17. marts 2006 UPA 2006/21
Peqqussutissatut siunnersuummut oqaaseqaatit
Oqaaseqaatit nalinginnaasut1. Peqqussutissatut siunnersuummut tunuliaqutaasut
Inatsisartut peqqussutaat nr. 6, 14. november 2004-meersoq, 1. januar 2005-imi atuutilersoq, radio tv-ilu pillugit inatsisinut 1990-imiilli aatsaat ataatsimut iluarsissutaavoq maleruagassartaqarlunilu annertuunik paasiuminaatsunillu, kingornalu naapertuutinngitsutut paasineqartut tunngavigalugit pisariaqartinneqalerluni inatsisartut peqqussutaanni minnerusunik iluarsiisoqarnissaa. Aallakaatitsisinnaanermut akuersissutinut maleruagassat pillugit nalunaarutip atuuttup suliarineranut atatillugu paasineqarpoq, aallakaatitsisinnaanermut akitsuutit pillugit maleruagassat sukumiinerusumik aalajangernissaannut inatsisartut peqqussutaanni § 9, imm. 2 aamma 3 inatsisitigut tunngavissatut naammanngitsut, aalajangersakkat pineqartut Tunngaviusumik Inatsimmi § 43 eqqarsaatigalugu naammattumik eqqorluaasunik imaqanngimmata. Allatut oqaatigalugu peqqussutip § 9, imm. 2 aamma 3-mi maannakkut aalajangersagaasut tunngavigalugit periarfissaqanngilaq nalunaarutitut ilusilimmik aallakaatitsisinnaanermut akitsuutit akileqqunissaannut maleruagassat aalajangissallugit, taamaattumillu aalajangersakkat aallakaatitsinermi akuersissutit akilerneqartarnissaannut maleruagassanik aalajangersagaliornissamut piginnaatitsinermut tunngassuteqartut piviusumik atorneqarsinnaanngitsutut nalilerneqartariaqarlutik. Peqqussummut oqaaseqaatini allassimavoq, aallakaatitsisinnaanermut akitsuutit akilernissaannut piumasaqaatit KNR-ip aammalu sumiiffinni radiukkut tv-ikkullu aallakaatitsisarfiit pilerisaarisarnermut tunngatillugu unamminerup annertunerulernera peqqutigalugu isertitassanit annaasaasa taarsernissaannik kissaateqarnermik tunngavilersorneqarsinnaasut.
Tunngaviusumik inatsimmi § 43 malillugu inatsisiliortinnani akileraaruteqartitsisoqalersinnaanngilaq, akileraarummik allanngortitsisoqarsinnaanngilaq imaluunniit atorunnaarsitsisoqarsinnaanani. Oqaatsimi "akileraarummi" toqqaannartumik toqqaannanngitsumilluunniit akileraaruteqartitsinerit pineqarput. Toqqaannartuunngitsumik akileraarutit, aamma akitsuutinik taaneqartartut, ilisarnaatigivaat akileraarutitigut piumasat akileraartartunit, inaarutaasumik akileraarutinik nammattuusussanit allaanerusunit akileqquneqartussaaneranik, killormulli § 43-mi inatsisitigut piumasaqaataasumi akitsuutinik akiliutinillu, piviusunik kiffartuussissutinut akiliutaasussanik akileeqqusisarnerit ilanngunneqaratik. Tamanna tunngavigalugu paasineqarpoq, aallakaatitsisinnaanermut akitsuutitut inatsisartut peqqussutaanni taaneqartutut aalajangerneqartut tassaasut inuiaqatigiinnut tuttussatut akitsuutaasut, akileeqqusinissamut pi-ngaarnertut eqqarsaatigineqartoq tassaammat, nunatta karsiani aningaasat agguataaqqinnissaat pissasoq, taavalu akitsuutit Naalakkersuisut aningaasartuutaat sippussallugit, taamaattumillu akitsuutit akileqqunissaannut inatsisitigut tunngavissat ersarinnerusut pisariaqarlutik, nali-nginnaasumik imaalillugu akiliutip angissusissaa peqqussummi inatsimmiluunniit namminermi aalajangerneqassalluni. Radiukkut tv-kkullu aallakaatitsisarneq pillugu Inatsisartut peqqussutaanni maanna atuuttumi taakkua piumasaqaataanngillat.
