4. august 2006

UKA 2006/32

 

Inatsisissatut siunnersuummut oqaaseqaatit

 

Oqaaseqaatit nalinginnaasut

1. Inatsisissatut siunnersuutip tunngavia
Inatsisissatut siunnersuut, akileraaruserinermik ingerlatsineq pillugu Inatsisartut inatsisissaattut siunnersuutip peqatigitillugu saqqummiunneqartup kinguneranik inatsisinik allannguineruvoq.

Taamaalilluni inatsisissatut siunnersuut akitsuusiisarneq akiliisitsiniartarnerlu pillugit inatsisinik atuuttunik allannguinernik arlaqartunik imaqarpoq.

Taamatuttaaq siunnersuutip umiarsuarnit timmisartunillu nioqqutissanik eqqussuinermi aammalu annissuinermi nakkutilliinermut aalajangersakkanut maleruagassanut erseqqissaatinik imaqarluni.

2. Inatsisissatut siunnersuutip imarisai
Akileraaruserinermik ingerlatsineq pillugu Inatsisartut inatsisissaattut siunnersuut aalajangersakkanik, aningaasarsianit akileraaruserinermik akitsuusiisarnermillu ingerlatsinermut malittarisassiuisunik arlalinnik imaqarpoq. Ilaatigut naatsorsuutinik misissuisarneq pillugu, aalajangiinernik maalaaruteqartarneq assigisaallu pillugit maleruagassat ataatsimoorussat aalajangersarneqarput. Akitsuutit pillugit inatsisit arlallit aalajangersakkanik taamaattunik imaqarput. Aalajangersakkat taakku maleruagassat ataatsimoorussat nutaat kingunerisaannik pisariaarupput, taamaammallu atorunnaarsinneqarnissaat siunnersuutigineqarluni.

Umiarsuarnik timmisartunillu misissuisarneq kiisalu inunnik misissuisarneq pillugit immikkut maleruagassat nioqqutissanik eqqussuinermi akitsuutit pillugit inatsisini aalajangersagaapput. Siunnersuutigineqarpoq tunngaviusumik aalajangersakkat taakku maannakkutut isikkoqartillugit ingerlatiinnarneqassasut, tassa nioqqutissanik eqqussuinermi akitsuutit pillugit inatsisit malillugit misissuisarneq siunnerfigineqarmat. Datatilsynilli qularisimammagu Namminersornerullutik Oqartussat qarasaasiatigut elektroniskiusumik paasissutissanik qarasaasiatigut toqqaannartumik aallersinnaanera uparuarlugu, soorlu ilaasunik paasissutissanik aamma usigisanik paasissutissanik aallersinnaaneq pillugu, erseqqissaatigissallugu siunnersuutigineqarpoq akileraaruseriffik paasissutissanik aalajagersimasunik piumasaqaateqarsinnaanera qarasaasiatigut toqqaannartumik aallersinnaanermik piumasaqaateqartumik ammaassiffigineqassasoq. Datatilsynip oqaaseqaateqarnera Kalaallit Nunaanni nalunaarusiortussaatitaanermut inatsimmut tunuliaqutaqarpoq kisiannili nioqqutissanik eqquissuinermi annissuinermilu nakkutilliinissamut maleruagassanut tunngasortaa Inatsisartut nioqqutissanik eqquissuinermi annissuinermilu akitsuutit pillugit inatsisaanni maleruagassiai nalilersuuteqarfigisimanagu. Qarasaasiatigut toqqaannartumik paasissutissanik aallersinnaanerup ilaatigut qulakkiissavaa, pisortat nakkutilliisuutitaat paasissutissanik nutaavinnik pissarsisinnaaneri aammalu tamanna tunngavigalugu ilaatigut aanngajaarniutinik eqquissuinermi nakkutilliinerup ersarissunik tunngavissaqarluni nakkutilliinerup siunnerfeqartumik aaqqissorsinnaaneranut periarfissiimmat. Pissusiviusoq unaavoq pineqartumut suleriaatsitigut periuseqartarnerup tunngavilersorneqarneranut erseqqissaateqarneruinnarmat.

Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaat malillugu kommunit allat Namminersornerullutillu Oqartussat akileraarutit sippuutaannik akileraartartup pissaanik unerartitsinikkut ilanngartuisinnaapput. Aalajangersakkap maannakkut imarisaa malillugu naatsorsuutaavoq akileraarutit sippuutaasa kommunimit akileraarfiusumit tunniunneqartussaanerat.

Akileraarutinut, matumani aamma aningaasarsianit akileraarutinut akitsuutinullu akiliutaavallaarsimasut utertinneqartussat akileraaruseriffimmit tunniunneqartalertussaammata, aalajangersakkap tamanna malillugu allanngortinneqarnissaa siunnersuutigineqarpoq. Siunnersuutip kinguneraa kommunit akileraarutinut akiliutaavallaarsimasunik utertitsilernerminni pissarsisussap akileraarutinut, utertitassanngorlugit ikiorsiissutinut, pilersuisussaatitaanermut akilersuutinut siumoortumik tunniunneqartartunut aammalu kommunit inuussutissarsiutitigut suliffeqarfimmut aningaasatigut attartortissimasaannut akilerneqartussanngoreersimagaluartunut akiligassarisaasa amerlaqataannik unerartitsinikkut ilanngartuisinnaanerat.

Maleruagassaq atuuttoq malillugu kommunip akileraarfiusup ilanngaatissai aamma kommunit allat Namminersornerullutillu Oqartussat ilanngartuisinnaanerat piffissaq tunngavigalugu tulleriiaarneqarput. Maleruagassatut siunnersuummi tamanna allanngortinneqanngilaq. Ilanngaanissamik nalunaaruteqartarneq ilanngartuinissamillu nalunaaruteqartarneq akileraaruseriffimmit isumagineqartalertussaammata, imaalersussaavoq akileraaruseriffiup aalajangertussaallugu tulleriiaarinermini kommmuni ilanngartuisinnaaneranik nalunaarfigineqassanersoq, imaluunnit Namminersornerullutik Oqartussanut salliussilluni akiligassanik ilanngaasoqassanersoq. Naalakkersuisut suliassanik taamaattunik suliaqarnerminni pingaartillugu isiginiassavaat tulleriiaarinerup pissarsisussap akiitsui ataatsimut isigalugit ingerlanneqarnissaa.

Siunnersuutip kinguneraa aammattaaq akitsuutinut akiliutaavallaarsimasut utertinneqarnissaanni ilanngartuisoqarsinnaanera. Allannguutip akiitsut pineqartut appartinneqarnissaannut annikitsuinnarmik sunniuteqarnissaa naatsorsuutigineqarpoq, akitsuutinimmi utertitsisarneq annikitsuinnaammat.

Naggasiullugu siunnersuutigineqarpoq inatsisini arlalinni oqaaseq "Akileraartarnermut Pisortaqarfik" oqaatsimik uuminnga taarserneqassasoq "akileraaruseriffik".

3. Aningaasatigut allaffissornikkullu pisortanut kingunissai:
Siunnersuut pisortanut allaffissornikkut sunniuteqassangatinneqanngilaq, aningaasatigulluunniit taasarialimmik sunniuteqassangatinneqarani.

4. Aningaasatigut allaffissornikkullu inuussutissarsiortunut kingunissai:
Siunnersuut inuussutissarsiortunut allaffissornikkut aningaasatigulluunniit taasarialimmik sunniuteqassangatinneqanngilaq.

