7. april 2006

UPA 2006/96

 

Inatsisissatut siunnersuummut nassuiaatit

Nalinginnaasumik nassuiaatit

1. Aallaqqaasiut:

Kalaallit Nunaanni inatsisiliortutut sulinerup pitsaassusiata Inatsisartuni ilaasortat ataasiakkaat kiisalu partiit ilaasortaatitaasa, taakkulu partiimi allattoqarfiisa sulinerisa pitsaassusianut attuumassuteqarluinnartuuvoq. Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaata partiini, kattusseqatigiinni kisimiillutillu qinigassanngortittut allattoqarfiini sulinerup aningaasaqarnikkut tunngavia qulakkeeriffigaa. Sulineq tamanna Inatsisartuni ilaasortat aalajangiinissaannut piareersarnerusoq ataqatigiissaarinerusorlu partiini ataasiakkaani partiillu ilaasortaatitaanni il.il. tamat oqartussaaqataaneranni piumassuseqarnerup pileriartornerani pinngitsoorneqarsinnaanngilaq.

2. Siunnersuummi immikkoortut pingaarnerit:

Siunnersuutip anguniagaa pingaarneq tassa Inatsisartuni ilaasortat ulluinnarni sulinerisa partiinit ukioq naallugu tapersersorneqarneqarnissaanut periarfissat pitsaanerulersinneqarnissaat. Partiini ataasiakkaani partiillu ilaasortaatitaanni il.il. naalakkersuinikkut piumassuseqarnerup pileriartornera tamaalilluni patajaallisarneqassaaq, Inatsisartunullu ilaasortat, tassalu partiini siunnersortitut atorfilinnit namminerisaminnit, annertunerusumik sullinneqarsinnaalissallutik. Partiinut naalakkersuinikkut akuleruteqqunagit Inatsisartut atorfilittaat pisussaaffiligaammata tamanna Inatsisartunut ilaasortat sulinerannut oqalisaataaginnarani naalakkersuinikkut allanut ingerlateqqitassaanngitsumik naalakkersuinermullu tunngassuteqarnerusumik siunnersorneqarnermik aammattaaq ammaassisussaavoq. Partiit allatseqarfiisa naalakkersuinermut tun-ngassuteqarnerusumik sullissisinnaalernissaat taamaalilluni Inatsisartuni partiinik naalakkersuinikkut erseqqinnerusumik malunnartitsilersussaavoq kiisalu partiit naalakkersuinikkut a-nguniagaasa piviusunngortinniarlugit suliarinerat anguniagaqarfiunerusunngortissallugu. Partiittaaq allattoqarfiisa sullissilluarnerulersinnaanerat partiit innuttanut tunngatillugu sulinerata pitsaanerulernissaanik periarfissiisussaavoq, ilanngullugulu qinikkat qinersisartullu akornanni ingerlaavartumik attaveqatigiinneq annertusassallugu.

Partiinut Inatsisartuni ilaasortaatitaqartunut partiinut tapiissutaareersut ilaasortamut ataatsimut maannakkut 100.000 kr.-iniit 125.000 kr.-nut qaffanneqarnissaat siunnersuutigineqarpoq. Taamatuttaaq partiinut, kattusseqatigiinnut kisimiillutilluunniit qinigassanngortillutik Inatsisartuni ilaasortaatitalinnut ilaasortaasunulluunniit ukiumut 300.000 kr.-inik aningaasartalinnik tunngaviusumik tapiissutinik atulersitsisoqassasoq siunnersuutigineqarpoq. Siunissami Inatsisartunut ilaasortaaqatigiit siunnersortimik ataatsimik piffissaq tamakkerlugu sulisuusumik atorfinitsitsinissamut periarfissaqarnissaat minnerunngitsumik tunngaviusumik tapiissutit ani-ngaasartaat taakku partiinut il.il. mikinerpaanut pingaaruteqartussapput.

Inatsisartunut ilaasortat ataasiakkaat paasisassarsiorlutik angalanerinut atugassatut aningaasaliissutit Inatsisartuni ilaasortamut ataatsimut inatsisikkut piginnaatitaaffittut atorunnaartutut pissuseqalernissaa pillugu tamatuma saniatigut aningaasarsiaqarnermut inatsit allanngortinneqassasoq siunnersuutigineqarpoq. Partiit ilaasortaatitaasa aningaasanik taakkunannga siunissami qinnuteqaateqarsinnaanerat ammaanneqassaaq, taakkulu taamaalillutik ilaasortat angalanissaasa piareersarneqarnerini ataqatigiissaarneqarnerinilu peqataatinneqarnerusinnaalissallutik.

