3. august 2006

UKA 2006/35

 

Peqqussutissatut siunnersuummut oqaaseqaatit

Oqaaseqaatit nalinginnaasut

1. Aallaqqaasiut:
Ilaqutariinnermut Inatsisinillu Atortitsinermut Naalakkersuisup allannguutissatut siunnersuutaa annertuumik innarluutilinnik namminneq inigisaminni taamatullu ataatsimoorullugit najugaqarfinni najugalinnik suliassaqartitsinermut ingerlatsinermut tapiissutinik aningaasaliissutinut erseqqissumik inatsitigut tunngavissiissaaq. Sannavimmi illersugaasumi suliassaqartitsisoqartassaaq.

2. Siunnersuummi pingaarnerit:
Ilaqutariinnermut Pisortaqarfik annertuumik innarluutilinnut ikiorsiisarneq pillugu Namminersornerullutik Oqartussat nalunaarutaat nr. 28-mi § 40, imm. 4 malillugu ornittakkanut assigisaannullu tapiissutinik siusinnerusukkut aningaasaliissuteqartareerpoq, annertuumik innarluutilinnik suliassaqartitsinnermut sannavinnut illersugaasunut assigisaannullu atatillugu ingerlatsinermut aningaasartuutinut akiliutigineqartartunik.

Ilaqutariinnermut Pisortaqarfiup 2004-p naalernerani annertuumik innarluutillinnik nammineq inigisaminni najugalinnik suliassaqartitsinermut ingerlatsinermut tapiissuteqartarnini unitsippaa, inatsisimmi ima nassuiaatissarsineqarmata annertuumik innarluutilinnik suliassaqartitsinermut tapiissuteqartarnissaq inatsisitigut tunngavissaqanngitsoq.

Tulliuttut Ilaqutariinnermut Pisortaqarfiup paasinninneranut nassuiaaneranullu tunngavigineqarput.

Annertuumik innarluutilinnut ikiorsiisarneq pillugu Inatsisartut peqqussutaat nr. 7, 3. november 1994-imeersumi § 18, imm. 1-imi takuneqarsinnaavoq Ilaqutariinnermut Pisortaqarfik annertuumik innarluutilinnut ulloq unnuarlu paaqqinnitarfimmiittunut, naleqquttumik suliassaqartitsissasoq. Taamatuttaaq peqqussummi § 18, imm. 2 innarluutilinnik ulloq unnuarlu paaqqinnittarfimmiittunik suliassaqartitsinermut taamaallaat tunngavoq.

Ilaqutariinnermut Pisortaqarfiup paasinninnera malillugu § 18, imm. 3 § 18, imm. 1-imut aamma 2-mut atatillugu atuarneqartussaavoq, taakku annertuumik innarluutilinnut ulloq unnuarlu paaqqinnittarfimmi najugalinnut tunngapput. Taamaammat § 18, imm. 3-mi Ilaqutariinnermut Pisortaqarfiup isumaa malillugu annertuumik innarluutilinnut nammineq angerlarsimaffimminni najugaqartunut suliassaqartitsinermut tapiissutit pillugit malittarisassanik aalajangersaanissamut inatsisitigut tunngavissaqanngilaq. Annertuumik innarluutilinnut ikiorsiisarneq pillugu Namminersornerullutik Oqartussat nalunaarutaat nr. 28-mi § 40, imm. 4 ulluunerani katersuuttarfinni ornittakkaniluunniit iliuuseqarnernut peqataanermut akiliutissat annertussusissaannut tunngavoq. § 40, imm. 4 paragraffip sinneranut ataqatigiissillugu atuarneqassaaq, tassani allaaserineqarmat Ilaqutariinnermut Pisortaqarfiup kommunillu innarluutilinnik tamarmik immikkut suliassaqartinniarlugit akisussaaffigisaminnik suliassaqartitsinissaq qanoq ilillutik suleqatigiissutigisinnaaneraat.

