17. maj 2006 UKIU 2006/10
Aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut
(Inuit umiarsuarni ilaasunik angallassissutini, Akileraartarnermut Pisortaqarfiup umiarsuarni inuttat akissarsiaasa akileraarutitaat pillugit aaqqissuussinermut nalunaarsuiffiani nalunaarsorsimasut sulisutut akissarsiaqartut pillugit aaqqissuussineq)pillugu
Inatsisartut Akileraartarnermut Akitsuusiisarnermullu Ataatsimiititaliaata
ISUMALIUTISSIISSUTAA
Siunnersuutip aappassaaneerneqarnerani saqqummiunneqartoq
Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Augusta Salling, Atassut, siulittaasoq
Inatsisartunut ilaasortaq Agnethe Davidsen, Siumut, siulittaasup tullia
Inatsisartunut ilaasortaq Agathe Fontain, Inuit Ataqatigiit
Inatsisartunut ilaasortaq Lars Emil Johansen, Siumut
Inatsisartunut ilaasortaq Lene Knüppel, Demokraatit
Inatsisartunut ilaasortaq Jens Lars Fleischer, Siumut - Sinniisussaq
Akileraartarnermut Akitsuusiisarnermullu Ataatsimiititaliap UKIU 2006-imi siullermeerinerup kingorna inatsisissatut siunnersut matumani pineqartoq nassuiaatitaalu misissuataarpai.
Siunnersuutip imarisaaUmiarsuarsuit takornarianik angallassillutik ingerlaartut imaluunniit ilaasunik nalinginnaasunik takornarianillu ilaasoqarlutik ingerlaartut inuttaasa akissarsiaqartinneqarsinnaanerannut periarsiffiinissaq siunnersuutikkut matumuuna Naalakkersuisut kissaatigaat.
Ilaasunik nalinginnaasunik takornarianillu ilaasoqarluni ingerlaarneq tassaavoq umiarsuaq ilaasunik angallassissut atorlugu takornarianik, angalanernut ataatsimut aaqqissuuteriikkanut Danmarkimiit, Savalimmiuniit nunanilluunniit allaniit aaqqissuussanut atatillugu timmisartumut aammalu umiarsuarmut billetsimik pisisimasunik, aamma maani nunaqartunik Kalaallit Nunaata iluani umiarsuakkut angalanissaannarmik kissaateqartunik ilaasoqarluni aalajangersimasumik ingerlaarfeqarluni angallassineq.
Arctic Umiaq Line-p umiarsuaataasa arlallit Arctic Travel Group-imut (ATG) 1. april 2006 aallarnerfigalugu tiguneqartussanngorlugit november 2005-imi tunineqarnerat siunnersuummut toqqammaviuvoq. Umiarsuarni pigineqalersuni inuttaasut akissarsiaasa akileraaruserneqartarnelernissaannik Kalaallit Nunaanni aaqqissuussisoqarnisssaa naatsorsuutigalugu tunisinermi pisisumut akigitinneqartoq aalajangersarneqarsimavoq.
Umiarsuarni assartuutini ilaasartaatinilu Danmarkimi nunat tamalaat akornanni nalunaarsuiffimmiittunut inuttaasut akissarsiaasa tunniunneqartarnerannut immikkut tunngavissaatitasunik peqareerpoq, tak. aningaasarsianit akileraarutit pillugit inatsimmi § 34 a.
Tusarniaanermit akissutitAkileraartarnermut Akitsuusiisarnermullu Ataatsimiititaliaq siunnersuutip matumani pineqartup suliarineqarnissaanut atugassatut tusarniaanermit akissutit nuutinneqarnerinik pissarsiniarsimavoq. Siunnersuut ulloq 17. december 2005-imi ulloq 21. december 2005-imi akissuteqarfigineqartussatut tusarniaassutitut nassiunneqarpoq.