5. Avatangiisinut pinngortitamullu kingunissai:
Siunnersuut avatangiisinut pinngortitamulluunniit sunniuteqassanngilaq.

6. Allaffissornikkut innuttaasunut kingunissai:
Siunnersuutip kinguneraa akileraaruseriffiup aalajangigaanik, naammagittaalliuteqarsinnaanermut piffissaliussat, naatsorsuutinik misissuisarneq assigisaallu pillugit malittarisassat atorunnaarsinneqarneri. Taarsiullugu pissutsit taakku akileraaruserinermik ingerlatsineq pillugu inatsisartut inatsisaanni aalajangersakkanit killilersorneqassapput.

7. Naalagaaffeqatigiinnermut namminersornermullu tunngasut:
Siunnersuut naalagaaffeqatigiinnermut namminersornermulluunniit tunngasunik imaqanngilaq

8. Pisortanik kattuffinnillu tusarniaaneq:
Siunnersuut pisortaqarfinnut tamanut tusarniaassutigineqarpoq, KANUKOKA, Grønlands Arbejdsgiverforening (GA), ILIK, Nunaqavissut Suliffiutillit Kattuffiat (NUSUKA), Sulinermik Inuussutissarsiuteqartut Kattuffiat (SIK), KNAPK, Savaatillit Peqatigiit Suleqatigiissut (SPS), Atorfillit Kattuffiat (AK), Ilinniagartuut Kattuffiat/Akademikernes Sammenslutning I Grønland (ASG).

Tusarniaanermi akissutit Akileraarutinut Akitsuutinullu Ataatsimiititaliamut ingerlateqqinneqarput.

Tusarniaanermi akissutit siunnersuutip allanngortinneranik kinguneqanngillat.

 

 

Inatsisissatut siunnersuummi aalajangersakkanut ataasiakkaanut oqaaseqaatit

§ 1-imut

Nr. 1-imut
Siunnersuutigineqarpoq inatsimmi tamarmi oqaaseq "Akileraartarnermut Pisortaqarfik" oqaatsimik "akileraaruseriffik"-mik taarserneqassasoq.

Nr. 2, aamma 6-mut
Aalajangersakkat uku atorunnaarsinneqassapput: § 24 missingersuilluni angissusiliineq pillugu, § 33 suliffeqarfiit akitsuutinik akiliisussaatitaasut pillugit, § 34 pisortatut oqartussaasut il.il. paasissutissanik akileraaruseriffimmut ingerlatitseqqittussaanerat pillugu, § 36 aalajangiinernik maalaaruteqarneq pillugu, aamma § 43 nipangiussisimasussaatitaaneq pillugu.

Taagorneqartut tamassuma kingorna akileraaruserinermik ingerlatsineq pillugu Inatsisartut inatsisaanni maleruagassatigut aalajangersarneqalissapput.

Nr. 3-mut
Aalajangersakkap Inatsisartut nioqqutissanik eqquissuineq aamma annissuineq pillugit inatsisaanni § 29, imm. 1 aallaavigivaa.

Nakkutilliisinnaanerup suliarineqarnissaanut pisariaqartinneqarlutik paasissutissiinissamut aamma takussutissiisinissamut pisussaaffeqartitsineq, matumani ilanngullugit angallassissutip suussusaanik paasissutissiinerit, inuttat, ilaasut aamma taakku nassataasa nalunaarsorneqarnerinik paasissutissat aammalu usigisat pillugit paasissutissiinerit pillugit siunnersuutigineqarpoq aamma sulliffeqarfinnut timmisartutigut aammalu umiarsuartigut angalasunik assartuussisartunut atuuttussanngorlugu aalajangersakkap ilaneqarnissaanik. Timmisartut umiarsuillu atorlugit assartuinermik ingerlassineq assersuutigalugu paasineqassaaq nassiussanik inunnillu angallassineq, allakkanik ingerlassineq, angallatinik kalittaammik ingerlassineq, siorartaat, napparsimasunik timmisartukkut ingerlassineq assigisaallu. Nakkutilliisinnaanerup suliarineqarnissaanut pisariaqartinneqarlutik paasissutissiinissamut aamma sakkutooqarnikkut angallassinerit, taakku Kalaallit Nunaannik illersuineq pillugu isumaqatigiissut 27. april 1951-imeersoq nunallu tamat akornanni pisussaaffiit taakkununnga assingusut malillugit missuiffigineqarsinnaappata.

