11. august 2006
2. februar 2006UKA 2006/7
UKIU 2006/72
Inatsisissatut siunnersuummut nassuiaatit
Nalinginnaasumik nassuiaatit1. Siunnersuutip siunertai imarisaalu pingaarnerit:
Inatsisissatut siunnersuutip matuma tunngaviusumik atuarfiit namminersortitaasut atuarfiit illutassaannik sanaartornissaannut periarfissippai inissialiornermi aningaasaliissuteqartarnermi aaqqissuut 10-40-50 naapertorlugu malittarisassat atuuttut sapinngisamik assingusut najoqqutaralugit. Tunngaviusumik atuarfiup namminersortitaasup nammineerluni sanaartornermi aningaasartuutit katinnerisa 10%-iat akilertussaavai, sanaartornermi aningaasartuutit 10%-iat kommunalbestyrelsip Naalakkersuisullu 30%-iat taarsigassarsiutigissallugit. Sinneruttut 50%-it aningaaserivimmit taarsigassarsisitsisarfimmilluunniit taarsigassarsinikkut aningaasalersorneqassallutik. Kommunalbestyrelsip taarsigassarsiarititai Naalakkersuisullu taarsigassiarsiarititai ukiuni 15-ini erniaaqaratillu taarsersorneqassanngillat, taassuma kingorna ukiuni 10-ni taarsersorneqassallutik.Tamakku saniatigut tunngaviusumik atuarfiup namminersortitap aningaasalersuinermi ani-ngaasartuutissaanut allanut Naalakkersuisut kommunalbestyrelsilu tapiissuteqarsinnaapput taarsigassarsisitsillutilluunniit.
Allannguutissatut siunnersuutip qulakkiissavaa tunngaviusumik atuarfiit namminersortitat sanaartornissamut aningaasalersuinermi pitsaanerusunik periarfissiissaaq, taamaaliornikkullu naatsorsuutigineqartariaqassalluni tunngaviusumik atuarfiup namminersortitap aningaasaqarnera pitsaasumik sunnerneqassalluni taamaalillunilu tunngaviusumik atuarfiit namminersortitat pilersinnissaat ajornaannerulissalluni kiisalu angajoqqaat akiliutaannut ikilisaataassalluni. Nuuk International Friskole, KANUKOKA, IMAK aamma Sulisitsisut Peqatigiiffiat Naalakkersuisut tusarniaaffigimmagit akissutini isornartorsiuinerit taamaalilluni ilalerneqassapput.
2. Allaffissornikkut aningaasarsiornikkullu pisortanut sunniutissat:
§ 18a-imi oqaasertassatut siunnersuutit, atuarfiup namminersortup illutassaanik sanaartornermi aningaasartuutissat 30%-iinik Naalakkersuisut taarsigassarsisitsinissaannut pisussaaffilernera landskarsip aningaasaliinissaanut pisariaqartitsinermik kinguneqarsinnaavoq. Assersuutigalugu Nuummi atuarfiup namminersortup illutassaanik sanaartorneq 70 mio. kr.-eqarpat, landskarsip aningaasaliissutissai 21 mio. kr.-iussapput. Peqqussutissatulli siunnersuut Ani-ngaasanut Inatsisikkut sanaartornermut taarsigassarsisitsinikkullu immikkut aningaasartuutinik kinguneqassanngilaq, aningaasartuutimmi sanaartornermi taarsigassarsinermilu aningaasaliissutit nussorneqarnerisigut aningaasalersorneqartussaapput. Malugeqquneqarportaaq Nuummi atuarfimmik namminersortumik sanaartorneq maanna atuarfeqarnikkut pioreersut annertusarnissaannik pisariaqartitsineq millisissavaa. Tamakku saniatigut allannguutissatut siunnersuut Namminersornerusunut immikkut aningaasartuutaassanngilaq, taamaallaat malittarisassanik suliarinninnernut atatillugu aningaasartuuteqarnerussallutik kiisalu akisussaaffigisami maanna aningaasanik immikkoortitsiffiunngitsumut allaffissornermut allanullu aningaasartuuteqassallutik.Kommunit eqqarsaatigalugit allannguutissatut siunnersuut aningaasatigut allaffissornikkullu kinguneqarnissaanut kommunimi tunngaviusumik atuarfimmik namminersortitamik pilersitsisoqassanersoq apeqqutaassaaq. § 18a-imi oqaasertassatut siunnersuutit, atuarfiup namminersortup illutassaanik sanaartornermi aningaasartuutissat 10%-iinik kommunip taarsigassarsisitsinissaanut pisussaaffilernera kommunip aningaasaliinissaanut pisariaqartitsinermik kinguneqarsinnaavoq. Assersuutigalugu Nuummi atuarfiup namminersortup illutassaanik sanaartorneq 70 mio. kr.-eqarpat, kommunip aningaasaliissutissai 7 mio. kr.-iussapput.