Taamaattumik Naalakkersuisut naapertuuttuunerpaasoraat radiukkut tv-kkullu aallakaatitsisarneq pillugu inatsisartut peqqussutaanni aallakaatitsisinnaanermut akitsuutit pillugit aalajangersakkat atuuttut atuukkunnaarsissallugit taarsiullugulu aallakaatitsisinnaanermut akitsuutit pillugit apeqqutit akitsuutit pillugit inatsisit nalinginnaasut aqqutigalugit iluarsisillugit.
Tamatuma saniatigut siunnersuutip siunertaraa, KNR-ip siulersuisuini aammalu Radio tv-ilu pillugit aalajangiisartuni qinigaasinnaasut piginnaaneri immikkut piukkunnaateqartut iluaqutigisinnaaneri eqqarsaatigalugit sumi najugaqarnissamik piumasaqaatit kisiisa aallaavigalugit pisariaqanngitsumik killilersorsinnaaneri eqqarsaatigalugit naapertuuttuunngitsutut paasineqartut iluarsissallugit. Kiisalu Naalakkersuisut naapertuuttuusoraat eqqortuutissallugu, sumiiffinni radiukkut tv-kkullu aallakaatitsisarfiit pisortanik kiffartuussisarnerat eqqarsaatigalugu sumiiffinni nutaarsiassat pillugit paasissutissiisarnerat paasineqassasoq sumiiffini nutaarsiassanik aaqqissuussisarnertut, aallakaatitsisarfiup nammineq aaqqissuussaanik, taamaalillunilu aallakaatitsisarfiup nutaarsiassanik aallakaatitassiat namminersorluni aaqqissussallugit.
2. Peqqussutissatut siunnersuummi immikkoortut pingaarnerita) Pisinnaatitaanerit atuuttut
Radiukkut tv-kkullu aallakaatitsisarneq pillugu Inatsisartut peqqussutaanni nr. 6, 14. november 2004-meersumi § 9, imm. 2-mi allassimavoq, Naalakkersuisut nuna tamakkerlugu aallakaatitsinissamut akuersissummik tunniussinermut atatillugu aallakaatitsinermut akuersissummut piumasaqaatit aalajangersinnaagaat, aallakaatitsisinnaanermut akitsuutit akilertarnissaat ilanngullugu, taamatuttaarlu Nalakkersuisut inatsisartut peqqussutaanni § 9, imm. 3 malillugu nuna tamakkerlugu aallakaatitsinissamut akuersissutinut atatillugu piumasaqaatit pillugit maleruagassanik sukumiinerusunik aalajangiisinnaasut, aallakaatitsisinnaanermut akitsuutit akilertarnissaat ilanngullugit.
Aammattaaq inatsisartut peqqussutaanni § 31, imm. 2 aamma § 43, imm. 2, imm. 2.-mi allassimavoq, KNR-ip siulersuisuini aammalu Radio tv-ilu pillugit aalajangiisartuni ilaasortanik toqqaasarnerit inunnik Kalaallit Nunaanni najugalinnik kisimi pissasutut killilersimassasoq.
Kiisalu inatsisartut peqqussutaanni § 38, imm. 1, nr. 4-mi allassimavoq, sumiiffinni radiukkut tv-ikkullu aallakaatitsivinnut tunngaviusumik tapiissutissanik pisinnaanissamut piumasaqaataassasoq, aallakaatitsisarfiup sumiiffinni nutaarsiassanik innuttaasunut paasissutissiisarnissaa. Aalajangersakkap atuuttup sukumiinerusumik erseqqissaatiginngilaa, "sumiiffinni innuttaasut nutaarsiassanik ilisimatittassagai" qanoq paasineqassanersoq.
b) Siunnersuut
Siunnersuummi aallakaatitsisinnaanermut maleruagassat inatsisartut peqqussutaanniittut, oqaatigineqareersutut nuna tamakkerlugu aallakaatitsinissamut akuersissutinik tunniussisarnermut atatillugu aallakaatitsisinnaanermut akitsuutinik akileeqqusinissamut tunngavissatut atorsinnaanngitsut, atorunnaarsinneqarput.
