2006-imi aalisarnermi pisassiissutit pillugit Namminersornerullutik Oqartussat nalunaarutaat nr. 34, 29. december 2006-imeersoq

Aalisarneq pillugu Inatsisartut inatsisaanni nr. 18-imi 31. oktober 1996-imeersumi § 5-imi, imm. 1-imi, § 9-mi imm.1-imi, § 10-mi, § 14, imm. 2-mi, § 33-mi, imm. 2-mi, aamma § 34-mi, imm. 3-mi, kingusinnerusukkut Inatsisartut inatsisaatigut nr. 5-ikkut 21. maj 2002-meersukkut allannguuteqartinneqartumi, makku aalajangersarneqarput:

 

Atuuffia

§ 1. Nalunaarummi sumiiffiit taaneqartut WGS84 naapertorlugu nalunaarsorneqarput, imartat assinginut Kalaallit Nunaannut atuuttunut iluarsiissutinik iluarsisarlugit.

§ 2. Nalunaarut manna imartani Kalaallit Nunaata aalisarnikkut oqartussaaffigisaani inuussutissarsiutigalugu aalisarnermut kiisalu Kalaallit Nunaata aalisarnikkut oqartussaaffigisaata avataani inuussutissarsiutigalugu kalaallit aalisarnerannut atuuppoq.

§ 3. Nalunaarummi matumani angallatip usitussutsimut killigititamik qaangiisimaneranut ataassisimaneranulluunniit aalajangiisuussaaq usitussutsip angallatip uuttuutaanut uppernarsaammi allassimanera, uuttueriaatsit pillugit maleruagassat sorliit angissusaanut uuttuummik atulersitsinermut tunngaviliisuusimanersut apeqqutaatinnagit.

 

Nassuiaatit

§ 4. Nalunaarummi matumani "imartat Kalaallit Nunaata aalisarnikkut oqartussaaffigisai" aamma "tunngaviusumik killeqarfik" paasineqassapput tunngaviusumik killeqarfittut imartat Kalaallit Nunaata aalisarnikkut oqartussaaffigisai pillugit statsiministeriaqarfiup nalunaarutaani aalajangersarneqarsimasut.

§ 5. "Avataasiorluni aalisarnertut" paasineqassaaq aalisarneq imartami Kalaallit Nunaata aalisarnikkut oqartussaaffigisaani tunngaviusumik killeqarfinnit 3 sømilip avataani kiisalu imartani kiisalu imartani Kalaallit Nunaata aalisarnikkut oqartussaaffigisaata avataani ingerlanneqartoq. Avataasiorluni aalisarneq angallatinik usitussutsimut uuttuutaat malillugu 75 BRT/120 BT-nik angissusilinnik anginerusunilluunniit ingerlanneqartoq, nalunaarummi allami allanik aalajangiisoqarsimatinnagu.
Imm. 2. "Sinerissamut qanittumi aalisarnertut" paasineqassaaq aalisarneq angallatinik usitussutsimut uuttuutaat malillugu 75 BRT/120 BT-nik mikinerusunit ingerlanneqartoq, nalunaarummi allami allanik aalajangiisoqarsimatinnagu.

