Aasaanerani nalunaaquttap aalajangersarneqarnera pillugu Namminersornerullutik Oqartussat nalunaarutaat nr. 19, 5. oktober 2006-meersoq

Aasaanerani nalunaaquttap atorneqarnera pillugu Inatsisartut inatsisaanni nr. 14-imi, 19. oktober 1989-meersumi § 1 naapertorlugu aalajangersarneqarpoq:

 

§ 1. Piffissamik immikkut naatsorsuineq atorneqassaaq, aasaanerani nalunaaqutaq, piffissami martsimi sapaatip akunnerani kingullermit oktoberimi sapaatip akunneranut kingullermut.

§ 2. Aasaanerani nalunaaqutaq Nunatsinni nalinginnaasumik nalunaaquttamut tunngatillugu aallartissaaq martsimi arfininngornermi kingullermi nal. 22.00, piffissami nalunaaqutaq allanngortinneqassalluni nal. 23.00-mut.
Imm. 2. Ittoqqortoormiini, Nunatsinni nalinginnaasumik nalunaaquttamik malinnaanngitsumi, aasaanerani nalunaaqutaq aallartissaaq sapaammi kingullermi nal. 00.00, piffissami nalunaaqutaq allanngortinneqassalluni nal. 01.00-mut.
Imm. 3. Pituffimmi sakkutooqarfimmi kiisalu Danmarkshavnimi aasaanerani nalunaaqutaq aallartissanngilaq.

§ 3. Nunatsinni nalinginnaasumik nalunaaquttamut tunngatillugu aasaanerami nalunaaqutaq atorunnaassaaq oktoberimi arfininngornermi kingullermi nal. 23.00, piffissami nalunaaqutaq allanngortinneqassalluni nal. 22.00-mut.
Imm. 2. Ittoqqortoormiini, Nunatsinni nalinginnaasumik nalunaaquttamik malinnaanngitsumi, aasaanerani nalunaaqutaq atorunnaassaaq oktoberimi sapaammi kingullermi nal. 01.00, piffissami nalunaaqutaq allanngortinneqassalluni nal. 00.00-mut.
Imm. 3. Nal. akunnerannut marloqiusaasumut tunngatillugu, takuuk. imm. 1 aamma 2, taagorneqassaaq nal. ak. siulleq nal. 22.00 A-tut, akunnerlu aggersoq taagorneqassalluni nal. 22.00 B-tut, aamma nal. 00.00 B-tut.

§ 4. Nalunaarut atuutilerpoq 1. oktober 2006.
Imm. 2. Tamatumunnga peqatigitillugu ukioq 1994-imut aasaanerani nalunaaquttap aalajangersarneqarnera pillugu Namminersornerullutik Oqartussat nalunaarutaat nr. 4, 11. marts 1994-meersoq atorunnaarsinneqarpoq.

Namminersornerullutik Oqartussat, ulloq 5. oktober 2006

Hans Enoksen

/

Peter Schultz