Namminersornerullutik Oqartussat Meeqqanut ileqqaakkat pillugit nalunaarutaat nr. 23, 1. december 2006-imeersoq

Inatsisartut inatsisaanni nr. 13, 2. november 2006-imeersumi § 2, imm. 2, aamma § 7, imm. 2 naapertorlugit aalajangerneqarput:

 

Aningaasaliinerit

§ 1. Aningaasat Meeqqanut ileqqaakkanut agguaatassatut pigineqartut, imatut aningaasaliissutigineqassapput qaqugukkulluunniit pisussaaffimminnik naammassinnissinnaanissaat aarlerinaatsumik qulakkeerneqarluni.
Imm. 2. Meeqqanut ileqqaakkatut agguaatassat qassiikkuutaarlugit immikkuutaakkanut pisassaritinneqassapput pappiaqqat nalingisa katinneri qaqugukkulluunniit agguaatassat meeqqanut ileqqaakkat pillugit Inatsisartut inatsisaanni § 2, imm. 1 malillugu pisussaaffiisa nalingisa amerlaqataannik amerlassuseqartunik. Pappiaqqat nalillit suuneri toqqarneqassapput isumannaatsuunissaq, iluanaaruteqarnissaq aningaasaqarnerlu eqqarsaatigalugit meeqqanut ileqqaakkanut piumasarisanik naammassinninnissap qulakkeernissaanut naleqquttuunissaat siunertaralugu katitigaasunik.

§ 2. Ukiumut sinneqartoorutit pissutissaqartumik meeeqqanut ileqqaakkanit pisassaqartunut ernialersuiffigineqarnerannut atorneqassapput.
Imm. 2. Erniaqartitsinerup 31. decemberimi diskonto atuuttuusoq sinnersimappagu, erniat annertunerussutaasa 50 procentii sillimmatitut toqqorneqassapput.

 

Aningaasaatit il.il. atorneqanngitsut

§ 3. Aningaasat, Meeqqanut ileqqaakkat pillugit Inatsisartut inatsisaanni § 4, imm. 2-mi taaneqartumik piffissaliunneqartup qaangiutinnginnerani atorneqanngitsut, imaluunniit toqukkut qimaguttoqarneranik pissuteqartumik Meeqqanut ileqqaakkanit agguaatassanut tutsinneqartut sillimmatitut toqqorneqassapput.

 

Sillimmatit

§ 4. Meeqqanut ileqqaakkanut agguaatassanit sillimmatit aningaasaqarnermut Naalakkersuisup erseqqinnerusumik aalajangiinera malillugu qulakkeerneqarsimassaaq, Meeqqanut ileqqaakkanut agguaatassat qaqugukkulluunniit pisussaaffimminnik naammassinnissinnaanissaat.

 

Aqutsineq

§ 5. Meeqqanut ileqqaakkanik pissarsiassanit tunineqarnissamut qinnuteqarnermi atugassatut immersugassanik ilitsersuutinillu akileraaruseriffik suliaqassaaq.

§ 6. Meeqqanut ileqqaakkanik pissarsiassanit tunineqarnissamik qinnuteqaatit akileraaruseriffimmut tunniunneqartassapput.
Imm. 2. Meeqqanut ileqqaakkanit pissarsiassanit tunniussinissamut piumasaqaataavoq, aningaasat tunniussassat annertussusaasa atorneqarnissaat, Meeqqanut ileqqaakkat pillugit Inatsisartut inatsisaanni § 4, imm. 3-mi siunertamut akuerisaasumut atorneqarnissaat pillugu meeqqap akileraaruseriffimmut uppernarsaateqarnissaa, aammalu meeqqap ilumoorluinnarluni nalunaajaammik atsiuinissaa.
Imm. 3. Meeqqanut ileqqaakkat pillugit Inatsisartut inatsisanni § 1, nr. 6 naapertorlugu meeqqat angajoqqaatik ilagalugit Kalaallit Nunaata avataanut nooqqasimasut, angajoqqaat atorfeqarnerminnut atatillugu ilinniariartorsimanerannik imaluunniit Kalaallit Nunaata avataani ilinniaqqinnerannik peqquteqartumik nunami allamiissimanermut uppernarsaammik aamma saqqummiussissapput. Uppernarsaat tassaasinnaavoq angajoqqaat taakkualu sulisitsisuisa akornanni allakkatigut isumaqatigiissutaat, akissarsianut allagartat assigisaallunniit. Uppernarsaasiinissamik naammassinninnginnerup kingunerissavaa meeqqap piffissap pineqartup nalaani meeqqanut ileqqaakkanik pissarsisinnaannginnera.

