumik ilitsersuisinnaallutillu peqqusisinnaapput. Taamaattorli aktiatillit allat ingerlatseqatigiiffiulluunniit annaasaqaatigisinnaasaannik aktiaatillit ilaannut allanulluunniit ersarilluinnartumik pissusissamisuunngitsumik iluaqusiisinnaasumik siulersuisut iliuuseqannginnissaat imaluunniit aktieselskabit pillugit inatsimmut ingerlatseqatigiiffiulluunniit malittarisassaanut akerliusunik ataatsimeersuarnermi aalajangiussanik malinninnginnissaat aktieselskabit pillugit inatsimmi § 63-imi pingaarnertut aalajangersakkap killiliiffigaa.
Ingerlatseqatigiiffimmulli akulerunnerit ima sakkortussuseqaratillu akulikitsigisariaqanngillat ingerlatseqatigiiffimmik aqutsinermik ataatsimeersuarneq tigusisimasutut oqaatigisariaqalerluni, aqutsinermi aktieselskabinut inatsit naapertorlugu siulersuisuniillunilu qullersaniimmat.
Taamaalilluni aktiaatilittut inissisimanermik isumaginninnissamik piumasaqaatip aallaavittut isigalugu kingunerissanngilaa aktieselskabip annikitsutigut ingerlatsivigineqarneranut Naalak-kersuisut sunniuteqarnissaat. Ingerlatseqatigiiffiimmi pineqartut naalakkersuinikkut aqunneqaratik inuussutissarsiornermik tunngaveqartuluni aqunneqarnissaat qulakkeerniarlugu aktieselskabitut ilusiliineq toqqarneqarpoq. Inuussutissarsiutinik ingerlatsisut inuussutissarsiutitigut sullivimmik ingerlatsinissamut inuit qinigaannit pitsaanerusumik tunngavissaqarnerat nassuerutigalugu tamatumunnga Inatsisartut tapersiipput.
Akerlianilli aktiaatilittut eqiingasumik ingerlatsinikkut Naalakkersuisut ingerlatsinermut killissarititaasunik aalajangersaassapput, taakkulu tunngavigalugit angusanik nakkutilliissallutik (tassa ingerlatseqatigiiffiup ingerlanneqarneranik ingerlaavartumik naliliisarnikkut aammalu ingerlatseqatigiiffiup niuernermik pitsaanerpaamik tunngaveqarluni ingerlanneqannginneranut takussutissaqarnermi qisuariartarnikkut), soorlu ingerlatseqatigiiffik piginnittuusoq ingerlatseqatigiiffiutiminut taamaa iliortartoq.
Tamatuma peqatigisaanik inatsisartoqarnerup tungaanit isigalugu Namminersornerullutik Oqartussat naliliutaat akisussaassuseqartumik aqunneqassappata aktiaatilittut Naalakkersuisut ingerlatsinerannik Inatsisartut eqqumaffiginninnissaat, tamatuminngalu ingerlatsineq naammaginartumik pinngippat naalakkersuisunikkut akisussaatitsisinnaanissaat pisariaqarpoq.
Namminersornerullutik Oqartussat aktiaatilittut soqutigisaannik Naalakkersuisut ingerlatsinerannik Inatsisartut nakkutilliineranni atugassatut Inatsisartut (Inatsisartut Kukkunersiuinermut Ataatsimiititaliaata) paasissutissanik Naalakkersuisut pissarsiarisinnaasaasa assinginik pissarsisinneqarsinnaanissaat tunngavissaatinneqarpoq. Inatsisartut (Inatsisartut Kukkunersiuinermut Ataatsimiititaliaat) paasissutissanik Naalakkersuisut pissarsiarisinnaasaasa assinginik pissarsisinnaappata Naalakkersuisut pisuni aalajangersimasuni akisussaassuseqartumik iliuuseqarsimanersut (tassa aktiaatilittut piginnaatitaaffimminnik naleqquttumik atuisimanersut) Inatsisartunit aatsaat naliliiffigineqarsinnaavoq. Tamatumanili paasissutissat pissarsiarissallugit Naalakkersuisut periarfissaqarfigi(sima)saat tunngavigalugit Naalakkersuisut naliliivigineqartariaqarput – tassa paasissutissat Naalakkersuisut piniarsimasaat kisiisa tunngaviginagit. Naalakkersuisut kikkulluunniit aktieselskabimi naapertuutinngissinnaasunik piaaralutik ilisimasaqarnaveersaarnermikkut Namminersornerullutik Oqartussat aktiaatilittut soqutigisaannik isumaginninnerminnut atatillugu inatsisitigut naalakkersuinikkulluunniit akisussaaffimminnik qimarratiginnissinnaasariaqassanngillat. Taamaammat Kukkunersiuinermut Ataatsimiititaliap paasissutissanik sunilluunniit Naalakkersuisunit pissarsiarineqarsinnaasunik pissarsiniarsinnaatitaasariaqarnera siunnersuummi matumani tunngaviusumik aallaaviuvoq.
Tamatuma kingunerisaanik Kukkunersiuinermut Ataatsimiititaliaq pisariaqarpat aktieselskabit pillugit inatsimmi ingerlatseqatigiiffiulluunniit malittarisassaani periarfissiissutaasut atornerisigut aktieselskabimit paasissutissanik erseqqinnerusumik nalunaakkanik pissarsiniarnissamik Naalakkersuisunut peqqusisinnaassasoq siunnersuutigineqarpoq. Ataatsimiititaliap kaammattuineratigut paasissutissat Naalakkersuisut pissarsiatik kinguarsaanertaqanngitsumik ataatsimiititaliamut atugasiissutigissavaat.
Aktieselskabini Namminersornerullutik Oqartussanit tamakkiisuunngitsumik pigineqartuni Naalakkersuisut paasissutissanik ingerlatseqatigiiffinnut tunngasunik pissarsisinnaanerat paasissutissanut ataatsimeersuarnermi, tassungalu ilanngullugu ingerlatseqatigiiffimmi immikkut ittumik ataatsimeersuarnermi, aktieselskabit pillugit inatsimmi aalajangersakkat naapertorlugit aktiaatillinnit pissarsiarineqarsinnaasunut killiligaavoq (Namminersornerullutik Oqartussat siulersuisuni sinniisorisaat aqqutigalugit Naalakkersuisut paasissutissanik pissarsisinnaanerat inatsilerinerup tungaanit isigalugu oqallisaasarpoq, taamaammallu matumani pineqartunut tunngatillugu isiginiarneqassanngitsoq toqqarneqarluni).
Matumanili pineqartoq pingaarnerpaaq tassaavoq aktieselskabit pillugit inatsimmi § 76 naapertorlugu aktiaatillip paasissutissanik pissarsisinnaatitaanera. Aalajangersagaq taanna naapertorlugu aktiaatilik makkuninnga pissarsisinnaatitaavoq: "…paasissutissanik tunniuteriaannarnik, pissutsinik tamanik ukiumoortumik naatsorsuutinut nalunaarummullu aammalu ingerlatseqatigiiffissuussappat taassuma ukiumoortumik naatsorsuutaanut ingerlatseqatigiiffiullu ingerlaneranik naliliinissamik pingaarutilinnik, imaluunniit apeqqutinut ataatsimeersuarnermi aalajangiiffigineqar-tussanut tunngasunik. Ilisimatitsisussaatitaaneq suliffeqarfissuarmi ataatsimi selskabip ataatsip selskabinut allanut tunngatillugu attaveqarneranut aammattaaq atuuppoq." Paasissutissiisus-saatitaanerli pissaaq paasissutissat pineqartut "ingerlatseqatigiiffimmut annertuumik ajoqutaatin-nagit".
Tamatuma saniatigut aktieselskabit pillugit inatsimmi § 71 naapertorlugu oqaluuserisassamik suugaluartumilluunniit aktiaatilik ataatsimeersuarnermi suliassanngortitsisinnaallunilu aktieselskabit pillugit inatsimmi § 86 naapertorlugu qalaajagassanngortitsisinnaavoq.
Aktieselskabinut Namminersornerullutik Oqartussat kisimiillutik aktiaateqarfigisaannut tunngatillugu aktieselskabit pillugit inatsit aallaavittut isigalugu taakku assinginik killiliivoq, tamatumalu kingunerisaanik ingerlatseqatigiiffiup ataatsimeersuarneranut atatillugu Naalakkersuisut paasissutissanik pissarsiniartariaqassapput. Tunngaviusumilli isigalugu kisimiilluni aktiaatillip paasissutissanik pissarsiniarnissamut periarfissai killileqarsorinanngillat. Taamaalillunilu paasissutissanik erseqqinnerusumik taaneqartunik pissarsiniarsinnaaneq ingerlatseqatigiiffiup malittarisassaanut ilanngunneqarsinnaavoq, soorluttaaq ataatsimeersuarnermi immikkulluunniit ittumik ataatsimeersuarnermi aalajangiinikkut paasissutissinneqarnissaq Namminersornerullutik Oqartussat kisimiillutik aktiaateqartuusutut qulakkeersinnaagaat (Tamatumani Danmarkimi Aningaasaqarnermut ministereqarfiup, Inatsiseqarnermut ministereqarfiup, Statsministereqarfiup, Angallannermut ministereqarfiup kiisalu Aningaasaqarnermut Inuussutissarsiutinullu ministereqarfiup naalagaaffiup aktieselskabiutai pillugit september 2003-mi saqqummiunneqartumik nalunaarusiaat innersuussutigineqassaaq). Tamatuma saniatigut aktieselskabimi Namminersornerullutik Oqartussanit tamakkiisumik pigineqartumi siulersuisut (taamatullu siulersuisunut ilaasortat ataasiakkaat) paasissutissanik Naalakkersuisunut ingerlatitseqqinnissamut aallavittut isigalugu piginnaatitaasut naatsorsuutigineqartariaqarpoq, paasissutissanik pineqartunik pissarsisinnaatitaaneq ingerlatseqatigiiffiup malittarisassaani allassimagaluarpalluunniit. (Tamatumani Danmarkimi Aningaasaqarnermut ministereqarfiup, Inatsiseqarnermut ministereqarfiup, Statsministereqarfiup, Angallannermut ministereqarfiup kiisalu Aningaasaqarnermut Inuussutissarsiutinullu ministereqarfiup naalagaaffiup aktieselskabiutai pillugit september 2003-mi saqqummiunneqartumik nalunaarusiaat innersuussutigineqassaaq). Siulersuisut taamaaliornissamut pinaaserpata siulersuisut pinaasertut taakkuluunniit ilaasa taarserneqarnissaat siunertaralugu kisimiilluni aktiaateqartoq immikkut ittumik ataatsimeersuarnissamut aggersaanissamut periarfissaqarpoq. Taamaattumik aktieselskabimi Namminersornerullutik Oqartussanit tamakkiisumik pineqartumi siulersuisut paasissutissinneqarnissamik Naalakkersuisut qinnuiginninnerannut akuersaartumik qisuariartarnissaat naatsorsuutigineqarsinnaavoq, paasissutissanik pineqartunik pissarsisinnaatitaaneq ingerlatseqatigiiffiup malittarisassaani allanneqarsimanngikkaluarpalluunniit.
Ingerlatseqatigiiffiit pineqartut pillugit Naalakkersuisut aqqutigalugit Kukkunersiuinermut Ataatsimiititaliap paasissutissanik pissarsisinnaanera aktieselskabit Namminersornerullutik Oqartussanit tamakkiisumik pigineqartut malittarissaasigut aporfissaqalersinneqassanngitsoq Naalakkersuisunit qulakkeerneqassasoq naatsorsuutigineqarpoq.
Naalakkersuisut – taamaalillunilu Inatsisartut Kukkunersiuinermut Ataatsimiititaliaat – ataatsimeersuartitseqqaanngikkaluarluni paasissutissinneqarsinnaanerat aktieselskabit Namminersornerullutik Oqartussanit tamakkiisumik pigineqartut malittarisassaat aqqutigalugit qulakkeerneqarsinnaassaaq.
Naalakkersuisut suliffeqarfiillu pineqartut siulersuisuisa akornanni attaveqatigiittarnermi aqqutissanik ersarissunik paasisartunillu isumaqatigiissuteqarnissaq pissusissamisuussaaq, assersuutigalugu piginnittut siulersuisullu akornanni ingerlaavartumik oqaloqatigiittarnerit siulersuisut siulittaasoqarfiat aqqutigalugu pisalissalluni, matuma kingorna siulersuisunut ilaasortat sinneri taassuma ilisimatittassallugit.
Namminersornerullutik Oqartussat aktiaatilittut soqutigisaannik Naalakkersuisut isumaginninnerannik Inatsisartut Kukkunersiuinermut Ataatsimiititaliaata nakkutilliinerminut ilaatillugu aktieselskabit Namminersornerullutik Oqartussanit tamakkiisumik ilaannakuusumilluunniit pigineqartut ingerlatsivigineqarneranni aningaasaqarnikkut innimigisassanik Naalakkersuisut naleqquttumik qulakkeerinninniarsimanersut nalilersorsinnaassagaa siunnersuutigineqarpoq. Taamatut nalilersuineq "ingerlatsineq pillugu kukkunersiuineq"-tut nalinginnaasumik taaneqartarpoq.
Ingerlatsinermik kukkunersiuinerup ingerlatseqatigiiffimmi pineqartumi siulersuisunut pisortaasunulluunniit sammitinneqannginnissaa equmaffigissallugu pingaartuuvoq. Ingerlatsinermik kukkunersiuineq aktieselskabit pillugit inatsimmi killissarititaasut iluini Kalaallit Nunaanni Namminersornerullutik Oqartussat aktiaatilittut soqutigisaannik Naalakkersuisut isumaginninnerannut sammititaasarpoq.
Paasissutissanik pissarsiarisat naliliivigineqarnerini (t.i. aktieselskabit Namminersornerullutik Oqartussanit tamakkiisumik ilaannakuusumilluunniit pigineqartut ingerlatsivigineqarneranni aningaasaqarnikkut innimigisassanik Naalakkersuisut naleqquttumik qulakkeerinninniarsimanersut pillugu naliliineq) ataatsimiititaliap siunnersuisartunik avataaneersunik (amerlanertigut kukkunersiusarfinnik) ikiortissarsinissaa naatsorsuutigineqartariaqarpoq, soorlu Namminersornerullutik Oqartussat ataanni ingerlatsiviup ingerlatsineranik kukkunersiuilluni misissuinermik ingerlatsissatilluni Kukkunersiuinermut Ataatsimiititaliaq taamaaliortartoq. Taamatuttaaq Naalakkersuisunut apeqqutissanik ilusilersuinerminut atatillugu Kukkunersiuinermut Ataatsimiititaliaq pisariaqartinneqartillugu avataanit ikiortissarsiortartoq.
Kukkunersiuinermut Ataatsimiititaliap aktieselskabinit Namminersornerullutik Oqartussanit tamakkiisumik ilaannakuusumilluunniit pigineqartunit paasissutissanik pissarsisinnaanera ingerlatsinerluunniit pillugu kukkunersiuisinnaanera mianersortumik atorneqartariaqarpoq. Taamaapportaaq aktieselskabit pillugit inatsimmi periarfissat aammalu ingerlatseqatigiiffiit ataasiakkaat pineqartut malittarisassaat atorlugit Naalakkersuisunut peqqusinikkut ataatsimiititaliap paasissutissanik piniarsinnaanera eqqarsaatigalugu. Ataatsimiititaliap apeqqutaasa akinissaannut nukissat qanoq annertutigisut ingerlatseqatigiiffiup atortariaqarnerai eqqumaffigissallugu pissutissaqarpoq. Taamatuttaaq ingerlatsinermik kukkunersiuilluni aallartitsinerup ingerlatseqatigiiffiup pisortaanut siulersuisuinulluunniit tatiginninnginnertut paasineqarsinnaanera aarleqqutigissallugu pissutissaqarpoq, tamatumami kingunerisinnaammagu ingerlatseqatigiiffiup ingerlatsineranut ajoqutaasumik sulisuusut annertuumik eqqissisimajunnaarnerat. Kiisalu paasissutissat mianernartut ingerlatseqatigiiffiup unammillersinnaassusianut pingaaruteqartut siammarterneqarnissaasa pinngitsoortinneqarnissaanik ingerlatseqatigiiffiit inatsimmik tunngaveqartumik soqutigisaat eqqumaffigissallugit pissutissaqarpoq.
Eqqarsaatigisassat taakku Inatsisartut Naalakkersuisullu pillugit Inatsisartut inatsisaanni § 17, imm. 3-mi oqaaseqatigiit aappaanni tunngaviusunik sanioqqutsisoqarsinnaanera pissutissaqartippaat. Aalajangersagaq taanna naapertorlugu ataatsimiititaliamut ilaasortap ataasiinnaalluunniit piumasarippagu atortussat suugaluarnersut ataatsimiititaliamit piniarneqassapput.
Paarlattuanilli partiinut naalakkersuisuutitalinnut sinniisuusutut ataatsimiititaliami amerlanerussutillit, Namminersornerullutik Oqartussat aktiaatilittut soqutigisaannik Naalakkersuisut isumaginninneranni pissutsit isornartorsiuissutaasinnaasut qulaajarneqarnissaat pinngitsoorniarlugu amerlanerussuteqarnertik atorpassuk pitsaavallaarnavianngilaq. Taamaammat paasissutissanik pissarsiniarsinnaanerup akisussaassusilimmik atorneqarnissaata qulakkeerneqarnissaa sunniuteqarluartumik kukkunersiuinikkut nakkutilliisinnaanerup qulakkeerneqarnissaanut sanilliullugu nalilerniarneqartariaqarpoq.
Innimigisassat takku tamarmik eqquutsinneqarnissaat anguniarlugu siunnersuummi § 17 a, imm. 5-imi oqaasertaliussatigut aalajangersarneqarpoq ataatsimiititaliamut ilaasortap ataatsip aktieselskabimut tunngatillugu paasissutissanik pissarsiniarnissamik siunnersuutaa ataatsimiititaliami amerlanerussuteqartunit akerlilerneqarsinnaasoq, taamaattoqartillugulu apeqqut Inatsisartunut tamarmiusunut ataatsimiititaliap ilaasortaanit kimilluunniit saqqummiunneqarsinnaasoq.
Siunnersuut akuersissutigineqartutut isigineqassaaq Inatsisartunut ilaasortat minnerpaamik 2/5-iilii tassunga isumaqataallutik taasippata.
Siunnersuummut allannguutissatut siunnersuumik saqqummiussisoqarsinnaanngilaq.
Paasissutissat mianersuuttariallit ingerlatseqatigiiffiup unammillersinnaaneranut tunngassutillit siaruarterneqannginnissaat aktieselskabip pissutissaqarluarluni soqutigisaraa. Taamatut soqutigisaqarneq Namminersornerullutik Oqartussat ingerlatseqatigiiffiutaannut tunngatillugu paasissutissanik ataatsimiititaliap – atorfilittallu tassunga attuumassuteqartut - nipangiussinissamik peqquneqarsinnaaneratigut eqquutsinneqassaaq. Taamatut nipangiusimannittussaatitaaneq pinerluttulerinermik inatsimmi aalajangersakkatigut pineqaatissiissutaasinnaavoq.
Ataatsimiititaliamilli pisariaqartinneqarpat pissutsinik Namminersornerullutik Oqartussat aktiaatilittut soqutigisaannut tunngassutilinnik ataatsimiititaliaq Inatsisartunut ilisimatitsissuteqarsinnaavoq. Tamanna pissaaq – isumaliutissiissut paasissutissanik isertuussanik imaqarpat - matoqqasumik suliarineqartussamik immikkut isumaliutissiissuteqarnikkut. Taamaalilluni matoqqasumik ataatsimiinnermi peqataasut tamakkerlutik nipangiussisussanngortinneqassapput. Paasissutissanik isertuussanik matoqqasumik ataatsimiinnermi pissarsiarineqartunik ingerlatitseqqinneq atuinerluunniit pinerluttulerinermik inatsit aqqutigalugu pineqaatissiissutaasinnaavoq, soorlu paasissutissanik isertuussanik Kukkunersiuinermut Ataatsimiititaliap sulineranut atasumik pissarsiarineqartunut atatillugu taamaattoqartoq.
Pisariaqarpat aktieselskabit pillugit inatsimmi ingerlatseqatigiiffiullu malittarisassaani tunngavissinneqartumik periarfissat atornerisigut aktieselskabinut Namminersornerullutik Oqartussanit tamakkiisumik ilaannakuusumilluunniit pigineqartunut tunngatillugu paasissutissanik erseqqinnerusumik nalunaakkanik pissarsiniarnissamut Aningaasaqarnermut Ataatsimiititalimit Naalakkersuisut siunnersuut malillugu peqquneqarsinnaapput (soorlu Kukkunersiuinermut Ataatsimiititaliaq taamaaliorsinnaasoq). Aningaasaqarnermulli Ataatsimiititaliamut tunngatillugu paasitinneqarsinnaatitaaneq ataatsimiititaliap siunnersuutinik imaluunniit aningaasalersuinissamut qularnaveeqqusiinissamulluunniit qinnuteqaatinik suliarinninneranut taamaallaat tunngatinneqassaaq.
Siunnersuut naapertorlugu aktieselskabini Namminersornerullutik Oqartussanit tamakkiisumik ilaannakuusumilluunniit pigineqartuni pisariaqarpat aktieselskabit pillugit inatsimmi ingerlatseqatigiiffiulluunniit malittarisassaani periarfissiissutaasut atornerisigut Aningaasaqarnermut Ataatsimiititaliaq (Kukkunersiuinermut Ataatsimiititaliatulli) paasissutissanik erseqqinnerusumik nalunaakkanik pissarsiniarnissamik Naalakkersuisunut peqqusisinnaassaaq. Paasissutissat pissarsiarineqartut Naalakkersuisut ataatsimiititaliamut kinguarsaanertaqanngitsumik atugassanngortissavaat.