Inatsisartuni ilaasortat ataasiakkaat paasisassarsiorlutik angalanissaannut aningaasat atugassanngortitat taamatut allannguinikkut ajorseriaateqarnissaat siunertarineqanngimmat erseqqissarneqassaaq. Akerlianik Inatsisartunut ilaasortat ingerlaavartumik paasisassarsiortarnerisa qinersisartunullu attaveqarnerisa pitsanngorsarneqarnissaa siunertaralugu angalanernut atugassiissutigineqartartut taakku qaffaaviginissaannut periarfissaqartoqalernissaa siunnersuuteqartut kissaatigaat. Tamatumunnga tunngatillugu Inatsisartut sulinerannut atatillugu Aningaasanut Inatsisikkut Inatsisartut missingersuusiorneranni aningaasanik atugassiinissaq aalaja-ngerneqartassaaq.

3. Namminersornerullutik Oqartussanut aningaasaqarnikkut allaffissornikullu kingunerisassat:

Partiinut tapiissuteqartarnermik aaqqissuussinerup allannguutissaatut siunnersuutigineqartoq 2007-mi aningaasanut inatsiseqarfimmit ukiumut aningaasaliiffiusumut kr. 2.275.000-inik aningaasartuuteqarnerussutaalersussaavoq.

Ukiup aningaasaliiffiusup 2006-ip sinnerani katillugit aningaasartuuteqarnerussutissat kr. x.xxx.xxx-iussasut naatsorsuutigineqarpoq. Inatsisartut missingersuutaattut akuersissutigineqareersuni nikisiterinikkut aningaasartuut matussuserneqassasoq naatsorsuutigineqarpoq.

Inatsisartuni ilaasortat ataasiakkaarlutik paasisassarsiorlutik angalanermut inatsisikkut piginnaatitaanerisa atorunnaarsinneqarnissaa landskarsimut sunniuteqartussatut naatsorsuutigineqanngilaq, siunertamut tassunga Inatsisartut maannamutut aningaasanik ukiumut atugassiisarumaartut naatsorsuutigineqarmat. Inatsisartulli ukiumoortumik missingersuusiornerinut atatillugu aningaasat qaffanneqartarnissaat annikillineqartarnissaalluunniit siunissami periarfissaasussaavoq.

4. Inuussutissarsiuteqartunut aningaasaqarnikkut allaffissornikkullu kingunerisassat:

Inuussutissarsiortunut siunnersuut kinguneqaateqartussaanngilaq.

5. Avatangiisinut pinngortitamullu tunngasumik kingunerisassat:

Avatangiisinut pinngortitamullu siunnersuut kinguneqaateqartussaanngilaq.

6. Innuttaasunut allaffissornikkut kingunerisassat:

Innuttanut siunnersuut kinguneqaateqartussaanngilaq.

7. Kingunerisassat allat pingaaruteqartut:

Pingaarutilinnik allanik siunnersuut kinguneqaateqartussaanngilaq.

8. Naalagaaffeqatigiinnermut namminersulernissamullu tunngasut:

Naalagaaffeqatigiinnermut namminersulernissamullu siunnersuut kinguneqaateqartussaanngilaq.

9. Oqartussaasut kattuffiillu tusarniaavigineqarnerat:

Innuttanut inuussutissarsiortunulluunniit siunnersuut kinguneqaateqartussaanngimmat tusarniaassutitut nassiunneqarsimanngilaq.

 

Siunnersuummi aalajangersakkanut ataasiakkaanut nassuiaatit

§ 1-imut

Nr. 1-imut.