§ 6. Uiluinniarnermi sumiiffiit pisassaqarfiit imatut aalajangersarneqarput:
1) Nuup eqqaa: Sumiiffik avannarpasissutsit 63º45’0 aamma 64º21’5 akornanniittoq kiisalu Nuup Kangerluani avannarpasissutsip 64º21’5 avannaatungaani.
2) Aqajarua: Titarneq kippasissuseq 51º40 Qeqertarsuarmut avannarpasissutsit 69º35’ aamma 69º50’ akornanni.
3) Attup eqqaa: Kippasissutsit 53º00’ aamma 54º00’ akornanni aammalu avannarpasissutsit 67º50’ aamma 68º10 akornanni. Taamaattorli sumiiffik una aalisarnermut matoqqavoq: Sumiiffik killiliussanik ukunannga killiliivigineqartoq avannarpasissuseq 68°05’ kippasissuseq 54°45’, avannarpasissuseq 68°05’ kippasissuseq 53°00’, avannarpasissuseq 67°55’ kippasissuseq 53°00’ aamma avannarpasissuseq 67°55’ kippasissuseq 53°45’.
4) Sisimiut - Kujataa (Saqqaq): Sumiiffik imartap aalisarnikkut oqartussaaffigisap tunngaviusumik killinganut kangimut killilik; avannamut imartap aalisarnikkut oqartussaaffigisap tunngaviusumik killinganiit kangimut avannarpasissutsikkut 66º55’5 Sisimiut kujataanni nunaviup tungaanut; kujammut imartap aalisarnikkut oqartussaaffigisap tunngaviusumik killinganiit kangimut avannarpasissutsikkut 66º36’ nunaviup tungaanut.
5) Sisimiut - Avannaa (Kangaarsuk): Sumiiffik imartap aalisarnikkut oqartussaaffigisap tunngaviusumik killinganut killilik; avannamut imartap aalisarnikkut oqartussaaffigisap tunngaviusumik killinganiit kangimut avannarpasissutsikkut 67º20’ nunaviup tungaanut; kujammut imartap aalisarnikkut oqartussaaffigisap tunngaviusumik killinganiit kangimut avannarpasissutsikkut 66º55’5 nunaviup tungaanut.
6) Nassuttooq: Sumiiffik imartap aalisarnikkut oqartussaaffigisap tunngaviusumik killinganut kangimut killilik; avannamut imartap aalisarnikkut oqartussaaffigisap tunngaviusumik killinganiit kangimut avannarpasissutsikkut 67º35 nunaviup tungaanut; kujammut imartap aalisarnikkut oqartussaaffigisap tunngaviusumik killinganiit kangimut avannarpasissutsikkut 67º20’N nunaviup tungaanut. Kangimut killinga tassaavoq sinerissap immamut killinga.
7) Kitaata sinnera: Pisassaqarfiit taaneqartut avataanni Kalaallit Nunaata kitaata sinnera. Sumiiffinni taakkunani pisassat qummut killeqanngillat.

 

Pisassiissutit

§ 7. Aalisakkanut aalajangersimasunut ilanngussaq 1-imi (aalisariutinut avataasiortunut) aamma nunat allamiut aalisarnerannut aalisarneq pillugu inatsimmi § 7-imi eqqartorneqartumut aamma ilanngussaq 2-mi (sinerissamut qanittumi aalisariutinut) taaneqartunut pisassiissutit tamarmiusut annertussusii ilanngussani ammukaartumi 1-imi allassimasutut aalajangersarneqarput. Ukiup ingerlanerani allanngortitsisoqarsinnaavoq, aalisarneq pillugu Inatsisartut inatsisaanni § 10 naapertorlugu.

§ 8. Aalisakkanit ilanngussaq 1-imi taaneqartunit kalaallit angallataat, aalisarneq pillugu Inatsisartut inatsisaanni § 6 takuuk, ilanngussami 1-imi ammukaartumi 2-mi allassimasunit pisassanit annertunerusunik aalisaqqusaanngillat.

§ 9. Aalisakkanit ilanngussaq 2-mi taaneqartunit kalaallit angallataat, aalisarneq pillugu Inatsisartut inatsisaanni § 6 takuuk, ilanngussami 2-mi ammukaartumik 1-imi allassimasunit pisassanit annertunerusunik aalisaqqusaanngillat.

§ 10. Angallatit nunani EU-mut ilaasortaasuni nalunaarsorneqarsimasut taamaallaat katillugit pisassiissutit ilanngussami 1-imi ammukaartumi 3-mi allassimasut aalisarsinnaavaat.

§ 11. Angallatit Savalimmiuni nalunaarsorneqarsimasut taamaallaat katillugit pisassiissutit ilanngussami 1-imi ammukaartumi 4-mi allassimasut aalisarsinnaavaat.

§ 12. Angallatit Islandimi nalunaarsorneqarsimasut taamaallaat katillugit pisassiissutit ilanngussami 1-imi ammukaartumi 6-imi allassimasut aalisarsinnaavaat.

§ 13. Angallatit Norgemi nalunaarsorneqarsimasut taamaallaat katillugit pisassiissutit ilanngussami 1-imi ammukaartumi 6-imi allassimasut aalisarsinnaavaat.

§ 14. Angallatit Ruslandimi nalunaarsorneqarsimasut taamaallaat katillugit pisassiissutit ilanngussami 1-imi ammukaartumi 7-imi allassimasut aalisarsinnaavaat.

§ 15. Naalakkersuisut pisassiissutinik tamarmiusunik, ilanngussani 1-imi 2-milu taaneqartunit ammukaartoq 1, allanngortitsissagaluarpata imaluunniit pisassiissutit tamarmiusut, ilanngussaq 1-imi taaneqartunit ammukaartut 2 - 7, agguataarneqarsimanerannik allanngortitsissagaluarpata, nunanik tamalaanik isumaqatigiissuteqarnerit kingunerannik tamatuma kingunerissavaa, nalunaarummik nutaamik atuuttuulersitsinissaq.

