14. september 2006

UKA 2006/43

 

Inatsisissatut siunnersuummut nassuiaatit

Nalinginnaasumik oqaaseqaatit

1. Aallaqqaasiut:
Aalisarnermut aningaasaliissutinut immikkoortitat pillugit inatsimmi matumani siunertaq tassaavoq inatsimmi aalajangersakkat malillugit sinerissamut qanittumi aalisarnermi nutaanik sanaartornernut kiisalu angallatinik atornikunik pisinermi nutarterinermilu suliniutinut naleqquttunut tapiissuteqartarnissaq. Aammattaaq Aalisarnermut aningaasaliissutinut immikkoortitat pillugit inatsisip siunertarivaa Kalaallit Nunaanni aalisarnermik inuussutissarsiuteqarnermut nutaanik pilersitsisinnaasunik pilersaarutinut nutarterisunut tapiissuteqartarnissaq.

Taamaalilluni aalisarnermut aningaasaliissutinut immikkoortitat pillugit Inatsisartut inatsisissaattut siunnersuut sinerissamut qanittumi aalisarnermut Namminersornerullutik Oqartussat siusinnerusukkut maannakkullu tapersiisarnerinut naleqqiullugu suliniut nutaajuvoq.

2. Siunnersuutip immikkoortui pingaarnerit:
Siunnersuutip ersersippaa pisuussutit piujuarnissaannut sapinngisamik pitsaanerpaamik teknologi naleqqussarneqarsimasoq atorlugu sinerissamut qanittumi aalisakkatigut pisuussutit suli sunniuteqarluartumik iluaqutiginissaannut atugassanik pilersitseqataanissamik kissaateqarneq.

Siunnersuutip inuussutissarsiutinut tapersiisarneq pillugu inatsisiniit atuuttuniit allaassutaa tassaavoq inatsit naapertorlugu tapiissuteqarnissamut tunngaviummat pilersaarut suliniummi pisiarineqartup pisiarinerani nalingata tamarmiusup minnerpaamik 80 %-ianik aningaasaliisoqarsinnaasimanera. Siunnersuut naapertorlugu 20% angullugu pisortanit tapiissutigineqarsinnaavoq. Pisisut namminneq aningaasaliissuteqarnissaannik piumasaqaateqartoqanngilaq, tassa aningaaseriviit taamaaqataalluunniit aningaasaliissutit annerpaavinik aningaasaliisussat pisisup nammineq aningaasaliissutissaata annertussusissaannik namminneq piumasaqaateqartussaammata. Naalakkersuisulli pisinerup tamarmiusup ilai pigisanut tunngasuusinnaasut nammineq aningaasaliissutit pillugit piumasaqaateqarsinnaanermut periarfissaqarusupput. Tapiissuteqarneq siunnersuut malillugu aatsaat pisinnaassaaq aningaasaliissutit sinneri 80-90%-it aningaaserivinniit pissarsiarineqarpata.

Inuussutissarsiutinut tapersiisarnermut aaqqissuussineq atuuttoq, aalisarnermut, piniarnermut nunalerinermullu tapersiisarneq pillugu Inatsisartut peqqussutaat, tunngaveqarpoq pisiarineqartup nalingata 90 %-ia tikillugu pisortanit ernialersukkanik aamma ernialersorneqanngitsunik akilersorneqartussaanngitsunillu taarsigassarsisarneq pisisullu nammineq 10 %-ia aningaasaliissutigisussaallugu.

Tit. 1

	Aalisarnermut aningaasaliissutinut immikkoortitat	Inuussutissarsiutinut tapersiisarnermik aaqqissuussineq
Nammineq aningaasaliissutit imaluunniit namminersortunit taarsigassarsiat	Minnerpaamik 80%	Minnerpaamik 10%
Pisortanit tapiissutit	20%-i tikillugu	0%
Pisortanit taarsigassarsiat ernialersorneqanngitsut	0%	30%-i tikillugu
Pisortanit taarsigassarsiat ernialersukkat	0%	60%-i tikillugu

Tamatuma saniatigut, siunnersuummi atugassat iluanni, pilersaarutinut nutarterisunut tapiisoqarsinnaavoq, aningaasaliinissamullu periarfissat imatut isikkoqarlutik:

Tit. 2

	Aalisarnermut aningaasaliissutinut immikkoortitat	Inuussutissarsiutinut tapersiisarnermik aaqqissuussineq
Nammineq aningaasaliissutit imaluunniit namminersortunit taarsigassarsiat	50%	0%
Pisortanit tapiissutit	50%-i tikillugu	0%

Soorlu qulaaniittunit takuneqarsinnaasoq pisortat aningaasatigut peqataanerat inuussutissarsiutinut tapersiisarnermut aaqqissuusinermut sanilliullugu annikinneerarsuuvoq.

Aningaasaliinernut pisortat tapiissutissaat siunnersuutip kapitali 1-ia naapertorlugu Aningaasanut inatsimmi immikkoortinneqartassapput, aningaasallu 2006-imut aamma 2007-imut ukiunut aningaasaliiffiusunut kontomi pingaarnermi 50.06.50, Aalisarnermik ineriartortitsinermut sillimmatini immikkoortinneqarsimallutik.

Naalakkersuisut siunertaraat angallatinik pisinermut tapiissutit aningaasaliissutinut tamarmiusunut killiliussat 80 %-iisa missaannik annertussuseqassasut. Sinneri 20%-it suliniutinut nutarterisunut immikkoortinneqassapput.

Aalisarnermut aningaasaliissutinut immikkoortitat pillugit Aalisarnermut, Piniarnermut Nunalerinermullu Pisortaqarfik aamma KNAPK-p aamma taamanikkut APK-jusup akornanni aallarniutaasumik oqaloqatigiittarnerni aalisarnermik inuussutissarsiortut pisortat assigalugit aaqqissuussinermut aningaasaleeqataasinnaanerat oqallisigineqarnikuuvoq. Taamaalilluni tunisinermi tunisat nalingisa siulliit 0,5%-iinik akiliisarnissaq KNAPK-p akuersaarnikuuaa. Tamatumanili killiliussassat pillugit isumaqatigiittoqarsinnaasimanngilaq, taamaattumik Inatsimmi Kapitali 1-imi periarfissiisoqarpoq kingusinnerusukkut tamanna pillugu malittarisassiortoqarsinnaasoq.

Periarfissaavoq kingusinnerusukkut inatsisiliornikkut Aalisarnermut aningaasaliissutinut immikkoortitanut inuussutissarsiortut tapeeqataasarnissaat aalajangersarneqarsinnaavoq. Taamatut tapiisarneq tunisat aallaqqaammut nalinginik aallaaveqarsinnaavoq imaluunniit pisuussutinit ernialiinissamut inuiaqatigiit aalisarnermiit kissaataannut tunngatillugu pingaarnerusutigut eqqarsaatigineqartoq tunngavigineqarsinnaalluni.

Aalisarnermik inuussutissarsiortut namminneq akiliutigisinnaasaat immikkut inatsimmi aalajangersarneqarsinnaapput, takuuk inatsisini tunngaviusuni § 43.

Inatsimmi aalajangersakkat naapertorlugit tapiisoqarsinnaaneranut nammerisamik aamma/imaluunniit allamiit aningaasaliisoqarnissaanut piumasaqaatit saniatigut pingaaruteqarpoq angallammik pisineq imaluunniit suliniutip nutarterisup piviusunngortinneqarnera aalisarnerup ineriartorteqqinnissaanut tapersiissasut.

Taamaattumik siunnersuummi pilersaarummik naammattumik allaaserinnittoqarnissaanik piumasaqaateqartoqarpoq. Tapiissutit aalisarnernut aalajangersimasuinnarnut killilerneqanngillat. Aalisarneq, siunissami qaninnermi aalisagaqassutsikkut aningaasarsiornikkullu tunngavigisanut naleqqiullugu aaqqissuussaanikkut naleqqussarnissamut annertunerpaamik pisariaqartitsisoq maannakkut tassaavoq qaleralinniarneq.

Tapiissutit utertillugit akilerneqarnissaat piumasarineqarsinnaavoq arlaatigullu pisoqartillugu utertillugit akilerneqartussaallutik. Pigisanik nalilinnik siunnersuut malillugu tapiissutit atorlugit aningaasalersorneqarsimasunik ukiunik qulinik piffissaliussap iluani tuniseqqinnermi siulliulluni tapiiffigineqartumut tapiissutit piginnittup nutaap tigusinissaa akueralugu Naalakkersuisut nalunaaruteqarsinnaapput.

Siunnersuut malillugu tapersiineq tapiissuteqarnikkut pissaaq, tapiissutilli tunniunneqarpata avataaniit aningaasaliisoqarnissaanik neriorsuummik pissarsisimanissaq aammalu pilersaarutip imminut akilersinnaanissaanik ilimagisaqarneq piumasarineqarluni. Aammattaaq pilersaarut naammassineqarsinnaasariaqarpoq, tamatumanilu ilaatigut piumasarineqarluni oqartussanit akuersissutit tassunga attuumassuteqartut piffissaliunneqarsinnaasup iluani pigereerneqarnissaat imaluunnit pissarsiarineqarnissaat naatsorsuutigineqassasoq.

Tapiissutit utertillugit akilerneqassanngillat §§ 12-13 naapertorlugit ingerlasoqarsimanngip-pat. Piumasaqaatigineqarporli pigisaq nalilik aamma/imaluunniit ingerlataq tapiiffigineqarsimasoq tapiisoqareernerata kingorna ukiut siulliit qulit ingerlaneranni Naalakkersuisunit akuersisoqaqqaartinnagu tunineqassanngitsoq.

