13. september 2006

UKA 2006/44

 

Aalisarnermik, piniarnermik nunalerinermillu inuussutissarsiutillit inuussutissarsiornerannik siuarsaaneq pillugu Inatsisartut peqqussutissaattut siunnersuut nr. xx 2006-imeersutut siunnersuut.

Kalaallit Nunaanni inuussutissarsiutinut tapiissuteqartarneq pillugu inatsimmi nr. 134-mi 28. marts 1984-imeersumi § 1 naapertorlugu aalajangersarneqarpoq:

 

Kapitali 1
Siunertat

§ 1. Inatsisartut peqqussutiliaatigut siunertarineqartoq tassa aalisarnermik, piniarnermik nunalerinermillu inuussutissarsiutit naammassiviulluartartut unammillersinnaasullu siunissaq ungasinnerusoq isigalugu suliffissaqartitsisinnaasut siuarsarnissaat suliniutitigut ungasinnerusoq isigalugu inooqatigiit aningaasarsiornerannut iluaqutaasinnaasutigut.
Imm. 2. Kapitalini 2, 3 aamma 4-mi oqaatigineqartutut inuit ingerlatseqatigiilluunniit Kalaallit Nunaanni aalisarnermik, piniarnermik nunaateqarnermilluunniit ingerlatsisinnaatitaasut inuussutissarsiorneq siuarsarniarlugu Naalakkersuisut inuussutissarsiutit siuarsarniarlugit taarsigassarsitillugilluunniit tapiiffisinnaavaat.

 

Kapitali 2
Inuussutissarsiutit siuarsarniarlugit taarsigassarsianik atukkiussinermi tapiinermilu tunngaviusussat pingaarnerit

Ingerlatassatut pilersaarutit, inuussutissarsiutit siuarsarniarlugit taarsigassarsisitsiviusinnaasut

§ 2. Ingerlatassatut pilersaarutinut inuussutissarsiutit siuarsarniarlugit Naalakkersuisut taarsigassarsisitsisinnaapput:
1) Teknikkikkut isumannaatsumik nalilerneqartunut, aamma
2) maannakkut siunissamiluunniit aningaasatigut akilersinnaasutut nalilerneqartunut, aamma
3) ingerlatassatut pilersaarutigineqartuni iluanaarutissaattut naatsorsuutigineqartut aningaasartuutaajumaartunut naapertuuttutut nalilerneqarpata.

 

Ingerlatassatut pilersaarutit tapiiffigineqarsinnaasut

§ 3. Naalakkersuisut pilersaarutinut makkununnga tapiisinnaapput:
1) Teknikikkut isumannaatsumik nalilerneqartunut, aamma
2) maannakkut siunissamiluunniit inuiaqatigiit aningaasarsiorneranni akilersinnaasutut nalilerneqartunut, aamma
3) tapiiffigineqartoq periarfissaqarpat imminut napatilernissamut.
Imm. 2. Naalakkersuisut tapiisinnaapput pilersaarutinut nunagissaanermik siunertalinnut.

 

Qinnuteqaateqartu, inuussutissarsiutit siuarsarniarlugit taarsigassarsisinnaasut

§ 4. Inuussutissarsiutit siuarsarniarlugit taarsigassarsiniartup qinnuteqaataata suliarinerani qinnuteqaat ataatsimut isigalugu naliliiffiginiarneqassaaq ilaatigut matuma kinguliini taasat uppernarsisinneqarsimappata:
1) Qinnuteqartoq ingerlatsinikkut aqutsinikkullu pisariaqartinneqartunik piginnaassuseqartoq qulakkeerneqarsimalluni ingerlanniakkaminik imminut akilersinnaasumik ingerlatsisinnaanera inuussutissarsiutit siuarsarniarlugit taarsigassarsisitsinissami piumasarineqartunut naapertuuppata.
2) Ingerlatsinermi aningaasartuutissatut akiliisinnaassutsimullu naatsorsuusiatigut taku-neqarsinnaappat taarsigassarsiat utertinniarlugit akilersorneqarsinnaasut.
3) Qinnuteqartoq nalilinnik pigisaqarnermigut ima ittoq akilersuinissamik pisussaassut-siminik naammassinnissinnaalluni aningaasanik atukkaminik taarsiisinnaassuseqartumik.
4) Takuneqarsinnaappat nunaminertamik atuinissamik akuersissummik tunineqarnermut, aalisarnissamik akuerineqarnermut, aalisagartassinneqarnermut pisortanillu akuersissutinut allanut aallartinniakkanullu pisortanit akuersinissamut nalunaarneqarsimasoq peqqussut manna malillugu inuussutissarsiutinik siuarsaanissanissamut atatillugu taarsigassarsisitsisoqarsinnaavoq.
5) Qinnuteqartoq pilersaarutimi naammassinissaanut inuussutissarsiutit siuarsarniarlugit taarsigassarsinissamik piumasaqaatigineqartunik pigisaqarpat.
Imm. 2. Imm.1, nr. 3 malillugu naliliineq pissaaq qinnuteqartup qinnuteqarnerup nalaani aningaasatigut ingerlanera tunngavigalugu. Pissutsit patsisissallit, taamatuttaaq sillimmasii-nermik suliat, eqqartuussivimmi sulianik aalajangiinerit il.il. pissutsit naammassereertinnagit naliliinermut ilaasinnaanngillat.
Imm. 3. Naliliinissamik tunngavik Naalakkersuisut ilasinnaavaat piumasaralugit inuussutissarsiornermut atasumik siusinnerusukkut atorniarnerit Namminersornerullutik Oqartussanilluunniit tapiissutit paasissutissartaannik tunineqarnissamik nalilerniarlugu qinnuteqartup pi-sussaaffini naammassisimanerai.
Imm. 4. Qinnuteqartoq angallammut ataatsimut imaluunniit savaateqarfimmut ataatsimut inuussutissarsiutit siuarsarniarlugit taarsigassarsisinnaavoq. Tamanna atuupportaaq inuk taanna ingerlatseqatigiiffinnik ilivitsumik ilaannakuusumilluunniit arlalinnik piginnittuuppat.

