11. august 2006 6. marts 2006

UKA 2006/9 UPA 2006/14

 

Uunga siunnersuut: Sulisoqarnermut akitsuut pillugu Inatsisartut inatsisaat nr. xx, xx. xxxx 2006-imeersoq

 

Akitsuummik akiliisussaatitaasut

§ 1. Sulisitsisut il.il. kikkulluunniit aningaasarsiat A-t akileraarutaannik Aningaasarsianit akileraarutit pillugit Inatsisartut inatsisaanni § 38, tak. § 39, naapertorlugu unerartitsisussaatitaasut inatsimmi matumani aalajangersakkat naapertorlugit sulisoqarnermut akitsuummik landskarsimut akiliuteqartussaapput.
Imm. 2. Akitsuummik akiliisussaatitaasunut ilaanngillat naalagaaffik naalagaaffiullu suliffeqarfiutai.
Imm. 3. Sulisitsisut Kalaallit Nunaanni atortussiassat aatsitassanit pisut il.il. pillugit inatsit naapertorlugu aatsitassanik iluaqutiginninniarsinnaanermut akuersissuteqarfigineqarsimasut akitsuummik akiliisussaatitaanerat atorunnaassaaq tamanna pisinnaatitaaffeqalersumut akuersissummi allassimappat.

 

Akitsuutip naatsorsornera

§ 2. Sulisoqarnermut akitsuut akissarsiarititat katinnerisa 0,9 pct.-iattut annertussuseqarpoq.
Imm. 2. Akissarsiarititat katinnerat tassaavoq inuit Kalaallit Nunaanni tamakkiisumik akileraartussaatitaasut sulisussarsiarineqarsimallutik nammineerlutik sulinerannut aningaasanngorlugit akissarsiatut tunniunneqartut suulluunniit katinnerat, matumani ilanngullugit akissarsiat, feeriarnersiat, honorarit, iluanaarutinit kajumissaatitut tapisiat, kiffartulussinnarnaveeqqutisiat akiliutillu taakkua assigisaat.
Imm. 3. Akissarsiarititat katinnerannut imm. 1-imi taaneqartumut ilaapputtaaq siulersuisunut, ataatsimiititalianut, kommissioninut assigisaannullu Kalaallit Nunaanni angerlarsimaffeqartunut ilaasortaanermi ikiortaanermiluunniit akissarsiat.
Imm. 4. Akissarsiarititat katinnerisa imm. 2 malillugu naatsorsorneranni ilanngunneqassanngillat aningaasat sulisitsisumit aaqqissuussinernut, aningaasarsianit akileraarutit pillugit Inatsisartut inatsisaanni § 17 b-mi aamma § 17 c-mi taaneqartunut akilerneqartut.

 

Akitsuutip akilersinneqarnera

§ 3. Piffissaq akitsuummik akiliiffiusoq tassaavoq qaammat.

§ 4. Suliffeqarfiup akitsuummik akiliisussaatitaasup qaammatit naaneri tamaasa, kingusinnerpaamillu qaammammi tulliuttumi ulluinnarmi kingullermi, kommunimut (sulisitsisutut kommuni) suliffeqarfiup angerlarsimaffigisaanut, akissarsiarititat akitsuummik akiliuteqaataasussat katinnerat kiisalu taakkua akitsuutitassaat nalunaarutigissavai.
Imm. 2. Suliffeqarfinnut kommunit aggornerisa avataanniittunut imaluunniit Kalaallit Nunaata avataaniittunut sulisitsisutut kommuni tassaavoq Akileraartarnermut Pisortaqarfik.
Imm. 3. Nalunaaruteqarneq immersuiffissat Akileraartarnermut Pisortaqarfimmit suliarineqarsimasut atorlugit pissaaq.

§ 5. Akissarsiarititat akitsuummik akiliuteqaataasussat katinnerisa akitsuutitaat qaammatip tulliuttup ulluisa aallaqqaataanni akiligassanngussaaq, ulloq piffissaagallartillugu akilerneqarfissaa kingulleq tassaalluni qaammammi akilerneqarfissaani ulluinnaq kingulleq.
Imm. 2. Sulisitsisutut kommunimut akiliisoqassaaq.
Imm. 3. Akitsuut piffissaagallartillugu akilerneqanngippat qaammatip akiligassanngorfiata ulluisa aallaqqaataat aallarnerfigalugu qaammatit aallartinneri tamaasa qaammammoortumik ernialiussaq 1 pct.-i akilerneqassaaq.
Imm. 4. Erniat landskarsip pisassarai.

§ 6. Suliffeqarfiup akitsuummik akiliisussaatitaasup Akileraartarnermut Pisortaqarfik sulisitsisutut kommunerinngikkaluarlugu akitsuummik Akileraartarnermut Pisortaqarfimmut nalunaarutiginnillunilu akiliinissaa Naalakkersuisut akuersissutigisinnaavaat.

