12. september 2006

UKA 2006/45

 

Peqqussutissatut siunnersuummut oqaaseqaatit


Oqaaseqaatit nalinginnaasut

1. Aallaqqaasiut
Attartortitsineq pillugu peqqussutip allannguutissaanik saqqummiinissamut tunngaviusimasut annersaraat Naalakkersuisut sulisut sulisunut inissianik najukkaminnik inissiatut attartortittakkatut nalinginnaasutut tigusisinnaanerannik oqilisaassinissamik kissaateqarnerat. Kiisalu pisortat inissiaataanni attartortittakkani attartortut, najugaqarfimmi attartortut allat piginneqatigiilluni inissiaatillit peqatigiiffiannik imaluunniit inissianik nammineq pigisanik inissiaatillit peqatigiiffiannik pilersitsigaluarpataluunniit inissianik najukkaminnik piginneqatigiilluni inissiatut imaluunniit inissiatut nammineq pigisatut tigusinissamik kissaateqanngitsut inatsisitigut inissisimanerat allanngortikkusunneqarpoq erseqqissarneqarusullunilu.

Tamatuma saniatigut siunnersuummi attartortitsisup ineqarnermut akiliut aqqutigalugu najugaqarfimmi pitsannguinissamut imaluunniit attartortitsisup inissiaataani aningaasaleeqqinnissamut pisariaqartinneqartumut atugassanik attartortunut akiliisitsilaarsinnaaneranut, manna tikillugu ineqarnermut akiliut aqqutigalugu matussuserneqarneq ajortumut periarfissamik ammaassisoqarpoq.

Aammattaaq attartortitsisoq pisussaaffilerneqassaaq, attartortup inissiamit aneqqusissummik tigusinerani tamanna pillugu kommunimi isumaginnittoqarfimmut allakkatigut ilisimatitsissuteqartarnissaanik. Isumaginnittoqarfiit attartortumik ikiuunnissamut periarfissinneqarnissaa qulakkeerniarlugu tamanna pissaaq.

Kiisalu peqqussutissatut siunnersuut teknikkikkut allannguutinik arlalinnik, peqqussummi najoqqutassat imaannut allannguutaanngitsunik imaqarpoq. Allannguutit attartortup najugaqarfinni piginneqatigiilluni inissianut imaluunniit inissianut nammineq pigisanut allannguiffiusuni inatsisitigut inissisimanerannut sunniutaasussanik allannguutaasinnaapput.

2. Peqqussutissatut siunnersuummi pineqartut pingaarnerit
§ 21, imm. 2 atuuttoq naapertorlugu attartortoq sulisunut inissiami najukkamini ukiuni kingullerni arfineq marlunni najugaqarsimasoq inissiamik inissiatut attartortittakkatut nalinginnaasutut tigusisinnaavoq. Tassani sulisup piffissap pineqartup iluani inissarsiorlutik allatsissimasunut allattuiffimmut nalinginnaasumut allatsissimanissaa piumasaqaataavoq.

Peqqussutissatut siunnersuummi inissarsiorlutik allatsissimasunut allattuiffimmut nalinginnaasumut allatsissimanissamut piumasaqaat peerneqarpoq, paasinarsisimammat piumasaqaat taanna amerlasuunut sulisunut inissianik najukkaminnik inissiatut attartortittakkatut nalinginnaasutut tigusinissamut akornutaasartoq. Taamaattumik aalajangersagaq atorfillit ukiut arfineq marluk sinnerlugit sulisunut inissiami najugaqaraeernermini inissiamik inissiatut attartortittakkatut nalinginnaasutut tigusisinnaaneranut siunertaasoq malillugu atorneqarsimanngilaq.

Taamatuttaaq § 21, imm. 3-mi attartortunut soraarninngortunut piffissami attartorfiusumi tamarmiusumi inissarsiorlutik allatsissimasunut allattuiffimmut allatsissimanissaannik piumasaqaat peerneqarpoq. Attartortut taakku maanna sulisunut inissiat najukkatik inissiatut attartortittakkatut nalinginnaasutut tigusinnaalissavaat, sulisunut inissiaq ukiuni pingasuni kingullerni najoreersimagunikku.

Kiisalu najugaqarfimmi attartortup najugaani inissiat attartortittakkat piginneqatigiilluni inissiatut allanngortinneqarnerini attartortup inatsisitigut inissisimanerannut maleruagassanut najoqqutassat allannguiffigineqarput. § 24 maanna atuuttoq naapertorlugu attartortup inissiaq attartukkani piginneqatigiilluni inissiatut tigunissaanik kissaateqanngikkuni inissiaq attartortittagaq najukkani piumasaqaatit atuuttut atuinnarlugit najuinnassallugu aalajangersinnaavoq. Peqqussutissatut siunnersuummi attartortup najugaqaannarsinnaanera suli periarfissaqartinneqarpoq, tamatumanili attartortup pisinnaatitaaffii Namminersornerullutik Oqartussat imaluunniit kommunip piginneqataasutut pisinnaatitaaffiinut killilerneqarput.

Kiisalu attartortunut inissiamik attartortittakkamik najukkaminnik piginneqatigiilluni inissiatut tiguserusunngitsunut, kisiannili inissiami najugaqaannarusuttunut ineqarnermut akiliutissaannut naatsorsueriaatsinik nutaanik atuutsitsisoqalissaaq. Ineqarnermut akiliut nutaaq tun-ngaviusunik aningaasartalerneqarluni naatsorsorneqartassaaq. Ineqarnermut akiliutip annertussusissaanut najugaqarfiup, inissiap inissisimaffiata tunniunneqarneranut akiusoq kiisalu inissiap attartortup najugaata angissusaa apequtaatinneqartassapput. Attartortoq najugaqarfimmi najugaqaannarnissamik kissaateqanngikkuni, illoqarfimmi najukkamini inissiamut allamut inissinneqarnissamut Namminersornerullutik Oqartussat imaluunniit kommunip neqeroorutaa tigussallugu periarfissinneqassaaq.

Inissianik attartortittakkanik piginneqatigiilluni inissiatut allanngortinneqarneranni periaaserineqartussaq assigalugu inissiat attartortittakkat inissiatut nammineq pigisatut allanngortinneqarneranni attartortumut atugassarititaasunut aalajangersagaq nutaaq § 24a-mik taaneqartoq ilanngunneqarpoq. Najugaqarfimmi ilivitsumi inissiat sapinngisamik amerlanerpaat inissiatut nammineq pigisatut allanngortinneqartarnissaat anguniarlugu, najugaqarfik ataaseq 16-it tikillugit inissiartaqarpat, tassanilu attartortut affaat sinnerlugit inissianik attartortittakkanik najukkaminnik inissiatut nammineq pigisatut tigusinissamik kissaateqarpata, attartortoq inissiamik allamik neqeroorfigineqassaaq.

Najugaqarfiit ilaasa avatangiisaat assersuutigalugu qalipaatit seqqitsartakkat atorlugit qalipaasarnermik pinaveersaartitsinermut sammisaqartitsinermullu tunngatillugu pitsannguiffigineqarnissamik pisariaqartitsiviupput. Inissiat allat ineqarnermut akiliutip nalinginnaasup saniatigut, soorlu igaffinnut nutaanut imaluunniit uffarfinnut nutaanut aningaasaleeqqinnissamik pisariaqartitsiviupput. Taamaattumik attartortitsisup ineqarnermut akiliut aqqutigalugu suliniuteqarfinnut immikkut atugassanik akiliisitsilaarnissaanut periarfissamik ammaassisoqarpoq. Akiligassaq nammaqatigiilluni akilerneqartassaaq, aammalu pisariaqartitsinermik naliliineq malillugu agguarneqartassalluni.

Tamatuma saniatigut peqqussutissatut siunnersuummi Namminersornerullutik Oqartussat kommunillu aqutsisumik avataaneersumik atorfinitsinneqartunik nakkutilliinissaat erseqqissarneqarpoq. Erseqqissaanermi aningaasaqarnerup nakkutigineqarnissaa kiisalu ingerlatsinerpiamik tamakkiisumik nakkutilliinissaq pingaartinneqarput.

Kapitali 14-imi Ineqarneq pillugu maalaaruteqartarfimmut tunngasumi allannguinerup peqatigisaanik Namminersornerullutik Oqartussat imaluunniit kommunip ataatsip nakkutilliinermi suliassaasa aamma Namminersornerullutik Oqartussat imaluunniit kommunip ataatsip suliassani Ineqarneq pillugu maalaaruteqartarfiup oqartussaatitaaffiisa avataanniittuni suliassanik ingerlatitseqqiffiusartutut suliassaasa akornanni imarisaasa assigiinngissutaasalu erseqqissarneqarnissaat siunertarineqarpoq.

3. Pisortanut aningaasaqarnikkut allaffissornikkullu sunniutissat
Peqqussutissatut siunnersuutip pisortanut aningaasaqarnikkut allaffissornikkullu annertuumik sunniuteqarnissaa naatsorsuutigineqanngilaq.

