19. maj 2006

UPA 2006/96

 

Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata allanngortinneqarneranik Inatsisartut inatsisissaattut siunnersuut kiisalu Inatsisartuni Naalakkersuisunilu ilaasortat aningaasarsiaqartitaanerat il.il. pillugu Inatsisartut inatsisaata allanngortinneqarneranik Inatsisartut inatsisissaattut siunnersuut


pillugu


Inatsisartut Suleriaaseq pillugu Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

 

Inatsisartut Suleriaaseq pillugu Ataatsimiititaliaat ulloq 11. maj 2006-imi suliarinninnermini ukuninnga inuttaqarpoq:

 

Inatsisartut Siulittaasuat Jonathan Motzfeldt, Siumut, siulittaasoq
Inatsisartunut ilaasortaq Agathe Fontain, siulittaasup tullia siulleq, Inuit Ataqatigiit
Inatsisartunut ilaasortaq Ellen Christoffersen, Augusta Sallingimut sinniisussaq , Atassut
Inatsisartunut ilaasortaq Astrid Fleischer Rex, Per Berthelsenimut sinniisussaq, Demokraatit
Inatsisartunut ilaasortaq Vittus Mikaelsen, Ruth Heilmannimut sinniisussaq, Siumut
Inatsisartunut ilaasortaq Anthon Frederiksen, Kattusseqatigiit Partiiat


Ulloq 16. maj 2006-imi suliarinninnermi ataatsimiititaliaq ukuninnga inuttaqarpoq:

Inatsisartut Siulittaasuat Jonathan Motzfeldt, Siumut, siulittaasoq
Inatsisartunut ilaasortaq Agathe Fontain, siulittaasup tullia siulleq, Inuit Ataqatigiit
Inatsisartunut ilaasortaq Otto Steenholdt, Augusta Sallingimut sinniisussaq, Atassut
Inatsisartunut ilaasortaq Palle Christiansen, Per Berthelsenimut sinniisussaq, Demokraatit
Inatsisartunut ilaasortaq Ruth Heilmann, siulittaasup tulliata sisamaat, Siumut
Inatsisartunut ilaasortaq Anthon Frederiksen, Kattusseqatigiit Partiiat

 

UPA 2006-imi siullermeerinerup kingorna aalajangiiffigisassatut siunnersuut Inatsisartut Suleriaaseq pillugu Ataatsimiititaliaata misissorpaa.


Siunnersuutip imarisaa

Naalakkersuinikkut sulinermut aningaasatigut tapiissuteqartarnerup allanngortinneqarnissaanik kiisalu aningaasarsiaqartitsinermut inatsisip allanngortinneqarnissaanik siunnersuutikkut suliarineqartukkut aaqqissuussinermi maanna atuuttumi makku allanngortinneqarnissaat siunnersuutigineqarpoq:

Taamaalilluni Kalaallit Nunaanni paasisassarsiorluni angalanissanut katillugit 1.500.000 kr.-it Inatsisartut kontoanni immikkoortinneqassapput. Siunertaq nalunaarlugu angalanissamut missingersuut tunngavigalugu akiliunneqarnissamik qinnuteqaateqarnikkut, angalanerullu kingorna Inatsisartut Allattoqarfiannut naatsorsuusiornikkut aningaasat taakku partiinit ataasiakkaanit atorneqarsinnaapput. Paasisassarsiorluni angalasarnerit pillugit aaqqissuussinermik manna tikillugu atuuttumik taama allannguineq 2006-imi aningaasanut inatsisikkut ukiunilu missingersuusiorfiusuni naatsorsuutigeriikkat saniatigut landskarsimut artukkiissanngilaq.

Partiinut ukiumut tunngaviusumik 300.000 kr.-inik tapiissuteqartarnissamik siunnersuut Inatsisartut maanna katitigaanerat naapertorlugu ukiumut 1.500.000 kr.-inik aningaasartuuteqarnerunissamik kinguneqassaaq.

Ilaasortamut ataatsimut ukiumut maanna tapiissutigineqartartut 100.000 kr.-init 125.000 kr.-inut qaffanneqarnissaannik siunnersuut ukiumut 775.000 kr.-inik aningaasartuuteqarnerunissamik kinguneqassaaq.

Taamaalilluni naalakkersuinikkut sulinermut aningaasatigut tapiissutit ukiumi aningaasanut inatsisip atuuffiani 2007-imi 2.275.000 kr.-iussapput. Siunnersuutigineqartutut inatsisip 1. juni 2006-imi atuutilerneratigut qaammatisiutit ukiuaannut sanilliullugu 7/12-lisut naatorsoraanni naalakkersuinikkut sulinermut aningaasatigut tapiissutinut ukiup aningaasanut inatsisip atuuffiata 2006-ip sinnerani aningaasartuutaanerusussat 1.327.000 kr.-iussapput.


Inatsisartut siunnersuummik siullermeerinerat.

Amerlanerussuteqartut Siumumeersut, Inuit Ataqatigiinneersut Atassummeersullu siunnersuut maanna ilusimisut iluseqartoq taperserpaat.

