1. august 2006 UKA 2006/36
Peqqussutissatut siunnersuummut oqaaseqaatit
Nalinginnaasumik oqaaseqaatit
1. Aallaqqaasiut
Meeqqanik inuusuttunillu ikiorsiisarneq pillugu Inatsisartut peqqussutaat atuuttoq 2003-mi upernaakkut ataatsimiinnermi akuersissutigineqarpoq 2004-milu ukiakkut ataatsimiinnermi allanngortinneqarluni. Tamatuma kingornatigut peqqussummi malittarisassanik atuinermi paasineqarpoq § 21, imm. 2-mi ilaqutariit paarsisartut atugarisaannut malittarisassaliornissamut inatsisitigut tunngavissat atuuffissaannut tunngatillugu nalorninartoqartoq.Meeqqat inuusuttullu angerlarsimaffiup avataani ilaqutariinni paarsisartuniinnerannut atatillugu malittarisassat atuuttut kingullertigut KANUKOKA-mit, kommuninit ataasiakkaanit ilaqutariinnillu paarsisartunit isornartorsiorneqartarput. Meeqqanik inuusuttunillu ikiorsiisarneq pillugu Namminersornerullutik Oqartussat nalunaarutaat nr. 17, 1. juli 2003-meersumi malittarisassat qanittukkut iluarsaateqqinnissaannut atatillugu pissusissamisuussaaq inatsisitigut tunngavigineqartut erseqissassallugit.
Taamaalilluni meeqqanik inuusuttunillu ikiorsiisarneq pillugu Inatsisartut peqqussutaanni § 21, imm. 2 allanngortinneqassaaq ilaqutariinnut paarsisartunut kaasarfimmiussanik atisassarsiutissanillu akiliuteqartarneq pillugu malittarisassanut meeqqanik inuusuttunillu ikiorsiisarneq pillugu Namminersornerullutik Oqartussat nalunaarutaat nr. 17, 1. juli 2003-meersuneereersunut inatsisitigut tunngavissat nalornissutaasinnaajunnaarsinniarlugit.
2. Siunnersuummi pingaarnerit nassuiarneqarnerat
Allanngortitsinissamik siunnersuutikkut matumuuna siunertarineqarpoq Naalakkersuisut ilaqutariit paarsisartut atugaannut malittarisassiorsinnaanerannut inatsisitigut tunngavissani aalajangersakkat kattunneqarnissaat.Meeqqanik inuusuttunillu ikiorsiisarneq pillugu Namminersornerullutik Oqartussat nalunaarutaat nr. 17, 1. juli 2003-meersumi ilaqutariit paarsisartut kaasarfimmiussanik atisassarsiutissanillu akiliuteqartarnerat pillugu malittarisassaliortoqarsimavoq inatsisitigut tunngavissani aalajangersakkap atuuttup oqaasertaasa avataanniittunik. Taamaalilluni kaasarfimmiussanik atisassarsiutissanillu akiliuteqartarnermut inatsisitigut tunngavissat meeqqanik inuusuttunillu ikiorsiisarneq pillugu nalunaarut 1. juli 2003-mili atuutilermat nalorninartoqarsimapput.
Inatsisartut peqqussutaanni § 21, imm. 2-mik allanngortitsinerup kingunerissavaa malittarisassaareersut meeqqanik inuusuttunillu ikiorsiisarneq pillugu Inatsisartut peqqussutaanni inatsisitigut tunngavissaqalernerat.
3. Aningaasaqarnikkut allaffissornikkullu pisortanut kingunerisassai
3.1 Aningaasaqarnikkut pisortanut kingunerisassai
Allanngortitsinissamik siunnersuut pisortanut aningaasaqarnikkut kinguneqassanngilaq tassami allanngortitsinikkut aalajangersakkat atuutereersut tunngavissinneqaannartussaammata. Aalajangersakkamut atuutereersumut tunngatillugu allanngortitsinerup kingunerissavaa Naalakkersuisut Namminersornerullutik Oqartussanut kommuninulluunniit aningaasaqarnikkut kinguneqartussanik aalajangersaasinnaajunnaarnerat.3.2 Allaffissornikkut pisortanut kingunerisassai
Allanngortitsinissamik siunnersuut pisortanut allaffissornikkut kinguneqassanngilaq.4. Aningaasaqarnikkut allaffissornikkullu namminersortunut kingunerisassai
Allanngortitsinissamik siunnersuut namminersortunut aningaasaqarnikkut allaffissornikkullu kinguneqassanngilaq.5. Avatangiisinut pinngortitamullu tunngatillugu kingunerisassai
Allanngortitsinissamik siunnersuut avatangiisinut pinngortitamullu tunngatillugu kinguneqassanngilaq.6. Allaffissornikkut innuttaasunut kingunerisassai
Allanngortitsinissamik siunnersuut innuttaasunut allaffissornikkut kinguneqassanngilaq.7. Allat pingaarutillit kingunerisassai
Allanngortitsinissamik siunnersuut allanik pingaarutilinnik kinguneqassanngilaq.8. Naalagaaffeqatigiinnermut namminersulernissamullu tunngasut
Allanngortitsinissamik siunnersuut Naalagaaffeqatigiinnermut namminersulernissamullu tunngatillugu sunniuteqassanngilaq.9. Oqartussaasunik kattuffinnillu allanillu tusarniaaneq
Allanngortitsinissamik siunnersuut tusarniaassutigineqanngilaq, tassa pissusissaatut allanngortitsinerinnaammat malittarisassanut atuutereersunut inatsisitigut tunngavissat nalornissutaajunnaaqqullugit.
Peqqussutissatut siunnersuummi aalajangersakkanut ataasiakkaanut oqaaseqaatit
§ 1-imut
Nr. 1-imut
§ 21, imm. 2-kkut siunertaavoq ilaqutariit paarsisartut atugarisaat pillugit malittarisassaliortarnermut inatsisitigut tunngavissani aalajangersakkat kattunneqarnissaat, tassami kaasarfimmiussanut atisassarsiutissanullu inatsisitigut tunngavissaq siusinnerusukkut Inatsisartut aningaasanut inatsisaannut oqaasertaliussaniinnikuummat.Aalajangersakkakkut Naalakkersuisut piginnaatinneqarput ilaqutariit paarsisartut atorfinitsitaasarnerannut, ilaqutariit paarsisartut sulinerminni atugarisaannut, aningaasarsianut, ajunngitsorsiassanut, nerisaqarnermut kiisalu kaasarfimmiussanut atisassarsiutissanullu nalinginnaasumik atugassarititaasut pillugit malittarisassanik aalajangersaasinnaanissaannut.
Piginnaatitsissut taanna meeqqanik inuusuttunillu ikiorsiisarneq pillugu nalunaarutip iluarsaateqqinneqarneranut atatillugu atorneqartussaassaaq.
§ 2-mutSiunnersuutigineqarpoq Inatsisartut peqqussutissaat ulloq 1. december 2006-imi atuutilissasoq.