18. september 2006 UKA 2006/7
Tunngaviusumik atuarfiit namminersortitat angerlarsimaffimmilu atuartitaaneq il.il. pillugit Inatsisartut inatsisaata allanngortinnissaanut Inatsisartut inatsisissaattut nr. xx xx 2006-imeersutut siunnersuut
(Atuarfiit illutaannik sananermi sanaartornermut taarsigassarsinissamut periarfissaq)
pillugu
a l l a n n g u u t i s s a t u t
siunnersuut
Inatsisartut Kultureqarnermut Ilinniartitaanermullu Ataatsimiititaliaanni amerlanerussuteqartunit, Siumumeersunit, Inuit Ataqatigiinneersunit Atassummeersunillu saqqummiunneqartoq.
§ 1-imut.
1. § 1, nr. 1, atorunnaarpoq.
2. § 1, nr. 2, ima oqaasertaqassaaq:
"2. § 18-ip kingorna kapitali 5 ima oqaasertaqassaaq:
"§ 18a. Tunngaviusumik atuarfiit namminersortitat atuarfiit illutassaannik sanaartornermut aningaasartuutissaasa katinnerisa 40%-ii tikillugit tunngaviusumik atuarfiit namminersortitat Naalakkersuisut taarsigassarsitissavaat.
Imm. 2. Imm. 1 naapertorlugu taarsigassarsisitsineq taamaallaat pisinnaavoq tunngaviusumik atuarfik namminersortitaq sanaartornermut aningaasartuutit katinnerisa 10%-iinik nammineq aningaasaliissuteqarpat.
Imm. 3. Sanaartornermi aningaasartuutit sinneri tunngaviusumik atuarfiup namminersortitap nammineerluni aningaasaliissuteqarfigissavai, soorlu aningaaserivimmit imaluunniit taarsigassarsisitsisarfimmit taarsigassarsinermigut.
Imm. 4. Imm. 1 malillugu taarsigassarsiat sanaartornerup naammassinerani tunniunneqassapput. Taarsigassarsineq illuutit qularnaveeqqusiunnerisigut qulakkeerneqassaaq, imm. 3-lu malillugu tunngaviusumik atuarfiup namminersortitap taarsigassarsereerneratigut qularnaveeqqusiunneqassallutik.
Imm. 5. Imm. 1 malillugu taarigassarsiat ukiuni 15-ini erniaalersorneqaratillu taarsersorneqassanngillat, taassumalu kingorna ukiut qulit ingerlanerini taasersukkat amerliartuaartutut erniaallu ikiliartuaartutut taarsersuineqassalluni, ernialersuinermilu Nationalbankenip erniaalersuinera malinneqassaaq qaavatigut 3%-imik ilallugu.
Imm. 6. Taarsigassarsisitsisut allamik aalajangiinngippata, ima pisoqarneratigut taarsigassarsiat akileqquneqassapput
1) taarsigassarsiat erniaat taarsersukkallu akilersorneqanngippata, tunngaviusumillu atuarfiup namminersortitap kinguaattoorutini allakkatigut tunngaviusumik atuarfiup namminersortitap akileeqquneqarnerminit kingusinnerpaamik ullut 7-it qaangiunnerini akilersimanngippagit,
2) tunngaviusumik atuarfiup namminersortitap illuutit isumannaatsumik aserfallatsaaliunngippagit, paarinerluppagit taamaalillunilu taarsigassarsisitsisut qularnaveeqqusiussaat ajortinneqarsimasut paasineqarpat, imaluunniit
3) illuutit allanut tunineqarpata.
Imm. 7. Sanaartukkanut sanaartornerup nalaani sanaartorneq pilersaarusiornerlu pillugit inatsisinut atuuttunut kiisalu sanaartoriaatsimi ingerlatsinermilu najoqqutassanik eqquutsitsisunut kisimi taarsigassarsisitsisoqarsinnaavoq.
Imm. 8. Imm. 1 malillugu taarsigassarsinissamik qinnuteqannginnermi tunngaviusumik atuarfik namminersortitaq nunaminertamik sanaartorfissamik kommunalbestyrelsimit tunineqareersimassaaq.
Imm. 9. Taarsigassarsinissaq aatsaat neriorsuutigineqarsinnaavoq sanaartornissamut pilersaarut aningaasaqarnerlu Naalakkersuisunit nalilerneqarlutillu akuerineqareerpata, kiisalu tunngaviusumik atuarfiup namminersortitap sanaartornissamut aningaasartuutissat katinnerini nammineq aningaasartuutigisassani uppernarsaasioreersimappagit.
