11. maj 2006 UPA 2006/21
Radiukkut tv-kkullu aallakaatitsisarneq pillugu Inatsisartut peqqussutaata allanngortinneqarnissaanik siunnersuut
pillugu
Inatsisartut Kultureqarnermut Ilinniartitaanermullu AtaatsimiititaliaataISUMALIUTISSISSUTAA
Siunnersuutip aappassaaneerneqarnerani saqqummiunneqartoq
Inatsisartut Kultureqarnermut Ilinniartitaanermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Juliane Henningsen, Inuit Ataqatigiit, siulittaasoq
Inatsisartunut ilaasortaq Kristian Jeremiassen, Atassut, siulittaasup tullia
Inatsisartunut ilaasortaq Ruth Heilmann, Siumut
Inatsisartunut ilaasortaq Isak Davidsen, Siumut
Inatsisartunut ilaasortaq Astrid Fleischer Rex, DemokraatitUPA 2006-imi siulleermeerinerup kingorna ataatsimiititaliap peqqussutissatut siunnersuut misissorpaa imalu oqaaseqarfigissallugu:
Siunnersuutip imarisaaRadiukkut tv-kkullu aallakaatitsisarneq pillugu Inatsisartut peqqussutaata allanngortinneqarnissaanik siunnersuummik Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq saqqummiussivoq.
Inatsisartut peqqussutaatigut atuuttukkut ukiorlu manna 1. januar atortuulersukkut radiukkut tv-kkullu aallakaatitsisarneq pillugu inatsiseqarneq ukiut 15-it ingerlaneranni siullermeertumik ataatsimut nutarterneqarpoq. Taassuma imarisai ima annertutigalutillu pisariutigipput ataasiakkaanik naapertuutinngitsunik peqartoq kingusinnerusukkut paasineqarsimalluni siunnersuullu matumani pineqartoq aqqutigalugu taakku aaqqiivigineqarnissaat siunertaavoq. Nuna tamakkerlugu aallakaatitsinissamik akuersissutit eqqarsaatigalugit akuersissummut akitsuutinik akileeqqusissuteqarnissamut inatsisikkut tunngavissiinissaq siunnersuutikkut pingaarnertut anguniarneqarpoq. Tamatuma saniatigut KNR-imi siulersuisunut aamma Radio- tv-milu aalajangiisartunut ilaasortassanik toqqaasarnermi sumi najugaqarnissamik aalajangersakkat allanngortinneqarnissaat Naalakkersuisut tulluartutut isumaqarfigaat, toqqarneqarsinnaasut piginnaanillit sumi najugaqarneri tunngavigiinnarlugit toqqarneqarsinnaannginnissaat pinngitsoorniarlugu. Kiisalu najukkani nutaarsiassat nutaarsiassanik aallakaatitassiatut immikkoortutut isigineqartussaanerat pillugu najukkani radio- aamma tv-qarfiit najukkani innuttaasunut paasissutissiisarnissaannik peqqussummi piumasaqaatit erseqqissarneqarnissaat siunnersuutigineqarpoq.
TusarniaaneqSiunnersuut ukununnga tusarniaassutigineqarsimasoq ataatsimiititaliamit oqaatigineqassaaq: KNR, STTK, Radio- tv-milu aalajangiisartunut, Aningaasaqarnermut Pisortaqarfik, Akileraartarnermut Pisortaqarfik, Kultureqarnermut ministereqarfik. Oqaaseqaatit tiguneqartut siunnersuummut ilanngunneqarsimasut Naalakkersuisut paasissutissiissutigaat.
Ataatsimiititaliap siunnersuummik suliarinninneraPartiit tamarmik Naalakkersuisullu siunnersuut tunngaviatigut taperseraat ataatsimiititaliamillu suliarineqarnissaa inassutigigaat Inatsisartut Kultureqarnermut Ilinniartitaanermullu Ataatsimiititaliaannit oqaatigineqassaaq.
Radiukkut tv-kkullu aallakaatitsisarneq pillugu Inatsisartut peqqussutaannut atuuttumut sanillullugu aaqqiissutissatut siunnersuutigineqartut ataatsimiititaliamit tamakkiisumik taperserneqarput. Aallakaatitsinissamik akuersissummut akitsuutinik akileeqqusissuteqarnermut atatillugu inatsisikkut tunngaviit ersarissaavigineqarnissaat ataatsimiititaliap naapertuuttutut isigaa. Najukkani radioqarfinni tv-qarfinnilu nutaarsiassanik paasissutissanillu annertunerusumik aallakaatitsisinnaanissamut periarfissiineq ataatsimiititaliamit taperserneqarpoq. KNR-imi siulersuisunut aamma Radio- tv-milu aalajangiisartunut ilaasortassanik toqqaasoqassatillugu - pineqartoq nunatsinni nunattaluunniit avataani najugaqarnersut apeqqutaatinnagu - piginnaasat pisariaqartut pingaartinneqartarnissaat ataatsimiititaliamit pingaartinneqarpoq. Nunatsinnili inuiaqatigiinni pissutsinik minnerunngitsumillu oqaatsitsinnik kulturitsinnilllu pineqartup ilisimasaqarnissaata assorsuaq pingaartinneqarnera ataatsimiititaliamit erseqqissarumaneqarpoq. Allannguinerit maleruagassat eqaannerulernerannik nassataqassasut ataatsimiititaliaq isumaqarpoq.
Kalaallisut aallakaatitat KNR-imit ukiuni aggersuni amerliniarneqarnerat ataatsimiititaliamit nuannaarutigineqarpoq. Naammassisassat pillugit Naalakkersuisut KNR-illu isumaqatigiissutaata nassiunneqarnissaa ataatsimiititaliap qilanaaraa. Taamatuttaaq KNR-ip ukiumoortumik nalunaarusiaata nassiunneqarnissaa ataatsimiititaliamit kissaatigineqarpoq ataatsimiititaliamillu naammagisimaarneqarpoq paasissutissat taakku inuiaqatigiinnit takuneqarsinnaasunngortinnissaat Naalakkersuisut sulissutigiumammassuk.
Tamanna tunngavigalugu siunnersuutip akuersissutigienqarnissaa ataatsimiititaliap isumaqatigiittup inassutigaa.
Taama oqaaseqarluni Inatsisartut Kultureqarnermut Ilinniartitaanermullu Ataatsimiititaliaata siunnersuut aappassaaniigassanngortippaa.
Juliane Henningsen,
siulittaasoq
Kristian Jeremiassen,
siulittaasup tulliaRuth Heilmann
Isak Davidsen
Astrid Fleischer Rex