Ingerlatseqatigiiffimmulli aningaasalersuinissap qularnaveeqqusiinissalluunniit isumaliutigineqarnerani atugassatut paasissutissanik pissarsinissamut Naalakkersuisut aktiaatilittut piginnaatitaaffimminnik atuinissamik pisariaqartitsinissaat ilimananngilaq.
Siunnersuummi § 16 a-p oqaasertalerneqarnera naapertorlugu paasissutissat ataatsimiititaliap pisariaqartutut isigisai pissarsiarineqarserlugit siunnersuutinik qinnuteqaatinilluunniit suliarinninnissani ataatsimiititaliap utaqqisikkallarsinaavaa. Periarfissaq taanna aqqutigalugu aningaasaliisinnaasutut qularnaveeqqusiisinnaasutulluunniit allatulli Namminersornerullutik Oqartussat paasissutissanik pissarsisinnaanermik periarfissinneqarput; - periarfissaq taanna aktiaateqartut aktieselskabit pillugit inatsit naapertorlugu paasissutissanik pissarsisinnaanerannit amerlasuutigut annertuneruvoq. Taamaattumik Aningaasaqarnermut Ataatsimiititaliap paasissutissanik pissarsisinnaaneranut siunnersuut annertunerulersitsisutut oqaatigineqarsinnaanngilaq, tamatumunngali erseqqissaataanerulluni.
Paasissutissat isertuussassatut tunniunneqarsimappata, taakku ataatsimiititaliap – atorfilittallu tassunga attuumassuteqartut - nipangiusimasussaavai. Nipangiusimannittussaatitaaneq pinerluttulerinermik inatsimmi aalajangersakkatigut pineqaatissiissutaasinnaavoq.
Aktieselskabit pillugit inatsit (matumani aktieselskabit pillugit inatsimmi § 76) naapertorlugu Naalakkersuisut paasissutissanik suugaluartunik suliffeqarfinnit pissarsiniarsinnaanerat siunnersuutip allannguiffiginngimmagu erseqqissarneqassaaq, soorluttaaq paasissutissanik Naalakkersuisut namminneq pissarsiarisinnaanngisaannik Inatsisartut ataatsimiititaliaasa pissarsisinnaanerat siunnersuummit pilersinneqanngitsoq.
3. Norgemi, Sverigemi Danmarkimilu assigusumik aaqqissuussinerit.
Namminersornerullutik Oqartussat isertitaannik, aningaasartuutaannik pigisaannillu nalilinnik inatsisartutigoortumik nakkutilliineq nunani avannarlerni arlalinni inatsisartutigoortumik nakkutilliinermit arlalitsigut allaanerussuteqarpoq.
Norgemi, Sverigemi Danmarkimilu naalagaaffimmut kukkunersiuisoqarnermut (rigsrevisionen) assingusumik Kalaallit Nunaat peqanngilaq. Landskarsip ukiumoortumik naatsorsuutai kukkunersiuisumit naalagaaffimmit akuerisaasumit Inatsisartunit toqqarneqartumit kukkunersiorneqartarput. Naatsorsuutit eqqortuunersut aammalu atuinerit naatsorsuutinik tunniussinermi ilaatinneqartut aningaasalissutinut, inatsisinut najoqqutassianulluunniit nalunaarutigineqartunut kiisalu isumaqatigiissutigineqartunut nalinginnaasumilluunniit periutsinut naapertuunnersut kukkunersiuinermi misissorneqartarpoq. Naalakkersuisut paasissutissanik tamanik naatsorsuutit nalilerneqarnissaannut pisariaqartunik kukkunersiuisunut nalunaarutiginninnissamut pisussaatitaapput.
Inatsisartut Kukkunersiuinermut Ataatsimiititaliaata landskarsip naatsorsuutai kukkunersiuisullu taakkununnga oqaaseqaataat ukiumut ataasiarluni misissortarpai aammalu apeqqutinik oqaaseqaatinillu naatsorsuutit pisariaqalersitaannik Naalakkersuisunut saqqummiussisarluni. Apeqqutit oqaaseqaatillu Naalakkersuisut akissuteqaataannik ilaqartillugit Inatsisartunut saqqummiunneqartarput. Atortussat, ilanngussat nalunaarusiat assigisaallu sulinermini pisariaqartitani ataatsimiititaliap naatsorsuutinik oqartussaasutut ingerlataqartumit piniarsinnaavai. Ataatsimiititaliami ilaasortaq ataasiinnarluunniit piumasaqarpat atortussat kissaatigineqartut ataatsimiititaliap piniassavai.
Landskarsip naatsorsuutaanni suliffeqarfiit nammineertitat ilaatinneqartut, taamaalillutillu Kukkunersiuinermut Ataatsimiititaliamit nakkutigineqartut aktieselskabit Namminersornerullutik Oqartussanit tamakkiisumik ilaannakuusumilluunniit pigineqartut tamatumunnga (maleruagassat maanna atuuttut naapertorlugit) ilaatinneqanngillat.
Naalagaaffiup isertitaanik, aningaasartuutaanik pigisaanillu nalilinnik Norgemi, Sverigemi Danmarkimilu inatsisartutigoortumik nakkutilliineq aktieselskabit naalagaaffimmit pigineqartut pillugit paasissutissinneqarsinnaaneq immikkut pingaarnerutillugu matuma kinguliani sammineqassaaq.
Norge
Norgemi naalagaaffiup kukkunersiuisoqatigiivi (rigsrevision) tassaapput norskit inatsisartuisa, Stortingip kukkunersiunermut nakkutilliinermullu ingerlatsiviat. Tunngavissaatitat naapertorlugit naalagaaffiup isertitaqarnissaanut aammalu naalagaaffiup aningaasaataasa naliliutaasalu aningaasaaqarnikkut illersorneqarsinnaasumik kiisalu inatsisartut aalajangiinerinut tunngavissaatitaannullu naapertuuttumik atorneqarlutillu aqutsivigineqarnissaannut naalagaaffiup kukkunersiuisoqatigiivi kukkunersiuinermikkut, nakkutilliinermikkut ilitsersuinermikkullu peqataaqataassapput.
Naalagaaffiup kukkunersiuisoqatigiivisa suliassatik arlaannaannulluunniit attuumassuteqanngitsumik namminersorlutillu ingerlattarpaat aammalu sulinerup qanoq aaqqissuunneqarlunilu ilusiliivigineqarnissaa nammineq aalajangertarlugu. Immikkut misissuinerit ingerlanneqarnissaannik norskit inatsisartuisa ataatsimiinnerminni naalagaaffiup kukkunersiuisoqatigiivi peqqusinnaavaat, kukkunersiuinerulli nakkutilliinerullu qanoq sunillu tunngaveqarluni ingerlanneqarnissaanik naalagaaffiup kukkunersiuisoqatigiivinut ilitsersuisinnaanatik.
Naalagaaffiup kukkunersiuisoqatigiivi nalagaaffiup kukkunersiuisuinik tallimanik norskit inatsisartuinit Stortingimit toqqarneqartunik siulersorneqarput. Taakku ukiut sisamakkaarlugit toqqarneqartarput.
Naalagaaffiup kukkunersiuisoqatigiivi naalagaaffiup naatsorsuutaanik naalagaaffiullu ingerlataasa il.il. naatsorsuutitut tunniussaannik kukkunersiuisussaapput. Kiisalu ingerlatseqatigiiffinni, tassunga ilanngullugit aktieselskabini naalagaaffiup soqutigisaasa ingerlatsivigineqarnerat naalagaaffiup kukkunersiuisoqatigiivisa nakkutigisassaraat. Inatsisartut aalajangigaat tunngavissaatitaallu aallaavigalugit aningaasaqarnermik, naammassisaqarsinnaassutsimik, anguniakkat eqquutsinneqarnerannik sunniutinillu naalagaaffiup kukkunersuisoqatigiivi aaqqissuussamik misissuisassapput (ingerlatsinermik kukkunersiuineq). Kukkunersiuinermikkut naapertuutinngitsut kukkunerillu pinaveersimatinniarneqarnissaannut qulaajarneqarnissaannullu naalagaaffiup kukkunersiuisoqatigiivi peqataaqataassapput. Kiisalu kukkunerit amigaatillu siunissami pinngitsoortinneqarnissaat siunertaralugu naalagaaffiup kukkunersiuisoqatigiivi ingerlatsivimmik ilitsersuisinnaapput.
Ingerlatseqatigiiffinnik nakkutilliinermi ingerlatseqatigiiffit naalagaaffiup minnerpaamik 50%-imik aktiaateqarfigisai allatulluunniit aalajangiisuusumik sunniuteqarfigisai nakkutilliiffigineqartarput. Ingerlatseqatigiiffinni naalagaaffiup piginnittutut soqutigisaqarfigisaani aningaasalersuutinik naalagaaffiup kukkunersiuisoqatigiivi nalinginnaasumik kukkunersiuineq ajorput.
Ingerlatseqatigiiffinni il.il. naalagaaffiup soqutigisaasa ingerlatsivigineqarnerannik nakkutilliinermikkut naalagaaffiup soqutigisaanik ingerlatsisutut inatsisartut aalajangigai tunngavissaatitaalu naapertorlugit ministeri ingerlatsinersoq naalagaaffiup kukkunersiuisoqatigiivisa naliligassaraat (tassa naalagaaffiup soqutigisaanik inatsisinut naapertuuttumik aningaasaqarnikkullu illersorneqarsinnaasumik ministeri ingerlatsinersoq aammalu inatsisartut aalajangigaannik ministeri piviusunngortitsinersoq misissorlugu). Naalagaaffiup soqutigisaasa isumagineqarnerannik naliliinermi aningaasatigut soqutigisat kisimik naliliiffigineqarneq ajorput aammali inuiaqatigiinnut tunngasut, soorlu pinngortitap pisuussutaanik aqutsineq innuttaasullu sullinneqarnerat nalilersorneqartarput.
Ministerit ataasiakkaat naalagaaffiup soqutigisaanik aqutsinerannik tunngavissaqarluartumik naliliinissami misissuinerit pisariaqartutut isigineqartut nakkutilliinermi ilaatinneqartarput. Ingerlatseqatigiiffinni naalagaaffimmit tamakkiisumik pigineqartuni, taakkulu tamakkiisumik ingerlatseqatigiiffiutaanni allani nakkutilliinermut ilanngullugu inatsisartut aalajangigaat tunngavissaatitaallu aallaavigalugit ingerlatseqatigiiffinni aningaasaqarnermik, naammassisaqarsinnaassutsimik, anguniakkat eqquutsinneqarnerannik sunniutinillu misissuisoqarsinnaavoq.
Nipangiussisussaatitaaneq apeqqutaatinnagu paasissutissanik, nalunaarusianik uppernarsaatissanilluunniit suugaluartunik piumasaqarsinnaallutillu misissuinernik suliassamik suliarinissaannut pisariaqartutut isigisaminnik naalagaaffiup kukkunersiuisoqatigiivi ingerlatsisinnaapput. Tamanna naalakkersuinikkut aqutsinermut, ingerlatsiviit atorfilittaannut allanullu ingerlatsivinni atorfeqartunut kiisalu ingerlatseqatigiiffinni naalagaaffimmit tamakkiisumik pigineqartuni taakkulu ingerlatseqatigiiffiutaanni pisortaasunut, sulisunut kukkunersiuisunullu atuuppoq. Ingerlatseqatigiiffinni naalagaaffimmit ilaannakuusumik pigineqartuni aktiaatillit allat piginnaatitaaffiinit allaanerusunik naalagaaffik piginnaatitaaffeqanngilaq, tamannalu taakkuninnga naalagaaffiup kukkunersiuisoqatigiivisa paasissutissinneqarsinnaatitaaneranut kinguneqaateqarpoq. Ingerlatseqatigiiffinnulli naalagaaffimmit ilaannakuusumik pigineqartunut tunngatillugu ingerlatseqatigiiffiup kukkunersiuisuata suliassaqarfimminut killissarititaasut iluanni paasissutissanik tunniussinissamut ataatsimeersuartunit peqquneqarnissaanik piumasaqaammik saqqummiusseqqullugu naalagaaffiup kukkunersiuisoqatigiivisa naalagaaffiup soqutigisaanut sinniisuutitaasoq peqqusinnaavaat.
Ingerlatseqatigiiffinni naalagaaffimmit tamakkiisumik pigineqartuni ataatsimeersuartoqassatillugu, siulersuisut siiniisuutitalluunniit ataatsimiissatillugit il.il. naalagaaffiup kukkunersiuisoqatigiivi ilimasaarneqartussaallutillu peqataanissamut pisinnnaatitaaffeqarput. Naalagaaffiup kukkunersiuisoqatigiivi ataatsimiinnerni oqaaseqarsinnaatitaallutillu papiaqqanik ataatsimiinnernut tunngassuteqartunik tunineqartussaatitaapput.
Aammattaaq ingerlatseqatigiiffiit naalagaaffimmit ilaannakuusumik pigineqartut ataatsimeersuarneranni, siulersuisut sinniisuutitallu ataatsimiinneranni il.il. naalagaaffiup piginnittutut soqutigisaanut sinniisuutitaasoq peqatigalugu naalagaaffiup kukkunersiuisoqatigiivi peqataasinnaatitaapput.
Kukkunersiuinerup nakkutilliinerullu inerneri naalagaaffiup kukkunersiuisoqatigiivisa norskit inatsisartuinut Stortingimut nalunaarutigissussaavaat. Suliaq Stortingimut nalunaarutigineqartinnagu naalagaaffiup kukkunersiuisoqatigiivisa oqaaseqaataat ministerimut akisussaasuusumut oqaaseqarfigisassanngorlugit saqqummiunneqassapput.
Sverige
Naalagaaffiup kukkunersiuisoqatigiivi (rigsrevisionen) Sverigep inatsisartuisa Rigsdagip ataani oqartussaaffiuvoq.
Naalagaaffiup kukkunersiuisoqatigiivi nalagaaffiup kukkunersiuisuinik pingasuusunik siulersorneqarput.
Naalagaaffiup kukkunersiuisoqatigiivi aqutsisunik (styrelsimik) ilaqartinneqarput. Qulaajaanermik ingerlatsinerup malinnaaviginissaa aammalu naalagaaffiup kukkunersiuisoqatigiivisa qulaajaanermik nalunaarusiaasa kukkunersiuinerlu pillugu nalunaarusiaasa pisariaqalersitaannik siunnersuutinik nassuiaatinillu inatsisartunut saqqummiussinissaq kiisalu naalagaaffiup kukkunersiuisoqatigiivinut aningaasaliissutissatut siunnersuutit ukiumoortumillu naatsorsuutit pillugit aalajangiinissaq aqutsisut suliassaraat. Aqutsisut inatsisartunit toqqagaasut 11-nik ilaasortaqarlutillu 11-nik sinniisussaqarput.
Naalagaaffiup kukkunersiuisoqatigiivi arlaannaannulluunniit attuumassuteqanngillat. Suut qulaajaavigineqassanersut, qulaajaaneq qanoq ingerlanneqassanersoq qanorlu inerniliisoqassanersoq naalagaaffiup kukkunersiuisoqatigiivisa pingasuusut namminneq aalajangertarpaat.
Naalagaaffiup kukkunersiuisoqatigiivisa naalagaaffiup ingerlatai tamaasa qulaajaavigissavaat, taamaaliornermikkullu nukinnik atuilluarnissamut sunniuteqarluartumillu ingerlatsinissamut peqataaqataallutik. Oqartussaaffik svenskit inatsiartuisa Rigsdagip nakkutilliinermik ingerlatsinerata ilagaa taamaalillunilu tamat oqartussaaqataaneranni pingaarutilimmik suliaqartuulluni.
Suliffeqarfik inatsisitigut maleruagassiuunneqarsimappat naalagaaffilluunniit piginnittuunermigut tapiissuteqartarnermigulluunniit imaluunniit isumaqatigiissuteqarsimanikkut allatigulluunniit suliffeqarfimmi aalajangiisuusumik sunniuteqarsinnaappat suliffeqarfik naalagaaffimmik aktieselskabitut ingerlanneqartoq naalagaaffiup kukkunersiuisoqatigiivisa qulaajaaneranni ilaatinneqassaaq.
Inuiaqatigiit nalinginnaasumik soqutigisaat mianeralugit naalagaaffiup aningaasalersuutaasa angusaqarfiulluartumik pissarsiffigineqartarnissaannut ineriartortitsinissaq qulaajaanikkut siuarsarneqassaaq (angusanik kukkunersiuineq).
Naalagaaffimmi oqartussaasut peqquneqarnermikkut naalagaaffiup kukkunersiuisoqatigiivinut ikiorsiillutillu naalagaaffiup kukkunersiuisoqatigiivisa qulaajaanerminni paasissutissat pisariaqartitaat tunniuttassavaat. Tamanna aaamma allanut (tassunga ilanngullugit ingerlatseqatigiiffiit) naalagaaffiup kukkunersiuisoqatigiivinit qulaajaaffigineqarsinnaatitaasunut atuuppoq.
Ingerlatseqatigiiffinni naalagaaffiup kukkunersiuisoqatigiivinit qulaajaavigineqarsinnaatitaasuni kukkunersiuisumik ataatsimik arlalinnilluunniit ingerlatseqatigiiffiup kukkunersiuisui peqatigalugit ingerlatseqatigiiffiup kukkunersiorneqarnerani peqataasussanik naalagaaffiup kukkunersiuisoqatigiivi toqqaasinnaatitaapput.
Angusanik kukkunersiuinermi ukiumoortumillu kukkunersiuinermi pingaarnertut maluginiakkat ukiumoortumik nalunaarusiami katersorneqassapput, taannalu naalakkersuisunut inatsisartunullu tunniunneqassaaq.
Danmark
Danmarkimi naalagaaffiup ingerlatsineranik kukkunersiuisoqarnikkut nakkutilliineq marlunngorlugu avitaavoq: Naalagaaffiup kukkunersiuisoqatigiivi aammalu naalagaaffiup kukkunersiuisua.
Naalagaaffiup kukkunersuisoqatigiviit arfinillit (taakkununngalu tamanut sinnissussat) ukiut sisamakkaartumik Folketingimit toqqarneqartarput.
Inatsisini Tunngaviusuni § 47, imm. 2 naapertorlugu naalagaaffiup kukkunersiuisoqatigiivisa naalagaaffiup naatsorsuutai ukiumoortut misissorlugillu naalagaaffiup isertai tamarmik tassani nalunaarneqarsimanersut aammalu aningaasanut inatsimmik aningaasaliissutinulluunniit inatsimmik allamik tunngaveqanngitsumik aningaasartuuteqartoqannginnissaa nakkutigisarpaat.
Aningaasaliissutinik nakkutilliineq, maleruagassat allat maleruaqqusallu malinneqarnerannik nakkutilliineq aammalu aningaasaliissutigineqartunik aqutsinermi aningaasaqarnikkut innimigisassat pisariaqartut mianerineqarnersut nakkutilliinermut ilaapput. Aningaasaliissuteqarnermi aalajangiinernilu allani paasissutissat pisariaqartut Folketingimut taassumalu ataatsimiititaliaannut nalunaarutigineqarsimanersut naalagaaffiup kukkunersiuisoqatigiivisa aamma naliliiffigisarpaat.
Suliassaminnik isumaginninnerminni naalagaaffiup kukkunersiuisoqatigiivisa naalagaaffiup kukkunersiuisua suleqatigisarpaat.
Naalagaaffiup kukkunersiuisoqatigiivisa inassuteqarnerisigut Folketingillu Suleriaatsimut Ataatsimiititaliaanit akuersissutigineqartumik naalagaaffiup kukkunersiuisua Folketingip siulittaasuanit toqqagaasarpoq.
Naalagaaffiup kukkunersiuisua suliaminik ingerlatsinermini arlaannaannulluunniit atuumassuteqanngilaq. Misissuinernilli erseqqinnerusumik nalunaakkanik ingerlatsinissamik, taakkulu pillugit nalunaarusiornissamik naalagaaffiup kukkunersiuisua naalagaaffiup kukkunersiuisoqatigiivinit qinnuigineqarsinnaavoq.
Naalagaaffiup kukkunersiuisoqatigiivi naalagaaffiup naatsorsuutaanik misissuineranni naalagaaffiup kukkunersiuisua ikiuuttarpoq.
Naatsorsuutit eqqortuunersut aammalu atuinerit naatsorsuusutinik tunniussinermi ilaatinneqartut aningaasalissutinut, inatsisinut najoqqutassianulluunniit allanut nalunaarutigineqartunut kiisalu isumaqatigiissutigineqartunut nalinginnaasumilluunniit periutsinut naapertuunnersut kukkunersiuinermi misissorneqartarpoq. Naatsorsuutini ilaatinneqartunik aningaasanik aqutsinermi suliffeqarfinnillu ingerlatsinermi aningaasaqarnikkut innimigisassat mianeriniarneqarsimanersut aamma nalilerneqartarpoq.
Paasissutissanik taamaattunik tamanik naalagaaffiup kukkunersiuisuata suliaminik ingerlatsinermini pingaaruteqartutut isigisaanik ilisimatinneqarnissaq pisortat oqartussaaffeqarfiinut tamanut naalagaaffiup kukkunersiuisuata piumasarisinnaavaa.
Naatsorsuutit misissorumallugit aktieselskabinit naalagaaffimmit tamakkiisumik pigineqartunit aktieselskabinillu naalagaaffiup aalajangiisuusumik sinniuteqarfigisaannit tunniunneqarnissaat naalagaaffiup kukkunersiuisuata toqqaannartumik piumasarisinnaavaa. Tamannali aktieselskabinut børsimi nalunaarsorsimasunut atuutinngilaq. Aktieselkabit børsimi nalunaarsorsimasut aktieselskabillu naalagaaffimmit tamakkiisuunngitsumik pigineqartut naalagaaffimmillu aalajangiisuusumik sinniuteqarfigineqanngitsut naatsorsuutaat ministeri susassaqartoq aqqutigalugu pissarsiariniarneqartarput.