KNR-ip siulersuisuini aammalu Radio tv-ilu pillugit aalajangiisartuni ilaasortaasunik toqqaasarnerit eqqarsaatigalugit piumasaqaatit qasukkarnissaat aammattaaq siunnersuutigineqarpoq, sumi najugaqarnissaq kisiat aallaavigalugu pisariaqanngitsumik killilersuinissap pinnginnissaa pillugu. Tamatumani inuit, kalaallit radiukkut tv-kkullu aallakaatitsisarnerinut akerlilerneqarsinnaanngitsumik iluaqutissaasut pineqartillugit, taamaallaalli sumi najugaqarnertik pillugu suliassami pineqartumi sulisinnaatitaanatik. Taamaattorli erseqqissaatigineqassaaq, pineqartuni toqqaanermi suli pingaaruteqartuassasoq, pineqartup sumi najugaqarnini aqqutigalugu kalaallinut inuiaqatigiinnut attuumassuteqarsinnaanera.
Ilanngullugu siunnersuutigineqarpoq erseqqissassallugu, inatsisartut peqqussutaanni § 38, imm. 1, nr. 4-mi sumiiffinni nutaarsiassanik paasissutissiisarnissaq, nutaarsiassanik aallakaatitassiavinnik, aallakaatitsineq sioqqullugu aaqqissuussisumit suliarineqareersutut tunisassiatut paasineqassasut, tamanna piviusumik nalilerlugu minnerpaamik tusagassiortumit suliarineqarsimassasutut piumasaqaataasorinarluni, taamaanngippat info-kanalinik taaneqartartut pineqassammata. Tamatuma sanianiipput aammattaaq aallakaatitassiat, aallakaatititsisarfiup aallakaatitsisarfinnit allanit tigusai imaluunniit niuernermi nioqquteqartunit allanit suleqatigiinnermik isumaqatigiissuteqarnikkut tigusai, soorlu sumiiffimmi ingerlatsivimmit assersuutigalugu "kommunimit nutaarsiassat" assigisaalu aallakaatittarnerisigut, sumiiffimmi ingerlatsivimmit inniminniissutigineqartut akilerneqarlutillu. Sumiiffinni ullutsinni pisimasut pillugit namminersorluni nutaarsiassanik aallakaatitsisarnissamut piumasaqarneq taamatuttaaq tunngavilersorneqarpoq sumiiffimmi namminersorluni nutaarsiassanik siammarsaaneq sumiiffimmi inuttaasut oqartussaaqataanerinut pingaaruteqartumik tunngaviliinera. Kiisalu aammattaaq siunertarineqarpoq, aallakaatitassianit ilanngutassiat KNR-imut tunineqartarnissaat sullissisarfiup aallakaatitassianik, sumiiffinni kalaallit radiukkut tv-kkullu aallakaatitassiorfiinit tunisassiarineqartunik, aallakaatitsisarnissamik pisussaaffianut ilanngullugu, KNR-imi kalaallisut aallakaatitassiat amerlinissaat siunertaralugu.
3. Pisortanut aningaasatigut allaffissornikkullu aqutsinermut kingunerisassaiPeqqussutissatut siunnersuut Namminersornerullutik Oqartussanut kommuninulluunniit ani-ngaasatigut imaluunniit allaffissornikkut aqutsinermut kinguneqartussaanngitsutut nalilerneqarpoq.
4. Inuussutissarsiornermut aningaasatigut allaffissornikkullu aqutsinermut kingunerisassaiPeqqussutissatut siunnersuut inuussutissarsiornermut aningaasatigut allaffissornikkullu aqutsinermut kinguneqartussatut naatsorsuutigineqanngilaq.
5. Avatangiisinut pinngortitamullu kingunerisassaiPeqqussutissatut siunnersuut avatangiisinut pinngortitamullu kinguneqassanngilaq.