 

Qinnuteqartut tapiiffigineqarsinnaasut

§ 5. Inuussutissarsiutigalugu nutaamik sanaamik umiatsiaararsiniarnermut Naalakkersuisut tapiisinnaapput inuussutissarsiutigalugu umiatsiaararsiassaq:
1) Minnerpaamik isikkanik 16-inik annerpaamillu isikkanik 19-inik takissuseqarpat,
2) motooreqarpat aquuteralammik ikkuttakkamik, aamma
3) Kalaallit Nunaanni inuussutissarsiutigalugu umiatsiaarassatut akuerisaasimappat.
Imm. 2. Tapiissutit tunniukkumaneqarnerussapput umiatsiaararsiassanut piniarnermut atugassanut.
Imm. 3. Inuussutissarsiutigalugu umiatsiaaqqamik pisinermi umiatsiaaqqap pisiarinerani akiata 75%-ianik tapiissuteqartoqarsinnaavoq. Qinnuteqaateqartoq Qaanaami, Ammassalimmi Ittoqqortoormiuniluunniit aalajangersimasumik najugaqarpat umiatsiaaqqap pisiari-nerani akiata 84%-ianik tapiissuteqartoqarsinnaavoq.
Imm. 4. Inuussutissarsiutigalugu umiatsiaararsiniarnermi inuussutissarsiutit siuarsarniarlugit taarsigassarsisitsisoqarsinnaanngilaq.

§ 6. Qinnuteqartoq, inuussutissarsiutigalugu nutaamik umiatsiaarartaarniarnermini, § 5 malillugu imaassaaq:
1) 18-it 60-illu akornanni ukioqassalluni, aamma
2) tapiiffigineqarnissamik qinnuteqarnini ukiunik marlunnik sioqqullugu inuussutissarsiutigalugu piniartutut aalisartutulluunniit allagarserneqarsimasussaalluni qinnuteqarnermilu nalaani taama allagartaqartussaalluni.

 

Qinnuteqartut nunalerinermi tapiiffigineqarsinnaasut

§ 7. Nunalerinermut atatillugu nunagissaanermik suliassat kisimi tapiissuteqarfigineqarsinnaapput, aamma qinnuteqartoq tapiiffigineqassaguni:
1) nunalerinermik ingerlatsisooreertariaqarpoq,
2) uppernarsaateqartariaqarpoq nunagissaanermigut nunalinermik siuarsaaqataallunilu ingerlalluarnerulersitsisinnaanerminik, aamma
3) uppernarsaasiisinnaasariaqarpoq nunagissaanermigut nunalerinerup aningaasatigut ingerlanera iluaqusersinnaallugu.

 

Kapitali 3
Aalisarnermut piniarnermullu malittarisassat sukumiinerusumik oqaatigalugit

Inuussutissarsiutit siuarsarniarlugit angallatinut aalisariutinut taarsigassarsiat   inuutissarsiutigalugulu umiatsiaaqqanut tapiineq

§ 8. Naalakkersuisut inuussutissarsiutit siuarsarniarlugit aalisariutinut taarsigassarsisitsisinnaapput matuma kinguliini taaneqartut siunertarineqarpata:
1) Aalisariummik allanngortiteriniarneqarlunilu iluarsaaniarneqarpat.
2) Motoorinik pissarsiniarneqarpat, iluarsaassiniarneqarluni taarsiiniarneqarlunilu.
3) Sillimanissamut atortunik pissarsiniarneqarpat.
4) Teknikkikkut atortunik allanik pissarsiniarneqarpat.
5) Aalisarnermut atortunik ingerlatsinermilu atortunik taamaaqataannik pissarsiniartoqarpat. Imm. 2. Inuussutissarsiutit siuarsarniarlugit taarsigassarsianik aalisariutisiniarnissamut qinnuteqaat nalilerniarlugu, imm. 1 malillugu aalisariutip ataatsimut aningaasarsiutaanera nalilerniarneqassaaq aalisartup nalinginnaasumik isertarisinnaasai aallaavigalugit.

