05. august 2006

UKA 2006/50

 

Siunnersuummut oqaaseqaatit

 

Nassuiaatit nalinginnaasut

1. Aallaqqaasiut.
Suliffeqanngikkallarnermi ikiorsiissuteqartarneq pillugu peqqussummi atuuttumi ataasiakkaanik ingerlatsinermut tunngasunik kukkuneqarpoq. Allannguutissatut siunnersuut tassaavoq taakkuninnga naqqiineq.

2. Siunnersuummi immikkoortut pingaarnerit.
Aallannguutissatut siunnersuut peqqussummi atuuttumi suliffeqanngikkallarnermi ikiorsiissummik tunniussinissamut piumasaqaatit pillugit aalajangersakkap kalaallisuuanut allannguuteqarpoq, tassami kalaallisoornera atuuttoq ersernerluppallaarmat.

Aammalu siunnersuut peqqussummi atuuttumi Ikiuisarnermut Tunngatillugu Maalaartarfimmut naammagittaalliuutigineqarsinnaasunik kommunalbestyrelsip peqqussummut tunngatillugu aalajangiiffigisinnaasaanut tunngatillugu aalajangersakkamut naqqiummik imaqarpoq. Naqqiinissaq pisariaqarpoq tassami peqqussummi atuuttumi aalajangersakkami innersuussineq kukkuneqarmat.

Aammalu allannguutissatut siunnersuuut peqqussutip atuuttup kalaallisuuanut naqqiummik imaqarpoq, tassami peqqussutip kalaallisuuani ulloq atuutilerfissaa aammalu ikaarsaariarnissamut maligassaq ullulerneqarsimanngimmat.

3. Aningaasatigut ingerlatsinikkullu pisortanut sunniutissat.
Aallannguutissatut siunnersuut pisortanut aningaasatigut ingerlatsinikkullu sunniuteqartussaanngilaq.

4. Suliffissaqanngitsumut aningaasatigut ingerlatsinikkullu sunniutissat.
Aallannguutissatut siunnersuut suliffissaqanngitsumut aningaasatigut ingerlatsinikkullu sunniuteqartussaanngilaq.

5. Aningaasatigut ingerlatsinikkullu inuussutissarsiutinut sunniutissat.
Aallannguutissatut siunnersuut inuussutissarsiutinut aningaasatigut ingerlatsinikkullu sunniuteqartussaanngilaq.

6. Avatangiisinut pinngortitamullu sunniutissat.
Allannguutissatut siunnersuut avatangiisinut pinngortitamullu sunniuteqassanngilaq.

7. Naalagaaffeqatigiinnermut namminersulernissamullu tunngatillugu pissutsit.
Allannguutissatut siunnersuut Naalagaaffeqatigiinnermut namminersulernissamullu tunngatillugu sunniuteqassanngilaq.

8. Pisortanik kattuffinnillu tusarniaaneq.
Siunnersuutip ilusaa pissutigalugu tusarniaatigineqarsimanngilaq.

 

Peqqussutissatut siunnersuummi aalajangersakkanut ataasiakkaanut oqaaseqaatit

§ 1-imut

Nr. 1-imut
Inatsisartut peqqussutaata kalaallisoortaani oqaasertai naqqissorneqarput paasiuminarsarneqarlutillu, aalajangersakkalli imaa allanngortinneqarani.

Nr. 2-mut
Tassani innersuussutigineqassaaq inatsisartut peqqussutaanni § 4, imm. 4. Innersuussineq eqqortoq tassaavoq § 4, imm. 5. Aalajangersagaq taassuminnga naqqiinerinnaavoq.

Nr. 3-mut
Inatsisartut peqqussutaata atuuttup kalaallisuuani ulloq atuutilerfissaa aammalu ikaarsaariarnermi periusissap ullua allassimavoq "xx.yy. 2006". Siunnersuutip § 1, nr. 2-mi taamaallaat taassuma 1. juli 2006-inngorlugu naqqinneqarnissaa siunertaavoq.

§ 2-mut

Siunnersuutigineqarpoq inatsisartut peqqussutaata ullormi nalunaarutigineqarfimmini atuutilernissaa.

Peqqussutip atuuttup immikkoortortani tamaasa ilanngullugit atuutilerpoq 1. juli 2006, taakkunani § 18, imm. 1-ip kalaallisoornera kukkuneqarsimagaluarpalluunniit. § 18-ip naqqinneqarnera ilusaanik naqqiinerinnaavoq.

Allannguutit suliffeqanngikkallarnermi ikiorsiissutit pillugit inatsisartut peqqussutaata nr. 5, 1. juni 2006-imeersup atuutilerneraniit atuutilissapput. Taamaalilluni allannguutit 1. juli 2006 atuutilerput, tamatumali innuttaasoq kingumoortumik nammagassissanngilaa.

Imm. 2-mi aalajangersakkap peqqussutip aallaqqaammulli siunertaa, tassa maalaarutit, maalaarfissatut § 17, imm. 2-mi piffissaliussaq malinneqarsimappat, § 4, imm. 5 malillugu Isumaginninnermi Naammagittaalliuuteqarfimmit suliarineqartarnissaat, qularnaassavaa. Taanna ikaarsaariarnermut aalajangersagaq piffissami 1. juli 2006-miit allannguutitut peqqussutip atuutilerneranut maalaarutaasimasunut taamaallaat tunngavoq. Maalaaruteqarsimassagaluarpat piffissami tassani tunngavissamik amigaateqarneq pissutigalugu itigartinneqarsimasunik, aalajangersagaq maalaarutip suliareqqinneqarnissaanut periarfissiivoq.