Ilaqutariinnermut Pisortaqarfiuttaaq innarluutilinnik nammineq inigisaminni najugaqartunik suliassaqartitsineq ikiorsiissutitut naatsorsuutinngilaa tamatumalu kingunerisaanik annertuumik innarluutilinnik ikiorsiisarneq pillugu Inatsisartut peqqussutaanni ilaatinnagu, kisiannili kommunit suliassaattut isigalugu soorluttaaq kommunit pensionisiallit siusinaartumillu pensionisiallit suliassaqartittaraat.

Isumaginninnermi Naammagittaalliuteqarfiup 28. april 2006-imi aalajangiinermigut kommunit taperserpai annertuumik innarluutillit ikiorserneqartarnerat pillugu Inatsisartut peqqussutaat nr. 7, 3. november 1994-imeersumi inatsisitigut tunngavissaqartoq annertuumik innarluutilinnik suliassaqartitsinermut tapiissuteqartoqarsinnaaneranut.

Isumaginninnermi Naammagittaalliuuteqartarfiup aalajangiinerminut tunngavilersuutigaa Inatsisartut peqqussutaanni taamatullu Inatsisartut peqqussutaannut oqaaseqaatini erseqqissumik takuneqarsinnaammat Namminersornerullutik Oqartussat tassaasut ikiorsiiniarluni iliuuseqarnernut innarluutillit pillugit peqqussut inatsisitigut tunngavigalugu aallartinneqarsimasunut aningaasartuutinik nammattussat. Taamatuttaaq Isumaginninnermi Naammagittaalliuuteqartarfik naliliivoq innuttaaqataasunut innarluutilinnut suliassaqartitsiniutinik aallartitsisarneq eqqarsaatigalugu taamaallaat kommunit aamma Namminersornerullutik Oqartussat akornanni akisussaaffiit agguaanneqarnerat pineqartoq, aningaasanut tunngatillugu nammagassat agguaanneqarnerat pineqarani. Aningaasanut tunngatillugu nammagassat agguaanneqartarnerat taamaallaat peqqussummi § 26-kkut malittarisassaqartitaavoq kingusinnerusukkullu nalunaarummi aalajangersakkakkut allanngortinneqarsinnaanani.

Ilaqutariinnermut Inatsisinillu Atortitsinermut Naalakkersuisup kissaatigaa allannguutissatut siunnersuut malillugu inatsisitigut erseqqissumik periarfissaliisoqassasoq kommunit annertuumik innarluutilinnik namminnerlu najugaqarfeqartunik suliffissaqartitsinerannut ingerlatsinermut tapiissuteqartoqarsinnaanissaanik, taamaasilluni siunissami paatsuungassutigineqaqqunagu suut tapiissuteqarfigineqarsinnaanersut. Ilutigalugu kissaatigineqarpoq tapiissutinik aningaasaliissuteqartarneq pillugu malitassanik aalajangersaasoqassasoq, taamaasilluni kommunit suliffissaqartitsiniarnikkut pineqartunik neqeroorutigisinnaasaannut piumasaqaateqarsinnaanissaq periarfissaatikkumallugu, tamatumani aamma naatsorsuutinik il.il. nassiussisarnissamut tunngassuteqartut ilanngullugit.

3. Pisortanut aningaasaqarnikkut allaffissornikkullu kingunerisassai:
Siunnersuut kommuninut allaffissornikkut annikitsuinnarmik kinguneqassaaq. Naatsorsuutigineqarsinnaavoq kommunit Ilaqutariinnermut Pisortaqarfimmut ukiumoortumik naatsorsuutinik, missingersuutinik aamma ukiumoortumik nalunaarusianik nassiussisarnermi immikkut piffissamik atuisariaqartassasut, naatsorsuutigisariaqassammammi kommunit sannavimmik illersugaasumik ingerlatsinermut atatillugu ukiumoortumik nalunaarusiamik, missingersuutinik aamma ukiumoortumik naatsorsuutinik qangalili suliaqartareersut.

