10. januar 2006 UKIU 2006/11
Inatsisissatut siunnersuummut oqaaseqaatit
Oqaaseqaatit nalinginnaasut
Inatsisissatut siunnersuutip tunngavia:Umiarsualivimmiinnermut akileraarutit allanngortillugit Inatsisartut 2002-mi upernaakkut ataatsimiinnerminni aalajangiuppaat, umiarsuit takornarianik angallassissutit usisinnaassusiat naapertorlugu akileraarut ilaasunik angallassinermut akileraarummik taarserneqassasoq, tassa umiarsuit takornarianik angallassissutit Kalaallit Nunaanni umiarsualivimmut nunalittut, piffimmilu umiarsualiviup avataani kisartut imaluunniit ilaasunik sinerissamut nunnigussisut umiarsuarmi takornarianik angallassissumi ilaasumut ataatsimut akileraarummik 300 kr.-iusumik ulloq 1. januar 2003 aallarnerfigalugu akiliisalersussanngorlugit.
Akileraarummik allanngortitsinerup ilaatigut kingunerisimavaa umiarsuit takornarianik angallassissutit Kalaallit Nunaanni umiarsualiviit siusinnerusumut sanilliullugu annertunerusumik nunaliffigisalersimagaat, tassami umiarsuit takornarianik angallassissutit ilaasunik angallassineranni akileraarut umiarsuup takornarianik angallassissutip angallassinermini umiarsualivimmut ataatsimut arlaqartunulluunniit nunalinnera apeqqutaatinnagu akileraarut taannaaginnarmat. Tamatumalu kingunerivaa nunami niuertarfinnut niuertunullu iluaqutaasumik kaaviiaartitaqarnerulerneq.
Kaaviiaartitat takornariaqarnermillu isertitat amerlisarniarlugit, tassuunakkullu aamma aningaasatigut namminerisamik napatinnerulernissaq suleqataaffigiumallugu Greenland Tourism, Inuussutissarsiornermut, Nunalerinermut Suliffeqarnermullu Pisortaqarfik aamma Akileraartarnermut Pisortaqarfik suleqatigiinnermik aallartitsisimapput, tassa ilaatigut maannakkut takornariartitseriaatsip ineriartortinneqarsinnaaneranut aamma takornariartitseriaatsinik nutaanik ineriartortitsinissamut periarfissat allat suunerinik naliliinissaq siunertaralugu.
Suleqatigiit tassunga atatillugu naliliisimapput umiarsuit takornarianik angallassissutit ilaasunik angallassinerannut akileraarut umiarsuarmi takornarianik angallassissummi ilaasumut ataatsimut 150 kr.-inik qaffanneqarsinnaasoq, umiarsuit takornarianik angallassissutit siunissami nunalittartussat amerlinissaannik naatsorsuutigisamut sunniuteqanngikkaluartumik. Umiarsuimmi takornarianik angallassissutit atorlugit takornariartitsisarnermi ilaasorineqarnerusarput inuit akissaqarluinnartut, aki isiginiarpallaarnagu misigisaqarnissaminnik pingaarnerutitaqartut. Tassunga atatillugu ilaasunut angallassinermi akileraarut akimut tamarmiusumut sanilliulluni annikitsuararsuuvoq.
Kiisalu siunnersuutigineqarpoq ilaasunut Danmarkimiit, Savalimmiuniit nunanilluunniit allaniit aallartittumik angalanissatut aaqqissuussamut atatillugu umiarsuakkut timmisartukkullu angalanissamut billetsimik pisisunut akileraarummik taamaattumik atuutilersitsinissaq, tassa umiarsuaq ilaasunik angallassissut ilaasunik nalinginnaasunik takornarianillu ilaasoqarluni ingerlaartuuppat. Siunnersuut taanna aningaasarsianit akileraarutit pillugit Inatsisartut inatsisaata allanngortinneqarneranik siunnersuummut attuumassuteqarpoq (umiarsuarni inuttat akissarsiaasa akileraarutitaat pillugit aaqqissuussinermut).
Inatsisissatut siunnersuutip imarisai:Inatsisissatut siunnersuutip ullormit 1. april 2006-imiit kingunerissavai umiarsuit takornarianik angallassissutit ilaasunik angallassinerannut akileraarutip, umiarsuarmi takornarianik angallassissummi ilaasumut ataatsimut 300 kr.-iniit 450 kr.-inut qaffanneqarnissaa kiisalu ilaasunut Danmarkimiit, Savalimmiuniit nunanilluunniit allaniit aallartittumik timmisartukkut umiarsuakkullu angalanissatut aaqqissuussanut peqataasunut akileraarummik ilaasumut ataatsimut taamatulli 450 kr.-imik atuutilersitsinissaq.