§ 9. § 5 malillugu tapiissutigineqartut inummut qinnuteqartumut taamaallaat ukiut aqqaneq marlunngoraangata tunniunneqarsinnaassapput. Tassalu qinnuteqaateqartoq malittarisassat siusinnerusukkut atuuttut malillugit umiatsiaaqqamik pisinissamut Naalakkersuisunit taarsigassarsilluniluunniit tapiiffigineqarsimaguni, umiatsiaaqqamik inuussutissarsiummik nutaamik pisinissamut akuerineqarsinnaavoq pissarsinermi kingorna ukiut aqqaneq-marluk aatsaat qaangiuppata.

§ 10. Inuussutissarsiutigalugu umiatsiaaraq Naalakkersuisunit peqqussut manna malillugu siusinnerusukkulluunniit malittarisassat malillugit taarsigassarsilluni tapiiffigineqarluniluunniit pisiarineqarsimasoq umiiarnikkut, tamakkiisumik ajoqusivinnikkut allatulluunniit sillimmasiissutitigut matussusigassamik pisoqarneratigut annaaneqarpat, § 9 soqutinagu inuussutissarsiutigalugu nutaamik umiatsiaararsiniarnissamut tapiissuteqartoqarsinnaavoq:
1) Umiatsiaaraq annaaneqartoq naapertuuttumik sillimmasigaasimappat, aamma
2) sillimmasiinermut taarsiissutit pigineqarpata Naalakkersuisunullu tunniunneqarsimallutik Naalakkersuisut umiatsiaaraliortumik tamakkiisumik akiliuteqarnissaa siunertaralugu.
Imm. 2. Tapiissutit, imm. 1 malillugu, ajoqusiiffigineqarsimasumut sillimmasiinikkut taar-siiffigineqarsimasumut tunniussanut ilanngaatigineqassapput.
Imm. 3. §§ 3, 5 aamma 6 malillugit piumasaqaatit aalajangiinermilu tunngaviit atorneqassapputtaaq.

 

Inuussutissarsiutigalugu umiatsiaaqqamut tapiissutit utertillugit akilerneqarnerat

§ 11. Inuussutissarsiutigalugu umiatsiaaqqamik nutaamik pisinermut tapiissutit utertillugit akilerneqarnissaat Naalakkersuisut piumasarisinnaavaat imaattoqarsimappat:
1) Tapiissuteqarfigineqartoq ukiuni tulleriinni marlunni inuussutissarsiutigalugu piniartutut aalisartutulluunniit nalunaarsugaasimanngippat.
2) Nalilerneqarpat tapiissuteqarfigineqartup qaammatini kingullerni aqqaneq marlunni inuussutissarsiutigalugu umiatsiaaraq pingaarnertut isertitaminut atorsimanngikkaa.
3) Pisiarineqarsimasut, § 5, imm. 1 malillugu, allamut tunineqarsimappata tapiissutit tigune-ranniit ukiut arfinillit qaangiutsinnagit.
4) Pisiarineqarsimasut, § 5, imm. 1 malillugu, qularnaveeqqusiunneqarsimappata.
5) Tapiissuteqarfigineqartup Naalakkersuisunit, § 30, imm. 3 malillugu, piumaffigineqarluni inuussutissarsiutigalugu umiatsiaaqqap ingerlannerani qaammatini aqqaneq marlunni qaa-ngiuttuni nioqqutissiassanik tunisanut uppernarsaat nassiussimanngippagu.
6) Tapiinissamut piumasarisat atugassarititaasullu allakkut qaangiinnarneqarsimappata.

§ 12. Ukiunut aqqaneq marlunnut tapiissutit aningaasartaat nalikillineqartassapput ukiut tamaasa aqqaneq marlorarterummik.
Imm. 2. Tapiissutip utertinneqarnerani, § 11 malillugu, utertitsinissamik piumasaqaat naatsorsorneqassaaq tapiissutit tiguneranniit ukiup nutaap aallartinneranit aqqaneq marlorarterummik ikiliartuaartillugit.