Naatsorsuutit aktieselskabinit naalagaaffimmit tamakkiisumit pigineqartunit aktieselskabinillu naalagaaffiup aalajangiisuusumik oqartussaaffigisaanit naalagaaffiup kukkunersiuisuata pissarsiarissallugit piumasarisinnaasai tassaapput ukiumoortumik naatsorsuutit suliffeqarfissuit naatsorsuutaannik ukiumoortumillu nalunaarutinik, piffissap ilaanut naatsorsuutinik naatsorsuutillu immikkuualuttortaannik kiisalu naatsorsuutinut attuumassuteqartunik atortussanik ilaqartinneqarsinnaasut, taakkununngalu ilaapput naatsorsuutinut inissitsiterinermi atorneqarsimasut, pisortaasut nalunaarsuutaat atortullu assingusut, kukkunersiuisut nalunaarsutaat nalunaarusiaallu il.il. kiisalu atortussat paasissutissallu allat naalagaaffiup kukkunersiuisuata suliamik ingerlatsinermini pingaaruteqartutut naliligai.
Naatsorsuutit aktieselskabinit børsimi nalunaarsorsimasunit aktieselskabinillu naalagaaffimmit tamakkiisuunngitsumik pigineqartunit naalagaaffimmillu aalajangiisuusumik sinniuteqarfigineqanngitsunit naalagaaffiup kukkunersiuisuata piumasarisinnaasai ukiumoortumik naatsorsuutit pillugit inatsit naapertorlugu ukiumoortumik naatsorsuutit il.il. saniatigut tassaapput atortussat naatsorsuutinik misissuinissami pingaarutillit ministerip pissarsiarisinnaasai.
Aktieselskabit naalagaaffimmit tamakkiisumik ilaannakuusumilluunniit pigineqartut naatsorsuutaannik misissuinermi pingaartumik nakkutigineqassapput naatsortuutit tutsuiginartumik kukkunersiorneqarsimanersut, tapiissuteqarnermi il.il. piumasaqaatit eqquutsinneqarsimanersut, aningaasat aalajangersakkat naapertorlugit atorneqarsimanersut aammalu aningaasanik aqutsinermi aningaasaqarnikkut innimigisassat mianeriniarneqarsimanersut.
Naalagaaffiup kukkunersiuisua sulinini pillugu naalagaaffiup kukkunersiuisoqatigiivinut ukiumoortumik nalunaarusiortarpoq. Tamatuma saniatigut suliat aningaasaqarnikkut tunngaviusumilluunniit annertuumik pingaaruteqartut naammassinerini naalagaaffiup kukkunersiuisua naalagaaffiup kukkunersiuisoqatigiivinut nalunaarusiortarpoq.
Suliat naalagaaffiup kukkunersiuisuata nalunaarusiorfigisai tunniunneqannginnerminni ministerimut susassaqartumut aammalu suliat aktieselskabinut tunngasut pineqartillugit sapinngisamik ingerlatseqatigiiffiup pineqartup siulersuisuinut saqqummiunneqassapput.
Oqaaseqaatigiunnakkaminnik ilallugit naalagaaffiup kukkunersiuisuata nalunaarusiai naalagaaffiup kukkunersiuisoqatigiivisa Folketingimut ministerimullu susassaqartumut nassiuttarpaat. Taamaalillutillu naalagaaffiup kukkunersiuisuata nalunaarusiai tunngavigalugit naalagaaffiup kukkunersiuisoqatigiivi tassaapput ministereqarfinnut il.il. isornartorsiuteqartartut.
4. Tusarniaaneq
4.1. Kukkunersiuinermut Ataatsimiititaliap inatsisissatut siunnersuutaa.
Inatsisartut 2004-imi upernaakkut ataatsimiinneranni aktieselskabet Namminersornerullutik Oqartussanit ilaannakuusumik tamakkiisumilluunniit pigineqartut pillugit Naalakkersuisut paasitinneqarsinnaanerat pillugu Inatsisartut Naalakkersuisullu pillugit Inatsisartut inatsisaata allan-ngortinneqarnissaanik siunnersuut Kukkunersiuinermut Ataatsimiititaliamit nalunaarutiginneqartoq siunnersuutip aallaavigisaa pillugu immikkoortumi matumani ilisimatitsissutigineqarpoq.
Kukkunersiuinermut Ataatsimiititaliap inatsisissatut siunnersuutaa tamatuma kingorna ukunani tusarniaassutigineqarpoq; KANUKOKA, Royal Greenland A/S, TELE Greenland A/S, Pilersuisoq A/S (KNI A/S), Arctic Umiaq Line A/S, Kalaallit Nunaanni Sulisitsisut Peqatigiiffiat, Kalaallit Nunaanni Inuussutissarsiorneq pillugu siunnersuisoqatigiit, Nuna Minerals A/S, Nunaoil A/S, Royal Arctic Line A/S, PriceWaterhouseCoopers Grønland A/S, Deloitte, Nunaatta Naqiterivia A/S, Inuussutissarsiornermut, Nunalerinermut Sulisoqarnermullu Pisortaqarfik, Namminersorneq pillugu Pisortaqarfik (Siulersuisut allattoqarfiat), Aalisarnermut Piniarnermullu Pisortaqarfik, Aningaasaqarnermut Pisortaqarfik aammalu Kalaallit Nunaanni Politimesteri.
Tusarniaanermi illuatungerisanit taaneqartunit tamanit tusarniaanermut atatillugu akissutinik tigusaqartoqarpoq. Inatsisissatulli siunnersuummut Kalaallit Nunaanni Politimesteri oqaaseqaatissaqarsimanngilaq. Kalaallit Nunaanni Sulisitsisut Peqatigiiffiat taamaallaat inatsisit nalersorneqarnissaannut oqaaseqaatissaqarpoq. Namminerisamik tusarniaanermut akissummik suliaqarnissamut periarfissaqartoqarsimanngitsoq Royal Artic Line A/S-ip ilisimatitsissutigaa tamutali ilutigisaanik Royal Greenland A/S-imit aamma TELE Greenland A/S-imit saqqummiunneqartut isumaqatigineqartut ilisimatitsissutigalugu.
Ilisimatitsissutigineqareersutuut Kukkunersiuinermut Ataatsimiititaliap inatsisissatut siunnersuutaanit maannakkut inatsisissatut siunnersuut aallaaveqarpoq. Tusarniaanermiilli akissutit siunnersuummut annertoorujussuarmik ilanngunniarneqarsimapput sukkulluunniilli tusarniaanermit akissutini isummersornerit nalilersuinerillu saqqummiunneqartut suleqatigiisitamit taperserneqarnerattut paasineqassanngilaq kisiannili siunnersuutip amerlanerpaanit taperserneqarnissaata kissaatigineqarneratut paasineqassalluni.
Tusarniaanermit akissutit qulequtakkaartumik ilusilerlugit inatsisissatullu siunnersuummut matumunnga innersuussutit tigusat qanoq annertutigisumik ilanngunneqarsimanersut tulliuttumi nassuiaatigineqassapput. Oqaaseqaatit eqqaassanngikkaanni inatsisinik nalilersuinerinnaassaaq.
Siunnersuutip siunertaa.
Siunnersuut pisariaqanngitsutut anguniagarlu allatigut periarfissatigut anguneqarsinnaasoq tusarniaanermi illuatungerisat arlallit isumaqarput.
Suliffeqarfiit naatsorsuutinik tunniussisarnissaannut tunngatillugu maannakkut maleruagassat suliffeqarfinni pissutsinik pisariaqartumik paasisaqartitsisinnaasut KANUKOKA isumaqarpoq, tamatumalu saniatigut Naalakkersuisunut ilaasortamik pineqartumik isumasioqateqarnissamut aggersaasinnaanermut Kukkunersiuinermut Ataatsimiititaliaq periarfissaqartoq ilassutigalugu.
Namminersornerullutik Oqartussat aktiaatilittut soqutigisaannik illersorneqarsinnaasumik isumaginninnissamut Naalakkersuisut pisussaaffimminnik eqquutsitsinngippata inatsisiliornerup atuuttup Inatsisartut nakkutilliinissamut piginnaatereerai naalakkersuinikkullu akisussaatitsisinnaatereerai Arctic Umiaq Line A/S-ip toqqammavilersuutigai. Taamaattumik Inatsisartut inissisimanerannik patajaallisaaniarnermut Kukkunersiuinermut Ataatsimiititaliap siunnersuutaa ilapertuutaanngitsoq Arctic Umiaq Line A/S isumaqarpoq.
Namminersornerullutik Oqartussat aktiaatilittut soqutigisaannik illersorneqarsinnaasumik Naalakkersuisut isumaginninnerisa Inatsisartunit nakkutilliivigineqarnissaannut maannakkut periarfissat naammattuusut Nunatta Naqiterivia A/S isumaqarpoq. Taamaalilluni suliffeqarfik pillugu Naalakkersuisut aktiaatilittut paasitinneqarsinnaanerannik periarfissamut, Namminersornerullutik Oqartussat aktiaataannut Naalakkersuisunut ilaasortap akisussaaneranut kiisalu Inatsisartut Naalakkersuisunut ilaasortamut apeqquteqarsinnaanerannut Nunatta Naqiterivia A/S innersuussivoq.
Ingerlatseqatigiiffinnut allattoqarfiup, aktiaatilittut inissisimanermik allaffissornikkut qaffasissusilimmik isumaginnittuusup, aningaasaliinikkut sulisoqarnikkullu patajaallisarneqareernera Ingerlatseqartigiiffinnut Allattoqarfiup tikkuarpaa. Tamatuma saniatigut nunatsinni Ingerlatseqatigiiffinnik aqutsilluarnissamut inassuteqaatinik suleqatigiisitaq suliaqareerpoq. Taamatuttaaq aktieselskabini Namminersornerullutik Oqartussat aalajangiisuusumik sunniuteqarfigisaanni ukiup affakkaartumik naatsorsuutinik tunniussisarnissamik piumasaqaat aktieselskabit pillugit inatsisikkut aamma ukiumoortumik naatsorsuutit pillugit inatsisikkut nutaakkut eqqunneqarnikuuvoq. Taamaattumillu ingerlaavartumik nalunaaruteqartarnissap annertuumik patajaallisaavigineqarnera taamaalillunilu pissusissamisuunngitsunik pisoqarsimatillugu akulerussinnaanermut periarfissap annertuumik patajaallisarneqarsimanera pilersinneqareerluni.
Namminersornerullutik Oqartussat soqutigisaannik aktiaatilittullu inissisimanerannik isumaginninnissamut atugassanik paasissutissanik pisariaqartumik pissarsiniartarneq ajornarluinnangajattuusoq, pissuserlu tamanna ungasinnerusoq isigalugu "naalagaaffimmi naalagaaffik"-iup pilernissaa pinngitsoorniarlugu pisariaqalersinnaasoq Inatsisartut tungaannit annertunerusumik aqutsilersinnaaneq atorneqalertariaqartoq, tamannali periarfissat kingullersarisariaqaraat Aalisarnermut Piniarnermullu Pisortaqarfimmit tunngavilersuutigineqarpoq. Nakkutilliineq atorneqartussatut eqqarsaatigineqartoq Naalakkersuisunut ilaasortat akisussaanerat pillugu Inatsisartut inatsisaannik tapertalerlugu Naalakkersuisut annertunerusumik suliuteqarnerisigut anguneqarsinnaavoq.
Mumittuanik allannguutissatut siunnersuutiginertunut tunngavilersuutit ataatsimut isigalugit isumaqatiginartuusut PriceWaterhouseCoopers-ip oqaatigaa.
Inatsisartut Kukkunersiuinermut Ataatsimiititaliaat Inatsisartut 2000-imi ukiakkut ataatsimiinneranni nalunaarummik taamanili saqqummiussivoq, tassani aktieselskabit Namminersornerullutik Oqartussanit pigineqartunut ilaatigut atatillugu Kukkunersiuinermut Ataatsimiititaliap oqartussaassuseqarnerata annertusineqarnissaanik pisariaqartitsisoqarnera ataatsimiititaliamit oqaatigineqarluni. Oqartussaassuseqarnerup taama ittup annertusineqarnissaa eqqarsaatigalugu nalunaarusiap taassuma malittaatut ataatsimiititaliaq 2001-imi ukiuakkut ataatsimiinnermi aalajangiiffigisassatut siunnersuummik saqqummiussivoq.
Maleruagassat atuuttut naapertorlugit Kukkunersiuinermut Ataatsimiititaliaq taamaallaat Nunatta karsiata naatsorsuutaanut suliffeqarfiillu nammineertitanut paasisaqartitaasinnaatitaavoq ilutigisaanilli aktieselskabit Namminersornerullutik Oqartussanit pigineqartut Kukkunersiuinermut Ataatsimiititaliamit nakkutilliivigineqarsinnaanatik. Suliffeqarfiit pisortanit pigineqartut arlallit 90-ikkut ingerlaneranni aktieselskabinngortinneqartarsimasut taamaalillunilu Nammminersornerullutik Oqartussat nalilinnik pigisaannik aqutsinermut atatillugu Inatsisartut paasisaqarsinnaatitaanerat annikilliaartuaarsimasoq nalunaarusiami 2000-imeersumi aamma malitsitut aalajangiiffigisassatut siunnersuummi Kukkunersiuinermut Ataatsimiititaliap oqaatigaa. Tamanna Inatsisartut aningaasaliisarnermik tigumminnittutut aamma aningaasaliissutit atorneqarnissaannut nakkutilliinerannut nalinginnaasumik akuerisaasumik tamat oqartussaaqataaneranni tunngavissaatitaasunut tulluuttuunngitsoq Kukkunersiuinermut Ataatsimiititaliap allappaa.
Kukkunersiuinermut Ataatsimiititaliap aalajangiiffigisassatut siunnersuutaa pillugu Inatsisit Atortinneqarnerannut Ataatsimiititaliap isumaliutissiitaani takuneqarsinnaavoq, tunngaviusumik isummersornerit Kukkunersiuinermut Ataatsimiititaliap aalajangiiffigisassatut siunnersuutiminut toqqammavilersuutigisai Inatsisit Atortinneqarnerannut Ataatsimiititaliap ataatsimut isigalugu tapersersinnaagai. Inatsisilli Atortinneqarnerannut Ataatsimiititaliaq isumaqarpoq, Inatsisartut paasissutissanik pissarsisinnaanissaannut patalaallisaanissaq pisariaqartinneqartoq, tamat oqartussaaqataanerat kisiat eqqarsaatiginagu kisiannili aamma suliffeqarfiit Namminersornerullutik Oqartussanit pigineqartut tamakkiisumik ingerlanneqarnissaasa qulakkeerneqarnissaat eqqarsaatigalugu. Taamaalilluni suliffeqarfiit Namminersornerullutik Oqartussanit pigineqartut ingerlatsivineqarneranni misilittakkat Inatsisit Atortinneqarnerannut Ataatsimiititaliamit innersuussutigineqarput. Ataatsimiititaliap isumaliutissiissutaa Inatsisartuni amerlasuunit taperserneqarpoq. Taamaammat Kukkunersiuinermut Ataatsimiititaliaata pisinnaatitaanerata annertusineqarnissaa pisariaqartoq Inatsisartut isummerput. Matumunnga naapertuuttumik inatsisissatut siunnersuut una suliarineqarpoq.
Aktieselskabet Namminersornerullutik Oqartussanit pigineqartut pillugit Aningaasaqarnermut Ataatsimiititaliap paasisaqarsinnaatitaanera.
Ataatsimiititaliap siunnersuutinik imaluunniit aningaasalersuinissamut qularnaveeqqusiinissamulluunniit qinnuteqaatinik suliarinninneranut atatillugu Aningaasaqarnermut Ataatsimiititaliap paasitinneqarsinnaatitaanissaa Kukkunersiuinermut Ataatsimiititaliap siunnersuutaata nassataraa.
Aningaasaqarnermut Ataatsimiititaliap suliamik suliarinninneranut atugassanik aktieselskabip aningaasalersorneqarnissaanut qularnaveeqqusiiffiginissaanulluunniit suliaqarnermut atatillugu paasissutissanik pisariaqartunik pissarsitinneqarsinnaanera pissusissamisoortoq Nunatta Naqiterivia A/S isumaqarpoq.
Aktiaatillip aktieselskabit pillugit inatsit naapertorlugu aktieselskabimit paasissutissinneqarsinnaanera amerlasuutigut aningaasalersuisumit qularnaveeqqusiisumillunniit annikinnersusartoq Royal Greenland A/S-imit aamma TELE Greenland A/S-imit taakkartorneqarpoq. Taamaattumik Aningaasaqarnermut Ataatsimiititaliaq pillugu aalajangersagassatut siunnersuutigineqartoq ataatsimiititaliap paasitinneqarsinnaaneranik annertusiinavianngitsoq Royal Greenland A/S-ip aamma TELE Greenland A/S-ip naliliiffigaat.
Namminersornerullutik Oqartussat aningaasaliisutut imaluunniit aningaasalersuisutut aktieselskabit pillugit inatsit imaluunniit malittarisassani aalajangersakkat naapertorlugit paasissutissinneqarnissamik aktieselskabimut piumasaqarsinnaanngitsoq Deloitte-mit assigisaanik taaneqapoq.
Tunngaviusumik suliffeqarfik Namminersornerullutik Oqartussanit ilaannakuusumik tamakkiisumilluunniit pigineqartumut suliffeqarfik taanna Namminersornerullutik Oqartussat kissaatigisaattut paasissutissanik tunniussiumanngippat, Namminersornerullutik Oqartussat aningaasalersuinissamut qularnaveeqqusiinissamulluunniit itigartitsisinnaapput. Taamaalilluni aningaasaliissuteqarumasup qularnaveeqqusiiumasulluunniit kinaagaluarnersup allap paasissutissanik pissarsisinneqarsinnaanerata asserluinnaanik Namminersornerullutik Oqartussat periarfissaqarput; -paasissutissanik pissarsisinnaaneq amerlasuutigut aktiaatillip aktieselskabit pillugit inatsit naapertorlugu paasissutissanik pissarsisinnaaneranit annertunerusoq. Pisuni suliffeqarfiup piuinnarnissaa aningaasaqarniarneraluunniit aningaasanik amigaateqarnikkut ulorianartorsiortinneqartillugit (taamaalillunilu Namminersornerullutik Oqartussat soqutigisaat aamma) taava Namminersornerullutik Oqartussat isumaqatigiinniarsinnaanerminni inissisimanerat sanngiillisinneqarsimassaaq. Misilittakkallumi aamma takutippaat aningaasalersuinissamut qularnaveeqqusiinissamulluunniit suliani tamarmiusuni paasissutissanik ataatsimiititaliamit kissaatigineqartunik tamatiguunngitsoq Aningaasaqarnermut Ataatsimiititaliaq tigusaqartarsimanngitsoq. Naak siunnersuutikkut Aningaasaqarnermut Ataatsimiititaliap paasissutissanik pissarsisinnaanera annertusitinneqarsinnaagunanngikkaluartoq tamatuma ersarissisinneqarnissaanut manna iluaqutaassaaq, imminik aningaasalersuinissamut qularnaveeqqusiinissanullu atatillugu inatsisartoqarnikkut nakkutilliineq patajaallisinneqartussatut nalilerneqasinnaavoq. Taamaattumik siunnersuummik matumannga ilusiliineq attatiinnarneqarpoq.
Aningaasaqarnikkut allatullu ittumik akornutit
Namminersornerullutik Oqartussat allaffissornikkut aningaasartuutaasa qaffannerannik ilutigisaanillu kommuninut tunngasutigut sipaaruteqarnernik siunnersuut nassataqarumaartoq KANUKOKA-mit taaneqarpoq. Tamanna aningaasartuuteqarfik siulliutitassaq pitsaanngitsuusoq nuna tamakkerlugu peqatigiiffik isumaqarpoq.
Siunnersuut marloriaammik allaffissornermik annertunerusumillu nukinnik atuiffiulissasoq Siulersuinut allattoqarfiup aarlerisaarutigaa, suliffeqarfiimmi kukkunersiuisui kukkunersiuinernik ingerlassaqareerput suliffeqarfiillu siulersuisuinut pissusissamisuunnginnernik tikkuussinissamut annertuumik pisussaaffeqareerlutik. Suliffeqarfiit tutsuiginartumik ingerlanneqarnissaat suliffeqarfiit siulersuisuisa qulakkiissallugu pisussaaffigereerpaat. Tamatuma qulakkeernissaanut suliffeqarfiillu aningaasaqarnikkut naammaginartumik ineriartortinneqarnissaannik nakkutilliisussanik Naalakkersuisut siulersuisunik toqqaasarput. Taamaalilluni kukkunersiuinerup / nakkutilliinerup qaffasissusaa aningaasartuuteqarnartoq alla pilersinneqartussaassaaq.
Namminersortut amerlanerusut annaasaqaataasinnaasunik aningaasaliinissaminnut nakkutilliissutit amerlanerulerneri kajumissaatiginavianngikkaat Nuna Minerals A/S-imit taaneqarpoq.
Inatsisartut ataatsimiititaliaat Namminersornerullutik Oqartussat aktieselskabiutaannik Namminersornerullutillu Oqartussat aktiaatilittut soqutigisaannik Naalakkersuisut isumaginninnerannik nakkutilliinissamut inatsimmit aalajangerneqartumik pisinnaatitaaffiliinerup Namminersornerullutik Oqartussat suliffeqarfiutaasa aktieselskabinngortinneqarneranni inuussutissarsiornikkut sunniuteqarnissamik anguniagaq anguneqanngitsoorluarsinnaasoq Aalisarnermut Piniarnermullu Pisortaqarfiup aarlerisaarutigaa. Naalakkersuinikkut toqqaannartumik sunniuteqartarnerup annikillisinneqarnissaa kissaatigalugu suliffeqarfiit taamaalillutik ingerlatsinerminnik pitsanngorsarnissartik aallussinnaaniassammassuk aktieselskabit Namminersornerullutik Oqartussanit pigineqartut pilersinneqarnerat toqqammaviusoq KANUKOKA-mit assinganik taaneqarpoq. Kukkunersiuinermut Ataatsimiititaliamit siunnersuutikkut niuerpalaartumik ingerlatsineq suliffeqarfinniit aammaartumik ingerlanneqarunnaarsinnaaneranut aarleqqutissaqartoq KANUKOKA isumaqarpoq.