Taamatut tunisinnginnissamut piumasaqarneq toqqarneqarpoq tapiissutit aningaasannanniutigineqarnissaat pinngitsoortinniarlugu. Naalakkersuisut naliliinerat naapertorlugu niuernermi aningaasannanniarneq siunertarineqanngitsoq piginnittup nutaap pigisat nalillit aamma/ imaluunniit suliniut nalinginnaasumik tigusinnaassavaa, tapiissutit utertinneqarnissaannik piumasaqaatitaqanngitsumik.

Pilersaarutip aningaasaqarnerata misissornissaanut aamma pilersaarummut aningaasartuutit pilersaarutillu kingunerisaanik isertitat uppernarsarnerisigut tapiissutisinissamut piumasaqaatit naammassineqarsimanersut misissornissaannut Naalakkersuisut periarfissaqarusussimapput.

Aningaasanik pissarsinissamut tunngavigisat qaangiinnarneqartillugit tapiissutit utertillugit akileqquneqarsinnaapput, siunnersuummilu § 12-imi taaneqartunik pisoqartillugu tapiissutit utertinneqartussaallutik.

Tapiissutit utertillugit akilersinneqartussanngorneri ilaatigut tassaapput eqqunngitsunik pingaarutilinnik paasissutissiisimappat, inatsit naapertorlugu piumasaqaatinik qinnuteqartoq malinnissimanngippat, imaluunniit tapiissutisisoq ingerlatseqatigiiffimmik aqutsinissamik piukkunnateqanngitsoq paasineqaraangat.

Tapiissutisisup tungaaniit ingasattumik sumiginnaasoqarsimanera pissutigalugu pilersaarummi akiliisinnaajunnaartoqartillugu tapiissutit utertillugit akilerneqarnissaat piumasarineqarsinnaapput. Tamatuma saniatigut pilersaarutip tunineqarnerani imaluunniit piginnittuni allannguisoqartillugu tapiissutit utertillugit akilerneqarnissaat piumasarineqarsinnaapput kiisalu oqartussanit akuersissutit pisariaqartut pigineqarunnaaraangata.

Tapiissutisinissamut piumasaqaatit sumiginnarneqartillugit pillaammik akiliisitsisoqarnissaanut Inatsit periarfissiivoq. Naalakkersuisunut salloqittaalluni paasissutissiineq suliniummilu uppernarsaatinik nassiussinnginneq aamma pillaammik akiliisitsinermik kinguneqarsinnaapput.

Naalakkersuisut pisinnaatinneqarput annertunerusumik malittarisassiornissamut suliniutit suut tapiiffineqarsinnaanerinik aamma nunap immikkoortui suut siuarsarniarneqassanersut. Aammattaaq Naalakkersuisut malittarisassanik aalajangersaasinnaapput inuussutissarsiutit immikkoortui suut siuarsarniarneqassanersut, aammalu qinnuteqartunut suliniutinullu ilinniagaqarnikkut, aningaasaqarnikkut teknikkikkullu suut piumasarineqarsinnaanersut.

3. Pisortanut aningaasaqarnikkut allaffissornikkullu kingunissai:
Nalilerneqarpoq Aalisarnermut, Piniarnermut Nunalerinermullu Pisortaqarfimmut aningaasaqarnikkut allaffissornikkullu kingunissai ulluinnarni aqutsinermut annikitsuinnaassasut. Malittarisassat aqukkuminartuupput uppernarsaanissamullu piumasaqaatit pilersaarummillu allaaserinninnissat sukaterneqarsimallutik taamaalilluni qinnuteqaatinik assigiinngitsunik naliliineq piviusorsiorluni ajornanngitsumik naammassineqarsinnaalluni. Naliliineq taamaalilluni tassaavoq aningaasaliissutigineqartutut killiliussat iluanni siunnersuut aqunneqarsinnaasoq. Suliniummik allaaserinninnissamik piumasaqaatit annertusisat allaffissornermut annertuumik nanertuutaanissaat ilimagineqanngilaq. Inuinnarnit avataaniittut imaluunniit aningaasaliisartut allat avataaniittut aningaasaliinerat tunngavigalugu tapiissuteqartoqartassaaq. Inuussutissarsiutigalugu aningaasanik atukkiisartut suliniutinik allaaserinninnissamik allaaserisat isikkulersornissaannik ajornartorsiuteqarnavianngillat. Taamaattumik piviusumik qinnuteqartunut suliniummik allaaserinninnissaannut allaffeqarfiup ilitsersuinissaa pisariaqassanngilaq.

4. Inuussutissarsiortunut aningaasaqarnikkut allaffissornikkullu kingunissai:
Inatsisissatut siunnersuutip kingunerissavaa inuutissarsiummut nutarterinerup ingerlanneqarnissaa ajornannginnerulissasoq taarsigassarsisarfiit namminersortut kisimik aningaasaliinissaanut sanilliullugu. Suliniutit nutarterisut suliniutillu ajutoorfiusinnaanerusut ajornannginnerusumik aningaasaliiffigineqarsinnaalissapput, naliliisoqarporlu tamatuma siunissami aalisarnikkut pilersaarutini aningaasaqarneq siuarsarlugulu pitsaanerulersissagaa.

Inatsisissatut siunnersuut tapiissutisinissamut periarfissaqartitsinerulissaaq, siusinnerusumulli naleqqiullugu tapiissutisisarnermut piumasaqaatit suliamut attuumassuteqarnerulissapput aningaasanik taarsigassarsisitsisartut avataaneersut taarsigassarsiat minnerpaamik 80 %-inik aningaasalersuisalernerisigut. Inuussutissarsiutinut tapersiisarnermik aaqqissuussinermut maannakkut atuuttumut sanilliullugu siunnersuummi sukaterisoqarpoq, siunnersuummi nalinginnaasumik namminersortuniit aningaasaliisoqarnissaanik piumasaqaateqarneq pissutigalugu.

Ilimamagineqarpoq qinnuteqartoq aningaasaliisaartut suleqatigalugit qinnuteqaammik suliaqassasoq. Taamaattumik naliliisoqarpoq inatsisissatut siunnersuutip inuussutissarsiortut annertunerungaartumik allaffissortilernavianngikkai.

5. Avatangiisitigut pinngortitamullu tunngasutigut kingunissat:
Angallatinik nutaanik taarsersuineq avatangiisinut annikitsumik sunniuteqassaaq, tassa angallatit nutaat avatangiisit pillugit malittarisassat nutaat malillugit sananeqaateqartussaammata.

6. Innuttaasunut allaffissornikkut kingunissat:
Tapersiissutinik pissarsiniarnermi sukumiisumik pilersaarutip allaaserineqarnissaa pisariaqarpoq.

Taamaattorli naliliisoqarpoq namminersortunit aningaasaateqarfinniit, taarsigassarsinermi il. il. nalinginnaasumik piumasarineqartartut sinnerlugit tamanna piumasaqaatitaqanngitsoq.

7. Naalagaaffeqatigiinnermut namminersulernissamullu tunngasut:
Siunnersuut Naalagaaffeqatigiinnermut namminersornermullu kinguneqartussaanngilaq.

8. Oqartussanik kattuffinnillu tusarniaaneq:
Aalisarnermut Aningaasaliissutinut Immikkoortitat pillugit Inatsisartut inatsisissaattut siunnersuut ukununnga tusarniaassutigineqarpoq: Kalaallit Nunaanni Aalisartut Piniartullu Kattuffiat (KNAPK), Kalaallit Nunaanni Kommuneqarfiit Kattuffiat (KANUKOKA), Kalaallit Nunaanni Sulisitsisut Peqatigiiffiat (GA), Nunaqavissut Sulisitsisut Kattuffiat (NUSUKA), Sulinermik Inuussutissarsiuteqartut Kattuffiat (SIK), Sparbank Vest A/S, GrønlandsBANKEN A/S, Aningaasaqarnermut Pisortaqarfik, Inuussutissarsiornermut Pisortaqarfik, Akileraartarnermut Pisortaqarfik aamma Avatangiisinut Pinngortitamullu Pisortaqarfik.

Tusarniaanermi akissutit tamanit tiguneqarput, kisiannili uuminnga tigusisoqanngilaq: Nunaqavissut Sulisitsisut Kattuffiat (NUSUKA). Tusarniaanermi akissutinut pisortaqarfiup oqaaseqaatai uingasunngorlugit allaqqapput.

Isornartorsiutit siunnersuutillu pingaarnerit ataani ilanngunneqarput. Itinerusumik apeqqutit aamma inatsisissamut siunnersuutip qanoq paasineqarnissaanik apeqqutit ilanngunneqanngillat.

KNAPK-p kissaatiginngilaa suliniutinut nutaaliortunut aalisakkanik tukertitsiviit ilanngunneqassassasut, tassa silaannaq nillerpallaartutut nalilerneqarmat: Nunani allani Kalaallit Nunaattut allorniusaniittuni aningaasat isertitarineqartartorpassuit tunngavigalugit siunnersuut taanna malinneqanngilaq. Inuussutissarsiortut ajutooriaannaallutik aningaasaliissuteqarusuppata, aalisakkanik tukertitsiviliornissamik periarfissat Naalakkersuisut ammatikkusuppaat. Suliniutinut qinnuteqaatini taammaattuni silap pissusai suliniutinilu piviusunngortinneqarsinnaasut nalilersuinerni soorunami ilaatinneqassapput.