Imm. 10. Tunngaviusumik atuarfiit namminersortitat sanaartornissamut taarsigassarsiniarnissaat pillugu Naalakkersuisut malittarisassanik erseqqinnerusunik aalajangersaasinnaapput.§ 18b. Tunngaviusumik atuarfiit namminersortitat aningaasaliissutissanut allanut aningaasartuutissaannut Naalakkersuisut tapiissuteqarsinnaapput taarsigassarsisitsisinnaallutillu.".".
Nassuiaatit
§ 1, nr. 1-imutTunngaviusumik atuarfiit namminersortitat angerlarsimaffimmilu atuartitaaneq il.il. pillugit inatsimmi § 18, imm. 2-p, kommunalbestyrelsip tunngaviusumik atuarfinnut namminersortitanut atuarfiup illutaasa sanaartorneqarnerannut kiisalu assigisaannik aningaasaliissutinut aningaasartuutinut tapiissuteqarsinnaaneranik taarsigassarsisitsisinnaaneranillu piginnaatitsisup, peerneqarnissaa inatsisissatut siunnersuutaaqqaartukkut anguniarneqarpoq. Tassunga taarsiullugu kommunalbestyrelsit sanaartornermi aningaasartuutit tamakkiisut 10 %-iinik aalajangersimasumik taarsigassarsisitsinissamut pisussaaffilerneqarnissaat aalajangersakkap taassuma peerneqarnissaani siunertarineqarpoq. Taamaaliornikkut tunngaviusumik atuarfiit namminersortitat sanaartornermut taarsigassarsianik kommunimit pissarsisinnaanissaat inatsisitigut pisussaaffinngortinneqarsimassagaluarpoq.
Allannguutissatulli siunnersuutikkut § 18, imm. 2-p maanna atuuttup allanngortinneqarani attatiinnarneqarnissaa qulakkeerneqarpoq. Taamaalillunilu atuarfiit illutaannik sanaartornermut aningaasaliissutissanulluunniit aningaasartuutinut allanut qanoq annertutigisumik tapiissuteqarnissaq kommunalbestyrelsit nammineerlutik aalajangigassarissavaat.
Taama allannguuteqartitsinikkut inatsisissatut siunnersuutaaqqaartumut Naalakkersuisut kommunillu tusarniaavigineqartut akerliliinerat isiginiarneqarpoq.
§ 1, nr. 2-mut§ 18a, imm. 1-imi oqaaseqatigiit siulliit uku "Tunngaviusumik atuarfiit namminersortitat..... sanaartornermut aningaasartuutissaasa… 30%-iinik… Naalakkersuisut taarsigassarsitissavaat" uuminnga taarserneqarpoq "Tunngaviusumik atuarfiit namminersortitat… sanaartornermut aningaasartuutissaasa… 40%-ii tikillugit… Naalakkersuisut taarsigassarsitissavaat". Tamatumalu peqatigisaanik oqaaseqatigiit aappaat, tunngaviusumik atuarfiit namminersortitat atuarfimmik sanaartornermut aningaasartuutissaasa katinnerisa 10-iinik kommunalbestyrelsip taarsigassarsisitsisarnissaanut tunngasoq peerneqarpoq.
Allannguutit taakku kingunerissavaat:
Naalakkersuisut sanaartornermut taarsigassarsisitsinissamut pisussaaffilerneqannginnerat, taamaallaalli taamaaliorsinnaanermut periarfissaqarnerat, aalajangersimasumik angissusilerlugu taarsigassarsisitsisarnissamut taarsiullugu taarsigassarsisitsissutaasinnaasut annerpaaffilerneqarnerat, aamma
Naalakkersuisunit taarsigassarsiarineqarsinnaasumut 30%-iusumut kommunalbestyrelsimillu taarsigassarsiarineqarsinnaasumut 10%-iusumut taarsiullugu Naalakkersuisunit taarsigassarsiarineqarsinnaasup annerpaamik 40%-imut aalajangerneqarnera.