Niuernikkut iliuuserisartakkaminik isertuussisinnaanermik suliffeqarfiup pisariaqartitsinera Nuna Minerals A/S-ip tikkuarpaa. Assigisaanik suliffeqarfiup nammineerluni isumaqatigiissuteqarfigineqartullu paasissutissaataat mianernartut Inatsisartunit Kukkunersiuinermut Ataatsimiititaliamiit misissuiffigineqarsinnaalernerat suliffeqarfimmut Namminersornerullutik Oqartussanit pigineqartumut pitsaanngitsumik sunniuteqarsinnaammat Royal Greenland A/S-ip aamma TELE Greenland A/S-ip tamanna innersuunneqarsinnaanngitsoq allappaat.
Namminersornerullutik Oqartussat allaffissornikkut aningaasartuutaasa qaffasinnaanerat pillugu apeqqut eqqarsaatigalugu Aningaasaqarnermut aamma Kukkunersiuinermut Ataatsimiititaliat qanoq annertugisumik paasissutissanik pissarsiniartarumaarnerannik qaffariaat taamaattoq aallaveqassaaq. Aningaasaqarnermut Ataatsimiititaliap aamma Kukkunersiuinermut Ataatsimiititaliap avataanit ikiorserneqartarnerat Inatsisartut missingersuutaasa tamarmiusut iluini pisarpoq. Matumannga annertunerusumik qaffariaateqartitsinissaq piffisami matumani naatsorsuutigineqanngilaq.
Namminersornerullutik Oqartussat aktiaatilittut soqutigisaasa Naalakkersuisunit isumaginnineqarnerat inatsisartutigoortumik nakkutilliivigineqarnerata patajaallisinneqarneratigut soqutigisat taakku isumagineqarnerisa pimoorunneqarnerunissaat nukittorsarneqassasoq ilimagineqarsinnaavoq. Taamaalilluni siunnersuut toqqaannanngitsumik Naalakkersuisut allaffeqarfianni nukissanik annertunerusunik pisariaqartitsinermik pilersitsisinnaavoq. Paarlattuanik aktieselskabini pineqartuni Namminersornerullutik Oqartussat aningaasaliissuteqarfigisimasaanni naleqassutsinut sanilliullugu Namminersornerullutik Oqartussat aktiaatilittut soqutigisaannik isumaginninnerup patajaallisinneqarnera pitsaasumik sunniuteqarsinnaasoq ilimagineqarsinnaavoq.
Namminersornerullutik Oqartussat suliffeqarfiutaasa aktieselskabinngortinneqarneranni inuussutissarsiornikkut sunniutissatut anguniagaasoq siunnertuutip atuuttuujunnaarsissagaa ilimagineqanngilaq. Paarlattuanik Namminersornerullutik Oqartussat aktiaatilittut soqutigisaannik inatsisartutigoortumik nakkutilliinerup patajaallisarnissaa siunnersuutip siunertaraa taamaalillunilu suliffeqarfiup ingerlanneqarnerata pitsanngorsarnissaanut kajumissaataassalluni.
Kiisalu suliffeqarfiit niuernikkut iliuuserisartakkaminnik isertuussisarnissamut pisariaqartitaat eqqarsaatigalugit, ajornartorsiut taanna siunnersuummi matumani atorneqartutut ilusiliinermut sanilliullugu piffissami matumani (tamakkiisumik) pineqanngilaq, aktieselskabimmi pillugit inatsimmit suliffeqarfiullu maleruagassaanit tunngavissaqartitsilluni paasissutissat pissarsiarineqarsinnaanerinut periarfissat siunnersuummi aallaavigineqarmata. Matumani ilanngunneqassaaq aktieselskabit Namminersornerullutik Oqartussanit pigineqartut pillugit paasissutissat pissarsiarineqartut, paasissutissat isertuussisussaatitaanermik peqquneqaammik ilallugit tunniunneqarsimatillugit, pillugit Kukkunersiuinermut Ataatsimiititaliaq (assinganik Aningaasaqarnermut Ataatsimiititaliaq) taakkulu ilaasortaat atorfilittaallu nipangiusimannittussaatitaammata. Nipangiusimannittussaatitaaneq taanna pinerluttulerineq pillugu inatsimmi aalajangersakkat aqqutigalugit kinguneqaatissinneqartarpoq. Ataatsimiititaliat ilaasortaasa nipangiusimannittussaatitaanermut matuminngalu malinninnginnerup isigineqartarnerata ilungersunarluinnartutut isigisariaqarneranut maluginiaanissaat qulakkeerumallugu siunnersuutigineqartarpoq ataatsimiititaliani ilaasortaat ataatsimiititaliamut ivertinneqarnerminni nipangiusiannittussaaneq eqqortikkumallugu ilumoorluinnarumallutik nalunaarnertik allaganngorlugu atsiortassagaat.
Suliffeqarfiup kukkunersiuisua aqqutigalugu paasissutissanik pissarsisarneq
Aktieselskabini Namminersornerullutik Oqartussat aalajangiisuusumik sunniuteqarfisaanni Namminersornerullutik Oqartussat aktiaatilillut soqutigisaannik nakkutillinissamut Kukkunersiuinermut Ataatsimiititaliap atugassaminik aktieselskabip kukkunersiuisuanit atortussanik pisariaqartunik, ilanngussanik, nalunaarusianik il. il. pissarsiniarsinnaanera pillugu aalajangersagaq Kukkunersiuinermut Ataatsimiititaliap siunnersuutaani ilaavoq. Paasissutissat ataatsimiititaliamit pissarsiarineqartut pillugit aktieselskabip kukkunersiuisuata Naalakkersuisut allallu aktiaateqarsinnaasut nuutitanngorlugu ilisimatittassagai aalajangersakkami aamma allassimavoq.
Assinganik Aktieselskabini Namminersornerullutik Oqartussat aalajangiisuusumik sunniuteqarfisaanni taamaattoq aktieselskabinut aningaasalersuinissamik qularnaveeqqusiinissamilluunniit siunnersuutinik qinnuteqaatinilluunniit suliarinninnermut taamaallaat atugassanik aktieselskabinut suliffeqarfiup kukkunersiuisuanit atortussanik, ilanngussanik, nalunaarusianik il. il. Aningaasaqarnermut Ataatsimiititaliaq pissarsiniarsinnaasoq pillugu aalajangersagaq ilaavoq.
Taama ilusiliisimanermut tusarniaavigineqartut arlallit aarlerisaaripput.
Paasissutissat suliffeqarfiup kukkunersiuisuanit pinatik aktieselskabimiilli toqqaannartumik matumani suliffeqarfiup siulersuisuinit aqutsisuiniilluunniit pissarsiariniarneqartariaqartut Nunatta Naqiterivia A/S isumaqarpoq.
Paasissutissat pisariaqartut ataatsimiititaliamut suliffeqarfiup ulluinnarni aqutsisuisa pitsaanersumik periarfissaqarlutik tunniussinnaagaluaraat Royal Greenland A/S-ip aamma TELE Greenland A/S-ip tikkuarpaat. Tamatuma saniatigut paasissutissat kissaatigineqartut kukkunersiuisumit saqqummiunneqartittarnissaannut atatillugu aningaasartuutissat suliffeqarfiit marluusut tikkuarpaat. Kiisalu suliffeqarfiup pissutsit isertuussai pillugit paasissutissat ingerlateqqinneqartarnerisa, kukkunersiuineq pillugu inatsit, eqqartuussisarneq pillugu inatsit kiisalu aktieselskabit pillugit inatsit naapertorlugu kukkunersiuisut nipangiusimannittussaatitaanerisa sanioqqunneqarnissaa nassataassasoq suliffeqarfiit tikkuarpaat.
Kukkunersiuisut paasissutissiisinnaassuseqarnerat aamma nipangiusimaninnittussaatitaanerat kukkunersiuisut pillugit inatsimmit aamma aktieselskabit pillugit inatsimmit aalajangersarneqartup sanioqqunneqarnissaa Kukkunersiuinermut Ataatsimiititaliap ilusissatut siunnersuutaanit nassatarineqassasoq aamma Arctic Umiaq Line A/S-ip allappaa. Inatsisit taakku marluk Folketingimit akuersissutaasimammata taakku sanioqqunneqarnissaat Folketingip kisimi akuersissutigisinnaavaa. Taamatuttaaq ilusiliineq Kukkunersiuisarfiup PriceWaterhouseCoopers-imit eqqarsarnartoqartinneqarpoq, tamatuma kukkunersiuisup nipangiusimannittussaatitaaneranik nalinginnaasumik atorunnaarsitsinissaq nassatarisussaammagu kukkunersiusullu inissisimanera suliffeqarfimmut pineqartumut aktiaatilimmullu sumulluunniit atuumassuteqartuunngitsoq kinaassusersiortuunngitsorlu sanngiillisinneqassammat. PriceWaterhouseCoopers-ip paasinninnera naapertorlugu atortussat tamaasa paasissutissallu tamakkerlugit Kukkunersiuinermut Ataatsimiititaliamit kissaatigineqarsinnaasut suliffeqarfiup siulersuisui aqqutigalugit pissarsiariniarneqartariaqarput. Paasissutissat tamakkiisuunersut nalornissutaatillugu pissarsiniarnermut atatillugu paasissutissat tamakkiisuusut eqqortuusullu suliffeqarfiup kukkunersiuisuata uppernarsassagaa siulersuisut qinnuigineqarsinnaapput.
Kukkunersiuisarfik Deloitte isumaqarpoq, ilanngussanik pisariaqartunik, atortussanik, allagaatinik paasissutissanillu allanik tunniussisarnissaq aqutsinikkoortumik suliassaasoq tamannalu tunngavigalugu kukkunersiuisumit aatsaat isumagineqarsinnaasoq, suliammi pissusiatigut aningaasatigut kukkunersiuinermut atatillugu kukkunersiuisup suliassaasa avataaniittuni pissutsinut kukkunersiusoq tamakkiisumik ilisimasaqartanngimmat. Pisulli ilaanni suliffeqarfiup aqutsisuisa paasissutissat tunniussaat suliffeqarfiup kukkunersiuisuata uppernarsaavigissagai qinnutigineqartassappat pissusissamisuussaaq.
Tamakku saniatigut aqutsisoqarfiit suliffeqarfiullu kukkunersiuisuisa pisinnaatitaaffiinik suliffeqarfiit pillugit inatsiliornikkut aalajangersaanermut tunngatillugu ajornartorsiut tusarniarneqartut arlallit tikkuarpaat.
Kukkunersiuinermut Ataatsimiititaliap misissuinerisa inerliliussaasalu aqutsinermut akisussaanerup siulersuisuniit aqutsisunut nuunneqaratarsinnaanera – kiisalu suliffeqarfimmut atatillugu kukkunersiuinermik ingerlatsineq qulaajaanertut isikkoqalersinneqarsinnaammat, tamanna aktieselskabit pillugit inatsit naapertorlugu ataatsimeersuarnermi taamaallaat aallartisinneqarsinnaammat, Royal Greenland A/S-ip aamma TELE Greenland A/S-ip aarlerisaarutigaat.
Aqutsisoqarfimmik nutaamik Kukkunersiuinermut Ataatsimiititaliap siunnersuutaatigut eqqussisoqassasoq aktieselskabillu pillugit inatsimmi nalilersorluakkamik pisinnaatitsinerit suliassanillu agguataarinerit taamaalillunik ajorseriartinneqassasut Pilersuisoq A/S allappoq. Tassunga atatillugu piginnittut suliffeqarfiullu akornanni kinaassisersisarnissaq pilersinneqarlersinnaammat aarleqqutissaasoq suliffeqarfiup maluginiaqquaa.
Ataatsimut isiginerusumik – suliffeqarfiit kukkunersiuisui pillugit aqutsisoqarfiillu akisussaaffii suliassaallu pillugit siuliani taaneqartut ataatsimoortillugit – Inuussutissarsiornermut Siunnersuisoqatigiit ernummatigalugu oqaatigaat, Kukkunersiuinermut Ataatsimiititaliap siunnersuutaa saqqummiunneqarnermisut piviusunngortinneqaraluarpat aktieselskabit pillugit inatsimmi aalajangersakkat ilaannik, ilaatigut siulersuisut akisussaanerannik atortussanillu tunniussisinnaanermik maleruagassiisunik atorunnaarsitsinermik kinguneqarsinnaasoq.
Aktieselskabit pillugit inatsimmut, ukiumoortumik naatsorsuutinik suliffeqarfiit ilaasa saqqummiussinissaat pillugu inatsimmut, naalagaaffimmit akuerisaallutik kukkunersiuisut il. il. pillugit inatsimmut, pingaartumik siulersuisut pisinnaatitaaffiinut aamma inissisimanerannut kiisalu suliffeqarfiup siulersuisuinut atatillugu suliffeqarfiup kukkunersiuisuata pisussaaffiinut Kukkunersiuinermut Ataatsimiititaliap siunnersuutaa akerliusoq KANUKOKA isumaqarpoq.
Aktieselskabit pillugit inatsimmi aalajangersakkanut akerliusumik taamaattumillu tassunga atasumik akisussaaffiinut akerliusumik atortussanik tunniussinissamik siulersuisunut ilaasortat aqutsisullu peqquneqarsinnaanissaat Kukkunersiuinermut Ataatsimiititaliap siunnersuutaata nassatarissammagu ernumassuteqarnini Inuussutissarsiornermut Pisortaqarfiup oqaatigaa.
Assinganik tunngaviusumik aktieselskabit inatsisitigut maleruagassaannut Kukkunersiuinermut Ataatsimiititaliap siunnersuutaa naapertuuttuunersoq Nuna Minerals A/S-ip apeqquserpaa.
Kiisalu Naalakkersuisut avaqqullugit Kukkunersiuinermut Ataatsimiititaliap paasissutissanik pissarsiniarsinnaaneranik (kisiannili paasissutissat pissarsiarineqartut Naalakkersuisut nuutitanik ilisimatinneqartarnissaat) Kukkunersiuinermut Ataatsimiititaliap siunnersuutaata periarfissiinisaa tusarniaaffigineqartut arlallit eqqarsarnartoqartippaat.
"Inatsisiliortuusup atuutsitsisuusullu akulerunneqarneri siunnersuummit ersersinneqartoq Inatsisip Tunngaviusup § 3-anut naapertuunnersoq" allaat nalorninartuusoq Pilersuisoq A/S isumaqarpoq. Taamaaqataanik ilusiliineq Naalakkersuisunut ilaasortat akisussaanerat pillugu pissaanerup agguataarneqartarnera inatsisiliornerlu pillugit ilinniartitsissutinut ajornanngitsumik akerliulersinnaanera Inuussutissarsiornermut, Nunalerinermut Suliffeqarnermullu Pisortaqarfimmit tikkuarneqarpoq.
Namminersornerullutik Oqartussat aktiaatilittut soqutigisaannik isumaginninnissamut Naalakkersuisut akisussaasuusut, Inatsisartut/Inatsisartut Kukkunersiuinermut Ataatsimiititaliaat matuminnga nakkutilliisussaasoq Royal Greenland A/S-ip aamma TELE Greenland A/S-ip oqaatigaat. Nakkutilliineq taama ittoq paasissutissanit Naalakkersuisut pissarsiarissallugit periarfissaqarfigisimasaannit taamaallaat tunngaveqartariaqarpoq. Taamaattumik nakkutilliinermi paasissutissat pisariaqartut Naalakkersiusunit toqqaannartumik ataatsimiititaliap pissarsiariniarsinnaasariaqarai suliffeqarfiit taakku marluk isumaqarput. Taamaaqataanik Namminersornerullutik Oqartussat aktiaatilillut soqutigisaannik Naalakkersuisut isumaginninnerat Kukkunersiuinermut Ataatsimiititaliamit nakkutilliivigineqarsinnaanera periarfissikkumallugu siunnersuutip siunertarisaasa ilagigaat Deloitte-p oqaatigaa, isumaqarlunili Kukkunersiuinermut Ataatsimiititaliap suliffeqarfinnik Namminersornerullutik Oqartussanit pigineqartunik ataatsimiititaliaq nakkutilliinissaminut Naalakkersuisuniit pitsaanerusumik periarfissaqartoq, tassa Naalakkersuisut suli suliffeqarfiit pillugit inatsisip periarfissiissutai atorlugit ingerlatsisariaqarmat. Naalakkersuisut aamma Kukkunersiuinermut Ataatsimiititaliap maleruagassatik immikkuullarissut aqqutigalugit suliffeqarfiup paasissutissaataanik pissarsisarnissaat pissusissamisuussasoq Deloitte-p isiginngilaa. Toqqaannartumik aktiaatilittut soqutigisanik Naalakkersuisut isumaginnissappata, Kukkunersiuinermullu Ataatsimiititaliap Naalakkersuisut Namminersornerullutik Oqartussat aktiaatilittut soqutigisaannik illersorneqarsinnaasumik isumaginerannik nakkutilliinermini paasissutissanik Naalakkersuisut pigeriigaannik pissarsitinneqartarnissaa qulakkeerneqarpat pissusissamisoornerpaasujussasoq Deloitte-mit isigineqarpoq.
Siunnersuummi tusarniaassutitut nassiunneqaqqaartumit ilusiliineq alla, siunnersuummi suleqatigiissitatut pilersinneqarsimasup missingiusiaanit aallaaveqarluni saqqummiunneqartumi atorneqartoq takuneqarsinnaavoq. Tassani aktieselskabini Namminersornerullutik Oqartussanit tamakkiisumik ilaannakuusumilluunniit pigineqartuni Namminersornerullutik Oqartussat aktiaatilittut soqutigisaannik nakkutilliinissaminut Kukkunersiuinermut Ataatsimiititaliap Naalakkersuisut peqqusinnaavai suliffeqarfimmit, pisariaqarpat aktieselskabit pillugit inatsimmit suliffeqarfiullu malittarisassaanit tunngavissinneqartumik periarsissat atorlugit paasissutissanik erseqqinnerusumik aalajangikkanik pissarsiniaqqullugit. Taamaalilluni paasissutissanik Naalakkersuisut aqqutigalugit, aktieselskabit pillugit inatsimmut naapertuulluinnartumik suliffeqarfiullu kukkunersiuisua toqqaannartumik attaviginagu pissarsiniarneq pisassalluni.
Naalakkersuisut tassaanngillat aktiaateqartut kisiannili Namminersornerullutik Oqartussat. Namminersornerullutik Oqartussat sinnerlugit Naalakkersiusut aktiaatilittut soqutigisanik isumaginnittuupput. Aktiaateqartup (Namminersornerullutik Oqartussat) aalajangigassaraa ingerlatsisutut immikkoortup (Naalakkersuisut) aamma ingerlatsinermik nakkutilliisutut immikkoortup (Inatsisartut) paasissutissat aktiaatilimmut Namminersornerullutik Oqartussanut tunniunneqartut qanoq ilillutik agguataassaneraat aalajangigassaraa. Tamanna siunertaralugu aaqqissuussinerit aalajangerneqarsimasut aktieselskabit pillugit inatsisiliornermi imaluunniit kukkunersiuisoqarfimmut pineqartumut inatsisiliornermi maleruagassiorneqarsimanngillat.
Taamaalilluni paasissutissanik kissaatigineqartunik Kukkunersiuinermut Ataatsimiititaliamut qanoq ililluni tunniussisarnissap aaqqissuunnissaa suliffeqarfiit ataasiakkaat kisimik aalajangigassaraat. Suliffeqarfiup Namminersornerullutik Oqartussanit tamakkiisuusumik pigineqarnera imaluunniit Namminersornerullutik Oqartussat ikinnerussuteqartumik aktiaateqarnerat apeqqutaatinnagu, aktianut immikkut nioqqutigineqartunut immikkut pisinnaatitaaffeqarneq pillugu aalajangersakkamik maleruagassanut ilanngussisoqarsinnaavoq. Pisinnaatitaaffiit taamaattut assersuutigalugu nioqqutigineqartunik pigisallit allat paasissutissanik suliffeqarfiup siulersuisuisut pisaasa assinginik imaluunniit nioqqutigineqartumik pigisallit allat suliffeqarfiup kukkunersiuisuata pissarsiarisartagaasa assinginik tigusaqartarnissaat akuerineqarsinnaatissinnaavaat.
Suliffeqarfiit børsimut nalunaarsorsimasut pineqarpata aktiaatillit paasissutissinneqartarnerisa qaffasissusaat maleruagassatigoortumik allaanerusumik iliuuseqarfigineqarsinnaanngillat. Paarlattuanilli paasissutissinneqartarnerup qaffasissusaa inatsisiliornerup piumasaqaataanut sanilliullugu kikkut tamaasa eqqarsaatigalugit pitsanngorsaavigineqarsinnaalluarpoq.
Assigiisitsinissamut tunngaviusumut, suliffeqarfimmi aktiaatilinnut atuuttumut sanilliullugu ajornartorsiutaasinnaasut.
Namminersornerullutik Oqartussat tamakkiisuusuunngitsumik piginneqataaffiini aalajangiisuusumilli sunniuteqarfigisaanni Kukkunersiuinermut Ataatsimiititaliap ingerlatsinermik kukkunersiuisarnissaanut periarfissiineq assigiisitsinissamut tunngaviusumut suliffeqarfinni aktiaatilinnut tamanut atuuttumut akerliusorinarnera Nuna Minerals A/S-imit aarlerisaarutigineqarpoq.
