3. august 2006

UKA 2006/42

 

Inatsisissatut siunnersuummut oqaaseqaatit


Oqaaseqaatit nalinginnaasut

1. Inatsisissatut siunnersuutip tunuliaqutaa
Inatsisissatut siunnersuutip matuma siunertaraa sinaakkusissallugu ilinniartitaanerit ingerlaqqiffiusut nutaat arlaliusut aammalu atuutereersut Ilisimatusarfimmut attuumassuteqalersinnaanngortitaanissaat.

Ilisimatusarfik (Grønlands Universitet) pillugu Inatsisartut inatsisaat nr. 16, 31. oktober 1996-imeersup maanna atuuttup atuutilernerata kingorna ilinniagartuutut ilinniartitaanerit nutaat arlaliusut takkussimapput. Matumuuna siunnersuutikkut erseqqissumik tunngavilerneqarusuppoq ilinniagaqarnerit taakkua Ilisimatusarfimmut attuumassuteqalersinnaanissaat.

Naalakkersuisut qaffasinnerusunik ilinniartitaanerit akunnattumik sivisussusillit atorfininnissamut sammisumik bacheloritut ilinniagaqarnertut ilusilersoruttorpaat. Tamatumani pineqarput ilinniartitsisunngorniarluni ilinniartitaanerup, tusagassiortunngorniarluni ilinniartitaanerup, inunnik siunnersortinngorniarluni ilinniartitaanerup aamma peqqissaasunngorniarluni ilinniartitaanerup atorfininnissamut sammisumik bacheloritut qaffasissuseqalersillugit inerisarneqarnissaat. Ilanngullugu qaffasinnerusumik ilinniartitaanerit akunnattumik sivisussusillit diplomimik allagartartaarluni masteritut kandidatitullu qaffasissuseqartumik ilinniagaqartuunngornissamut ammaassisisinnaasumik qaffasissuseqalersinnaanngortillugit ilaartorneqarsinnaanngorsimapput.

Naalakkersuisut Oqaatsinik Pikkorissarfik peqatigalugu oqalutsinngorniarluni aamma nutserisunngorniarluni ilinniartitaanerit bacheloritut qaffasitsigisumik ilinniartitaanertut aaqqissuunneqarsinnaanerat periarfissaqarnersoq aamma misissussavaat.

Siunissaq ungasinnerusoq eqqarsaatigalugu ilinniartitaanerit qaffasinnerusut akunnattumik sivisussusillit Ilisimatusarfimmut attuumassuteqalersinnerisigut kissaatigineqarpoq ilinniartitaanerit tamarmik ilisimatusarnermit aallaaveqalersinneqarnissaat. Ilisimatusarnermit aallaaveqalersinneqarnissaannik oqarneq ima paasisariaqarpoq ilinniartitaanermi ilinniartitsisuusut ilangaatsiarsui ilisimatusarnissamut aamma pisussaaffeqartitaaneqassammata.

Ilinniartitaanerit ilisimatusarnermit aallaaveqartut nutaat ilinniarnermi avatangiisit uummaarissut aamma sunniivigeqatigiiffiusut pilersinneqarnissaannut ilapittuutaassapput, tamatumuuna ilinniartitsisunngorumaartussat ilisimatusarnermik misilittagaqartut fagligiusumik avatangiisit assigiinngitsut iluanni ilinniartitaanernut aamma suliassanut inerisaanermik siunertaqartunut naleqquttunut attuumassuteqalernissaat orniginarnerusunngortinneqassalluni. Tamatuma saniatigut ilinniartitaanerit ilisimatusarnermit aallaaveqartut periarfississavaat suliniutinik ilinniartitsinermut aamma ilisimatusarnermut tunngassuteqartunik kiisalu fagit killeqarfii aamma ilinniarfeqarfiit akimorlugit sulianik inerisaanermik aamma naliliinernik aallarnisaasarnissaq. Siunissaq ungasinnerusoq eqqarsaatigalugu allanngortiterinerit tamakku kingunerissavaat allaffissornerup, ilinniartitaanerup, ilisimatusarnerup aammalu inerisaaneq siunertaralugu sulinerup tungaasigut isumalluutinik suleqatinillu pitsaanerusumik atorluaalernissaq fagligiusumik aamma aningaasarsiornikkut annertuumik ingerlatsinerup iluaqutissartai iluaqutsiullugit.