 

Kapitali 4
Nunalerinermik inuussutissarsiuteqarneq pillugu aalajangersakkat sukumiinerusut

§ 13. Nunalerineq uani peqqussummi nassuiarneqassaaq inuussutissarsiornertut narsaase-rinertut imaluunniit uumasuuteqarnertut.
Imm. 2. Naalakkersuisut nunalerinermi siunertanut inuussutissarsiutigalugu illuutit sanaartornerannut, allanit tigunerannut, allilerneqarnerannut pitsanngorsarneqarnerannulluunniit inuussutissarsiutit siuarsarniarlugit taarsigassarsisitsisinnaapput.
Imm. 3. Naalakkersuisut nunalerinermut inuussutissarsiutit siuarsarniarlugit taarsigassarsisitsisinnaapput, taassumalu iluani piginnittumut, atuisumut, pisortaatitaasumut ikiortaasumulluunniit inissiamik ataatsimik sanaartornermut.

§ 14. Naalakkersuisut nunalerinermi pigisanik piginnittumut inuussutissarsiutinik siuarsaanermut atatillugu inissiamik ataatsimik imaluunniit tunniussisup utoqqalinermini inissaanik taaneqartumik, sanaartornermut nunalerinermi pigisat allamut tunniunneqarneranut atatillugu inuussutissarsiutit siuarsarniarlugit taarsigassarsisitsisinnaapput, piumasaqaatit makkua naammassineqarsimappata:
1) Nunalerinermi pigisat tamakkerlugit allamut tunniunneqarsimappata inissiartaa, inuussutissarsiornermi illuutit, maskiinat, uumasuutit kiisalu nunamik atuisinnaatitaanermik akuersissut ilanngullugit,
2) nunalerinermi pigisanik tunniussisoq ilaqutaalu qaniginerusai tunniussisup utoqqali-nermini inissaani najugaqassappata, aamma
3) tunniussisup utoqqalinermini inissaa sanaartorneqarpat taarsigassarsissutigineqarluni pigineqarlunilu nunalerinermi pigisanik tamarmiusunik piginnittumit.

§ 15. § 13 imm. 2 aamma 3, aamma § 14-ilu malillugit inuussutissarsiutit siuarsarnissaannut taarsigassarsiat ilagissavaat innaallagissap aqqutaasa ikkussornerannut aningaasartuutit, toq-qaviliornermi sanasunik ikiorteqarnermut aningaasartuutit, sanaartornermut atatillugu sanaartukkanut taamatuttaaq teknikkimut, inatsisilerinermut aningaasaqarnermullu tunngatillugu siunnersuinermut aningaasartuutit allat.
Imm. 2. Inuussutissarsiutit siuarsarniarlugit taarsigassarsiat nunalerinermik ingerlatat allamut tunniunneqarneranni aningaasat atukkiussat atugassaapput illunut pigisanut, maskiinanut, uumasuutinut, illunut najugarisanut, ingerlatsinermi atortunut allanut kiisalu inatsisilerinermut aningaasaqarnermullu tunngatillugu pisinermut atatillugu siunnersuisoqarnermut.
Imm. 3. Inuussutissarsiutit siuarsarsarniarlugit taarsigassarsiat taamaallaat taarsigassarsiaritinneqarsinnaapput imm. 1 aamma 2 malillugit aningaasat pisissutissatut oqaatigineqartut nalinginnaasutut oqaatigineqarpata.

 

Ingerlatsinermi atortusat sanaartukkallu allat

§ 16. Naalakkersuisut inuussutissarsiutit siuarsarniarlugit taarsigassarsisitsisinnaapput ukununnga atugassanik:
1) Maskiinanut, atortussanut, imerterutissanut, ungaluliassanut kiisalu ingerlatsinermut atortussanut allanut pisariaqartinneqartunut.
2) Illuutini ingerlatsivinnilu atugassamik innaallagissiornermut atortussanik sanaartornermut pisiortornermulluunniit.
3) Umiatsiaaqqamik inunnik angallassissutissatut naatsorsuutigineqartunik pisinermut.

 

Uumasuutit kinguaassiortitat

§ 17. Naalakkersuisut inuussutissarsiutit siuarsarniarlugit taarsigassarsisitsisinnaapput uumasuutissanut kinguaassiortitassanut atugassanik makku pineqarpata:
1) Uumasuutit tamarmiusut immikkut ittumik pingaarutilimmillu amerlisinneqassappata.
2) Uumasuutinik kinguaassiortitassanik pisinermut pissutaappat uumasuutigineqareersut ki-nguaassiortitat uumasuutit nappaalaneratigut aamma silap pissusiinik assigisaannillu pissuteqartumik annertuumik annaaneqarsimappata.
3) Nunaleriffioreersimasumi suliffeqarfimmik aallartitseqqittoqarpat.