3. Aningaasatigut allaffissornikkullu inuussutissarsiornermut sunniutissat:
Inatsisissatut siunnersuut allaffissornikkut aningaasatigullu inuussutissarsiornermut sunniuteqassanngilaq.4. Avatangiisinut pinngortitamullu sunniutissat:
Inatsisissatut siunnersuut avatangiisinut pinngortitamulluunniit sunniuteqassanngilaq.5. Allaffissornikkut innuttanut sunniutissat:
Inatsit malillugu siunissami tapiissutinik innuttaasunit qinnuteqaateqartoqarsinnaanerata, tassungalu atatillugu uppernarsaasiinissamut piumasaqaammik il.il. innuttat eqquutitsiniissaasa saniatigut inatsisissatut siunnersuut allaffissornikkut sunniuteqassanngilaq.6. Naalagaaffeqatigiinnermut namminersulernissamullu tunngassutillit:
Inatsisissatut siunnersuut naalagaaffeqatigiinnermik nunattaluunniit namminersulernissaanik attuisuussanngilaq.7. Tusarniaaneq:
Siunnersuutip saqqummiunneqarnissaa sioqqullugu tusarniaassutigineqanngilaq. Siunnersuutigineqarpoq siunnersuutip aappassaaneerneqarnissaa 2006-imi upernaakkut ataatsimiinnissamut kinguartinneqassasoq. Taassuma tungaanut Naalakkersuisut qinnuigineqassapput oqartussanut kattuffinnullu il.il. attuumassuteqartunut tusarniaassasoq, tusarniaanermilu akissutaasut Inatsisartuni ataatsimiititalianut suliarinnittussanut ingerlanneqassallutik, taamaalilluni ataatsimiititaliap siunnersuummik suliarinninneranut ilanngutissallugit.Siunnersuummi aalajangersakkanut ataasiakkaanut nassuiaatit
§ 1-imutSiunnersuutigineqarpoq § 18, imm. 2 atorunnaassasoq. Tunngaviusumik atuarfiup namminersortitap illutassaanik sanaartornermut aningaasaliissutissanullu assingusunut kommunalbestyrelsi tapiissuteqarnissaanik taaarsigassarsisitsinissaanullu piginnaatitaanissaanik aalajangersagaq, allannguutissatut siunnersuutip § 18a aamma § 18b taarserneqassalluni.
Naalakkersuisut aamma kommunalbestyrelsi tunngaviusumik atuarfiup namminersortup illutassaanik sanaartornissamut taarsigassarsisitsissapput. Atuarfiup illutassaatut eqqarsaatigineqarput illuutit tamarmik, soorlu init atuartitsiviusussat, init assassorluni (pillorissarluni) sammisaqarfiit, soorlu nipilersorneq, eqaarsaarneq, iganeq assassornerlu, sananeq il.il. kiisalu init allaffissornermut atugassat. Sulisunut inissiat ilanngunneqanngillat. Tunngaviusumilli atuarfiit namminersortitat sulisunut inissianik sanaartornermut taarsigassarsisinnaapput, inissialiortiternermi aningaasaliissuteqarneq pillugu Inatsisartut peqqussutaat atuuttoq naapertorlugu.
Atuarfiup illutassaanut sanaartornermut taarsigassarsinermi 10-40-50 malillugu sanaartornermi malittarisassat assigerluinnangajappaat, soorlu inissialiortiternermi aningaasalersuineq pillugu peqqussummi naleqqussarneqarsimasut. Tunngaviusumilli atuarfiit namminersortitaasut atuarfiup sanaartornissaanut taarsigassarsinissaannut inatsisitigut pisinnaatitaapput, tamatumunnga piumasaqaatit allat eqquutsinneqarpata.
