10. januar 2006

UKIU 2006/10

Inatsisissatut siunnersuummut oqaaseqaatit

 

Oqaaseqaatit nalinginnaasut

Inatsisissatut siunnersuutip tunngavia

Arctic Umiaq Line A/S-ip pigisaanik tunisinermut atatillugu, naalakkersuisuusimasut aamma Arctic Travel Group-ip tunisinermik isumaqatigiissuteqarnerannut ilanngullugu naalakkersuisuusimasut siunnersuummik saqqummiussinissamik imminnut pisussaaffilerput, tassa Arctic Umiaq Line A/S-ip umiarsuaataani ilaasunik angallassissutini, takornarianillu angallassillutik ingerlaartuni imaluunniit ilaasunik nalinginnaasunik takornarianillu ilaasoqarlutik ingerlaartuni sulisuusut akileraarutissaat tamarmiusut akissarsiat taakkua akileraarutitaannut naapertuuttunik annertussusilinnik appaavigineqartarnissaannik (umiarsuarni inuttat akissarsiaat pillugit aaqqissuussineq).

Naalakkersuisut nutaat isumaqatigiissut taanna soorunami aalajangiusimavaat.

Inatsisissatut siunnersuutip imarisai

Aningaasarsianit akileraarutit pillugit inatsimmi § 34 b-mi allassimavoq inuup umiarsuarmi ilaasunik angallassissummi, Dansk Internationalt Skibsregisterimi nalunaarsorsimasumi 1.100 bruttotonsinik taakkuluunnit sinnerlugit usisinnaassuseqartumi, umiarsuartullu takornarianik angallassissutitut angalasumi sulinermigut akissarsiaqarsimasup akileraarutissani tamarmiusut akissarsiat taakkua akileraarutitaannut naapertuuttumik annertussusilinnik appartissagai.

Siunnersuutigineqarpoq umiarsuarni inuttat akissarsiaasa akileraarutitaat pillugit aalajangersakkap aningaasarsianit akileraarutit pillugit inatsimmi § 34-imiittup aammattaaq inunnut kalaallit umiarsuaanni ilaasunik angallassissutini 1.100 bruttotonsinik taakkualu sinnerlugit usisinnaassuseqartuni, aammalu ilaasunik nalinginnaasunik takornarianillu ilaasoqarlutik ingerlaartuni sulisunut atuuttunngortinneqarnissaa, taamaalillutik Sarfaq Ittuk-mi aamma Sarpik Ittuk-mi inuttat akileraartarneq eqqarsaatigalugu Disko II-mi inuttatulli pineqalersussanngorlugit.

Umiarsuit, umiarsuarni inuttat akissarsiaasa akileraarutitaat pillugit aaqqissuussinermut ilaasut nalunaarsuiffianni nalunaarsorsimasut inuttaat, umiarsuit § 34 a naapertorlugu Dansk Internationalt Skibsregisterimi nalunaarsorsimasut inuttaasa pineqarnerattuut pineqaqqullugit siunnersuutigineqarpoq umiarsuarni inuttat akissarsiaasa akileraarutitaat pillugit aaqqissuussinermut § 34 b naapertorlugu ilaassagaanni aammattaaq piumasaqaataassasoq, umiarsuaatileqatigiiffiup sulisullu kattuffiata isumaqatigiissutaanni erseqqissumik allassimassasoq umiarsuarni ilaasunik angallassissutini, Akileraartarnermut Pisortaqarfiup umiarsuarni inuttat akissarsiaasa akileraarutitaat pillugit aaqqissuussinermut nalunaarsuiffiani nalunaarsorneqarsimasuni sulineq taakkunani pineqartoq.

Nalunaarsuiffimmut tassunga ilanngunnissamut tassungalu ilaajunnaarnissamut maleruagassat erseqqinnerusut Naalakkersuisunit aalajangersarneqassapput, matumani ilanngullugu umiarsuup piginnittua tassaasoq nalunaarsuiffimmut ilanngussinnaanermut tassungalu ilaaginnarsinnaanermut piumasaqaatit naammassineqarsimanissaannut akisussaasuusoq. Tassa imaappoq piginnittoq piumasaqaatinik taakkuninnga unioqqutitsisimappat tamanna umiarsuaq nalunaarsuiffimmit piiarneqarsimatinnagu inuttat akileraarutaannut tunngasunut sunniuteqartussaanngilaq.