Aammattaaq siunnersuutigineqarpoq erseqqissarneqassasoq akileraaruseriffik eqqartuussivinni aalajangiinertaqanngitsumik takusaqarumalluni, ammaaqqusilluni imaluunniit tamakkua iserfigineqannginnissaanik peqqusilluni piumasaqarsinnaavoq taakkuninngalu misissuilluni

Nr. 4-mut
Aalajangersagaq nutaajuvoq, aalajangersakkap akileraaruseriffiup sukkulluunniit paasissutissat akileraaruseriffimmut atugassanngortinneqassanerannik piginnaatitsilernermik ammaassissaaq aamma tassunga atatillugu toqqaannartumik qarasaasiatigut elektroniskiusunik paasissutissanik piumasaminik aallersinnaalersissallugu.

Naak aalajangersagaq nutaajugaluartoq, erseqqissaataannaavoq. Tamatumani oqaaseqaatini naliginnaasuni imm. 2-mut innersuussineqassaaq.

Nr. 5-mut
Siunnersuutigineqarpoq § 29, imm. 2-imi aalajangersakkanik unioqqutitsisoq pillaammik akiligassinneqarsinnaassasoq. Aammattaaq siunnersuutigineqarpoq aalajangersagaq kinguneqartitsisumik allanngortinneqassasoq, tassami siusinnerusukkut § 29, imm. 3, kinguneratigut § 29, imm. 4-nngortillugu aammalu §§-it 33 aamma 34 atorunnaarsillugit. Aammattaaq siunnersuutigineqarpoq akileraaruseriffiup immersugassiaanik atuineq pillugu § 2, imm. 2-mik aamma akileraaruseriffiup ajoqusersorneqarani sinerissami sumiluunniit, umiarsualivinni il.il. misissuisinnaanerat pillugu § 32, imm. 1-imik unioqqutitsinerni pillaammik akiliisitsisinnaaneq atorunnaarsinneqassasoq. Naggasiullugu siunnersuutigineqarpoq erseqqissarneqassasoq § 29, imm. 5-imik unioqqutitsinermi pillaateqarsinnaaneq tassaasoq akileraaruseriffimmiit nalunaarutigineqartumit umiarsualivimmut akileraaruseriffiup ingerlaffigeqqusaanut peqqussummik nalunaaruteqarnermik sumiginnaanerusoq.

§ 2-mut

Nr. 1-imut
Inatsimmi tamarmi oqaaseq "Akileraartarnermut Pisortaqarfik" oqaatsimik "akileraaruseriffik"-mik taarserneqarpoq.

Nr. 2-mut
Maannamut inatsimmi atuuttuusumi § 1, imm 1, nr. 21, litra e malillugu biilit nioqqutissanik ingerlatsissutit biilitut inunnik ingerlatsissutitut akitsuuserneqassapput, biilitut nioqqutissanik ingerlatsissutitut akitsuusiinissamut piumasaqaatit atorneqarsinnaajunnaaraangata. Taamatut pisoqartillugu akitsuutit piffissami nunamut eqqussivimmiit piffissap akiliiffiup tungaanut qaammammut 2 procentimik ernialerneqassapput.

§ 1, imm.1, nr. 26. litra e malillugu taxanut akitsuut akilerneqanngikkallartoq aammattaaq 2 procentimik ernialerneqassaaq, akitsuummik akiliinissamut kinguartitsinermut piumasaqaatit atorneqarsinnaajunnaarneranniit akiliinissap tunngaanut.

Siunnersuutigineqarpoq erniarititaq aalajangersakkani taakkunani marlunni 1 procentinngorlugu appartinneqassasoq, taamaalilluni akileraartarnermi erniarititatut allatut annertussuseqalersillugu.