 

Iluarsaassinerit

§ 18. Pigisat nalillit §§ 13-mi, 14-imi 16-imilu taaneqartut iluarsaanneqarnerannut Naalakkersuisut inuussutissarsiutit siuarsarniarlugit taarsigassarsisitsisinnaapput, tamanna nunalerinerup ingerlaqqinnissaanut pingaaruteqarluinnarpat, tamakkununnga aningaasartuutit annertuallaarpata aningaasartuutaasartunik naatsorsuutigineqarsinnaasunillu sippuisimappata.

 

Nunagissaanerit

§ 19. Naalakkersuisut nunalerinermi pigisanik piginnittumut tapiisinnaapput naggorissaanermut nutaaliorlunilu nunagissaanermut, kalkilimmik marralersuinermut, paqqersaanermut, kalkilersuinermut, naggorissaasersuinermut kiisalu narsaatini aqqusinniornermut, nunaminertani nunalerinermi pigisanik piginnittumut atugassanngortitaasuni suliarineqartunut.
Imm. 2. Tapiissuteqartoqassaaq nunaminertap suliarineqarsimasup annertussusia suliallu suunera tunngavigalugit, tunniunneqassallutillu uppernarsarneqarpat suliaq naammassineqarsimasoq.
Imm. 3. Nunagissaanermut tapiissutit piumasaqaatit aalajangiinermilu tunngaviit §§ 3-mi aamma 7-imi taaneqarsimasut malissavaat.

 

Ingerlatsinermut akiligassarsineq

§ 20. Nunalerinermi pigisanik piginnittoq ingerlatsinermut akiligassarsisinneqarsinnaavoq aalajangersimasumik ernialersukkanik. Akiligassarsianit akiliisoqarsinnaavoq uumasut nerukkaatissaannut, naggorissaatinut assigisaannullu aningaasartuutit matussutissaattut. Akiligassanik tunniussisoqartassaaq aningaasartuutigisimasanut uppernarsaammik saqqummiussineq tunngavigalugu.
Imm. 2. Naalakkersuisut pissutsini immikkut ittuni ingerlatsinermut akiligassarsisitsineq akuerisinnaavaat aningaasartuutit imm. 1-imi taaneqanngitsut akilernissaannut, aningaasartuutit taakku akilerneqarnissaat kinguartinneqarsinnaanngippat imaluunniit ajutoorsinnaanerup pinngitsoortinnissaanut assigisaanullu atugassaappata ingerlatsinermullu tunngasuuppata.
Imm. 3. Naalakkersuisut ingerlatsinermut akiligassarsiat amerlassusissaannut, utertillugit akilernissaannut, erniat annertussusissaannut malittarisassiorsinnaapput.

 

Kapitali 5
Inuussutissarsiutit siuarsarniarlugit taarsigassarsinermut atugassarititaasut

Taarsigassarsiat ikilisarnerat

§ 21. Inuussutissarsiutit siuarsarniarlugit taarsigassarsiat utertinniarlugit akilersorneqarsinnaapput aalajangersimasumik annertussusilinnik akuttoqatigiiaakkanik ernialersukkanillu.
Imm. 2. Naalakkersuisut inuussutissarsiutit siuarsarniarlugit taarsigassarsiat ikilisinniarlugit akileeqataasinnaapput taarsigassarsiallip taarsigassarsiat annertussusiviinik ikiliartortitsinera ilutigalugu. Taarsigassarsiallip ernianik akilersuineranut ikilisitsissutissanik akileeqataasoqarsinnaanngilaq.
Imm. 3. Tapiissutit Naalakkersuisut ilasinnaavaat nunalerinermi pigisanik piginnittut arlallit peqatigiillutik atugassaminnik maskiinanik, nersutit inaannik allanillu pisippata.
Imm. 4. Naalakkersuisut tapiissutissat amerlassusissaat aalajangissavaat taarsigassarsianut piffissaq akilersuiffiusoq najoqqutaralugu. Inuussutissarsiutit siuarsarniarlugit taarsigassarsiat akilersornerini akilersuutip 50%-ia angullugu tapiissutigineqarsinnaavoq. Tapiineq taanna pisinnaavoq taarsigassarsisitsinermut isumaqatigiissut malillugu aalajangersimasumik ikilisaaalluni akiliutissaq taarsigassarsisumit akilerneqarsimappat.
Imm.5. Naalakkersuisut inuussutissarsiutit siuarsarniarlugit taarsigassarsianut ikilisaatissanut tapiissutit amerlassusissaat atugassarititaasullu allat pillugit malittarisassat aalajangersarsinnaavaat.

