26. april 2006 UPA 2006/29
Peqqussutissatut siunnersuummut oqaaseqaatit
Oqaaseqaatit nalinginnaasut
1. Allannguutissatut siunnersuutip siunertaaNakorsaatit pillugit ataatsimiititaliap inassuteqarnera naapertorlugu Naalakkersuisut nalunaarusiornikkut nakorsaammik allattorsimaffimmi A-mi, B-mi H-miluunniit ilanngussinerisigut Nakorsaatit pillugit inatsisartut peqqussutaanni nr. 1-imi 12. maj 2005-imeersumi § 7, imm. 1, naapertorlugu nakorsaatip inatsisitigut akuerisaalersarneranik maleruagassaq aqukkuminaalluinnartoq paasinarsisimavoq. Nakorsaatit inatsisitigut akuerisaasut allattorsimaffiiniipput nakorsaatit 7500-t missingi, taakkunanngalu nakorsaatit 200-t missingi qaammammut nioqqutissiarineqarunnaartarput, nakorsaatinillu allanik akuerineqartussanik taarserneqartariaqartarlutik.
Taamaattumik akuerseriaaseq Naalakkersuisut allanngortikkusuppaat, nakorsaatit Nakorsaatit pillugit ataatsimiititaliamit akuerineqarsinnaalersillugit, nakorsaatillu akuerisaasut peqqinnissaqarfiup nittartagaani www.peqqik.gl-imi takuneqarsinnaassallutik. Taamaaliornikkut nakorsaatit akuerineqareernerisa kingorna piaartumik tamanut saqqummiussisoqarsinnaalissaaq. Nalunaarusiornikkut akuersineq sivikinnerpaamik sap. ak. 3-4-nik sivisussuseqartarpoq, piffissamilu tamatumani nakorsaatit 150-200 nioqqutissiarineqarunnaareersarput.
2. Allannguutissatut siunnersuutip imarisai pingaarnerusutAllannguutissatut siunnersuutip kingunerissavaa nakorsaatit inatsisitigut akuerisaasut nalunaarusiornikkut saqqummiunneqartarunnaarnissaat, allattorsimaffinnili Nakorsaatit pillugit ataatsimiititaliamit akuerisaasuni takuneqarsinnaassallutik. Allattorsimaffiit peqqinnissaqarfiup nittartagaani takuneqarsinnaassapput. Tamatumunnga tunngavissiineq allannguutissatut siunnersuummi § 7, imm. 2-tut ilanngunneqarpoq.
Allannguutissatut siunnersuutip kingunerissavaattaaq peqqussummi atuuttumi § 8, pisariaarutsinneqassammat peerneqavissallunilu. Nutaamik § 8-mik ilanngussisoqassaaq, nakorsaatit pillugit peqqussummi § 7, imm. 3-p nutaamik oqaasertalerneqarneranik.
3. Allannguutissatut siunnersuutip pisortat oqartussaaffiinut aningaasatigut allaffissornikkullu kingunissai:Nalunaarutip annertoqisup ukiumut 8-10-riarluni taarserneqartartussap saqqummersinneqarneranut allaffissornermullu aningaasartuutit Namminersornerullutik Oqartussat ileqqaassavaat.
4. Allannguutissatut siunnersuutip inuussutissarsiornermut aningaasatigut allaffissornikkullu kingunissai:Allannguutissatut siunnersuut inuussutissarsiornermut aningaasatigut allaffissornikkullu kinguneqassanngilaq.
5. Avatangiisinut pinngortitamullu kingunissai:Allannguutissatut siunnersuut avatangiisinut pinngortitamullu kinguneqassanngilaq.
6. Allannguutissatut siunnersuutip allaffissornikkut innuttaasunut kingunissai:Allannguutissatut siunnersuut allaffissornikkut innuttaasunut kinguneqassanngilaq.
7. Allannguutissatut siunnersuutip Naalagaaffeqatigiinnermut naleqqiullugu namminersulivinnissamullu sunniutissai.Allannguutissatut siunnersuut Naalagaaffeqatigiinnermut naleqqiullugu namminersulivinnissamullu sunniuteqassanngilaq.
