12. oktober 2006 UKA 2006/34
Pisortanit ikiorsiissutit pillugit Inatsisartut peqqussutissaattut siunnersuut
pillugu
Inatsisartut Ilaqutariinnermut Ataatsimiititaliaata
ISUMALIUTISSIISSUTAA
siunnersuutip aappassaaneerneqarnerani saqqummiunneqartoq
Inatsisartut Ilaqutariinnermut Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Agathe Fontain, Inuit Ataqatigiit (siulittaasoq)
Inatsisartunut ilaasortaq Thomas Kristensen, Atassut (siulittaasup tullia)
Inatsisartunut ilaasortaq Agnethe Davidsen, Siumut
Inatsisartunut ilaasortaq Tommy Marų aamma Ruth Heilmann, sinniisussat, tamarmik Siumumeersut
Inatsisartunut ilaasortaq Astrid Fleischer Rex, Demokraatit
Inatsisartut Ilaqutariinnermut Ataatsimiititaliaata UKA 2006-imi siullermeerinerup kingorna siunnersuut misissuataarpaa.Tusarniaanermi akissutit
Siunnersuutip suliarineqarnerani atugassatut tusarniaanermi akissutigineqartut nuutinneri Ilaqutariinnermut Ataatsimiititaliap pissarsiarisimavai. Tusarniaanermi akissutigineqartut iluatinnaatillit amerlasuut Ilaqutariinnermut Ataatsimiititaliap qujassutigai.
Siunnersuut marloriarlugu tusarniaassutigineqarsimasoq Ilaqutariinnermut Ataatsimiititaliap maluginiarpaa, tamannalu pitsaasutut isigineqarpoq.
Tusarniaanermili atortussat annertussusaat pisariunerallu eqqarsaatigalugu tusarniaanerit ataasiakkaat sapaatit akunnerinik tallimanik sivikinnerusumik piffissalerneqarsimanerat naammaginavinngitsutut Ilaqutariinnermut Ataatsimiititaliamit isigineqarpoq. Kiisalu atortussat kalaallisut danskisullu tamakkiisut pigineqaleraangata KANUKOKA-p kommuninut aatsaat tusarniaassutigisarmagit tassunga atatillugu erseqqissaatigineqassaaq.
Siunnersuut inatsimmut kommunini ingerlatsivinnit aqutsivigineqartussamut assersuutissaqqippoq. Minnerunngitsumik pisuni taama ittuni piareersarnerup ingerlanneqarnerata sukumiisorujussuunissaa assut pingaaruteqarpoq, taamaaliornikkut inatsimmik ulluinnarni atuisussat sukumiisumik tusarniarneqarsinnaaqqullugit misilittakkaminnillu qitiusumik oqartussaasunut tunniussisinnaaqqullugit.
Tamanna tunngavigalugu tusarniaanermut naammaginartumik siunissami piffissaliisarnissamut Naalakkersuisoqarfik Ilaqutariinnermut Ataatsimiititaliamit kaammattorneqarpoq.
Siunnersuutip ilusiligaanerata misissornera
Siunnersuutip ilusiligaanerata missorneqarnissaanut atorfilittamik atugassinneqaqqulluni Ilaqutariinnermut Ataatsimiititaliap Ilaqutariinnermut Inatsisinillu Atortitsinermut Naalakkersuisoqarfik qinnuigaa. Qinnuiginninneq akuerineqarpoq siunnersuutillu ilusiligaanera pillugu imartuumik ataatsimiititaliaq saqqummiussivigineqarpoq.
Apeqqutit
Siunnersuummik suliarinninnermut atugassatut apeqqutit arlaqaqisut akissuteqarfigeqqullugit Ilaqutariinnermut Inatsisinillu Atortitsinermut Naalakkersuisoq Ilaqutariinnermut Ataatsimiititaliamit qinnuigineqarpoq. Ataatsimiititaliap apeqqutaasa Naalakkersuisunullu ilaasortap akissutaasa nuutinneri isumaliutissiissummut matumunnga ilanngussatut ilanngunneqarput.
Siunnersuummut oqaaseqaatigiumasat
Siunnersuut siullermeerneqarnermini Inatsisartuni partiinit tamanit tunngaviusumik taperserneqarpoq.