Naalakkersuisut imaluunniit kommunalbestyrelsi attartortut inissiamik attartukkaminnik piginneqatigiilluni inissiatut imaluunniit inissiatut nammineq pigisatut tigusinissamik kissaateqanngitsut nuunnerannut aningaasartuutinik akiliigallartassapput. Aningaasat annertussusissaannut attartortut nuunnissamik kissaateqartut amerlassusaat, kiisalu attartortut inissiat najugaasa annertussusaat apeqqutaasassapput. Aaqqissuussineq attartortitsisumut akiliisinnaassutsikkut killeqartorujussuarmik sunniuteqartussaavoq. Aningaasartuutissat inaarutaasumik allannguinissap ingerlanerani aningaasartuutitut akilerneqassapput, aammalu inissianik piginneqataalersussanit pigisaqalertussanillu inaarutaasumik akilerneqassallutik.

Attartortunut inissianik attartortittakkanik najukkaminnik piginneqatigiilluni inissiatut imaluunniit inissiatut nammineq pigisatut tiguserusunngitsunut ineqarnermut akiliutip naatsorsorneqartarnerata kingunerisassai pisortanut aningaasaqarnikkut nammagassatigut annertunerulersitsissanngillat, allaffissornermut aningaasartuutissat ukiumoortumik 4.200 kr.-iusut attartortut namminneerlutik ineqarnermut akiliutit aqqutigalugit akilertartussaammatigit. Aammattaaq attartornermut akiliutit naatsorsorneqartarnerat pisortanut aningaasaqarnikkut nammagassatigut annertunerulersitsissanngillat.

4. Inuussutissarsiornermut aningaasaqarnikkut allaffissornikkullu sunniutissat
Peqqussutissatut siunnersuutip inuussutissarsiornermut aningaasaqarnikkut allaffissornikkulluunniit sunniuteqarnissaa naatsorsuutigineqanngilaq.

5. Innuttaasunut aningaasaqarnikkut allaffissornikkullu sunniutissat
Peqqussutissatut siunnersuutip attartortunut, najugaqarfimmi inissianik nammineq pigisanik inissiaatillit peqatigiiffiannik pilersitsiviusimasumi inissiamik attartortittakkamik najugarisaminnik inissiatut nammineq pigisatut tiguserusunngitsunut sunniuteqarnissaa naatsorsuutigineqarpoq. Attartortunut taakkununnga ineqarnermut akiliutissaq siunissami aalajangersarneqarnerani allaffissornermut akiliutissat 4.200 kr.-it, najugaqarfiup sananeqarnerani aningaasaatinit iluanaarutissat 1,5%-iusut kiisalu ingerlatsinermut, aserfallatsaaliuinermut illuartitsinernullu kvadratmeterimut 405 kr.-it kattunneqassapput. Tamanna attartortunut aningaasaqarnikkut artukkiissutaassanersoq imaluunniit aningaasaqarnikkut iluanaarutaassanersoq maanna ineqarnermut akiliutaasup annertussusaa apeqqutaassaaq.

Taamatuttaaq peqqussutissatut siunnersuutip inissianik piginneqataalersussanut inissianillu piginnittunngortussanut aningaasaqarnikkut sunniuteqarnissaa naatsorsuutigineqarpoq, attartortut inissianik piginneqataalernissamik inissianillu pigisaqalernissamik kissaateqanngitsut nuutsinnissaannut aningaasartuutissat inaarutaasumik allannguinissap ingerlanerani aningaasartuutit aqqutigalugit akilerneqartussaammata, taamaalillutillu inissianik piginneqataalersussanit inissianillu pigisaqalersussanit inaarutaasumik akilerneqartussaallutik.

Peqqussutissatut siunnersuutip innuttaasunut allaffissornikkut sunniuteqarnissaa naatsorsuutigineqanngilaq.

6. Avatangiisinut pinngortitamullu sunniutissat
Peqqussutissatut siunnersuutip avatangiisinut pinngortitamulluunniit sunniuteqarnissaa naatsorsuutigineqanngilaq.

7. Sunniutaasinnaasut annertuut allat
Peqqussutissatut siunnersuut allanik annertuunik sunniuteqartussatut naliliiffigineqanngilaq.

8. Pissutsit Naalagaaffeqatigiinnermut namminersulernissamullu attuumassutillit
Peqqussutissatut siunnersuut Naalagaaffeqatigiinnermut namminersulernissamillu suliaqarnermut sunniuteqartussatut naliliiffigineqanngilaq.

9. Oqartussaasunut kattuffinnullu il.il. tusarniaaneq
Peqqussutissatut siunnersuutissap allaqqaarnera tusarniaassutigineqarpoq A/S Inissiaatileqatigiiffik INI-imut, Iserit A/S-imut, KANUKOKA-mut, Naalakkersuisut Allattoqarfiannut, Aningaasaqarnermut Pisortaqarfimmut aamma Sulisoqarnermut Pisortaqarfimmut.

A/S Inissiaatileqatigiiffik INI, Iserit A/S, Naalakkersuisut Allattoqarfiat, Aningaasaqarnermut Pisortaqarfik aamma Sulisoqarnermut Pisortaqarfik tusarniaanermi akissuteqaateqarput.

Tusarniaanermi akissutit, teknikkikkut kukkunernut kiisalu oqaatsitigut kukkunernut amigaatinullu oqaaseqaatitaqartut annertunerusumik oqaaseqaateqarfigineqaratik siunnersuutip allaqqaarnerani iluarsineqarput.

Tusarniaanermi akissutit pissarsiarineqartut allat, siunnersuutip allaqqaarnerani najoqqutassat imaannut tunngassuteqartut annertunersaat matuma kinguliani saqqummiuteqqinneqarput oqaaseqaateqarfigineqarlutillu. Ineqarnermut Attaveqarnermullu Pisortaqarfimmit tusarniaanermi akissutit peqqussutissatut siunnersuutip allaqqaarnerani tulleriinnilersuineq malillugu oqaaseqaateqarfigineqarnissaat naleqqunnerpaatut isumaqarfigineqarpoq.

Siunnersuummi matumani § nr. 5-imut aamma 6-imut

Iserit A/S-imit attartortitsisup attartortunik, inissianik piginneqataalernissamik piginnittun-ngornissamillu kissaateqanngitsunik attartorunnaarsitsisarnissaa eqqarsarnartoqartinneqarpoq, taamaattumillu aalajangersakkami Iserit A/S-imit inassutigineqartut naapertorlugit allannguisoqarpoq. Aalajangersagaq aalajangersakkanut marlunnut, inissianut attartortittakkanut piginneqatigiilluni inissiatut inissiatullu nammineq pigisatut allanngortinneqartunut tunngasunut avinneqarpoq. Kiisalu aalajangersakkat allannguutaapput, taamaalillunilu attartortut inissianik piginneqataalernissamik kissaateqanngitsut inissiaq attartugartik najugaqarfigiinnassanerlugu namminneerlutik aalajangersinnaalissapput, tamatumanili atugassaritaasut allanngortinneqarlutik.

Najugaqarfinni annerpaamik 16-inik inissiartaqartuni attartortut affaat sinnerlugit inissiamik attartukkaminnik inissiatut namminneq pigisatut tigusinissamik kissaateqarpata, attartortut inissianik attartortittakkanik najukkaminnik tigusinisamik kissaateqanngitsut inissiami najukkaminni najugaqaannarsinnaapput, tamatumanili atugassaritaasut allanngortinneqarlutik.

Iserit A/S isumaqarpoq attartortitsisup attartortunut, inissianik piginneqataalernissamik imaluunniit piginnittunngornissamik kissaateqanngitsunut illoqarfimmi najukkaminni inissiap najukkamik taamaaqataanik neqerooruteqartarnissaat eqqarsaatigilluagaanngitsoq. Siunnersuummi aalajangersakkat tamanna naapertorlugu iluarsineqarput, inissiallu taamaaqataanut taarsiullugu illoqarfimmi najukkami inissiamik, inoqutigiinni inuit amerlassusaannut naapertuuttumik neqerooruteqartoqartalissaaq. Allannguut attartortut nuunngikkaluarlutik najukkaminni najugaqaannarnissamut periarfissaqalernissaannut atasutut isigineqassaaq.

Siunnersuummi matumani § 1, nr. 11-mut

A/S Inissiaatileqatigiiffik INI-mit siunnersuutigineqarpoq attartortitsisup inissiamit anisitsinermut nalunaarutip assilinera kommunip inunnik isumaginnittoqarfianut nassiuttalissagaa, tassanilu attartorunnaarsitsinermut allakkiap assilinera pineqassanngitsoq. Aalajangersagaq taamatumunnga naapertuuttunngorlugu iluarsineqarpoq.

 

Peqqussutissatut siunnersuummi aalajangersakkanut ataasiakkaanut oqaaseqaatit

 

§ 1-imut

Nr. 1-imut.
Tassani taamaallaat najugaqarfinni piginneqatigiilluni inissiatut imaluunniit inissiatut nammineq pigisatut allanngortitsiviusuni attartortup inatsisitigut inissisimanissaanut maleruagassat teknikkikkut allannguiffigineqarput. Maanna aalajangersakkami innersuussutit § 24, imm. 1-imut, aamma § 24a, imm. 1-imut tunngatinneqalerput, § 24, imm. 1-iinnarmut tunngatinneqarunnaarlutik.

Nr. 2-mut.
Aalajangersakkap atuutilerneratigut naalagaaffiup suliffeqarfiutaani atorfeqartunut sulisunut inissianik innersuussisarneq pillugu Naalakkersuisut Rigsombudeqarfik aqqutigalugu danskit naalagaaffiannut isumaqatigiissuteqarsinnaapput.