§ 7. Sulisitsisutut kommunip suliffeqarfik piffissaagallartillugu akiliinngitsoq peqqusinnaavaa piffissaq qaammammit ataatsimit sivikinnerusoq pillugu nalunaarummik tunniusseqqullugu.
Imm. 2. Aammattaaq sulisitsisutut kommunip suliffeqarfik piffissaagallartillugu akiliinngitsoq peqqusinnaavaa akiliiffissatut piffissaliussamit § 5, imm. 1-imi taaneqartumit sivikinnerusumik piffissaqarluni akileeqqullugu.

§ 8. Suliffeqarfik sulisitsisutut kommunimut eqqunngitsumik nalunaaruteqarsimasoq, taamaalillunilu akitsuummik mikivallaamik akiliisimasoq paasineqarpat, aningaasat akiligassaalersut , § 5, imm. 3 malillugu pillaammik ernialiunneqarsimasinnaasut ilanngullugit peqqusinermiit kingusinnerpaamik ullut 14-it qaangiunneranni akilerneqassapput.
Imm. 2. Suliffeqarfik akitsuummik angivallaamik akiliisimasoq paasineqarpat aningaasat utertinneqassapput.
Imm. 3. Nalunaarut piffissaagallartillugu nassiunneqanngippat, imaluunniit suliffeqarfiup akitsuummut akiligassaata annertussusissaa suliffeqarfiup naatsorsuutai tunngavigalugit naatsorsorneqarsinnaanngippat, sulisitsisutut kommunip akitsuut akiligassaq missingersorlugu angissusilersinnaavaa.
Imm. 4. Pisuni imm. 1-imi 3-imilu taaneqartuni akitsuut piffissaagallartillugu akilerneqanngippat qaammatip akiligassanngorfiata ulluisa aallaqqaataat aallarnerfigalugu qaammatit aallartinneri tamaasa qaammammoortumik ernialiussaq 1 pct.-i akilerneqassaaq.
Imm. 5. Erniat landskarsip pisassarai.

 

Naammagittaalliornissamut aalajangersakkat

§ 9. Sulisitsisutut kommunip inatsit manna naapertorlugu aalajangigai pineqartup, aalajangiinermik taassuminnga ilisimatinneqarneraniit sapaatip akunneri sisamat qaangiutsinnagit Skatterådimut naammagittaalliuutigineqarsinnaapput.
Imm. 2. Skatterådip aalajangigai pineqartup, aalajangiinermik taassuminnga ilisimatinneqarneraniit sapaatip akunneri sisamat qaangiutsinnagit Kalaallit Nunaata Eqqartuussivianut suliarinnittussamut siulliusumut suliassiissutigineqarsinnaapput. Suliassiissutigineqartut tassaapput Naalakkersuisut.

 

Nakkutilliineq pillugu aalajangersakkat

§ 10. Akitsuummik akiliisussaatitaasup akissarsiarititat tunniunneqartut katinnerat, akitsuutip naatsorsorneqarnissaani kiisalu akitsuutip akilerneqarneranik nakkutilliinermi tunngaviusussaq naatsorsuusiugassaraa.
Imm. 2. Naatsorsuusiorneq pillugu maleruagassat erseqqinnerusut Naalakkersuisunit aalajangersarneqarsinnaapput.

§ 11. Sulisitsisutut kommuni suliffeqarfinni inatsimmi pineqartuni misissuisinnaatitaavoq, aammalu suliffeqarfiup niuernermini allattaaviinik, naatsorsuutaanik allanik kiisalu allakkatigut attaveqaqateqarneranik takunnissinnaatitaalluni.
Imm. 2. Paasissutissat imm. 1-imi taaneqartut sulisitsisutut kommunip qinnuteqarneratigut tassunga tunniunneqassapput nassiunneqarlutilluunniit.
Imm. 3. Suliffeqarfiup piginnittui inuillu suliffeqarfimmi atorfeqartinneqartut, misissuinerit imm. 1-imi taaneqartut ingerlanneqarneranni sulisitsisutut kommunimut pisariaqarnera malillugu ilitsersuillutillu ikiuutissapput.
Imm. 4. Naatsorsuutit il.il. inummi pingajuusumiippata taanna, taakkuninnga tunniussinngikkallarsinnaatitaagaluaruniluunniit paasissutissanik sulisitsisutut kommunimut, taamaaliortoqarpat paasissutissat atorneqareerneranni inummut pingajuusumut tassunga utertitsisussamut, tunniussissaaq.

