25. oktober 2006

UKA 06/44

 

Aalisarnermik piniarnermik nunalerinermillu inuussutissarsiutillit inuussutissarsiornerannik siuarsaaneq pillugu Inatsisartut peqqussutissaattut siunnersuut

pillugu

Inatsisartut Aalisarnermut Piniarnermut Nunalerinermullu Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

Inatsisartut Aalisarnermut, Piniarnermut Nunalerinermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Ane, Hansen, Inuit Ataqatigiit, siulittaasoq
Inatsisartunut ilaasortaq Kim Kielsen, Siumut, siulittaasup tullia
Inatsisartunut ilaasortaq Augusta Salling, Atassut
Inatsisartunut ilaasortaq Vittus Mikaelsen, Siumut (Lars Emil Johansenimut sinniisoq)
natsisartunut ilaasortaq Jens B. Frederiksen, Demokraatit

Inatsisartut Aalisarnermut, Piniarnermut Nunalerinermullu Ataatsimiititaliaata siunnersuut oqaaseqaatitai ilanngullugit siullermeerinerup kingorna misissuataarpaat.

Siunnersuutip tusarniaassutigineqarnera

Tusarniaanermit akissutit matumanilu piffissarititaasup misissornerinut siunnersuutip nalinginnaasumik nassuiaatitai innersuunneqassapput. Savaatillit Peqatigiit Suleqatigiissut (SPS) Nunaateqarnermullu siunnersuisoqatigiit tusarniaanermut akissuteqarsimanngitsut Ataatsimiititaliap maluginiarneqartariaqartoq isumaqarpoq. Inuussutissarsiortut paasisimasaqarluartullu ulluinnarni nunalerinermi inuussutissarsiutilinni suliaqartut tusarniaavigissallugit pingaaruteqartut Ataatsimiititaliaq isumaqarpoq. Taamaasillutik nunalerinermi inuussutissarsiornermi annertuumik pingaaruteqarsinnaasumut paasissutissartaqanngitsumik Inatsisartut aalajangiinissamut periarfissaqarput. Peqqussutissatut siunnersuut nunalerinermut aamma tunngassuteqarmat taassumalu piumasaqaatitaasa annertuumik sunniuteqarsinnaanerat ilimanaateqarmat Ataatsimiititaliap tamanna pissusissamisuunngilluinnartutut isigaa.

Siunnersuutip imarisai.

Inuussutissarsiutit siuarsarniarlugit taarsigassarsisinnaanerit pillugit tapiiffigitissinnaanerlu pillugu siunertat akornanni ersarissumik avissaarsimatitsinissaq Inatsisartut peqqussutaanni siunertaavoq. Taamatullu angallatinik nutaanik atornikunillu pisinermut tapiissutit pillugit aalajangersakkat immikkut inatsisiliuunneqarsimapput. Taamaattumik nunalerinermik inuussutissarsiummut taarsigassarsititsisarnermut tapiissuteqartarnermullu, aalisarnermik inuussutissarsiummut taarsigassarsititsisarnerit piniarnermik/aalisarnermik inuussutissarsiornermullu matumani tapiissutit inuussutissarsiorluni umiatsiaaqqanut eqqarsaatigineqartut peqqussummi anguniagaapput. Taarsigassarsiniartunut/tapiisutinik qinnuteqartunut ataasiakkaanut uppernarsaataannut piumasaqaatit peqqussummi aammattaaq sukaterneqarput. Taamaalilluni siunissami suliniutit inuiaqatigiit aningaasaqarniarnerannut pitsaasumik kinguneqassasut pingaartinniarneqarput.

Siunnersuutip imarisamigut ilusiligaanera

Siunnersuutip imarisamigut ilusiligaanerani § 10, imm. 2, aamma § 22, imm. 1-2 Ataatsimiititaliamit naqqinneqartariaqarsimapput, ilaatigut siunnersuutip kalaallisuua danskisuualu imminnut naapertuuttunngortinnissaat eqqarsaatigalugit. Matumuuna allannguutissatut siunnersuut naapertuuttoq Ataatsimiititaliap isumaqatigiittuup aappassaaneerinissamut saqqummiuppaa.

Siunnersuummik ataatsimiititaliap suliarinninnera

Naalakkersuisut siunnersuutikkut umiatsiaararsortut piniartullu atugaasa immikkut maleruagassiorneqarnissaat suliniutigimmassuk aallarniutitut ataatsimiititaliap pitsaasutut isigaa. Aalisartut piniartullu tamarmik sumi nunaqarnertik apeqqutaatinnagu taarsigassarsititsisarnermut tapiissutinullu pisaarsisinnaanermut naligiisinneqarnerat ataatsimiititaliap iluaqutaasussatut aamma isigaa. Naak aalisarneq piniarnerlu pillugu peqqussummi aalajangersakkani nalinginnaasumik siunertaasumut iluaqutaassasutut ataatsimiititaliamit isigineqaraluartut, peqqussutip § 5, imm. 1, nr. 2-a naapertorlugu angallatit avataani motooriliinnarnut taamaallaat tapiiffigineqarsinnaanerannik aalajangersakkat imaqarnerat peerneqartariaqartoq ataatsimiititaliaq isumaqarpoq. Inuussutissarsiutigalugu umiatsiaaqqanut tapiissutinut atatillugu angallatip iluani motoorilinnut qinnuteqartut peqqussut malillugu akuerineqartarnissaat ataatsimiititaliap iluaqutaasinnaasutut isigaa.