Tusarniaavigineqarsimasut arlallit piffissaq tusarniaavigineqartoq sivikippallaarsimanerarsimammassuk ataatsimiititaliap maluginiarpaa. Inatsisartunik nutaamik qinersisoqarnera pissutigalugu inatsisissamik piareersaallutik sulinissamut Naalakkersuisut piffissakippallaarsimasut Akileraartarnermut Akitsuusisarnermullu Ataatsimiititaliap paasisinnaagamiuk piffissaq tusarniaaviusoq sivisunerusinnaasimanngimmat ataatsimiititaliap pitsaanngitsutut isigaa. Tusarniaavigineqartut tusarniaanermi atortunik misissuinissamut naammaginartumik piffissaqartillugit tusarniaanermut piffissaliussat ataatsimut isigalugit sivisussusilerneqartassasut ataatsimiititaliap Naalakkersuisunut inassutigissavaa, taamaattoqanngikkaluarpammi tusarni-aanissap siunertaa anguneqanngitsuussammat.
Siunnersuutip matumani pineqartup Inatsisartut ataatsimiittarfianni siullermeerneqarnera tunngavigalugu Kalaallit Nunaanni Sulisitsisut Peqatigiiffiat (GA), sulisitsisut peqatigiiffiat ILIK aamma Arctic Umiaq Line/ATG Naalakkersuisunit qinnuigineqarput inatsisisissatut siunnersuummut oqaaseriumasinnaasaminnik saqqummeeqqullugit. Akileraartarnermut Akitsuusiisarnermullu Ataatsimiititaliamit saaffiginninneq tunngavigalugu taakku assinginik saaffiginnissutit SIK-mut APK-mullu nassiunneqarsimapput. Oqaaseqarfiginninnertut pissarsiarineqartut ataatsimiititaliami suliarinninnerup nalaani annertuumik oqaaseqarfiginninnissamut pissutissaqartitsisimanngillat.
Kiisalu siunnersuut una akileraatutinit iluanaarutit kommunit pissarsiassaasa appariartinneqarnerannik nassataqassappat ataatsimoortumik tapiissutit isumaqatiginninniutiginissaanni kommunit sinnerlugit peqatigiiffik taarsiiffigineqarnissamik piumaqarniartoq KANUKOKA-p tusarniaanermut akissuteqarnermini oqaatigisaa Akileraartarnermut Akitsuusiisarnermullu Ataatsimiititaliamit maluginiarneqarpoq. Umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit (UKIU06/11) naatsorsuutigineqartutut qaffanneqarnerisigut nunatta karsiata ilaatigut aningaasatigut eqqornerlunneqartussaagunanngimmat KANUKOKA-p piumasaqaataa tunngavissaqarunartoq Akileraatarnermut Akitsuusiisarnermullu Ataatsimiititaliaq isumaqarpoq. Kommunilli iluanaarutinik annaasaat KANUKOKA-p Naalakkersuisullu akornanni ataatsimut tapiissutit isumaqatigiinniutiginissaannut ilaasussaasut Akileraartarnermut Pisortaqarfiup ulloq 24. februar 2006 ilisimatitsissutigimmagu apeqqutip iliuuseqarfigeqqinnissaa tunngavissaqanngitsoq ataatsimiititaliaq isumaqarpoq.
Siunnersuutip aningaasatigut sunniutissaiSiunnersuut una pisortat karsiinut ukiumut 5 mio. kr.-inik isertitassanit annaasaqaataassasoq Naalakkersuisut naatsorsuutigaat, ima agguataarneqarlutik, Nunatta karsianut 1,3 mio. kr.-it kommuninullu 3,7 mio. kr-it.
Umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit (UKIU06/11) allanngortinneqarnissaannik Naalakkersuisut siunnersuutaat aamma Inatsisartunit akuersissutigineqassappat, ukiumoortumik isertitassanit iluanaarutit 4,3 mio. kr.-inik amerleriassasut naatsorsuutigineqarmat pisortat karsiisa ukiumoortumik iluanaarutinit annaasaqaatissaat katillugit 700.000 kr.-iunissaat naatsorsuutigisariaqarpoq.
Akileraartarnermut Akitsuusiisarnermullu Ataatsimiititaliap inassuteqaataaSiunnersuut akuersissutigineqassasoq ataatsimiititaliap isumaqatigiittup inassutigaa.
Taama oqaaseqarluni Inatsisartut Akileraartarnermut Akitsuusiisarnermullu Ataatsimiititaliaata siunnersuut aappassaaniigassanngortippaa.
Augusta Salling,
Siulittaasoq
Agnethe Davidsen
Agathe Fontain
Lars-Emil Johansen
Lene Knüppel