Partiinut kattusseqatigiinnullu kiisalu kisimiillutik qinigassanngortittunut Inatsisartuni ilaasortaatitaqartunut ilaasortanulluunniit tunniunneqartussanik naalakkersuinikkut sulinermut ukiumoortumik tapiissutinik, saaffiginninnikkut tunniussisoqartassaaq. Partiimut, kattusseqatigiinnut kiisalu kisimiilluni qinigassanngortittumut ataatsimut 300.000 kr.-inik tapiissutit tunngaviusumik aningaasartaqarput. Taakku saniatigut ilaasortamut ataatsimut ukiumut ani-ngaasat 125.000 kr., partiimut kattusseqatigiinnullunniit imaluunniit kisimiilluni qinigassan-ngortittumut ataatsimut atugassanngortitassat ilaassapput.

Ukiumi qinnuteqaateqarfiusumi ulloq 1. januarimi, inatsimmi atuuttutut pineqartumi § 5, imm. 2 naapertorlugu ilaasortat amerlassusiini allanngornerit kingusinnerusukkut pisut ukiumut tulliuttumut aatsaat sunniuteqartussamik, ilaasortat agguataarsimaneri tunngavigalugit ilaasortat amerlassusiat naatsorsorneqartassaaq.

Nr. 2-mut.

Inatsisartuni ilaasortanut partiimit kattusseqatigiinnilluunniit anisunut aalajangersagaq naalakkersuinikkut sulinermut tapiissutinut attuumassuteqarpoq. Ilaasortat taakku ilaasortanut tapiissutit aningaasartaasa angeqataannik, partiinulli tunngaviusumik aningaasartat ilanngunnagit, pisassaqartinneqassapput. Inatsisartunut ilaasortat piffissap qinigaaffiup nalaani partiiminnit il.il. tunuassagaluarpata tunngaviusumik tapiissutinik taamaalilluni tunniusseqqittoqassanngilaq. Taamaalilluni attaviitsoq piffissap qinigaaffiup sinnerani naalakkersuinikkut sulinermut tapiissutinik pissarsinissamut ilaasortamut nammineerluni iliuuseqarnermigut qinigaasumut, taamaalillunilu § 2, imm. 2 naapertorlugu tunngaviusumik tapiissutisisumut, assersuukkaanni pitsaannginnerusumik periarfissaqartussaavoq. Ilaasortalli naalakkersuinikkulluunniit agguataarnerit attaviitsunngornermikkut aningaasanik saniatigut pissarsinissamik ussernartorsiorsinnaanerat maleruagasakkut pinngitsoortinniarneqassasoq siunertaavoq.

§ 2-mut

Nr. 1-imut.

Inatsisartunut ilaasortat ataasiakkaat siunissami paasisassarsiorluni angalermut atugassanik aningaasanik inummut killilikkanik aalajangersimasunik pissarsinissamut inatsisikkut piginnaatitaaneq § 3, imm. 4-miit 7-imut aalajangersakkakkut maannamut maleruagassat atorunnaarsissavaat. Angalanermi aningaasanik taamaattunik partiit ilaasortaatitaasa, ilaasortat angalasarnerisa piareersarneqarneranni ataqatigiissaarneqarnerinilu annertunerusumik akuusinnaalersillugit, qinnuteqaateqarnissamut periarfissaat ammaattussaavai. Taamaaliornikkuttaaq oqalutsit partiilluunniit siunnersortaasa angalanermi peqataasinnaanerannut attuumassutilimmik aningaasartuutinut Siulittaasoqarfiup erseqqinnerusumik aalajangiineratigut angalanermut aningaasaliissutit atorneqarsinnaalissapput.

Aningaasaliissutit aqutsivigineqarnerannut, aammalu angalanermut siumoorutinik tunniussineq kiisalu angalanerup naatsorsuusiorneranut atugassatut paasissutissiinissamik pisussaatitaaneq ilanngullugu Inatsisartut Siulittaasoqarfiat maannamutut najoqqutassiissaaq. Tamanna § 3, imm. 6-imi erseqqissumik takuneqarsinnaavoq, siunissamili inatsimmik tunngavilimmik aalajangigaanngikkaluartumik ajornarunnaassalluni.

Aningaasat killilikkat inummut naatsorsuussat inatsisikkut piginnaatitaaffiujunnaaraluartut aningaasaliussat suliamut partiillu naalakkersuinikkut anguniagaannut sunniuteqanngitsumik piumasaqaatit malillugit Inatsisartut Siulittaasoqarfiata aningaasaliissutigissallugit aalajangiisassasut naatsorsuutigineqarpoq.