Nammineq aningaasaliissutissaq 10%-iusoq KNAPK-p qaffasippallaartutut isigaa 5%-ilu siunnersuutigalugu. Inatsisissamut siunnersuutip allanngortiternerani nammineq aningaasaliinissaq piumasaqaataajunnaarpoq. Aningaaseriviit taamaaqataalluunniit nammineq aningaasaliissutissat annertussusissaat aalajangissavaat.

KNAPK isumaqarpoq tuniseqqinnermi piumasaqaat ukiuni qulini atuuttussaq ukiunut arfineq pingasunut allanngortinneqassasoq, Naalakkersuisut akuersissuteqarnissaat pisariaqassanani. Isumagineqavippoq, Naalakkersuisut akuersissuteqassasut aaqqissuussinerup aningaasannanniutigineqarnissaa pinngitsoorniarlugu. Tamanna taamaallaat pisinnaavoq tunisinerup piviusunngortinnginnerani Naalakkersuisut akuersissuteqarpata. Taamaammat aalajangersagaq allanngortinneqanngilaq.

KANUKOKA-mit tusarniaanermi akissut allanngortitsinermik kinguneqanngilaq.

GA-p isornartorsiorpaa inuussutissarsiortut tapiissutaat pillugit GA-p aamma Pisortaqarfiup isumaqatigiissutaat imminnut ataqagiinnginnerat. Siunnersuummi § 1 maannakkut siunertanut paragraffiuvoq aalisarnermiillu inuussutissarsiortut akileeqataasinnaanerat kingusinnerusukkut aalajangersaaffigineqarsinnaanerat pillugu allaaserisaq nassuiaatinut nuunneqarluni. Tamatumunnga pissutaavoq taamatut periarfissaqarnermut aalajangersagaq ersersitsiniaannartussaammat. Aamma tamanna nassuiaatini pitsaanerusumik sammineqarsinnaammat.

SIK isumaqarpoq siunnersuummi § 11 malillugu uppernarsaasoqarnissaanik piumasaqarnissamut periarfissat erseqqarluppallaartut. Piumasaqaataasariaqarpoq uppernarsaatip taaneqartup nassiunneqarnissaa. Sunut tamanut uppernarsaateqarnissaq allaffissornermut nanertuutaasussaassaqaaq, aamma "tamanut atuuttumik nalunaaruteqarnermi immersugassaq" suliarineqaraluarpalluunniit. Aammattaaq immikkut ittunik pisimasoqartinnagu tapiissutit pineqartut utertillugit akilerneqartussaanngillat. Taamaammat aatsaat Naalakkersuisut pisariaqartitsippata uppernarsaanissamik piumasaqarsinnaaneq periarfissaassaaq.

Sparbank Vest A/S-p tusarniaanermi akissutaa allanngortitsinermik kinguneqanngilaq.

GrønlandsBANKEN A/S-ip annertunerusumik nammineq aningaasaliissuteqarnissaa kissaatigigaluarpaa. Aalajangersakkami § 5 imaalillugu allanngortinneqarpoq aningaasaliinermi namminersortuni taarsigassarsiat namminerluunniit aningaasaliissutit minnerpaamik 80 %-iunerannik Naalakkersuisut maannakkut takusaqartassasut. Aningaaseriviit allallu avataaniit aningaasaliisuusut taamaalillutik qinnuteqartunut namminneq piumasaqataatitik aalajangersorsinnaalerpaat.

Aningaasaqarnermut Pisortaqarfiup suliniutinut qinnuteqaatit isikkulersorneqarnerat eqqarsaatigalugu allaffissornermi aningaasatigut kingunissai oqaasiinnartigut apeqqutigai. Oqaaseqaatini nassuiarneqarpoq suliniutinut qinnuteqaateqarnermi isikkulersuineq immaqa qinnuteqartup taarsigassarsivia suleqatigalugu pissasoq, taamaammallu suliniummut qinnuteqaatip isikkulersornera pillugu qinnuteqartup ilitsersornissaanut sulisunik annertuumik pisaqariaqartitsisoqarnissaa ilimagineqanngilaq.

Inuussutissarsiornermut Pisortaqarfik aperivoq tamakkiisumik ilaannakortumilluunniit taarsigassarsinermut taarsiullugu suliniutinut nutaaliortunut nammineq aningaasaliisinnaaneq sooq periarfissaanngitsoq, siunnersuutigalugulu "Nammineq aningaasaliissutit" aamma "Namminersortunit taarsigassarsiat" ataatsimoortinneqassasut.

Inatsisissatut siunnersuummi § 8 allanngortinneqarpoq, taamaalilluni massakkut allaqqalerluni avataanit pilersaarutigineqartumi aningaasartuutit qanoq annertutigisut tapiiffigineqarnersut. Pilersaarummi aningaasartuutit sinnerisa aningaasalersornissaannut aningaasat taarsigassarsinikkut aamma/imaluunniit nammineq aningaasaliinikkut qinnuteqartumit akilerneqassapput. Taamaalilluni aningaaseriviit imaluunniit taarsigassarsisitsisup taarsigassarsisumut piumasaqaataat nammineq aningaasaliissutit annertussusissaannut aalajangiisuulerput. Taamaalilluni erseqqissarneqarpoq tapiiffigineqarnissamut pingaarnertut piumasaqaataasoq taarsigassarsisoq namminersortunik taarsigassarsisitsisartut imaluunniit nammineq aningaasaliissutit aqqutigalugit 50 %-imik aningaasaliisussarsiorsinnaasoq.

Inuussutissarsiornermut Pisortaqafiup kissaatigaa nukissiuutini sipaarutit inatsimmi ilanngunneqassasut. Kisiannili nukissiuutini sipaarutit pisariillisaanermut ilaapput, taamaammallu oqaasertalersuineq allanngortinneqarani.

Siunnersuummi § 6, imm. 2 pisariaqartuunnginnerarlugu Inuussutissarsiornermut Pisortaqarfiup isornartorsiorpaa. Aalajangersagaq maannakkut peerneqarpoq.

Inuussutissarsiornermut Pisortaqarfiup oqaatigaa allanut, taassuma ataani assigiinngitsunik aalisarsinnaanermut, tapiissuteqarsinnaaneq periarfissaasariaqarluartoq. Aalajangersagaq allanngortinneqarpoq imaalillugu raajat "aalisakkallu allat raajaanngitsut" siunnersuummi ilaalerlutik. Assigiinngitsunik aalisarneq siunnersuut malillugu periarfissaasinnaavoq, kisiannili erseqqissumik taaneqarani.

Akileraartarnermut Pisortaqarfik isumaqarpoq § 1, imm. 3 Tunngaviusumik Inatsisini § 43-mut tunngatillugu ajornartorsiutaasoq. Siunnersuummi § 1 maannakkut siunertanut paragraffiuvoq aalisarnermiillu inuussutissarsiortut akileeqataasinnaanerat kingusinnerusukkut aalajangersaaffigineqarsinnaanerat pillugu allaaserisaq nassuiaatinut nuunneqarluni. Tamatumunnga pissutaavoq taamatut periarfissaqarnermut aalajangersagaq ersersitsiniaannartussaammat. Aamma tamanna nassuiaatini pitsaanerusumik sammineqarsinnaammat.

Avatangiisinut Pinngortitamullu Pisortaqarfimmiit tusarniaanermi akissut allanngortitsinermik kinguneqanngilaq.

 

 

Inatsisissatut siunnersuummi aalajangersakkanut ataasiakkaanut oqaaseqaatit

§ 1-imut.

Imm. 1-mut
Imm. 1-mi siunertaq pillugu aalajangersakkami tunngavigineqarpoq siunissami aalisarnissamut apeqqutaammat aalisarneq piujuartitsinissaq tunngavigalugu siunissamullu isigisumik ingerlanneqarnersoq. Taamaalilluni aalisarsinnaassuseq pisuussutinik uumassuseqarnikkut piujuartitsineq tunngavigalugu iluaquteqarsinnaanermut naleqqussarneqarsimassaaq. Inatsisip siunertaani siunissamut isigisumik paasineqassaaq pisuussutinik uumassuseqarnikkut piujuartitsineq tunngavigalugu iluaquteqarsinnaaneq, kisianni aamma aalisarnerup aaqqissuussaanerata aalisarnermi peqataasussat nutaat periarfissaqassasut. Aalajangersakkami aalisarnerup inuiaqatigiit aningaasarsiornerinut sapinngisamik pitsaanerpaamik kinguneqartitsinissaata pingaaruteqarnera erseqqissassavaa, tamannalu naammassisaqarsinnaassusikkut unammillersinnaassutsillu pitsaanerulersinneratigut siuarsarneqarsinnaasoq.

Imm. 2-mut
Aalisarnermut Aningaasaliissutinut Immikkoortitat Inatsisartut Aningaasanut Inatsisaanni immikkoortinneqartassapput. Aningaasat 2006-imi kontomi 50.06.50-imi "Aalisarnermik ineriartortitsinermut sillimmatini" immikkoortinneqarnikuupput.

Aalisarnermut Aningaasaliissutinut Immikkoortitat missingersuisarnermi naatsorsuusiortarnermilu teknikkikkut aaqqissuussineruvoq nunap karsianut ilaasoq. Immikkoortitanut Aningaasanut Inatsimmi aningaasaliissutit, aammalu aningaasaliissutaasinnaasut Inatsisartut Aningaasaqarnermut Ataatsimiititaliaata akuerisai isertitatut nalunaarsorneqassapput. Aalisarnermut Aningaasaliissutinut Immikkoortitat pillugit inatsisartut inatsisissaattut siunnersuut malillugu tapiissutit Aalisarnermut Aningaasaliissutinut Immikkoortitani aningaasartuutitut nalunaarsorneqassapput. Akiliinermi nikingassutaasinnaasut Aalisarnermut Aningaasaliissutinut Immikkoortitani naligiissarneqartassapput. Aalisarnermut Aningaasaliissutinut Immikkoortitat Namminersornerullutik Oqartussani missingersersuisarneq pillugu inatsisartut inatsisaat aamma missingersersuisarnermi malittarisassiaq malillugit atorneqartassapput.