Pisortanut aningaasatigut allaffissornikkullu sunniutissai:Umiarsuit takornarianik angallassissutit ilaasorisartagaasa amerlassusii 2003-mi 9.500-niit 2004-mi 15.600-t missinginut amerleriarsimapput. Tuniniaasartut takornariaqarnermillu inuussutissarsiuteqartut annerit paasissutissiissutaat tunngavigalugit eqqoriarneqarpoq umiarsuarni takornarianik angallassissutini ilaasut 2006-imi tikittussat amerlassusissaat ikinnerpaamik 2004-misuulli amerlassuseqassasut, ilimagineqarsinnaasorli 20.000-it pallissagaat. Ilaasut Danmarkimiit, Savalimmiuniit nunanilluunniit allaniit aallartittumik angalanissatut aaqqissuussanut 2006-imi peqataajumaartussat 3.000-it missaanniissangatinneqarput.
Taamaattumik inatsisissatut siunnersuutip Landskarsip isertitassaanut ukiumut 4,3 mio. kr.-it missinginik amerlissutaanissaa naatsorsuutigineqarpoq.
Inuussutissarsiutinik ingerlataqartunut aningaasatigut allaffissornikkullu sunniutissai:Inatsisissatut siunnersuut inuussutissarsiutinik ingerlataqartunut aningaasatigut allaffissornikkulluunniit sunniuteqartussaanngilaq.
Avatangiisinut pinngortitamullu sunniutissai:Inatsisissatut siunnersuut avatangiisinut pinngortitamulluunniit sunniuteqartussaanngilaq.
Innuttaasunut allaffissornikkut sunniutissai:Inatsisissatut siunnersuut innuttaasunut allaffissornikkut sunniuteqartussaanngilaq.
Naalagaaffeqatigiinnermut namminersornermullu tunngasut:Inatsisissatut siunnersuut naalagaaffeqatigiinnermut tunngasunik imaqanngilaq, kisianni Kalaallit Nunaata aningaasatigut namminerisamik napatissinnaalernissaanik pilersitsinissamut pitsaasumik sunniuteqaqataassaaq.
Pisortatut oqartussaasunik kattuffinnillu tusarniaaneq:Inatsisissatut siunnersuut Aningaasaqarnermut Pisortaqarfimmut, Ineqarnermut Attaveqaqatigiinnermullu Pisortaqarfimmut, Inuussutissarsiornermut, Nunalerinermut Suliffeqarnermullu Pisortaqarfimmut, Greenland Tourism-imut aamma KANUKOKA-mut tusarniaassutigalugu nassiunneqarnikuuvoq, taakkulu inatsisissatut siunnersuummut oqaaseqaatissaqarsimanngillat.
Tusarniaanermut akissutit Akileraartarnermut Akitsuusiisarnermullu Ataatsimiititaliamut nassiunneqarnikuupput siunnersuummulli allannguutissaqartitsisimanatik.
Inatsisissatut siunnersuummi aalajangersakkanut ataasiakkaanut oqaaseqaatit
§ 1-imut
Nr. 1-imutUmiarsuarni ilaasunik angallassissutini ilaasunik nalinginnaasunik takornarianillu ilaasoqarlutik ingerlaartuni ilaasumut ataatsimut akileraarummik 450 kr.-iusumik atuutilersitsinissaq siunnersuutaavoq, tassa ilaasut Danmarkimiit, Savalimmiuniit nunanilluunniit allaniit aallartittumik timmisartukkut umiarsuakkullu angalanissatut aaqqissuussanut peqataappata.
Ilaasunik nalinginnaasunik takornarianillu ilaasoqarluni ingerlaarneq tassaavoq ilaasunik Danmarkimiit, Savalimmiuniit nunanilluunniit allaniit aallartittumik angalanissatut aaqqissuussamut atatillugu timmisartukkut umiarsuakkullu angalanissamut billetsimik pisisimasunik ilaasoqarluni, aammalu umiarsuarmi inissaqartillugu ilaasunut Kalaallit Nunaata iluani angallanneqartussanut billetsinik neqerooruteqarfiusumik ingerlaarneq. Taassuma nassuiaataa, Aningaasarsianit akileraarutit pillugit Inatsisartut inatsisissaattut siunnersuummi, UKIU 2006/10 -mi § 34 b, imm. 2 –mi pineqartup assigaa.
Nr. 2-mutUmiarsuit takornarianik angallassissutit ilaasunik angallassinerannut akileraarutip 150 kr.-inik qaffallugu ilaasumut ataatsimut 450 kr.-inngortinneqarnissaa siunnersuutigineqarpoq. Inatsisissatut siunnersuummi naliginnaasumik oqaaseqaatit innersuussutigineqarput.
Nr. 3-mutImm. 2-mi aalajangersagaasumit allaasumik akileraarutinik akiliuteqartarnissaq pillugu Akileraartarnermut Pisortaqarfimmut isumaqatigiissuteqartoqarsinnaanerata aammattaaq umiarsuarnut ilaasunik angallassissutinut, ilaasunik nalinginnaasunik takornarianillu ilaasoqarlutik ingerlaartunut atuutitinneqarsinnaanissaa siunnersuutaavoq.
§ 2-mut
Inatsisip ullormit 1. april 2006-imiit atortuulernissaa siunnersuutigineqarpoq.