Siunnersuummi pingaarnertut tunngaviusut Ilaqutariinnermut Ataatsimiititaliap isumaqatigiittup taperserpai, taakkumi malillugit aningaasaqarnerup tungaanit isigalugu sulineq tamatigut imminut akilersinnaajuartariaqarpoq. Inuit ataasiakkaat imminnut, aappaminnik meeqqaminnillu 18-it inorlugit ukiulinnik pilersuisuusinnaasariaqarput. Illuatungaatigulli imminut pilersorsinnaajunnaarsimagaanni pisortanit ikiorserneqarsinnaasariaqarpoq. Ikiorsiinerli sulinermi pissarsiarineqarsinnaasut annikinnerpaaaffianit annikinnerusariaqarpoq.
Piniartut aalisartullu inuussutissarsiummik ingerlatsinerminni pissutsinik immikkut ittunik atugaqarnerat siunnersuummik siullermeerinermi oqaluuserineqarpoq. Pisortanit ikiorsiissutinik pissarsinissamut piginnaatitaaffiit pisussaaffiillu pillugit siunnersuummi aalajangersakkat eqqarsaatigalugit piniartut aalisartullu immikkut inissisimannginnerat Ilaqutariinnermut Ataatsimiititaliamit tusaatissatut tiguneqarpoq. Piniartut aalisartullu piffissani sivikinnerusuni pisortanit ikiorsiissutinik ataasiaannartumik tapiissutitut pisartagaqartariaqarsimatillutik piniarnermut allagartaminnik tigumminniinnarsinnaanerannut periarfissaqarpoq. Tamanna pillugu apeqqutip 2-p akineqarnerani itinerusumik nassuiaat Ilaqutariinnermut Ataatsimiititaliap innersuussutigaa.
Allamut tunngatillugu aalisartut piniartullu allalluunniit immikkut ikiorserneqarnissaat sulissutigineqartariaqartillugu, tamanna immikkut inatsisiliaq aqqutigalugu pisariaqarpoq.
Iliuusissatut pilersaarutinut atatillugu siunnersuutip aningaasatigut kingunerisassaanut tunngasut Naalakkersuisut KANUKOKA-lu aaqqiissuteqarfigisimammatigit Ilaqutariinnermut Ataatsimiititaliap iluarisimaarpaa.
Iliuusissatut pilersaarutit atorneqalernissaat Ilaqutariinnermut Ataatsimiititaliap assorsuaq neriulluarfigaa. Ineriartornissamik pitsanngorsaanissamillu siunertaqarnermi iliuusissatut pilersaarutit pisortanit ikiorsiissutisisartut pillugit ilisimasanik atorluarneqarsinnaasunik pitsaasunillu pissarsinissamut ilapittuutaasinnaapput.
Iliuusissatut pilersaarutinik atuinerup assigiinngissitaartuunissaa Ilaqutariinnermut Ataatsimiititaliamit ilimagineqarpoq. Taamaattumik iliuusissatut pilersaarutinik kommunit atuineranni Naalakkersuisoqarfiup misilittagariligaanik ilisimaligaannillu ingerlaavartumik ilisimatinneqartarnissani Ilaqutariinnermut Ataatsimiititaliap qinnutigissavaa.
Kikkulluunniit pisortanit ikiorserneqarnissamik qinnuteqartut imminut pilersorsinnaanissaminnut periarfissaminnik qanoq pitsanngorsaasinnaanerat pillugu siunnersorneqarnissamut piginnaatitaanerat siunnersuutikkut qulakkeerneqartoq Ilaqutariinnermut Ataatsimiititaliamit erseqqissarneqassaaq.
Iliuusissatut pilersaarutit pillugit siunnersuummi maleruagassanik aalajangersaasoqarnera aammalu pisortanit ikiorsiissutinik pissarsisartut iliuusissatut pilersaarummik suliaqartitsinissamut annertuumik piginnaatitaaffeqarnerat pillugit sukumiisumik paasisitsiniaasoqassaaq.