Aalisariutinik taarsersuineq nutarsaanerlu ilimagineqarpoq piffissap ingerlanerani assigiin-ngiiaartumik aningaasanik atuiffiussasoq, tassa sanaartornermut pilersaarutit suliarineqartussaammata, angallatinik inniminniisoqartartussaalluni il.il. Taamaammat pingaarnerunikuun-ngilaq ukiumut aalajangersimasumik akiliisoqartarnissaa, kisiannili aningaasat suliniutit naleqquttut tiguneqarnerat malillugu aningaasat akilerneqartassapput. Aningaasat atorneqanngitsut Aalisarnermut Aningaasaliissutinut Immikkoortitaniiginnartassapput.

§ 2-mut.

Imm. 1-mut
Kalaallit Nunaanni aalisariutinik naleqqussaanissamik kissaateqarnermut tunngaviuvoq sinerissamut qanittumi aalisarneq allanngorartumik imminut akilersinnaassuseqarneranik nassuerutiginninneq. Aaqqissuussaanermi taamatut naleqqussaaneq amerlanertigut annaasaqarnermut atassuteqartarpoq.

Namminerisamik pisariaqartutigut aningaasaliinerup ingerlannissaa ajornakusoorpoq. Aningaasarsiornikkut aalisagaqassutsikkullu imminut napatissinnaasumik aalisarnerup siuarsarnissaa kissaatigineqarpoq, taamaalilluni qaqugukkulluunniit atuuttumik piujuartitsinermik tun-ngavigisani atugassaritinneqartut iluanni aalisarneq imminut akilersinnaasoq ingerlanneqarsinnaaniassammat.

Inatsisartut inatsisaasa siunertaraa ukununnga tapiissuteqarnissaq:

1) Piffissami sivisuumi aalisarnermik inuussutissarsiornerup ingerlaannarnissaata qulakkeernissaa.
2) Aalisarnermik inuussutissarsiortut naammassisaqarsinnaassusiisa pitsanngortinneqarnissaa.
3) Aalisarnermik inuussutissarsiortut unammillersinnaasusiisa pitsanngorsarneqarnissaa.
4) Aalisarnermi periarfissanut sanilliullugu aalisarsinnaassuseqarnerup ingerlaavartumik naleqqussarnissaanut peqataanissaq.
5) Aalisarnermik ingerlataqalersut nutaat aalisarnermi peqataalersinnaanerisa ajornannginnerulersinnissaa.

Ilimagineqarpoq aaqqissuussaanermik nalimmassaaneq ukiuni arlalinni annertusiartortillugu ingerlanneqassasoq, angallatit naammassisaqarsinnaanngitsut imminnullu akilersinnaangitsut angallatinik nutaanik nutaalianillu taarserneqarnissaat taamaalilluni kissaatigineqarluni.

Imm. 2-mut
Inatsimmi siunertat malillugit angallatinut atornikunut nutaanullu sapinngisamik ukiuni amerlanerpaani imminut akilersinnaasumik angusaqarluarlutillu aalisarsinnaasunut tapiissuteqartoqartassaaq. Piffissaritinneqartutut missingersuutit ukiut quliusut § 10-imi takuneqarsinnaapput.

Piumasaqaataavoq angallatit inuussutissarsiutigineqarsinnaasutut akuerineqarsimanissaat imaluunniit Veritas-imiit akuerineqarsimasuunissaat. Angallatit atornikut nunani allani pisiarineqarsinnaapput, assersuutigalugu Qallunaat Nunaanni, Islandimi Norgemiluunniit.

Imm. 3-mut
Aalajangersakkami nassiuarneqarpoq aalisariutinik nutarterinermi suut ilaatinneqarnersut. Taamaalilluni aalisariummut namminermut kiisalu teknikkikkut atortunut, sillimaniarnermi atortunut, teknikkikkut atortunut allanut, aalisarnermi atortunut atortunullu assigisaannut tapiissuteqartoqarsinnaavoq. Aammattaaq suliuniutip piviusunngortinnissaanut teknikkikkut aningaasaqarnermilu siunnersorneqarnernut pisariaqartunut tapiisoqarsinnaavoq.

§ 3-mut.

Suliniutinut nutarterisunut ilaannakortumik aningaasaliinissamut kissaateqarnermi tunngaviuvoq aalisarnernut niuernermi soqutiginartunut aalisarnermik inuussutissarsiornermi siuarsaasunut piumassuseqalersitsinissaq. Taamaalilluni suliniutit nutarterisut Kalaallit Nunaanni aalisarnermi ineriartornissamut periarfissanik misissuinernut tapersiissapput.

Piareersaatitut sammisat nutaaliornerit tapiiffigineqarsinnaasut pillugit taaguineq tamakkiisuunngilaq.

Nr. 1-imut
Aalajangersakkami pineqarput aalisakkat nutaat, sumiiffiit nutaat aamma aalisariaatsit nutaat. Aalisarnerup maannakkut ingerlanneqartup allanngortinnissaanut aningaasanik isertitsivissatut nutaanik periarfissarsiornissaq aamma ilaavoq.

Nr. 2-mut
Aalajangersakkap siunertaraa aalisarnermi atortunik ineriartortitsinissaq, taamaalilluni taakku assersuutigalugu avatangiisinut qajassuussinerulersinneqarlutik imaluunniit aalisarnermi naammassisaqalersitsinerullutik. Aalisariaatsinik misileraaneq ilinniartitsinerlu aamma ilaatinneqarput.

Nr. 3-mut
§ 3, nr. 2-mi aalajangersakkamut tunngatillugu aalajangersakkami tassani taamaallaat siunertaavoq aalisarnermi atortunik aalisariaatsinillu piujuaannartitsisinnaasunik ineriartortitsineq misileraanerlu.

Nr. 4-mut
Aalajangersakkami pineqarpoq aalisakkat imaluunniit aalisakkat ilaat maannamut niuernermi atorneqarnikuunngitsut tunngavigalugit tunisassianik ineriartortitsinernut tapiissutit.

Nr. 5-imut
Aalajangersakkami pineqarput tukertitsivinnut tunngatillugu misissuinerit ineriartortitsinerillu. Siunertaq tassaavoq aalisarnissamut periarfissanik nutaanik qulaajaanissamut pisariaqartunik misissuinerni aningaalersueqataaneq. Ingerlatsinermi tapiissutinik imaluunniit annertuunik sanaartornermi aningaasartuutinut matussutissanik qinnuteqartoqarsinnaanngilaq.

§ 4-mut.

Pilersaarusiap suliarineqarnissaa saqqummiunneqarnissaalu marloqiusamik isumaqarpoq.

Taamaalilluni, aningaasanik tunniussisoqarnerani, qinnuteqartut akornanni assersuussisoqarsinnaalissaaq, taamaaliornerullu qulakkiissavaa, pilersaarutit assigiimmik nalilerneqarnissaat.

Aammattaaq immikkoortut taaneqartut qinnuteqarnissaq sioqqullugu qinnuteqartunit isumannaareerneqarsimanissaat kissaatigineqarpoq. Qinnuteqaatit inuussutissarsiutinut tapersiisarnermik aaqqissuussinerup ataaniittut ilisarnaatigisimavaat annikitsuinnarmik immikkoortiterluarlugit suliarineqartarsimaneri aamma qinnuteqartut pilersaarutiminnik ingerlatitseqqin-nginnerminni Pisortaqarfimmiit neriorsuuteqartoqarnissaa kissaatigisarmassuk. Aalajangersakkami siunertarineqarpoq qinnuteqaatit suliarilluagaasimanissaat. Aammattaaq ilinniarsimasunik aamma/imaluunniit misilittagalinnik pilersaarutini qinnutigineqartuni pikkorissunik aqutsisussanik toqqaasoqartarnissaanik kaammattuinissaq kissaatigineqarpoq.

Nr. 1-imut
Qinnuteqaammi allassimassaaq sumut tapiissuteqarnissaa qinnuteqaatigineqarnersoq, taassuma ataani aalisarnerup suunera, qinnuteqaammut tunngavilersuut, suliniummi angusassatut suna kissaatigineqarnersoq aammalu suliniummi ingerlatsinermi suna isumassarsiaanersoq.

Nr. 2-mut
Aalajangersakkami kissaatigineqarpoq nassuiarneqassasoq suliniummi aningaasaqarnikkut tunngavigisat suut aallaavigineqarnersut. Tapiissutissatut qinnuteqaatigineqartut aalajangersimaqqinnaartumut immikkoortinneqarsinnaanngippata suliniummi missingersuummut takussutissaliortoqarnissaa kissaatigineqarpoq, missingersuut, tapiissutissatut qinnuteqaatigineqartut qanoq sumullu atorneqarnissaat kissaatigineqarnersoq piffissarlu qanoq sivisutigisup iluani atorneqassanersut.

