Illuliortiternermi oqartussaassuseq pillugu Namminersornerullutik Oqartussat nalunaarutaat nr. 13, 18. august 2006-imeersoq

Nunaminertat atorneqartarnerat pilersaarusiornerlu pillugit Inatsisartut peqqussutaanni nr. 6-imi, 19. december 1986-imeersumi, Inatsisartut peqqussutaatigut nr. 1-ikkut, 18. juni 1987-imeersukkut allannguuteqartinneqartumi § 21 naapertorlugu makkua aalajangersarneqarput:

 

§ 1. Naalakkersuisut illuliortiternermi oqartussaassuseqarput.
Imm. 2. Kommunalbestyrelsip Naalakkersuisunut akisussaassuseqarlutik illuliortiternermi oqartussaasutut suliassat najukkami innuttaasut akornanni isumagissavaat, tassunga ilanngullugit allaffissornermi nakkutilliinermilu suliassat.
Imm. 3. Kommunalbestyrelsip illuliortiternermi oqartussaanerup aqunneqarnerani suliassai pillugit maleruagassat "Illuliornermi Malittarisassat 2006"-imi (Illuliornermi Malittarisassat) Naalakkersuisut aalajangersassavaat, taannalu aamma Naalakkersuisunit saqqummersinneqassaaq.
Imm. 4. Qallunaatut kalaallisullu oqaasertaat assigiinngissuteqarpata, malittarisassat imaasa teknikkikkut paasiuminaannerat pissutigalugu qallunaatut allannera atuutissaaq.

§ 2. Nalunaarut atuutissaaq:
1) Nutaanik illuliortiternermut aamma illulianik alliliinermut.
2) Illuliornermi malittarisassani aalajangersakkanut naleqqiullugu illuliani allanngortiterinermut allatullu allannguinermut annertuumut.
3) Ikuallattoornissaq, isumannaallisaaneq peqqinnissarlu eqqarsaatigalugit illuliornermi teknikkikkut piumasaqaatinik allanik naammassinninnissamut pisariaqartitsiviusunik illuliat atorneqarnerinik allannguinermut.
Imm. 2. Illuliortiternermi oqartussaasup aalajangissavaa, imm. 1, nr. 2 naapertorlugu suna annertuutut isigineqassanersoq.

§ 3. Illuliat § 2-mi pineqartut kommunalbestyrelsimit sanaartornissamut akuersissuteqarfigineqartinnagit aallartinneqassanngillat. Kommunalbestyrelsip qinnuteqartoq paasissutissanik, qinnuteqaatip naliliiffiginiarnerani pisariaqartinneqartunik piumasaqarfigisinnaavaa.
Imm. 2. Illuliat § 2-mi pineqartut kommunalbestyrelsimit akuersissuteqarfigineqartinnagit atorneqassanngillat.

§ 4. Kommunalbestyrelsip suliassamik suliarinninnermini nalunaarut illuliornermilu malittarisassani aalajangersakkat malinneqarnersut misissussavai.
Imm. 2. Kommunalbestyrelsip illuliornermi malittarisassat malillugit peqqussutit naammassineqarnersut, kiisalu illuliornermi malittarisassat malillugit atugassarititaasut akuersissutini aammalu immikkut akuersissutini aalajangersarneqarsimasut malinneqarnersut misissussavai.

§ 5. Naalakkersuisut illuliornermi malittarisassani aalajangersakkat sanioqqullugit immikkut akuersissuteqarsinnaapput. Immikkut akuerineqarnissamut qinnuteqaat Ineqarnermut, Attaveqarnermut Aatsitassanullu Naalakkersuisoqarfimmut nassiunneqassaaq.
Imm. 2. Qinnuteqaatip paasissutissat makku imarissavai,
1) aalajangersakkat suut sanioqqunnissaannut immikkut akuerineqarnissamut qinnuteqaatigineqarnersut, kiisalu
2) illuliaq qanoq ittoq suliarineqartussatut eqqarsaatigineqarnersoq.
Imm. 3. Kommunalbestyrelsi illuliassamut, illuliornermi malittarisassani portussusissatut ungasissusissatullu aalajangersakkanik sanioqqutsinissamut immikkut akuerineqarnissamik qinnuteqaateqarfiusumut tunngatillugu sanilinut attuumassuteqalersussanut tusarniaassuteqassaaq.
Imm. 4. Imm. 1 naapertorlugu immikkut akuersinissamut aalajangiinermi tunngavissat pigineqartut, tak. imm. 2 tunngavigineqassapput, tamannalu siusinnerpaamik pisinnaavoq kommunalbestyrelsip illuutip immikkut akuersissuteqarnissamik qinnuteqaatigineqartup sanilinut nalunaarutigereerneraniit sapaatit akunnerisa pingasut ingerlareernerini, nalunaarutigineqassalluni
1) immikkut akuerineqarnissamik qinnuteqartoqartoq, aamma
2) oqaaseqaataasinnaasut sapaatit akunnerisa pingasut qaangiutinnginnerini kommunalbestyrelsimut nassiunneqarsinnaasut.

§ 6. Ineqarnermut, Attaveqarnermut Aatsitassanullu Naalakkersuisoqarfiup § 5, imm. 1 naapertorlugu aalajangiinera pillugu maalaarutit, kiisalu Ineqarnermut, Attaveqarnermut Aatsitassanullu Naalakkersuisoqarfiup illuliornermi malittarisassat naapertorlugit aalajangiinera pillugu maalaarutit Naalakkersuisunut ingerlateqqinneqarsinnaapput.

§ 7. Nalunaarut 1. september 2006-imi atortuulerpoq.
Imm. 2. Tamatumunnga peqatigitillugu Kalaallit Nunaanni illuliortiternermi oqartussaassuseq pillugu Namminersornerullutik Oqartussat nalunaarutaat nr. 24, 9. november 1987-imeersoq atorunnaarsinneqarpoq.

Namminersornerullutik Oqartussat, ulloq 18. august 2006

Jørgen Wæver Johansen

/

Dorthe Johannsen