29. oktober 2006 UKA2006/35
Inunnut annertuumik innarluutilinnut ikiorsiisarneq pillugu Inatsisartut peqqussutaata allanngortinneqarnissaanik siunnersuut
pillugu
Inatsisartut Ilaqutariinnermut Ataatsimiititaliaata
ISUMALIUTISSIISSUTAA
Peqqussutissatut siunnersuutip aappassaaneerneqarnerani saqqummiunneqartoq
Inatsisartut Ilaqutariinnermut Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Agathe Fontain, Inuit Ataqatigiit, Siulittaasoq
Inatsisartunut ilaasortaq Emilie Olsen, Thomas Kristensenip sinniisua, Atassummeersut
Inatsisartunut ilaasortaq Agnethe Davidsen, Siumut
Inatsisartunut ilaasortaq Isak Davidsen, Tommy Marø-p sinniisua, Siumumeersut
Inatsisartunut ilaasortaq Astrid Fleischer Rex, Demokraatit
Inatsisartut Ilaqutariinnermut Ataatsimiititaliaata ulloq 20. september 2006-imi siullermeerinnerup kingorna siunnersuut suliaraa.Tusarniaanermit akissuteqaatit
Ilaqutariinnermut Ataatsimiititaliap siunnersuummik suliarinninnerminut atugassaminik tusarniaanermi akissutigineqartut nuutinnerinik pissarsisimavoq. Tusarniaanermi akissutigineqartuni oqaaseqaatit tiguneqarneri Ilaqutariinnermut Ataatsimiititaliamit uppernarsarneqarpoq.
Tusarniaanerup annertungaatsiarnera eqqarsaatigalugu tusarniaanerup sapaatit akunnerinik tallimanit sivikinnerusumik tusarniaanissamut piffissaliilluni aasaanerani sulinngiffeqarnerup nalaani ingerlanneqarsimanera naammaginavinngitsoq Ilaqutariinnermut Ataatsimiititaliaq isumaqarpoq. Tamatumalu saniatigut atortussat kalaallisut danskisullu tamakkiisut pigineqaleraangata KANUKOKA-p kommuninut aatsaat tusarniaassutigisarmagit tassunga atatillugu erseqqissaatigineqassaaq, oqartussanut oqartussaniillu saaffiginnissutit suliarinerat piffissartornartuulluni.
Tamanna tunngavigalugu siunissami tusarniaanissani Naalakkersuisoqarfiup naammaginarnerusumik piffissaliisarnissaa isiginiarneqartariaqartoq Ilaqutariinnermut Ataatsimiititaliap innersuussutigissavaa.
Apeqqutit
Siunnersuummik ataatsimiititaliap suliarinninnerminut atatillugu atugassaminik Ilaqutariinnermut Inatsisinillu Atortitsinermut Naalakkersuisoq arlalinnik marloriarluni apeqquteqarfigisimavaa. Naalakkersuisunut ilaasortamut ataatsimiititaliap apeqqutai akissutigineqartullu nuutinneri isumaliutissiissummi matumani ilanngussatut ilanngunneqarput.
Iunnersuummut oqaaseqaatit
Siunnersuummut tunngatillugu apeqquterpaalussuarnut Naalakkersuisunut ilaasortap akissuteqqatai tiguneqarmata Ilaqutariinnermut Ataatsimiititaliap uppernarsassavaa. Sannaviit illersukkat qanoq paasineqarsinnaanerat pillugu Naalakkersuisunut ilaasortap akissuteqaataa tusaatissatut tiguneqarpoq.
Kommunit sannavinnut illersukkanut ingerlatsinermut tapiissutinik pissarsisinnaanerannut periarfissat sukateriffigineqarnerannik siunnersuut kinguneqartoq Ilaqutariinnermut ataatsimiititaliap oqaatigissavaa. Suliffissaqartitsinissaq siunertaralugu atuisunut sammisaqartitsinissamik neqerooruteqarnissaq ilaatigut piumasaqaataavoq. Atuisut annertuumik innarluutilinnut ikiorsiissutit pillugit Inatsisartut peqqussutaanni, tuniniaanissamillu siunertaqarluni tunisassiornermut ilaasut sannavimmik illersukkamik atuisinnaanissaat aamma aalajangiisuuvoq.
Ornittakkat, ulluunerani ornittakkat sammisassaqartitsiviillu ingerlatsinermut tapiissutinik kommunit pissarsisinnaanerat siunnersuummit periarfissinneqanngitsoq Ilaqutariinnermut Ataatsimiititaliap maluginiarpaa.