Aammattaaq sinerissamut qanittumi aalisarneq niuerpalaarlunilu aningaasaqarnikkut oqimaannerusoq peqqussutissatut siunnersuummi immikkoortinneqarsimammat Ataatsimiititaliamit iluaqutaasinnaasutut isigineqarpoq taamaalilluni peqqussut umiatsiaaqqamik aalisartunit piniartunillu aningaasaqarnikkut pisariaqartitsinermut sammitinneqarluni. Tassunga atatillugu Kalaallit Nunaanni inuussutissarsiutigalugu piniarneq pillugu misissueqqissaarnermi eqqarsaatigineqartut unnersuussutigineqartullu peqqussutissatut siunnersuummut ilanngunneqarnissaat periarfissaqarsimanngimmat ataatsimiititaliap ugguarnartutut isigaa.

Siunissami qinnuteqartoq piginnaasaqarnermut uppernarsaatinik, assersuutigalugu umiartorsinnaanermut uppernarsaammik, nunalerinermik ilinniarsimanernik uppernarsaammik, kommunimiluunniit inuussutissarsiornermi siunnersortimit oqaaseqaammik piumasaqarfigineqarsinnaasoq taamaalilluni qinnuteqartup suliffeqarfimmik, tassunga taarsigassarsianik qinnuteqartoqartillugu akilersinnaasumik ingerlatsisinnaanissaanik qularnarunnaarsitsinermik peqqussutissatut siunnersuummi aalajangersakkami periarfissiisoqarnera ataatsimiititaliap oqaatigissavaa.

Naalakkersuisut aalisarnermut piniarnermullu kattuffiit attuumasuteqartut suleqatigalugit aalisartut piniartullu ilinniarsimanerisa qaffasissusaasa tunaartaqartumik qaffassarnissaat anguniarniarmassuk taamaalilluni tapiissutinik pissarnissamut peqqussummi piumasaqaatit naammassineqarsinnaalernissaat tassunga atatillugu ataatsimiititaliap naatsorsuutigaa. Kukkunersiuinermut ataatsimiititaliap ESU-p aaqqissussaanerani ingerlatsinermi taarsigassarsititsisarnerillu tassunga atasut pillugit uparuaatai eqqarsaatigalugit piumasaqaatit taakku ataatsimut isigalugu naammaginartutut ataatsimiititaliamit isigineqarput.

Peqqussummi aalisarnermut piniarnermullu tunngasortaa ataatsimut isigalugu ataatsimiititaliap naammagisimaaraluaraa peqqussutip nunalerinermut tunngasortaanut ataatsimiititaliaq immikkut oqaaseqaateqarnissaminut tunngavissaqarpoq. Savaatillit Peqatigiit Suleqatigiissut Nunaateqarnermullu siunnersuisoqatigiit oqaaseqaataat tusarniaanerup nalaani immikkut pisoqarnera patsisigalugu peqqussutip suliarineqarnerani ilanngunneqanngitsut ataatsimiititaliamit ilisimaneqarpoq.

Nunalerinermi akuusunit pingaarnernit oqaaseqaatit siunnersuutillu ilaatinneqarnatilluunnit qulaajarneqarsimanngitsut nunalerineq pillugu nutaamik inatsimmik atuutitsilernissaq ataatsimiititaliamit toqqissisimanartinneqanngilaq.

Peqqussutissatut siunnersuut maannakkutut ilusimisut iluseqartoq inuussutissarsiummut annertuumik aningaasaqarnikkut kinguneqaateqarsinnaasoq Savaatillit Peqatigiit Suleqatigiissut 24. augusti 2006-imi allakkiaminni uparuarpaat.

Nunalerinermut naalakkersuinikkut anguniakkat nutaat pillugit upernaakkut ataatsimiinnissami siunnersuummik saqqummiussilersaarlutik Naalakkersuisut oqariartuutiginikuuaat. Inatsisartut upernaakkut ataatsimiinnissanut Naalakkersuisut nunalerinermut naalakkersuinikkut anguniakkanut siunnersuummik saqqummiussinissaat eqqarsaatigalugu tunngavigalugulu peqqussutip nunalerinermut tunngasortaa ilusilersorneqartariaqartoq ataatsimiititaliamit isummiunneqarpoq.

Taamaattumik peqqussutissatut siunnersuummit nunalerinermut tunngasortaa peerneqassasoq ataatsimiititaliap isumaqarfigaa aammalu nunalerinermut naalakkersuinikkut anguniagaq aallaavigalugu 2007-imi upernaakkut ataatsimiinnermi peqqussummik immikkuullarissumik nunalerinermi inuussutissarsiummik maleruagassiisuusumik suliamik saqqummiussisoqarnissaa kissaatigineqarpoq.

Matumunnga naapertuuttumik siunnersuutip pingajussaaneerneqarnerani allannguutissatut siunnersuummik ataatsimiitialiaq isumaqatigiittoq saqqummiussilersaarpoq.

Ataatsimiititaliap inassuteqaataa:

Allannguutissatut siunnersuut aappassaanerinissamut ilanngunneqartoq Ataatsimiitialiap isumaqatigiittup saqqummiuppaa. Aammattaaq Ataatsimiitialiap isumaqatigiittup pingajussaanneerinissamut allannguutissatut siunnersuut saqqummiutilersaarpaa, taamaalilluni nunalerinermut tunngasortaa aammalu angallatip avataani motoorinut peqqussummi § 5, imm. 1, nr. 2.-ani piumasaqaat peerneqassalluni.

Taama oqaaseqarluni Inatsisartut Aalisarnermut, Piniarnermut Nunalerinermullu Ataatsimiititaliaata siunnersuut aappassaaniigassanngortippaa.

 

	Ane Hansen, Siulittaasoq
Kim Kielsen, Siulittaasup tullia		Augusta Salling
Vittus Mikaelsen		Jens B. Frederiksen