29. december 2005 UKIU 2006/19
Peqqussutissatut siunnersuummut oqaaseqaatit
Oqaaseqaatit nalinginnaasut
1. Aallaqqaasiut:Naalakkersuisut pingaartippaat ilaqutariit meeqqallu ineriartornerminni alliartornerminnilu atugaat naalakkersuinikkullu suliniarnerminni anguniagariuarlugu ilaqutariit meerartallit ajunnginnerpaamik atugaqartitaanissaat. Taamaattumik Naalakkersuisut siunnersuutigaat a-ngajoqqaat sulinngiffeqartarnerat meeqqamut ataatsimut angajoqqaanngortunut sap. akunneri 6-init 17-inut, aammalu meeqqanut ataatsikkut inunngortunut marlunnut amerlanerusunulluunniit angajoqqaanngortunut sap. akunneri 10-init 21-inut sivitsorneqassasoq. Erninermut atatillugu angajoqqaat sulinngiffeqartarnerisa sivitsorneqarnera ilaqutariinni inuunerup aalajaannerulerlunilu eqqissisimanerulerneranut peqqutaaqataassaaq, taamalu aamma meeqqat inunngornerminniit toqqississimasumik atugaqarnissaannut periarfissiilluni.
2. Siunnersuut pingaarnersiorlugu:Siunnersuutigineqarpoq erninermut atatillugu ernereernermi angajoqqaat sulinngiffeqartarnerat meeqqamut ataatsimut angajoqqaanngortunut katillugit sap. akunneri 24-nit 35-nut aammalu meeqqanut ataatsikkut inunngortunut marlunnut amerlanerusunulluunniit angajoqqaanngortunut sap. akunneri 32-init 43-inut sivitsorneqassasoq. Maleruagassat ullumikkut atuuttut naapertorlugit ataatsimik meerartaarnermi anaanaasoq sap. akunnerini 15-ini erninermut atatillugu sulinngiffeqartarpoq, ataataasoq sap. akunnerini pingasuni angajoqqaallu marluullutik sap. akunneri arfinillit avissinnaavaat. Ataatsikkut marlunnik amerlanerusunilluunniit meerartaarnermi anaanaasoq sap. akunnerini 19-ini erninermut atatillugu sulinngiffeqartarpoq, ataataasoq sap. akunnerini pingasuni angajoqqaallu marluulluk sap. akunneri qulit avissinnaavaat. Ataataasup sulinngiffeqartarnera anaanaasup sulinngiffeqarnerata nalaani pisarpoq. Siunnersuutigineqarpoq sap. akunneri ilassutissat 11-it sulinngiffeqarnermut angajoqqaat akunnerminni avissinnaasaannut ilineqassasut, tassa angajoqqaat sulinngiffeqarnerannik taaneqartumut. Taamaaliornikkut angajoqqaat ulluinnarni ilaqutariittut inuunerminni sapin-ngisamik eqaannerpaamik aaqqissuussinissaminnik periarfissinneqassapput.
Peqatigisaanik ullormusiat aningaasalersorneqarnerat pillugu aalajangersakkap allanngortinneqarnissaa siunnersuutigineqarpoq, taamaalilluni inatsit periaatsimut atuuttumut naapertuuttunngorlugu.
3. Pisortanut aningaasatigut allaffissornikkullu kingunerisassai:Angajoqqaat sulinngiffeqartarnerisa sap. akunnerinik 11-nik sivitsorneqarnera Landskarsip ukiumut 18,5 mio. koruuninik erninermut atatillugu aningaasartuuteqarnerulerneranik kinguneqassaaq. Sivitsuineq kommunit ukiumut 2,0 mio. kr. missaannik aningaasartuuteqarnerulernerannik kinguneqassaaq. Kisitsisip taassuma naatsorsorneqarnerani tunngavineqarpoq ukiumut erninerit 875-iunissaat ullormusiallu nal. akunneranut 71,69 kr-iunissaat, taamaattorli pisinnaatitaasut assigiinngitsut isertitaqartarnerinut il.il. pissutsinut naleqqussarlugu.
Tamatumanili ilanngullugu naatsorsuutigineqanngilaq angajoqqaat tamarmik erninermut atatillugu ullormusiaqarsinnaatitaaneq ajormata, pisortanit allatut pissarsiaqartarnertik pissutigalugu, soorlu pisortanit ikiorsiissutinik, siusinaartumik pensionisianik il.il. Sulisoqarportaaq erninermut atatillugu sulinngiffeqarnermik nalaani tamakkiisumik aningaasarsiaqarsinnaatitaasunik, aamma sulinngiffeqarneq sivitsorneqassagaluarpat, tamannalu pissutigalugu ullormusiaqarsinnaatitaanngitsunik.
Nalinginnaasumik isertitat suliffeqartumut annikillissapput ullormusiat aningaasarsianit annikinnerummata. Taamaattumik imaassinnaavoq sap.akunnerini 11-ni sivisunerusumik sulin-ngiffeqarsinnaatitaanermik periarfissaq ilaasa atorumassanngikkaat, sulinngiffeqarnermi ullormusiaqarneq inuit ilaasa isertitamikkut annertuumik appariaatigisussaammassuk.