§ 16. Angallatinut §§-ini 8-miit 14-imut taaneqartunut akuersissutinut amerlassutsit atuuffissallu, Aalisarnermut, Piniarnermut Nunalerinermullu Pisortaqarfimmi Naalakkersuisup tunniussai pisassiissutit amerlassusiinut naapertuutissapput, tunniussinerlu angallatit taaneqartut aalisarsinnaassusiat eqqarsaatigalugu pissaaq, Aalisarsinnaanermut akuersissuteqartarneq pillugu Namminersornerullutik Oqartussat nalunaarutaat naapertorlugu.

 

Aalisarnermik unitsitsineq

§ 17. Aalisarnermut, Piniarnermut Nunalerinermullu Pisortaqarfimmi Naalakkersuisup, pisassiissutit ilanngussani 1-imi 2-milu taaneqartut pisarineqarpata aalisakkanik pineqartunik aalisarneq angallatinit ataatsimoortunit tamanit §§-ini 8-miit 14-imut taaneqartunit ingerlanneqartoq unitsissavaa. Nunanut ataasiakkaanut pisassiissutit tamarmik immikkut naatsorsorneqartassapput. Matumunnga atatillugu EU nunatut ataatsitut isigineqarpoq.
Imm. 2. Kalaallit angallataataannut pisassiissutinik ataatsimoorussanik aalisartunut, aalisarnerup unitsinneqarnissaanut piffissaliussaq radiukkut tusagassiorfitsigullu nalunaarutigineqassaaq.
Imm. 3. §§ 8 - 14 naapertorlugit angallatinut tamanut unitsitsinissamik piffissaliussaq telexikkut imaluunniit telefaxikkut angallammut pineqartumut nalunaarutigineqassaaq. Angallatinut EU-mi angerlarsimaffeqartunut taamatut nalunaarut taamatuttaaq EU-Kommissionimut nassiunneqassaaq. Kalaallit angallatiginngisaannut allanut taamatut nalunaarut nunap pineqartup aalisarnikkut oqartussaasuinut aamma nassiunneqassaaq.
Imm. 4. Angallatit aalisarunnaassapput piffissami Aalisarnermut, Piniarnermut Nunalerinermullu Pisortaqarfimmi naalakkersuisunut ilaasortap aalajangigaani.

 

Pineqaatissiissutit

§ 18. §§-ini 8-miit 14-imut aamma § 17 imm. 4-mi unioqqutitsinerit akiliisitsinermik kinguneqarsinnaapput.
Imm. 2. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiiffik imaluunniit piginneqatigiilluni umiarsuaatileqatigiiffik unioqqutitsippat taannaatillugu akiliisitassatut akisussaasunngortinneqarsinnaavoq.
Imm. 3. Pinerluttulerinermi inatsimmi arsaarinnittarneq pillugu malittarisassat taamatuttaaq atorneqarsinnaapput.
Imm. 4. Pineqaatissiinissamik suliat allattaaq aalisarneq pillugu Inatsisartut inatsisaanni §§ 33 - 38 malillugit suliarineqartassapput.

§ 19. Akuersissummi piumasaataasunik unioqqutitsineq tassannga atuisinnaatitaanermik killiliinermik kinguneqarsinnaavoq kiisalu sakkortunerusunik pisoqartillugu imaluunniit unioqqutitsisoqaqqitsillugu akuersissut arsaarinnissutigineqarsinnaalluni. Tamanna pillugu Naalakkersuisut aalajangiissapput, aalajangiinerlu nalunaarutigineqarnerminiit ullut 15-it qaangiutsinnagit Nunatta Eqqartuussivianut suliassiissutigineqarsinnaalluni, aalisarneq pillugu Inatsisartut inatsisaanni nr. 18-imi 31. oktober 1996-imeersumi § 21, imm. 4 naapertorlugu.

 

Atuutilerfia

§ 20. Nalunaarut 29. december 2006 atuutilerpoq. Peqatigitillugu 2005-mi aalisarnermi pisassat pillugit Namminersornerullutik Oqartussat nalunaarutaat nr. 31 7. december 2005-meersoq atorunnaarpoq.




Namminersornerullutik Oqartussat, ulloq 29. december 2006




Finn Karlsen

/

Amalie Jessen

Ilanngussaq 1 (pdf-format)

Ilanngussaq 2 (pdf-format)