Apeqqut 8 aamma 9 aallaavigalugit aammalu Naalakkersuisunut ilaasortap akissuteqaataanik sanilliussinikkut isumaginninnermut tunngasunik nakkutilliineq Ilaqutariinnermut Ataatsimiititaliap sukumiisumik oqaluuseraa. Nakkutilliinerup qanoq pitsanngorsarneqarsinnaanera kommuninullu iliuuserineqarsinnaasunik aalajangersaagaliornissaq qanoq annertutigisumik pisariaqartinneqarnersoq pillugu Ilaqutariinnermut Ataatsimiititaliamut siunnersuusioqqullugu Naalakkersuisoqarfik Ilaqutariinnermut Ataatsimiititaliamit kaammattorneqarpoq.
Nakkutilliineq pillugu nalunaarusiat, kommunalbestyrelsinut kommuninullu nakkutilliisoqarfimmut ingerlaavartumik nassiunneqartartut pillugit Ilaqutariinnermut Ataatsimiititaliaq paasitinneqarsimanngisaannarpoq. Nakkutilliineq pillugu nalunaarusiat kommuninut nakkutilliisoqarfiup sumut atortarnerai Ilaqutariinnermut Ataatsimiititaliamit ilisimaneqanngilaq, tamannalu pillugu kommunit nakkutilliisoqarfiannit oqaaseqaatinik paasissutissanillu Ilaqutariinnermut Ataatsimiititaliaq tigusaqanngisaannarluni. Isumaginninnermut tunngasuni maleruagassat aqutsivigineqarnerannut Ilaqutariinnermut Ataatsimiititaliap paasitinneqartarnera nukittorsarneqarsinnaaqqullugu Ilaqutariinnermut Pisortaqarfiup nakkutilliineq pillugu nalunaarusiaataanik tamakkiisunik siunissami ataavartumik nassinneqartalernissani Ilaqutariinnermut Ataatsimiititaliap kissaatigaa.
Illerfiit angallanneqarnerinut atatillugu aningaasartuutit matussuserneqartarnissaannut siunnersuutip tunngavissiinnginnera Ilaqutariinnermut Ataatsimiititaliamit tusaatissatut tiguneqarpoq.
Siunnersuut allannguutissaatut siunnersuutit
Siunnersuummi § 5-imut nassuiaatit amigaataanerat Naalakkersuisunut ilaasortap iliuusissai Ilaqutariinnermut Ataatsimiititaliamit qilanaarineqarput. Siunnersuummut allannguutissatut siunnersuut nassuiaatitalik periarfissaavoq atorsinnaasoq.
Siunnersuummi § 27, imm. 1, nr. 1-imut oqaasertaliussat nassuiaatillu akornanni naapertuutinngitsoqartoq Ilaqutariinnermut Ataatsimiititaliap maluginiarpaa. Ilaqutariinnermut Ataatsimiititaliap apeqqutaanut 16-imut Naalakkersuisunut ilaasortap akissuteqaataa innersuussutigalugu aallajangersakkamut allannguutissatut siunnersuummik saqqummiussisoqarnissaa Ilaqutariinnermut Ataatsimiititaliamit utaqqimaarneqarpoq.
Kommunit inatsisissamut nutaamut peqqissaarlutik piareersarluarnissaat eqqarsaatigalugu siunnersuutip atortuulerfissaatut aalajangersakkamut allannguutissatut siunnersuummik saqqummiussinissaq Naalakkersuisut qulakkiissagaat Ilaqutariinnermut Ataatsimiititaliap isumaqatigiittup kaammattuutigissavaa, taamaalilluni Inatsisartut peqqussutissaat 1. januar 2007-imi atortuulernani 1. april 2007-imi atortuulersinnaaqqullugu. Peqqussutissap atortuulerfissaanik kinguartitsineq tamanut iluaqutaassaaq maleruagassallu aqutsiviginissaannut Ilaqutariinnermut Pisortaqarfik kommunillu pisariaqartumik piffissalerneqarlutillu piareersarnissamut periarfissinneqassapput.
Taama oqaaseqarluni Inatsisartut Ilaqutariinnermut Ataatsimiititaliaata peqqussutissatut siunnersuut aappassaaniigassanngortippaa.
Agathe Fontain
Siulittaasoq
Thomas Kristensen
Agnethe Davidsen
Tommy Marų
/v Ruth Heilmann
Astrid Fleischer Rex
Ilanngussaq 1 (pdf-format)
Ilanngussaq 2 (pdf-format)