16. oktober 2006 UKA 2006/29
Allannguutissatut siunnersuut
uunga
Uunga siunnersuut: Akileraaruserinermik ingerlatsineq pillugu Inatsisartut inatsisissaannut nr.xx, xx 2006-imeersumut siunnersuut
Aappassaaneerinissamut Naalakkersuisunit saqqummiunneqartoq.
§ 1-imut
1. § 13-imi imm. 8 nutaatut ilanngunneqassaaq:
"Imm. 8. Akileraarutit, matumanittaaq ilaatigut akileraarutissat sinneri, tapiliussat, akitsuutit aammalu erniat, ukiumi akileraarusiiffimmi imaluunniit tulliani siumoortumik akileraarutaagallartunut ilanngullugit akileqquneqarnissaannut maleruagassanik Naalakkersuisut aalajangersaasinnaapput. Tamatumuuna siumoortumik akileraarutit akileriigassaagaluit ernialersorneqartarnerannut taarsiullugu akileraarutaagallartunut ilanngullugit tapiliussat akileqquneqarsinnaanerat Naalakkersuisut aalajangersarsinnaavaat."
§ 24-imut2. § 24, imm. 4, atorunnaarpoq.
Imm. 5-7 matuma kingorna imm. 4-6-inngorput.3. § 24, imm. 7, kingorna imm. 6-nngortumi imm. 3-6-imut" allanngortinneqassaaq uunga: imm. 3-5-imut".
§ 40-imut4. § 40, imm. 9, oqaasertalerneqassaaq imatut:
"Imm. 9. Akileraarutit imm. 1-imiit 8-mut taaneqartunut kiisalu taakkununnga ernialiussat tapiliussallu akilerneqannginnerisigut annaasat Landskarsip kommunillu akornanni agguataarneqassapput. KANUKOKA tusarniaavigereerlugu annaasat agguataarneqarnissaat pillugu maleruagassanik Naalakkersuisut aalajangersaasinnaapput.
Siunnersuummut oqaaseqaatit
Oqaaseqaatit nalinginnaasut
2007-imut ataatsimoortumik tapiissutissat KANUKOKA-p Naalakkersuisullu akornanni isumaqatigiinniutigineqarneranni KANUKOKA-p piumasaqaateqarneratigut isumaqatigiissutigineqarsimavoq akileraarutit A-t, akileraarutissat sinnerinut il.il. annaasat maannamutut landskarsip kommunillu akornanni agguataarneqartassasut. Inatsisissatut siunnersuummi siunniunneqarpoq annaasat taakku taamaallaat landskarsimit nammanneqassasut, tassunga illuatungiliullugu kommuninut ataatsimoortumik tapiissutit 15 mio. kr.-inik ikilineqassallutik. Kommunit tungaanniit oqaatigineqarpoq annaasat taakku agguataarinikkut, agguataarisarnerup ingerlaannarnissaa pitsaanerpaasoq. Kommuninit kissaatigineqartup taassuma itigartinneqarnissaanut Naalakkersuisut tunngavissarsisinnaasimanngillat.
Akileraaruserinermik ingerlatsineq pillugu inatsisartut inatsisissaattut siunnersuutip akuersissutigineqarnerata malitsigisaanik nalunaarutissap suliarineqartup suliarineqarnerani paasineqarpoq siunnersuummi § 24, imm. 4-p § 13-imut nuunneqarnissaa pitsaanerpaassasoq, tamatumalu peqatigisaanik taassuma atuuffia akileraarutinut tamanut atuuttussanngorlugu annertusineqarnissaa. Tamatuma kingorna aalajangersakkakkut periarfissaqalissaaq akileraarutit siumoortumik akileraarutaagallartunut ilanngullugit akileqquneqartarnissaasa nalunaarutikkut aalajangersaavigineqarsinnaanera. Tamatumuuna akileraarutinut akiitsut amerlassutsimikkut ikilisarneqassapput akileraarutinullu akiitsut akileqquneqartarnerat pillugu allaffissorneq killiliivigineqassalluni.
Aalajangersakkanut ataasiakkaanut oqaaseqaatit
Nr. 1-imut
Siunnersuutigineqarpoq akileraarutit ukiumi akileraarusiiffiusumi imaluunniit tulliani siumoortumik akileraarutaagallartunut ilanngullugit akileqquneqarnissaannut maleruagassanik aalajangersaanissamut Naalakkersuisut piginnaatinneqassasut. Aalajangersagaq, siusinnerusukkut suli atuutsinneqarsimanngitsoq, periarfissiivoq akileraartartut akileraarutissat sinnerinut il.il. assersuutigalugu 15.000 kr.-it tikillugit akiliisannginnissaasa nalunaarutikkut aalajangersarneqarnissaanut. Tassunga taarsiullugu akileraarutit taakku ukiumi akileraarusiiffiusumi imaluunniit tulliani siumoortumik akileraarutinut ilanngullugit akileqquneqartalissapput, tamannalu pisassaaq akileraartartunut ilanngaataatinneqartartup annikillisinneqarneratigut. Periutsimik taassuminnga atuinikkut pisariaqarnera naapertorlugu akileraartartoq naammaginartunik aningaasanik atugassaqartitaasussaavoq, taamaalilluni akileraartartoq taassumalu inoqutai angerlarsimaffeqarsinnaallutillu inuussutissaqarsinnaassapput (inuup pisariaqartitsinera artukkernagu).
Maleruagassanik aalajangersaanikkut ilaatigut akilerutit assigiinngitsut sorliit qanoq tulleriiaarneqarlutik siumoortumik akileraarutaagallartunut ilanngullugit akileqquneqartassanersut aammalu ernialersuinermut taarsiullugu tapiliussanik akileeqqusisalernissaq Naalakkersuisut aalajangersaavigisinnaalissavaat.
Nr. 2-imut aamma nr. 3-imut.Nr. 1-imi siunnersuutaasup kingunerisaanik § 24, imm. 4 atorunnaarpoq. Aamma allannguutip kingunerisaanik allannguuteqartitsinissaq § 24, imm. 7, imm. 6-inngortussamut pisariaqarpoq allannguuteqartinneqarnissaanik.
Nr. 4-imut.Isertitanit akileraarutit pillugit annaasat landskarsip kommunillu akornanni agguataarneqartarnissaat siunnersuutigineqarpoq aammalu annaasat taakku agguataarneqartarnissaat pillugu KANUKOKA tusarniaavigereerlugu maleruagassanik erseqqinnerusunik aalajangersaanissamut Naalakkersuisut piginnaatinneqassasut siunnersuutigineqarluni.
Agguataarineq pissaaq akileraarutinit kommunit aamma landskarsip pissarsiassaasa annertussusaat aallaavigalugu.
Tusarniaanissamut pisussaaffeqarnerup kingunerissavaa, Naalakkersuisut suliassaqarfimmut aalajangersakkanik nalunaarusiulinnginneranni KANUKOKA pineqartunut oqaaseqaateqartarnissaa pisinnaanngussammat.