1. januar 1987-imi danskit naalagaaffiata Kalaallit Nunaanni inissiaataannik piginnittussaatitaaneq Namminersornerullutik Oqartussanut nuunneqarpoq. Isumaqatigiissummut ilaasutut Naalakkersuisut danskit naalagaaffiata Kalaallit Nunaanni atorfeqartitaanut inissianik pilersuisussaatitaalerput. Aalajangersagaq isumaqatigiissuteqarnissamut inatsisitigut tunngavissiivoq. Naalakkersuisut isumaqatigiissut 1987-imeersoq tunngavigalugu pisussaatinneqarput sulisunut inissianik innersuussisarneq pillugu danskit naalagaaffiannut isumaqatigiissuteqassallutik, kisiannili danskit naalagaaffiata Rigsombudeqarfik aqqutigalugu Naalakkersuisunut isumaqatigiissusiussanerlutik namminneerluni aalajangissavaa.

Aalajangersagaq Rigsombudeqarfimmut, danskit naalagaaffiat sinnerlugu naalagaaffiup atorfeqartitaanut inissianik pilersuinermut atatillugu iliuuseqarnissamut piginnaatinneqartumut siumoortumik isumaqatigiissuteqarnikkut ilusilerneqarpoq. § 11, imm. 1-imi atuuttumi najoqqutassanik allannguisoqarpoq, taamaalillunilu siunnersuut naapertorlugu Rigsombudsmandi naalagaaffiup suliffeqarfiutai tamaasa sinnerlugit Naalakkersuisunut ataatsimoortumik isumaqatigiissusiorsinnaalerpoq.

Naalagaaffiup suliffeqarfiiutai taaneqartut tassaapput Rigsombudi, Kalaallit Nunaanni Eqqartuussivik, Kalaallit Nunaanni Politimesteri, kiisalu naalagaaffiup suliffeqarfiutai taakku ataanni inissisimasut. Naalagaaffiup suliffeqarfiutaanut taakku ataanniittunut ilaatigut suliffinnik nakkutilliisoqarfik aamma imarsiornermut nakkutilliisoqarfik ilaasutut naatsorsuutigineqarput.

Nr. 3-mut.
Imm. 2-mi aalajangersagaq Nuummi ineqarnikkut pissutsit allannguuteqangaatsiarnerisa ki-ngunerisaannik atorunnaarsinneqarpoq. Ukiuni kingullerni Nuummi inissianik niueruteqarneq namminersortunit ingerlanneqartoq annertusiartuinnarsimavoq, taamaattumillu namminerisamik imminut inissianik pilersorneq ajornannginnerulersimalluni nalinginnaaleriartorsimallunilu, tamatumalu peqatigisaanik ilaqutariinnut ataatsinut illut illullu affarleriit pisortanit pigineqartut ikiliartorsimallutik. Taamatut ineriartortoqarnera Naalakkersuisut namminerisamik inissianik niueruteqarnerup annertusineqarnissaanik politikkiannut naapertuuppoq. Aningaasalersueriaatsit atuuttut taamatut politikkeqarnermut tapertarineqarput.

Aalajangersakkami imm. 2-p peerneqarneratigut immikkoortortani pisortat siunissami pisortanut inissianit, inissiani ilaqutariinnut arlalinnut innimernerneqarsimasuni innersuunneqarsinnaalissapput. Inatsisitigut inissisimanermik allannguinermi immikkoortortani pisortat siunissami inissianik ilaqutariinnut arlalinnut inissianiittuni pisortanut inissiatut innimernerneqarsimasuni tunineqarsinnaalissapput.

Nr. 4-mut.
Aalajangersakkap atuutilerneratigut sulisunut inissiamik attartortup sulisunut inissiaq inissiatut attartortittakkatut nalinginnaasutut tigussallugu pisinnaatitaaffigilissavaa. Taamaattumik § 21 atuuttoq tunngavigalugu Naalakkersuisut imaluunniit kommunalbestyrelsi attartortup taamatut qinigassaqarnissaa pillugu neqerooruteqartarunnaassapput. Kiisalu nutaatut attartortup sulisunut inissiaq najukkani inissiatut attartortittakkatut nalinginnaasutut tigusinissamik pisinnaatitaaffini atorsinnaalerpaa, tamatumani sulisunut inissiami init amerlassusaat apeqqutaatinnagu.

Tamatumani attartortumut iluaqutissaq tassaavoq, attartortup inissiami attartortittakkami nalinginnaasumi najugaqalerniarluni nuunnissani pinngikkaluarlugu inissiami najukkamini najugaqaannarsinnaanissaa. Attartortup pisinnaatitaaffia qinnuteqartunut, sulisunut inissiamut imaluunniit inissiamut attartortittakkamut nalinginnaasumut utaqqisut allattorsimaffiannut allatsissimasunut allanut sunniuteqassanngilaq, inissiatut attartortittakkatut nalinginnaasutut neqeroorutigineqartoq sulisunut inissiamut taarsiullugu peerneqartussaammat. Attartortup inissiamut attartortittakkamut nalinginnaasumut neqeroorutigineqartumut nuunnani sulisunut inissiaq najukkani pigiinnarniarlugu aalajangerpat, inissiamut normu attartortup sulisitsisuata pigisaa atorneerutissaaq, taannalu sulisunut inissiamik allamik piniarnermi atorneqarsinnaalissalluni.

Inissiamut neqeroorut amerlanertigut attartortunut amerlasuunut ataatsikkut nassiussuunneqartarpoq, taamaattumillu atorfilik neqeroorummut akuersippat atorfillip pisortat inissiaataanik attartortittakkamik tigusinissaanut periarfissaqartoqartillugu neqeroorut akuerineqartutut isigineqartarluni. Attartortitsisoq atorfilik pisortat inissiaataannik attartortittakkamik neqeroorummik tunineqarpiarsimanersoq naliliissaaq.

Attartortoq sulisunut inissiami ukiuni kingullerni arfineq marlunni najugaqarsimappat, attartortup sulisunut inissiamik inissiatut attartortittakkatut nalinginnaasutut tigusisinnaanermut pisinnaatitaaffeqarnera imm. 2-mi aalajangersarneqarpoq. Taamaattumik § 21 atuuttoq tun-ngavigalugu Naalakkersuisut imaluunniit kommunalbestyrelsi attartortup taamatut qinigassaqarnissaa pillugu neqerooruteqartarunnaassapput.

§ 21-mi atuuttumi piumasarineqarpoq sulisorisaq piffissaq tamakkerlugu utaqqisut allattorsimaffianni allatsissimasimassasoq. Allannguutissatut siunnersuutip atuutilerneratigut piumasaqaat taanna atorunnaassaaq. Tassani attartortup sulisitsisuni assigiinngitsuni assigiinngitsunik atorfeqarnini tunngavigalugu sulisunut inissiaq najorsimaneraa apeqqutaatinneqassanngilaq, taamaallaalli attartortup ukiuni kingullerni arfineq marlunni sulisunut inissiami tassani najugaqarsimanissaa apeqqutaatinneqassalluni. Sulisunut inissiamik tigusinissamut pisinnaatitaaffinni ilaatinneqanngitsut imm. 4-mi takuneqarsinnaapput.

Attartortoq soraarninngunnginnermini sulisunut inissiami najukkamini ukiuni kingullerni pi-ngasuni najugaqarsimappat, attartortup sulisunut inissiamik inissiatut attartortittakkatut nali-nginnaasutut tigusisinnaanermut pisinnaatitaaffeqarnera imm. 3-mi aalajangersarneqarpoq. Taamaattumik § 21 atuuttoq tunngavigalugu Naalakkersuisut imaluunniit kommunalbestyrelsi attartortup taamatut qinigassaqarnissaa pillugu neqerooruteqartarunnaassapput.

§ 21-mi atuuttumi piumasarineqarpoq atorfilik piffissaq tamakkerlugu utaqqisut allattorsimaffianni allatsissimasimassasoq. Allannguutissatut siunnersuutip atuutilerneratigut piumasaqaat taanna atorunnaassaaq. Tassani attartortup sulisitsisuni assigiinngitsuni assigiinngitsunik atorfeqarnini tunngavigalugu sulisunut inissiaq najorsimaneraa apeqqutaatinneqassanngilaq, taamaallaalli attartortup soraarninngornissani sioqqullugu ukiuni kingullerni pingasuni sulisunut inissiami tassani najugaqarsimanissaa apeqqutaatinneqassalluni. Sulisunut inissiamik tigusinissamut pisinnaatitaaffinni ilaatinneqanngitsut imm. 4-mi takuneqarsinnaapput.

Attartortoq sulisunut inissiamik najukkaminik, imm 1-3-mi maleruagassat naapertorlugit inissiamik inissiatut attartortittakkatut nalinginnaasutut tigusinissaminik kissaateqaruni, attartortoq attartortitsisumut imaluunniit attartortitsisup aqutsisuutitassamik atorfinitsitaqarsimappat tassunga saaffiginnissaaq.

Aalajangersakkami imm. 4-p oqaasertai allannguuteqartinneqarput, taamaalillutik atuaruminarnerulersinneqarlutik.

Imm. 1-3-mi periarfissarititaasutut nassuiarneqartut atorfilinnut inissianik attartortunut, imm. 4-mi taaneqartunut atuutinngillat. Tamatumunnga tunngaviuvoq sulisunut inissiat imm. 4-mi taaneqartut sulisunut inissianut innimernerneqarsimasunut, nalinginnaasumillu sulisunut inissiatut nalinginnaasutut ilaatinneqanngitsunut tunngasuummata.