Aalajangersakkap oqaasertalersugaanerata kingunerisaanik imaalersussaavoq umiarsuaatileqatigiiffiit umiarsuaataat ilaasunik angallassissutit 1.100 bruttotonsinik taakkuluunniit sinnerlugit usisinnaassuseqartut, aammalu ilaasunik nalinginnaasunik takornarianillu ilaasoqarlutik ingerlaartut imaluunniit takornarianik angallassissutitut ingerlaartut tamarmik umiarsuarni inuttat akissarsiaasa akileraarutitaat pillugit aaqqissuussinermut ilaatinneqalissallutik. Tamanna aamma nunani allani umiarsuaatileqatigiiffinnut atuutissaaq, ilaasunik nalinginnaasunik takornarianillu ilaasoqarluni ingerlaarneq imaluunniit takornarianik angallassilluni ingerlaarneq Kalaallit Nunaanni aalajangersimasumik ingerlatsivimmiit ingerlanneqarpat, aammalu ingerlaarneq kalaallit umiarsuaataat ilaasunik angallassissutit atorlugit ingerlanneqarpat.

Ilaasunik nalinginnaasunik takornarianillu ilaasoqarluni ingerlaarneq tassaavoq umiarsuaq ilaasunik angallassissut atorlugu takornarianik, angalanernut ataatsimut aaqqissuuteriikkanut Danmarkimiit, Savalimmiuniit nunanilluunniit allaniit aaqqissuussanut atatillugu timmisartumut aammalu umiarsuarmut billetsimik pisisimasunik, aamma maani nunaqartunik Kalaallit Nunaata iluani umiarsuakkut angalanissaannarmik kissaateqartunik ilaasoqarluni aalajangersimasumik ingerlaarfeqarluni angallassineq.

Pisortanut aningaasatigut allaffissornikkullu sunniutissai:

Umiarsuarni inuttat akissarsiaasa akileraarutitaat pillugit aaqqissuussinerup atuuffia annertusillugu kalaallit umiarsuaanni ilaasunik angallassissutini, aammalu ilaasunik nalinginnaasunik takornarianillu ilaasoqarlutik ingerlaartuni sulisuusunut atuutilersinnerata akileraarutitigut isertitassaagaluit 5 mio. kr.-nit missaannik annaasaqaataajumaarnissaa nalilerneqarpoq, tassa agguataarlugit landskarsimut 1,3 mio. kr.-it missinginik kommuninullu 3,7 mio. kr.-it missinginik, tassa kommunimut aammalu kommuninut ataatsimut akileraarutitigut isertitakinnerulernikkut.

Tamakku eqqarsaatigalugit isiginianngitsuugassaanngitsoq tassaavoq umiarsuarni inuttat akissarsiaasa akileraarutitaat pillugit aaqqissuussineq siunnersuutigineqartoq pilersinneqanngippat ingerlatat taamatuttaarlu akileraarutitigut isertitassat annaaneqassagaluarnerat.

Siunnersuummut uunga ilutigitillugu umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit pillugit Inatsisartut inatsisaata allanngortinneqarneranik siunnersuut saqqummiunneqarpoq. Siunnersuutip taassuma imarai umiarsuit takornarianik angallassissutit ilaasunik angallassinerannut akileraarutip qaffanneqarnissaa, soorluttaaq takornarianut Sarfaq aamma Sarpik Ittuk-mi ilaasunut aamma atuutilersinneqassasoq, tamannalu maannamut taamaassimanngikkaluarpoq. Umiarsuit takornarianik angallassissutit ilaasunik angallassinerannut akileraarutip takornariatut ilaasunik ilaneratigut isertitassat annertuseriaatissaat 1,3 mio. kr.-inut eqqoriarneqarpoq, taamaalillutik pisortat karsiisa ilanngaatissat ilanngaatigereerlugit isertitassaraluamikkut annaasassaat katillugit 3,7 mio. kr.-it missaannut naatsorsorneqalerlutik.

Inuussutissarsiutinik ingerlataqartunut aningaasatigut allaffissornikkullu sunniutissai:

Inatsisissatut siunnersuut inuussutissarsiutinik ingerlataqartunut aningaasatigut allaffissornikkulluunniit sunniuteqartussaanngilaq.

Avatangiisinut pinngortitamullu sunniutissai:

Inatsisissatut siunnersuut avatangiisinut pinngortitamulluunniit sunniuteqartussaanngilaq.

Innuttaasunut allaffissornikkut sunniutissai:

Inatsisissatut siunnersuut innuttaasunut allaffissornikkut sunniuteqartussaanngilaq.