2. Siunnersuummi immikkoortut pingaarnerusut

a) Inatsisit atuuttut

Ilisimatusarfik pillugu inatsisitigut toqqammavigineqartut massakkut atuuttut malittarisassanik makkuninnga katitigaapput:

Malittarisassat maannakkut atuuttut malillugit Ilisimatusarfik periarfissaqanngilaq atorfininnissamut sammisumik bacheloritut allagartartaartitsisinnaassalluni. Tamatuma saniatigut ullumikkut qaffasinnerusumik ilinniartitaanerit akunnattumik sivisussusillit arlaliusut ilisimatusarnermit aallaaveqartitaanatilluunniit ilisimatusarnermut attuumassuteqartitaanngillat. Tamanna pissutigalugu ilinniartut qaffasinnerusumik ilinniartitaanerni akunnattuni ilinniartut Ilisimatusarfimmi toqqaannartumik nangitseriarsinnaanngillat.

b) Siunnersuutip imarisaa

Siullermik siunnersuummi aalajangersarneqarput Ilisimatusarfimmi ilinniartitaanerit pillugit pingaarnerusutigut piumasaqaatit. Tamakkua siunertarivaat ilinniartitaanerit naammaginartumik pitsaassusilerneqarnissaasa qulakkeerneqarnissaat aammalu angusanik nuussinissamut ilinniartunillu paarlaasseqatigiinnissamut tunngavissarititaasut pilersinneqarnissaat.

Tulliullugu ilinniagartuutut anguneqarsinnaasut Ilisimatusarfimmit ivertitsissutigineqarsinnaasut aalajangersarneqarput. Ilinniagartuutut anguneqarsinnaasut Ilisimatusarfimmit ullumikkut ivertitsissutigineqarsinnaasut taamaasiornikkut annertusarneqarput, taamatuttaarlu siunnersuummi aalajangersarneqarput anguneqarsinnaasut suut Ilisimatusarfimmit ivertitsissutigineqarsinnaanersut. Tamanna piffissami matumani nalunaarut toqqammavigalugu pisarpoq. Siunnersuutip siunertarivaa ilinniagartuutut anguneqarsinnaasunik tunniussisarnissap inatsisitigut erseqqissumik tunngavilerneqarnissaata qulakkeerneqarnissaa aammalu suliassaqarfiup tungaatigut Ilisimatusarfiup nunat tamat akornanni ineriartornermut malinnaasinnaanerata qulakkeerneqarnissaa.

Ilinniagartuutut anguneqarsinnaasut nutaat eqqunneqarnerisigut periarfissaqalerpoq Ilisimatusarfiup ilinniartitaanernik assigiinngiiaartunik amerlanerusunik neqerooruteqartalersinnaanissaa fagligiusumik avissaaqqutit akimorlugit Ilisimatusarfik ilinniarfittut aamma ilisimasaqarfittut alliartorniassammat.

Ilinniartitaanerit allanngortiterneqarnissaannik aamma Ilisimatusarfiup ataani kattunneqarnissaannik periarfissiinikkut ilinniartut ilinniartitsisullu eqqarsaatigalugit ilinniarnermut avatangiisit anginerusut pilersinneqassapput fagligiusumik paarlaasseqatigiinnermut sunniivigeqatigiinnermullu iluaqutaasussamik. Tamatumalu peqatigisaanik avatangiiserisanit inuutissarsiutitigut ilinniartitaanikkullu politikikkut piumasaqaatinut naapertuuttumik annerusumik naleqqussarsinnaassuseqarneq pissarsiarineqassaaq.

Kiisalu siunnersuut immikkut ittumik inatsisitigut tunngaviliivoq Ilisimatusarfiup iluani ilinniartitaanerit akornanni aammalu Ilisimatusarfiup iluani ilinniartitaanerit aammalu nunagisami nunallu tamat akornanni ilinniarfeqarfinni ilinniartitaanerit akornanni angusanik nuussisinnaaneq pillugu Naalakkersuisut malittarisassiorsinnaanerannik.