Kukkunersiuinermut Ataatsimiititaliap siunnersuutaani atuarneqarsinnaavoq, aktieselskabip kukkunersiuisuata Naalakkersuisuinnaanngitsut kisiannili aktiaateqarsinnaasut allat paasissutissanik ataatsimiititaliamut tunninneqartunik aamma nuutitanngorlugit ilisimatittassagai. Taamaalilluni Kukkunersiuinermut Ataatsimiititaliap siunnersuutaa aktiaatillit tamakkerlutik paasissutissanik Kukkunersiuinermut Ataatsimiititaliamit pissarsiarineqartunik pissarsisinnaatissavai. Taamaattumik Kukkunersiuinermut Ataatsimiititaliap paasissutissanik pissarsisinnaatitaanera kisiat assigiisitsinissamut tunngaviusumut unioqqutitsisooratarsinnaasutut Nuna Minerals A/S-imit isigineqarsimassaaq. Allatulluunniit oqaatigalugu, Namminersornerullutik Oqartussat paasissutissanik pissarsisinnaanerattuulli aktiaatillit allat pissarsisinnaanngitsut.
Ilusiliinerup taassuma inatsisissatut siunnersuummi atorneqartup taaneqareersullu, Kukkunersiuinermut Ataatsimiititaliaq pisinnaatippaa suliffeqarfimmit, pisariaqarpat aktieselskabit pillugit inatsimmit suliffeqarfiullu malittarisassaanit tunngavissinneqartumik periarsissat atorlugit paasissutissanik erseqqinnerusumik aalajangikkanik Naalakkersuisut peqqusinnaagai pissarsiniaqqullugit. Taamaalilluni inatsisissatut siunnersuutip aktiaatillit tamakkerlugit assigiisippai paasissutissanik pissarsiniarsinnaaneq aamma eqqarsaatigalugu.
Aktieselskabip Namminersornerullutik Oqartussanit pigineqartup ilaannakuusumik ingerlatseqatigiiffiutaa pillugu paasissutissaatanik isertuussanik Kukkunersiuinermut Ataatsimiititaliap pissarsinissaaneranut atatillugu ajornartorsiutaasinnaasut.
Aktieselskabip Namminersornerullutik Oqartussanit pigineqartup ingerlatseqatigiiffiutaa pillugu paasissutissanik isertuussanik ataatsimiititaliap pissarsisinneqartalernera Kukkunersiuinermut Ataatsimiititaliap paasissutissanik killeqanngitsumik pissarsisinnaatitaalernerata nassatarissagaa Royal Greenland A/S-ip aamma TELE Greenland A/S-ip tikkuarpaat. Suliffeqarfiup Namminersornerullutik Oqartussanit pigineqartup ingerlatseqatigiiffiutaa tamakkiisumik pigineqanngikkuni, suliffeqarfimmut piginnittumut paasissutissanik isertuussanik ataatsimiititaliamut ingerlatitseqqeeqqusisinnaanera ajornakusuussaaq. Tamatuma saniatigut ingerlatseqatigiiffiutigineqartup paasissutissaatai isertuussat Inatsisartunit misissuiffineqarsinnaanerlerpata suliffeqarfimmi peqataasut allat siunissami suleqatigineqarnerat akornuserneqarsinnaavoq.
Inatsisissatut siunnersuummi ilusiliinermut sanilliullugu ajornartorsiut taanna (tamakkiisumik) maannakkut pineqanngilaq, tassa paasissutissanik pissarsisinnaanermut periarfissat siunnersuummi aallaavigineqarmata aktieselskabit pillugit inatsimmit suliffeqarfiullu maleruagassaanit tunngavissinneqarsimasut. Matuma saniatigut Kukkunersiuinermut Ataatsimiititaliaq (assinganillu Aningaasaqarnermut Ataatsimiititaliaq) taassumalu ilaasortai atorfilittaalu aktieselskabinit Namminersornerullutik Oqartussanit pigineqartunit paasissutissat pissarsiarineqartut pillugit, paasissutissat isertuussassaanerannik piumasaqaateqarluni tunniunneqarsimatillugit, nipangiusimannittussaatitaapput. Nipangiusimannittussaatitaaneq pinerluttulerinermi inatsimmi aalajangersakkat aqqutigalugit kinguneqaatissiissutigineqartarpoq.
Kukkunersiuinermut Ataatsimiititaliap paasissutissanik pissarsisinnaanerata killiliivigineqarneranut sanilliullugu, matumani ingerlatsinermik kukkunersiuinermik aallartisitsisinnaaneranut atatillugu ajornartorsiutaasinnaasut.
Suliffeqarfiit pillugit inatsit atuuttoq ataqqillugulu mianeralugu ingerlatsinermik kukkunersiuisarnissamik siunnersuutigineqartup imarisamigut annertussutsigullu ersarinnerusumik erseqqissarneqarnissaa ilusiliivigineqarnissaalu Arctic Umiaq Line A/S-ip innersuussutigaa. Taamaalilluni kiffartuussinissamik isumaqatigiissutit malillugit ingerlanneqartunut suliffeqarfiup suliassaqarfiinut tunngasut kisimik ingerlatsinermik kukkunersiuinermut ilaatinneqassanersut Kukkunersiuinermut Ataatsimiititaliap sinnersuutaani ersarissumik allanneqarsimanngitsut Arctic Umiaq Line A/S isumaqarpoq. Kiffartuussinissamik isumaqatigiissutit malillugit sulianut ingerlanneqartunut atatillugu ingerlatsinermik kukkunersiuineq immikkut eqqarsaatigalugu, Arctic Umiaq Line A/S-imit innersuussutigineqarpoq, siunnersuummi imaluunniit inatsimmut oqaaseqaatini allassimassasoq, ingerlatsinermik kukkunersiuinermi taama ittumi tapiissuteqartut, tapiissuteqarfigineqartup aqutsisui tapiissuteqarfigineqartullu kukkunersiuisuata akornanni akisussaaffimmik killeqartitsinissaq tunngavissaatitaassasoq. Taamaalilluni pisortat aningaasaataasa ingerlanneqarnerannut kiisalu naatsorsuutinik tunniussisarnernut il. il. suliffeqarfiup aqutsisuisa akisussaasuunerat Arctic Umiaq Line A/S-ip paasinninnera malillugu aallaavigineqartariaqarpoq. Suliffeqarfiup kukkunersiuisuata aqutsisut suliassaminnik qanoq isumaginnissimanerat naliliiffigisartussaavaa. Illuatungaatigulli tapiissuteqarnermi aaqqissuussineq kissaatigineqartutut kinguneqarnersoq taamaalillunilu naalakkersuinikkut anguniakkanik eqquutsitsinersoq tapiissuteqartup akisussaaffigisallugu. Inatsimmi tunngavigineqartumi aalajangersarneqartut anguniakkat piviusunngortinneqarsinnaanerat aaqqissuussinermilu inuiaqatigiissutsikkut sunniutaa anguneqarsimanersoq naliliiffigineqarsinnaaqqullugu nalinginnaasumik iluatsitsinissamut piumasaqaatinik pilersitsinissaq tapiissuteqartup isumagisariaqarpaa.
Kukkunersiuisarfiup Deloitte-p paasinninnera aamma malillugu ingerlatsinermik kukkunersiuisinnaaneq qanoq annertutigissanersoq Kukkunersiuinermut Ataatsimiititaliap inatsisissatut siunnersuutaani tassungalu oqaaseqaatigineqartut ersarissumik paasinarsisinneqanngillat. Kukkunersiuisarfiup paasinninnera malillugu Namminersornerullutik Oqartussat aktiaatilittut soqutigisaannik Naalakkersuisut isumaginninnerannik Kukkunersiuinermut Ataatsimiititaliap naliliisinnaaneranut periarfissap aamma suliffeqafinnik Namminersornerullutik Oqartussanit aqunneqartunik Kukkunersiuinermut Ataatsimiititaliap ingerlatsinermik kukkunersiuisinnaanerata akornanni ataqatigiisitsinissaq pisariaqanngitsoq Deloitte-p oqaatigaa. Namminersornerullutik Oqartussat aningaasalersuiffigisaanni suliffeqafiup suliassaasa kiffartuussinissamik isumaqatigiissutinut/tapiissutinut ilaqartut aamma suliffeqarfiup ingerlatsinermik suliassaasa allat akornanni annertuumik immikkoortitsisoqartariaqartoq Deloitte isumaqarpoq. Inatsisissatut siunersuutip oqaasertaliorneqarneratuut suliffeqarfik Namminersornerullutik Oqartussanit tamakkiisumik pigineqartoq pineqartillugu suliassaqarfinnut tunngasut tamakkerlugit Inatsisartut Kukkunersiuinermut Ataatsimiititaliaata paasissutissarsiorfigisinnaavai matumanilu nunatta karsiata kukkunersiuisua avataaneersoq ingerlatsinermik kukkunersiuinissamik ingerlatseqquneqarnisaa ilaalluni. Kiffartuussinissamik isumaqatigiissutinut/tapiissutinut ingerlatsinermik kukkunersiuisinnaaneq ilan-ngunneqartariaqartoq, Namminersornerullutik Oqartussat aktiaatilittut soqutigisaannik Naalakkersuisut qanoq isumaginninnerannik nalilersuinermut tamanna atassuteqartinnagu Deloitte-p siunnersuutigaa. Suliffeqarfiup suliassaanut tamanut tunngasunut tamakkiisumik pissarsisinnaanerup kingunerissavaa, suliffeqarfiit Namminersornerullutik Oqartussanit pigineqartut suliffeqarfiillu nammineertitat akornanni taamaallaat annikitsuararsuarmik assigiinngissuseqarneq. Danskit iliuuserisartagaannit, Naalagaaffiup kukkunersiuisua pillugu inatsisip § 6-iani oqaasertaliunneqartumit Deloitte-p paasinninnera malillugu iliuusaasussatut siunnersuutigineqartoq annertunerujussuuvoq.
PriceWaterhouseCoopers paasinninnerit assigisaannik oqaaseqanngilaq aarlerisaarutigaluguli ingerlatsinermik kukkunersiueqqusinissamut periarfissiineq mianersorluinnartumik atorneqartariaqartoq maleruagassamullu taarsiullugu qaqutigoortariaqartoq, tassami taama iliuuseqarneq suliffeqarfiup ulluinnarni aqutsisuinut aamma siulersuisuinut tatiginninnginnertut nalinginnaasumik paasineqarsinnaammat. Tatiginninnginneq taama ittoq suliffeqarfiup ingerlanneqarneranut nalinginnaasumik ajoqutaarujussuartarpoq, aaqqissuussaanikkummi toqqissisimannginnermik pilersitsisarmat ajornerpaagaangallu suliffeqarfiup nalinginnaasumik iliuseqarsinnaaneranik unitsitsarmat.
Aktieselskabinut Namminersornerullutik Oqartussanut pigineqartunut tunngatillugu ingerlatsinermik kukkunersiuinermik periarfissiinissamik siunnersuutigineqartoq kiffartuussinissamik isumaqatigiissutinut il. il. ilaatinneqartunut suliassanut taamaallaat killiligaanngilaq. Tamanna suliassaqarfik Kukkunersiuinermut Ataatsimiititaliap siornatigulli Inatsisartut inatsisaanni atuuttumi § 17, imm. 2 naapertorlugu annertoorujussuarmik kukkunersiuiffigisinnaareerpaa. Oqartussaasunut kiffartuussinissamik isumaqatigiissutinik akisussaallutik atortuulersitsisunut tunngatillugu maleruagassat atuuttut malillugit Kukkunersiuinermut Ataatsimiititaliaq taamaalilluni ingerlatsinermik kukkunersiuinissamut periarfissaqarpoq, matuma ilaatut nalilersuiffigisinnaallugu aningaasaqarnikkut mianerisassat mianeralugit kiffartuussinissamik isumaqatigiissutit suliarineri ilusilersorneqarsimanersut matumani ilangullugit suliffeqarfiup pineqartup akilerneqarsimanerata nakkutilliivigineqarnera naammaginartuunersoq aamma qulakkeeriffigissallugu (assersuutigalugu manna pillugu kukkunersiuisut uppernarsaanissaannik piumasaqaateqarnikkut).
Siunnersuummili matumani ingerlatsinermik kukkunersiuinermik ingerlatsinissamik periarfissaq erseqqissagaavoq, taamaalilluni aktieselskabit Namminersornerullutik Oqartussanit tamakkiisumik ilaannakuusumilluunniit pigineqartut ingerlanneqarneranni aningaasaqarnikkut mianerisassat Naalakkersuisunit qanoq annertutigisumik qulakkeerniarneqarsimanerinik ingerlatsinermik kukkunersiuineq nalilersuinertut isikkoqartinneqartoq allanneqarsimalluni.
Ingerlatsinermik kukkunersiuinerup aallartisinneqarnissaanut periarfissap mianersortumik atorneqartariaqarneranik kaammattuut inatsisissatut siunnersuutip oqaaseqaatitaanut ilanngunneqarnikuuvoq.
Kalaallit Nunaanni Inatsisartut ataanni sumulluunniit attuumassuteqanngitsumik kukkunersiuisutut oqartussaasumik pilersitsinissaq
Tunngaviit illuinnaasiortunngitsut annertuut Kalaallit Nunaanni Inatsisartut ataanni sumulluunniit attuumassuteqanngitsumik kukkunersiuisutut oqartussaasumik, aktieselskabini Namminersornerullutik Oqartussanit pigineqartuni pisortat aningaasaataannik atuinerup annertusisaasinnaasumik pitsaasumillu misissuataarnerinut nammineq nukissaqartitaalluni ingerlatsisinnaasumik pilersitsinissamut tunngavissaatitaanissaat siunnersuutip pisariitsumik pilersinneqarnissaanut tikkuussisuusut Arctic Umiaq Line A/S-ip oqaatigaa.
Namminersornerullutik Oqartussat aktiaatilittut soqutigisaannik isumaginninnerup inatsisartoqarnikkut nakkutilliivigineqarsinnaanerat pillugu apeqqut Inatsisartunit Inatsisartulluunniit ataatsimiititaliaannit samminninnikuunngilaq, Kalaallit Nunaanni Inatsisartut ataanni sumulluunniit attuumassuteqanngitsumik kukkunersiuisutut oqartussaasumik pilersitsisinnaanermut (Kukkunersiuinermut Ataatsimiititaliaq Inatsisillu Atortinneqarnerannut Ataatsimiititaliaq) soqutiginninnerarnikuupput. Matumani ilanngunneqassaaq Kalaallit Nunaanni Inatsisartut ataanni sumulluunniit attuumassuteqanngitsumik kukkunersiuisutut oqartussaasumik pilersitsinissaq (assersuutigalugu danskit, norskit svenskilluunniit naalagaaffiup kukkunersiuisoqatigiivisa assingannik) Inatsisartut kukkunersiuilluni nakkutilliinermut aningaasaqarnikkut atugassaasa pioreersut iluini pilersinneqarsinnaanngilaq. Taamaattumik Arctic Umiaq Line A/S-ip innersuussutaa sinnersuummut pineqartumut ilanngutissallugu suleqatigiissitatut pilersinneqarsimasoq tunngavissarsisimanngilaq.
Aktieselskabinit allaanerusumik ingerlatseqatigeeriaatsit allat
Aktieselskabinit allaanerusumik ingerlatseqatigeeriaatsinik allanik siunnersuut aamma imaqartinneqatariaqartoq Deloitte isumaqarpoq.
Aktieselskabinit allaanerusumik ingerlatseqatigeeriaatsini allani Namminersornerullutik Oqartussat maannakkut peqataaffeqanngillat. Aktieselskabinit allaanerusumik ingerlatseqatigeeriaatsini allani imaluunniit aningaasaateqarfiit inuussutissarsiutinik ingerlatsisuni assigisaanniluunniit Namminersornerullutik Oqartussat kingusinnerusukkut ilanngutissagaluarpata Inatsisartut inatsisaannik nutarterinissaq pisariaqartinneqalissagaluarpoq, taamaalilluni matumani Inatsisartut inatsisaannut piginnittut soqutigisaat aamma ilanngunneqarsinnaallutik. Tamanna siunnersuummut oqaaseqaatini ilannguneqarsimavoq.
Kukkunersiuinermut Ataatsimiititalimi/Inatsisartuni ikinnerussuteqartut aalajangiisinnaanerannut periarfissiineq
Aktieselskabinut Namminersornerullutik Oqartussanit pigineqartunut tunngatillugu ingerlatsinermik kukkunersiuinermi paasissutissanik pissarsiniarnissaq aallartisitsinissarluunniit pillugu ataatsimiititaliami ilaasortap siunnersuutaanut Kukkunersiuinermut Ataatsimiititaliami amerlanerussuteqartut akerliuppata, ataatsimiititaliami ilaasortap sinnersuut Inatsisartunit aalajangiiffigineqartussatut saqqummiussinnaavaa. Siunnersuut akuersissutigineqartutut isigineqassaguni matumunnga Inatsisartunut ilaasortat ikinnerpaamik 2/5-ii tapersiillutik taasisimasussaapput.
Inatsisartuni ikinnerussuteqartut aalajangiisinnaanerannut periarfissamik ilanngussineq immikkuullarissuullunilu tupinnartuusoq Pilersuisoq A/S isumaqarpoq.
Paasissutissanik il. il. pissarsisinnaanermut ikinnerussuteqartut periarfissaannik annertusiinermik siunnersuut malitseqanngilaq paarlattuanilli annikilliliineruvoq. Inatsimmi atuuttumi § 17, imm. 3 naapertorlugu ataatsimiititaliami ilaasortap ataasiinnaalluunniit piumasarippagu atortussanik il. il. ataatsimiititaliaq pissarsiniartussaavoq. Aallaavik taanna Kukkunersiuinermut Ataatsimiititaliap siunnersuutaatigut saneqqunneqarpoq.
Matumunnga tunngavigineqarpoq illuatungaani paasissutissanik pissarsinissamut periarfissinneqarnerup akisussaassuseqartumik atorneqarnissaata qulakkeerneqarnissaanut mianerisassat illuatungaanilu kukkunersiuilluni misissuinissamut sunniuteqarluartumik periarfissinneqarnerup qulakkeerneqarnissaanut mianerisassat akornanni oqimaaqatigiisitsinissaq.
Ataatsimiititaliap apeqqutaasa akineqarnissaannut suliffeqarfiit ataasiakkaat nukinnik immikkoortitsinissaat eqqumaffigissallugu tunngavissaqarpoq. Taamatuttaaq ingerlatsinermik kukkunersiuinermik aallartitsineq suliffeqarfiup aqutsisuinut siulersuisuinullu tatiginninnginnertut paasineqaratarsinnaanerata aarleqqutiginissaanut tunngavissaqarpoq, tamatumami suliffeqarfiup ingerlanneqarneranut ajoqutaasumik aaqqissuussaanikkut annertuumik toqqissisimannginneq kingunerisinnaammagu. Kiisalu paasissutissat mianernartut suliffeqarfiup unammillersinnaassusianut sunniuteqarsinnaasumik siammarterneqarsinnaanerisa pinngitsoortinnissaat suliffeqarfiup inatsisitigoortumik soqutigisarisaa eqqumaffigissallugu tunngavissaqarpoq. Mianerisisassat taakku paasissutissanik pissarsiniarnissamik ataatsimiititaliami ilaasortap piumasaqaateqarsinnaanera maannakkut pisinnaatitaaffigisaasup killilernissaanut tikkuussipput.
Paarlattuanik Namminersornerullutik Oqartussat aktiaatilittut soqutigisaannik Naalakkersuisut isumaginninnerannut isornartorsiuinermik pilersitsisinnaasut partiit naalakkersuisuutitaqartut ataatsimiititaliami sinniisaasa amerlanerussuteqartut pissutsit qulaajarneqarnissaannut amerlanerussuteqarnertik atorlugu pinngitsoortittassappassuk pitsaasuunavianngilaq. Mianerisisassaq taanna ikinnerussuteqartut illersorneqarnerat pillugu ilusiliinerup attatiinnarnissaanut tikkuussissuuvoq.
Inatsisissatut siunnersuummi ilusiliineq attatiinnarneqarpoq naak oqaasertaliornera aalajangersimasoq allanngoraluartoq.
Taakku eqqaassanngikkaanni ilusiliineq Folketingip suleriaasiani ilusiliinermit (ikinnerussuteqartut aalajangiisarneri) immikkuullarinnerunngilaq (Takuuk tassani § 8, imm.8, matuma kingorna isumasioqatigiinneq tamanut ammasuussaaq, ataatsimiititaliap ilaasortaasa 17-iusut akornannit ikinnerpaamik pingasut tamanna taperserpassuk), aamma Inatsimmi Tunngaviusumi (Takuuk tassani § 39, matuma kingorna Folketingip siulittaasuata ataatsimiinnissamut aggersaanissaq pisussaaffigaa, Folketingip ilaasortaasa ikinnerpaamik 2/5-iusut allaganngorlugu tamanna saqqummiussimappassuk. Tamatuma saniatigut takuuk § 41, matuma kingorna Folketingip ilaasortaasa 2/5-iusut qinnutigisinnaavaat aappassaaneerinerup kingorna ullut aqqaneq-marluk qaanngiunnerini pingajussaarineq aatsaat pissasoq. Kiisalu aamma takuuk § 42, matuma kingorna innuttaasut taasitinneqarnissaat Folketingip ilaasortaasa 1/3-usut qinnutigisinnaavaat.)