Nr. 3-mut
Peqataasut pineqarput taakkuupput kikkulluunniit sulinermikkut, ilisimasamikkut, aningaasatigut il.il. suliniummut tapersiisut. Kikkut tamarmik suliniummi piginneqataasut, siulliullutik pisisinnaasut imaluunniit pisisinnaatitaasut (pisinissamut salliutinneqarneq) qinnuteqaammi allassimassapput. Uppernarsaataasinnaavoq aktiat pillugit allattuiffik, malittarisassat isumaqatigiissutillu suliniummi piginneqataassuteqarnermik killiliisut.

Nr. 4-mut
Ingerlatsisut imaluunniit inuit pingaarnerit qinnuteqaammi allassimassapput, taakkulu pisinnaasaannik misilittagaannillu aallaaserinninneq ilanngunneqassalluni.

Nr. 5-imut
Suliniutip qaqugukkut piviusunngortinnissaanut piffissaliussamut pilersaarusiortoqassaaq. Piffissaliussamut pilersaarut pissutsinik pingaaruteqartunik tamanik imaqassaaq, soorlu ani-ngaasaliinissaq qaqugu naammassineqassanersoq, isumaqatigiissutit pingaarnerit qaqugu isumaqatigiissuteqassanersut piviusunngortinneqarlutillu, aalisarnerup qaqugu aallartinneqarnissaa ilimagineqarnersoq il.il. Aammattaaq allassimassaaq tunisassiat siulliit qaqugu tunineqarnissaat ilimagineqarnersoq.

Nr. 6-imut
Qinnuteqaammi allassimassaaq atortut, tunisassiornermi atortut, angallatit teknologimilu atortut allat eqqarsaatigalugit suliniut qaqugu piviusunngortinneqassanersoq.

Nr. 7-imut
Qinnuteqaammi isummerfigineqassaaq suliniummi tunisassiarineqartussanik kina pisiortussanersoq siaruarteralunilu. Tunitsivik pineqarpat suliffeqarfiup aqqa ersissaaq. Tunisassiat pisisartunut amerlanerusunut tuniniarneqarpat pisisartut allaaserineqassapput.

§ 5-imut.

Nr. 1-imut
Suliniutit, akuersissutinik pisariaqartunik, pisassiissutinik, aalisarsinnaanermut akuersissutinik aamma pisortat aalajangiinissaannut pisariaqartunik allanik tunniunneqarnissaannik qulakkeerinnissimasut, tapiiffigineqarsinnaapput. Tassa imaappoq akuersissutit tunniunneqarsimasut imaluunniit neriorsuutigineqarsimappat nangaassuteqarani akuersissutit tunniunneqarsinnaasut.

Nr. 2-mut
Aalajangersagaq malillugu nammineq aningaasaliinissamik piumasaqartoqanngilaq. Aningaasaatit qinnuteqartumit pissarsiarineqartussat taamaalillutik tassaassapput taarsigassarsiat, nammineq aningaasaliissutit imaluunniit taakku akuleriissillugit. Taamaattorli Naalakkersuisut § 9 naapertorlugu tapiissuteqarnissamut piumasarisinnaavaat nammineq aningaasaliissutit uppernarsarneqarsimanissaat.

Ilimagisariaqarpoq aningaasaatit ilai annertuut taarsigassarsinikkut pissarsiarineqartarnissaat. Piviusumik taamaalilluni tapiissutisinissamut tunngavigineqarpoq pilersaarut taarsigassarsiniartarfinnit atasinnaasut nalilerneqarsimanera. Taarsigassarsisitsisup taarsigassarsinissamut aalajangernerani piumasaqaatinut nammineq aningaasaliissutit pillugit piumasaqaatit ilaatinneqarsinnaapput.

Nr. 3-mut
Qinnuteqaammut ilanngunneqassapput suliffeqarfimmik piginnittuunermut uppernarsaat. Kikkut tamarmik suliniummi piginneqataasut, siulliullutik pisisinnaasut imaluunniit pisisinnaatitaasut (pisinissamut salliutinneqarneq) qinnuteqaammi allassimassapput. Uppernarsaataasinnaavoq aktiat pillugit allattuiffik, malittarisassat isumaqatigiissutillu suliniummi piginneqataassuteqarnermik killiliisut.

Uppernarsaatissanik ilanngunneqartussanik taakkartuineq tamakkiisuunngilaq. Naalakkersuisut piumasarisinnaavaat qinnuteqaammut annertunerusunik uppernarsaasoqarnissaa piumasarineqarsinnaasoq. Assersuutigalugu missingersuutit suliamilu pisinnaasat uppernarsarneqarnissaat Naalakkersuisut piumasarisinnaavaat. Aammattaaq piumasarineqarsinnaavoq misissorneqassasoq suliniutip pineqartup nunani allani misilittagaqarfigineqarnersoq/misissuiffigineqarsimanersoq, taannalu qinnuteqaammut ilanngunneqassaaq.

Nr. 4-mut
Aalajangersagaq malillugu qinnuteqartup ilisimatitsissutigissavaa, pineqartup siusinnerusukkut Namminersornerullutik Oqartussanit inuussutissarsiornermut tunngasunik taarsigassarsisisimanerluni. Aalajangersagaq taanna § 6 nr. 3-mut tunngatillugu isigineqassaaq.

Uppernarsaatissanik ilanngunneqartussanik taakkartuineq tamakkiisuunngilaq. Naalakkersuisut annertunerusunik uppernarsaasoqarnissaa piumasarineqarsinnaavaat. Assersuutigalugu missingersuutit suliamilu pisinnaasat uppernarsarneqarnissaat Naalakkersuisut piumasarisinnaavaat. Aammattaaq piumasarineqarsinnaavoq misissorneqassasoq suliniutip pineqartup nunani allani misilittagaqartoqarnersoq/misissuisoqarsimanersoq, taannalu qinnuteqaammut ilanngunneqassaaq.

§ 6-imut.

Inatsit manna malillugu qinnuteqartut tapiissutisinissaminnut inatsisitigut piumasaqaateqarsinnaanngillat. Aalajangersakkami pissutsit qinnuteqaatit nalilersornerini pingaartinneqartut taagorneqarput.

Imm. 1-imut
§ 6, imm. 1-imi erseqqissarneqarpoq imminut akilersinnaassuseq aammalu aningaasatigut piumasaqaatit § 2 malillugu suliniutinut tunniussinissamut pingaaruteqarluinnartut.

Imm. 2-mut
§ 6, imm. 2-mi pineqarpoq § 3 malillugu suliniutini periarfissat suliniut tunngavigalugu suliffeqarfimmik pilersitsivissinnaanerannik naliliineq.

Imm. 1 aamma 2-mut
Aalajangersakkanut marluusunut atuuppoq tamakkiisumik isiginnilluni nalilersuinermi kissaatigineqartoq suliniutini tamakkiisumik allaaserineqarsinnaanngitsunut aningaasaliisinnaanermut periarfissap ammaanneqarnissaa, assersuutigalugu katitigaanerata paasiuminaatsuunera pissutigalugu, imaluunniit naliliisoqartillugu suliniutip piviusunngortinnissaa imatut pingaaruteqartigisoq piumasaqaatinit nalinginnaasunit sakkukinnerusumik piumasaqaateqartoqarsinnaalluni.

Erseqqissarneqassaaq suliniutip aningaasaqarnikkut patajaatsuuneranut uppernarsaat pingaarnerpaaq, §§ 4 aamma 5 naapertorlugit avataani aningaasaliisartunit pissarsisinnaanermut uppernarsaat atorlugu tunniunneqartutut isigineqarmat.

Imm. 3-mut
Aalajangersakkami siunertaavoq imm. 1 aamma 2-mi ataatsimut naliliinerit apeqqutaatinnagit qinnuteqartup siusinnerusukkut tapiissutisisimatillugu qinnuteqartunik itigartitsinissamut Naalakkersuisut periarfissinneqarnissaat. Tamatuma qulakkiissavaa tapiissutinik agguaanerup siammarneqarnissaa.

Naalakkersuisut aamma qinnuteqartoq siusinnerusukkut tapiissutisisimasoq, tapiissutisinissamullu piumasaqaatinik sumiginnaasimasoq itigartissinnaavaat. Taamatut periarfissiinermut siunertaavoq qinnuteqartut siunnersuutip atulersinnissaa sioqullugu pisortaniit inuussutissarsiutinut taarsigassarsianik sumiginnaasimasunik Naalakkersuisut qinnuteqartunik itigartitsisinnaanerat. Aammattaaq qinnuteqartup siusinnerusukkut pisortaniit taarsigassarsiaqarsimaneranik Naalakkersuisut takunnissinnaanermik periarfissaqarusupput. Siunnersuummi § 5, nr. 4 naapertorlugu pisortanit inuussutissarsiutinut taarsigassarsisimanermut uppernarsaat qinnuteqartumit ilanngunneqartussaavoq. Aalajangersagaq tamakkiisuunngilaq.

§ 7-imut.

Imm. 1-imut aamma 2-mut nalinginnaasumik tunngasoq

Nr. 1-imi aamma 2-mi immikkoortunut taaneqartunut tapiissuteqartoqarsinnaavoq. Aammattaaq qinnuteqartunut sinerissap qanittuani aalisarnermi, taassuma ataani assigiinngitsunik aalisarnermi, aalisariummik anginerusumik sisammik sanaajusumik pisinissamik kissaateqartunut salliutillugu tapiisoqarsinnaavoq.

Nr. 1-imut
Raajarniarnermi tapiissutit annertussussaasa minnerunerinut pissutaasoq tassaavoq ilimagineqarmat pisassiissutit niuerutigineqarsinnaaneri, taamaalillunilu pisassiissutit qularnaveeqqutigineqarsinnaaneri tunngavigalugit raajarniutinut avataaniit aningaasaliisoqarsinnaaneranut ajornannginnerunera.