3. Pisortanut aningaasaqarnikkut allaffissornikkullu kingunerisassai
Ataatsimut isigalugu siunnersuut maannakkut aningaasaliissutigineqarsimasut iluanni akissaqartinneqarpoq, tassami naatsorsuutigineqarmat ilinniartitsinerup aamma allaffissornerup iluani nukiit pitsaanerusumik atorneqalernissaat, nukinnillu aningaasanillu atorluaanerup ilisimatusarnermik tunngaveqarluni ilinniartitsineq qulakkiissavaa. Atorfininnissamut sammisumik bachelori 2005-imi Ilinniarfissuarmi misiliutitut aallartinneqarpoq. Ilinniartut atorfininnissamut sammisumik bachelorinngorniat nutaat 80-it missaat aggustimi 2006-imi aallartipput, aatsaallu ilinniartut taamak amerlatigisut aallartittussanngorlutik. Taanna ilinniariaaseq suli manna tikillugu aningaasaliissutinik amerlanerusunik pisariaqartitsinngilaq, kingunerisimalluguli qinnuteqartut amerleriarujussuarsimanerat aamma pitsaassutsimikkut qaffariarsimanerat. Siunnersuutip matuma kingunerissavaa ilinniartitaanerit assigiinngitsut akimorlugit atuartitsinerit ingerlanneqarsinnaanngornissaat, ilinniartitsissutissat pitsaanerusumik pilersaarusiorneqartalernissaat aamma ilinniartitsisut atortussallu pitsaanerusumik atorneqartalernissaat.

Aningaasartuutissat siunnersuummut attuumassuteqartut kontop pingaarnerup 40.12.33, Ilinniartitaanernut ingerlaqqiffiusunut ilinniarfiit, kontop pingaarnerup 40.12.27, Ilimmarfiup ingerlanneqarnera, kontop pingaarnerup 40.01.10, Inerisaavik/Pilersuiffik aamma konto pingaarnerup32.10.06, Peqqissaanermik Ilinniarfik, iluanni matussutissaqartinneqarput.

4. Inuussutissarsiuteqartunut aningaasaqarnikkut allaffissornikkullu kingunerisassai
Inatsisissatut siunnersuut inuussutissarsiuteqartunut aningaasaqarnikkut allaffissornikkullu kinguneqassanngilaq.

5. Avatangiisinut pinngortitamullu kingunerisassai
Inatsisissatut siunnersuut avatangiisinut pinngortitamullu kinguneqassanngilaq.

6. Innuttaasunut aningaasarsiornikkut allaffissornikkullu kingunerisassai
Inatsisissatut siunnersuut innuttaasunut aningaasarsiornikkut allaffissornikkullu kinguneqassanngilaq.

7. Naalagaaffeqatigiinnermut namminersornermullu tunngasortai
Siunnersuut naalagaaffeqatigiinnermut sunniuteqassanngilaq.

Ilinniartitaanerit ingerlaqqiffiusut patajaallisarneqarnerat Kalaallit Nunaata namminersortup tunngavianik ilapittuutaassaaq.

8. Pisortanik, suliffeqarfinnik soqutigisaqaqatigiiffinnillu tusarniaaneq
Siunnersuut Ilisimatusarfiup ataani ingerlaqqiffiusumik ilinniartitaanerit pillugit inatsisissatut siunnersuutitut isikkoqarluni makkununnga tusarniaassutigineqarpoq: Ilisimatusarfik, Ilinniarfissuaq, Perorsaasunngorniat Ilinniarfiat, Inunnik Siunnersortinngorniat Ilinniarfiat, Tusagassiortunngorniat Ilinniarfiat, Inerisaavik/Pilersuiffik, KANUKOKA, Aningaasaqarnermut Pisortaqarfik, SIK, Grønlands Arbejdsgiverforening, IMAK, PIP, Ilinniartitaanermut Ministeriaqarfik, Ilisimatuussusermut Ministeriaqarfik, Peqqissutsimut Pisortaqarfik, Suliffeqarnermut Inuussutissarsiutinullu Ilinniartitaanermut Pisortaqarfik, Inuussutissarsiornermut Pisortaqarfik, Nunanut Allanut Pisortaqarfik, aammalu Oqaatsinik Pikkorissarfik.

Tusarniaanermi akissutisiarineqartut siunnersuummut oqaaseqaatinut annerusumik tunngassuteqarput oqaaseqaatinullu matumani saqqummiunneqartunut sapinngisamik ilanngussorneqarlutik.