6. Innuttaasunut allaffissornikkut aqunneqarnermik kingunerisassaiPeqqussutissatut siunnersuut innuttaasunut allaffissornikkut aqunneqarnermik kinguneqarnissaa naatsorsuutigineqanngilaq.
7. Naalagaaffeqatigiinnermut namminersulivinnissamullu tunngasutRadiukkut tv-kkullu aallakaatitsisarneq pillugu Inatsisartut peqqussutissaattut siunnersuutip Naalagaaffeqatigiinnermut imaluunniit namminersornerup tungaanut ineriartortitseqqinnermut sunniuteqarnissaa ilimagineqanngilaq.
8. Oqartussaasut kattuffiillu tusarniaavigineqartutPeqqussutissatut siunnersuut ukunnunga tusarniaassutigineqarpoq:
KNR
STTK
Radio tv-lu pillugit Aalajangiisartut
Aningaasaqarnermut Pisortaqarfik
Akileraatarnermut Pisortaqarfik
KulturministerietTusarniaanermut akissuteqarnissamut piffissaliussap naanerani tusarniaaffigisanit ukunanit akissutit tiguneqarput: Akileraartarnermut Pisortaqarfimmit, Aningaasaqarnermut Pisortaqarfimmit, Nuuk TV-mit, KNR-imit aammalu Radio tv-lu pillugit Aalajangiisartunit, siunnersuummut oqaaseqaateqarsimanngitsut. Kingulliulluguli taaneqartup allaaseraa, siunnersuutip ataasiakkaartaanni tunngavilersuutit naammagisimaarnartuusut siunnersuummullu isumaqataasoqartoq, soorluttaaq KNR tusarniaanermi akissuteqaammi ilanngummagu, siunnersuut suliffeqarfiup kissaatigisaanut tulluuttuusoq. Taamatuttaaq Kulturministeriamiit oqarasuaatikkut tusarniaanermi akissummik pissarsisoqarpoq tamatumani oqaaseqaateqartoqarani, taamaallaat inatsisilerinermi ataasiakkaannguit ilanngunneqareersut eqqaaneqarlutik, soorluttaaq Inatsisileriffimmiit Inatsisartullu Inatsisileriffianni oqaaseqaatit taamaaliorneqartut
Peqqussutissatut siunnersuummi aalajangersakkanut ataasiakkaanut oqaaseqaatit
§ 1-imut
Nr. 1-imut
Allannguutissatut siunnersuut aallaaveqarpoq aallakaatitsisinnaanermut akitsuutit pillugit apeqqutit akitsuutit pillugit inatsiseqartitsinerit nalinginnaasut aqqutigalugit aaqqiivigineqarnissaanik.
Nr. 2-mutAllannguutissatut siunnersuut tunngavilerneqarpoq, nuna tamakkerlugu aallakaatitsinissamut akuersissutit tunniunneqartarnerinut atatillugu aallakaatitsisinnaanermut akitsuutit akileqqusarnissaannut aalajangersakkap maanna taama iluseqartillugu tunngaviliisinnaannginneranik.
Oqaaseqaatini nalinginnaasuni allassimasut innersuussutigineqarput.
Nr. 3-mutAllannguutissatut siunnersuut tunngavilerneqarpoq, nuna tamakkerlugu aallakaatitsinissamut akuersissutit tunniunneqartarnerinut atatillugu aallakaatitsisinnaanermut akitsuutit akileqqusarnissaannut aalajangersakkap tunngaviliisinnaannginneranik.
Oqaaseqaatini nalinginnaasuni allassimasut innersuussutigineqarput.
