29. oktober 2006

UKA 2006/34

 

Pisortanit ikiorsiissutit pillugit Inatsisartut peqqussutissaattut siunnersuut

pillugu

Inatsisartut Ilaqutariinnermut Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

Aappassaanerinninneq unitsinneqareersorlu Naalakkersuisut siunnersuummut allannguutissatut siunnersuut Ilaqutariinnermut Ataatsimiititaliap sukumiisumik misissuataarpaa.

Allannguutissatut siunnersuummut oqaaseqaatit

Ilaqutariinnermut Ataatsimiititaliap kaammattuineratigut allannguutissatut siunnersuummik makkuninnga nassataqartumik Naalakkersuisut saqqummiussaqarnerat Ilaqutariinnermut Ataatsimiititaliap naammagisimaarlugu maluginiarpaa,

• peqqussutissatut siunnersuut ulloq 1. april 2007-imi atuutilersinnaammat,
• siunnersuummi § 13, imm. 3-mi kingunerisassat iluarsiivigineqarnissaasa ingerlanneqartariaqartut, aamma
• siunnersuummi § 27, imm. 1-ip aalajangersakkallu oqaaseqaataasa akornanni imminnut naapertuuttunngortinneqarnerat.

Taakku saniatigut napparsimasut nunatsinni danmarkimiluunniit napparsimmavinni uninnganerminni tamatiguunngikkaluartumik kaasarfimmiulerneqartalernissaannik kinguneqartussamik aalajangersakkamik nutaamik siunnersuummik Naalakkersuisut kaammattorneqanngikkaluarlutik saqqummiussaqarput.

Aalajangersagarli taanna pisortanit ikiorsiissuteqartanermi malittarisassanut ilaatinneqartunut napparsimasunut sammitinneqarmat aalajangersakkallu napparsimasunut pineqartunut inatsisitigut inissisimanerat pitsanngortittussaammagu Ilaqutariinnermut Ataatsimiititaliap isumaqatigiittut aalajangersagaq taanna aamma taperserpaa.

Tamatuma saniatigut allannguutissatut siunnersuut aammattaaq inatsisissatut siunnersuummut § 5-imut nassuiaasuusumik ilanngussamik imaqarmat Ilaqutariinnermut Ataatsimiititaliap paasivaa.

Allannguutissatut siunnersuut maanna ilusimisut iluseqartoq akuersissutigineqassasoq Ilaqutariinnermut Ataatsimiititaliap isumaqatigiittup inassutigissavaa.

 

	Agathe Fontain Siulittaasoq
Emilie Olsen Thomas Kristensen sinnerlugu		Agnethe Davidsen
Isak Davidsen Tommy Marų sinnerlugu		Astrid Fleischer Rex