Ilisimatusarfiup siunnersuut ataatsimut isigalugu iluarisimaarpaa. Tamatuma saniatigut Ilisimatusarfiup oqaatigaa aningaasanut inatsimmi aningaasaliissutit iluanni massakkut periarfissaqanngitsoq atorfininnissamut sammisumik bacheloritut ilinniartitaanerit, diplomimik allagartartaarluni ilinniartitaanerit aammalu masteritut ilinniartitaanerit ingerlanneqarnissaannut atorneqarsinnaasunik. Siunnersuutip aningaasaqarnikkut kingunissaanut atatillugu oqaaseqaatigineqartut matumuuna innersuussutigineqassapput.

Ilinniarfissuup uparuarpaa ilinniartitsisunngorniarluni ilinniartitaanerup atorfininniarluni bacheloritut ilinniartitaaninngortinneqarnissaa piffissap suliffiup sivisussusia pillugu isumaqatigiissut eqqarsaatigalugu kinguneqarumaartoq tamannalu aningaasartuutit amerlineqarnerannik nassataqarumaartoq. Siunnersuutip aningaasaqarnikkut kingunissaanut atatillugu oqaaseqaatigineqartut matumuuna innersuussutigineqassapput.

KANUKOKA siunnersuutip siunertarisaanut akuersaarpoq.

SIK-p ilinniartitaanerup ilisimatusarnermit aallaaveqartup nassuiaataa, tamatumunnga ilagitillugu ilinniartut ilinniarnerisa ilaata qanoq annertutigisup ilinniartitsisunit ilisimatusarnissamut pisussaaffeqartunit tigummineqarnissaa, ujartorpaa. Tassunga atatillugu oqaatigineqassaaq ilinniartitsinerup ilaata ilinniartitsisunit ilisimatusarnissamut pisussaaffeqartunit ataatsimut isigalugu isumagineqarnissaa pillugu siunnersuummi aalajangersimasumik killiliinissaq anguniarneqanngimmat. Ilinniartitaanermit ilinniartitaanermut nikerartumik aalajangersaasoqartarnissaa tamatumunnga pissutaavoq, taamaattorli piffissangaatsiarsuunissaa siunertarineqarpoq. Siunnersuutip pisortanut, inuussutissarsiuteqartunut aamma innuttaasunut aningaasarsiornikkut allaffissornikkullu kinguneqannginnissaanik uppernarsaataasinnaasunik SIK aamma ujartuivoq. Tassunga atatillugu siunnersuutip aningaasarsiornikkut kingunissaanut atatillugu oqaaseqaatigineqartut innersuussutigineqassapput.

Grønlands Arbejdsgiverforeningip oqaatigaa isumaliutigineqartariaqartoq pissusissanik saneqqutsisarnerit pillugit pineqaatissiisarneq pillugu malittarisassiornissamut Naalakkersuisut piginnaatitaaffilerneqartariaqannginnersut. Tassunga atatillugu ilisimatitsissutigineqassaaq Ilisimatusarfik pillugu Inatsisartut inatsisaanni § 8, immikk. 4, malillugu rektori taamatut piginnaatitaaffeqartinneqarmat. Tamatuma allanngortinneqarnissaa pissusissamisoorsorineqanngilaq. Ilanngullugu uparuarneqarpoq siunnersuummi aalajangersakkat aalajangersimasut tungaasigut Naalakkersuisut aamma Universitets Rådip akornanni marloqiusaasumik piginnaatitaanermik peqarsorinartoq. Tassunga atatillugu oqaatigineqassaaq piginnaatitsissut siunnersuummi Naalakkersuisut tunniunneqalersaartoq tassaammat angusanik nuussisinnaanermut malittarisassiornissamut piginnaatitsissut. Piginnaatitsissut Universitets Rådimut tunniunneqalersaartoq tassaavoq angusanik nuussisinnaanermut najoqqutassiornissamut piginnaatitsissut. Piginnaatitsissutit imminnut qalleraanneqarsorineqarsinnaapput, kisiannili Universitets Rådip najoqqutassanik aalajangersaasinnaanera attanniarneqarpoq malittarisassat pingaarnerusut Naalakkersuisut aalajangersaavigisinnaasaasa tigussaasumik ilusilersorneqarnissaat anguniarlugu. Kiisalu uparuarneqarpoq nalunaarummi nr. 27-imi 1. september 1995-imeersumi § 3 peerneqartariaqartoq siunnersuummut naapertuutinngimmat. Inatsisissatut siunnersuut akuerineqarpat inatsimmi allassimasoq pingaarnerutinneqassaaq tamatumalu kingorna nalunaarut inatsit naapertorlugu nutarterneqarumaarluni.