Naatsorsuutigineqarpoq kommunini 15-ini sannavinnik illersugaasunik ingerlatsinermut siunnersuut ukiumut katillugit 5.755.000 koruuninik akeqassasoq. Ilaqutariinnermut Pisortaqarfiup naatsorsuutigaa aningaasat taamatut amerlatigisut siunissami atorneqartarumaartut.

Naatsorsuisoqarpoq kommunit maannakkut sanaviutaat illersugaasut aamma sannavinnik illersugaasunik allanik pilersitsinissamik ilimagisaasut aallaavigalugit.

Ilaqutariinnermut Pisortaqarfiup sulisunut aningaasartuutit akilertassavai imatut,

Sullitat arfinillit qulillu akornannannut sulisumut ataatsimut tapiissuteqartoqartassaaq.

Sullitat aqqanillit 25-llu akornannannut sulisunut marlunnut tapiissuteqartoqartassaaq.

Sullitat 26-niit qummut sulisunut pingasunut tapiissuteqartoqartassaaq.

Tapiissuteqartoqarsinnaavoq nalunaaquttap akunneranut 97,79 koruuninik nalunaaquttap akunneri 1880-it ukiumut killiliullugit. Katillugit sulisumut amerlanerpaamik 183.845 koruunit tapiissutigineqartassapput.

Suliassaqartitsinermut atortussat:

Naatsorsuutigineqarpoq sannavinnut tamanut 75.000 koruunit tunniunneqartassasut, taakku ulloq unnuarlu paaqqinnittarfiit sannaviinut tapiissutigineqartartut amerlaqatigaat.

Naatsorsuutigineqarpoq kommunit 15-nit peqareerlutilluunniit imaluunniit qanittukkut sannavimmik illersugaasumik pilersitsissasut.

Ilaqutariinnermut Pisortaqarfiup kommunit mikinerit marluk annertuumik innarluutillit pillugit peqqussummut ilaasunik ikittuinnarnik innuttallit ilanngutinngilai, soorluttaaq Ivittuut Kommuniat eqqarsaatersuutinut ilaatinneqanngitsoq, naatsorsuutigineqarmammi kommunini taakkunani sannavinnik illersugaasunik pilersitsinissaq pisariaqartinneqarnavianngitsoq.

4. Namminersortunut aningaasaqarnikkut allaffissornikkullu kingunerisassai:
Siunnersuut namminersortunut aningaasaqarnikkut allaffissornikkullu kinguneqassanngilaq. Naatsorsuutigineqanngilaq sannaviit illersukkat namminersortunut unammillertuunissaat.

5. Avatangiisinut pinngortitamullu tunngatillugu kingunerisassai:
Siunnersuut avatangiisinut pinngortitamullu tunngatillugu kinguneqassanngilaq.

6. Innuttaasunut allaffissornikkut kingunerisassai:
Siunnersuut innuttaasunut allaffissornikkut kinguneqassanngilaq.

7. Naalagaaffeqatigiinnermut namminersulernissamullu tunngasut:
Siunnersuut Naalagaaffeqatigiinnut namminersulernissamullu tunngatillugu kinguneqassanngilaq.

8. Oqartussaasunik kattuffinnillu tusarniaaneq:
Siunnersuut oqartussaasunut kattuffinnullu ukununnga tusarniaassutigineqarpoq:

KANUKOKA, Kalaallit Nunaanni Innarluutillit peqatigiiffiat (KNIPK) aamma Aningaasaqarnermut Pisortaqarfik.

Tamarmik tusarniaanermut akissuteqarput.

Pisortaqarfiup tusarniaanermut akissutinut oqaaseqaatini matuma kinguliini uingasunngorlugit allattorpai.

KNIPK allanngortitsinissamik siunnersuummut oqaaseqaateqanngilaq.

 

Aningaasaqarnermut Pisortaqarfiup siunnersuutigaa kommuninut allaffissornikkut kingunerisassai pillugit oqaaseqaatit allanngortinneqassasut.

