12. maj 2006

FM 2006/20

 

Allannguutissatut siunnersuut

 

Tipsernermit lottornermillu iluanaarutinik agguaassisarneq pillugu Inatsisartut inatsisissaattut siunnersuut pillugu

Aappassaaneerneqarneranut atatillugu Naalakkersuisunit saqqummiunneqartoq.

 

1. § 4-mi immikkoortoq nutaaq ilanngunneqassaaq:
"Imm. 3. Imm.1-imi aalajangersagaq qanorluunniit ikkaluarpat Avalak tapiiffigineqarsinnaassaaq".

2. § 8-mi immikkoortoq nutaaq ilanngunneqassaaq:
"§ 2-mi imm.1, nr.1-3 naapertorlugu naalakkersuisut kattuffinnit taakkartorneqartunit tapiissutinik agguaassinermi aalajangersakkat pillugit maalaarutinik suliaqarnissamut atatillugu malittarisassiorsinnaassapput".

 

Oqaaseqaatit

Nr. 1-imut

Aalajangersakkap malitsigaa Avalaap(siornatigut DKIK) tipsernermi lottornermillu iluanaarutinit tapiiffigineqarsinnaalernera, apeqqutaatinnagu peqatigiiffiup Danmarkimi angerlarsimaffeqarnera.

Siunnersuummut tunuliaqutaavoq Inatsisartut Kultureqarnermut Ilinniartitaanermullu ataatsimiititaliaata tipsernermit lottornermillu iluanaarutinik agguaassisarneq pillugu Inatsisartut inatsisissaattut siunnersuutaata aappassaaneerneqarnissaanut atatillugu isumaliutissiissutaa, tassani ilaatigut saqqummermat ataatsimiititaliamit isumagineqartoq Avalak DUF-imit tapiissutisisinnaanngippat siunnersuut allannguuteqartinneqassasoq, taamalu qulakkeerneqassaluni Avalaap Kalaallit Nunaanni tipsernermit lottornermillu iluanaarutinik agguaassassanik qinnuteqarsinnaanngornissaa.

Nr. 2-mut

Taamatut aalajangersaanikkut Naalakkersuisut pisinnaatitaaffigilerneqarput § 2-mi imm.1, nr. 1-3 naapertorlugu kattuffinnit taakkartorneqartunit tapiissutinik agguaassinermi aalajangersakkat pillugit maalaarutinik suliaqarnissamut atatillugu malittarisassiornissamut.

Tassunga ilanngullugu naalakkersuisut malittarisassiornerminni aalajangersarsinnaavaat maalaarutitut suliassat ataatsimiititamit suliarineqarsinnaanerat, assersuutigalugu kattuffiit sinniissaannik pingasunik Namminersornerullutillu Oqartussat sinniisaannik ataatsimik inuttaqartinneqartumik. Taamatuttaaq malittarisassiornikkut aalajangersarneqarsinnaassaaq allattoqarfimmit kiffartuunneqarnissamut tunngasut assigisaallu, maalaarutitut suliassat ataatsimiititamit suliarineqarnissaanut tunngasut pingaaruteqartut pillugit.

Taamatut malittarisassanik aalajangersaanissaq sioqqullugu kattuffiit pineqartut pingasut oqaloqatigineqassapput, taamaaliornikkut anguniarlugu maalaarutitut suliassiissutit siunertamut naapertuuttumik pitsaasumillu suliarineqarnissaasa qulakkeerneqarnissaat.

Siunnersuummut tunuliaqutaavoq Inatsisartut Kultureqarnermut Ilinniartitaanermullu Ataatsimiititaliaata tipsernermit lottornermillu iluanaarutinik agguaassisarneq pillugu Inatsisartut inatsisissaattut siunnersuutaata aappassaaneerneqarnissaannut atatillugu isumaliutissiissutaa, tassani ilaatigut saqqummiunneqarluni ataatsimiititaliamit inassutigineqartoq aalajangiisinnaassusilimmik maalaartarfeqarnissap qulakkeerneqarnissaa.