IMAK-ip naammagisimaarpaa ilinniartitsisunngorniarluni ilinniartitaaneq aammalu ilinniaqqinnerit ilisimatusarnermit aallaaveqalersinneqassammata. IMAK-ip uparuarpaa ilinniaqqinnermut aningaasaliissutit maannakkut atuuttut attanneqarnissaat.

Aningaasaqarnermut Pisortaqarfiup nalunaarutigaa siunnersuutip aningaasartuutissanik kinguneriumaagai allaaserineqarsimanngitsut aamma siunnersuutip aningaasartuutissanik kinguneriumaagassai Naalakkersuisut tulleriaarinissaannut 2007-imut aningaasanut inatsisissamut siunnersuummi ilaatinneqartariaqarsimagaluartut sulianut nutaanut aallartitassanut ilaatillugit. Aningaasaqarnermut Pisortaqarfiup suliamut tapertaliullugu nalunaarutigaa, tamatuma kingunerissagaa siunnersuutip 2008-mi aningaasanut inatsisissamut siunnersuusiornermi aatsaat saqqummiunneqarnissaa. Siunnersuummi matumani pisortanut aningaasatigut kingunissaanik nalunaarusiornermi erseqqissarneqarpoq siunnersuut aningaasartuutissanik nutaanik kinguneqassanngitsoq, tassami ilinniartitsinerit ilisimatusarnermik tunngaveqarluni ingerlanneqarnissaannut aningaasartuutit annertunerusut ilinniartitsinerup aamma allaffissornerup iluani nukinnik aningaasaliissutinillu atorluaanerup matussutissaqartissammagit.

Aningaasaqarnerup Pisortaqarfiup matuma saniatigut kissaatigaa siunnersuummut oqaaseqaatini nalinginnaasuni erseqqissumik nalunaarneqassasoq aaqqissuussinissamik siunnersuut aningaasaliissutissanit 2007-imut aningaasanut inatsisissaannut siunnersuutip iluaniittussanngorlugit. Tassani nalunaaritigineqassaaq aaqqissuussinermut aningaasaliissutissat suut atorneqassanersut. Siunnersuutip aningaasaqarnikkut pisortanut kinguneriumaagassaanik nalunaaruteqarnikkut allaaserineqarpoq aningaasartuutissat siunnersuummut attuumassuteqartut kontop pingaarnerup 40.12.33, Ilinniartitaanernut ingerlaqqiffiusunut ilinniarfiit, kontop pingaarnerup 40.12.27, Ilimmarfiup ingerlanneqarnera, konto pingaarnerup 40.01.10, Inerisaavik/Pilersuiffik aamma konto pingaarnerup 32.10.06, Peqqissaanermik Ilinniarfik, iluanni matussutissaqartinneqartut.

Aningaasaqarnermut Pisortaqarfiup aamma qinnutigaa aningaasartuutissanut tunngavissat ukunani aningaasartuutissani erseqqissarneqassasut kontoni pingaarnerni:

Tamatumuuna malugequneqassaaq Ilimmarfimmik pilersitsiniarluni pilersaarut tunngavigalugu ingerlasoqarmat, kontonullu aningaasaliissutissatut tunngaviusut najoqqutaralugit ingerlaavartumik erseqqarissarneqartuassammata.