Ilaqutariinnermut Pisortaqarfiup siunnersuummut ilanngullugit suliarai.

 

Aningaasaqarnermut Pisortaqarfiup siunnersuutigaattaaq ingerlatsinermut tapiissutisinissamut atatillugu ukiumoortumik naatsorsuutinik, missingersuutinik, ukiumoortumik nalunaarusiamik allanillu nassiussisoqartassasoq.

Ilaqutariinnermut Pisortaqarfiup siunnersuummut ilanngullugit suliarai.

 

KANUKOKA-p isumaqatiginngilaa taamaallaat sannaviit illersukkat siunnersuummut ilaammata annertuumik innarluutilinnut ullormut neqeroorutigineqartartut ataatsimut isigalugit pineqaratik.

Ilaqutariinnermut Inatsisinillu Atortitsinermut Naalakkersuisup kissaatiginngilaa annertuumik innarluutilinnut ullukkut neqeroorutigineqartartunut tamanut ataatsimut isiginnilluni tapiissuteqartarnissaq, aningaasaqarnerulli tungaanit isigalugu taamaallaat sannavinnut illersugaasunut tapiissuteqartoqartassasoq toqqarsimallugu. Kommunit ataasiakkaat illersugaasumik sannaveqalernissartik, ornittagaqalernissartik ulluuneraniluunniit katersuuttarfeqalernissartik nammineq aalajangissavaat. Taamatuttaaq siunnersuummi innarluutillit atugarisaat eqqaamaniarneqarput, naatsorsuutigineqartariaqarmammi amerlanerpaartaasa kissaatigissagaat nunatsinni innuttaasutulli allatut piviusorsiortumik suliassaqartitaanissartik kissaatigissagaat.

 

KANUKOKA isumaqarpoq taamaallaat sannaviit illersugaasut siunnersuummut ilaatinneqarnerat Isumaginninnermi Naammagittaalliuuteqartarfiup aalajangiineranut 28. april 2006-imeersumut akerliusoq, tassanimi kommunit ilumoornerarneqarmata aammattaaq ornittakkanut tapiissuteqartoqartarnissaanut inatsisini atuuttuni tunngavissaqartoq.

Ilaqutariinnermut Inatsisinillu Atortitsinermut Naalakkersuisup kissaatigerpiarpaa siunnersuutikkut inatsisit allanngortinneqassasut taamaalilluni siunissami annertuumik innarluutilinnut nammineq inigisaminni najugaqartunut sannavinnut illersugaasunut taamaallaat ingerlatsinermut tapiissuteqartarnissamut inatsisitigut tunngavissaqalerluni.

 

 

Peqqussutissatut siunnersuummi aalajangersakkanut ataasiakkaanut oqaaseqaatit.

§ 1-imut

Nr. 1-imut
Annertuumik innarluutillit ikiorserneqartarnerat pillugu Inatsisartut peqqussutaat nr. 7, 3. november 1994-imeersumi § 18-imi innarluutillit ulloq unnuarlu paaqqinnittarfimmiittut suliassaqartinnissaat pillugu aalajangersaasoqarsimavoq. Siunnersuutikkut innarluutilinnik nammineq inigisaminni najugaqartunik suliassaqartitsineq pillugu malittarisassat peqqussutikkoortunngorlugit qaffanneqarnissaat aalajangersarneqassaaq. Isumaginninnermi Naammagittaalliuuteqartarfiup isummerfiginngilaa nalunaarummi aalajangersakkat aammattaaq innarluutilinnut nammineq inigisaminni najugalinnut tunnganersut. Taamaammat takuneqarsinnaanngilaq § 18, imm. 3-p, Naalakkersuisunik piginnaatitsisup annertuumik innarluutillit nammineq inigisaminni najugaqartut suliassaqartinneqarnerat pillugu erseqqinnerusunik malittarisassiornissaannut, aamma siunnersuummi § 18a, imm. 3-p, Naalakkersuisunik piginnaatitsisup annertuumik innarluutillit nammineq inigisaminni najugaqartut suliassaqartinneqarnerat pillugu erseqqinnerusunik malittarisassiornissaannut, akornanni akerleriittoqartoq.