Nr. 1 teknikkikkut allannguuteqartinneqarpoq, taamaalillunilu naalagaaffiup suliffeqarfiutai ataatsimut pineqartut tassaalerput Rigsombudi, Kalaallit Nunaanni Eqqartuussivik, Kalallit Nunaanni Politimesteri, kiisalu naalagaaffiup suliffeqarfiutai taakku ataanni inissisimasut, tak. allannguutissatut siunnersuummi § 1, nr. 2.

Imm. 4 nr. 4-mut ilaavoq, assersuutigalugu inissiat aningaasarsiaqartitaanermut inatsit naapertorlugu Naalakkersuisunut ilaasortanut inniminnerneqarsimasut, tamatumani Naalakkersuisunut ilaasortaq attartornermut isumaqatigiissummi inissiamik attartortutut taaneqarsimappat.

Nr. 5-imut.
§ 24-mi attartortut inissianik najukkaminnik piginneqatigiilluni inissiatut imaluunniit inissiatut nammineq pigisatut tigusinissamut kissaateqartut pineqarput, kiisalu allannguutissatut siunnersuummi § 1, nr. 4-mi taamaallaat attartortut inissianik najukkaminnik piginneqatigiilluni inissiatut tigusinissaminnik kissaateqartut pineqarlutik.

Ataatsimut isigalugu aalajangersakkami naatsorsuutigineqarpoq, inissiat attartortittakkat piginneqatigiilluni inissiatut allanngortinneqartarnerat piginneqatigiilluni inissiaatit pillugit peqqussummi atuuttumi maleruagassat naapertorlugit ingerlasassasoq, taamaattumillu aalajangersakkami piginneqatigiilluni inissiaatit pillugit peqqussummut innersuussinissaq pisariaqartutut isumaqarfigineqarani.

Imm. 1-imi Naalakkersuisut piginneqatigiilluni inissiaatillit peqatigiiffiata inissianik attartukkaminnik piginneqatigiilluni inissiatut tigusinissamik allakkatigut Namminersornerullutik Oqartussanut imaluunniit kommunimut qinnuteqarneraniit attartortitsineq pillugu peqqussummi §§ 5-imik aamma 65-imik saneqqunneqarsinnaanerinut periarfissamik ammaassisoqarpoq. Aalajangersakkami allannguiniarluni suliap ingerlanerani tapersersuinissaq siunertarineqarpoq. Taamaalilluni § 5 naapertorlugu innersuussisarnerit tulleriinneri sanioqqunneqarsinnaapput, taamatullu Namminersornerullutik Oqartussat kommuniluunniit aalajangersinnaallutik attartortoq allanngortitsiniarnermut suleqataasoq atorfeqartinneqarnerminik taamaatitsinermut atatillugu inissiap qimannissaanut pisussaaffilerneqassanngitsoq. § 5-imi innersuussisarnermut maleruagassanik saneqqutsinermi Namminersornerullutik Oqartussat kommunilluunniit inissiaq inueruttoq piginneqatigiilluni inissiaatillit peqatigiiffianni inissiamut inueruttussamut utaqqisut allattorsimaffianni allatsissimasumut innersuussinnaavaat. Piginneqatigiilluni inissiaatillit peqatigiiffiat inunnik piginneqatigiilluni inissianut inueruttut allattorsimaffiannut allattuisinnaapput, inuup allatsissimasup inoqutaani inuit amerlassusaat piginneqatigiilluni inissianngortussap angissusaanut naapertuuppata, tak. attartortitsisarneq pillugu peqqussummi § 6, imm. 2.

Imm. 2 naapertorlugu Namminersornerullutik Oqartussat imaluunniit kommuni pisussaavoq attartortoq inissiamik attartukkaminik piginneqatigiilluni inissiatut tigusinissamik kissaateqanngitsoq illoqarfimmi najukkami inissiamik allamik neqeroorfigissallugu. Inissiap neqeroorutigineqartup annertussusissaanut attartortup Namminersornerullutik Oqartussat imaluunniit kommunip neqerooruteqarnerani inoqutaani inuit amerlassusaat apeqqutaassapput, attartortup maanna inigisaata annertussusaa apeqqutaanani. Attartortitsisarneq pillugu peqqussummi atuuttumi § 24, imm. 1 naapertorlugu attartortitsisoq pisussaavoq attartortumut inissiap taamaaqataanik neqerooruteqassalluni. Oqaaseq "taamaaqataanik" siunnersuummi peerneqarpoq, attartortup inoqutaani inuit amerlassusaat inissiap neqeroorutigineqartup angissusissaanut aalajangiisuutinneqarmat. Attartortup inissiamik innersuussinissamut piumasaqaatinik allanik, tak. § 24, imm. 2 atuuttoq, naammassinnissimanissaanik piumasaqaat siunnersuummi oqaasertatigut ingerlateqqinneqanngilaq. Siunnersuummi piumasaqaat taanna allatut oqaasertaliorneqarpoq, maannakkut imaalerluni " Inissiaq angissutsimigut neqeroorutip saqqummiunnerani inoqutigiinni inuit amerlassusaannut naapertuutissaaq, tak. § 6, imm. 2 aamma 3". Attartortup inissiamik innersuussinissamut piumasaqaatinik allanik naammassinnissimanissaanik oqaasertaq atuuttoq attartortup inoqutaasa inissiap angissusaanut naapertuunnissaanik piumasaqaammut taamaallaat innersuussivoq, taamaalilluni nalornissutigineqassanani piumasaqaatit suut innersuussutigineqarnersut.

Imm. 3-mi aalajangersarneqarpoq attartortut taamaallaat attartornermut isumaqatigiissut malissimagunikku inissiamut allamut innersuunneqarsinnaasut. Attartornermut isumaqatigiissut malinneqarsimassaaq, sumiginnaanernik annertuunik, attartortitsisarneq pillugu peqqussummi kapitali 11-mi maleruagassat naapertorlugit attartortitsisumut attartortitsinermik taamaatitsinissamut pisinnaatitaaffiliisunik pisoqarsimanngippat.

Imm. 4 naapertorlugu attartortoq inissiamut allamut neqeroorfigineqarnerminik akuersisoq nutaatut Namminersornerullutik Oqartussanit imaluunniit kommunimit taartisiassaqartinneqarnissamik pisinnaatitaaffeqalissaaq, attartortup allanngortitsiniarluni sulinermut atatillugu neqeroorut akuerisimappagu. Tassalu piginneqatigiilluni inissiaatillit peqatigiiffiata aamma Namminersornerullutik Oqartussat imaluunniit kommunip akornanni pisinissamut akiusup inaarutaasumik isumaqatigiissutigineqannginnerani. Attartortoq inissiamit nuuttussaq ani-ngaasanik taartisiassaqartinneqarnissamut pisinnaatitaaffeqalissaaq, taakkulu tunngaviusumik aningaasartai 1.200 kr.-inik, kiisalu inimut najugaqarfiusumut ataatsimut 1.000 kr.-inik amerlassuseqartinneqassapput, nuunnermut atatillugu aningaasartuutissanut naammaginartunik matussutissatut annertussuseqassallutik. Aningaasat taartisiassaritinneqartut inaarutaasumik naatsorsorneqartarnerinut tunngatillugu § 68, imm. 4-mut oqaaseqaatit innersuussutigineqarput.

Aningaasat aallaqqaammut illutip piginnittuata attartortumut inissamit nuuttumut akilissavai, kiisalu aningaasartassarititaasut nalinginnaasut allannguiniarluni suliap ingerlanerani aningaasartuutinut inaarutaasunut ilanngunneqassallutik. Maleruagassaq taanna allannguiniarluni suliap piffissap akuersaarneqarsinnaasup iluani naammassineqarsinnaanissaa eqqarsaatigalugu ilanngunneqarpoq. Attartortut nuunnerminnut atatillugu taartisiassaqartinneqarnissaannik neqeroorfigineqarsinnaappata, amerlanerit nuunnissartik aalajangiutissagaat ilimagineqarpoq, nuunnermi aningaasartuutinit naammaginartut matussuserneqartartussaammata.

Kiisalu attartortup piffissap qanorluunniit ilinerani attartortitsisumit inissiamut allamut neqeroorfigineqarnissani toqqarsinnaavaa. Tamatumani najugaqarfiup inissiaataanik tamanik piginneqatigiilluni inissiatut allanngortinneqarnissaamik siunertaqarneq pingaarnerusoq eqqarsaatigineqarpoq. Najugaqarfiup inissiaataasa piginneqatigiilluni inissiatut allanngortinneqarnerisa kingorna attartortup inissiamik allamik tunineqarnissamik neqeroorut akuerissappagu, akerlianik imm. 4 naapertorlugu attartortoq nuunnerminut atatillugu taartisiassaqartinneqarnissaminut pisinnaatitaaffeqassanngilaq. Inissiap neqeroorutigineqartup angissusissaanut Namminersornerullutik Oqartussat imaluunniit kommunip neqeroorummik saqqummiussinerata nalaani attartortup inoqutaani inuit amerlassusaat apeqqutaassapput, tamatumani attartortup inissiamut allamut neqeroorfigineqarnissamut akuersinerani piffissaq apeqqutaatinneqarani.

Inissiamit nuunneq kapitali 12 naapertorlugu pissaaq, tassalu attartortup attartukkani qimatani attartortumut pisussaatitaaffiliunneqartup iluani nalinginnaasumik iluarsaatissavaa.