Ilisimatuussutsimmut Ministeriaqarfiup uparuarpaa Danmarkimi ilinniartitaanerit ingerlaqqiffiusut akunnattumik sivisussuseqartut ilisimatusarnermit aallaaveqartitaanngimmata. Tassunga atatillugu oqaatigineqassaaq tamanna inatsisissatut siunnersuummut atatillugu immikkut ittumik sunniuteqanngimmat siunnersuummi ilinniartitaanerit pitsaassusissaasa minnerpaaffimmik piumasaqaatit taamaallaat aalajangersaavigineqarmata. Kalaallit Nunaanni ilinniartitaanerit akunnattumik sivisussusillit ilisimatusarnermit aallaaveqartitaalernerisa kingunerissavaat pitsaassuseq qaffanneqassammat nunat tamat akornanni akuerinninneq, angusanik nuussisinnaaneq aamma ilinniartunik paarlaasseqatigiinneq eqqarsaatigalugu ajornartorsiutaanaviarani.

Tusarniaanermi akuusut sinneri oqaaseqaateqanngikkaangamik akissuteqartarsimanngillat.

 

Inatsisissatut siunnersuummi aalajangersakkanut ataasiakkaanut oqaaseqaatit


§ 1-imut

Nr. 1-imut atatillugu
§ 3a aalajangersagaq nutaajuvoq Ilisimatusarfik pillugu Inatsisartut inatsisaanni § 2-mi, immikk. 1-imi oqaaseqatigiinnik ilassutaasoq aalajangersarlugu Ilisimatusarfik "ilisimatuussutsikkut qaffasinnerpaamik anguneqarsinnaasoq angutserlugu ingerlaqqiffiusumik ilinniartitaanermik neqerooruteqassasoq".

Siunertarineqarpoq nunagisami aamma nunat tamat akornanni assigiissaarnerusunik aamma annertunerusumik ataqatigiissaarneqartunik malittarisassiornissaq. Taamasiornikkut Kalaallit Nunaanni ingerlaqqiffiusunik ilinniartitaanerni ilinniartut eqqarsaatigalugit nuttarsinnaassuseq annertunerusoq aammalu ilinniartitaanerit, fagit aammalu angusanik nuussisinnaanerit akuerineqartalernissaannut periarfissat amerlineqassallutik.

Aalajangersakkap erseqqissarpaa ingerlaqqiffiusumik ilinniartitaanerit nunat tamat akornanni ilinniartitaanertulli qaffasissuseqassasut. Ingerlaqqiffiusumik ilinniartitaanerit tungaasigut pisariaqarpoq ilinniartitaanerit naleqqussarneqarnissaat angusanik nuussisinnaaneq, ingerlaqqiffiusumik ilinniarnissamut periarfissaqarneq aamma nunat tamat akornanni akuerinninnissaq immikkut ittumik eqqarsaatigalugit nunani allani ilinniartitaanernut assingusunut naapertuutilersinneqaqqullugit.

§ 3b-imi aalajangersarneqarpoq ilinniagartuutut anguneqarsinnaasut suut Ilisimatusarfimmit ivertitsissutigineqarsinnaanersut.

Fagit assigiinngitsut tungaasigut suleqatinut pisortanullu piumasaqaatit sakkortusiartorput. Tamanna isumaqarpoq pikkorissarnerit imaluunniit ingerlaqqiffiusumik ilinniartitaanerit aqqutigalugit suliamut atatillugu pikkorissarnermik pisariaqartitsinermik. Pikkorissarnerit ingerlaqqiffiusumillu ilinniartitaanerit tamakku pointsystemi, ECTS-point – European Credit Transfer System, malillugu aaqqissugaapput.

Nr. 1 naapertorlugu Ilisimatusarfik bacheloritut angusinermik tunniussisinnaavoq. Bacheloritut ilinniartitaanerit ilisimatusarfinni ileqquusumik ilinniartitaanerit assigaat. Ilinniartut bacheloritut ilinniarnermik naammassinnittut kandidatitut ilinniartitaanermut nangissinnaapput.

Nr. 2 naapertorlugu Ilisimatusarfik atorfininnissamut sammisumik bacheloritut angusinermik tunniussisinnaavoq. Atorfininnissamut sammisumik bacheloritut ilinniartitaanerit ilinniartitaanerupput atuagarsornikkut ilinniarnernik aamma praktikkernertut ilusilimmik misiliilluni sungiusarnernik tapertariissitsinermik piumasaqarfiusut. Siunissami nalilissallugu pisariaqassaaq inuutissarsiutitigut ilinniartitaanerit ilaat atorfininnissamut sammisumik bacheloritut ilinniartitaanertut pissuseqalersinneqarluarsinnaannginnersut. Tamatuma kingunerissavaa ilinniartitaanerit ilisimatusarnermik aamma inerisaanermik siunertaqarluni sulinernik annertusiartortumik aallaaveqaleriartornissaat.

