14. oktober 2006

UKA2006/46

 

Ikuallannaveersaartitsineq qatserinerlu pillugit Inatsisartut peqqussutissaata allanngortinneqarnera pillugu Inatsisartut peqqussutissaattut siunnersuut

pillugu

Inatsisartut Attaveqaqatigiinnermut Ineqarnermullu Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

Inatsisartut Attaveqaqatigiinnermut Ineqarnermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Godmand Rasmussen, Atassut, siulittaasoq
Inatsisartunut ilaasortaq Agathe Fontain, Inuit Ataqatigiit, siulittaasup tullia
Inatsisartunut ilaasortaq Isak Davidsen, sinniisussaq Tommy Marø, Siumut
Inatsisartunut ilaasortaq Agnethe Davidsen, Siumut
Inatsisartunut ilaasortaq Esmar Bergstrøm, Demokraatit

Inatsisartut Attaveqaqatigiinnermut Ineqarnermullu Ataatsimiititaliaata peqqussummut siunnersuutip nassuiaatitai ilanngullugit siullermeernerata kingorna misissorneqarsimapput.

Siunnersuummut tusarniaaneq

Peqqussummut siunnersuummut Nunatsinni Politimesteri, Nunatsinni Naalagaaffiup sinniisua, Sulisitsisut KANUKOKA-lu tusarniaavigineqarnikuupput. Tusarniaanermut piffissarititaq ataatsimiititaliamit oqaaseqaatitaqanngilaq.

Siunnersuutip imarisai

Akoorutissat qaartuujasut ikuallajasullu pillugit isumannaallisaanerup qaffanneqarnissaa eqqarsaatigalugu, nunat naliginnaasumik naleqqersuuttakkagut assigalugit Kalaallit Nunaata inatsiseqalernissaa qulakkeerneqassasoq Naalakkersuisut uani siunnersuummi kissaatigaat. Taassuma saniatigut siunnersuutip aalajangersagaasa akoorutissat qaartuujasut ikuallajasullu Kalaallit Nunaanniit ingerlateqqinnissaat killilerniarpaat. Taassuma saniatigut Naalakkersuisunut peqqussummut siunnersuummi piginnaatitsissummik siammasissumik malittarisassamut ilassutaasinnaasunik ilanngussisinnaassasut imarivaa.

Ataatsimiititaliap siunnersuummut oqaaseqaatai

Peqqussummut siunnersuut ullutsinnut naleqquttutut pisariaqartutullu ataatsimiititaliap isigaa. Londonimi qaartitsinernut atatillugu minnerunngitsumillu Odensemi ajortumeeriniat pisut alianartut tusaamaneqartut tunuliaqutigineqarput. Pisariaqartitat malillugit innuttaasut pineqartuni naleqqussaavigineqarnissaa inuuttaasut piffinni isumannaallisarneqarnissaanut pisariaqartuni imaluunniit akoorutissat qaartuujasut ikuallajasullu sanaartorfiusuni isumannaallisaanissaq ataatsimiititaliap aamma naleqquttutut isigaa.

Peqqussummut siunnersuummi pinerluttulerinermi inatsimmi pineqaatissiisinnaanermut periarfissat pineqartut peqqussutit aalajangersakkallu tunngavigalugit unioqqutitsinermi eqqartuussivinni atortussaatinneqalersinnaasoq ataatsimiititaliap maluginiarpaa. Pineqaatissiisinnaanermut periarfissat sukannernerulernerisigut pitsaaliuissutaasinnaasussatut ataatsimiititaliap Naalakkersuisut assigalugit nalilerpaat. Taamaasilluni akoorutissanik qaartuujasunik ikuallajasunillu illersorneqarsinnaanngitsumik atuineq sukannerulersitsinerup pitsaaliorsinnaavaa.

Sulisitsisunit tusarniaanermi akissut peqqussummut siunnersuummit marlunnik pingaarnernik isornartorsiugassaasoq ataatsimiitaliap maluginiarpaa. Isornartorsiut siulleq Naalakkersuisut peqqussutip siammasissumik piginnaatitaanermut atortussaatinneqalersinnaaneranut akuersissummut tunngavoq.

Isumagisassat assigiinngitsut aqqutissiuussinissamut aqqutissiuunneqartariaqartut ataatsimiititaliap tassunga atatillugu paasivaat. Tamanna ilumoorpoq, peqqussummi Naalakkersuisut malittarisassamut annertuumik siammasissumik atortussaatinneqalersinnaaneranut piginnaatitaatinneqarmata. Sulisitsisunilli ajornartorsiut qaqinneqartoq innuttaasut isumannaallisarneqarnissaannut eqqarsaatigisariaqarpoq, Naalakkersuisullu eqaatsumik sukkasuumillu iliuuseqarnissaat ajortumeeriniat assigisaasaluunniit pitsaaliuinerannut tunngatillugu, innuttasunut isumannaaallisaanermut navianartuunnginissaa nalilerneqassaaq.

Taamaattumik tamat innuttaasullu isumannaatsumik isumagineqarnissaat uani suliami pingaartinneqarnerusoq ataatsimiititaliaq isumaqarpoq. Peqqussummut siunnersuut Europap kitaani ukiuni kingullerni innuttaasunut isumaannaallisaanermi navianartorsiornikkut tunngaveqartoq inatsisiliinermut eqqunneqartumut assingusinnaavoq.

Peqqussummut siunnersuummi Naalakkersuisut akuersissutit tunniunneqartarnerini nutarterneqartarnerinilu akitssuusiinissamut tunngaveqalersimmasigit Sulisitsisunit siunertaqanngitsutut isigineqarpoq. Aaqqiinerup aqunneqarnerani akitsuutit annertussusaat ilimagisatut appasinnerpaaffimminniissasut ataatsimiititaliap pissusissamisoortutut isigaa, akitsuutillu nalinga peqqussummut ingerlatsinermi aningaasartuutinut toqqaannartumik assingunerarneqarput. Imatut nunatsinni sanaartornermi akitsuutit qaffasissusaannut aningaasartuutinut minnerpaamik sunniuteqartussanngorlugu.

Ataatsimiititaliap Inassuteqaatai

Ataatsimiititaliap isumaqatigiittup siunnersuut akuerisassanngortipaat.

Taama oqaaseqaateqarlutik Inatsisartut Attaveqaqatigiinnermut Ineqarnermullu Ataatsimiititaliaata siunnersuut aappassaaniigassanngortippaat.

 

	Godmand Rasmussen, Siulittaasoq
Agathe Fontain, Siulittaasup tullia		Agnethe Davidsen
Esmar Bergstrøm		Isak Davidsen