Attartortup najugaqarfimmi attartornini imm. 5 naapertorlugu ingerlatiinnassappagu, siunissami ineqarnermut akiliutissaq nutaatut naatsorsueriaatsit Namminersornerullutik Oqartussat aamma kommunit inissiaataannut attartortittakkanut atuutsinneqartunit allaanerusut malillugit aalajangersarneqassaaq. Ineqarnermulli akiliutissaq attartornermut akiliummut akilerneqartareersumut qanittumik annertussusilerneqarluni naatsorsorneqassaaq. Inissianut assingusunut attartornermut akiliutup annertussusaa malinnaaffigisinnaajumallugu attartornermut akiliutip annertussusissaata ukiumoortumik aningaasanut inatsisikkut oqaasertaliinikkut allannguisinnaaneq inatsisitigut tunngavissiuunneqarpoq. Ineqarnermut akiliutip annertussusissaannut ilaatigut ukiumoortumik allaffissornermut akiliut 4.200 kr.-inik annertussuseqartoq ilaatinneqarpoq. Allaffissornermut akiliut Namminersornerullutik Oqartussat ullumikkut A/S Inissiaatileqatigiiffik INI-p Namminersornerullutik Oqartussat ilaqutariinnut arlalinnut inissiaataasa aqunneqarnerinut akiliutigisartagaasa annertoqatigipajaarpaa. Kiisalu ineqarnermut akiliutip annertussusissaanut najugaqarfiup tunniunneqarnerani akiusup 1,5%-ianik aningaasaaliissutinit iluanaarutissaq ilaatinneqarpoq. Aningaasaaliissutinit iluanaarutissaq § 31, imm. 1-imi aningaasaaliissutinut iluanaarutissatut aalajangersakkap annertoqqataanik annertussusiligaavoq. Kiisalu Ineqarnermut akiliummut kvadratmeterimut ingerlatsinermut akiliut ukiumoortumik aalajangersarneqartartoq 405 kr.-iusoq ilaatinneqarpoq.

Imm. 6 nutaajuvoq, aammalu attartortumut inissiamik attartukkaminik piginneqatigiilluni inissiatut tigusinissamik kissaateqanngitsumut, kisiannili Namminersornerullutik Oqartussat kommunilluunniit inissiaataanni attartortittakkami attartortutut ingerlaannartumut tunngatinneqarluni. Tassani immikkoorutaasoq tassaalerpoq Namminersornerullutik Oqartussat kommunilu inissiamik piginneqataasutut inissisimanertik tunngavigalugu inissiamut tunngatillugu killilersuiffigineqalernerat.

Tassani assigiinngissut annertooq pingaaruteqarluinnartoq tassaavoq Namminersornerullutik Oqartussat kommunillu inissianut piginnittuujunnaarnerat, taamaattumillu taakkuninnga killeqanngitsumik atuisinnaajunnaarnerat. Namminersornerullutik Oqartussat kommunillu piginneqatigiilluni inissiaatileqatigiiffimmi piginneqataasutut inissisimasalissapput.

Atuisinnaatitaaneq ilaallu ilanngullugit piginneqatigiilluni inissiaatit pillugit inatsimmi, piginneqatigiilluni inissiaatillit peqatigiiffiata malittarisassaanni kiisalu piginneqatigiilluni inissiaatillit peqatigiiffiisa ingerlanneqarnerannut tunngaviusuni nalinginnaasuni malittarisassiuunneqarput.

Aalajangersakkami attartortup aserfallatsaaliugassatut suliassap suliarineqarnissaanik piumasaqarnera, aammalu aserfallatsaaliugassatut suliassap attartortitsisumit isumagineqartussaanerata akerlilerneqarsinnaannginnera tunngavigineqarpoq. Tamatuma kingorna periarfissat marluupput:

1) Tassani aserfallatsaaliugassatut suliassaq tassaasinnaavoq Namminersornerullutik Oqartussat imaluunniit kommunip erngerluni suliaritissinnaasaa, aserfallatsaaliugassatut suliassaq piginneqatigiilluni inissiaatillit peqatigiiffiat (siulersuisut imaluunniit ataatsimeersuartut) ilanngutinngikkaluarlugit suliassatut inissisimammat. Tassani assersuutigalugu suliassaq pineqartoq tassaasinnaavoq erngup kuuffianik imermik kissartumik nillertumillu akoorutaasartumik taarsiineq.

2) Pineqartup aappaani aserfallatsaaliuinermi suliassaq suliarineqartussatut piumasarineqartoq tassaasinnaavoq atortulersuut piginneqatigiilluni inissiaatillit peqatigiiffianni ataatsimoorussamik atugaasoq. Tassani assersuutigalugu suliassaq pineqartoq tassaasinnaavoq radiatorinik, kiassaateqarfinnik imaluunniit milluaatinik ataatsimoorussanik taarsiineq. Pineqartumi tassani Namminersornerullutik Oqartussat kommuniluunniit piginneqatigiilluni inissiaatit ingerlanneqarnerinut tunngavissat nalinginnaasut uniornagit ingerlaannarlutik aserfallatsaaliugassatut suliassanik suliaqartitsisinnaanngillat, taamaattumillu piginneqatigiilluni inissiaatillit peqatigiiffiat (siulersuisut imaluunniit ataatsimeersuartut) siumoortumik ilanngutsittariaqarlugit.

Piginneqatigiilluni inissiaateqarnermi eqqarsaat oqartussaaqatigiinnermik tunngaveqartussatut eqqarsaatigineqarmat, Namminersornerullutik Oqartussat kommuniluunniit piginneqatigiilluni inissiaatillit peqatigiiffiannit (siulersuisunit imaluunniit ataatsimeersuartunit) attartortup aserfallatsaaliugassatut suliassamik piumasaqaataanik naammassinninnissamut itigartinneqarsinnaapput. Taaneqartoq kingulleq aalajangersakkami isummerfigineqarpoq, tassami attartortoq Namminersornerullutik Oqartussanit imaluunniit kommunimit piginneqataasutut pisinnaatitaaffiinit pitsaanerusunik pisinnaatitaaffilerneqarsin-naanngilaq. Taamaattumik taaneqartumi attartortup radiatorinik, kiassaateqarfinnik imaluunniit milluaatinik ataatsimoorussanik taasiisoqannginnissaa akuerisariaqarpaa.

Atortulersuutit, piginneqatigiilluni inissiaatillit peqatigiiffianni ataatsimoorussatut taaneqarsinnaasut nalinginnaasumik piginneqatigiilluni inissiaatillit peqatigiiffianni piginneqataasunut tamanut attuumassuteqartussaapput. Tamanna pissutigalugu Namminersornerullutik Oqartussat imaluunniit kommunip piginneqataaffigisaani attartortoq nalinginnaasumik killilersuiffigineqartassaaq, suliassat taamaattut suliaritinnissaannut piginneqataasut akornanni ataatsimut soqutigisatut inissisimasussaammata.

Imm. 7-imi attartortup piffissap qanorluunniit ilinerani inissiamik attartortittakkamik najukkaminik piginneqatigiilluni inissiatut tigusisinnaanissaa aalajangersarneqarpoq. Piginneqatigiilluni inissiaatillit peqatigiiffiat pisussaavoq inissiaq attartortumut tunissallugu, attartortoq tamanna pillugu kissaateqarnerminik saqqummiussaqarpat. Tunisineq piginneqatigiilluni inissiaatillit peqatigiiffianni malittarisassat naapertorlugit ingerlanneqassaaq.

Nr. 6-imut
Peqqussummi atuuttumi § 24-mi piginneqatigiilluni inissianut inissianullu nammineq pigisanut allannguinermi attartortup inissisimanissaa malittarisassiuunneqarpoq. Taamaalilluni allannguutissatut siunnersuummi § 1, nr. 5 § 24-iusimasumit immikkoortinneqarpoq, siunnersuut taamaallaat attartortunut inissianik najukkaminnik inissiatut nammineq pigisatut tiguserusuttunut tunngasuummat.

Imm. 1-imi siunnerfigineqarpoq inissianik attartortittakkanik inissiatut nammineq pigisatut allannguinerit attartortumiit piginnittumut peqqussummi atuuttumi maleruagassat naapertorlugit pisassasoq, taamaattumillu imm. 1-imi attartortumiit piginnittumut peqqussut innersuutissallugu pisariaqartutut isumaqarfigineqarani.

Imm. 1-imi atuuttuutitsisinnaaniarluni tunngavissat marluk saqqummiunneqarput. Siullermi najugaqarfik 16-it tikillugit inissiartaqartoq pineqarpoq. Tulliani najugaqarfimmi attartortut inissianik najukkaminnik tigusisinnaaniarlutik attartortut affaat sinnerlugit inissianik nammineq pigisaqartut peqatigiiffiannik pilersitsisarnissaat pineqarluni.

Namminersornerullutik Oqartussat imaluunniit kommuni attartortunit taakkunannga inissianik attartukkaminnik inissiatut nammineq pigisatut tigusinissamik qinnuteqaataannik tigusaqarpat, §§ 5-ip aamma 65-ip sanioqqunneqarsinnaanerinut inatsisitigut tunngavissiisoqarpoq. Taamaalilluni innersuussisarnermi maleruagassat nalinginnaasut sanioqqunneqarsinnaapput, taamatullu Namminersornerullutik Oqartussat kommuniluunniit aalajangersinnaallutik attartortoq allanngortitsiniarnermut suleqataasoq atorfeqartinneqarnerminik taamaatitsinermut atatillugu inissiap qimannissaanut pisussaaffilerneqassanngitsoq. § 5-imi innersuussisarnermut maleruagassanik sanioqqutsinermi Namminersornerullutik Oqartussat kommunilluunniit inissiaq inueruttoq piginneqatigiilluni inissiaatillit peqatigiiffianni inissiamut inueruttussamut utaqqisut allattorsimaffianni allatsissimasumut innersuussinnaavaat.