 

Nammineq aningaasaliissutit

§ 22. Inuussutissarsiutit siuarsarniarlugit taarsigassarsisitsisoqartassaaq qinnuteqartoq nammineq aningaasaliissuteqassasoq piumasaqaatigalugu.
Imm. 2. Nammineq aningaasaliissutit pisiap akiata minnerpaamik 10%-erissavai Naalakkersuisunullu akilerneqareersimassallutik inuussutissarsiutit siuarsarniarlugit taarsigassarsiat akiliutigineqalersinnagit.
Imm. 3. § 8, imm. 1, aamma §§ 13, 14, 16, 17 aamma 18 malillugit nammineq aningaasaliissutit ilaqarsinnaapput pigisanik nalilinnik pissarsiariniakkap tamarmi nalinganut ilaasunik.
Imm. 4. Naalakkersuisut nammineq aningaasaliissutip annertussusiata allinissaanik malittarisassaliorsinnaapput.

 

Piffissaq akilersuiffiusussaq

§ 23. Inuussutissarsiutit siuarsarniarlugit taarsigassarsianik piffissaq akilersuiffiusussaq, takuuk § 8, imm. 1, sivisunerpaamik ukiunut tallimanut aalajangersarneqarpoq. Taamaattorli § 8-mi imm.1-imi nr. 1 aamma 2 malillugit taarsigassarsianik piffissaq akilersuiffiusussaq ukiunut qulinut aalajangersarneqarsinnaavoq angallammik sanaqqiineq iluarsaassinerlu kiisalu motoorimik pissarsineq taarsiinerlu annertuujusimappata.
Imm. 2. Inuussutissarsiutit siuarsarniarlugit taarsigassarsianik piffissaq akilersuiffiusussaq, takukkit §§ 13, 14 aamma 16-imi nr. 2, sivisunerpaamik ukiunut 20-nut aalajangersar-neqarpoq. Siullermeerluni taarsigassarsianut akiliinissaq ukiut marluk angullugit kinguartinneqarsinnaavoq ukiut akilersuiffissat 20-usut kinguartitsinerup sivisussusianik ilallugit.
Imm.3. Inuussutissarsiutit siuarsarniarlugit taarsigassarsianik piffissaq akilersuiffiusussaq, takukkit §16-imi nr. 1 aamma 3, sivisunerpaamik ukiunut qulinut aalajangersarneqarpoq.
Imm. 4. Inuussutissarsiutit siuarsarniarlugit taarsigassarsianik piffissaq akilersuiffiusussaq, takuuk §17, sivisunerpaamik ukiunut tallimanut aalajangersarneqarpoq.
Imm. 5. § 18 tunngavigalugu inuussutissarsiutit siuarsarniarlugit taarsigassarsianut piffissaq akilersuiffiusussaq, pigisanut nalilinnut iluarsaanniarlugit taarsigassarsissutigineqartunut, taarsigassarsianut tamanut atuuttutulli piffissamut akilersuiffissamut naapertuuttumik aalajangersarneqassaaq, takukkit § 23, imm. 2-4, innaallagissap aqqutaasa ikkussornerannut taamaattoq annerpaamik ukiut qulit.

 

Qularnaveeqqusiineq

§ 24. Inuussutissarsiutit siuarsarniarlugit taarsigassarsiat pigisami nalilimmi aalisariummilu inuussutissarsiutit siuarsarniarlugit taarsigassarsiaqarfiusimasumi qularnaveeqquserneqartassapput. Qularnaveeqqut sapinngisamik pitsaanerpaamik prioriteteqartinneqassaaq.
Imm. 2. Inuussutissarsiutit siuarsarniarlugit taarsigassarsiat sapinngisamik pitsaanerpaamik qularnaveeqquserneqarsimassapput, pigisami nalilimmi inuussutissarsiutit siuarsarniarlugit taarsigassarsisitsiviusumiluunniit qularnaveeqqusiinikkut.

 

Inuussutissarsiutit siuarsarniarlugit taarsigassarsisitsinermi atugassarititaasut