§ 3-mut

Nr. 1-imut
Inatsimmi tamarmi oqaaseq "Akileraartarnermut Pisortaqarfik" oqaatsimik "akileraaruseriffik"-mik taarserneqarpoq.

Nr. 2-mut
Aalajangersakkat uku atorunnaarsinneqassapput: § 22a pisortatut oqartussaasut il.il. paasissutissanik Akileraartarnermut Pisortaqarfimmut ingerlatitseqqittussaanerat pillugu, aamma § 23, imm. 3 aamma 4, Akileraartarnermut Pisortaqarfiup aamma Naalakkersuisut aalajangiinerinik maalaaruteqarneq pillugu.

Taagorneqartut tamassuma kingorna akileraaruserinermik ingerlatsineq pillugu Inatsisartut inatsisaanni maleruagassatigut aalajangersarneqalissapput.

§ 4-mut

Nr. 1-imut
§ 3, imm. 1-imi aamma 2-mi oqaaseq "Akileraartarnermut Pisortaqarfik" oqaatsimik "akileraaruseriffik"-mik taarserneqarpoq.

Nr. 2-mut
§ 3, imm. 5 kingusinaarluni akiliinermi ernianut ilassut atorunnaarsinneqarpoq.

Taaneqartoq tamassuma kingorna akileraaruserinermik ingerlatsineq pillugu Inatsisartut inatsisaanni maleruagassatigut aalajangersarneqalissaaq.

§ 5-imut

Nr. 1-imut
Inatsimmi tamarmi oqaaseq "Akileraartarnermut Pisortaqarfik" oqaatsimik "akileraaruseriffik"-mik taarserneqarpoq.

Nr. 2-mut
Aalajangersakkat uku atorunnaarsinneqassapput: § 7 kingusinaarluni akiliinermi erniat pillugit, § 8 Akileraartarnermut Pisortaqarfiup aamma Naalakkersuisut aalajangiinerinik maalaaruteqarneq pillugu, aamma § 9 pisortatut oqartussaasut il.il. paasissutissanik Akileraartarnermut Pisortaqarfimmut ingerlatitseqqittussaanerat pillugu.

Taagorneqartut tamassuma kingorna akileraaruserinermik ingerlatsineq pillugu Inatsisartut inatsisaanni maleruagassatigut aalajangersarneqalissapput.

§ 6-imut

Nr. 1-imut
§ 6, imm. 1-imiit 3-mut oqaaseq "Akileraartarnermut Pisortaqarfik" oqaatsimik "akileraaruseriffik"-mik taarserneqarpoq.

§ 7-imut

Nr. 1-imut
§ 14, imm. 2-mi oqaaseq "Akileraartarnermut Pisortaqarfik" oqaatsimik "akileraaruseriffik"-mik taarserneqarpoq.

§ 8-mut

Nr. 1-imut
Inatsimmi tamarmi oqaaseq "Akileraartarnermut Pisortaqarfik" oqaatsimik "akileraaruseriffik"-mik taarserneqarpoq.

Nr. 2-mut
Oqaatsit "§ 8, imm. 2 naapertorlugu pillaatitut ernialiunneqarsinnaasut ilanngullugit," § 10, imm. 1-imiit peerneqarput. Tamanna § 8, imm. 2-p atorunnaarnerata kinguneraa, takuuk ataani nr. 3 pillugu.