Tunngavissanik nalinginnaasunik sanioqqutsisinnaanermi siuliani taaneqartumi siunertarineqarpoq, najugaqarfimmi ataatsimi attartukkat tamarmik sapinngisamik pilertortumik eqaatsumillu allanngortinneqarnissaat.

Imm. 2 siunnersuummi § 24, imm. 2-6-imut innersuussummik imaqarpoq, taannalu aammattaaq inissianik attartortittakkanik inissiatut nammineq pigisatut allannguinermut atorneqassaaq. Pineqartoq imm. 1-imut tunngasuupat inatsisitigut inissisimaneq attartortunut sinneruttunut assigiissaaq, tamatumani ineqariaasip allannguutigisaa apeqqutaatinneqarani.

Imm. 3-mi attartortut ataatsimoortut marluk pineqarput. Pineqartuni siulliit tasaapput najugaqarfinni 16-it sinnerlugit inissiartaqartuni attartortut, aappaalu tassaallutik najugaqarfinni 16-it tikillugit inissiartaqartuni attartortut, kisiannili najugaqarfimmi attartortut inissianik nammineq pigisanik inissiaateqartut peqatigiiffiannik pilersitsisimasut aammalu inissianik attartukkaminnik inissiatut nammineq pigisatut tigusinissaminnik qinnuteqaateqarsimasut attartortut affaat sinnernagit amerlassuseqartut.

Attartortunut ataatsimoortunut marlunnut atuuttutut attartortut inissianik attartortittakkanik inissiatut nammineq pigisatut tigusinissamut kissaateqanngitsut inissiamut allamut innersuunneqarnissamut pisinnaatitaaffeqanngillat, kisiannili atugassarititaareersut atorlugit attartornerminnik nangitsiinnartariaqarlutik. Tassunga ilanngullugu ineqarnermut akiliut Namminersornerullutik Oqartussat imaluunniit kommunit inissiaataanni attartortittakkani ineqarnermut akiliutip aalajangersarneqartarneranut maleruagassat malillugit aalajangersarneqassaaq. Taamaattumik inissiat attartortittakkat najugaqarfittut ingerlaannassapput. Maleruagassaq taanna ajornaannerusumik sulinissaq eqqarsaatigalugu ilanngunneqarpoq. Inissiat amerlavallaat ataatsikkut attartortunut inissianik attartukkaminnik inissiatut nammineq pigisatut tigusinissamik kissaateqanngitsunut innersuunneqarnissaat piumasarineqarpat, tamanna illoqarfinni annerni ajornartorsiutinik annertuunik pilersitsisussaammat.

Nr. 7-imut
§ 26, imm. 3 aamma 4 peerneqarnissaat siunnersuutigineqarpoq, pissutsit taakkorpiaat aammattaaq Namminersornerullutik Oqartussat kommunillu inissiaataat attartortittakkat attartortinneqartarnerat pillugu nalunaarummi § 9, imm. 1, nr.-2-mi malittarisassaqarmata.

Kiisalu aamma illuatungaani § 26, imm. 3-p aamma 4-p illuatungaanilu nalunaarummi § 9, imm. 1, nr. 2-p akornanni naapertuutinngitsoqarpoq. § 26, imm. 3-mi allassimavoq najugaqarfinni siulersuit ukiumoortumik naatsorsuutit attartortitsisumit inaarutaasumik akuerineqan-nginnerini oqaaseqarfigisassanngorlugit tigusassagaat, aammalu § 26, imm. 4-mi allassimavoq najugaqarfinni siulersuisut ukiumoortumik naatsorsuutit inaarutaasut attartortitsisumit inaarutaasumik akuerineqareertillugit paasissutissiissutitut tigusassagaat. Tamatuma peqatigisaanik nalunaarummi allassimavoq najugaqarfimmi siulersuisut ukiumoortumik naatsorsuutit kukkunersiorneqarsimasut kingulliit akuerisassanngorlugit tigusassagaat.

Ukiumoortumik naatsorsuutit kisitsisit oqaluttuarisaanerannut tunngasuusarmata, aammalu attartortut inissiat najukkamik ingerlanneqarnerinut sunniuteqarsinnaanerat attartortut najugaqarfimmi siulersuisut aqqutigalugit attartortut ingerlatsinermut missingersuutit suliarineqarnerannut sunniuteqarsinnaanerisigut malittarisassiuunneqarmat, tak. attartortitsineq pillugu peqqussummi § 26, imm. 1 aamma 2, najugaqarfimmi siulersuisunit ukiumoortumik naatsorsuutit inaarutaasumik attartortitsisumit akuerineqannginnerini oqaaseqarfigisassanngorlugit tiguneqartarnissaat pisariaqarsorineqanngilaq. Kisiannili najugaqarfimmi siulersuisut oqaluuserisassaat tamarmik nalunaarummi aalajangersakkamut ataatsimut ataatsimoortinneqarnissaat naleqqunnerpaatut isumaqarfigineqarpoq, taamatullu najugaqarfimmi siulersut aningaasaqarnermut tunngassutillit najugaqarfimmi ukiumoortumik ataatsimiititsinermut pingaaruteqartut suliarisassagaat naleqqunnerpaatinneqarluni.

Nr. 8-mut
Attartortitsisoq najugaqarfinni pitsanngorsaanermut imaluunniit inissiani attartortittakkani aningaasaleeqqinnermut aningaasartuutiminut matussutissanik attartortumut akiliisitsisinnaavoq. Aalajangersagaq nutaajuvoq aammalu attartortitsisup attartortut nammaqatigiillutik akiliinissaannik piumasaqarsinnaaneranut inatsisitigut tunngavissiuussilluni.

Najugaqarfinni pitsanngorsaaneq attartortitsisup pitsaaliuinermut sammisaqartitsinermullu suliniutinut akiliisitsissutit atorlugit ingerlassinnaavaa. Kiisalu aamma attartortitsisoq inissiaqarfinnik atoruminarsaasinnaavoq, tassanilu illoqarfinni nunaqarfinnilu inunnut atugassanik pitsaanerpaanik pilersitsinissaq pineqarpoq, pissutsit inooqatigiinnermut, kulturimut, inuiannut ukiunullu tunngasut akimorlugit ilisimasanik, isumassarsianik nukinnillu ataatsimut suliniutissanut sammisassanullu atorneqarnissaat periarfissaqarpat, najukkami avatangiisini inuunerup pitsaanerulersinneqarnissaanut, isumalluarnissamut, inuunerup imaqarnissaanut, ataatsimoornissamut ataatsimooqatigiinnissamullu atorneqarsinnaasunik pilersitsisoqarsinnaavoq.

Taakku saniatigut akiliutit aamma attartortitsisup inissiaataanni aningaasaleeqqinnernut atorneqarsinnaapput, assersuutigalugu igaffinnut nutaanut, perusuersartarfinni uffarfinnilu pisattanut nutaanut imaluunniit illup qaliaannik aneerasaartarfiinillu iluarsaassinermut. Akiliutissaq akilersinneqartoq attartortitsisup inissiaataannut tamanut ataatsimut atugassatut akilersinneqartassaaq, tassani aningaasanik agguaassisarnissaq pisariaqartitsinerup naliliiffigineqarnera naapertorlugu pisassammat. Taamaattumik assersuusigalugu Sisimiuni imaluunniit nunaqarfiit ilaanni akiliutigitinneqartut Nuummi inissianut atorneqarsinnaapput aammalu paarlattuanik pisoqarsinnaalluni.

Akiliutit imm. 7 naapertorlugu akilersinneqartut taamaallaat najugaqarfimmi pineqartumi atorneqarsinnaapput, kiisalu akiliutit imm. 8 naapertorlugu akilersinneqartut attartortitsisup inissiaataanni tamaginni atorneqarsinnaallutik. Akiliutit atorneqartarnerisa assigiinngissutaannut illuutini aserorterisarneq tunngaviusutut isigineqarsinnaavoq, taamaattumillu najugaqarfinni aserorteriffiusuni attartortut tamatumunnga akiliisariaqartarlutik. Akerlianik aningaasaleeqqittarnerit najugaqarfinnillu pitsanngorsaasarnerit illuutinik piginnittut akilertartussaavaat, taamaattumillu illuutinik piginnittoq aalajangertussaavoq ilaqutariinnut arlalinnut inissianik piginnittup najugaqarfiit arlaat pitsanngorsaavigineqarnissamut imaluunniit aningaasaleeqqinnissamut pisariaqartitsiviunersut. Namminersornerullutik Oqartussat imaluunniit kommunit illuutinik piginnittutut inissiaatiminni avatangiisinik pitsanngorsaanissamut imaluunniit aningaasaleeqqinnissamut pisariaqartitsiviusunik naliliinerminni tunngavissat suut pingaarnerutinneqassanersut aalajangersartartussaavaat.

Akiliutissap annertussusissaa ukiumoortumik Inatsisartut aningaasanut inatsisaanni oqaasertaliinikkut aalajangerneqartassaaq.

