12. november 2006 UKA 2006/111
Peqqussutissatut siunnersuummut nassuiaatit
Nalinginnaasumik nassuiaatit2006-imi Inatsisartut ukiakkut ataatsimiinnerannut Aalisarnermik, piniarnermik nunalerinermillu inuussutissarsiutillit inuussutissarsiornerannik siuarsaaneq pillugu Inatsisartut peqqussutissaattut siunnersuut (UKA 2006/44) Naalakkersuisunit saqqummiunneqarpoq. Nunalerinermilli inuussutissarsiummut siuarsaanermut aalajangersakkat peerneqarnissaannik nassataqartumik tamatumunnga allannguutissatut siunnersuummik Inatsisartut Aalisarnermut, Piniarnermut Nunalerinermullu Ataatsimiititaliaat saqqummiussivoq. Nunalerinermi inuussutissarsiummut siuarsaasarneq tamatuma kingorna aalisarnermut, piniarnermut nunalerinermullu tapersiisarneq pillugu inatsisartut peqqussutaanni atuuttumi suli maleruagassiorneqartassaaq.
Tamatuma kingunerisaanik Inatsisartut peqqussutaannit atuuttumit aalisarnermut piniarnermullu tapersiisarneq pillugu aalajangersakkat tamakkerlugit peerneqarnissaat kiisalu Inatsisartut peqqussutaata taaguutaa "Nunalerinermut tapersiisarneq pillugu Inatsisartut peqqussutaat"-nut allanngortinneqassasoq siunnersuutigineqarpoq.
Tamatuma saniatigut Inatsisartut peqqussutaanni atuuttumi (siunissami naunalerinermut tapersiisarnermut taammaallaat tunngasuulersussami) Aalisarnermik, piniarnermik nunalerinermillu inuussutissarsiutillit inuussutissarsiornerannik siuarsaaneq pillugu Inatsisartut peqqussutissaattut Naalakkersuisut siunnersuutaanni (UKA 2006/44) § 29-miittup nunalerinermut tapersiinermi akiligassallit nikinnerat pillugu aalajangersakkap assinga ilanngunneqassasoq kissaatigineqarpoq.
Kiisalu inuussutissarsiutinut tapersiissutinut taarsigassarsiat ernilersugaallutillu aalajangersimasumik amerliartuaartutut erniaallu ikiliartuaartutut taarsersorneqartarnissaannik aalajangersagaq ilanngunneqassasoq kissaatigineqarpoq. Aalajangersagaq Naalakkersuisut Aalisarnermik, piniarnermik nunalerinermillu inuussutissarsiutillit inuussutissarsiornerannik siuarsaaneq pillugu Inatsisartut peqqussutissaattut siunnersuutaanni (UKA 2006/44) § 21, imm. 1-ip assigaa. Aalajangersakkap ilanngunneqarneratigut taarsigassarsiat ernilersugaallutillu aalajangersimasumik amerliartuaartutut erniaallu ikiliartuaartutut taarsigassarsiarititat Namminersornerullutik Oqartussat aningaasaqarnikkut ingerlatsinerminni atugaata XAL-ip taamaallaat suliarisinnaagai tunngavilersuutigalugu Aalisarnermut Piniarnermullu Pisortaqarfiup kissaataa naammassineqarpoq.
Siunnersuutip kingunerisassai, kiisalu tusarniaaneq il.il. eqqarsaatigalugit UKA 2006/44-mut nalinginnaasumik nassuiaatit innersuussutigineqassapput.
Nunalerinermut tapersiisarneq pillugu Inatsisartut peqqussutaata atuutsiinnartinnerata ilutigisaanik inuussutissarsiutillit inuussutissarsiornerannik siuarsaaneq pillugu peqqussut nutaaq malillugu aalisarnermik piniarnermillu inuussutissarsiutit ingerlatsivigineqarnissaannut Aalisarnermut, Piniarnermut Nunalerinermullu Pisortaqarfiup makku ilisimatitsissutigai:
Maanna taarsigassarsisitsisarnermi iluseritinneqartoq maannakkut periuserineqartup atorneqaannarneranut ilutigitillugu iluarsaanneqassaaq. Matumani aningaasartuutissat pisortaqarfimmit kr. 300.000-iussasut missingerneqarpoq.
