11. maj 2006 UPA 2006/20
Tipsernermit lottornermillu iluanaarutinit agguaassisarneq pillugu Inatsisartut inatsisaattut siunnersuut
pillugu
Inatsisartut Kultureqarnermut Ilinniartitaanermullu AtaatsimiititaliaataISUMALIUTISSIISSUTAA
siunnersuutip aappassaaneerneqarnerani saqqummiunneqartoq
Inatsisartut Kultureqarnermut Ilinniartitaanermullu Ataatsimiititaliaat suliarinninnermini makkuninnga inuttaqarpoq:
Inatsisartunut ilaasortaq Juliane Henningsen, Inuit Ataqatigiit, siulittaasoq
Inatsisartunut ilaasortaq Kristian Jeremiassen, Atassut, siulittaasup tullia
Inatsisartunut ilaasortaq Ruth Heilmann, Siumut
Inatsisartunut ilaasortaq Isak Davidsen, Siumut (sinniisussaq)
Inatsisartunut ilaasortaq Astrid Fleischer Rex, Demokraatit
UPA 2006-imi siullermeerinerup kingorna inatsisissatut siunnersuut ataatsimiititaliap misissuataarpaa makkuninngalu oqaaseqaateqassalluni:
Siunnersuutip imarisaaTipsernermit lottornermillu iluanaarutinit agguaassisarneq pillugu Inatsisartut inatsisissaattut siunnersuut Inatsisartunut Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisumit saqqummiunneqarpoq. Inatsisartut 2004-imi ukiakkut ataatsimiinneranni siunnersuut ullormut oqaluuserisassani immikkoortoq 68-ip ataani aalajangiiffigineqarpoq, taamaalilluni tipsernermit lottornermillu aningaasanik agguaassisarneq pillugu Inatsisartut inatsisaat allanngortinneqartussanngorluni taamaaliornikkut meeqqat inuusuttullu peqatigiiffiinut tipsernermit lottornermillu aningaasanik agguaassisarneq SORLAK-mit oqartussaaffigineqalersinneqassalluni. Kalaallit Nunaanni Timersoqatigiiffiit Kattuffiannut aamma Team Grønlandimut timersornernut tamanit ilaaffigineqartartunut kiisalu piukkunnaatilinnut qaffasissumillu timersortunut tapiissutinik agguaassisartunut SORLAK naligiisinniarneqartussaavoq. SORLAK siunnertuutikkut saqqummiunneqartukkut Kalaallit Nunaanni Timersoqatigiiffiit Kattuffiannut aamma Team Grønlandimut taama naligiisinneqarnissaminik qulakkeerussunneqarpoq. Ilutigisaanik pisariaqartumik Inatsisartut inatsisaata immikkoortuni allani arlalinni allannguiffigineqarnissaa pisariaqartoq Naalakkersuisut siunnersuutigaat.
Tipsernermit iluanaarutit pillugit maleruagassiisartussatut suleqatigiissitaliap nukissanik sipaarniarnissaq siunertaralugu atorunnaarsinneqarnissaa siunnersuutigineqarpoq. Tipsernermit iluanaarutit pillugit maleruagassiisartussatut suleqatigiissitaliap qitiusumik suliassaasa ilai maleruagassanik il. il. atuutsitsilermut atatillugu tusarniaanernit taarserneqarsinnaassasut Naalakkersuiusut nalilerpaat, soorluttaaq illuatungiusunit soqutiginnissinnaasunit agguaassisarnermut tunngatillugu aalajangersimasumik apeqquteqaataasinnaasut sukkulluunniit oqaluqatigiissutiginissaannut Naalakkersuisut piumassuseqartut.
Tipsernermit lottornermillu aningaasat pisortat aningaasaatigimmatigit siunnersuutigineqarpoq, aningaasanik agguaassisarnerup nakkutilliiviginissaanut Naalakkersuisut maleruagassat aqqutigalugit periarfissinneqassasut. Sulianik suliarinnittarnermut piumasaqaatit tunngaviusut arlallit, naak suliassat peqatigiiffinnit namminersortunit isumagineqaraluartut, attatiinnarneqarnissaat Naalakkersuisunit pingaartinneqarpoq. Tamanna pivoq tipsernermit lottornermillu aningaasanit tapiissuteqarnissaq pillugu qinnuteqaateqartut inatsisitigut illersorneqarnissaat eqqarsaatigalugu. Tamatuma saniatigut suliassaqarfimmut maleruassanik atuuttunngortitsisarnissamut Naalakkersuisut piginnaatitaanerat aalajangersakkamut ataatsimoortinneqassasoq siunnersuutigineqarpoq soorluttaaq piginnaatitsissutip ilusilerneqarnera erseqqissarneqassasoq siunnersuutigineqartoq.