Tunngaviusumik atuarfiup namminersortitaasup nammineerluni sanaartornermi aningaasartuutit katinnerisa 10%-iat, s.ass. angajoqqaat akiliutaat, katersiniarnerit, aningaasaateqarfimmit tapiissutit nammineerluniluunniit taarsigassarsiat imm. 3-mi taaneqartutut illutaq pingaarnertut qularnaveeqqusiullugu aningaaserivimmit taarsigassarsisitsisarfimmilluunniit taarsigassarsineq atorlugu akilertussaavai, sanaartornermi aningaasartuutit 10%-iat kommunalbestyrelsip Naalakkersuisullu 30%-iat taarsigassarsiutigisassallugit. Sinneruttut 50%-it, illutat pi-ngaarnerutillugit qularnaveeqqusiunneqarnerisa qulakkeerneqarnerisigut aningaaserivimmit taarsigassarsisitsisarfimmilluunniit taarsigassarsinikkut aningaasalersorneqassallutik.
Kommmunalbestyrelsip Naalakkersuisullu taarsigassarsisitsissutigisai ukiuni 15-ini erniaalersorneqaratillu taarsersorneqassanngillat, taassumalu kingorna ukiuni 10-ni taarsersorneqassallutik. Pisortanit taarsigassarsiat taakku imm. 3 naapertorlugu siuliani taaneqartutut aningaaserivimmit taarsigassarsisitsisarfimmilluunniit taarsigassarsiatut pingaarnersiukkatut, qularnaveeqqutinilli pigisaqartuusinnaasunit allanit siulliullugit, qularnaveeqqutitigut qulakkeerneqassapput.
Sanaartornermi aningaasartuutit katinnerinut ilaapput pilersaarusiornermut aningaasartuutit, sanasunut aningaasartuutit, sanaartornermi taarsigassarsinermi erniaat, sumiiffimmi sanaartorfigissaaneq, sanaartornermi allaffissorneq kiisalu inatsisitigut uppernarsaasiornernut aningaasartuutit.
Tunngaviusumik atuarfiup namminersortitap sanaartornermi aningaasartuutit 10%-iinik nammineq akiliinissaata saniatigut piumasaqaatit allat arlallit atuupput. Tunngaviusumik atuarfik namminersortitaq nunaminertamik tunineqassaaq, sanaartukkallu sanaartornermi pilersaarusiornermilu inatsit atuuttoq malinneqassaaq, kiisalu sanaartornermi najoqqutassat atuuttut eqquutsittussaallugit. Taamattaaq sanaartornissamut pilersaarut aningaasaqarnerlu kommunalbestyrelsimit Naalakkersuisunillu nalilerneqassaaq akuerineqarlunilu. Taarsigassarsisitsisut allamik aalajanginngippata illuutinik tunisisoqarpat imaluunniit aserfallatsitsisoqarsimappat taarsigassarsiat akilerneqassapput, kiisalu tunngaviusumik atuarfiup namminersortitap kinguaattoorutinik akileeqquneqarluni kingusinnerpaamik ullut 7-it qangiunnerini akilersimanngippagit. Pisortat taarsigassarsisitsisuusut aningaasatigut qulakkeerunneqarnissaat aalajangersakkakkut tassuuna qulakkeerniarneqarneruvoq. Oqaaseqatigiit "Taarsigassarsisitsisut allamik aalajanginngippata" atorlugu tamanna timitalimmik siunertamut naapertuuttutut isigineqarpat taarsigassarsisitsisoq piumasaqaatinik missingiilluni qasukkaallatsitsisinnaatissavaa, s.ass. piumasaqaatip tiguneqarneranit akiliisitsinissamut piffissaliussap ullunit 7-nit sivisunerunissaata akuerineratigut. Inatsimmili naatsorsuutigineqartumit taarsigassarsisitsinermut piumasaqaatit sakkortunerusut atorneqarnissaannik pisortat piumasaqaateqarsinnaatitaassanngillat.
Tunngaviusumik atuarfiup namminersortitap aningaasaliissutinut allanut aningaasartuutissaanut Naalakkersuisut kommunalbestyrelsilu tapiissuteqarsinnaallutillu taarsigassarsisitsisinnaapput. Aningaasaliissutissatut aningaasartuutit tassaasinnaapput pequtisiortorneq. Taamaattorli tunngaviusumik atuarfik namminersortitaq taama tapiiffigineqarnissaminut taarsigassarsitinneqarnissaminulluunniit inatsisitigut piumasaqarsinnaanngilaq.
§ 2-mutSiunnersuut naapertorlugu inatsit ulloq 1. januar 2007 atuutilissaaq.