§ 25. Inuussutissarsiutit siuarsarniarlugit taarsigassarsianut ernialiussat naafferartumillu akilersuutit Naalakkersuisunit aalajangersaavigineqartassapput. Tulleriiaakkamik angeqatigiissaakkanik taarsigassarsiat tunniunneqarsinnaapput.
Imm. 2. Naalakkersuisut piumasarisinnaavaat inuussutissarsiutit siuarsarniarlugit taarsigassarsiat tamarmik utertinneqassasut ima pisoqarpat: Erniaat ikilisaallunilu akiliutaasartut piffissaq eqqorlugu akilerneqanngippata imaluunniit inuussutissarsiutit siuarsarniarlugit taarsigassarsinermut atatillugu piumasareqqaakkat sumiginnarneqarpata.
Imm. 3. Taarsigassarsianik akilersuineq piffissaq eqqorlugu pisarsimassaaq ulloq aki-leeqquneqarnermik kingorna kingusinnerpaamik ullut 30-t qaangiunneranni akilerneqarsimagunik. Tamatuminnga kingusinnerusukkut akiliineq pisimappat aningaasat taarsigassarsiari-neqarsimasut utertinniarneqalissapput taarsigassarsisimasup allakkatigut piumaffigineqarnermi tusarlerneqarnermiluunniit kingorna ullut arfineq marluk qaangiutsinnagit erniat naafferartumillu akilersuutit akilersimanngippagit.
Imm. 4. Naalakkersuisut taarsigassarsisup piffissami aalajangersimasumi akiliinissaa ukiut marluk tikillugit kinguartissinnaavaat imaattoqarsimappat:
1) Inuussutissarsiutit siuarsarniarlugit taarsigassarsiat tamarmiusut nalingisa qularna-veeqqusiussap nalingata 60%-iat sinnerlugu annertussuseqartoq nalilerneqarpat, aamma
2) isumaqartoqarpat akiliisinnaanngikkallarneq sivikitsuinnaasoq.
Imm. 5. Taarsigassarsiallip imm.4 malillugu akilersuinermik kinguartitsinerup kingornatigut piffissami aalajangersimasumi akiligassanik akilersuinini aallarteqqippagu, piffissaq akilersuiffiusussaq piffissat aalajangersimasut kinguartitsivigineqarsimasut amerlaqataannik sivitsorneqassaaq.
Imm. 6. Ukiunit marlunnit amerlanerusunik akilersuinissamik sivitsuisinnaanermik Naalakkersuisut akuersisinnaapput immikkut ittunik pisoqartillugu.

 

Akiitsunik annikillisaaneq isumakkeerinninnerlu

Ernialersuinerup akiitsunillu ikilisaanerup unitsinneqarnerat

§ 26. Taarsigassarsiat ernialersorneqarnerat unitsinneqassaaq taarsigassarsiat sumiginnar-neqarsimanerannik pissuteqartumik Naalakkersuisut taarsigassarsisitsineq taamaatitippassuk.
Imm. 2. Taarsigassarsiat taamaatitinneqarpata, akiitsut ikilisarnissaannut Naalakkersuisut ukiumoortumik tapiissuteqartarsinnaapput, aningaasat qaammatit aqqaneq marluk kingulliit ingerlanerani taarsigassarsialimmit akilerneqarsimasut amerlaqataannik.

 

Isumakkeerinninneq

§ 27. Peqqussut manna imaluunniit inuussutissarsiutinut tapersiisarneq pillugu malittarisassat siusinnerusukkut atuuttut malillugit taarsigassarsiat ukiup qaammatisiuteqarfiusup naane-ranit ukiut tallimat ingerlareerpata Naalakkersuisut akiligassat ilaat isumakkeerinnissutigisinnaavaat. Akiligassat 150.000 kruuninit ikinninngorlugit isumakkeerinnissutigineqarsinnaanngillat.
Imm. 2. Taamaallaat isumakkeerinnittoqarsinnaavoq naatsorsuutigineqarpat taarsigassarsiallip akiligassat tamakkerlugit ukiuni qaninnerni tamakkiisumik utertillugit akilersinnaanngippagit.
Imm. 3. Taarsigassarsiallip imm. 2 malillugu akiliisinnaassuseqarnera ukua tunngavigalugit nalilerneqassaaq:
1) Akiitsut amerlassusiat.
2) Taarsigassarsisup inoqutaasalu aningaasaateqassusiat.
3) Taarsigassarsisup inoqutaasalu maannakkut isertitaat siunissamilu isertitassaat.
4) Taarsigassarsiallip ukiui.
Imm. 4. Naalakkersuisut imm. 1 soqutiginagu akiligassat sinneri tamaasaluunniit ukiut qulit qaangiunneranni isumakkeerinnissutigisinnaavaat, tamatumanili tunngaviussaaq taarsigassarsialik akiliisinnaassuserigunakkani naapertorlugu annertussusilimmik akiligassanik akilersuisimappat.
Imm. 5. Taamaallaat inuit isumakkeerinniffigineqarsinnaapput.

 

Taarsigassarsianik allanngortitsineq

§ 28. Naalakkersuisut inuussutissarsiutit siuarsarniarlugit taarsigassarsiaareersut taarsigassarsianut nutaanut allanngortissinnaavaat piffissami aalajangersimasumi akilersuiffissaq pigisap nalillip taarsigassarsiarititanut tunngasup piunissaa sinneruttutut naatsorsuutigineqartoq sinnernagu, imaassimappat
1) inuussutissarsiutit siuarsarniarlugit taarsigassarsiaareersut ukiut tallimat sinnerlugit ingerlareersimappata, aamma
2) nalilerneqarpat taarsigassarsiallip tamatuma kingornatigut inuussutissarsiutit siuarsarniarlugit taarsigassarsiat nutaat utertillugit akilersornissaat sapissanngikka.