Inatsisip oqaasertaasa inatsimmullu oqaaseqaatit akornanni naapertuutinnginnerit
Kukkunersiuinermut Ataatsimiititaliap siunnersuutaani suliffeqarfiit Namminersornerullutik Oqartussanit aalajangiisuusumik sunniuteqarfigisaasa aamma suliffeqarfiit Namminersornerullutik Oqartussanit aalajangiisuusumik sunniuteqarfiginngisaasa akornanni immikkoortitsisoqartoq Nunaoil A/S-ip, Nuna Minerals A/S-ip, Royal Greenland A/S-ip TELE Greenland A/S-illu taakkartorpaat, inatsisissatulli siunnersuummut oqaaseqaatini suliffeqarfiit Namminersornerullutik Oqartussanit tamakkiisumik ilaannakuusumilluunniit pigineqartut akornanni immikkoortitsisoqarluni.
Kukkunersiuinermut Ataatsimiititaliap inatsisissatut siunnersuutaata siulliup mumittuanik Kukkunersiuinermut Ataatsimiititaliaq aamma Aningaasaqarnermut Ataatsimiititaliaq aktieselskabini suliffeqarfiup kukkunersiuisuanit toqqaannartumik paasissutissanik pissarsiniarnissamut periarfissiinermik inatsisissatut siunnersuut saqqummiunneqartoq tunniussinngilaq. Suliffeqarfinni Namminersornerullutik Oqartussanit aalajangiisuusumik sunniuteqarfigisaasa aamma suliffeqarfinni Namminersornerullutik Oqartussanit aalajangiisuusumik sunniuteqarfiginngisaasa akornanni immikkoortitsisoqarnera taamaalilluni inatsisissatut siunnersuutip inatsisitut oqaasertaani saqqummiunneqartumi atorneqanngilaq. Taamaallilluni siunnertuummi saqqummiunneqartumi inatsisip oqaasertaasa inatsimmullu oqaaseqaatit akornanni tamakkiisumik naapertuuttoqarpoq.
4.2. Suleqatigiissitap inatsisissamut missingiusiaa.
Inatsisissatut siunnersuut una inatsisissatut siunnersuummit Inatsisartut 2004-imi upernaakkut ataatsimiinneranni Kukkkunersiuinermut Ataatsimiititaliamit saqqummiunneqartumit tamatumalu kingorna tusarniaassutigineqartumit annertuumik taaneqareersumit tunngaveqarpoq.
Taamaakkaluartoq suleqatigiissitap inatsisissamut missingiusiaa aamma tusarniaassutigineqarpat eqqornerpaassasoq suleqatigiissitaq isumaqarsimavoq. Tassunga atatillugu tusarniaaffigineqartut amerlisinneqarsimapput taamaalilluni inatsisissatut siunnersuummut oqaaseqaateqarnissamut tulliuttut periarfissinneqarsimallutik: Royal Greenland A/S, TELE Greenland A/S, Pilersuisoq A/S, Arctic Umiaq Line A/S, Royal Arctic Line A/S, Nuna Minerals A/S, Nuna Oil A/S, Nunaatta Naqiterivia A/S, A/S Inissiaatileqatigiiffik INI, Greenland Resources A/S, AIR Greenland A/S, Great Greenland A/S, Greenland Venture A/S, Grønlandshavnens Ejendomme A/S, GrønlandsBANKEN A/S, Sparbank Vest Grønland, Kalaallit Nunaanni Inuussutissarsiornermi Siunnersuisoqatigiit, KANUKOKA, Kalaallit Nunaanni Sulisitsisut Peqatigiiffiat, ILIK, NUSUKA, APK, PricewaterhouseCoopers Grønland A/S, Deloitte, Inuussutissarsiornermut, Nunalerinermut Sulisoqarnermullu Pisortaqarfik, Siulersuisut allattoqarfiat, Aalisarnermut Piniarnermullu Pisortaqarfik, Aningaasaqarnermut Pisortaqarfik, Ineqarnermut Attaveqarnermullu Pisortaqarfik, Aatsitassanut Ikummatissanullu Pisortaqarfik, Kalaallit Nunaanni Politimesteri kiisalu Kalaallit Nunaanni Rigsombudsmandi.
Tusarniaanermit akissutit ukunannga tiguneqarsimapput; Nuna Oil A/S, Greenland Venture A/S, AIR Greenland A/S, GrønlandsBANKEN A/S, TELE Greenland A/S, Inuussutissarsiornermut, Nunalerinermut Sulisoqarnermullu Pisortaqarfik, Aalisarnermut Piniarnermullu Pisortaqarfik, Ineqarnermut Attaveqarnermullu Pisortaqarfik, Aningaasaqarnermut Pisortaqarfik, Aatsitassanut Ikummatissanullu Pisortaqarfik, Siulersuisut allattoqarfiat, Kalaallit Nunaanni Sulisitsisut Peqatigiiffiat, Deloitte kiisalu Kalaallit Nunaanni Politimesteri aamma Kalaallit Nunaanni Rigsombudsmandi.
Inatsisissatut siunnersuummut siusinnerusukkut nassiunneqarsimasumut suliffeqarfiup oqaaseqaatai missingiusiamut nutaamut ilanngunneqarsimanerat Nunaoil A/S-ip naammagisimaarlugit oqaatigaa. Nunaoil A/S-illi qinnutigaa, inatsisissatut siunnersuummi imaluunniit inatsisissatut siunnersuutip nassuiaatitaani allanneqassasoq, aktieselskabit pillugit inatsimmi § 76 naapertorlugu Naalakkersuisut suliffeqarfimmit paasissutissanik suugalualuanilluunniit pissarsiniarsinnaanerat siunnersuutikkut allanngortinneqanngitsoq, soorluttaaq Naalakkersuisut pissarsiarisinnaanngisaannik paasissutissanik ataatsimiititaliat pissarsitinneqarsinnaanerat siunnersuutikkut pisinnaatinneqanngitsoq. Kaammattuut taanna akueralugu inatsimmut nassuiaatinut ilanngunneqarpoq.
Aningaasaqarnermut Ataatsimiititaliamut Kukkunersiuinermullu Ataatsimiititaliamut piginnaatitsinermik inatsisip tunniussinera Greenland Venture A/S-imit tunngaviatigut akerlerineqanngilaq, paasissutissanilli pissarsisinnaalerneq eqqarsarluartumik atorneqartassasoq kaammattuutigineqarluni. "Immikkuualuttut ilanngullugit naalakkersuinermik suliallit aqutsinissaannut" siunnersuut ammaassisinnaasoq taamaalillunilu ilaatigut inuussutissarsiornerup siuarsaaffiginiarnerani nutaami siunertarineqartut paarlattuanik sunniuteqarsinnaasoq Greenland Venture A/S-imit aarleqqutigineqarpoq. Tamanna ungasinnerusoq eqqarsaatigalugu suliffeqarfiit ataasiakkaat aningaasaqarnikkut illersorneqarsinnaasumik ineriartornissaannut akornutaasinnaavoq. Tunngaviusumik isigalugu matumani eqqartorneqartoq tassaavoq, illuatungaani Namminersornerullutik Oqartussat aningaasaataasa pissusissamisoornerpaamik atorneqartanerisa kinguneqarluartumik nakkutilliivigineqarnerisa qulakkeerneqarnissaasa illuatungaanilu nunanitsinni inuussutissarsiornerup naalakkersuinermut attuumajunnaartinneqarlunilu akissarsiutaalernissaanik kissaateqarneq aallavigalugu ineriartortitsineq aqqutigalugu aningaasaqarnikkut nunatta imminut napatinnerulernissaanut sinaakkutit pitsaanerpaat qulakkeernissaasa akornanni oqimaaqatigiisitsiniarneq.
Kukkunersiuinermut Ataatsimiititaliap aktieselskabi Namminersornerullutik Oqartussanit tamakkiisumik ilaannakuusumilluunniit pigineqartoq pillugu Naalakkersuisut aqqutigalugit paasitinneqarsinnaanera suliffeqarfiup piginneqataaffigisinnaasaanut – taanna Namminersornerullutik Oqartussanit tamakkiisumik ilaannakuusumilluunniit pigineqaraluarpalluunniit – aamma atuuttuussasoq inatsisissamut missingiusiami allassimasoq Greenland Venture A/S-imit aallaavigineqarpoq. Suliffeqarfimmi piginneqataaffiusumi suliffeqarfik piginnittuusoq piginneqataaffiusumi taasisinnaanerit amerlanersaannik pigisaqartuussasoq Greenland Venture A/S-imit tunngavissaatinneqarpoq. Tamanna Greenland Venture A/S-imut ima pingaaruteqartigaaq, suliffeqarfiup taanna inatsisip oqaasertalerneqarneranut ilanngunneqassasoq takujumagaluarlugu.
Aktieselskabit Namminersornerullutik Oqartussanit tamakkiisumik ilaannakuusumilluunniit pigineqartut pillugit paasissutissanik Kukkunersiuinermut Ataatsimiititaliap Naalakkersuisut aqqutigalugit pissarsisinnaanera inatsisissatut siunnersuummit tunniunneqartoq tunngavimmigut suliffeqarfimmut sumulluunniit atuuttussaavoq, suliffeqarfik taanna piginnittuugaluarpat imaluunniit piginneqataagaluarpat – piginneqataassutsip qanoq annertutiginera apeqqutaanani. Kukkunersiuinermulli Ataatsimiititaliaq paasissutissanik– aktieselskabit pillugit inatsimmit suliffeqarfiullu maleruagassai aqqutigalugit – Naalakkersuisut pissarsiarissallugit periarfissaqarfigisimasaannik taamaallaat pissarsisinnaavoq. Tamatuma piviusumik nassatarissavaa suliffeqarfinnit Namminersornerullutik Oqartussanit tamakkiisumik ilaannakuusumillunniit pigineqartunit, matumani suliffeqarfik piginneqataaffiusoq eqqartorneqarsimanngippat, paasissutissanik pissarsiniartoqarsinnaajunnaarneq; ima paasillugu, suliffeqarfimmi aktieselskabi Namminersornerullutik Oqartussanit pigineqartoq aalajangiisuusumik sunniuteqarfeqartillugu.
Siunnersuummi ilaatinneqarsinnaanani Air Greenland A/S isumaqarpoq. Taamaattumik siunnersuummut suliffeqarfik oqaaseqaateqanngilaq tikkuartuinnarluguli, aktieselskabit pillugit inatsimmit tunngavissinneqartumik periarfissat atorlugit suliffeqarfimmi aktiaatillip paasitinneqarsinnaanera taamaallaat pisinnaasoq aammalu Kalaallit Nunaanni Namminersornerullutik Oqartussat suliffeqarfimmi siulersuisunut ilaasortaatitaat suliffeqarfiup ingerlanneqarneranut aalajangiinernullu, siulersuisut ataatsimiinnerini aalajangiunneqartunut tunngatillugu nipangiusimannittussaatitaasut.
Air Greenland A/S-i siunnersuummi ilaasimanngitsoq paatsuuinermit peqquteqarsimassaaq. Paarlattuanik aktiaatilittut Air Greenland A/S pillugu (Aktieselskabi Namminersornerullutik Oqartussanit ilaannakuusumik pigineqartoq) paasissutissinneqarsinnaaneq aktieselskabit pillugit inatsit naapertorlugu taamaallaat anguneqarsinnaavoq, suliffeqarfiulli ingerlanneqarneranut siulersuisuni ataatsimiinnerni aalajangiinerni aalajangiussanut tunngatillugu nunatsinni Namminersornerullutik Oqartussat suliffeqarfiit siulersuisuini ilaasortaatitaat nipangiusimasussaatitaapput.
Siunnersuut GrønlandsBANKEN A/S-ip taperserpaa. GrønlandsBANKEN-illi kaammattuutigaa suliffeqarfiit børsimut nalunaarsukkat piginnittunut paasissutissanik ingerlateqqiisarnermut periarfissaat killeqarmata inatsimmut nassuiaatini ajornanngippallu inatsisip oqaasertaani ersarissarneqartariaqartut. (Kaammattuut assingusoq Kalaallit Nunaanni Sulisitsisut Peqatigiiffiannit Deloitte-miillu saqqummiunneqarpoq). Kaammattuut akueralugu inatsisimmut nassuiaatini ilanngunneqarpoq.
Tamatuma saniatigut Naalakkersuisut suliffeqarfiullu aqutsisuisa akornanni attaveqartarneq Naalakkersuisut siulersuisunullu siulittaasup taassumanngaluunniit inuup siulersuisuneersup aqutsisuneersulluunniit akornanni aallaavittut isigalugu pisarnissaa allanneqarluni nassuiaatinut ilanngunneqartariaqarnissaa GrønlandsBANKEN-ip takujumagaluarpaa. (Kaamaattuutit assingusut TELE Greenland A/S-imit Deloitte-miillu saqqummiunneqarput). Kaammattuut taanna aamma akueralugu inatsimmut nassuiaatini ilanngunneqarpoq.
Siunnersuutaaqqaartumut suliffeqarfiup akerliliissutaasa ilai naaperiarneqarsimasut TELE Greenland A/S-ip oqaatigaa, aalajangiusimalluguli siulersuisut aqutsisullu akisussaanerat Kukkunersiuinermut Ataatsimiititaliap misissuinerisa inerniliussaasalu innarlersinnaagaat, misissuinerlu ataatsimeersuarnerup oqartussaaffiisa ataanni inissisimasasariaqartutut isigineqartariaqartoq.
Tamatuma saniatigut suliffeqarfiup ingerlanneqarnera suleqateqarneranilu pissutsit il. il. pillugit paasissutissanik isertuussanik pissarsiaqarsinnaasut amerlineqarnerisa nassatarisinnaagaat, paasissutissat susassaqanngitsunit suliffeqarfimmut akornutaasumik pissarsiarineqarsinnaalernissaat nassatarineqarsinnaasoq TELE Greenland A/S-imit nalilerneqarpoq.
Akerliliinerit marluk taakku annertunerusumik akuerineqanngillat. Kukkunersiuinermut Ataatsimiititaliap siunnersuutigeqqaagaa qulaaniittoq pillugu tusarniaaneq pisimasoq pillugu nassuiaat innersuussutigineqarpoq.
Naggasiullugu aallaavittut isigalugu siulersuisunut ilaasortap (siulersuisut allat avaqqullugit) Naalakkersuisunut paasissutissanik ingerlatitseqqissinnaaneranik pisussaaffeqartutut isumaqarfiginninneq suliffeqarfiup piginnittullu akornanni ersarluttumik attaveqartarnermik pilersitsisinnaasoq TELE Greenland A/S-ip oqaatigaa. Tamatumunnga siulersuisut piginnittumut attaveqartarnerat siumoortumik isumaqatigiissuteqarfigineratigut sillimaratarsinnaanertik qulakkeersinnaavaat. Oqaaseqaat taanna GrønlandsBANKEN A/S-imut oqaaseqaatit qulaaniittut naapertorlugit akuerineqarpoq.
Inuussutissarsiornermut, Nunalerinermut Suliffeqarnermullu Pisortaqarfik siunnersuutip imarisaanut oqaaseqaatissaqanngilaq. Inatsimmut nassuiaatit eqqarsaatigalugit pisortaqarfiup maluginiaqquaa, aktieselskabit aaqqissuunneqarnerannut allannguutissatut siunnersuut (inatsisissatut missingiusiamut tusarniaanermi nassuiaatini allanneqartutuut) 2006-imi upernaakkut ataatsimiinnermi suliarineqarnissaa naatsorsuutigineqarsinnaanngitsoq tamannali siusinnerpaamik 2006-imi ukiakkut ataatsimiinnermi pisinnaasoq.
Paasissutissanut Naalakkersuisut pissarsiarisinnaasaannut Kukkunersiuinermut Ataatsimiititaliaq tamakkiisumik pissarsisinnaasariaqartoq Aalisarnermut Piniarnermullu Pisortaqarfiup isumaqatigalugu nalunaarutigaa.
Aningaasalersuinissamut qularnaveeqqusiinissanullu atatillugu Aningaasaqarnermut Ataatsimiititaliap paasissutissanik pissarsisinnaanera eqqarsaatigalugu Pisortaqarfiup oqaatigaa, suliffeqarfinnik pisinermi tunisinermilu pisariaqartumik peqqissaarnermut atatillugu imaluunniit suliffeqarfiit akiliisinnaassusaasa aningaaserivinnit misissuiffigineqarneranni suliffeqarfiup paasissutissaataanut, aktieselskabit pillugit inatsisip pisinnaatitsineranit annertunerusut pissarsiarineqakkajuttartut. Taamaattumik aningaasalersuinissamut qularnaveeqqusiinissanullu atatillugu Namminersornerullutik Oqartussat aktieselskabit pillugit inatsimmit killilerneqartariaqanngitsut, nalilersuinissamulli tunngavissanik pissarsiniartariaqartut, aningaasaatinillu aqutsisumit akissarsiortuusumit pissarsiniarnissaq pissusissamisuussasoq Pisortaqarfik isumaqarpoq.
Aningaasalersuinissamut qularnaveeqqusiinissanullu atatillugu Aningaasaqarnermut Ataatsimiititaliap paasissutissanik pissarsisinnaanera siunnersuummit killiliivigineqassasoq sukkulluunniit siunertaanngilaq. Ataatsimiititaliap siunnersuutip § 16 a-p nassuiarneqarneranut naapertuuttumik ataatsimiititaliap siunnersuummik qinnuteqaammilluunniit suliarinninni, paasissutissat ataatsimiititaliamit pisariaqartutut isigineqartut pissarsiarineqarnissaasa tunngaannut unitsikkallarsinnaavaa. Aningaasalersuiumasut qularnaneeqqusiiumasulluunniit allat kikkulluunniit periarfissaasa assinginik periarfissap taassuma nunatsinni Namminersornerullutik Oqartussat periarfissippai; -pissarsisinnaaneq aktiaatillip aktieselskabit pillugit inatsimmut naapertuuttumik paasissutissinneqarsinnaaneranit pisuni amerlasuuni annertunerusinnaasoq.
Siunnersuut Namminersornerullutik Oqartussat aktiaatilillut soqutigisaasa isumagineqarnerinut (aktiaatit naleqassusiisa annertusineqarnissaannik soqutiginninnertut paasineqarsinnaasumik) taamaallaat annertusineqartariaqanngitsoq kisiannili aamma suliffeqarfiit Namminersornerullutik Oqartussanit pigineqartut ingerlassaannut soqutigisanullu allanut aamma ilaatinneqartariaqartoq Pisortaqarfik isumaqarpoq. Taamaalilluni paasissutissanik, suliffeqarfiit Namminersornerullutik Oqartussanit pigineqartut kalaallinut inuiaqatigiinnut inuussutissarsiornerannullu tunngasunik, assersuutigalugu suliffeqarfiit aalisarnermik ingerlataqartut piginnittui assigiinngiiaartut pillugit paasissutissanik Namminersornerullutik Oqartussat pissarsisinnaanerat siunertamut iluaqutaassasoq Pisortaqarfik isumaqarpoq. Paasissutissat taama ittut inuussutissarsiornerup siuarsarniarnerani suliniutissat ilusilersorneqarnerannut pingaaruteqarsinnaapput. Taamaattumik suliffeqarfiit Namminersornerullutik Oqartussanit pigineqartut Kalaallit Nunaanni inuussutissarsiornermut, tunisassiassanik inaarneqanngitsumik tunisassianillu tigooraasuullunilu ingerlatitseqqittartuusumut, sunniutaat ersersinneqarsinnaassappat iluaqutaasinnaavoq. Inuussutissarsiornerup aaqqissugaaneratigut paasiuminaatsukkut avataaniik aningaasaliiumasut pileritsatsinnissaannut Kalaallit Nunaata periarfissai annikitsuummata taama oqaaseqaateqarneq isigineqassaaq. suleqatigiissitaq ajornartorsiuteqarfik taanna pillugu isumaliutersuuteqarnissamut pissusissaqarsorisimanngilaq, suleqatigiissitamut suliakkiissutip avataaniittutut nalilerneqarmat.
Naggasiutitut Kukkunersiuinermut Ataatsimiititaliami Aningaasaqarnermullu Ataatsimiititaliami ilaasortat il. il. paasissutissanik isertuussisumik tunniussanik isertuussisussaanermik pisussaaffeqarneranni suut ersarissumik pineqarneri erseqqissarneqartariaqartut Pisortaqarfik isumaqarpoq. Assersuutigalugu ataatsimiititaliap avataatigut eqqartueqatigiinneq matoqqasumik ingerlanneqarsimappat, paasissutissat isertuussassat inuit kikkut peqatigalugit oqaluuserineqarsinnaanersut allassimasariaqarpoq. Kaammattuut taanna akueralugu siunnersuummut nassuiaatini ilanngunneqarpoq.
Kalaallit Nunaanni Sulisitsut Peqatigiiffiata Namminersornerullutiik Oqartussat aningaasaataasa atorneqarnerat annertunerusumik nakkutilliivigineqalersussaammat pingaarnertut ilassilluarpaa. Ilutigisaanilli nakkutilliinerup annertusineqarnerata taassuma suliffeqarfinni ataasiakkaani pissutsit naalakkersuinikkut akuleruffigineqartalernerannik nassataqarsinnaanera Kalaallit Nunaanni Sulisitsisut Peqatigiiffiata aarleqqutigigini erseqqissaatigaa. Tamatuma aktieselskabit pineqartut akornusiivigiinnarnavianngilai (taamaalillunilu inuiaqatigiit naliliutaat) aammali Kalaallit Nunaanni annaasaqaataasinnaasumik aningaasaliissuteqarumanermi periarfissat. Nakkutilliinermut tassunga aningaasarsiutigalugu kukkunersiuisartumik killilimmik atuinikkut ajornartorsiut taanna iluarsiiffigineqarsinnaasoq Kalaallit Nunaanni Sulisitsisut Peqatigiiffiata tikkuarpaa.