Ikinnerussuteqartut Demokraatineersut Kattusseqatigiit Partiianneersullu siunnersuut tapersinngilaat.


Ataatsimiititaliami suliarinninneq.

Partiit kattuffiinik Inatsisartunilu sulinermut atatillugu taakku sulinerannik patajaallisaanissamik siunnersuutigineqartup aningaasalersornissaanut apeqqut siunnersuummik suliarinninnermini ataatsimiititaliap pingaarnerutillugu suliaraa.

Ukiup aningaasanut inatsisip atuuffia 2006.

Siunnersuutip kingunerisaanik 1. junimit ukiup sinneranut aningaasartuutaanerussutissat 1.327.000 kr.-inik annertussuseqartut Inatsisartut 2006-imi missingersuutissaattut akuersissutigineqartunit sipaaruteqarnikkut aningaasalersorneqarnissaannut periarfissat ataatsimiititaliamit misissorneqarput.

Inatsisartoqarfiup allilerneqarnissaanik sanaartornissamut pilersaarutip piviusunngortinneqarnissaanut atatillugu allaffiit nuutsinneqarnissaannut ininillu avataanit attartornissamut Inatsisartut 2006-imi missingersuutaanni aningaasanik immikkoortitsisoqarpoq. Sanaartornerup ingerlanneqarnissaanut piffissaliussatut pilersaarutit allanngornerat pissutigalugu aningaasartuut taanna 2006-imi aningaasartuutigineqassanngilaq.

2006-imi Inatsisartut ataatsimiinnerisa ataatsimiititaliamilu sulinerup ingerlanneqarnerata kingunerisaannik ataatsimiititaliat 2006-imi angalanissaannut aningaasaliunneqarsimasut sipaaruteqarfiunissaat naatsorsuutigineqarpoq.

Ukiumi aningaasanut inatsisip atuuffiani 2006-imi aningaasartuutaanerussutissatut naatsorsuutigineqartut kontomi pingaarnermi 01.10.10-mi, Inatsisartunut tunngasumi, aningaasaliissutit 1.327.000 kr.-inik ikilisinnerisigut kontomilu pingaarnermi 01.06.11-mi, Naalakkersuinikkut suliniaqatigiiffinnut aningaasatigut tapiissuteqarnermut tunngasumi, aningaasaliissutit taakku amerlaqataannik amerlineqarnerisigut aningaasalersorneqarsinnaapput.

Siunnersuut akuersissutigineqassappat maanna aningaasaliissutaasuni allannguutissat taaneqartut piviusunngortinneqassasut ataatsimiititaliami amerlanerussuteqartut inassutigaat.

Ukiup aningaasanut inatsisip atuuffia 2007.

Ukiup aningaasanut inatsisip atuuffianut 2007-imut ataatsimiititaliap missingersuutinut ilanngussaa katillugu annertunerpaamik 2,5 procentimik qaffaasoqarnissaanik kaammattuummik eqquutsitsisoq suliarineqarpoq.

Partiit akunnermiliuttunngortinnerisigut paasisassarsiorluni angalanernik atorluaanerunissamik naatsorsuutiginninneq naapertorlugu ukiumi aningaasanut inatsisip atuuffiani 2006-imi taaneqartutut aningaasaliissutinik ikililerinerup kingorna 2006-imi atorneqartussatut naatsorsuutigineqartut annertoqataannik ataatsimiititaliat angalanissaannut ataatsimoortumik aningaasaliissutit annertussusilerneqarsinnaasut ataatsimiititaliami amerlanerussuteqartut isumaqarput.

Inatsisartunut ilaasortanut immikkut naatsorsuullugit inissianik atugassiissutiginninnissaq pillugu Inatsisartut Naalakkersuisunut isumaqatigiissutaata sunniutissaatut naatsorsuutigisat naapertorlugit utaqqiisaasumik ineqartitsigallarnermut pequtanillu toqqortaatiginiinnermut ukiumoortumik sipaaruteqarnissaq naatsorsuutigineqarpoq.

Partiit kattuffiinik annertuumik nukittorsaaneq Inatsisartut Allattoqarfianni sulinerunerup annikilleriarneranik kinguneqassasoq naatsorsuutigineqarpoq. Taama naatsorsuutiginninneq eqquutsinneqassappat ilaasortat siunnersuutaannut atatillugu suliassat siunnersuutinik tunniussivissatut killigititaq sioqqullugu naammassereerneqarsimasariaqarput. Partiit allattoqarfiisa Inatsisartullu Allattoqarfiata akornanni suleqatigiinnermi suleriaatsip pitsanngornissaa aamma naatsorsuutigineqarpoq, ataatsimut isigalugu annertuumik sipaaruteqarnissamut tunngaviliisinnaasumik.

2006-imi aningaasanut inatsimmut sanilliullugu kontomut pingaarnermut 01.06.11-imut, Naalakkersuinikkut suliniaqatigiiffinnut aningaasatigut tapiissuteqarnermut tunngasumut, missingersuutinut ilanngussakkut aningaasaliissutigineqartut 2.275.000 kr.-inik amerlineqarnissaat ataatsimiititaliami amerlanerussuteqartunit inassutigineqarpoq.

