15. maj 2006

UPA2006/29

Nakorsaatit pillugit Inatsisartut peqqussutaata allanngortinneqarneranik Inatsisartut peqqussutissaattut siunnersuut.

pillugu

Inatsisartut Peqqinnissamut Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

 

Inatsisartut Peqqinnissamut Ataatsimiititaliaat suliarinninnermini ukuninnga inuttaqarpoq::

Inatsisartunut ilaasortaq Jens Lars Fleischer, Siumut (siulittaasoq)
Inatsisartunut ilaasortaq Vittus Mikaelsen, Siumut
Inatsisartunut ilaasortaq Juliane Henningsen, Inuit Ataqatigiit
Inatsisartunut ilaasortaq Jens B. Frederiksen, Demokraatit
Inatsisartunut ilaasortaq Godmand Rasmussen, Atassut

Ataatsimiititaliap suliarinninnerani tapiliussatut paasissutissat ilanngunneqartut:

Tusarniaanermi akissutigineqartut assilineri Inatsisartut Peqqinnissamut Ataatsimiititaliaata siunnersuummut pineqartumut ataatsimiititaliami suliarinninnerminnut atatillugu pisariaqartitani aasimavai.

Peqqussutissatut siunnersuut Inatsisartunit siullermeerneqarmat apeqqutit arlaqartut saqqummiunneqartut pillugit Naalakkersuisunut ilaasortamit oqaaseqaatinik akissuteqaatinillu imaqartumik allakkiamik Peqqinnissamut Avatangiisinullu Naalakkersuisumit Ataatsimiititaliaq aammattaaq tigusaqarsimavoq. Allagaq ataatsimiititaliap isumaliutissiissutaanut ilanngusatut ilanngunneqarpoq.

Siunnersuutip siunertaaa:

Nakorsaatit pillugit peqqussummi malittarisassat ulumikkut atuuttut malillugit Nalakkersuisut suliassaraat aalajangersassallugu nakorsaatit suut akuerineqartumik eqqunneqarsinnaanersut, nioqqutigineqarsinnaanersut nunamilu maani napparsimasunik katsorsaanermi atorneqarsinnaanersut. Nakorsaatit pillugit ataatsimiittartoqatigiinnit Naalakkersut toqqarsimasaannit inassuteqartoqarnerata kingorna tamanna pillugu Naalakkersuisut aalajangiipput. Peqqinnissaqarfimmi nakorsanut tunngasutigut, peqqissaasoqarnikkut, nakorsaaserinikkut, allaffissornikkut aningaasaqarnikkullu pissutsinik nakorsaatit pillugit Ataatsimiittartoqatigiit immikkut ilisimasaqarput. Nakorasaatit sorliit akuerisaanerannik Naalakkersuisut aalajangersaanerat nalunaarutinik saqqummiussinikkut pisarpoq.

Qaamatilli tamaasa nakorsaatit amerlaqisut tunisassiarineqarunnaartarput nutaallu takkuttarlutik. Tamatuma pisariaqalersippaa nalunaarutinik nutaanik ingerlaavartumik saqqummiussisarneq tamannalu allaffissornikkut suliaqarfiuvoq nukissanik atuiffiusoq. Ilutigisaanik Nalunaarutinik saqqummiussisarneq piffissamik atuiffiusartorujussuuvoq allaat nakorsaatit nioqqutigineqartut piumaneqarnerisa ineriartornerannut sanilliullugu nalunaarutit nutaat saqqummiunneqartut nutaanngilereersimasarlutik.

Nakorsaatinik inatsisitigut tunngaviliinissamik suliaqartarnerup sunniuteqarnerusumik nukissanillu annikinnerusunik atuiffiunissaa siunnersuutip pingaarnertut siunertaraa. Nakorsaatit sorliit inerteqqutaanerannik nalunaarutinik aalajangersaasarneq qimanneqassasoq taamaalilluni siunnersuutigineqassaaq. Akerlianilli nakorsaat Kalaallit Nunaanni atorsinnaassappat Nakorsaatit pillugit Ataatsimiittartoqatigiit tamanna akuerisassaraat. Nakorsaatit akuerineqartut nalunaarsuiffinnut qaammammut ataasiarluni nutarterneqartartumut ilanngunneqartassapput taakkulu Peqqinnissaqarfiup qarasaasiakkut nittartagaatigut kikkunnilluunniit aaneqarsinnaassapput.

Ataatsimiititaliap eqqarsaatersuutai inassuteqaataalu:

Nioqquteqarfinni ineriartornerup sapinngisamik malinnaafiginissaa nakorsaatit inatsisitigut tunngavissinneqarnera Ataatsimiititaliap taperserpaa. Allaffissornikkut suleriaatsit sunniuteqarnerusut atorluaanerusullu anguniarlugit Naalakkersuisut suliniarnerat Ataatsimiititaliamit pitsaasutut isigineqarpoq.

Taamaattumik Peqqinnissamut Ataatsimiititaliap isumaqatigiittup siunnersuut akuerineqaqqullugu inassutigaat.

Peqqinnissaqarfiup nittartagaani nakorsaatit allattorsimaffiat ima ilusiligaasimassaaq, nakorsaatit ataasiakkaat qanoq ilinerani akuerineqarsimanersut taamaalillutillu inatsisitigut akuersissutigineqarsimanerat ersarissuunissaat assut pingaartuusoq Ataatsimiititaliaq isumaqarpoq. Innutaasut inatsisitigut illersorneqarnissaanut nakorsaatillu pillugit peqqussutip atuutsinneqarnissaanut tamanna pingaaruteqarpoq.

Taama oqaaseqarluni Inatsisartut Peqqinnissamut Ataatsimiititaliaata aalajangiiffigisassatut siunnersuut aappassaaniigassanngortippaa.

 

	Jens Lars Fleischer Formand
Vittus Mikaelsen		Juliane Henningsen
Jens B. Frederiksen		Godmand Rasmussen

 

Ilanngussaq (pdf-format)