Nr. 2-mut
Aalisarnermut Aningaasaliissutinut Immikkoortitani siunertaavoq kalaallit aalisarnerisa nutarterneqarnissaannut aaqqissuussaanermilu pisariillisarneqarnissaanut peqataanissaq. Aalaja-ngersagaq aalisakkanut allanut raajaanngitsunut atuuppoq. Aalajangersagaq maannakkut qaleralinniarnermut tunngasuussaaq, peqassutsikkut aningaasaqarnikkullu piumasaqaatit tunngavigalugit piffissami sivikitsumi aaqqissuussaanermi nalimmassaanissamik pisariaqartitsinerpaasoq.

Taamaallaat 20 %-i angullugu tapiissuteqarnissamut tunuliaqutaasoq tassaavoq raajanut akerliusumik qaleralinniarnermi aningaasarsiornerup piffissamut killilimmut pisassiissutinik tuniniarneqarsinnaanngitsunik tunngaveqarnera. Maannakkut piffissaq ukioq ataasiuvoq pisassiissutillu qularnaveeqqutitut atorneqarsinnaanatik, taakkumi allanut tunniunneqarsinnaanngimmata. Taamaattorli akuersissuteqarnissamut piumasaqaatit naammassineqarsimatillugit aalajangersimasumik atugaasimavoq pisassiissutit tunniunneqareersimasut tunniuteqqinneqartarneri.

Saarullinniarsinnaanermik ilimagisaqarneq piviusunngorpat saarullinniarneq salliutinneqarsinnaavoq.

Imm. 2 nr 1.-imiit nr. 4-mut
Angallatip angissusaanik pisinnaasaanillu pisariaqartitsineq suliniummiit suliniummut allan-ngorassaaq, taamaammallu inatsimmi annertunerusumik erseqqissarneqarsinnaanani. Imm. 2-mi nassiuarneqarpoq aningaasartuutit suut angallammut aningaasaliinermi pisinermi aningaasartuutitut isigineqarnersut. Angallatip pisiarinerani nalinganut ilaapput angallammik naammattumik pisinnaasaqartumik pisinermi aalisarnermilu atortunut pisariaqartunut aningaasartuutit. Teknikkikkut atortut allat sillimaniarnermilu atortut naammattut nalilerneqartut pisinermi nalinganut ilaapput.

Nr. 5-imut
Teknikkikkut aningaasaqarnikkullu siunnersorneqarnermi pisariaqartumi pineqarpoq aningaasartuutit suut suliniutip pineqartup piviusunngortinneqarnerani pisariaqartinneqartut. Teknikkikkut siunnersorneqarneq pisariaqartoq tassaasinnaavoq angallatip ilusilersornera aalisarnermilu atortut. Pisinermi nalinganut aningaasaqarnikkut siunnersorneqarnermut taamaallaat ilaapput pilersaarusiornermut pineqartumut tulluartumik ilaasut.

Imm. 3-mut
Inuussutissarsiortunik siuarsaanermi tapersiisarneq pillugu peqqussut maannakkut atuuttoq malillugu Qaanaap, Ittoqqortoormiit Ammassallillu kommuuniinut immikkut iluaqutaasunik malittarisassaqarpoq. Nalunaarusiornikkut tapiissutit annertussusaannik piumasaqaatinillu malittarisassanik annertunerusumik aalajangersaanissaq aalajangersakkami periarfissinneqarpoq. Taassuma saniatigut Qaanaap, Ittoqqortoormiit Ammassallillu kommuuniinut atuuttunik angallatit angissusissaat pissutsillu allat pillugit malittarisassanik aalajangersaasoqarsinnaavoq.

§ 8-mut.

Imm. 1-imut
Pilersaarutit nutaamik pilersitsisut pilersaarutinit allanit annerusumik misissuinissamik siunnersuinissamillu pisariqartitsisuupput. Ajutoortoqariataarsinnaanera annertuneruvoq, taamaattumillu pinngitsoorani nammineq aningaasaliinissamik piumasaqaatitaqanngitsumik, § 9 naapertorlugu, nammineq aningaasaliinertaqanngitsumik 50 %-i angullugu tapiisoqarsinnaanera periarfissaalluni.

Nr. 1-imut
Pilersaarusiornermi aningaasartuutini pineqarput biologinit teknikkikkullu aallarniutaasumik misissuinerit.

Nr. 2-mut
Aalisariutaanngitsunut, illunut ikkussukkanullu aalajangersagaanngitsunut pisinissamut tapiissuteqartoqarnissaanik qinnuteqaatigineqarsinnaavoq. Taamaalilluni aningaasartuutinut suliniummi periarfissanik misissuinermi pisariaqartunut tapiisoqarsinnaanera pingaartinneqarpoq. Ingerlatsinermut aammalu pilersitsinermut tapiissutiviit aalajangersakkamik ilaan-ngillat. Aalajangersakkami siunertaavoq ammaanneqassasoq misissuinerni allaaserineqartuni atortunut pisariaqartunut tapiissutisisinnaaneq, tassungali peqatigitillugu aaqqiissutaagallartunut angallatinut illunut il.il. pilersitsinermut ilaanngitsunut tapiissuteqarnissamut periarfissat killilerneqarlutik.

Nr. 3-mut
Teknikkikkut, aningaasatigut biologinillu siunnersorneqarnissamik pisariaqartitsinermi pineqarput aningaasartuutit suliniutip pineqartup piviusunngortinneqarnissaanut tulluartumik pisariaqartinneqartut. Pisinermi nalinganut siunnersorneqarnermut taamaallaat ilaapput pilersaarusiornermut pineqartumut tulluartumik ilaasut.

§ 9-mut.

Imm. 1-imut
Aalajangersagaq periarfissiivoq §§ 6-imiit 8-mut malillugit nammineq aningaasaliisoqarnissaa piumasaralugu tapiissuteqartoqarsinnaaneranik.

Imm. 2-mut
Aalajangersagaq naapertorlugu nammineq aningaasaliissutit aningaasaanngitsut allat atorlugit akiliutigineqarsinnaapput, pilersaarummi aningaasaliissutitut atorneqarniartoq imaluunniit pigisat nalillit pilersaarummi aningaasartuutinut tamarmiusunut pissusissamisoortumik pisariaqartutullu ilaappata.

Pigisat nalillit aningaasaliissutigineqartut nalinginik uppernarsaatit nassiunneqartut tunngavigalugit Naalakkersuisut nalilersuisinnaapput.

Pigisat nalillit aningaasaliissutigineqartut niuernermi atugassaritinneqartut nalinginnaasut malillugit annertunerusumik naleqarsinnaanngillat. Pigisat nalillit aningaasaliissutigineqartut nalingi nalornissutaalerpata Naalakkersuisut pigisat nalillit nalilersortissinnaavaat.

§ 10-mut.

Imm. 1-imut
Siunnersuummi kissaatigineqarpoq qulakkeerneqassasoq Naalakkersuisut tapiissutinik aaqqissuussinerat aningaasannanniarnernut atorneqannginnissaa, assersuutigalugu tapiissutisinerup kinguninngua angallatip niuerfimmi atugassaritinneqartunit appasinnerusumik akilersillugu tuninineqarnerani. Aammattaaq piffissami sivisuumi ingerlatsisoqarnissaa piumasaralugu pimoorullugu qinnuteqartoqarnissaa inatsisissatut siunnersuummi qulakkeerniarneqarpoq. Tamanna pinngitsoorniarlugu angallat imaluunniit suliniutit ukiut qulit ingerlaneranni tunineqarsinnaanngillat.

Qinnuteqartup nalunaarutigissavaa akueralugu angallat suliniutilluunniit tapiiffigineqartut Naalakkersuisut akuersitinnagit tunineqarsinnaanngillat, tapiissutit utertillugit akilerneqarneqaqqaarnerisigulluunniit tunineqarsinnaalluni.

Piffissaq tunniussivissaq pisineq isumaqatigiissusiortarnerlu pillugit inatsisit nalinginnaasut tunngavigalugit aalajangersarneqassaaq.

Imm. 2-mut
Aalajangersagaq periarfissiivoq tapiissutit utertillugit akilerneqaratik piginnittut nikissinnaaneranik. Tassani piumasaqaataavoq suliniummi tapiiffigineqarsimasumi piumasaqaatit allanngortinnagit ingerlatiinnarneqarnissaat.

Taamaalilluni suliniut ingerlalluartoq tunisinermi sanngiillisinneqassanngitsoq nalilerneqarpat tunineqarsinnaanera taamaallaat periarfissaavoq. Taamaattumik § 4-mi oqaatigineqartutut pilersaarummik allaaserinninneq nutaaq nassiunneqassaaq § 5-ilu naapertorlugu uppernarsaatit nassiunneqassallutik. Aalajangersakkap massuma siunertaa tassaavoq, suliniut inatsisip matuma siunertaanut naapertuuttutut nalilerneqarsimasoq, pilersaarutip ingerlaannarnissaa periarfissaqartillugu atorunnaarsinneqassanngitsoq. Tamatuma kingunerissagaluarpaa ani-ngaasat pilersaarummi Naalakkersuisunit aningaasaliissutigineqarsimasut annaaneqarsinnaaneri.

Imm. 3-mut
Aalajangersakkap siunertaraa piginnittuulersup nutaap § 10, imm. 2 malillugu tapiissutit akilerneqarneranni piumasaqaatit akuerissagai.

§ 11-mut.