Naalakkersuinikkut suliniaqatigiiffinnut aningaasatigut tapiissutinik taaneqartutut qaffaanermut aningaasalersuutissatut kontomi pingaarnermut 01.10.10-p Inatsisartunut tunngasumut, missingersuutinut ilanngussakkut aningaasaliissutigineqartut 900.000 kr.-inik ikilineqassasut kontolu pingaarneq 01.01.01, Inatsisartut Allattoqarfiannut tunngasoq, 1.375.000 kr.-inik ikilineqarluni.

Amerlanerussuteqartut oqaaseqaataat.

Amerlanerussuteqartut Siumumeersut, Inuit Ataqatigiinneersut Atassummeersullu siunnersuummut tunngatillugu oqaatigissavaat siunnersuummi aningaasanik taaneqartunik naalakkersuinikkut sulinermut aningaasatigut tapiissutinik pissarsinissaq partiinut ataasiakkaanut piginnaatitaaffiusoq. Taamaattorli tapiissutigineqarsinnaasutut periarfissiissutaasut tamakkerlugit tigunissaannut partiit ataasiakkaat soorunami pisussaaffeqanngillat. Partiit naalakkersuinikkut sulinermut aningaasatigut tapiissutinik ikinnerusunik pissarsinissamik kissaateqartut tapiissutinik pissarsinissamik qinnuteqarnerminni tamanna nalunaarutigiinnassavaat. Taamaaliornermi tapiissutit tunniunneqanngitsoortut landskarsimut nakkartinneqassapput


Ikinnerussuteqarluni oqaaseqaat.

Ikinnerussuteqartut Demokraatit ima ikinnerussuteqarlutik oqaaseqaateqarput:

Partiinut tapiissuteqartarneq pillugu maleruagassat ullumikkut atuuttut imaapput partiit ataasiakkaat Inatsisartunut ilaasortaatitaasa amerlassusiat apeqqutaatillugu partiit tapiissuteqarfigineqartarlutik. Taamaalillutik partiit Inatsisartunut ilaasortamut ataatsimut ukiumut 100.000 kroninik pissarsisarput.

Inatsisartut 31-inik ilaasortaqarmata Landskarsimit ukiut tamaasa 3,1 millioner kronit partiinut tapiissutigineqartarput.

Partiit angisuut Inatsisartunut amerlasuunik ilaasortaatitaqartut maanna aaqqissuussinikkut annertuumik iluaqutissinneqartarput. Partiinut mikinerusunut annertunerusumik iluaqutissanngorlugu partiinut tapiissutip allanngortinneqarnissaa Demokraatinit kissaatigineqarneruvoq.

Taamaattumillu partiit Inatsisartunut ilaasortaatitaqartut tamarmik partiip qassinik ilaasortaatitaqarnera apeqqutaatinnagu ukiumut 200.000 kroninik pissarsisartunngorlugit partiinut tapiissutit allanngortinneqassasut Demokraatit isumaqarput. Tamatuma saniatigut partiit Inatsisartunut ilaasortaatitaqartut tamarmik ilaasortamut ataatsimut 60.000 kroninik partiinut tapiissutitut pissarsisinneqartassapput. Taama aaqqissuussinikkut partiit mikinerusut Inatsisartunut tallimat inorlugit ilaasortaatitaqartut partiinut anginerusunut pisariaqartinneqartumik unammillersinnaanerulersinneqassapput.

Tamatuma saniatigut Inatsisartut maanna katitigaanerat naapertorlugu allannguutissatut siunnersuutigineqartoq Landskarsimut 240.000 kroninik sipaaruteqartitsissammat pingaaruteqarpoq oqaatigissallugu. Missingersuutit qanoq annertussuseqarnerat eqqarsaatigigaanni oqartoqarsinnaagunanngilaq aningaasat amerlasuut pineqartut, taamaaliornikkulli nunatsinni aningaasaqarneq mianernaqisoq pitsanngortinniarlugu sorsuutiginninnermi naalakkersuinikkut suliaqartuusugut sallersaajumanerput inuiaqatigiinnut oqariartuutigissavarput.


Kattusseqatigiit Partiiata tapersiinera.

Demokraatit ikinnerussuteqarlutik oqaaseqaateqaatitut saqqummiussaat Kattusseqatigiit Partiiannit isumaqataafigineqarpoq.

Ataatsimiititaliap inassuteqaataa.

Amerlanerussuteqartut Siumumeersut, Inuit Ataqatigiinneersut Atassumeersullu siunnersuummik aningaasalersuutissatut isumaliutissiissummi taaneqartut ilanngullugit siunnersuut maanna iluserisamisut iluseqartoq akuersissutigineqassasoq inassutigaat.

Ikinnerussuteqartut Demokraatineersup Kattusseqatigiillu Partiianneersup siunnersuut itigartitsissutigineqassasoq inassutigaat.

 

Jonathan Motzfeldt
Siulitaasoq

Agathe Fontain
Otto Steenholdt

Palle Christiansen


Ruth Heilmann

Anthon Frederiksen