Kukkunersiuilluni nakkutilliinermut Kalaallit Nunaanni Inatsisartut ataanni sumulluunniit attuumassuteqanngitsumik kukkunersiuisoqarfimmik pilersitsinissaq Inatsisartut aningaasaqarnikkut killiliussaasa piusut iluini pisinnaanngilaq, Inatsisartullumi taama aaqqissuussisoqarnissaanut soqutiginninnertik manna tikillugu oqaatigisimanngilaat. Inatsisartulli Kukkunersiuinermut Ataatsimiititaliaat killilimmik annertussusilimmik aningaasarsiutigalugu kukkunersiuisunit ikiorserneqartarpoq, Naalakkersuisullu Namminersornerullutik Oqartussat aktiaatilittut soqutigisaannik isumaginninnerannut atatillugu tamanna aamma pissuserineqartoq naatsorsuutigineqartariaqarpoq.
Kiisalu assersuutigalugu suliffeqarfiit børsimi nalunaarsukkat pillugit ilisimasallinnut piumasaqaatit taakkulu paasissutissanik ingerlatitseqqiisinnaanerannut killilimmik periarfissaat ersarissarneqassasut Kalaallit Nunaanni Sulisitsiut Peqatigiiffiata amigaataanerarpai. Kaammattuut taanna GrønlandsBANKEN-ip tusarniaanermut akissutaa qulaaniittoq naapertorlugu akuerineqarpoq.
Taamatuttaaq suliffeqarfiit børsimut nalunaarsorneqarsimasut, nunatsinni Namminersornerullutik Oqartussat ilaannakuusumik piginnittutut soqutigisaqarfigisinnaasaat pillugit maleruagassat erseqqissarneqartariaqartut Deloitte-p kaammattuutigaa. Taamaalilluni suliffeqarfiit børsimut nalunaarsukkat paasissutissanik, tamanit ilisimaneqanngitsunik, aktiaatilimmut ataasiusumut taamatullu siulersuisuni ilaasortamut Namminersornerullutik Oqartussanit toqqarneqarsimasumut atuuttumik ingerlatitseqqiisinnaanerat periarfissaassanngilaq. Kaammattuut taanna GrønlandsBANKEN-ip tusarniaanermut akissutaa qulaaniittoq naapertorlugu akuerineqarpoq.
Kukkunersiuinermut Ataatsimiititaliap aktieselskabi pillugu apeqquteqaatai siunnersuut malillugu Naalakkersuisut aqqutigalugit pisassaaq. Allatut oqaatigalugu Naalakkersuisut tassaassapput suliffeqarfinnut toqqaannartumik attaveqartuusut. Tamanna pissusissamisoortuusoq Deloitte isumaqarpoq kaammattuutigaluguli Naalakkersuisut suliffeqarfiillu pineqartut siulersuisuisa akornanni attaveqartarnermi aqqutit ersarissut paatsuugassaanngitsullu isumaqatigiissutigineqassasut. Piginnittut siulersuisullu akornanni ingerlaavartumik oqaloqatigiittarnerit siulersuisut siulittaasuat aqqutigalugu ingerlanneqartassasoq, taassumalu siulersuisunut ilaasortat sinneri ilisimatittassagai Deloitte-mit isumaqarfigineqarpoq. Siulersuisuni ilaasortat ataasiakkaat piginnittumut toqqaannartumik saaffiginnissinnaanermik piginnaatinneqarnissaat inassutiginanngilaq, tamatumami isertuussisussaatitaaneq siulersuisunut ilaasortaanerup ilagisaa akornusiiffigilluarsinnaammagu. Deloitte-p oqaaseqaatai, qulaani GrønlandsBANKEN-ip TELE Greenland A/S-illu oqaaseqaataat naapertorlugit inatsisissatut siunnersuummut nassuiaatinut ilanngunneqarput.
Inuussutissarsiutit inatsisiliorfigineqarnerat Namminersornerullutik Oqartussat oqartussaaffigimmassuk Rigombud-eqarfillu Namminersornerullutik Oqartussat inatsisiliorneranni inatsisitinut akerliujunnaarsitsinissaannut nakkutilliinermi peqataanissamut periarfissaqanngimmat inatsisissatut siunnersuummut Rigsombud-eqarfik oqaaseqaatissaqanngitsoq Kalaallit Nunaanni Rigsombudsmand-ip nalunaarutigaa.
Ineqarnermut Attaveqarnermullu Pisortaqarfik, Aningaasaqarnermut Pisortaqarfik, Aatsitassanut Ikummatissanullu Pisortaqarfik, Siulersuisut allattoqarfiat kiisalu Kalaallit Nunaanni Politimesteri siunnersuummut oqaaseqaatissaqanngillat.
5. Aningaasaqarnikkut aqutsinikkullu kingunerisassat
Siunnersuutip aningaasaqarniarnikkut aqutsinikkullu kingunerisassaanut Aningaasaqarnermut Ataatsimiititaliap taamatullu Kukkunersiuinermut Ataatsimiititaliap paasissutissanik pissarsiniarsinnaanermut periarfissamik qanoq annertutigisumik atuinissaat apeqqutaajumaarpoq.
Kukkunersiuinermut Ataatsimiititaliap misissuinermik ingerlatsineranut, tassungalu ilanngullugu ingerlatsinermik kukkunersiuinermut, aningaasartuutit Inatsisartunut aningaasaliissutinut konto aqutigalugu akilerneqartassapput. Misissuinerit taamaattut aallartinneqarnissaannut Inatsisartut Kukkunersiuinermut Ataatsimiititaliaat aalajangiisassaaq. Aalajangiineq Inatsisartut tamakkiisumik missingersuutaasa iluini pisassaaq, taamaammallu tamassuma aallartinneqarnissaa misissuinissap qanoq annertutiginissaa apeqqutaatillugu Suleriaaseq pillugu Inatsisartut Ataatsimiititaliaannit akuerineqartussaalluni.
Ingerlatsinermik kukkunersiuinermut il.il. atatillugu Kukkunersiuinermut Ataatsimiititaliap avataanit ikiorteqarnissaanut aningaasanik atugassanik aningaasanut inatsisissatut siunnersuutip akuersissutigineqarneranut atatillugu Inatsisartunut aningaasaliissutinut kontoni aningaasaliissuteqartoqassaaq. Aningaasaliussattaaq Namminersornerullutik Oqartussat tamakkiisumik ilaannakuusumilluunniit aktieselskabiutaasa misissuiffigineqarnerannut atatillugu ikiorteqarnermut matussutissatut atorneqartassapput. Ilassutitut aningaasaliissuteqarfigineqarsinnaanermut periarfissat eqqarsaatigalugit § 1, nr. 2-mut tunngatillugu oqaaseqaatit innersuussutigineqassapput.
Aammattaaq aningaasaliinernut qularnaveeqqusiinermulluunniit apeqqutinik ataatsimiititaliap suliaqarneranut atatillugu aktieselskabinik Namminersornerullutik Oqartussanit tamakkiisumik ilaannakuusumilluunniit pigineqartunik Aningaasaqarnermut Ataatsimiititaliap misissuiffiginnissinnaaneranut atatillugu ataatsimiititaliaq pisariaqarneratut annertussusilimmik avataaneersunik ikiortissarsiorsinnaavoq. Tamannattaaq Inatsisartut tamakkiisumik missingersuutaasa iluini pissaaq, taamaammallu tamassuma aallartinneqarnissaa annertussuseq apeqqutaatillugu Suleriaaseq pillugu Inatsisartut Ataatsimiititaliaannit akuersissutigineqartussaavoq.
Naalakkersuisut aqqutigalugit ataatsimiititaliat susassaqartut paasissutissanik pissarsiniartarnerat Naalakkersuisut aqutsisoqarfianni suliakkersuinermik siunnersuut kinguneqassaaq.
Namminersornerullutik Oqartussat aktiaatilittut soqutigisaannik Naalakkersuisut isumaginninnerannik inatsisartutigortumik nakkutilliineq soqutigisat taakku uummaarinnerusumik ingerlanneqarnissaannut siuarsaaqataassasoq naatsorsuutigineqarsinnaavoq. Taamaalilluni siunnersuut Naalakkersuisut allattoqarfianni sulisoqarnikkut annertusaasoqarnissaanik pisariaqartitsilersinnaavoq.
Illuatungaatigulli Namminersornerullutik Oqartussat aktiaatilittut soqutigisaasa isumagineqarnerannik patajaallisaaneq Namminersornerullutik Oqartussat akatieselskabini aningaasaliissutaasa nalinginut pitsaasumik kinguneqarnissaa naatsorsuutigineqarsinnaavoq.
Aktieselskabinut tunngatillugu Inatsisartut Kukkunersiuinermut Ataatsimiititaliaannit aamma Inatsisartut Aningaasaqarnermut Ataatsimiititaliaannit apeqqutigineqartut akissuteqarfigineqarnissaat eqqarsaatigalugu siunnersuut sulisoqarnikkut annertusaasoqarnissaanik kinguneqassaaq. Taamatut annertusisitsinerup erseqqinnerusumik annertussusissaanut apeqqutaassaaq ataatsimiititaliat pineqartut apeqquteqarnissamut periarfissaminnik qanoq annertutigisumik atuinersut. Paarlattuanik Namminersornerullutik Oqartussat aktiaatilittut soqutigisaannik Naalakkersuisut ingerlatsinerannik nakkutilliinerup annertusineqarnera ingerlatseqatigiiffimmi ingerlatsinerup pitsanngorsarniarneqarnissaanut kajumissaaqataasinnaavoq.
Siunnersuutip aalajangersagartaanut ataasiakkaanut nassuiaatit
§ 1-imutNr. 1-imut
Aktieselskabit Namminersornerullutik Oqartussanit tamakkiisumik ilaannakuusumilluunniit pigineqartut pillugit paasissutissanik, Naalakkersuisut ilassutitut aningaasaliissuteqarnissamik qinnuteqaataannik aktieselskabinullu taamaattunut aningaasaliissuteqarnissamik qularnaveeqqusiinissamilluunniit siunnersuutaannik ataatsimiititaliap suliarinninnerani atugassanik pissarsiniarnissamik Inatsisartut Aningaasaqarnermut Ataatsimiititaliaata Naalakkersuisunut peqqusisinnaanera aalajangersakkakkut periarfissinneqarpoq. Taamaaliornerup siunertarissavaa aningaasaleeqataassutip qularnaveeqqusiinerulluunniit naapertuuttuneranik Aningaasaqarnermut Ataatsimiititaliap tamakkiisumik tunngavissaqarluni naliliisinnaanissaata qulakkeernissaa.„Paasissutissanik" oqarneq siamasissumik paasineqassaaq. Taamaalilluni ataatsimiititaliap suliarinninnerani atortussat suulluunniit, ilanngussat nalunaarutillu il.il. pisariaqartutut isigineqartut pissarsiareqqullugit ataatsimiititaliap Naalakkersuisut peqqusinnaavai.
Taakku assersuutigalugu tassaasinnaapput ukiumoortumik naatsorsuutit suliffeqarfissuup naatsorsuutaanik, piffissap ilaanut naatsorsuutinik naatsorsuutillu immikkuualuttortaannik kiisalu naatsorsuutinut attuumassuteqartunik atortussanik ilaqartinneqarsinnaasut, taakkununngalu ilaapput naatsorsuutinut inissitsiterinermi atorneqarsimasut, pisortaasut nalunaarsuutaat atortullu assingusut, kukkunersiuisut nalunaarsutaat nalunaarusiaallu il.il. kiisalu atortussat paasissutissallu allat ataatsimiititaliap isummernissaanut pingaaruteqartutut Aningaasaqarnermut Ataatsimiititaliamit nalilerneqartut.
Aktieselskabini Namminersornerullutik Oqartussat kisimiillutik aktiaateqarfigisaannisuulli aktieselskabinit Namminersornerullutik Oqartussanit tamakkiisuunngitsumik pigineqartunit Naalakkersuisut atortussanik piumasaqarsinnaanermut paasissutissanillu pissarsiniarsinnaanermut killeqanngitsumik periarfissaqanngillat. Taamaakkaluartoq paasissutissatut kissaatigineqartut pissarsiarineqarnissaat siunertaralugu Naalakkersuisut aktiaatilinni sinniisuutitaqartutut periarfissaminnik sunilluunniit atueqqullugit ataatsimiititaliamit peqquneqarsinnaapput.
Aktiaatilinni sinniisuutitaqartutut Naalakkersuisut paasissutissanik piniarnissamut periarfissaqarnerat ilaatigut aktieselskabit pillugit inatsisikkut, ilaatigullu ingerlatseqatigiiffiup malittarisassaasigut aalajangersaavigineqarsimavoq.
Immikkut taaneqarsinnaavoq aktiaatillip aktieselskabit pillugit inatsisip § 76-ia naapertorlugu ingerlatseqatigiiffiup ataatsimeersuarnerani ingerlatseqatigiiffimmut pissutsit pillugit paasissutissanik piniarsinnaanera. Taamaaliorsinnaanermulli tunngavissaatitaavoq paasissutissat pineqartut siulersuisut naliliinerat malillugu ingerlatseqatigiiffimmit aktiaatilinnut tunniunneqarsinnaammata, taamaaliorneq ingerlatseqatigiiffimmut annertuumik ajoqusiisuussanngippat.
Tamatuma saniatigut aktieselskabit pillugit inatsimmi § 71 naapertorlugu aktiaatilik ataatsimeersuarnermi oqaluuserisassamik suliassanngortitsisinnaavoq, kiisalu aktieselskabinut inatsimmi § 86 naapertorlugu qulaajaatitsisinnaalluni.
Paasissutissanilli pissarsiarineqartussatut kissaatigineqartunik pissarsiniarlutik Naalakkersuisut taamatut alloriarnissaat pisariaqarnaviarunanngilaq, tak. ataaniittut.
Siunnersuummi § 16 a, imm. 2-mik oqaasertaliineq naapertorlugu siunnersuummik imaluunniit aningaasaleeqataanissamik qularnaveeqqusiinissamilluunniit qinnuteqaammik, paasissutissat kissaatigineqartut pissarsiarineqarnissaasa tungaanut, Aningaasaqarnermut Ataatsimiititaliap suliarinninnini unitsikkallarsinnaavaa.
Inatsisartut ataatsimiititaliaasa sinneri assigalugit Inatsisartut Aningaasaqarnermut Ataatsimiititaliaat siunnersuutinut ataatsimiititaliamut suliarineqartussanngortitanut (tak. Inatsisartut Suleriaasianni § 17, imm. 1, oqaaseqatigiit aappaat) tunngatillugu isumaliutissiissusiortussaatitaavoq. Siunnersuummik Inatsisartunit ataatsimiititaliamut suliarineqartussanngortitamik Inatsisartut suliarinninnerat ataatsimiititaliaq isumaliutissiissummik tunniussereerserlugu unitsinneqarallartaraluarpoq, Inatsisartulli Siulittaasoqarfiata isumagisassaraa ataatsimiititaliat sulinerat illersorneqarsinnaasumik piareersaasiorneqarlunilu ingerlanneqassasoq. Taamaalilluni Siulittaasoqarfiup alaatsinaatassaraa isumaliutissiissusiornerup pisariaqanngitsumik kinguarsarneqannginnissaa.
Ataatsimiititaliarli isumaliutissiissusiornermik kinguartitsinissamik saaffiginnissuteqaraangat, tamanna suliamut tunngatillugu tunngavilersugaagaangat, Siulittaasoqarfik nalinginnaasumik akuersisarpoq. Taamaammat siunnersuummut suugaluartumulluunniit Inatsisartut ataatsimiititaliaat sorlerluunniit, aalajangiinissamut tunngavissaq tamakkiisoq pissarsiarineqarserlugu, isummernissaminik kinguartitsinissamut nalinginnaasumik periarfissaqassaaq.
Aningaasaliissuteqarnissamik qinnuteqaatinik aktieselskabinulluunniit Namminersornerullutik Oqartussanit pigineqartunut aningaasaliissuteqarnissamik qularnaveeqqusiinissamilluunniit siunnersuutinik Aningaasaqarnermut Ataatsimiititaliap suliarinninnissaanut tunngatillugu periarfissap taassuma erseqqissumik aalajangiunneqarnissaa toqqarneqarsimavoq. Taamalillunissaaq tamatuma ataatsimiititaliamit atorneqarnissaata pissusissamisoorluinnarnera erseqqissarneqarpoq. Aalajangiinissamut tunngavigisassap tamakkiisunngornissaa pitinnagu ataatsimiititaliaq isummipallanissaminik tatineqartariaqanngilaq. Ingerlatseqatigiiffik pineqartoq paasissutissanik, qinnuteqaammik illersorneqarsinnaasumik suliarinninnissamut periarfissiisusunik, tunniussitinnagu Inatsisartut Inatsisartulluunniit Aningaasaqarnermut Ataatsimiititaliaata aningaasaleeqataassutissanik qularnaveeqqusiinissamilluunniit akuersissuteqarnissaat ingerlatseqatigiiffiup Namminersornerullutik Oqartussanit tamakkiisumik ilaannakuusumilluunniit pigineqartup naatsorsuutigisinnaanngilaa.
Aamma tamatuma assinganik qinnuteqaammut siunnersuummulluunniit isummersinnaajumalluni paasissutissanik, ataatsimiititaliamit pingaarutilittut isigineqartunik pissarsisoqarsinnaasimanngippat qinnuteqaammik itigartitsinissamut siunnersuummilluunniit atorunnaarsitsinissamut ataatsimiititaliaq soorunami periarfissaqartussaavoq. Aalajangiinissamut tunngavissatut pigineqartoq illersorneqarsinnaasutut ataatsimiititaliap isiginngippagu periarfissaq taanna aallaavittut isigalugu atorneqartariaqarpoq. Tamanna ataatsimiititaliap paasissutissanik kissaataanik aktieselskabip pineqartup malinninnissaanik soorunami annertuumik kaammattuissutaasussaavoq.
Akerlianik paasissutissat mianernartut ingerlatseqatigiiffiup unammillersinnaassusianut pingaarutillit siammarterneqannginnissaannik, taamaalillunilu ingerlatseqatigiiffiup unammillertaanit niueqatigisartagaanilluunniit pissarsiarineqannginnissaannik aktieselskabi Namminersornerullutik Oqartussanit tamakkiisumik ilaannakuusumilluunniit pigineqartoq pissutissaqartumik soqutigisaqarpoq. Taamaammat siunnersuutigineqarpoq Aningaasaqarnermut Ataatsimiititaliaq taassumalu ilaasortarisai ataasiakkaat atorfilittallu, paasissutissat isertuussassatut tunniunneqarsimappata, paasissutissanut pissarsiarineqartunut tunngatillugu nipangiusimannittussaatitaassasut.
Nipangiusimannittussaanermik aammalu taassuminnga unioqqutitsinerup imaannaanngitsutut isigineqarneranik ataatsimiititaliami ilaasortat eqqumaffiginninnissaat qulakkeerniarlugu ataatsimiititaliami ilaasortat nipangiusimannittussaanermik malinninnissaq uppernarsarlugu ataatsimiititaliamut ilanngunnerminni atsiortarnissaat aalajangersarneqarpoq.
Ataatsimiititaliap aningaasaliissutissatut qinnuteqaatinik suliarinninneranut atatillugu nipangiusimannittussaatitaanerup kingunerissavaa paasissutissat isertuussassatut ataatsimiititaliamit pissarsiarineqartut ataatsimiititaliap aalajangiinermini immikkut innersuussutigisassanngikkai.
Inatsisissatut siunnersuutinut aningaasaliissutissatulluunniit qinnuteqaatinut, Namminersornerullutik Oqartussat missingersuutaat pillugit Inatsisartut inatsisaanni § 25, imm. 2 naapertorlugu Inatsisartunit suliarineqartussanngortitanut, Aningaasaqarnermut Ataatsimiititaliap Inatsisartunut tamarmiusunut inassuteqaataanut tunngatillugu paasissutissanut isertuussanut ataatsimiititaliamit pissarsiarineqarsimasunut Aningaasaqarnermut Ataatsimiititaliaq aamma nipangiusimannittussaatitaavoq. Tamanna aamma Inatsisartut sinnerinut tunngatillugu atuutissaaq.Tamatumali pingaarutaa minnerulinngilaq, Naalakkersuisummi akisussaanerannut Inatsisartut inatsisaanni § 6, imm. 2 naapertorlugu suliap pineqartup Inatsisartunit nalilerneqarnissaanut paasissutissat pingaarutillit suugaluartulluunniit Inatsisartunut tunniutissallugit Naalakkersuisut pisussaammata.
Paasissutissat pingaarutillit mianernartulli illersorneqarnissaat Naalakkersuisut kissaatigippassuk Inatsisartut inatsisaanni § 12-mi oqaaseqatigiit aappaat naapertorlugu matoqqasumik suliarinnittoqarnissaanik Naalakkersuisut taamaalillutik siunnersuuteqartariaqassapput. Pisuni taamaattuni paasissutissanik Naalakkersuisut Inatsisartunut tamarmiusunut tunniuteriigaannik Aningaasaqarnermut Ataatsimiititaliaq isumaliutissiissummini soorunami innersuussiinnarsinnaallunilu issuaasinnaavoq. Ataatsimiititalialli isumaliutissiissutaa (Naalakkersusunut kiisalu) Inatsisartut ilaasortaannut, pinerluttulerinermik inatsimmut akisussaallutik taassuminnga avammut saqqummiussinatik pissuseqartussaatitaasunut taamaallaat agguaanneqassaaq.
Naalakkersuisulli paasissutissanik pingaaruteqarsinnaasunik mianernarsinnaasunilli aningaasaleeqataanissamik qularnaveeqqusiinissamilluunniit apeqqummik aningaasanut inatsimmik akuersissutiginninnerup kingornanut kinguartitsinermikkut Inatsisartut tamarmiusut ilisimasaqalersinneqarnissaannik pinngitsuuisinnaanavianngillat. Tamanna Namminersornerullutik Oqartussat missingersuutaat pillugit Inatsisartut inatsisaata § 28, imm. 2-anik tunngaveqarpoq, taannami tunngavigalugu aningaasaliissutissanik nutaanik allanngortitanilluunniit qinnuteqaat iliuutsinik aningaasanut inatsisip suliarineqarnerani siumut naatsorsuutigineqarsinnaasimanngitsunik taamaallaat imaqartussaammat.