8. Pisortat oqartussaaffiinut, kattuffinnut il.il. tusarniaaneq.Allannguutissatut siunnersuut ukunani tusarniaassutigineqarsimavoq: Aningaasaqarnermut Pisortaqarfik, Inuutissarsiornermut, Nunalerinermut Suliffeqarnermullu Pisortaqarfik, Peqqissaaveqarfinnik Aqutsivik, Dronning Ingridip Napparsimmavissua, Peqqinnissakkut Nakkutilliisoqarfik, Kalaallit Nunaanni Nakorsat Peqatigiiffiat aamma Kigutit Nakorsaasa Peqatigiiffiat.
Dronning Ingridip Napparsimmavissua, Kalaallit Nunanni Nakorsat Peqatigiiffiat aamma Kigutit Nakorsaasa Peqatigiiffiat akissuteqarsimanngillat.
Peqqissaaveqarfinnik Aqutsiviup oqaatigaa § 7-imi, imm. 1-imi, nr. 1-imi aamma 2-mi ittoq (allattorsimaffik A undergruppit ilanngullugit) aamma (allattorsimaffik B undergruppit ilanngullugit) oqaaseqaat "undergruppit ilanngullugit" peertariaqartoq, allattorsimaffiit A-p, B-p H-llu suliarineqarneranni aaqqiinerummat. Tamanna allannguutissatut siunnersuummi iluarsineqarpoq.
Aningaasaqarnermut Pisortaqarfiup ernumassutiginerarpaa nakorsaatit akisunerusut atorneqartalernissaat, akuersisinnaatitaaneq Nakorsaatit pillugit Ataatsimiititaliamiitinneqarpat.
Nakorsaatit pillugit inatsisartut peqqussutaanni nr. 1-imi 12. maj 2005-imeersumi atuuttumi § 7, imm. 1, naapertorlugu Naalakkersuisut nakorsaatit sorliit nakorsaatit inatsisitigut akuerisaasut allattorsimaffiinut ilannguttariaqarneraat Nakorsaatit pillugit ataatsimiititaliap inassutigisarpai, Nakorsaatit pillugit ataatsimiititaliap pineqartumi suliamut tunngatillugu ilisimasaqartuunera pissutigalugu. Taamaattumik allannguuteqartoqarnavianngilaq Naalakkersuisut nalunaarusiornikkut nakorsaatit inatsisitigut akuerisaasut allattorsimaffiinik aalajangersaasuusanngippata.
Tusarniaaffigineqartut sinneri allannguutissatut siunnersuummut oqaaseqaatissaqarsimanngillat.
Peqqussutissatut siunnersuutip aalajangersagartaanut ataasiakkaanut oqaaseqaatit
§ 1-imut
Nr. 1-imut
Nakorsaatit akuerisaasut nalunaarutitut iluseqartillugit saqqummiunneqartarunnaarnerisa kinguneranik imm. 2-mi nutaatut nr. 1-imik ilanngussisoqarpoq nakorsaatit akuerisaasut allattorsimaffiinik Nakorsaatit pillugit ataatsimiititaliap suliaqartalernissaanik piginnaatitsissummik. Nakorsaatit pillugit ataatsimiititaliap nakorsaatinik akuersisartuunerata kinguneranik akuersineq ingerlatsinikkut aalajangersaaneruvoq.
Nr. 2-mutNutaamik imm. 4-mik ilanngussisoqarpoq, Nakorsaatit pillugit ataatsimiititaliaq piffissap sivikitsup ingerlanerani ataatsimiissinnaanngippat Nakorsaatit pillugit ataatsimiititaliap siulittaasuata Nakorsaatit pillugit ataatsimiititaliaq sinnerlugu aalajangiisinnaaneranik piginnaatitsisumik. Tamanna pingaartumik pingaaruteqarpoq allannguutissatut siunnersuummi § 8 naapertorlugu nakorsaatip akuerisaasup inerteqqutigilersinneqarnissaani. Taamatut pisoqartillugu siulittaasup nakorsaq peqqinnissakkut nakkutilliisoq Danmarkimilu Lęgemiddelstyrelsen attavigisinnaavai pisuni ataasiakkaani qanoq ilioraanni pitsaanerussanersoq oqaluuseriumallugu.