Nr. 9-mut
Allannguutip imaa taamaallaat imm. 5-imik nutaamik ikkussineq tunngavigalugu sunniutissanik iluarsiinermut tunngasuuvoq, tak. siunnersuummi nr. 10.

Nr. 10-mut
Imm. 5 nutaatut ikkunneqarpoq, tassani aalajangersarneqarluni attartortitsinermut peqqussummi atuuttumi §§ 58 aamma 59 naapertorlugit allamut attartortitsigallartarneq, nammineq kissaatigalugu nuunneq aammalu inimik paarlaateqatigiittarneq, inissianut attartortitsisumit siunertanut aalajangersimasunut inniminnerneqarsimasunut imaluunniit inissianut immikkut aaqqissugaasunut innarluutilinnullu inissiatut tunniunneqartunut atuutinngitsut.

Imm. 5-imi maleruagassat maannarpiaq Namminersornerullutik Oqartussat kommunillu inissiaataannik attartortittakkanik attartortitsisarneq pillugu nalunaarummi nr. 23-mi, 22. december 2003-meersumi § 1, imm. 3-kkut inatsisiliuunneqarput. Nalunaarummilu § 1, imm. 3 ataasiakkaatigut attartortitsisarneq pillugu peqqussummi atuuttumi aalajangersakkanut akerliummat atuuttuusinnaanerata qularineqarsinnaanera ilimanaateqarsinnaavoq. Namminersornerullutik Oqartussat kommunillu inissiaataannik attartortitsisarneq pillugu nalunaarummi nr. 23-mi, 22. december 2003-meersumi § 1, imm. 3-mut tunngatillugu, siunnersuummi § 63, imm. 5-imi maanna taamaallaat §§ 58 aamma 59 innersuussutigineqarput, innersuussutit allat ingerlateqqissallugit pisariaqanngimmat.

Attartortitsisup inissianik siunertanut aalajangersimasunut inniminniisarnera inissianut aalajangersimasumik atorfinilinnut atugassianut imaluunniit pisortanut inissianut tunngasinnaavoq. Kiisalu attartortitsisoq inissianik immikkut ittumik inuussutissarsiornermut imaluunniit nuttartitsinermut tunngatillugu atugassanik inniminniisinnaavoq. Suliffeqarfinnik nutaamik aallartittunik ikiuiniarluni, sulisunik immikkut piginnaanilinnik pilerisaariniarluni imaluunniit suliffeqarneq pillugu politikkip ataatsimoortup ilagisaatut tamanna pisinnaavoq.

Nr. 11-mut
Aalajangersagaq teknikkikkut iluarsiissutissamik imaqarpoq, taamaalilluni sulisunut inissiamik attartornerup atorfeqarnerup unitsinneqarnerani atorunnaartussaanera ersarissumik takuneqarsinnaalerluni.

Nr. 12-mut
Siunnersuummi imm. 1-ip aamma 2-p peqqussummi maanna atuuttumi § 73, imm. 1 aamma 2 assigai, kiisalu imm. 3-6 nutaajupput aammalu peqqussummi atuuttumi § 73, imm. 3-mit allaqqitaallutik.

Imm. 1 pisortani attartortitsisartut aamma attartortitsisartut namminersortut attartorunnaarsitsisarnerannut tunngasuuvoq. Aalajangersakkami pisortani attartortitsisartut ineqarnermut akiliummut, imermut, kiassarnermut imaluunniit qularnaveeqqusiissummut akiliinngitsoornerup kingunerisaanik attartortitsinermut isumaqatigiissummik atorunnaarsitsisinnaanerat tamakkiisumik maleruagassiuunneqarpoq, kiisalu attartortitsisartut namminersortut pisuni taaneqartuni attartornermut isumaqatigiissummik atorunnaarsitsisinnaapput, tamatumunngali pisussaaffilerneqaratik. Pisortani attartortitsisartut ineqarnermut akiliummut, imermut, kiassarnermut qularnaveeqqusiissummulluunniit akiliinngitsoornermi attartortitsinermut isumaqatigiissummik taamaatitsinissamut pisussaaffilerneqarneranut peqqutaavoq, pisortat attartortitsineranni ineqarnermut akiliinngitsoorneq attartortitsisup annaasaasa najugaqarfinni attartortunit sinneruttunit agguarneqartussaasarnerat, taamaattumillu ineqarnermut akiliummut akiliinngitsoorneq tamatigut annertuumik sunniutilittut sumiginnaanerusarnera. Akerlianik attartortitsisartup namminersortup attartortup piffissaq eqqorlugu ineqarnermut akiliisimanngikkaluaruniluunniit attartukkamini najugaqaannarnissaa nammineerluni aalajangersinnaavaa. Attartortitsisartup namminersortup sumiginnaaneq annertuutut isigineqarsinnaanersoq annertussutsimik naliliinermini naliliiffigissavaa.

Imm. 2-mi pisortat namminersortullu attartortitsisartut attartornermik isumaqatigiissummik taamaatitsinissap taamaatitsinnginnissalluunniit akornanni toqqaasinnaanerat tamakkiisumik nassuiarneqarpoq.

Imm. 3 pillugu. Imm. 1-imi aamma 2-mi attartornermik atorunnaarsitsisinnaanermut tunngaviusunut ataatsimut atuuppoq, imm. 3 naapertorlugu attartortitsinerup taamaatinneqarsinnaanera sioqqullugu sumiginnaanerup annertuutut isigineqarsinnaanissaa. Pisortanit attartortitsisartut pisussaammata imm. 1-imi taaneqartunik pisoqartillugu attartornermut isumaqatigiissut atorunnaarsissallugu tamanna sumiginnaanertut naatsorsorneqartut tamatigut annertuutut isigineqarnissaannut takussutissaavoq. Taamaattumik pisortanit attartortitsisartut imm. 1-imi taaneqartutut pisoqartillugu annertussutsimik naliliisariaqanngillat, akiliinngitsoornerit tamatigut sumiginnaanertut annertuutut isigineqartussaammata, tamannalu allaffissornikkut annertuumik oqilisaaneruvoq. Akerlianik attartortitsisartoq namminersortoq imm. 1-imi taaneqartutut pisoqartillugu annertussutsimik naliliisussaavoq, attartortup ineqarnermut akiliummut, imermut, kiassanermut imaluunniit qularnaveeqqusiissummut akiliinngitsoornera pisortanit attartukkamut naleqqiullugu aatsaat sumiginnaanertut annertuutut isigineqarsinnaammat, tamanna attartortitsisup namminersortup sumiginnaanertut annertuutut naliliiffigippagu.

Sumiginnaanerup imm. 2 naapertorlugu annertuutut aalajangiiffigineqarnerani assersuutigalugu pissutsit utoqqatsinarsinnaasut, pisaqattaarsinnaasut, qununartumik pissusilersuutaasinnaasut imaluunniit piaaraluni peqqussummi aalajangersakkanik unioqqutitsinerusinnaasut pi-ngaartinneqarsinnaapput.

Imm. 4-mi pinngitsoorani naammassisassanut inatsisitigut tunngavissat nalinginnaasut nassuiaatigineqarput, taakkulu malillugit ismaqatigiissut atorunnaarsinneqarsinnaanngilaq, atorunnaarsitsinissamut tunngaviusoq atorunnaarsitsinissamut nalunaarutip anngutinnginnerani taamaatissimappat.

Imm. 5-imi aalajangersakkamut atuuttumut naleqqiullugu erseqqissarneqarpoq, attartortitsisup peqqusinissamut pisussaaffia taamaallaat imm. 2-mi pissutsinut taaneqartunut tunngasuusoq, tamatumunngalu peqqutaavoq imm. 1-imi pissutsit taaneqartut peqqutigalugit taamaatitsinissamut periaasiusoq, tassalu akiliinissamik sumiginnaanermut tunngasoq, § 74, imm. 1-imi aamma 2-mi maleruagassiorneqareersimammat.

Imm. 6 peqqussummut atuuttumut naleqqiullugu nutaajuvoq. Aalajangersagaq ilanngunneqarpoq inunnik isumaginninnermi oqartussaasut inuk ataaseq ilaqutariilluunniit attartortitsisup attartornerannik taamaatitsinerata kingunerisaanik inissiamit najukkaminnit anisitaaneranni namminneerlutik iliuuseqarsinnaanissaat qulakkeerniarlugu. Inunnik isumaginnittoqarfik anisitsinissamik nalunaarutip assilinera atorlugu ilisimatinneqartassaaq, tassanilu atorunnaarsitsinermut allakkiap assilinera atorneqassanngilaq, suleriaaseq malillugu attartortunut atorunnaarsitsinissamik allakkiat anisitsisarnernut naleqqiullugu amerlangaatsiartarmata. Tassalu 2006-imi qaammatit sisamat siulliit ingerlanerini A/S Inissiaatileqatigiiffik INI-miit atorunnaarsitsinissamik allakkiat 2.306-it nassiunneqarsimapput, piffissamilu tassani pisortat inissiaataanni attartortittakkani A/S Inissiaatileqatigiiffik INI-mit aqunneqartuni attartortut 47-t anisinneqarsimallutik. Kisiannili attartortitsisup kommunip inunnik isumaginnittoqarfia ilisimatinngitsoorsimappagu, tamanna inatsisitigut kinguneqartussaanngilaq.