Aaqqissuussinernik atuisunut inuussutissarsiutilinnut allanullu, pingaartumik kommunini inuussutissarsiornermut pisortaasunut siunnersortinullu, taakku suliassaqarfimmut peqqussutit atuuttut marluk illersorneqarsinnaasumik paasisaqarfigisinnaaniassammatigit, ingerlatsiviup annertuumik paasisitsiniaanissaa pisariaqartussaassasoq pisortaqarfiup matuma saniatigut nalilerpaa.
Pisortaqafiup naatsorsuutigaa, tamanna kr. 200.000-inik aningaasartuuteqarnerunermik nassataqassasoq, taamaalilluni 2007-imi aningaasanut inatsisissatut siunnersuummi sillimaffigineqarsimanngitsumik aningaasartuuteqarneruneq tamakkiisoq kr. 500.000-iussalluni.
Peqqussutissatut siunnersuutip aalajangersagartaanut ataasiakkaanut nassuiaatit
§ 1-imutNr. 1-8-imut
UKA 2006/44-imik akuersissutiginninnikkut aalisarnermut piniarnermullu tapersiisarneq Inatsisartut peqqussutaanni immikkoorsitami (Aalisarnermik piniarnermillu inuussutissarsiutillit inuussutissarsiornerannik siuarsaaneq pillugu Inatsisartut peqqussutaat) 1. januar 2007 aallarnerfigalugu maleruagassiorneqarpoq. Matuma kingunerisaanik Aalisarnermut, piniarnermut nunalerinermullu tapersiisarneq pillugu Inatsisartut peqqussutaanni atuuttumi, aalisarnermut piniarnermullu tapersiisarnermut aalajangersakkat tamakkerlutik peerneqassasut matumalu malitsigisaanik Inatsisartut peqqussutaata taaguutaa "Nunalerinermut tapersiisarneq pillugu Inatsisartut peqqussutaat"-nut allanngortinneqassasoq siunnersuutigineqarpoq.Nr. 9-mut
Inuussutissarsiutit siuarsarniarlugit taarsigassarsianut atuutereersunut akiligassallit nikissinnaapput, taarsigassarsisoq nutaaq nunalerinermi tapersiisarnermit taarsigassarsinissamut piumasaqaatit eqqortippagit.Aalajangersakkami taamaallaat aalajangersarneqarpoq akiligassallit nikinneranni taarsigassarsisitsisup taarsigassarsisumut pisinnaatitaaffii nalinginnaasut malillugit atuutinneqassasut. Tamanna imatut isumaqarpoq, isumaqatigiissutigineqartumit aallavilimmik taarsigassarsisoq nutaaq isumaqatigiissummi pisinnaatitaaffinnik pisussaatitaaffinnillu tamanik tigusissasoq. Isumaqatigiissutit taamaallaat allanngortinneqarsinnaapput Naalakkersuisut akuersippata.
Nr. 10-mut
Nr. 1-8-mut oqaaseqaatit innersuussutigineqassapput.Nr. 11-mut
Aalajangersagaq Naalakkersuisut Aalisarnermik, piniarnermik nunalerinermillu inuussutissarsiutillit inuussutissarsiornerannik siuarsaaneq pillugu Inatsisartut peqqussutissaattut siunnersuutaanni (EM 2006/44) § 21, imm. 1-ip assigaa. Aalajangersakkap ilanngunneqarneratigut taarsigassarsiat ernilersugaallutillu aalajangersimasumik amerliartuaartutut erniaallu ikiliartuaartutut taarsigassarsiarititat Namminersornerullutik Oqartussat aningaasaqarnikkut ingerlatsinerminni atugaata XAL-ip taamaallaat suliarisinnaagai tunngavilersuutigalugu Aalisarnermut Piniarnermullu Pisortaqarfiup kissaataa naammassineqarpoq.Nr. 12-13-imut
Nr. 1-8-mut oqaaseqaatit innersuussutigineqassapput.
§ 2-mutPeqqussut ulloq 1. januar 2007 atuutilissasoq siunnersuutigineqarpoq.