4. Inuussutissarsiornermut aningaasatigut allaffissornikkullu kingunerisassai:Angajoqqaat sulinngiffeqartarnerata sivitsorneqarnera Namminersornerullutik Oqartussat ullormusiaqartitsinerannik aningaasalersorneqassappat, taamalu sulinngiffeqarnerup nalaani sulisitsisut aningaasarsiaqartitsinatik, sulisitsisunut aningaasartuutit qaffariarnavianngillat.
Sulisitsisoq sulinngiffeqarnerup nalaani aningaasarsiaqartitsinngippat, aningaasarsianut ani-ngaasartuutissat tamatumuuna sipaarneqartut vikarimik atorfinitsitsinermut atorneqarsinnaassapput. Vikarimik sulisussarsiornermut sulisitsisoq aningaasartuuteqarsinnaavoq, aammali maleruagassat ullumikkut atuuttut tunngavigalugit aningaasartuuteqartussaareerput.
5. Avatangiisinut pinngortitamullu tunngatillugu kingunerisassai:Siunnersuut avatangiisinut pinngortitamullu tunngasutigut kinguneqassanngilaq.
6. Innuttaasunut allaffissornikkut kingunerisassai:Siunnersuut innuttaasunut allaffissornikkut kinguneqassanngilaq.
7. Naalagaaffeqatigiinnermut Namminersornermullu pissutsit:Siunnersuut Naalagaaffeqatigiinnermut Namminersornermullu pissutsinut attuissanngilaq
8. Pisortat kattuffiillu tusarniaaviginerat:Siunnersuut pisortani kattuffinnilu makkunani tusarniaassutaasimavoq:
KANUKOKA, SIK, Sulisitsisut Peqatigiiffiat, AK, IMAK, ILIK, PIP, ASG, PPK, Inuussutissarsiornermut, Nunalerinermut Suliffeqarnermullu Pisortaqarfik, , Allaffissornermut Pisortaqarfik, Akileraartarnermut Pisortaqarfik Aningaasarnermullu Pisortaqarfik.
KANUKOKA, SIK, Sulisitsisut Peqatigiiffiat, AK, IMAK, ILIK, Akileraartarnermut Pisortaqarfik, Allaffissornermut Pisortaqarfik, Peqqissutsimut Pisortaqarfik Aningaasarnermullu Pisortaqarfik tusarniaanermi akissuteqaateqarput.
PIP, ASG, PPK aammalu Inuussutissarsiornermut, Nunalerinermut Suliffeqarnermullu Pisortaqarfik tusarniaarnermi akissuteqaateqanngillat.
Tusarniaarnermit akissutit siunnersuummik allannguinissamut peqqutissaqartitsisimanngillat.
Peqqussutissatut siunnersuummi aalajangersakkanut ataasiakkaanut oqaaseqaatit
§ 1-imutNr. 1-imut
Siunnersuutip kingunerissavaa angajoqqaat sulinngiffeqartarnerata sap. akunnerinit 6-init sap. akunnerinut 17-inut sivitsorneqarnissaa, taamaalillutillu angajoqqaat tamarmik immikkut erninermut atatillugu sulinngiffeqarsinnaatitaanermik saniatigut ataatsimut katillugit sap. akunnerini 17-ini sulinngiffeqarsinnaalissapput, akunnerminni agguarsinnaasaminnik.
Nr. 2-mutSiunnersuutip kingunerissavaa arlalinnik ataatsikkut qitornartaartunut angajoqqaat sulinngiffeqartarnerata sap. akunnerinit 10-nit sap. akunerinut 21-nut sivitsorneqarnera, taamaalillutillu angjoqqaat tamarmik immikkut erninermut atatillugu sulinngiffeqarsinnaatitaanermik saniatigut ataatsimut katillugit sap. akunnerini 21-ni sulinngiffeqarsinnaalissapput, akunnerminni agguarsinnaasaminnik.
Nr. 3-mutUllormusiat aningaasalersorneqartarnerisa agguataarneqartarnerat pillugu periutsinut atuuttunut peqqussut siunnersuutikkut naleqquttunngorsarneqarpoq. Ullormusiat kommunimit najugarisamit aqunneqarlutillu tunniunneqartarput, aningaasartuutillu 90 %-ii Namminersornerullutik Oqartussanit utertillugit akilerneqartarlutik. Sinneruttut 10 %-it kommunimit najugarisamit akilerneqartarput.
Imm. 2-imi aalajangersagaq peqqussummi atuuttumi § 27-imik ingerlateqqiineruvoq.
§ 2-mut
Siunnersuutip julip aallaqqaataanni 2006-imiit atuutilernissaa siunnersuutigineqarpoq, atuutissallunilu angajoqqaanut 2006-imi julip aallaqqaataani tamatumalu kingorna qitornartaartunut.
Inuit maleruagassat atuuttut tunngavigalugit sulinngiffeqalereersimasut, julillu aallaqqaataanni 2006 tamatumaluunniit kingorna qitornartaartut, inatsisartut peqqussutaat una malillugu sullingiffeqarsinnaatitaassanngillat.