Nr. 3-mutAalajangersagaq taanna manna tikillugu periusaasimasumut taartaavoq, tassa nakorsaat Naalakkersuisunit nalunaarutikkut akuerineqarsimappat Kalaallit Nunaanni akuerisaasarsimammat. Taamatut periuseqarneq pissusissamisuunngilluinnartoq paasinarsisimavoq, tassami qaammammut ataasiarluni nalunaarummik saqqummersitsisoqartariaqartassammat nakorsaatit akuerisaallutillu atorneqartut qaammammut 200 missingi nioqqutissiarineqarunnaartarmata, nakorsaatinillu allanik akuerisassanik taarserneqartariaqartartussaallutik.
Nakorsaatit pillugit ataatsimiititaliap nakorsaatit, nakorsaatit allattorsimaffiinut ilanngunneqarnissaat siunissami akuerisalissavaa. Allattorsimaffimmi B-miipput nakorsaatit innersuussutigineqartussatut akuerisaasut, allattorsimaffimmilu H-miillutik nakorsaatit pisiarineqarsinnaasutut akuerisat. Taakku saniatigut nakorsaatit nalunaarutigineqartartussaasut allattorsimaffimmi A-miissapput, taamaalillunilu nakorsaatit ueriffiusinnaasut pillugit innersuussisarnermik nakkutilliineq sakkortusitinneqarsinnaalluni.
Allattorsimaffinnut taaguutit pingasuusut A, B aamma H Danmarkimi taaguutit atorneqartut assigalugit atorneqarput, nunami maani peqqinnissaqarfimmi sulisut akuersissutaateqartut amerlanertigut qallunaat nakorsaatinut najoqqutassaat ilinniarsimasarmatigik imaluunniit ilisimasarmatigik. Taamaattumik sulisut piffissami sivikitsuinnarmi tikisitatut sulisussat sungiusimariigaannik naalisaaneq atorneqarmat, tamanna aamma napparsimasunut isumannaallisaaneruvoq.
Allattorsimaffinni A-mi, B-mi aamma H-mi nakorsaatinik ilanngussinermut tunngaviuvoq nakorsaatip Nakorsaatit pillugit ataatsimiititaliamit akuerineqarsimanissaa. Nakorsaatit inatsisitigut akuerisaasut allattorsimaffii Nakorsaatit pillugit ataatsimiititaliamit imaluunniit inummit Nakorsaatit pillugit ataatsimiititaliap toqqagaanit suliarineqartartussaaput. Nakorsaatip aalajangersimasup pineqarnerani immikkut ittunik maleruagassaqarnissaanik Nakorsaatit pillugit ataatsimiititaliaq isumaqarpat, katsorsaanermi ilitsersuutitut ilusilerlugit aalajangersarneqarsinnaapput, assersuutigalugu nakorsaatip taamaallaat nakorsamit immikkut ilinniarsimasumit atorneqarnissaanik imaluunniit taassuma alaatsinaataanik atorneqarnissaanik kaammattuutinik imaqartunik.
Imm. 2 naapertorlugu Nakorsaatit pillugit ataatsimiititaliap nakorsaatit allattorsimaffii minnerpaamik qaammammut ataasiarluni iluarsaattassavai, taamaalillutik nakorsaatit nioqqutissiarineqarunnaarsimasut aammattaaq nakorsaatit allattorsimaffiinit peerneqarniassammata nakorsaatinillu akuerisaasunik taarserneqarlutik.
Nakorsaatit pillugit ataatsimiititaliap imaluunniit inuup Nakorsaatit pillugit ataatsimiititaliamit toqqarneqartup isumagissavaa nakorsaatit allattorsimaffiisa tamanut saqqummiunnissaat peqqinnissaqarfiup nittartagaatigut www.peqqik.gl-ikkut. Taamaalilluni kikkut tamarmik, tassunga ilanngullugit peqqinnissaqarfimmi sulisut, innuttaasut oqartussaasullu nakorsaatit allattorsimaffii takusinnaassavaat. Innuttaasut internetimut isernissaminnut periarfissaqanngitsut Peqqissutsimut Pisortaqarfimmut saaffiginnissinnaapput nakorsaat Kalaallit Nunaanni akuerisaanersoq paasiniarlugu.
