4. marts 2006

UKIU 2006/19

 

Naartunermi, erninermi kiisalu meerarsiartaarnermi sulinngiffeqartarneq  ullormusiaqartitaasarnerlu pillugit inatsisartut peqqussutaata allanngortinneqarnissaanut siunnersuut

pillugu

Inatsisartut Ilaqutariinnermut Ataatsimiititaliaata

ISUMALIUTISSIISSUTAA

siunnersuutip aapaassaaneerneqarnerani saqqummiunneqartoq

 

Inatsisartut Ilaqutariinnermut Ataatsimiititaliaat suliarinninnermini ukuninnga inuttaqarpoq:

 

Inatsisartunut ilaasortaq Agathe Fontain , IA (siulittaasoq)
Inatsisartunut ilaasortaq Thomas Kristensen, Atassut
Inatsisartunut ilaasortaq Agnethe Davidsen, Siumut
Inatsisartunut ilaasortaq Tommy Marø, Siumut
Inatsisartunut ilaasortaq Esmar Bergstrøm, Demokraatit

Siunnersuutip siullermeerneqarnera toqqammavigalugu peqqussutissatut siunnersuut kiisalu siunnersuummut oqaaseqaatit Inatsisartut Ilaqutariinnermut Ataatsimiititaliaata misissuataarpai.

Ataatsimiititaliap isumaliutersuutai

Ernereernermi sulinngiffeqartarnerup sap. ak. 11-nut sivitsorneqarnissaa Peqqussutissatut siunnersuummi siunnerfigineqarpoq. Suliniut siullermeerinninnermi partiit oqaaseqartitaasa tamakkerlutik ilassilluarpaat. Ilaqutariit meerartallit naartunermi, erninermi kiisalu meerarsiartaarnermi atugarisaasa nunallu avannarliit qaffasissusaanut qanillattornissaanut atasumik uagutsinnut assersuussassaqarsinnaanissarput kissaatigalugu inuulluarnerunissamut pitsanngorsaataasussaavoq. Inuiaqatigiit peqqissumik patajaatsumillu ineriartortinneqassappata ilaqutariiussuseq toqqammaviliisuusarmat anaananngortussanut ilaqutariinnullu inuusunnerusunut toqqissisimasumik atugassaqartitsinissaq pingaartuusoq Ataatsimiititaliap isumaqatigaa.

Peqqussutissatut siunnersuutip inatsisartut siullermeerinninneranni tapersersorneqarluarnera eqqarsaatigalugu, inatsisartut oqallinneranni immikkut maluginiarneqarsimasut eqqarsaatigalugit ajornartorsiutit ataasiakkaat Ataatsimiititaliap oqaaseqarfigissallugit aaliangerpaa.

1) Naligiissitanissamik isiginninneq.

Ernereernermi sulinngiffeqartarnerup sivitsorneqarnerani inatsisip ilaqutariinnut suliffissaqartitsiniarnermilu politikki kisimik attorneqarneq ajorput naligiissitaanissamilli politikki aammattaaq minnerunngitsumik attorneqartartoq inatsisartut oqallinneranni arlalinnit tikkuarneqarpoq. Tamatumunnga patsisaavoq sulinngiffeqartarnerup sivitsorneqarnerata ataataasut meeqqap paaqqutarinissaanut nutaanik pitsanngoriaatinillu periarfissiisussaammat taamatuttaarlu arnat inuusunnerusut suliffissaqartitsiniarnermi inissisimanerannut kinguneqartussamik malitseqartussaammat. Taamaattumik Naligiissitaanermut Ataatsimiititaliap tusarniaanermi oqaaseqarnissaa periarfissinneqarsimanngimmat Ataatsimiititaliamit ajuusaarnartutut isigineqarpoq. Tamanna siunissami pisalissaaq.

Peqqussutissatut siunnersuummi ilusiliinermi sulinngiffeqartarnerup sivitsorneqarnerata ataataasumut anaanaasumullu pitsaanerulersitsisussaanera Ataatsimiititaliap iluarisamaarlugu ilaatigut maluginiarpaa.

Sulinngiffeqarnermi piffissap agguataarneqarnissaa sioqqullugu angajoqqaat assigiinngitsunik arlalissuarnik aaliangiussinnginnernerminni eqqarsaasersuuteqartariaqarput. Meeqqap milutsinneqartarnissaannut tunngasut sulifimmilu pissutsit kiisalu ilaqutariit aningaasaqarniarnerat pillugu eqqarsaatersuutit uani apeqqummi aamma ilaapput. Aaliangiinermissaaq ilaqutariiussutsitigut ileqqut suiaassutsikkullu pissutsit ilisimaneqartut nalilersueqataasussaapput. Tamanna tunngavigalugu siunnersuutip siullermeerneqarnerani oqaatigineqartut, ataataasut ilaasa ilaatigut eqqarssatigilluagaanngitsumik sulinngiffeqarnissap anaanaasumut tunniussinnaammassuk aarleqqutigineqartoq Ilaqutariinnermut Ataatsimiititaliamit isumaqatigineqarpoq. Taamaalillutik taakku ataataasut angajoqqaatut akisussaassuseqarnertik suusupagilertussaavaat, ajornerpaarli tassaavoq namminneq meeqqamillu pingaarutilinnik pissarsiffiulluartunillu misigisaqarnissartik pinngitsoortissinnaagamikku.