Naalagaaffeqatigiinnermut namminersornermullu tunngasut:

Inatsisissatut siunnersuut naalagaaffeqatigiinnermut namminersulernissamulluunniit tunngasunik imaqanngilaq.

Pisortatut oqartussaasunik kattuffinnillu tusarniaaneq:

Inatsisissatut siunnersuut Aningaasaqarnermut Pisortaqarfimmut, Ineqarnermut Attaveqaqatigiinnermullu Pisortaqarfimmut, Inuussutissarsiornermut, Nunalerinermut Suliffeqarnermullu Pisortaqarfimmut, Greenland Tourism-imut, KANUKOKA-mut aamma SIK-mut tusarniaassutigalugu nassiunneqarnikuuvoq.

Tusarniaanermut akissutit Akileraartarnermut Akitsuusiisarnermullu Ataatsimiititaliamut nassiunneqarnikuupput siunnersuummulli allannguutissaqartitsisimanatik.

 

Inatsisissatut siunnersuummi aalajangersakkanut ataasiakkaanut oqaaseqaatit

 

§ 1-imut

Siunnersuutigineqarpoq inuit umiarsuarni, Akileraartarnermut Pisortaqarfiup umiarsuarni inuttat akissarsiaasa akileraarutitaat pillugit aaqqissuussinermut nalunaarsuiffianut nalunaarsorsimasuni sulisuusut akileraarutissaat tamarmiusut akissarsiat taakkua akileraarutitaannut naapertuuttumik annertussusilinnik appaaffigineqartassasut, tak. imm. 4.

Appaanissami piumasaqaataavoq pineqartoq tassaassasoq kalaallit umiarsuaat ilaasunik angallassissut 1.100 bruttotonsinik taakkuluunniit sinnerlugit usisinnaassuseqartoq, aammalu takornarianik angallassilluni ingerlaartoq imaluunniit ilaasunik nalinginnaasunik takornarianillu ilaasoqarluni ingerlaartoq. Ingerlaarnerup taassuma Kalaallit Nunaata imartaata iluani avataaniluunniit ingerlanneqarnera apeqqutaanngilaq.

Ilaasunik nalinginnaasunik takornarianillu ilaasoqarluni ingerlaarnerup suunera imm. 2-mi nassuiarneqarpoq.

Umiarsuit takornarianik angallassissutit atorlugit ilaasunik angallassilluni ingerlaarneq tassaavoq umiarsuaq ilaasunik angallassissut aalajangersimasumik ingerlaarfeqanngitsoq, aammalu ilaasunik umiarsualivimmiit umiarsualivimmut allamut angallassinissamik pingaarnertut siunertaqanngitsoq atorlugu angallassineq. Ilaasut siunertaat pingaarneq tassaanerusarpoq nuannisarnissaq qasuersaarnissarlu, soorluttaaq umiarsuarmi takornarianik angallassissumi ilaasuunissaq takornariaalluni imminermini pilerinartuussasoq. Umiarsuit takornarianik angallassissutit atorlugit ilaasunik angallassinerup nassuiarneqarnerata taamaalilluni assigaa umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit pillugit Inatsisartut inatsisaanni § 1, imm. 2-mi nassuiaat. Umiarsuup ilaasunik angallassissutip ilaasunik umiarsualivimmiit umiarsualivimmut allamuinnaq angallanneqarnissaq siunertaralugu amerlanngitsunik ilaasoqartarnera umiarsuup ilaasunik angallassissutip takornarianik angallassilluni ingerlaartuuneranik allannguisuunngilaq.

Umiarsuup ilaasunik angallassissutip umiarsualivimmiit umiarsualivimmut allamut sumiiffimmilluunniit sumiiffimmut allamut ilaasunik angallassinissaq siunertarinerullugu takornarianik angallassilluni ingerlaarnini imaluunniit ilaasunik nalinginnaasunik takornarianillu angallassilluni ingerlaarnini piffissap ilaani unitsikkallarpagu ingerlaarneq taanna aalajangersakkami pineqartunut ilaassanngilaq, taamaattumillu ingerlaarnermi tassani inuttat akissarsiaattut tunniunneqartut akileraarutinik A-nik unerartitsivigineqassapput.

Kalaallit umiarsuaatileqatigiiffiat matumani tassaavoq umiarsuaatileqatigiiffimmik ingerlatsivik, piginneqatigiilluni umiarsuaatileqatigiiffik imaluunnit aktieselskabi umiarsuaatileqatigiiffik aningaasarsianit akileraarutit pillugit inatsimmi § 1 naapertorlugu Kalaallit Nunaannut tamakkiisumik akileraartussaatitaasoq, imaluunniit § 2 naapertorlugu killilimmik akileraartussaatitaasoq.

