25. oktober 2006

UKA 2006/44

 

Aalisarnermik piniarnermik nunalerinermillu inuussutissarsiutillit inuussutissarsiornerannik siuarsaaneq pillugu Inatsisartut peqqussutissaattut siunnersuut

pillugu

allannguutissatut siunnersuut

Peqqussutissatut siunnersuutip aappassaaneerneqarnerani Inatsisartut Aalisarnermut, Piniarnermut Nunalerinermullu Ataatsimiititaliaannit saqqummiunneqartoq.

§ 10-mut

1. § 10, imm. 2, ima oqaasertalerneqassaaq:
"Imm. 2. Tapiissutit sillimmasiissutinit ajoqusiiffigineqarsimasumut taarsiissutit ilaannik, inuussutissarsiutigalugu umiatsiaaqqap annaaneqartup pissarisarinerani akiata ilaata Naalakkersuisut tapiissuteqarnerisigut aningaasalersorneqartup procentinngorlugu annertoqataanik ilanngaaffigineqassapput."

§ 22-mut

2. § 22, imm. 1-2, ima oqaasertalerneqassapput:
"§ 22. Inuussutissarsiutit siuarsarniarlugit taarsigassarsisitsisoqartassaaq qinnuteqartoq nammineq aningaasaliissuteqassasoq piumasaqaatigalugu.
Imm. 2. Nammineq aningaasaliissutit pisiap akiata minnerpaamik 10%-erissavai Naalakkersuisunullu akilerneqareersimassallutik inuussutissarsiutit siuarsarniarlugit taarsigassarsiat akiliutigineqalersinnagit."

 

Nassuiaatit nalinginnaasut

§ 22-mi, imm. 1-p aamma 2-p kalaallisuuani danskisuuanilu oqaasertat taakkulu nassuiaatitaat allannguutissatut siunnersuutikkut imminnut naapertuuttunngortinneqarput.

Kiisalu sillimmasersimanermit aningaasat tunniunneqarsimasut ilaannaat umiunermi il.il. umiatsiaaqqap taartissaanut Naalakkersuisut tapiissutut tunniussinnaasaannit ilanngaatigineqartassaasut § 10, imm. 2-mi erseqqissarneqarpoq. Taamaalilluni umiatsiaaqqap annaasap nalingata ilaa siusinnerusukkut tapiissutaasup annertoqataa kisimi sillimmasiisimanermit aningaasat ilaannit ilanngaatigineqartassaaq. (75 %, inuussutissarsiutigalugu umiatsiaaqqap annaaneqartup pissarsiarineqarnerani akip 75 %-ia Naalakkersuisunit tapiiffigineqarsimappat. 84 %, inuussutissarsiutigalugu umiatsiaaqqap annaaneqartup pissarsiarineqarnerani akip 84 %-ia Naalakkersuisunit tapiiffigineqarsimappat). Tamanna peqqussutissatut siunnersuutaaqqaartumi § 10, imm. 2-mut inatsimmut nassuiaatini allaqqareerpoq.

 

Aalajangersakkanut ataasiakkaanut nassuiaatit

Nr. 1-imut

Inuussutissarsiutigalugu umiatsiaaraq Naalakkersuisut tapiiffigisimalluguluunniit taarsigassarsitsissuteqarfigisimasaat sillimmasiinikkut matussusigaasumik pisoqarneratigut annaaneqarpat Naalakkersuisut umiatsiaaqqamut taarsiissutaasussamut § 10, imm. 1 malillugu tapiisinnaapput. § 10, imm. 3 malillugu tapiissutit taamaattut §§ 3, 5 aamma 6-imi aamma atuupput. Tamatuma ilaatigut kingunerisaanik umiatsiaaqqap taarsiissutissap pissarsiarinerani akiata 75 %-ia taamaallaat tapiissuteqarfigineqarsinnaavoq. Qinnuteqartorli Qaanaameersuuppat, Ammassalimmeersuuppat Ittoqqortoormiineersuppalluunniit pissarsiarinerani akip 84 %-ia tapiissutaasinnaavoq. Taakkuli sillimmasiissutinit ajoqusiiffigineqarsimasumut taarsiissutit ilaannik inuussutissarsiutigalugu umiatsiaaqqap annaaneqartup pissarisarinerani akiata ilaata Naalakkersuisut tapiissuteqarnerisigut pissarsiarineqartup annertoqataanik § 10, imm. 2 naapertorlugu ilanngaaffigineqassapput. Assersuutigalugu Naalakkersuisut inuussutissarsiutigalugu umiatsiaaqqap annaaneqartup pissarsiarinerani akiata 75%-ia tapiissuteqartigisimappassuk sillimmasiinermit taarsiissutitut tunniussat 75 %-iannik tapiissutit ikilisinneqassapput.

Nr. 2-mut

 Inuussutissarsiutit siuarsarniarlugit taarsigassarsisitsiniarlutik Naalakkersuisut aalajangerunik piumasarissavaat qinnuteqartoq nammineq minnerpaamik 10 %-imik aningaasaliissuteqartariaqartoq. 10 %-i taanna inuussutissarsiutit siuarsarniarlugit taarsigassarsinermi nammineq aningaasaliissutissaq taamatut tamanut atuuppoq aaqqissuussineq paasiuminarnerusunngortinniarlugu. Tamanna aalisarnermut, piniarnermut nunalerinermullu peqqussutitoqqamut sanilliullugu annikitsuinnarnik allannguuteqartitsineruvoq. Nammineerluni illuliassanut atatillugu allannguuteqarpoq nammineerluni akiliutissaq maanna 10 %-iusussaammat, siornatigut 5 %-iulluni.

Allannguummi pineqarpoq qinnuteqartup ilumoorussinerulernissaa. Minnerpaamik akileeqataassutissaq 10% minnerpaaffissatut isigisariaqarpoq, tassami nalunaarutikkut nammineq akileeqataassutissaq annerusoq piumasarineqarsinnaammat, imm. 4 malillugu.