Uppernarsaatit nassiunneqarnissaat pillugu siunnersuummi § 5-imi marlunnik aalajangersagaqareerpoq. § 11-mi aalajangersagaq ilanngunneqarpoq aningaasat siunertaq naapertorlugu atorneqarsimanerinut Naalakkersuisut nalilersuinissaannut atugassatut tapiiffigineqartup uppernarsaatinik nassiussinissaanik peqqussuteqarnissamut Naalakkersuisunut periarfissiisumik. Aalajangersagaq tamakkiisuunngilaq.

Nr. 1-imut
Naalakkersuisut taamaalillutik misissorsinnaavaat aningaasartuutinik matussusiinissamut tapiissutissatut qinnuteqaatigineqartut atorneqarsimanersut. Naalakkersuisut aammattaaq tapiissutinik pissarsisoq peqqusinnaavaat pisinermi allagartat, bilagit assigisaallu atorlugit uppernarsaatinik nassiussinissaanik.

Nr. 2-mut
Aningaasartuutigineqartuinnaanngitsut uppernarsarneqarnissaat Naalakkersuisut piumasaqaatigisinnaavaat, kisiannili suliniummi isertitat aamma. Tamassuma Naalakkersuisut periarfissippai § 4 malillugu piumasaqaatitut aalajangersakkat malinneqarnerinik misissuinissamut. Aammattaaq suliniutit immikkoortuini aalajangersimasuni niuernikkut periarfissat Naalakkersuisut uppernarsartissinnaavaat.

Nr. 3-mut
Aalajangersakkap Naalakkersuisut periarfissippai tuniseqqissinnaanissamut piumasaqaatip atuunnerani ukiumoortumik naatsorsuutinik nassitsisoqarnissaanik. Inatsisissatut siunnersuummi tapiissutit pineqarput, taamaammallu tapiissutinik pissarsisut tamarmik ukiumoortumik naatsorsuutinik nassitsinissaat piviusunngornaviarnani. Kisiannili aalajangersakkami erseqqissarneqarpoq tapiissutinik pissarsisut Naalakkersuisut taamatut peqquppatigit tapiissutinik pissarsisut ukiumoortumik naatsorsuutinik nassitsinissamut pisussaaffeqartut.

§ 12-imut.

Naalakkersuisut nr. 1-imiit 4-mut pisuni allaaserineqartuni tapiissutinik utertitsilluni akiliisoqarnissaanik piumasaqarnissamut pisussaaffeqarput. Aalajangersakkami pisut killilersorneqarput, tassani tapiissutinik pissarsisoq piaaraluni pissusilersornikkut iliuuseqarnikkulluunniit imaluunniit mianersuaalliorujussuarluni tapiissuteqarnermi piumasaqaatinik tunngavigineqartunillu avaqqutaarisimappat.

Nr. 1-imut
Aalajangersakkami aalajangersarneqarput tapiissuteqartoqarnissaanik qinnuteqarnermi tapiissutinik tunniussinermi tunngavigineqartunik tapiissutinik pissarsisoq eqqunngitsumik paasissutissiisimatillugu iliuusissat.

Nr. 2-mut
Aalajangersakkami aalajangersarneqarpoq tapiissutinik pissarsisup uppernarsaatinik annertunerusunik Naalakkersuinik nassitsequneqarsimanera, tapiissutinillu pissarsisup peqqussutillu malinneqannginnerani iliuusissat.

Nr. 3-mut
Aalajangersakkami aalangersarneqarput, tapiissutinik pissarsisoq tapiissutit atorneqarneranni annertuumik sumiginnaasimanerani iliuusissat. Aammattaaq aalajangersakkami aalajangersarneqarput, tapiissutinik pissarsisup suliniummik naammassinninniarnermini suliffeqarfinnik pitsaasumik ingerlatsinermut akerliusumik ingerlatsinera.

Nr. 4-mut
Aalajangersakkami aalajangersarneqarput tapiissutinik pissarsisoq tapiissuteqarnermi atugassaritinneqartut piumasaqaatillu malinnagit tapiissutinik atuisimatillugu iliuusissat.

§ 12-imut atuuppoq pisortanut akiitsunik kinguaattorutinik akiliisitsiniarneq pinngitsoortitsiniarnerlu pillugit Inatsisartut inatsisaat, Aalisarnermut Aningaasaliissutinut Immikkoortitat pillugit Inatsisartut inatsisaat malillugu pisassarilikkanut atorneqassasoq, tassa siunnersuut imarisamigut aalisarnermut, piniarnermut nunalerinermullu tapiissuteqartarnermut Inatsisartut peqqussutaannut naapertuuppoq.

§ 13-imut.

Aalajangersakkami pisut taaneqarput, tassani tapiissutit utertillugit akilerneqarnissaannik piumasaqarnissaq Naalakkersuisut qinersinnaagaat, § 12-ip akerlianik, tassani tapiissutit utertillugit akilerneqarnissaannik piumasaqarnissamik Naalakkersuisut pisussaaffeqarmata.

§ 13 malillugu utertitsilluni akiliisoqarnissaanik Naalakkersuisut qinersisinnaanerannut tun-ngaviuvoq pissutsit taaneqartut inuussutissarsiornermi pissutsit nalinginnaasut kingunerannik pisinnaanerat: Akiliisinnaajunnaarneq, tigusinninneq, inuussutissarsiornermi atugassarisat allanngorneri (aalisarsinnaanermut akuersissutit tunniunneqartarneri).

Aallaaviuvoq pinngitsoornani utertitsilluni akiliisoqartariaqanngitsoq.

Nr.1-imut
Aalajangersakkami aalajangersarneqarpoq tapiissutinik pissarsisoq sumiginnaarujussuarnermi kinguneranik akiliisinnaajunnaarnerani iliuusissat. Aalajangersakkami aalajangersarneqarpoq tapiissutinik pissarsisoq piaaraluni pissusilersornikkut iliuuseqannginnikkulluunniit imaluunniit mianersuaalliorujussuarluni tapiissuteqarnermi piumasaqaatinik tunngavigineqartunillu sumiginnaanerani iliuusissat.

Nr. 2-mut
Miarnersuaalliorujussuarnermik assigisaannilluunniit tunngaveqarnermik aalajangersagaq imaqanngilaq, tassa aalajangersakkami aalajangersarneqarmata tunisinerup niuernerinnarmik tunngaveqarnerani iliuusissat. Tassunga atatillugu aalajangersagaq isigineqassaaq, Aalisarnermut Aningaasaliissutinut Immikkoortitanit aningaasat agguaanneqartut utertinneqarsinnaanerannik Naalakkersuisut periarfissinneqarnerat.

Tassani tusinermi akia, tunisinermi iluanaarutit aammalu suliniummik suliaqarnermi naleqquttumik aningaasarsiat aallaavigineqassapput, taamaalilluni suliniut annikitsuinnarmik sinneqartooruteqarluni tunineqarpat tapiissutit utertillugit akilerneqarnissaanik piumasaqannginnissaq Naalakkersuisut qinersinnaallugu.

Taamaalilluni pinerit tamaasa aalajangersimasumik naliliisarnissaq pineqarpoq.

Nr. 3-mut
Aalajangersakkami aalajangersarneqarpoq piginnittut annertuumik allanngorneranni iliuusissat. Annertuumik oqarnermi selskabimut piginneqataanermut aningaasaliissutit ilai ima annertugisut pineqarput piviusumik naalagaalluni sunniuteqarneq pineqarsinnaalluni.

Piginneqataasut allat aamma ingerlatseqatigiiffiup piginnittumik, piginneqataassummik nutaamik piginnilersimasumik imaluunniit ingerlatseqatigiiffimmi piginneqataassutiminik annertusisimasumik peqataanera eqqarsaatigalugu naliliinermik tamanna tunngaveqarpoq.

Naalakkersuisut nalilersussavaat piginnittut allanngorneri § 13, nr. 2 malillugu suliniutip tunineqarneranut sanilliunneqarsinnaanersoq. Piginnittut allanngorneri piginneqatigiiffimmik ingerlatsinermik piviusorsiortumik tamakkiisumik pissuteqarsinnaavoq. Kisiannili nalilersorneqassaaq tapiissuteqartoqarnissaanik qinnuteqaat eqqarsaatigalugu pimoorussaanngitsumik piginnittuuneq pineqarnersoq.

Nr. 4-mut
Aalajangersakkami aalajangersarneqarput tapiissutinik pissarsisoq aalisarsinnaanermut akuersissuteqarunnaarluni imaluunniit aalisarnermi suliniummiluunniit pineqartumi pisortaniit akuersissutaateqarunnaarnerani iliuusissat. Aalisarsinnaanermut akuersissutip imaluunniit pisortat akuersissutaasa atorunnaarnerannut pissutaasut aallaavigineqassapput. Aalisarsinnaanermut akuersissut imaluunniit pisortat akuersissutaat pillugu inatsimmik aalisarsinnaanermut akuersissutinut imaluunniit pisortat akuersissutaannut tunngaviusumik unioqqutitsinermik aalisarsinnaanermut akuersissummik imaluunniit pisortat akuersissutaannik annaasaqarneq pissuteqarpat, tapiissutit utertillugit akilerneqarnissaat pineqassaaq. Akerlianilli tapiissutinik pissarsisup inuussutissarsiummik allamik tamakkiisumik ilaannakortumilluunniit ingerlataqalernera ilinniagaqarnerluunniit pissutigalugu aalisarsinnaanermut akuersissummi eqqortinneqarsinnaajunnaarpata sakkukinnerusumik naliliisoqassaaq.