Ingerlatsinermut tapiissutit sulisorisassallu qassiunissaat pillugu 14 – 20-mut Naalakkersuisunut ilaasortap akissuteqaatai Ilaqutariinnermut Ataatsimiititaliap tusaatissatut tiguai.
Siunissami Isumaginninnermi Naammagittaalliuuteqartarfik tusarniarneqartalissasoq Ilaqutariinnermut Ataatsimiititaliap naammagisimaarlugu maluginiarpaa. Suliassap taassuma allap suliassanik suliarinninnermi piffissamut ajoqutaanngitsumik aaqqinniarnerani naammagittaalliortarfiup allattoqarfia nukissanik pisariaqartunik Naalakkersuisunit qulakkeerunneqarnissaa ataatsimiititaliamit naatsorsuutigineqarpoq.
Inuit annertuumik innarluutillit pillugit Inatsisartut peqqussutaanni malittarisassat ilaavoq neqeroorutinut pioreersunut inuit siunnersuummut matumunnga tunngatillugu aalajangersimasumik sunniivigineqarnissaannut tassunga malinnaanissaminut Ilaqutariinnermut Ataatsimiititaliaq annertuumik soqutiginnippoq. Pineqartumut neqeroorutinut pioreersunut tunngatillugu siunnersuutip kingunerisinnaasai pillugit sukumiisumik nassuiaammik kingusinnerpaamik 2008-p naanerani ataatsimiititaliap tigusaqarnissaa Ilaqutariinnermut Ataatsimiititaliap qinnutigissavaa. Inuit annertuumik innarluutillit pillugit Inatsisartut peqqussutaanni malittarisassanut ilaasumik kommunit inunnut pineqartunut sammisassaqartitsinissamik neqeroorutaannik nalilersuinermik 2008-p naanerani ataatsimiititaliap tigusaqarnissaa Ilaqutariinnermut Ataatsimiititaliap aammattaaq inussiarnersumik qinnutigissavaa.
Sulliviit illersukkat ingerlatsinermut tapiissutinik Ilaqutariinnermut Pisortaqarfimmit pissarsitinneqartartunut tunngatillugu Ilaqutariinnermut Pisortaqarfimmiit paasissutissatut ukiumoortumik nalunaarusianik ataavartumik pissarsisinneqartarnissani Ilaqutariinnermut Ataatsimiititaliap aammattaaq soqutigaa. Taamaaliornikkut suliat sullivinnilu illersukkani pissutsit pillugit tatiginartumik Ilaqutariinnermut Ataatsimiititaliaq paasitinneqarnermik qulakkeerunneqassaaq.
Innarluutilinnut tunngasuni aningaasartuutit sukkasoorujussuarmik qaffakkiartortut Aningaasaqarnermut Ataatsimiititaliaq taamatullu Naalakkersuisut assigalugit Ilaqutariinnermut Ataatsimiititaliamit ilisimaarineqarpoq. Piviusumik suliniuteqartoqanngippat 2006-imut aningaasaqarnikkut sinaakkutit aningaasartuutit qaffasissusaasa sipporsinnaavaat.
Innarluutilinnut aningaasartuutit annertusiartuinnarnerannut tunngatillugu tamakkiisumik, pitsaassutikkut nutaaliornikkullu aaqqiissutissanik nassaartoqarsinnaasoq Ilaqutariinnermut Ataatsimiititaliaq isumaqarpoq. Suliffeqarnikkut inissaqartitsinerunissaq pillugu inuussutissarsiutilinnik annertunerusumik suleqateqartoqarpat assersuutigalugu innarluutilinnut sammisassatut neqeroorutit aammalu innarluutillit inuunerisa pitsaassusaanik akuulersinneqarnissaasalu patajaallisarneqarnerannut Naalakkersuisut peqataasinnaapput. Tassunga ilanngullugu pineqartumut kommunit kajumilersinneqarnissaannut aningaasaqarnikkut naapertuutinngitsumik malittarisassat ilaqartinneqannginnissaat aammattaaq Naalakkersuisut qulakkeertariaqarpaat.
Taama naatsumik oqaaseqarluni siunnersuut maanna ilusimisut iluseqartoq akuersissutigineqassasoq Inatsisartut Ilaqutariinnermut Ataatsimiititaliaata isumaqatigiittup inassutigaa.
Agathe Fontain
Siulittaasoq
Emilie Olsen
Thomas Kristensen sinnerlugu
Agathe Davidsen
Isak Davidsen
Tommy Marø sinnerlugu
Astrid Fleischer Rex
Ilanngussaq 1 (pdf-format)
Ilanngussaq 2 (pdf-format)
Ilanngussaq 3 (pdf-format)
Ilanngussaq 4 (pdf-format)