Annertuumik innarluutillit ikiorserneqartarnerat pillugu Inatsisartut peqqussutaanni § 18-imi sannavinnut illersugaasunut ingerlatsinermut tapiissutinik agguaassisarneq pillugu immikkut malittarisassanik aalajangersaasoqarsimanngilaq. Ilaqutariinnermut Inatsisinillu Atortitsinermut Naalakkersuisup siunnersuutikkut kissaatigaa sannavinnut illersugaasunut ingerlatsinermut tapiissutinik agguaassisarnermut peqqussummiittumik piumasaqaateqartoqarsinnaalissasoq.

Imm. 1-imut
Aalajangersakkakkut erseqqissumik Ilaqutariinnermut Pisortaqarfik inatsisitigut tunngavissinneqassaaq annertuumik innarluutilinnut nammineq inigisaminni najugalinnut sannavinnut illersukkanut ingerlatsinermut tapiissutinik aningaasaliisarnissaanut. Oqaatsimut nammineq inigisamut ilaapputtaaq najugaqaqatigiiffiit ataatsimoorussamillu inissiat.

Sannavimmi illersugaasumi suliassaqartitsisoqassaaq. Sannavik illersugaasoq suliffeqarfimmut nalinginnaasumut assinguvoq, tassami assersuutigalugu tunisassiortoqartarmat tuniniarneqartussanik. Aningaasarsianut aningaasartuutinut kiisalu suliassaqartitsinermut atortussanut aningaasartuutinut matusissutissanik ingerlatsinermut tapiissuteqartoqarsinnaavoq. Suliassaqartitsinermut atortussatut paasineqassapput sannavimmi illersugaasumi sulinermut atortussat pisariaqartinneqartut. Assersuutigalugu tassaasinnaapput naneruusiornermut atortussat.

Imm. 2-mut
Sannavimmut illersugaasumut ingerlatsinermut tapiissutissanik kommunit qinnuteqarnerannut atatillugu piumasaqaataavoq kommunip sannavik illersugaasoq pillugu ukiumoortumik naatsorsuutinik, missingersuutinik aamma ukiumoortumik nalunaarusiamik ilanngussisarnissaa. Taakku nalunaarummiitinnagit Inatsisartut peqqussutaannut ilanngunneqarnerannut pissutaavoq ersersikkumaneqarmat pinngitsoorani piumasaqaataasoq Ilaqutariinnermut Pisortaqarfiup qulakkeerniassammagu ingerlatsinermut tapiissutit siunertamut isumaqatigiissutaareersumut atorneqarnissaat. Taamaattoq kommuni ingerlatsinermut tapiissutisisarnissaminik piumasaqaateqarsinnaanngilaq ukiumoortumik naatsorsuutinik, missingersuutinik ukiumoortumilluunniit nalunaarusiamik nassiussisimagaluaruniluunniit.

Imm. 3-mut
Naalakkersuisut annertuumik innarluutilinnut nammineq inigisaminni najugalinnut sannavinnut illersukkanut ingerlatsinermut tapiissutisisinnaassagaanni piumasaqaatit pillugit sukumiinerusunik malittarisassiornissaminnut piginnaatitaaffilerneqarput. Immikkut eqqarsaatigineqarpoq erseqqinnerusumik taaneqassasoq suna tunngavigalugu ingerlatsinermut tapiissutisinissamik qinnuteqaat akuerineqassanersoq, taamatuttaaq suliassaqartitsinerup, nalunaaquttap akunnerisa amerlassusissaasa, akissarsiassat allallu qanoq ittuunissaannut immikkut piumasaqaateqartoqarnissaa.

§ 2-mut

Siunnersuutigineqarpoq Inatsisartut peqqussutaat atuutilissasoq ulloq 1. januar 2007-imi.