Imm. 3-mi aalajangersagaq tassaavoq nakorsaatinik akuerisaanngitsumik eqqussuinermik, annissuinermik, tuniniaanermik, agguaassinermik, passussinermik, tunniussinermik innersuussinermik il.il unioqqutitsinermi pisuusut akuliuffigineqarnissaannut § 24-kkut pineqaatissiinissamut inatsisitigut tunngaviliinermut atatillugu inerteqqut. Taamaattumik aalajangersagaq politiit, ilanngaaserisut eqqartuussiviillu inatsisinik eqqortumik atuutsitsinissaannut qulakkeerinnittooqataavoq.
"Nakorsaatit pillugit ataatsimiititaliaq akuersissuteqaqqaartinnagu"-mik oqaasertaliinikkut nakorsaatit allattorsimaffiini nakorsaatinik ilanngunneqarsimanngitsunik Nakorsaatit pillugit ataatsimiititaliap akuersissuteqarnissaanut periarfissiisoqarpoq. Nakorsaatip aalajangersimasup atugassanngortinnissaanut Nakorsaatit pillugit ataatsimiititaliap allattorsimaffinnik nutarterinissaa utaqqineqarsinnaatinnagu pisunut pinartunut aalajangersagaq atugassanngorlugu eqqarsaatigineqarpoq.
Nakorsaatit pillugit ataatsimiititaliaq tamatuma saniatigut nakorsaatinut tamanut atuuttumik akuersissuserneqarsinnaanngitsunut immikkut akuersissuteqarsinnaavoq. Tamatumani ilaatigut eqqarsaatigineqarput nakorsaatit, napparsimasunut aalajangersimasunut nunani allani napparsimmavimmiinnerminnut atatillugu katsorsarneqarnerminni immikkut ittunik nakorsaatitortinneqartunut atugassat.
Pissusaasutut Peqqissutsimut Pisortaqarfik nakorsaatit pillugit oqartussaasutut Nakorsaatit pillugit ataatsimiititaliaq sinnerlugu akuersissuteqartarsinnaavoq. Immikkut akuersisoqannginnerani Danmarkimi Lęgemiddelstyrelsen apereqqaarneqassaaq pisumi taamaaqataani nakorsaatip atornissaanut akuersissuteqassagaluarnersoq. Tamatumuunakkut qulakkeerneqassaaq nakorsaatit akuerineqarnissaannut suliamik ilisimasalinnik siunersiuineq.
Nr. 4-mutNakorsaatip akuerisaasup sunniuttarnerata, ilakutaqarnerata imaluunniit pingaarutilitsigut allatigut tunisassiaq pillugu paasissutissat allaanerunerannik tunngavissaqartumik pasinnittoqarpat, Nakorsaatit pillugit ataatsimiititaliaq allannguutissatut siunnersuummi § 8 naapertorlugu inerteqquteqarsinnaavoq. Taanna immikkut ittumik akuersissutit assigalugit pissutsinut pinartunut naatsorsuussaavoq, Nakorsaatit pillugit ataatsimiititaliap nakorsaatit allattorsimaffiinik iluarsiinissaa utaqqineqarsinnaanngikkaangat, napparsimasut isumannaatsumik pineqarnissaat pissutaatillugu. Nakorsaatip akuerineqarsimasup ulorianaateqarsinnaaneranik paasineqaqqammersut pillugit innuttaasut illersorneqarnissaat aalajangersakkami siunertarineqarpoq, aammattaaq nakorsaatit pitsaassusissaannut innuttaasut tatiginninnerat illersorniarlugu.
Nakorsaatip pineqartup navianarsinnaanera qanoq nalilersorneqassanersoq kiisalu nakorsaammik allamik taarserneqarsinnaanersoq Nakorsaatit pillugit ataatsimiititaliap aalajangertassavaa. Sivikitsuinnarmik piffissaliilluni Nakorsaatit pillugit ataatsimiititaliaq katersortinneqarsinnaanngippat siulittaasoq Nakorsaatit pillugit ataatsimiititaliaq sinnerlugu aalajangiisinnaavoq, § 3, imm. 4, naapertorlugu.