Nr. 3-mut aamma nr. 5-imut
Aalajangersakkat uku atorunnaarsinneqassapput: § 8, imm. 2 kingusinaarluni akiliinermi erniat pillugit, § 10, imm. 2 akitsuutinut akiliutaavallaarsimasut utertinneqarneranni erniat pillugit, § 10, imm. 3 akitsuutinut akiliutissat missingersuilluni angissusilernerat pillugu, § 10, imm. 4 kingusinaarluni akiliinermi erniat pillugit, § 11 Akileraartarnermut Pisortaqarfiup aamma akitsuutinik nakkutilliisut aalajangiinerinik maalaaruteqarneq kiisalu utertitsilluni akileeqqusinermik piumasaqaatit ernialersorneri pillugit, § 12, suliffeqarfinni misissuineq pillugu, § 13 pisortatut oqartussaasut Akileraartarnermut Pisortaqarfimmut paasissutissanik ingerlatitseqqittussaatitaanerat pillugu, § 16 raajanut akitsuutit pillugit akitsuutinut ataatsimiititaliaq pillugu, aamma § 17 akitsuutinut ataatsimiititaliami ilaasortat nipangiussisussaatitaanerat pillugu.

Taagorneqartut tamassuma kingorna akileraaruserinermik ingerlatsineq pillugu Inatsisartut inatsisaanni maleruagassatigut aalajangersarneqalissapput. Tamassuma ilaatigut kinguneraa akileraaruseriffiup raajanut akitsuutit pillugit aalajangiinerinut maalaarutit Skatterådimit suliarineqartarlernissaat aammalu raajanut akitsuutit pillugit ataatsimiititaliaq atorunnaarsinneqassasoq.

Raajanut akitsuutit pillugit ataatsimiititaliaq pillugu ilisimatitsissutigineqarsinnaavoq, ataatsimiititaliaq ukiuni arlalinni ataatsimiigiaqquneqarnikuunngitsoq, ataatsimiitsimiititaliamut suliakkiissutinik tigusaqartoqarnikuunnginnerata kingunerisaanik.

Nr. 4-mut
§ 15, imm. 1-imi oqaatsit "kiisalu akitsuummut akiliinngitsoortitsisinnaallutik imaluunniit annikillisitsisinnaallutik, pissutsit immikkut illuinnartut tamanna pisariaqartippassuk" peerneqarput.

Tamassuma kingorna raajanut akitsuutinik isumakkeerinninnissamut pisinnaatitaaffik Naalakkersuisuniit Skatterådimut nuunneqarpoq, tassa akileraaruserinermik ingerlatsineq pillugu Inatsisartut inatsisissaattut siunnersuut malillugu Skatterådi aningaasarsianit akileraarutinik akitsuutinillu isumakkeerinninnermi suliat aalajangiiffiginissaannut pisinnaatitaaffeqalissammat.

§ 9-mut

Nr. 1-imut
Inatsimmi tamarmi oqaaseq "Akileraartarnermut Pisortaqarfik" oqaatsimik "akileraaruseriffik"-mik taarserneqarpoq.

§ 10-mut

Nr. 1-imut
§ 5-imi oqaasertat allanngortinneqarneri akileraaruserinerup qitiusumiit ingerlanneqalernissaata kingunera.

Aalajangersagaq tunngavigalugu kommunit akileraarutinut, matumani aamma aningaasarsianit akileraarutinut akitsuutinullu akiliutaavallaartunik utertitsinerminni utertitsivigineqartup akileraarutinut, utertitassanngorlugit ikiorsiissutinut, pilersuisussaatitaanermut akilersuutinut siumoortumik tunniunneqartartunut aammalu kommunit inuussutissarsiutitigut suliffeqarfimmut aningaasatigut attartortissimasaannut akilerneqartussanngoreersimagaluartunut akiligassarisaanut naapertuuttunik unerartitsinikkut ilanngartuisinnaatitaapput.

Aalajangersagaq tunngavigalugu kommuni utertitsivigineqartussap akileraarutinut akiliutigivallaarsimasaanik pissarsisussanngorsinnaavoq, utertitsivigineqartussaq utertitassanngorlugit ikiorsiissutinut, pilersuisussaatitaanermut akilersuutinut siumoortumik tunniunneqartartunut imaluunniit kommuninit inuussutissarsiutitigut suliffeqarfimmut aningaasatigut attartortissimasaannut akilerneqartussanngoreersimagaluartunut akiligassaqarpat.