Nr. 2-mut
Namminersornerullutik Oqartussat aktiaatilittut soqutigisaannik Naalakkersuisut isumaginnittuunerannik nakkutilliineq ilanngullugu Inatsisartut Kukkunersiuinermut Ataatsimiititaliaata oqartussaaffia aalajangersakkakkut annertusineqarpoq.Taamatut nakkutilliinerminut ilanngullugu ingerlatseqatigiiffiup pineqartup ingerlatsivigineqarnerani aningaasaqarnikkut innimigisassat Naalakkersuisunit naammattumik qulakkeerniarneqarsimanersut ataatsimiititaliap naliliiffigisinnaavaa (ingerlatsinermik kukkunersiuineq). Tamanna siunnersuummi § 17 a, imm. 2-mik oqaasertaliinermi aalajangersarneqarpoq. Ingerlatseqatigiiffiup ingerlatsivigineqarnerani aningaasaqarnikkut innimigisassat naammattumik qulakkeerinniffigineqarsimanerannik apeqqut ingerlatseqatigiiffiup tunisassiorsinnaassusianut naammassisaqarsinnaassusianullu minnerunngitsumik tunngassuteqarpoq.
Oqaasertaliussarli „Aktieselskabit Namminersornerullutik Oqartussanit tamakkiisumik ilaannakuusumilluunniit pigineqartut ingerlatsivigineqarneranni aningaasaqarnikkut innimigisassanik Naalakkersuisut naleqquttumik qulakkeerinninniarsimanersut ataatsimiititaliap imm. 1 naapertorlugu nakkutilliinerminut ilaatillugu nalilersorsinnaavaa" (§ 17 a, imm. 2) uungaannaq isigaluni paasineqassanngilaq. Taamaalilluni iliuutsinut ingerlatseqatigiiffiup ingerlatsinerinnaanut sammitinneqarsinnaanngitsunut, tassunga ilanngullugu assersuutigalugu namminersortunngorsaanissap piareersaasiorneqarneranut ingerlatanilluunniit avissaartitsinermut atatillugu aningaasaqarnikkut innimigisassanik Naalakkersuisut naleqquttumik qulakkeerinninniarsimanerannik naliliinissamut Kukkunersiuinermut Ataatsimiititaliap matunneqarnissaa siunertarineqanngilaq. Taamaattorli pisuni taama ittorpiani ingerlatsinermik kukkunersiuinissap aallartinnissaata tunuarsimaarfigineqarnissaanut pissutissaqartoqarsinnaavoq, taamatummi iliuuseqarnikkut namminersortunngorsaaniarnerup ingerlatanilluunniit avissaartitsiniarnerup pitsaanngitsumik sunnerneqarnissaa aarleqqutigineqarsinnaammat.
Aktieselskabini Namminersornerullutik Oqartussanit tamakkiisumik ilaannakuusumilluunniit pigineqartuni Kalaallit Nunaanni Namminersornerullutik Oqartussat aktiaatilittut soqutigisaannik ataatsimiititaliap nakkutilliinermini atugassatut paasissutissanik erseqqinnerusumik nalunaakkanik pissarsiniarnissamik Naalakkersuisut peqqusinnaavai.
"Paasissutissanik" oqarneq siamasissumik paasineqassaaq. Taamaalilluni ataatsimiititaliap suliarinninnerani atortussat suulluunniit, ilanngussat nalunaarutillu il.il. pisariaqartutut isigineqartut pissarsiareqqullugit ataatsimiititaliap Naalakkersuisut peqqusinnaavai
Taakku tassaasinnaapput ukiumoortumik naatsorsuutit suliffeqarfissuup naatsorsuutigisimasinnaasaanik, piffissamut tamakkiisuunngitsumillu naatsorsuutinik kiisalu naatsorsuutinut atortussanik naapertuuttunik, tassungalu ilanngullugu naatsorsuusiornermut atortussanik, qullersaasut allattugaataannik atortussanillu taakkununnga assingusunik, kukkunersiuisullu allattugaanik nalunaarusiaanillu il.il. kiisalu atortussanik paasissutissanillu allanik, Kukkunersiuinermut Ataatsimiititaliap naliliinera malillugu ataatsimiititaliap nakkutilliisutut atuunneranut pingaarutilinnik imaqartut.
Namminersornerullutik Oqartussat aktiaatilittut soqutigisaannik nakkutilliinermi atugassatut paasissutissanik kissaatigineqartunik, Naalakkersuisut Namminersornerullutik Oqartussat aktiaateqarneranni sinniisutut pigisaaannik, periarfissaasinnaasut tamaasa atorlugit pissarsiniarnissamut Naalakkersuisut ataatsimiititaliamit peqquneqarsinnaapput. Paasissutissanik piniarnissamut Naalakkersuisut qanoq periarfissaqartitaanersut ilaatigut aktieselskabit pillugit inatsisikkut, ilaatigullu ingerlatseqatigiiffiup maleruagassaasigut aalajangersaavigineqarsimavoq.
Aktieselskabit pillugit inatsimmi § 76 naapertorlugu ingerlatseqatigiiffimmut tunngassutillit pillugit ingerlatseqatigiiffiup ataatsimeersuarneranut atatillugu paasissutissanik aktiaatillip pissarsiniarsinnaatitaanera immikkut erseqqissaatigineqarsinnaavoq. Siulersuisut naliliinerat malillugu taamatut pisinnaatitaaneq paasissutissat pineqartut ingerlatseqatigiiffimmut annertuumik ajoqusiisuussanngippata, ingerlatseqatigiiffimmi aktiaatilinnut aatsaat atuussinnaavoq.
Tamatuma saniatigut aktieselskabit pillugit inatsimmi § 71 naapertorlugu aktiaatilik ataatsimeersuarnermi oqaluuserisassamik suliassanngortitsisinnaavoq, kiisalu aktieselskabinut inatsimmi § 86 naapertorlugu qulaajaatitsisinnaalluni.
Ingerlatseqatigiiffimmi pineqartumi aktiaateqartunit allanit Namminersornerullutik Oqartussat pitsaanerusumik atugassaqartinneqartariaqanngillat. Tamatuma kingunerisaanik paasissutissat Kukkunersiuinermut Ataatsimiititaliap Naalakkersuisut aqqutigalugit pissarsiarisai aktiaateqarsinnaasunut allanut aamma ingerlateqqinneqartariaqarput.
Ingerlatseqatigiiffinnut børsimi nalunaarsugaasunut tunngatillugu paasissutissat fondbørsimi maleruagassat ataqqillugit soorunami piniarneqartussaapput. Tamatumannga nassatarineqassaaq (Pappialanik aningaasanik nalilinnik nioqquteqarneq il. il. pillugit inatsisip Kalaallit Nunaannut atuuttup § 36-ia naapertorlugu) tassannga paasissutissanik siusinnerusukkut tamanut saqqummiunneqarsimanngitsunik pissarsiniarsinnaannginneq. Matumanngali sunniut annikinnerusussaavoq, tassa suliffeqarfimmut tunngasut pissutsit pingaarutillit, pappialat nalillit niuerutigineqarnerisa naliliiffigineqartarnerannut sunniuteqarsinnaanerat ilimagineqarsinnaammat, suliffeqarfiup børsimut nalunaarsukkap piaarnerpaamik tamanut saqqummiunneqarnissaat pisussaaffigimmagu (tak. Pappialanik aningaasanik nalilinnik nioqquteqarneq il. il. pillugit inatsisip Kalaallit Nunaannut atuuttup § 27-a). Matumani suliffeqarfiup piffissakkaartumik naatsorsuutigoortumik paasissutissanik tamanut saqqummiussisussaanermik pisussaaffeqarnera ilaavoq.
Tamanna aktieselskabit pillugit inatsisikkut aamma ingerlatseqatigiiffiup (piginnittuusup) malittarisassaatigut ajornartinneqanngippat aktieselskabinit Namminersornerullutik Oqartussanit tamakkiisumik ilaannakuusumilluunniit pigineqartunit Naalakkersuisut aqqutigalugit paaasissutissanik Kukkunersiuinermut Ataatsimiititaliap pissarsiniarsinnaanera ingerlatseqatigiiffiup pineqartup ingerlatseqatigiiffiutigisinnaasaanut aamma atuuppoq – tamatumani apeqqutaanani taakku Namminersornerullutik Oqartussanit tamakkiisumik ilaannakuusumilluunniit pigineqarnersut. Matumanissaaq ingerlatseqatigiiffimmi pineqartumi aktiaateqartunit allanit Namminersornerullutik Oqartussat pitsaanerusumik atugassaqartinneqartariaqannginnerat mianerineqassaaq.
Naalakkersuisut aktieselskabinit Namminersornerullutik Oqartussanit tamakkiisumik pigineqartunit paasissutissanik pissarsiniarsinnaanerannut tunngatillugu nalinginnaasumik nassuiaatit innersuussutigineqarput.
Paasissutissanik kissaatigineqartunik Naalakkersuisut pissarsisinnaanerat apeqqutaatillugu taakku Kukkunersiuinermut Ataatsimiititaliamut Naalakkersuisut kinguarsaanertaqanngitsumik ingerlateqqitassaraat.
Aktieselskabi Namminersornerullutik Oqartussanit tamakkiisumik ilaannakuusumilluunniit pigineqartoq pillugu paasissutissanik piniarnissamik ingerlatseqatigiiffiulluunniit taamaattup ingerlatsivigineqarneranni aningaasaqarnikkut innimigisassanik Naalakkersuisut naleqquttumik qulakkeerinninniarsimanersut naliliinissamik ataatsimiititaliamut ilaasortap siunnersuutaa ataatsimiititaliami amerlanerussutillit akerlerippassuk siunnersuut Inatsisartunit tamarmiusunit aalajangiiffigineqartussanngorlugu ataatsimiititaliami ilaasortap kialuunniit saqqummiussinnaavaa.
Suliassap Inatsisartunut tamarmiusunut saqqummiunneqarnissaa nalinginnaasumik Inatsisartut ileqquusumik ataatsimiinnissaasa tullianut utaqqinneqarsinnaavoq. Inatsisartulli siulittaasuata aalajangiineratigut Naalakkersuisulluunniit siulittaasuata imaluunniit Inatsisartunut ilaasortat ikinnerpaamik affaasa piumasarippassuk Inatsisartut immikkut ittumik ataatsimiigiaqquneqarsinnaapput, tak. Inatsisartut Naalakkersuisullu pillugit Inatsisartut inatsisisaanni § 9, imm. 2. Inatsisartut ataatsimiinnerata ingerlasup nalaani ataatsimiititaliap aalajangiinera pippat, ajornanngippat Inatsisartut ataatsimiinnerat pineqartoq naammassitinnagu, siunnersuut Inatsisartunut tamarmiusut saqqummiunneqassaaq.
Paasissutissanik erseqqinnerusumik aalajangikkanik pissarsiniarnissamik ataatsimiititaliamut ilaasortap siunnersuutaa nalinginnaasumik Inatsisartunit akerlilerneqarneq ajorpoq. Siunnersuutit taamaattut ataatsimiititaliap aalajangiinissaanut tunngaviliisooqataasarput nakkutilliinermillu isumaginninneranut. Taamaammat naatsorsuutigineqarpoq aalajangersagaq allatut iliortoqarsinnaajunnaarangat aatsaat atorneqartassasoq. Siunnersuut uumisaarinertut ataatsimiititalialluunniit pisinnaatitaaffiinik atornerluinertut pissuseqarpat, tassa imaappoq siunnersuut eqqunngitsumik tunngaveqartuusoq ilimagineqarpat aalajangersagaq atorneqarsinnaasarumaartoq naatsorsuutigineqartariaqarpoq. Misissuinissamittaarli siunnersuutigineqartoq kisimiilluni allatigulluunniit aktieselskabimut tunngatillugu ataatsimiititaliap misissuinerinut atatillugu ima annertussuseqalerpat, misissuinerup ingerlanneqarneranut sanilliullugu selskabimut pissusissamisuunngitsumik artornarpallaartutut nalilerneqarpat aalajangersagaq atorneqarsinnaassaaq.
Inatsisartunut tamarmiusunut aalajangiiffigisassatut aktieselskabimik misissuinermik ingerlatsinissamik siunnersuut akuersissutigineqartutut isigineqassaaq Inatsisartunut ilaasortat ikinnerpaamik 2/5-iilii siunnersuummut isumaqataallutik (§ 17 a, imm. 4) taasippata. Siunnersuut akuersissutigineqassappat Inatsisartunut ilaasortat 31-iusut ilaat ikinnerpaamik 13-it taamaalillutik siunnersuummut isumaqataallutik taasisariaqarput. Piumasaqaat taanna nammassineqarpat, Inatsisartunut ilaasortat amerlanerussutillit siunnersuummut akerliullutik taasisimanersut apeqqutaatinnagu, siunnersuut akuersissutigineqartutut isigineqassaaq. Taamaalilluni aalajangersagaq Inatsisartut inatsisaanni § 29, imm. 2-mi aalajangersarneqartutut aallaavimmit allaanerussuteqarpoq, taannami malillugu Inatsisartut aalajangiineri tamarmik amerlanerussuteqarnikkut pisartussaammata.
Siunnersuummut allannguutissatut siunnersuummik saqqummiussisoqarsinnaanngilaq.
Aktieselskabimik misissuinissaq § 17 a, imm. 4 naapertorlugu aallartinneqartussatut aalajangiunneqarsimasoq Kukkunersiuinermut Ataatsimiititaliap misissuinerinut aningaasaliussat iluini ingerlanneqarsinnaanngippat ilassutitut aningaasaliissuteqarnissaq pisariaqassaaq. Ataatsimiititaliamut aningaasaliissutigineqartunit sinneruttut misissugassatut aalajangiunneqartup ingerlanneqarnissaanut naammanngitsutut Kukkunersiuinermut Ataatsimiititaliamit nalilerneqarpata ilassutitut aningaasaliissuteqartoqarnissaanik Kukkunersiuinermut Ataatsimiititaliaq Inatsisartut Suleriaaseq pillugu Ataatsimiititaliaannut qinnuteqassaaq. Inatsisartut § 17 a, imm. 4 naapertorlugu aalajangiussaat ataqqillugu Inatsisartut Suleriaaseq pillugu Ataatsimiititaliaata ilassutitut aningaasaliissuteqarnissamik qinnuteqaammik taamaattumik akuersissutinninnissaa naatsorsuutigineqarpoq.
Aktieselskabit Namminersornerullutik Oqartussanit pigineqartut pillugit paasissutissatut pissarsiarineqartut, paasissutissat isertuussassatut tunniunneqarsimappata, Kukkunersiuinermut Ataatsimiititaliamit, taassumalu ilaasortaanit atorfilittanillu nipangiusimaneqartussaapput (§ 17 a, imm. 5).
Paasissutissanut taamaattunut tunngatillugu Kukkunersiuinermut Ataatsimiititaliap nipangiusimannittussaatitaanera, Inatsisartut Suleriaasianni § 13 naapertorlugu nipangiusimannittussaatitaanerup akerlianik, sanioqqunneqarsinnaanngilluinnartuuvoq. Taamaalilluni Suleriaatsimi § 13, imm. 2 naapertorlugu pisinnaanertulli Kukkunersiuinermut Ataatsimiititaliaq erseqqinnerusumik annertussusilerlugit nalunaarutit tamanut saqqummiunneqassasut aalajangersinnaanngilaq.
Nipangiusimannittussaanermik pisussaaffiup nassataraa, ataatsimiititaliami ilaasortaq partiimini gruppiminut paasissutissanik isertuussisumik tunniussanik ingerlatitseqqiisinnaannginnera suliamili tunngaviusumik ajornartorsiuteqarfiit ataatsimut isigalugit ilisarnarunnaarsarlugilluunniit paasissutissiisinnaanini annikilliliiffigisariaqarlugu.
Pisortat isumaqatiginninniutaasa isertuunneqarnissaannik unioqqutitsineq (Kalaallit Nunaanni pinerluttulerinermut inatsimmi § 20) aamma sulinermut atatillugu nipangiusimannittussaatitaanermik unioqqutitsineq (Kalaallit Nunaanni pinerluttulerinermut inatsimmi § 20) pinerluttulerinermik inatsimmi aalajangersakkat aqqutigalugit nipangiusimannittussaatitaaneq pineqaatissiissutaasarpoq.
Kukkunersiuinermulli Ataatsimiititaliaq pissutsinik Namminersornerullutik Oqartussat aktiaatilittut soqutigisaannut tunngassutilinnik Inatsisartunut ilisimatitsinissamik pisariaqartitsippat ataatsimiititaliaq immikkut isumaliutissiissusiussaaq – isumaliutissiissut paasissutissanik isertuussassanik imaqarsimappat - matoqqasumik oqaluuserineqartussamik.
Landskarsip naatsorsuutai pillugit siunnersuummut Kukkunersiuinermut Ataatsimiititaliaq ukiumut ataasiarluni isumaliutissiissuteqartarpoq (nalinginnaasumik Inatsisartut ukiakkut ataatsimiinneranni). Namminersornerullutik Oqartussat aktiaatilittut soqutigisaannut tunngatillugu immikkut isumaliutissiissutigineqarsinnaasut tassunga atatillugu saqqummiunneqarpata pissusissamisuussaaq, taamaalillunilu Landskarsip naatsorsuutaanut siunnersuutip, immikkut isumaliutiissuteqarfigineqartup, aappassaaneerneqarnera taassuma matoqqasumik oqaluuserineqarneranik aallartinneqarpat pissusissamisuussaaq.
Taamaalilluni immikkut isumaliutissiissut Landskarsip naatsorsuutaasa oqaluuserineqarnerannut attuumassuteqarluni isumaliutissiissutip ilaatut iluseqalissaaq, taamaammallu immikkut inassuteqaammik imaqarani. Inatsisartut Suleriaasianni § 49-imi oqaluuserinninnerup naammassineqarnissaanik aalajangernermit, Inatsisartut Suleriaasianni § 50 malillugu ullormut oqaluuserisassap atorunnaarnissaanik aalajangiinermit allaasumik (tamannali Landskarsip naatsorsuutaannik suliarinninnermut atatillugu nalinginnaanngilluinnartussaavoq) kiisalu Inatsisartut Suleriaasianni § 51 malillugu tatiginninnginnermik nalunaarnissamik aalajangernermit Inatsisartut immikkut isumaliutissiissummik oqaluuserinninnerminni aalajangigaqarsinnaannginnerat tamatuma nassatarissavaa.
Isumaliutissiissut ataatsimiinnermi matoqqasumi suliarineqartoq Inatsisartunut ilaasortanut Naalakkersuisunullu taamaallaat agguaanneqartussaavoq. Taamaalilluni isumaliutisiissut tamanit pissarsiarineqarsinnaasuussanngilaq. Naalakkersuisut akissuteqaateqarsimappata taanna Inatsisartut ilaasortaannut taamaallaat agguaanneqartussaavoq, taamaalillunilu aamma taanna tamanit pissarsiarineqarsinnaassanani.
Immikkut isumaliutissiissuumik Inatsisartut suliarinninneranni Inatsisartuni Naalakkersuisunilu atorfilittat ikiuuttut najuunnissaannut aalajangersagaq mattussisuunngilaq. Atorfilittat pineqartut atorfimmut atatillugu nipangiusimannitussaatitaaneq pillugu pinerluttulerinermik inatsimmi aalajangersakkani ilaatinneqarput (Kalaallit Nunaannut pinerluttulerinermik inatsimmi § 29).
Inatsisartunuttaaq ilaasortat pinerluttulerinermik inatsimmi § 20-mi aamma § 29-imi ilaatinneqarput, taamaalillutillu assersuutigalugu Kukkunersiuinermut Ataatsimiititaliap immikkut isumaliutissiissutaanik Inatsisartut matoqqasumik suliarinninneranni atorfimminnut atatillugu paasissutissanik isertuussassanik pissarsiarisaminnik ingerlatsiseqqikkunik pissusissamisuunngitsumilluunniit atuigunik pineqaatissinneqarsinnaapput.
§ 2-mutSiunnersuutigineqarpoq inatsisartut inatsisaat ulloq 1. januar 2007 atuutilissasoq.
Namminersornerullutik Oqartussat aktiaatilittut soqutigisaasa inatsisip atortuulernissaa sioqqullugu Naalakkersuisuisunit isumagineqarnerat Kukkunersiuinermut Ataatsimiititaliap nakkutilliinermut pisinnaatitaaneranut ilaatinneqanngilaq.
1. januar 2007-illi kingorna Namminersornerullutik Oqartussat aktiaatilittut soqutigisaannik Naalakkersuisut isumaginninnerannik Kukkunersiuinermut Ataatsimiititaliap nakkutilliinerata pisariaqalersippagu, Kukkunersiuinermut Ataatsimiititaliap naatsorsuutinut paasissutissanulluunniit allanut tunngatillugu, ataatsimiititaliap naliliinera malillugu paasissutissat taamaattut ilanngunneqarnissaat pisariaqarpat, inatsisip atortuulersinneqarnissaa sioqqullugu pisunut tunngassutilinnik pissarsinissaanut piffissaq atortuulersitsivissaq akornutaanngilaq.
Tamatuma assinganik inatsisip atortuulersinneqarnissaa sioqqullugu piffissamut attuumassuteqartunik, ataatsimiititaliap § 16 a naapertorlugu piniarsinnaatitaanerminik atuineranut atatillugu Ani-ngaasaqarnermut Ataatsimiititaliaq paasissutissanik, aningaasaleeqataassutissanik qularnaveeqqusiinissamilluunniit siunnersuummik qinnuteqaammilluunniit ataatsimiititaliap suliarinninneranut ilaatinneqartariaqartutut ataatsimiititaliamit nalilerneqartunik piniarsinnaavoq.