Allannguutissatut siunnersuutigineqartut ataatsimut annertussuiat eqqarsaatigalugu, suliassaqarfimmut Inatsisartut inatsisaannik nutaamik siunnersuuteqarnissaq Naalakkersuisut eqqornerpaasutut isigisimavaat.
Siunnersuummik ataatsimiititaliap suliarinninneraPartiinit tamanit Naalakkersuisuniillu siunnersuut taperserneqarmat siunnersuullu ataatsimiititaliamit suliarineqassasoq inassutigineqarsimammat aallarniutigalugu Inatsisartut Kultureqarnermut Ilinniartaanermullu Ataatsimiititaliaannit oqaatigineqassaaq.
Tipsernermit lottornermillu aningaasanik agguaassisarnerup tiguneqarnerani tunngaviusumik allaffissornikkut periutsit peqatigiiffinnut atuuttunngortinneqareersimanerat taamaattumillu tipsernermit iluanaarutit pillugit maleruagassiisartussatut suleqatigiissitaliaq atorunnaasinneqarsinnaammat kiisalu sipaaruteqaatit konto pingaarnerup 30-14.28-p iluani agguataarneqarsinnaammata ataatsimiititaliap nuannaarutigalugu maluginiarpaa.
Peqatigiiffiit tipsernermit lottornermillu aningaasanik agguaassisartut sulianik suliarinnittarneq pillugu inatsit taamaalillunilu nalinginnaasumik ingerlatsinermi inatsisitigut piumasaqaatit malittassagaat Naalakkersuisut pingaartillugu qulakkeerniarsimammassuk ataatsimiititaliamit pitsaasutut isumaqarfigineqarpoq. Aningaasanik agguaassisarnermut atatillugu Naalakkersuisut nakkutilliinissamut periarfissaqarnerat takullugu aamma naammagisimaarnarpoq. Peqatigiiffiup namminersortup nammineersuullugu aningaasanik agguaassisalernissaani illersorneqarsinnaasumik aqutsinissamut maleruagassanik minnerpaamik peqatoqartariaqartoq ataatsimiititaliaq isumaqarpoq.
Aalajangersakkat pillugit innuttaasut ilisimatinneqartariaqarnerat pingaartuusoq ataatsimiititaliaq isumaqarpoq, minnerunngitsumik tipsernermit lottornermillu aningaasanik tunineqarnissamut peqatigiiffik ilaasortaasariaqanngitsoq peqatigiiffinnut ilisimatitsissutigineqartariaqarpoq. Taamaattumik suliassaqarfimmi tamatumani annertunerusumik paasisitsiniaanissamik Naalakkersuisut pilersaaruteqarnerat nuannaarnartuuvoq.
Taamaattoq naammagittaalliornissamut periarfissat maleruagassiorfigineqarnissaasa Naalakkersuisunit qanoq qulakkeerniarneqarnerat itisiliiffigineqassasoq ataatsimiititaliap kissaatigaa, naammagittaalliortarfimmik pitsaasumik pilersitsinissaq annertuumik sunniuteqarsinnaasoq ataatsimiititaliaq isumaqarmat.
Tipsernermit lottornermillu aningaasat pillugit Danskit inatsisaata allanngortinneqarnerata 2003-imeersup, tamatumalu kingunerisaanik 2004 aallarnerfigalugu akitsuummik atorunnaarsitsinerup malitsigisaanik Danmarkimut akitsuutit akilerneqartarnerisa taamaatinneqarnerata nassatarisaanik tipsernermit lottornermillu tapiissutit qanoq annertutigisumik appaavigineqarsimanerat siullermeerinermi Anthon Frederiksenip, Kattusseqatigiit Partiaaniit apeqquteqarfigaa. Tassunga neriorsuutigineqarpoq allaffissornikkut allakkatigut akissuteqaat nassiunneqarumaartoq taannalu ataatsimiititaliamit qilanaarineqarpoq.
TusarniaaneqInatsisissatut siunnersuutip saqqummiunneqannginnerani Naalakkersuisunit makkununnga tusarniaassutigineqarsimavoq: Sorlak, Sorlaks Tipsudvalg, SUKORSEQ, Spejderit Kattuffiat, K.I.K., S.I.S, Savaatillit Inuusuttut Peqatigiit, Sanningasup Tungujortup Inuusuttai Paamiut, NAIP-inuusuttai, Inuusuttut Peqatigiit Upernavik Kujalleq, Meeqqat Inuusuttullu Peqatigiiffiat "Kattutta", Meeqqat Inuusuttullu Peqatigiiffiat Attu, Atassutip Inuusuttai, Upernavimmi Atassutip Inuusuttai, Meeqqat Inuusuttullu Peqatigiiffiat "Ikinngutivut", Ukkusissani Kalattoortartut Peqatigiiffiat U.K.P., Pikialaarneq, Det Hvide Kors- Det Grønne Bånd, Inuit Youth International, Kalaallit Nunaanni Timersoqatigiiffiit Kattuffiat, Team Grønland, Aningaasaqarnermut Pisortaqarfik, Akileraartarnermut Pisortaqarfik, Ilaqutariinnermut Pisortaqarfik aamma Ineqarnermut Attaveqarnermullu Pisortaqarfik.