Nr. 4-mutAllannguutissatut siunnersuutigineqartup malitsigissavaa, sumi najugaqarneq kisiat tunngavigalugu toqqaanissamik susassaqartut KNR-ip siulersuisuini inunnik ilaasortaasussatut immikkut piukkunnaateqartunik toqqaasinnaanissaminnut periarfissaannik mattunneqannginnerinik. Siulersuisut inummik radiumut tv-mullu tunngasunik assortuussutissaanngitsumik piukkunnaateqartumik iluaqutissaqartillugu, aalajangersagaq atorneqarsinnaavoq, pineqartoq maani nunami najugaqanngikkaluarpalluunniit. Tassunga atatillugu erseqqissaatigineqassaaq, aallaaviusoq suli tassaammat, pineqartunik toqqaanermi suli pingaaruteqartuassasoq, pineqartup sumi najugaqarnini aqqutigalugu kalaallinut inuiaqatigiinnut attuumassuteqarsinnaanera. Tamatuma saniatigut siunnersuummi siunertarineqanngilaq toqqaanermi periuserineqartartut allanngortinneqarnissaat.
Nr. 5-mutSiunnersuutigineqarpoq erseqqissarneqassasoq, sumiiffinni radiukkut tv-kkullu aallakaatitsisarfinnut, tapiissutissanik qinnuteqartartunut, sumiiffinni nutaarsiassat pillugit innuttaasunik ilisimatitsisarnissaannik piumasaqaatit, imatut paasineqassasut, nutaarsiassanik aallakaatitassiavinnik tunisassiornertut, tassani piuamsaqaataalluni namminersorluni paasiniaanermik aaqqissuussinermillu suliaqarnissaq. Soorlu silassamik aallakaatitassiat, imaluunniit borgmesterip oqalugiaataanik, imaluunniit sumiiffimmi oqartussanit paasissutissanik soorlu "kommunimit nutaarsiassanik" aallakaatitsisarnerit, sumiiffimmi ingerlatsivimmit inniminniissutigineqartut akilerneqarlutillu, tassunga atatillugu nutaarsiassanik aallakaatitsinertut nalilerneqanngillat taamaattumillu aalajangersakkap avataaniittuullutik. Pingaarneq tassaavoq, sumiiffimmi pissutsit pillugit sumiiffimmi nutaarsiassanik siammarsaanerup namminersortumik pinissaa, taamaalillunilu aallakaatitsisarfiup aallakaatitassiat aallakaatinnerinut aaqissuussissutut akisussaaffik tigummissallugu. Ullutsinni pisut siammarsarnissaat taamatuttaaq aalajangersakkami pineqarpoq. Aallakaatitassiat atuaanerinnaappata minnerpaamik alapernaasernermik imaluunniit apeqqarissaarnermik ilaneqanngitsut, tamanna nutaarsiassanik aallakaatitsinivittut nalilerneqarsinnaanngilaq. Kiisalu aallakaatitassiat ilanngutassiat eqqarsaatigalugit qulequttamikkut assigiinngitsuusarnissaat nutaarsiassanik aallakaatitassiatut taaneqarsinnaanerinut, naliliinermut ilanngunneqarpoq.
Nr. 6-imutAllannguutissatut siunnersuutigineqartumut tunngavilersuutitut eqqarsaatigineqarpoq, inunnik radiomut tv-mullu tunngasuni Radio tv-lu pillugit aalajangiisartuni ilaasortaasutut immikkut piginnaanillit iluaqutigisarnissaasa mattutinnginnissaat, sumi najugaqarnissamik piumasaqarneq kisiat aallaavigalugu. Naatsorsuutigineqarpoq aalajangersagaq atorneqartassasoq radiumut tv-imullu tunngatillugu inummik assortuussutissaanngitsumik immikkut piginnaanilimmik aalajangiisartut ilaasortaqartissallugit iluaqutissaqarpat, tassani pineqartoq maani nunami najugaqanngikkaluarpalluunniit. Peqatigitillugu erseqqissaatigineqassaaq, aallaaviusoq suli tassaammat, pineqartunik toqqaanermi suli pingaaruteqartuassasoq, pineqartup sumi najugaqarnini aqqutigalugu kalaallinut inuiaqatigiinnut attuumassuteqarnera. Tamatuma saniatigut siunnersuummi siunertarineqanngilaq toqqaanermi periuserineqartartut allanngortinneqarnissaat.
§ 2-mut
Siunersuutigineqassaaq, inatsisartut peqqussutaat ulloq 1. juni 2006-imi atuutilissasoq.