Taamaattumik siunissami sulinngiffeqartarnermi inatsisit pitsanngorsarneqassatillugit sulinngiffeqartarnerup sivisussusaata ilaa ataataasup sulinngiffeqartarninngorlugu ilusilerneqarnissaa eqqarsaatigineqartariaqartoq Ilaqutariinnermut Ataatsimiititaliap kaammattuutigissavaa, ima paasillugu sulinngiffeqartarnerup sivisussusaa uisumut taamaallaat atuutsinneqartassasoq anaasaasup imaluunniit angajoqqaajusut sulinngiffeqarnerata sivitsorneqarneranut atatillugu atorneqanngippat atorunnaarsinneqarsinnaalluni.

Naartunermut maleruagassat nutaat pillugit Ilaqutariinnermut Naalakkersuisoqarfiup innuttanut paasisitsiniaanerminut atatillugu, tassungalu ilanngullugu innutani isummertarnerup anguniagaqarfiusumik suliaralugu naartunermut atasumik aningaasaqarniarnerup sukumiisumik paasissutiissutiginissaa Ilaqutariinnermut Ataatsimiititaliap ilanngullugu kaammattuutigissavaa. Taamaalilluni paasissutissanik mappersagaaqqanik suliaqarnermi kiisalu radiokkut imaluunniit tv-kkut ilanngutilaakkani ataataasoq nutaaliaasoq pingaartillugu suliaqarnissaq kiisalu angajoqqaat akornanni assigiimmik akisussaaffiup agguataarneqarnissaanut pitsanngorsaaniarneq periarfissinneqassappat pissusissamisuuginnassaaq. Taamaalilluni peqqussutip atuutsilerneqarnera isummeriaatariaatsit sunnerneqarnissaannut pingaarutilimmik, ataatanngorlaanuinnaanngitsoq taamatulli sulisitsisunut utoqqartatsinnullu periarfissiissaaq.

2) Peqqussutip atuutilernerani malittarisasaat.

Siunnersuutip siullermeerneqarnerani Siumup oqaaseqartartartuaniit uparuarneqarpoq peqqussutissatut siunnersuummi § 2-mut oqaaseqaatit aalajangersakkap atuutilernissaanut tunngasoq qularnartoqartoq. Taamaattoq atuutilersitsinissamut aalajangersakkap oqaasertaasa ersarissumik aaliangersarpaat inatsisip atortinneqarnerani piumasaqaatitut tunngavissaq tassaasoq, ulloq 1. juli 2006-imi atortuulersitsineq sioqqullugu kingusinnerusukkulluunniit meeraq inuusimassasoq siunnersuummi ersarissumik naqissuserneqarpoq. Paarlattuanik inatsisissatut siunnersuummut oqaaseqaatini maluruagassat atuuttut atuutinngitsulluunniit malillugit sulinngiffeqarneq aallartereersimagaluarpalluunniit saniatigut piffissaq erniffiusoq sunniivigineqarsinnasoq siunnersuutip kalaallisoortaaniittunit ilimartoqartinneqarpoq.

Inatsisissatut siunnersuummi oqaaseqaatit pillugit Naalakkersuisunut ilaasortaq ersarissaalersaartoq Naalakkersuisunut ilaasortamik ataatsimeeqateqarnermi Ilaqutariinnermut Ataatsimiititaliap paasivaa, taamaalilluni oqaaseqaatit nalornisoornissamik kinguneqartitsissanngimmata.

Peqqussutip oqaasertaata inatsisitigut inissisimanera aalajangiisuusariaqartoq Ilaqutariinnermut Ataatsimiititaliaq isumaqarpoq. Aammattaaq erninnermi malittarisassat nutaanngitsut nutaalluunniit atorneqassanersut piffissami meeqqap inunngornerami aalajangiunneqarnissaannut naleqquttuunersut piumasaqaatitullu naammaginarnersut aalajangerneqartariaqartoq ataatsimiititaliaq isumaqarpoq.

3) Erninermi aningaasaateqarfimmik pilersitsinissaq pillugu apeqqut.

Siunnersuutip siullermeerneqarneranut atatillugu erninermi aningaasartuutinut attuumassuteqartunut matussutissiiffiusussamik aningaasaateqarfimmik pilersitsinissaq Atassutip oqaaseqartartuanit saqqummiunneqarpoq.

Tamatumunnga atatillugu erninermi aningaasaateqarfimmik pilersitsinissamut periarfissap erninermi malittarisassat siunissami patajaallisarneqarnissaannik kissaateqarneq matumani eqqarsaatersuutigineqartariaqartoq Ilaqutariinnermut Ataatsimiititaliamit maluginiarneqarpoq. Erninermi aningaasateqarfimmik pilersitsinissaq periarfissaqarnersoq Naalakkersuisut piaarnerpaamik misissorlugu aallartissagaat Ilaqutariinnermut Ataatsimiititalimit kaamattuutigineqarpoq.

Ilaqutariinnermut Ataatsimiititaliap inassuteqaataa.

Siuliani oqaaseqaaseqaatit tunngavigalugit aappassaaneerinninnermi peqqussutissatut siunnersuut saqqummiunneqartoq ilusimisut iluseqartoq Inatsisartut akuersissutigissagaat ataatsimiititaliap isumaqatigiittup inassutigaa.

Taama oqaaseqarluni Inatsisartut Ilaqutariinnermut Ataatsimiititaliaata siunnersuut aappassaaniigassanngortippaa.

	Agathe Fontain Siulittaasoq
Thomas Kristensen		Agnethe Davidsen
Tommy Marø		Esmar Bergstrøm