Pisuni suliamut atatillugu tunngaviit pisariaqartippassuk inunmut paasisassarsiorluni anga-lanissat Inatsisartut Siulittaasoqarfiata akueriumanngissinnaavai. Ataatsimiinnernut kinguartinneqarsinnaanngitsunut angalanissaq pineqarsimanngippat tamanna Inatsisartunut qinersinissamik nalunaaruteqarnerup qinersinerullu akuersissutigineqarnerata akornanni piffissamut ingammik atuuppoq, piffissamimi tassani Inatsisartut naalakkersuinikkut nalinginnaasumik sulinerat unitsinneqartarmat. Maleruagassaq taanna maannamut § 3, imm. 7-imi erseqqissumik aalajangersagaavoq, siunissamili aningaasaliissutip siunertaa malittussaallugu.

§ 3-mut

Piffissami 1. junimiit 31. december 2006-imut qaammatinik arfineq-marlunnik sivisussusilimmi maleruagassat nutaat malillugit naalakkersuinikkut sulinermut tapiissutinik qinnuteqartoqarsinnaanngorlugu Inatsisartut inatsisaat 1.- juni 2006 atuutilissasoq siunnersuutigineqarpoq. Tunngaviusumik aningaasartat 300.000 kr.-isut 7/12-iiliinik kiisalu 25.000 kr.-it 7/12-iinik ilallugit ilaasortamut ataatsimut tapiissutitut tunniunneqareersut qaffanneqaqqullugit partiit il.il. qinnutigisinnaavaat (maannamut ilaasortamik aallaaveqarluni 100.000 kr.-inik tapiissutaareersut aammalu ilaasortamut tapiissutit nutaat 125.000 kr.-it akornanni nikingassutaattut aningaasat annertussuseqarput). Ulloq 1. januar 2006 aallartittumik ilaasortat agguataarnerat tunngavigalugu ilaasortat amerlasusiat naatsorsorneqassaaq, tak. inatsimmi pineqartumi § 5, imm. 2-mi tunngaviutinneqartoq.

Ukiup ingerlanerani siusinnerusukkut naalakkersuinikkut sulinermut tapiissutinik akuersissuteqartoqarnera apeqqutaatinnagu aningaasat qaffaataat qinnutigineqarsinnaapput. Ukiup ingerlanerani siusinnerusukkut naalakkersuinikkut sulinermut tapiissutinik akuersissuteqartoqarsimanngippat tapiissutit qaffaataannik taamaallaat qinnuteqartoqarsinnaavoq, tapiissutaaqqaartunimmi qinnuteqarnissamut piffissaliussaq ulloq 1. marts 2006 qaangiussimammat.

Atuutilersitsinermut aalajangersakkap oqaaseqatigiivisa aappaani piffissaq qaangernagu Inatsisartut Siulittaasoqarfiannut tapiissutit qaffaataanik qinnuteqaammik tunniussinissamut ulloq 1. august 2006 killiliunneqarpoq. Taassuma assigaa inatsisip atuutilerneraniit qaammatinik marlunnik piffissaliineq, partiillu naalakkersuinikkut sulinermut tapiissutinik inatsit naapertorlugu ukiup aallartinneraniit qinnuteqarnissamut piffissaliussamut ataqatigiissinneqassaaq (tak. inatsimmi pineqartumi § 2, imm. 4).

Inatsisartuni ilaasortat ataasiakkaarlutik paasisassarsiorlutik angalasarnerinut aningaasanut atugassanut tunngatillugu maannamut inatsisitigut piginnaatitaaneq atorunnaassaaq ulloq 31. maj 2006. Ulloq taanna qaangerpat Inatsisartuni ilaasortat ataasiakkaat 2006-ip sinnerani paasisassarsiorlutik angalanissaannut aningaasat atorneqanngitsut Inatsisartut Siulittaasoqarfiata akuersissutigisinnaavai. Ulloq killiliussaq qaangiutinnagu Inatsisartuni ilaasortap angalanermut aningaasat atugai ukiup pineqartup iluani aningaasanut killiliussatut akuersissutigineqartut ilaasortap partiilluunniit il.il. pineqartup atorsimanerai siulittaasoqarfiup naliligassaanut ilaasussaassapput.