Inerteqquteqarnermut atatillugu aamma nakorsaammik pineqartumik uninngasuutigineqartut peerneqarnissaannik, utertinneqarnissaannik suujunnaarsinneqarnissaannilluunniit erseqqinnerusumik ilitsersuuteqarnikkut Nakorsaatit pillugit ataatsimiititaliaq inassuteqarsinnaavoq, tamannalu Nuna tamakkerlugu nakorsaataasiviup qullersaaniit pisinnaalluni. Taamaattoqartillugu nakorsaat pineqartoq atorlugu katsorsaanerit ingerlaannartumik unitsinneqassapput.
§ 8-p nutaamik oqaasertalerneqarneratigut maanna peqqussummi § 8-mi maleruagassat pisariaarupput. Nakorsaatit inatsisitigut akuerisaasut allattorsimaffii ingerlaavartumik iluarsaanneqartuassapput, tassa ikinnerpaamik qaammammut ataasiarluni, taamaattumillu ikinnerpaamik ukiumut ataasiarluni iluarsaanneqartarnissaannik maleruagassaq naleqqukkunnaarpoq. Nakorsaatit inatsisitigut akuerisaasut allattorsimaffiinit nakorsaatinik peersisinnaatitaaneq Nakorsaatit pillugit ataatsimiititaliamit tigummineqalermat, Nakorsaatit pillugit ataatsimiititaliamit inassuteqaatigineqartariaanngitsumik Naalakkersuisut peersisinnaatitaanerannik maleruagassaq naleqqukkunnaarpoq.
Nr. 5-imut§ 24, imm. 1 aamma 2, imatut allanngortinneqarput, paragraffinut innersuussutit allannguutissatut siunnersuummi paragraffinut naapertuuttunngortinneqarlutik.
Nr. 6-imut§ 24-mi nutaamik imm. 5-imik ivertitsisoqarpoq, nakorsaatit pillugit peqqussutip kingunerisaanik najoqqutassialiornermi najoqqutassiami pineqartumi maleruagassanik unioqqutitsinermi inuit inatsisilerinermik suliaqartut unioqqutitsinerisa akiliisitsinermik pineqaatissinneqarsinnaalernissaannik tunngavissiisumik.
Nr. 7-imut§ 25, imm. 4, imatut allanngortinneqarpoq, paragraffinut innersuussutit allannguutissatut siunnersuummi paragraffinut naapertuuttunngortinneqarlutik.
Aalajangersakkami pineqarput suliassaqarfiit, nakorsap peqqinnissakkut nakkutilliisup peqqinnissaqarfimmik nakkutilliisutut inissisimanerminut atatillugu nakorsaatit pillugit maleruagassat eqquutinneqarnerannik nakkutilliiffigisassai. Tamatumani pineqarpoq nakorsat nakorsaasiortullu nakorsaatit nalunaarutigisimasamik nakorsaasiarinnginnerini Nakorsaatit pillugit ataatsimiititaliamit akuersissummik peqqaarsimasussaanerat. Peqqinnissamik suliaqartut akuersissutaateqarnermik iluanni piginnaatitaaffigisamik iluanni nakorsaatinik innersuussinnaasaminnik taamaallaat innersuussisassasut. Kiisalu nakorsap peqqinnissakkut nakkutilliisup nakkutigissavaa pilerisaaruteqartarnermi maluagassat unioqqutinneqannginnissaat.
Aammattaaq nakorsap peqqinnissakkut nakkutilliisup nakkutigissavaa nakorsaatit inatsisitigut akuerisaanngitsut pillugit allannguutissatut siunnersuummi § 7, imm. 3, naapertorlugu maleruagassat unioqqutinneqannginnissaat. Nakorsap peqqinnissakkut nakkutilliisup nakkutilliisussaatitaanera peqqinnissaqarfiup maleruagassanik eqquutitsinerata nakkutiginissaanut taamaallaat killeqarpoq. Nakorsaatit inatsisitigut akuerisaanngitsut pillugit inuinnaat qanoq iliortarnersut Nakorsap peqqinissakkut nakkutilliisup nakkutiginnittussaatitaanerata avataaniippoq.
§ 2-mut
Siunnersuutigineqarpoq peqqussut 1. juli 2006 atuutilissasoq. Tamanna ilutigalugu nakorsaatit inatsisitigut akuerisaasut pillugit nalunaarut nr. 22, 14. november 2005-imeersoq atorunnaarsinneqassasoq siunnersuutigineqarpoq, allannguutissatut siunnersuutip atuutilerneratigut pisariaarutissammat.