Inatsisissatut siunnersuummut oqaaseqaatinut Sorlaap tusarniaanermut akissutai naammaginartumik itisiliinngitsut ataatsimiititaliaq isumaqarpoq.
Siunnersuut manna pillugu ulloq 11. maj 2006 ataatsimiititaliap Naalakkersuisunut ilaasortaq Doris Jakobsen isumasioqatigisimavaa. Tapiissutit inunnut suliniaqatigiiffinnulluunniit nunami maani najugaqartuinnaq tunniunneqartarnerinut patsisaasup ersersinneqarnissaa ataatsimiititaliamit kissaatigineqarpoq. Taamatuttaaq naammagittaalliornissamut periarfissat maleruagassiorfigineqarnissaat Naalakkersuisut qanoq qulakkeerniarneraat itisiliiffigeqquneqarpoq. Isumasioqatigiinnissamut aggeqqusissut Naalakkersuisunullu ilaasortap oqaatigisaasa allassimaffiat ilanngussatut ilanngunneqarput.
Tipsernermit lottornermillu aningaasaniit aningaasat A-miittut B-miittullu pillugit Kalaallit Nunaanni Timersoqartigiiffiit Kattuffiat Sorlallu nammineerlutik naammagittaalliortarfittut sinnersuut manna malillugu siunissami atuutissasut isumasioqatigiinnermi ataatsimiititaliamut ilisimatitsissutigineqarpoq. Tamanna assut ajuusaarnartutut ataatsimiititaliamit isigineqarpoq. Taamaattumik naammagittaalliortarfimmik sunniuteqarluartumik qulakkeerinnittoqassasoq kiisalu soqutigisaqaqatigiiffiit aningaasanik aqutsisut assersuutigalugu qinnuteqaatit tiguneqarsimasut, aningaasat atugassiissutaasimasut kiisalu aningaasat sunut atorneqarsimanerinik malitseqartitsilluni ukiumoortumik nalunaarummik pisortaqarfimmut nassiussisarnissaannik peqquneqartassasut ataatsimiititaliap inassutigissavaa.
Tamatuma saniatigut inuusuttortatta, nunatta avataani ilinniagaqartut nunatsinniillu ilinniarnertuunersiuteqartut, matumani Avalak ilanngullugu, tipsernermit lottornermillu aningaasanit qinnuteqarsinnaannginneri suli ajuusaarnartuusoq ataatsimiititaliaq isumaqarpoq. Siunnersuutip aappassaaneerneqannginnerani Avalak DUF-imit aningaasanik qinnuteqarsinnaanersoq misissorneqassasoq ataatsimiititaliap Naalakkersuisunut ilaasortamut qinnutigaa. Tamanna pisinnaanngippat ataatsimiititaliaq isumaqarpoq, siunnersuummi allannguisoqartariaqartoq taamaalilluni Avalak nunatsinni tipsernermit lottornermillu aningaasanik qinnuteqarsinnaanera qulakkeerneqarluni. Kalaallit ilinniagaqartut nunatsinnit kulturimikkut aallaaveqartut kultureqarnikkut suliaqarnermik ingerlatsinissamut periarfissaqarnissaat pingaartuusoq ataatsimiititaliamit isumaqarfigineqarpoq. Nunatsinniillu qimagusimanerup nalaani kultureqarnikkut aallaaveqarnerup attatiinnarsinnaanera ineriartortiinnarsinnaaneranullu periarfissaqarnissaq pingaartuuvoq.
Tamanna tunngavigalugu ataatsimiititaliap isumaqatigiittup siunnersuut akuersissutigineqassasoq inassutigaa.
Taama oqaaseqarluni Inatsisartut Kultureqarnermut Ilinniartitaanermullu Ataatsimiititaliaata siunnersuut aappassaaniigassanngortippaa.
Juliane Henningsen,
Siulittaasoq
Kristian Jeremiassen, siulittaasup tulliaRuth Heilmann
Isak Davidsen
Astrid Fleischer Rex
Ilanngussaq 1 (pdf-format)
Ilanngussaq 2 (pdf-format)