§ 7. Meeqqanut ileqqaakkanik pissarsisinnaatitaasunut ukiut tamaasa 1. juli nallertinnagu, ileqqaakkat amerlassusii pillugit meeqqamut nalunaarutigineqartassapput.
Imm. 2. Meeqqap 18-inik ukioqalernissaa kingusinnerpaamik qaammatinik pingasunik sioqqullugu meeqqap meeqqanut ileqqaakkanik qanoq amerlatigisunik uninngatitaqarnera pillugu meeqqanullu ileqqaakkat tunniunneqarnissaannik qinnuteqarnermut ilitsersuut meeqqamut nalunaarutigineqassapput.
Imm. 3. Meeqqamut meeqqanut ileqqaakkanik pisassarisaminik suli tunineqarsimanngitsumut, meeqqap meeqqanut ileqqaakkanik pisassarisaasa amerlassusii aammalu meeqqanut ileqqaakkat tunniunneqarnissaannut qinnuteqarnissamut ilitsersuut, kingusinnerpaamik meeqqap 22-inik ukioqalernissaa qaammatinik pingasunik sioqqullugu nalunaarutigineqassapput. Aammalu meeraq ilisimatinneqassaaq tamanna pillugu qaammatip meeqqap 22-nik ukioqalerfigisaata naannginnerani qinnuteqartoqanngippat, meeqqanut ileqqaakkanik tunineqarnissamut pissarsisinnaatitaaneq atorunnaassasoq.

 

Naammagittaalliorneq

§ 8. Meeqqanut ileqqaakkanut tunngasumik aalajangiineq, aalajangiinerup ulluaniit qaammatit pingasut qaangiutsinnagit, Naalakkersuisunut aalajangiinermi pineqartumit naammagitaalliuutigineqarsinnaavoq, imaluunniit pineqartoq 18-it inorlugit ukioqarpat, meeqqap angajoqqaavinit. Naammagittaalliuut itigartitsissutigineqassaaq, piffissaritinneqartup naanerata kingornatigut tunniunneqarpat. Naalakkersuisulli piffissaliussap qaangerneqarnera naatsorsuutiginngissinnaavaat, pissutsit immikkut ittut tamanna taperserpassuk.

 

Pineqaatissiinerit atuuttussanngorfialu

§ 9. Piaaraluni imaluunniit soqqusaatsumik mianersuaalliornikkut meeqqanut ileqqaakkanik tunniussinissamut atugassanik eqqunngitsunik imaluunniit paatsoorneqarsinnaasunik paasissutissiisoq imaluunniit suliap aalajangiiffigineqarneranut pingaaruteqartunik paasissutissanik nipangiusimannittoq, Kalaallit Nunaanni pinerluttulerinermik inatsit naapertorlugu pineqaatissinneqarsinnaavoq.

§ 10. Nalunaarut 1. januar 2007-imi atuutilerpoq.
Imm. 2. 2007-imi maji naatinnagu meeqqanut ileqqaakkat pillugit paasissutissiissummik meeqqanut ileqqaakkanik pissarsisinnaatitaasussaasorineqartunut angajoqqaat nassinneqassapput.

Namminersornerullutik Oqartussat, ulloq 1. december 2006,

Josef Motzfeldt

/

Kaare Hagemann