Akileraartarnermut Pisortaqarfiup umiarsuarni inuttat akissarsiaat pillugit aaqqissuussiner-mut ilaasunik nalunaarsuiffia pillugu Namminersornerullutik Oqartussat nalunaarutaat nr. 7, 28. marts 2006-imeersoq

Aningaasarsianit akileraarutit pillugit Inatsisartut inatsisaanni nr. 5, 19. maj 1979-imeersumi, ilaatigut Inatsisartut inatsisaatigut nr. 2, 2. maj 1996-imeersukkut allanngortinneqartumi, kingullermillu Inatsisartut inatsisaatigut nr. 2, 27. marts 2006-imeersukkut allanngortinneqartumi § 34 b, imm. 1, aamma § 111 naapertorlugit makku aalajangersarneqarput:

 

Atuuffia

§ 1. Nalunaarut atuutissaaq kalaallit umiarsuaannut ilaasunik angallassissutinut 1.100 bruttotonsinik taakkualuunniit sinnerlugit usisinnaassuseqartunut, takornarianik angallassissutitut imaluunniit ilaasunik nalinginnaasunik takornarianillu angallassissutitut ingerlaartunut, aammalu Akileraartarnermut Pisortaqarfiup umiarsuarni inuttat akissarsiaat pillugit aaqqissuussinermut ilaasunik nalunaarsuiffianut ilanngukkumaneqartunut.

 

Oqartussaasutut nalunaarsuisoq aamma nalunaarsugassanik nalunaaruteqartarneq

§ 2. Nalunaarsuinermut tunngatillugu suliassat, tassa imaappoq Akileraartarnermut Pisortaqarfiup umiarsuarni inuttat akissarsiaat pillugit aaqqissuussinermut ilaasunik nalunaarsuiffianut ilanngussinerit tassanngaanniillu piiaanerit Akileraartarnermut Pisortaqarfimmit isumagineqassapput.
Imm. 2. Akileraartarnermut Pisortaqarfiup umiarsuarni inuttat akissarsiaat pillugit aaqqissuussinermut ilaasunik nalunaarsuiffianut nalunaarsuineq elektroniskiusumik ingerlanneqassaaq.

§ 3. Kalaallit umiarsuaannik ilaasunik angallassissummik piginnittup, umiarsuup ilaasunik angallassissutip Akileraartarnermut Pisortaqarfiup umiarsuarni inuttat akissarsiaat pillugit aaqqissuussinermut ilaasunik nalunaarsuiffianut ilanngunneqarnissaanik kissaateqartup allaganngorlugu nalunaarut Akileraartarnermut Pisortaqarfimmut nassiutissavaa.
Imm. 2. Nalunaarut umiarsuup ilaasunik angallassissutip aqqa, angerlarsimaffia, umiarsuup ilaasunik angallassissutip usisinnaassusia kiisalu umiarsuup ilaasunik angallassissutip, aningaasarsianit akileraarutit pillugit Inatsisartut inatsisaanni § 34 b, imm. 2-mut naapertuuttumik atorneqarnera ingerlaarneralu pillugit paasissutissanik imaqassaaq.
Imm. 3. Umiarsuarmi ilaasunik angallassissummi sulisut tamarmik akissarsiaat sulinermilu atugassarisaat pillugit isumaqatigiissutit taamatut sulinerinnarmut atuuttuunerisa taakkunani erseqqissumik allassimanerannut uppernarsaat nalunaarummut ilanngullugu nassiunneqassaaq.
Imm. 4. Umiarsuaq ilaasunik angallassissut Akileraartarnermut Pisortaqarfiup umiarsuarni inuttat akissarsiaat pillugit aaqqissuussinermut ilaasunik nalunaarsuiffianut ilanngunneqarpat ulloq ilanngunneqarfia tassaassaaq ulloq allaganngorlugu nalunaarutip tiguneqarfia, aatsaalli piginnittup ulloq ilanngunneqarfissaq kingusinnerusoq kissaatigisimanngippagu.

§ 4. Umiarsuup ilaasunik angallassissutip Akileraartarnermut Pisortaqarfiup umiarsuarni inuttat akissarsiaat pillugit aaqqissuussinermut ilaasunik nalunaarsuiffianut nalunaarsorneqarsimasup piginnittuata paasissutissanut § 3, imm. 2 aamma 3 naapertorlugit nalunaarutigineqarsimasunut allannguutit ingerlaannaartumik nalunaarutigisassavai.

 

Akileraartarnermut Pisortaqarfiup umiarsuarni inuttat akissarsiaat pillugit
aaqqissuussinermut ilaasunik nalunaarsuiffianit piiarneqartarneq

§ 5. Umiarsuaq ilaasunik angallassissut Akileraartarnermut Pisortaqarfiup umiarsuarni inuttat akissarsiaat pillugit aaqqissuussinermut ilaasunik nalunaarsuiffianit piiarneqassaaq:
1) Tamanna umiarsuarmik ilaasunik angallassissummik piginnittup allaganngorlugu qinnutigippagu.
2) Aningaasarsianit akileraarutit pillugit Inatsisartut inatsisaanni § 34 b-mi piumasaqaatit eqquutsinneqarunnaarsimappata.
3) Umiarsuaq ilaasunik angallassissut atoqqittussaajunnaarlugu aserorterneqarpat, umiuppat tammarpalluunniit.

§ 6. Akileraartarnermut Pisortaqarfiup umiarsuarni inuttat akissarsiaat pillugit aaqqissuussinermut ilaasunik nalunaarsuiffianit § 5, nr. 2 naapertorlugu piiaasoqassanngilaq, taamaaliornissaq Akileraartarnermut Pisortaqarfimmit umiarsuup ilaasunik angallassissutip piginnittuanut nalunaarutigineqarsimatinnagu, aammalu nalunaarutip nassiunneqarneraniit piffissaliussaq ullunik 10-nik sivisussuseqartoq qaangiussimatinnagu.

 

Pineqaatissiisarneq

§ 7. § 4-mik unioqqutitsineq akiliisitsissummik pillarneqaataasinnaavoq.
Imm. 2. Aktieselskabi, anpartsselskabi assigisaalluunniit unioqqutitsippat selskabi taanna taamatulli akiliisitsissummik pillarneqarsinnaavoq.

 

Atortuulerfia

§ 8. Nalunaarut ullormi 1. april 2006-imi atortuulissaaq.

Namminersornerullutik Oqartussat, ulloq 28. marts 2006

Josef Motzfeldt

/

Kaare Hagemann