§ 12. Pisortat oqartussaasut qinnuigineqarnermikkut sulisitsisutut kommuni paasissutissanik sunilluunniit, suliffeqarfiit inatsimmi pineqartut nalunaarsorneqarnissaannut nakkutigineqarnissaannullu atugassanik nalunaarfigissavaat.

 

Allaffissornermi malittarisassat

§ 13. Inatsisip matuma atuutsinneqarnissaa pillugu maleruagassat erseqqinnerusut Naalakkersuisunit aalajangersarneqarsinnaapput, matumani ilanngullugit kommunit akitsuummik pillaammillu ernianik landskarsimut akiliisarnissaat pillugu aalajangersakkat.

 

Pineqaatissiinerit

§ 14. Pillaammik akiliisinneqassaaq kinaluunniit piaaraluni mianersuaalliorujussuarluniluunniit:
1) Paasissutissanik akitsuutip nakkutigineqarnissaanut atugassanik eqqunngitsunik paasinerlunneqarsinnaasunilluunniit paasissutissiisoq imaluunniit paasissutissanik nipangiussiinnartoq.
2) Akitsuutip missingersuinikkut angissusilerneqarsimasup, tak. § 8, imm. 3, pineqartumut ilisimatitsissutigineqarneraniit kingusinnerpaamik sap.ak. sisamat qaangiunneranni taassuma appasippallaarneranik sulisitsisutut kommunimut ilisimatitsinngitsoq.
3) § 4, imm. 1-imik, § 5, imm. 1-imik, imaluunniit § 11, imm. 2-miit 4-imut unioqqutitsisoq.
4) § 7, imm. 1 aamma 2 naapertorlugit peqqussinermik malinninngitsoq.
Imm. 2. Inatsit naapertorlugu maleruagassiornikkut kinaluunniit maleruagassiani aalajangersakkanik piaaraluneerluni mianersuaalliorujussuarluniluunniit unioqqutitsisoq akiliisinneqarsinnaavoq.
Imm. 3. Imm. 1-imi 2-miluunniit taaneqartut arlaat aktieselskabimit, anpartsselskabimit, andelsselskabimit, peqatigiiffimmit, suliffeqarfimmit imminut ingerlattumit, aningaasaateqarfimmit assigisaannilluunniit unioqqutinneqarpat inatsisit malillugit inuttut isigineqarsinnaasoq taanna akiliisinneqarnissamut akisussaatinneqarsinnaavoq. Namminersornerullutik Oqartussat, kommuni kommunilluunniit suleqatigiiffiat unioqqutitsisimappat Namminersornerullutik Oqartussat, kommuni kommunilluunniit suleqatigiiffiat akiliisinneqarsinnaavoq.
Imm. 4. Akiliisitsissut landskarsip pisassaraa.

§ 15. Naalakkersuisut inatsimmi matumani aalajangersakkanik unioqqutitsisoq nalunaarfigisinnaavaat suliassap eqqartuussinertaqanngitsumik naammassineqarsinnaaneranik, unioqqutitsisup unioqqutitsinini nassuerutigippagu akiliisitsissullu nalunaarummi taaneqartoq piffissaq aalajangersimasoq, qinnuteqarnikkut sivitsorneqarsinnaasoq nallertinnagu akilerumallugu akuersippat.
Imm. 2. Nalunaarummut imm. 1-imi taaneqartumut tunngatillugu aalajangersakkat eqqartuussisarnermi inatsimmi unnerluussinermik imaqartut aammattaaq atuupput.
Imm. 3. Akiliisitsissut piffissaq eqqorlugu akilerneqarpat imaluunniit aalajangiunneqarnermi kingorna akiliisitsiniarnikkut akilersinneqarpat qanoq iliuuseqaqqittoqassanngilaq.

 

Aalajangersakkat atuutilersitsisuusut ikaarsaarutaasullu

§ 16. Inatsisartut inatsisaat ullormi 1. januar 2007-imi atuutilissaaq.
Imm. 2. Tassunga ilutigitillugu atorunnaarsinneqassaaq Inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaat nr. 16 ulloq 23. november 1989-imeersoq.
Imm. 3. Taamaattorli Inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaanni nr. 16 ulloq 23. november 1989-imeersumi maleruagassat maannamut atuuttut akiliutinut piffissamut 1. januar 2004-miit 31. december 2006-imut tunngasunut atuutiinnassapput, soorluttaaq akiliutit akilerneqarsimanngitsut suli akiliisitsiniarnikkut akilersinniarneqarsinnaasut.
Imm 4. Ilinniagaqarnersiutit pillugit Inatsisartut peqqussutaanni nr. 5, 14. november 2004-meersumi § 5, imm. 1-imi oqaaseqatigiit aappaat pingajuilu atorunnaarsinneqassapput.

Namminersornerullutik Oqartussat, ulloq xx. xxxx 2006

Hans Enoksen

/

Josef Motzfeldt