 

Akiligassallit nikinnerat

§ 29. Taarsigassarsiallip peqqussut manna imaluunniit inuussutissarsiutinut tapersiisarneq pillugu malittarisassat siusinnerusukkut atuuttut malillugit taarsigassarsisimasup taarsigassarsiniartumut nutaamut taarsigassarsiaminik tunniussisinnaanera Naalakkersuisut akuerisinnaavaat, taarsigassarsiniartup nutaap pigisat nalillit taarsigassarsiaritinnerinut tunngaviusut tiguppagit taarsigassarsiaqalersullu nutaap inuussutissarsiutit siuarsarniarlugit taarsigassarsi-sinnaassaguni piumasaqaataasut naammassisimappagittaaq.

 

Inuussutissarsiutit siuarsarniarlugit taarsigassarsianik tapiissutinillu utertitsilluni akiliineq

§ 30. §§ 11 aamma 25, imm. 2 malillugit inuussutissarsiutit siuarsarniarlugit taarsigassarsisitsineq taamaatinniarlugu Naalakkersuisut aalajangiisinnaapput, inuit ingerlatseqatigiiffiilluunniit tunngavissaqanngitsumik peqqussut manna iluaqutigalugu taarsigassarsianik tapiissutinilluunniit pisimappata.
Imm. 2. §§ 11 aamma 25, imm. 2 malillugit inuit ingerlatseqatigiiffiillu inuussutissarsiutit siuarsarniarlugit taarsigassarsisitaasimasut tapiiffigineqarsimasulluunniit aningaasatigut ingerlanermik allanngornerinik pingaaruteqartunik Naalakkersuisunut nalunaaruteqarnissamik pisussaaffeqarput. Naalakkersuisut pineqartut taakku piumasaqarfigisinnaavaat aningaasaqarnerminnut tunngasunik uppernarsaatinik tuneqqullutik.
Imm. 3. Naalakkersuisut inuk umiatsiaararsiniarnermut tapiiffigineqarsimasoq piumasaqarfigisinnaavaa qaammatini ingerlareersuni aqqaneq marlunni umiatsiaaqqamik pisami tu-niniarnerinut uppernarsaatinik nasseqqullutik.

 

Kapitali 6
Ataatsimut aalajangersakkat

§ 31. Naalakkersuisut Inatsisartut peqqussutaata allaffissornikkut aqunneqarnera pillugu malittarisassanik erseqqinnerusunik aalajangersaasinnaapput, taamatuttaaq makku pillugit malittarisassaliorsinnaallutik:
1) Inuussutissarsiutit suut ingerlatassatullu pilersaarutit suut inuussutissarsiutit siuarsarniarlugit taarsigassarsisitsivigineqarsinnaasut.
2) Nunap ilaani sumiiffiit sorliit Naalakkersuisut inuussutissarsiutit siuarsarniarlugit taarsigassarsisitsiffigisassaneraat.
3) Inuussutissarsiutit siuarsarniarlugit taarsigassarsiat ikilisarnerinut tapiissutinik aalaja-ngersaasarnerit.
4) Ilinniartitaanermut, aningaasaqarnermut teknikkimullu tunngatillugu qinnuteqaateqartunut ingerlatassatullu pilersaarutinut piumasaqaatit.
5) Nunagissaanernut tapiissutissanut piumasaqaatit.
6) Ingerlatsinermi akiligassarsititsisarneq.
7) Peqqussutip allaffissornikkut aqunneqarnera, tassani aamma kommunit peqataanerat.

 

Ikaarsaariarnermi atortuulersitsinermilu aalajangersakkat

§ 32. Inatsisartut peqqussutaat manna atuutilerpoq 1. januar 2007.
Imm. 2. Tamanna peqatigalugu Aalisarnermut, piniarnermut nunalerinermullu tapersiisarneq pillugu Inatsisartut peqqussutaat nr. 10, 12. november 2001-imeersoq atorunnaarsinneqarpoq.
Imm. 3. Namminersornerullutik Oqartussat nalunaarutaat nr. 12, 12. december 1984-imeersoq inuussutissarsiutinik tapiinermut tunngasoq ataannassaaq peqqussut manna naapertorlugu nalunaarummik taarserneqarserluni imaluunniit atorunnaarserneqarserluni una Inatsisartulluunniit peqqussutaat allat aallaavigalugit.
Imm. 4. Piumasarisat Inatsisartut peqqussutaat nr. 4, 20. november 1984 inuussutissarsiutinut tapersiisarneq malillugu aamma Inatsisartut peqqussutaat nr. 10, 12. november 2001 aalisarnermut, piniarnermut nunalerinermullu tapersiisarnernut tunngasoq malillugu suli atasut allaffissornikkut aqunneqartuarallassapput atukkiinerit pineranni aalajangersakkat atuuttut najoqqutaralugit.

Namminersornerullutik Oqartussat, ulloq xx.yy 2006

Hans Enoksen

/

Finn Karlsen