Meeqqat atuarfiannik sanaartornissamut aningaasaliussat tamakkiisut naapertuunnerpaamik atorneqarnissaannik nalileereernermikkut Naalakkersuisut taarsigassarsinissamik qinnuteqaatit pillugit aalajangiisassapput. Pisortat sanaartornissamik kissaataannik naliliinermi piumasaqaataasartut assingi atorlugit tunngaviusumik atuarfinnik namminersortitanik sanaartornissamut taarsigassarsinissamik qinnuteqaatit sapinngisamik naliliiffigineqartassapput. Pisortanit namminersortunillu qinnuteqaatinik naligiimmik nalilersuisarnikkut meeqqat atuarfiannut tunngatillugu aningaasartuutaasartut pisariaqartinneqartullu matussuserneqartarnissaannut sapinngisamik pitsaanerpaamik sinaakkutissatut atugassaqartitsinissaq anguniarneqarpoq.
Sanaartugassatut suliassanut aalajangersimasunut tunngaviusumik atuarfiit namminersortitat taarsigassarsisinneqartussaanerannik aalajangersagaq inatsisitigut piusussaaffiliinngilaq. Tamatumalu kinguneranik sanaartugassanut aningaasaliussanik ataatsimoortumik tulleriiaarineq innersuussutigalugu qinnuteqaatinik itigartitsisoqarsinnaavoq, tamatumani piumasaqaatit Naalakkersuisut naliliineranni ilaatinneqarsimasut itigartitsinermi paasissutissiissutigineqassallutik, tak. pisortat ingerlatsineranni suliassanik suliarinnittarneq pillugu Inatsisartut inatsisaat naapertorlugu itigartitsinermi tunngavilersuinissamik maleruagassat nalinginnaasut.
Tunngaviusumik atuarfiit namminersortitat atuarfiit illutassaannik sanaartornermut aningaasartuutissaasa katinnerisa annerpaamik 40%-ii tikillugit Naalakkersuisut taarsigassarsisitsisinnaapput. Ataatsimoortumik tulleriaarinerup mianerineqarnissaa pissutigalugu tunngaviusumik atuarfiup namminersortitap qinnuteqaatigisaanit annikinnerusumik aningaasaliisoqassappat sanaartugassatut suliassap qinnuteqaat naapertorlugu pilersaarutaasutut ingerlanneqarnissaa taarsigassarsisitsinermi piumasaqaataassaaq.
Taama allannguuteqartitsinikkut inatsisissatut siunnersuutaaqqaartumut Naalakkersuisut kommunillu tusarniaavigineqartut akerliliinerat isiginiarneqarpoq.
Inatsisissatut siunnersuummi § 18a, imm. 9 naapertorlugu ilaatigut sanaartornissamut pilersaarut aningaasaqarnerlu Naalakkersuisunit kommunalbestyrelsimillu nalilerneqarlutillu akuerineqareerpata taarsigassarsinissaq aatsaat neriorsuutigineqarsinnaassaaq. Allannguutissatut siunnersuut naapertorlugu kommunalbestyrelsip naliliillunilu akuersissuteqarnissaa piumasaqaataajunnaarpoq, kommunimmi aningaasaleeqataasarnissaannut tunngasoq peerneqarmat. Taamaaliornikkut meeqqat atuarfiannut tunngatillugu sanaartugassatut suliassanut aningaasaliisarnerup maleruagassat atuuttut malillugit Namminersornerullutik Oqartussanit taamaallaat suliassarineqarnera isiginiarneqarpoq.
Taama allannguuteqartitsinikkut inatsisissatut siunnersuutaaqqaartumut Naalakkersuisut akerliliinerat isiginiarneqarpoq.
Inatsisissatut siunnersuummi § 18b naapertorlugu tunngaviusumik atuarfiit namminersortitat aningaasaliissutissanut allanut aningaasartuutissaannut kommunalbestyrelsi tapiissuteqarsinnaallunilu taarsigassarsisitsisinnaassaaq. Aalajangersakkap taassuma § 18, imm. 2 maanna atuuttoq taarsertussaagaluarpaa. Allannguutissatulli siunnersuut aqqutigalugu kommunit § 18, imm. 2 naapertorlugu inatsisitigut maanna inissisimanerat attatiinnarneqarpoq, tak. § 1, nr. 1-imut nassuiaatit siuliani allassimasut.
Inatsisissatut siunnersuummi aalajangersakkat sinneri allannguuteqartinnagit attatiinnarneqarput. Inatsisissatut siunnersuutaaqqaartumut nassuiaatit innersuussutigineqarput.