Isumaqatigiissutit umiarsuarni, umiarsuarni inuttat akissarsiaasa akileraarutitaat pillugit aaqqissuussinermut nalunaarsuiffianni atuisuusuni sulinermik taamaallaat imaqarnerannik taakkunani allassimasoqarnissaanik piumasaqaatip kingunerissavaa umiarsuup, umiarsuarni inuttat akissarsiaasa akileraarutitaat pillugit aaqqissuussinermut atuisut nalunaarsuiffiannut nuunneqarneranut atatillugu isumaqatigiissutinik nutaanik isumaqatigiissuteqartoqarnissaa. Umiarsuit, umiarsuarni inuttat akissarsiaasa akileraarutitaat pillugit aaqqissuussinermut atuisut nalunaarsuiffianni sulisuisa akissarsiaat sulinikkullu atugassarisaat pillugit isumaqatigiissutit sulisut kattuffii arlaqartut peqatigalugit isumaqatigiissutigineqarsinnaapput. Taamaalillutik sulisuusut isumaqatigiissutini ilaatinneqanngitsut akissarsiaat sulinikkullu atugassarisaat sulisuusut ataasiakkaat umiarsuaatileqatigiiffiullu pineqartup, imaluunniit taassuma taamaaliornissamut piginnaatitaata akunnerminni isumaqatigiissutigisariaqassavaat.

Sulinikkut aningaasarsiat matumani tassaapput aningaasanngorlugit aningaasanilluunniit nalilittut aningaasarsiat akileraaruteqaataasussat suulluunniit, matumani aamma inuttat akissarsiaat, aningaasarsiat allallu sulinikkut akiliutigineqartut, kiffartulussinnarnaveeqqutisiat, drikkepenget assigisaallu sulisuusup sulinermini umiarsuarmiluunniit sullissinermini pissarsiarisai. Tamakkununnga aamma ilanngunneqassapput aningaasat sulisuusup nunamiikkallarnerani tunniunneqartut, kiisalu napparsimanermi erninermiluunniit ullormusiat pillugit inatsisit naapertorlugit ullormusiat umiarsuaatileqatigiiffimmit tunniunneqartut, aamma umiialersunik ikiuinermi akissarsiat.

Aningaasat umiarsuarmi akeqanngitsumik nerisaqarnissamut taarsiullugit tunniunneqartut annertussusii aammattaaq aningaasarsianut ilanngullugit naatsorsorneqassapput.

Umiarsuarmi sulinikkut aningaasarsiat aamma tassaapput umiarsuup ilaasunik angallassissutip piffissami sananeqarnerani, iluarsaanneqarnerani amutsivimmiikkallarneraniluunniit umiarsuarmi sulinikkut akissarsiat. Tamanna umiarsuup inuttaanuinnaq atuuppoq.

Kiisalu siunnersuutigineqarpoq umiarsuarni inuttat akissarsiaasa akileraarutitaat pillugit aaqqissuussinermut nalunaarsuiffimmut tassunga ilanngunnissamut tassungalu ilaajunnaarnissamut maleruagassat erseqqinnerusut Naalakkersuisunit aalajangersarneqarsinnaassasut, matumani ilanngullugu umiarsuarmik piginnittup piumasaqaatit atuutsinneqarnissaanik akisussaasuunissaat aammalu umiarsuup piginnittui kisimiillutik akisussaasuuneq pillugu maleruagassat nalinginnaasut taakkununnga atuutsinneqarnissaat.

Umiarsuarni inuttat akissarsiaasa akileraarutitaat pillugit aaqqissuussinermut atuisut piginnaatitaaffii kingumoortumik atuutsinneqalersinnaanngillat umiarsuarmik piginnittuusut unioqqutitsissagaluarpataluunniit, tassa inuttat umiarsuarni inuttat akissarsiaasa akileraarutitaat pillugit aaqqissuussinermut ilaatinneqartassamata, umiarsuup, umiarsuarmi inuttat akissarsiaasa akileraarutitaat pillugit aaqqissuussinermut ilaajunnaarnissaa tikillugu, tamannalu kingumoortumik atuutsinneqarsinnaanera pisinnaanngilaq.

 

§ 2-mut

Inatsisartut inatsisaata ullormi 1. april 2006-imi atuutilernissaa siunnersuutigineqarpoq.