16. oktober 2006

UKA 2006/034

 

Pisortanit ikiorsiissutit pillugit Inatsisartut inatsisissaatut nr. xx, uu.qqqq. 2006-imeersussatut siunnersuummut

 

Allannguutissatut siunnersuut

Aappassaaneerinninnermut Naalakkersuisunit saqqummiunneqartoq.

 

§ 13-imut

1. Imm. 3, ima oqaasertalerneqassaaq:
"Aningaasartuutiviusut tunngavigalugit kiisalu najugaqatigiissinnaanermi iluaqutissat aallaavigalugit aningaasat aalajangersarneqassapput. Pilersuinermut aningaasartuutinullu aalajangersimasunut pisortanit ikiorsiissutit annerpaamik SIK-p Naalakkersuisullu akornanni isumaqatigiissutit naapertorlugit ilinniarsimanngitsumut aningaasarsiarititat ikinnerpaaffiisa 65%-erisinnaavaat, taamaattorli imm. 4 takuuk."

2. § 01 sioqqullugu qulequtaq ima oqaasertalerneqassaaq:

"Napparsimasunut kaasarfimmiussissutit"

3. § 23-p kingorna paragrafitut nutaatut ikkunneqassaaq:
" § 01. Pisortanit ikiorsiissutit napparsimasunut Nunatsinni Danmarkimillu napparsimmavinni uninngasunut kaasarfimmiussissutitut tunniunneqarsinnaapput.
Imm. 2. Napparsimasut Nunatsinni Danmarkimilu uninngasut kaasarfimmiussaannik pisortanik ikiorsiisoqarsinnaanerannut malittarisassanik Naalakkersuisut aalajangersaasinnaapput."

§ 27-mut

4. § 27, imm. 1, ima oqaasertalerneqassaaq:
" § 27. Aammattaaq kommunalbestyrelse pisortanit ikiorsiissutit utertinneqarnissaat pillugu aalajangiisinnaavoq:
1)  Inuup aningaasaqarnikkut sulinikkulluunniit mianersuaalliorluni iliuuseqarnera pissutigalugu pineqartoq ikiorneqartariaqarpat.
2)  Piffissami pisortanit ikiorsiissutisinissamik qinnuteqarfiusumi takuneqarsinnaappat qinnuteqartoq piffissap sivikitsup ingerlanerani pisortanit ikiorsiissutinik utertitsisinnaasoq."

§ 31-mut

5. § 31, imm. 1, ima oqaasertalerneqassaaq:
" § 31. Inatsisartut peqqussutaat 1. april 2007-imi atuutilerpoq."

 

 

Nalinginnaasumik nassuiaatit

Allannguutissatut siunnersuut allannguutinik pingaarnertut siunnersuutip Inatsisartuni siullermeerneqarnerata kingorna Ilaqutariinnermut Ataatsimiititaliap isumaliutissiissutaanik tunngavilinnik imaqarpoq.

Tamatuma saniatigut allannguutissatut siunnersuummi napparsimasunut Nunatsinni Danmarkimilu napparsimmavinni uninngasunut pisortanit ikiorsiissuteqarnissamut tunngavissiisoqarpoq.

 

Aalajangersakkanut ataasiakkaanut nassuiaatit

§ 5-imut

Aalajangersagaq peqqussummi pineqartumi § 4-mut naapertuuppoq.

Imm. 1-imut
Aappariinneq pillugu inatsit meeqqalluunniit inatsisitigut illersugaanerat pillugu inatsit naapertorlugu pisartagallip piumasaqaataanut pisortat ilanngussinnaanerat aalajangersakkami periarfissiuunneqarpoq. Pisortanit ikiorsiinermi pisortat pisartagalimmut pilersuilissapput taamaalillutillu aningaasanik pisartagallip pilersorneqarnermini tigusimasaanik utertitsisoqarnissaanik piumasaqarsinnaallutik. Pisortat piumasaqaatinut ilanngunnermikkut akilersuisussaatitaasut aningaasanik naapertuutinngitsumik atuinissaat pinngitsoortissinnaavaat.

Imm. 2-mut
Imm. 2 naapertorlugu pisortat akilersuutit aalajangersarneqarnissaannik qaffanneqarnissaannilluunniit namminneq piumasaqarsinnaatitaapput. Taamatut pisinnaatitaaneq pisariaqarpoq, pisortat inunnut pilersuisussaatitaasumit pilersorneqartussaagaluartunut pisortanit ikiorsiinnginnissaat qularnaarniarlugu. Taamaattumik akilersuutit aalajangersarneqarnissaannik qaffanneqarnissaannilluunniit nammineq piumasaqarsinnaatitaaneq pisariaqarpoq akilersuisussaatitaasoq piaaraluni akilersuutissat aalajangersarneqarnissaat qaffanneqarnissaalluunniit piumasarinngippagu aalajangersakkap imm. 1-imiittup imarisai qularnaarniarlugit.

§ 13, imm. 3-mut

Paragrafimi innersuussut eqqortuutikkumallugu allannguisoqarpoq.