Nr. 3 naapertorlugu Ilisimatusarfik ilinniagartuutut diplomimik allagartartaarluni ilinniartitaanermik angusinermik tunniussisinnaavoq. Siunertarineqarpoq ilinniartut akunnattumik ingerlaqqiffiusumik ilinniartitaanermik naammassinnissimasut periarfissaqartinneqassasut ilinniagartuutut diplomimik allagartartaarluni ilinniarnissamut taamaalillutik 60 ECTS-pointinik, ukiumik ataatsimik sivisussusilimmik ilinniartutut sulinermik naatsorsuunneqartumik, pissarsinermikkut atorfininnissamut sammisumik bacheloritut ilinniartitaanermik naammassinnissimasunut fagligiusumik nallersuunneqarsinnaasumik angusaqarsinnaaqqullugit.

60 ECTS-pointit naleqarput ukiumik ataatsimik sivisussuseqartumik ilinniartutut sulinermik.

Nr. 4 naapertorlugu Ilisimatusarfik masteritut angusinermik tunniussisinnaavoq. Ilinniartut atofininnissamut sammisumik bacheloritut ilinniartitaanermik imaluunniit ilinniagartuutut diplomimik allagartartaarluni ilinniartitaanermik naammassinnissimasut masteritut ilinniartitaaneq 60 ECTS-pointinik pissarsillutik naammassisinnaavaat.

Nr. 5 naapertorlugu Ilisimatusarfik kandidatitut angusinermik tunniussisinnaavoq. Bachelorit ilinniagartuutut bacheloritut ileqquusumik ilinniartitaanermik naammassinnittut 120 ECTS-pointinik allanik pissarsillutik kandidatitut angusinermik tunineqarsinnaapput.

Ilinniartut atorfininnissamut sammisumik bacheloritut angusaqarsimasut masteritut ilinniarnermik nangitsisinnaapput, ilinniaqqinnermilu 60 ECTS-pointinik naleqartunik pissarsinikkut kandidatitut allagartartaarsinnaallutik.

Kiisalu Ilisimatusarfik Ph.D.-itut angusinermik tunniussisinnaavoq. Ph.D.-itut ilinniartitaaneq kandidatitut angusinermik pissarsisimasunit qinnutigineqartarsinnaavoq. Ph.D.-itut ilinniartitaaneq ukiuni pingasuni ilinniarnikkut nalinginnaasumik naammassineqartarpoq, 180 ECTS-pointinik pissarsinertut naleqartumik.

Nr. 2-mut atatillugu
Siunnersuutigineqarpoq Ilisimatusarfik pillugu Inatsisartut inatsisaanni § 19-imi nr. 6 nutaaq ilanngunneqassasoq. Aalajangersaanikkut tamatumuunakkut Naalakkersuisut periarfissinneqassapput pisariaqartitsisoqalissappat suliaqarfiit pineqartut tungaasigut sukumiinerusumik malittarisassiorsinnaanissamut.

Naalakkersuisut malittarisassiorsinnaapput tunngavissarititaasut suut atorlugit fagi imaluunniit ilinniartitaaneq ilinniartitaanernut allanut ammaassisinnaassanersoq imaluunniit ilinniartitaanerni allani fagit assingusut atuaqataaffiginngissinnaanerlugit.


§ 2-mut atatillugu

Siunnersuutigineqarpoq Inatsisartut inatsisaat 1. december 2006 atuutilissasoq. Tamatumuuna anguniarneqarpoq ilinniartitaanerit pineqartut Ilisimatusarfimmut attuumassuteqalersinneqarnissaat pillugu inatsisitigut sinaakkutarineqartut pisariaqartut sapinngisamik piaarnerpaamik pilersinneqarnissaat siunertaralugu aammalu sapinngisamik piaarnerpaamik Ilisimatusarfik erseqqissumik inatsisitigut tunngavissaqaleqqullugu ilinniartut ilinniartitaanernik pineqartunik tamarmiusunik naammassinnittut ilinniagartuutut angusinernik tunineqarsinnaaleqqullugit.