Ilanngartuinissaq piffissami, utertitsivigineqartussap tamatuminnga nalunaarummik tigusaqarfiani pissaaq.

Ilanngartuinermi pissarsisoq utertitsivigineqartussap piffissami pineqartumi inatsisitigut inissisimaffianik nangitsissaaq, tamannalu isumaqarpoq ilanngaasoq utertitsivigineqartussap akileraarutinut akiliutaavallaarsimasunik utertitsivigineqarnissamik piumasaqarsinnaanerigaluatut inatsisitigut inissisimalersoq.

Ilanngartuinissamut pisinnaatitaaffiup ilanngaanissamut, nuussinissamut arsaarinninnissamullu sanilliulluni qanoq tulleriinneqarnera piffissamik aalajangerneqartarpoq.

Soorlu akileraaruseriffik utertitsinermut atatillugu ilanngaataasinnaasunik akiligassaqarfigineqarpat, ilanngaatissat taakku ilanngartuisussamut akiligassanit salliutillugit ilanngaatigineqassapput, ilanngaaneq piffissaq utertitsivigineqartussap ilanngartuinissamik nalunaarummik tigusaqarfia sioqqullugu pippat.

Taamatuttaaq ippoq utertitsivigineqartussap utertinneqarsinnaasut ilanngartuisoqartinnagu inummut pingajuusumut nuunneqartussanngortissimappagit, imaluunniit akiliisitsiniartarnermik oqartussaasut ilanngartuisoqartinnagu arsaarinnissuteqarsimappata, taava ilanngartuisussap taakku ataqqissavai aningaasallu sinnerussimasinnaasut naammagalugit. Ilanngartuisoqareersoq taamatut iliortoqarpat nuussivigineqartussap arsaarinnittussalluunniit ilanngartuisup pisinnaatitaaffii ataqqissavaat.

Ilanngartuisinnaatitaanerup atorneqareersup akiitsullip akiliisinnaajunnaarneranut atatillugu atuutitiinnarneqarsinnaanera akiliisinnajunnaarneq pillugu inatsisini atorunnaarsitsisinnaanermut maleruagassat nalinginnaasut tunngavigalugit aalajangerneqartariaqarpoq.

Utertitassat ilanngartuisinnaatitaasup akileqqusaanut tamakkiisumik ilaannakortumilluunniit matussutigineqareersut utertitsivigineqartussamut tunngatillugu akileraarutinut akitsuutinullu aaqqiissuteqartoqarpat, akileraarutinut akileqqusaasinnaasut ilanngartuisumut piumasaqaataasinnaanngillat, taamaallaalli utertitsivigineqartussamut.

Imm. 2-mi siunnersuutigineqarpoq akileraaruseriffiup akileraartartoq ilanngartuineq pillugu nalunaarfigissagaa. Tamassuma kinguneraa kommunip ilanngartuisinnaatitaanermik atuiniartup akileraaruseriffik saaffigissagaa, taassumalu taava utertitsivigineqartussaq piumasaqaateqarnermut atatillugu ilanngartuisoqarneranik nalunaarfigissagaa. Kommunip akileraaruseriffimmut saaffiginninnera ukiup ingerlanerani qaqugukkulluunniit pisinnaavoq.

Tassa nalinginnaasumik imaalissaaq ilanngartuinermik nalunaarut inaarutaasumik naatsorsuummut ilanngullugu nassiunneqartassalluni imaluunniit utertitsivigineqarnissamik qinnuteqaateqarnerup aalajangiiffigineqarneranik nalunaaruteqarnermut atatillugu nassiunneqartassalluni.

Nr. 2-mut
Siunnersuutigineqarpoq inatsisartut inatsisaanni § 9-mi oqaaseq "Akileraartarnermut Pisortaqarfiup" imatut allanngortinneqassasoq "akileraaruseriffik".

§ 11-mut

Inatsisartut inatsisaat atuutilissaaq 1. januar 2007.