Nr. 13-imut
Siunnersuutigineqarpoq § 81-imi imm. 5-imik nutaamik ikkussisoqassasoq. Aalajangersakkap immikkoortuani 5-imi Namminersornerullutik Oqartussat imaluunniit kommunip aqutsisutut atorfeqartitaata avataaneersup nakkutigineqarnerata imarisai erseqqissarneqarput. Nakkutilliineq attartortitsisup inissiaatiminik nakkutilliineratut paasineqassaaq.

Ataatsimut isigalugu makku akornani immikkoortitsisoqassaaq:

Aningaasaqarnikkut ingerlatsinermik nakkutilliineq pillugu:

Aqutsisuutitap aningaasaqarnikkut ingerlatsineranik nakkutilliinermi pingaartumik Namminersornerullutik Oqartussat kommunilu eqqarsaatigalugit ingerlanneqartarpoq, tassani pigisat nalillit, soorlu inissiat attartortittakkat aqutsisumit aningaasaqarnikkut illersorsinnaasumik ingerlanneqarnissaat pineqarmata. Tamatumani missingersuusiornerup eqqortumik akisussaaffeqartumillu pinissaa eqqarsaatigineqarpoq, kisiannili aamma aningaasaatinik ingerlatsinerup, naatsorsuutinik saqqummiussisarnerup kukkunersiuisarnerullu akisussaaffeqartumik pinissaa eqqarsaatigineqarluni.

Attartortoq aqutsisuutitap inissiami attartortittakkami attartortup najugarisaanik aningaasaqarnikkut ingerlatsinera pillugu Namminersornerullutik Oqartussanut imaluunniit kommunimut maalaaruteqarsinnaavoq, tamatumani Ineqarneq pillugu maalaaruteqartarfiup suliaq suliarissallugu piginnaatitaaffeqanngippat, tak. § 84, imm. 1. Namminersornerullutik Oqartussat imaluunniit kommunip aalajangiinera allaffissornikkut aalajangiinerussaaq inaarutaasoq.

Suliffeqarfiup sinnerata ingerlanneqarneranik nakkutilliineq pillugu:

Aningaasaqarnerup avataatigut aqutsisuusitap suliffeqarfimmi ingerlatsinermut allamut tun-ngassuteqartut nakkutigineqarput. Tamatumani pissutsit aningaasaqarnermik ingerlatsinermut naleqqiullugu pingaaruteqannginnerusutut inissisimasut eqqarsaatigineqarput. Tamakkiisunut tunngasut eqqarsaatigalugit suliffeqarfimmi ingerlatsinerit allat ilaatinneqarput, taakku attartortunut amerlasuunut, ulluinnarni aqutsisuutitamut attaveqartunut pingaaruteqarmata.

Suliffeqarfimmi ingerlatsinermik allamik nakkutilliineq assersuutigalugu aqutsisuutitap piffissani ammaffiusartutut taaneqartuni sullitanik kiffartuussinermut ammatitsisarneranut tunngasinnaavoq, imaluunniit assersuutigalugu aqutsisuutitap naammaginartumik annertussusilimmik aputaajaanissamik isumaginnittarneranut tunngasuusinnaalluni, taamaalillunilu attartortoq aqutsinermi allaffeqarfimmut saaffiginninnissamut periarfissaqartinneqarluni.

Attartortoq aqutsisuutitap inissiami attartortittakkami attartortup najugarisaani ingerlatsinera allamut tunngassuteqartoq pillugu Namminersornerullutik Oqartussanut imaluunniit kommunimut maalaaruteqarsinnaavoq, tamatumani Ineqarneq pillugu maalaaruteqartarfiup suliaq suliarissallugu piginnaatitaaffeqanngippat, tak. § 84, imm. 1. Namminersornerullutik Oqartussat imaluunniit kommunip aalajangiinera allaffissornikkut aalajangiinerussaaq inaarutaasoq.

Namminersornerullutik Oqartussat imaluunniit kommunip nalinginnaasumik aqutsisuutitap kukkusumik iliuuseqarnera attartortumiit maalaarut nassiunneqartoq tunngavigalugu maluginiartussaavaa. Tamatumani Namminersornerullutik Oqartussat imaluunniit kommunip ingerlatitseqqiffissatut oqartussaasuunatik nakkutilliinermi oqartussaasutut inissisimanissaat pi-ngaaruteqarpoq.

Ingerlatitseqqiffiusinnaasut pillugit:

Attartortoq aqutsisuutitap aalajangiinera pillugu maalaaruteqarniarpat § 84, imm. 1-imi Ineqarneq pillugu maalaaruteqartarfimmut ingerlatitseqqissinnaaneq inatsisitigut tunngavilerneqarpoq. Aalajangersagaq taanna aqqutigalugu attartortup ineqarneq pillugu maalaaruteqartarfik aqqutigalugu illersorneqarnissaanut soqutigisaqarneq isumagineqarpoq, tamatumani maalaarut nassiunneqartoq ineqarneq pillugu maalaaruteqartarfiup suliarissallugu piginnaatitaaffigippagu.

Ineqarneq pillugu maalaaruteqartarfiup aalajangiinera allaffissornikkut inaarutaasumik aalajangiineruvoq, tak. § 86, imm. 7.

Nr. 14-imut
Aalajangersakkami erseqqissarneqarpoq, attartortoq aatsaat maalaarummik Ineqarneq pillugu maalaarteqartarfimmut tunniussisinnaasoq, maalaarut imm. 1-imi pissutsit ilaannut ataatsimut tunngasuuppat. Taamaalilluni Naalakkersuisoqarfiup inissiap attuumassuteqarfigisaata imaluunniit kommunip Namminersornerullutik Oqartussat imaluunniit kommunip avataaniit aqutsisuutitaata aalajangigai pillugit maalaarutit suliarissallugit piginnaatinneqanngillat, maalaarut pissutsit imm. 1-imi taaneqartut arlaannut tunngappat.

Naalakkersuisoqarfiup inissiap attuumassuteqarfigisaata imaluunniit kommunip tamanna malillugu taamaallaat Namminersornerullutik Oqartussat imaluunniit kommunip avataaniit aqutsisuutitaata aalajangigai pillugit maalaarutit suliarissallugit piginnaatinneqarsinnaapput, maalaarut Ineqarneq pillugu maalaaruteqartarfiup piginnaatitaaffiisa avataanniippat. Taamatut pisoqartillugu Naalakkersuisoqarfik inissiap attuumassuteqarfigisaa, imaluunniit kommuni ingerlatitseqqinnermi oqartussaasutut atuutissaaq. Taamatut pisoqartillugu suliassaqarfik annikitsuararsuartut isigineqartussaavoq, aammalu aalajangersimasumut naliliinermik tunngaveqartussaalluni. Assersuutitulli pissutsit taaneqarsinnaasut tassaapput A/S Inissiaatileqatigiiffik INI-p Namminersornerullutik Oqartussat sinnerlugit inissiaatileqatigiiffimmik pilersitsineq pillugu Inatsisartut peqqussutaat naapertorlugu oqartussaasutut suliassarisai.

Ingerlatsineq, soorlu sammisaqartitsinernut avatangiisinuinnaq tunngasoq, innuttaasunut sullissinernik pilersitsinissamut pisariaqartuutinneqartoq ingerlatitseqqittarnermut ilaatinneqan-ngilaq, taamaattumillu attartortup maalaaarutaata, Ineqarneq pillugu maalaaruteqartarfiup piginnaatitaaffigisaanut ilaatinneqanngitsup, aammalu naalakkersuisoqarfimmut inissiap attuumassuteqarfigisaanut imaluunniit kommunimut ingerlateqqinneqarsinnaasunut tunngassuteqanngitsup eqqartuussisunut ingerlateqqinneqartarnissaa naatsorsuutigineqartariaqassalluni.


§ 2-mut

Siunnersuutigineqarpoq peqqussutissatut siunnersuut 1. januar 2007-imi atortuulersinneqassasoq.

Taamaalilluni peqqussutissatut siunnersuummi aalajangersakkat ullormit tassannga tunngavigineqarsinnaalissapput, taamatullu siunnersuummi aalajangersakkat ullormit tassannga atuuttuulersinneqassallutik. Assersuutigalugu immikkoortortani pisortat ullormit atortuulersitsiviusumit ilaqutariinnut arlalinnut inissiani, tassalu ilaqutariinnut ataatsinut illuinnaanngitsuni imaluunniit illuni affarleriiginnaanngitsuni pisortanut inissianut innersuunneqarsinnaalissapput, tak. siunnersuummi nr. 3. Immikkoortortami pisortaq ulloq atortuulersitsiviusoq sioqqullugu atorfinitsinneqarsimagaluarpalluunniit taanna atuutissaaq, taamaallaalli immikkoortortami pisortaq ulloq taanna sioqqullugu pisortanut inissiamut innersuunneqarsimassanngilaq.

Aalajangersagaq ikaarsaarnermut aalajangersakkanik imaqarpoq, taannalu malillugu § 1, nr. 4 aamma 5 piginneqatigiilluni inissiaatillit peqatigiiffiinut imaluunniit inissianik namminneq pigisallit peqatigiiffiinut, peqqussutip atuutilernerata kingorna pilersinneqarsimasunut atuuttussaanngillat. Tamanna peqatigiiffinni, allanngortitsinissamik suliniuteqareersuni attartortut sinnerisa aalajangersakkamit eqqorneqannginnissaat qulakkeerniarlugu aalajangersarneqarpoq.