§ 13-imut atuuppoq pisortanut akiitsunik kinguaattoorutinik akiliisitsiniarneq pinngitsoortitsiniarnerlu pillugit Inatsisartut inatsisaat, Aalisarnermut Aningaasaliissutinut Immikkoortitat pillugit Inatsisartut inatsisaat malillugu pisassarilikkanut atorneqassasoq, tassa siunnersuut imarisamigut aalisarnermut, piniarnermut nunalerinermullu tapiissuteqartarnermut Inatsisartut peqqussutaannut naapertuuppoq.

§ 14-imut.

Siunnersuummi § 14 Aalisarnermut Aningaasaliissutinut Immikkoortitat pillugit Naalakkersuisut itisilerutaasumik tamanut atuuttunik malittarisassanik aalajangersaasinnaanerinut pisinnaatitsissutaavoq. Malittarisassat taamaattut Namminersornerullutik Oqartussat nalunaarusiornerisigut aalajangersarneqassapput.

Naalakkersuisut annertunerusunik malittarisassanik aalajangersaanissamut pisinnaatinneqarput, tamannalu annertunerusumik eqaannerusumik periuseqarsinnaanermik kissaateqarnermik tunngaveqarpoq. Taamaalilluni aalisarnermik inuussutissarsiornerup ineriartornissaanik kigaallatsinneqarnissaanilluunniit Naalakkersuisut aaqqiinissaamut Naalakkersuisut periarfissinneqassapput.

Nr. 1-mut
Naalakkersuisut annertunerusunik malittarisassanik aalajangersaanissamut pisinnaatinneqarput, tamannalu annertunerusumik eqaannerusumik periuseqarsinnaanermik kissaateqarnermik tunngaveqarpoq. Taamaalilluni aalisarnermik inuussutissarsiornerup iluani ineriartornerup suliniutit suut pingaartinneqarnerunersut malittarisassiunnerisigut, Naalakkersuisut naleqqussaanissaminnut periarfissaqalerput.

Aamma aalajangersakkamiippoq suliniutit nutaaliortut suut siuarsarniarneqarnersut annertunerusumik nassuiarneqarnissaannik periarfissiineq. Inuiaqatigiit aningaasaqarniarneranni pissarsiassanut annertunerpaamik tapiissutaasinnaasutut ilimagineqartut Naalakkersuisut tunngavigissavaat.

Nr. 2-mut
Aningaasat killeqarmata nalunnarusiornikkut najoqqutassanik aalajangersaasoqarsinnaavoq nunap immikkoortui sorliit tapiiffigineqarsinnaanersut. Aalajangersakkami ilaatigut ilaapput nunap immikkoortuini ineriartortitsinermi suliniutit allat.

Aammattaaq inuussutissarsiortunik siuarsaanermi tapiisarneq pillugu peqqussut maannakkut atuuttoq malillugu Qaanaap, Ittoqqortoormiut aamma Ammassaliup kommuniinut immikkut iluaqutaasunik malittarisassaqarpoq. Nalunaarusiornikkut tapiissutit annertussusaannik piumasaqaatinillu malittarisassanik annertunerusumik aalajangersaanissaq aalajangersakkami periarfissinneqarpoq. Taassuma saniatigut Qaanaap, Ittoqqortoormiut aamma Amassaliup kommuniinut atuuttunik angallatit angissusissaat pissutsinillu allat pillugit malittarisassanik aalajangersaasoqarsinnaavoq.

Nr. 3-mut
Aningaasat killeqarmata nalunaarusiornikkut najoqqutassanik aalajangersaasoqarsinnaavoq inuussutissarsiutini immikkoortut sorliit tapiiffigineqarsinnaanersut.

Naalakkersuisut kissaatigippassuk kalaallit aalisarnerat sammivimmut aalajangersimasumut ingerlassasoq, aalisarnerup iluani inuussutissarsiutit suut salliutinneqarnissaat pillugu annertunerusumik malittarisassanik aalajangersaanissaq periarfissaavoq. Aalajangersakkamiippoq suliniutit, suliniutit nutarterisut ataaniittut niuernermi imminnut nappassinnaasutut paasinarsippata, taakku qanoq siuarsarneqarnissaat pillugu Naalakkersuisut annertunerusunik malittarissanik aalajangersaasinnaasut. Naalakkersuisut taamaalillutik aalisakkanik tukertitsiveqarnermi niuerneq tunngavigalugu ingerlatsinissaq periarfissaqalissappat, taakku pillugit malittarisassiornissaq qinersinnaavaat.

Taamaammat aalisarneq annertuumik imaluunniit periarfissaqalersitsisumik ineriartorpat aalisarnermik taassuminnga annertunerusumik killilersuinissaq aalajangersakkap periarfissaqalersissavaa. Siunertaavoq aalisarnerup sapinngisamik aallaqqaataaniit isumagineqarnissaa, taassuma ineriartornera atuineralu eqqarsaatigalugit.

§ 14, imm. 3 malillugu aalajangersaanissamut piginnaatitsissutip atorneqarnerani inuussutissarsiutit tapiiffigineqartut inuiaqatigiit aningaasaqarniarneranni pissarsiassanut annertunerpaanissaat pingaartinneqassaaq.

Nr. 4-mut
Teknikkikkut, aningaasaqarnikkut ilinniartitaanikkullu piumasaqaatit inatsit malillugu tapiiffigineqarnissamut pisariaqartut pillugit Naalakkersuisut malittarisassanik aalajangersaasinnaapput. Taamaalilluni suliniutip ingerlanneqarnerani teknikkikkut ilinniagaqarnikkullu maannakkut piumasaqaatit suliniummi takuneqarsinnaassapput. Suliniutit piviusunngortinneqarneranni "sulinermi iliuusissaq pitsaanerpaaq" ("best practice") ingerlanniarneqassaaq, tamannalu nalunaarusiornikkut piviusunngortinniarneqarsinnaalluni.

Aningaasaqarnermut piumasaqaatinut atatillugu ilaatigut nammineq aningaasaliissutissanut, aningaasatigut tunngavigineqartut annertussusaat imaluunniit imminut akilersinnaassutsimik ilimagineqartut pillugit piumasaqaatinik aalajangersaasoqarsinnaavoq.

§ 15-imut.

Imm. 1-imut
Imm. 1-imi aalajangersarneqarpoq Inatsisartut inatsisaanni aalajangersakkat suut pillaammik akiliisitsiffiusinnaanersut.

Nr. 1-imut
Aalajangersakkami § 12 innersuussutigineqarpoq, tassani tapiissutit utertillugit akilerneqarnissaanik piumasaqarnissamut Naalakkersuisut pisussaaffeqarmata. § 13-imi aalajangersarneqarput tapiissutinik pissarsisoq piaaraluni pissusilersornikkut iliuuseqannginnikkulluunniit imalluunniit mianersuaalliorujussuarluni tapiissuteqarnermi piumasaqaatinik tunngavigineqartunillu sumiginnaanerani iliuusissat. Pisuni taakkunani aamma pillaammik akiliisitsisoqarsinnaavoq.

Nr. 2-mut
Aalajangersakkami ilaatinneqarpoq § 4-mi pissutsit taaneqartut pillugit qinnuteqartoq salloqittaalluni paasissutissiinera. Salloqittaalluni passissutissiinermut paasissutissat eqqunngitsut ilaapput. Aammataaq aalajangersakkami ilaapput qinnuteqartoq Inatsisartut inatsisaanni § 4-mi paasissutissiissutissatut piumasaqaatit paasissutissiissutiginngippagit.

Aalajangersakkami aamma ilaapput, eqqunngitsumik tunngaveqarluni tapiissutit akilerneqarpata imaluunniit nalunngikkaluarlugu paasissutissiisoqanngippat, tassani pineqarluni qinnuteqartup eqqunngitsunik imaluunniit amigartunik Naalakkersuisunut paasissutissiisimanera.

Naalakkersuisut isumaqarpata kukkusunik paasissutissiisoqartoq, paasissutissiissutigineqartut eqqortuunersut Naalakkersuisut misissussavaat.

Nr. 3-mut
§ 11 malillugu uppernarsaatinik annertunerusunik Naalakkersuisut peqqusinerat malinneqanngippat, pillaammik akiliisitsinissaq periarfissaavoq.

Imm.2-miit 4-mut
Imm. 2-miit 4-mut oqaaseq "unioqqutitsineq" annertuninngorlugu nassuiarneqassaaq. Oqaaseq pisunut tamanut taaguutitut atorneqassaaq, tassani qanoq iliuuseqarnernut sumiginnaasimanernulluunniit aalajangersakkanut pillaassuteqarfiusinnaasunut naapertuutinngippata. Peqqusinermik malinninnginneq assersuutigalugu oqaatsimi unioqqutitsinermi ilaavoq.

Kommunimi ataatsimoorussaq kommunalbestyrelsit aamma nunaqarfinni aqutsisut il.il. pillugit Inatsisartut inatsisaasa ataaniittoq, tassaavoq Kommunalbestyrelsit aamma nunaqarfinni aqutsisut il.il. pillugit inatsisartut inatsisaanni nr. 20 3. november 1994-imeersumi kingusinnerusukkut allanngortinneqartumi § 64-imi ilaasut. Aalajangersakkami § 64-i innersuussutigineqanngilaq, tassa ilimagineqarmat kommunalbestyrelsit aamma nunaqarfinni aqutsisut il.il. pillugit Inatsisartut inatsisaat aaqqissuussaanermi kommuninillu aaqqissuusseqqinnermut atatillugu allanngortinneqassasoq.

§ 16-imut

Siunnersuutigineqarpoq Inatsisartut inatsisaat 1. januar 2007-imi atuutilissasoq.