§ 01-imut

Napparsimasut inatsisitigut illersorneqarnissaat pillugu erseqqissunik malittarisassaqartitsiumalluni aalajangersagaq ilanngunneqarpoq.

Imm. 1-imut
Napparsimasunut Nunatsinni Danmarkimilu napparsimmavinni uninnngasunut kaasarfimmiussissutitut pisortanit ikiorsiinissaq aalajangersakkakkut tassuuna periarfissinneqarpoq. Tamanna pillugu napparsimasunut Nunatsinni Danmarkimilu napparsimmavinni uninngasunut kaasarfimmiuliisarneq pillugu Ilaqutariinnermut Pisortaqarfiup kaajallaasitaani nr. 214-imi, kiisalu napparsimasunut Nunatsinni napparsimmavinni uninngasunut kaasarfimmiussissutinik qinnuteqartarneq tunniussisarnerlu pillugit Ilaqutariinnermut Pisortaqarfiup kaajallaasitaani nr. 222-mi malittarisassaqartitsisoqareerpoq. Taamaalilluni aalajangersakkami taamaallaat pisortanit ikiorsiissutit atorneqarnissaat pillugu malittarisassat atuutereersut tunngavilerneqassapput.

Imm. 2-mut
Aalajangersakkami Naalakkersuisut napparsimasunut Nunatsinni Danmarkimilu napparsimmavinni uninngasunut kaasarfimmiussissutitut pisortanit ikiorsiisarneq pillugu malittarisassanik aalajangersaanissaannik pisussaaffilerneqarput. Malittarisassat pisortanit ikiorsiissutit pillugit nalunaarummi atuutilersinneqassapput kiisalu kaajallaasitani malittarisassat atuutereersut nalunaarutip atuutilerneratigut atorunnaartussat iluarsissallugit. Napparsimasunut napparsimmavinni uninngasunut kaasarfimmiussiisarnissaq pillugu kaajallaasitani atuuttuni pinnani nalunaarummi malittarisassaqartitsinerup malittarisassat atuuttut erseqqissarneqarnissaat nassatarissavaa. Nalunaarutip pisartagaqarsinnaasut inatsisitigut pitsaanerusumik illersorneqarnissaat kiisalu kommunini sullissisut sulinerminni malittarisassanik atuinissaasa pisariillisarneqarnissaa kingunerissavaa.

§ 27-mut

Imm. 1-imut
Aammattaaq kommunalbestyrelsip qaqugukkut pisortanit ikiorsiissutit utertinneqarnissaannik piumasaqarsinnaanerata erseqqissarneqarnissaa siunnersuutigineqarpoq. Aalajangersakkami kommunalbestyrelsip ikiorsiissutit utertinneqarnissaannik aalajangiisinnaaffii kisiisa taagorneqarput.

Nr. 1-imut
Pisortanit ikiorsiissutisisoq assersuutigalugu akissarsiarpassuarminik piffissap sivikitsuinnaap ingerlanerani atuippat, akissarsiallu isumatusaartumik atuinikkut sivisunerusumik pigineqarsinnaasimagaluarpata, ass. aalisartoq sapaatit akunnerini tallimani matussutaasussanik akissarsilluni sapaatit akunnerini tallimani sulinngiffeqarpat, pineqartullu piffissaq sulinngiffeqarfini tamaat akissarsiaminik paarsisinnaanngippat, imaluunniit inuk uternissaminut billetisiutissaminik aningaasanik naammattunik peqarani kommunimut allamut sulinngiffeqarluni aallarpat pisortanit ikiorsiissutisisoq aningaasaqarnikkut mianersuaalliorsimassaaq.

Pisortanit ikiorsiissutisisoq ass. sulinikkut mianersuaalliorsimassaaq, pineqartoq pissutissaqarani sulinngitsoorluni aalakoorluniluunniit suliartorluni soraarsitaappat.

Nr. 2-mut
Aammattaaq pisortanit ikiorsiissutisisoq piffissap sivikitsup ingerlanerani ikiorsiissutinik nammineerluni utertitsisinnaanngorsinnaappat utertitassanngorlugit pisortanit ikiorsiissutinik tunniussisoqarsinnaavoq. Piffissaq sivikitsoq tassaavoq qaammammit sivikinnerusoq. Pisortanit ikiorsiissutit utertitassanngorlugit tunniunneqartarnissaat isumaanngilaq.

Kommunalbestyrelsip aningaasat utertinneqassanersut naliliinermini pisortanit ikiorsiissutisisup taassumalu ilaqutaasa siunissami aningaasaqarnerminnik iluarsiinissamut periarfissaat eqqarsaatigissavai. Aammattaaq pineqartoq siusinnerusukkut mianersuaalliorsimanersoq kiisalu mianersuaalliorneq taanna utoqqatsissutissaqarnersoq kommunalbestyrelsip misissussavaa. Ass. pisortanit ikiorsiissutisisoq ilaqutariinni napparsimasoqarnera pissutigalugu suliartunngitsoorsimanersoq.

§ 31-mut

Peqqussutip 1. april 2007-imi atuutilernissaa siunnersuutigineqarpoq.