Isumaginninnermut tunngasunik nakkutilliineq pillugu Namminersornerullutik Oqartussat nalunaarutaat nr. 6, 16. februar 2006-meersoq

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-imeersumi § 1, imm. 2 naapertorlugu makku aalajangersarneqarput:

 

Kommuuninik nakkutilliineq

§ 1. Isumaginninnermut inatsisini maleruagassat kommuunit eqquutsinneraat aammalu inatsisini ingerlatsinermut tunngassuteqartuni maleruagassat naapertorlugit ingerlanneraat Ilaqutariinnermut naalakkersuisoqarfiup nakkutigisaraa.
Imm. 2. Nakkutilliinermut pineqarput allaffissornikkut aqutsineq paaqqinniffiillu.

§ 2. Nakkutilliilluni takusaanerit pisassapput kommunalbestyrelsimut qinigaaffiup iluani minnerpaamik ataasiarluni.
Imm. 2. Ilaqutariinnermut naalakkersuisoqarfiup pisariaqarsorippagu imm. 1-imi taaneqartumiit annertunerusumik nakkutilliisoqassaaq.

§ 3. Nakkutilliisutut takusaanissaq sivikinnerpaamik sapaatit akunnerinik marlunnik sioqqutsisumik kommunalbestyrelsimut nalunaarutigineqassaaq.

§ 4. Nakkutilliisutut takusaanermi ilaatigut suliassaqarfinni aalajangersimasuni suliat ataasiakkaat misissuiffigineqassapput. Misissorneqassaaq isumaginninnermut inatsisit naapertorlugit aalajangiisoqartarsimanersoq.

§ 5. Nakkutilliisutut takusaanerit tamaasa Ilaqutariinnermut naalakkersuisoqarfik nalunaarusiortassaaq. Nakkutilliinermit nalunaarusiaq kommuunip aamma kommuuninut Nakkutilliisoqarfiup tigussavaat. Taamaaliortoqartassaaq sapinngisamik qaammatit marluk qaangiutsinnagit.
Imm. 2. Nakkutilliinermit nalunaarusiap nassiunneqarneraniit qaammatit arfinillit qaangiunneranni Ilaqutariinnermut naalakkersuisoqarfiup kaammattuineratigut nalunaarusiami assuarineqarsimasut, inatsisinik paatsuuisimaneq sullissinermilu kukkussutaasimasut aaqqinniarlugit qanoq iliuuseqartoqarsimaneranik allakkatigut nassuiaammik kommuuni nassitsissaaq.

 

Ulloq unnuarlu paaqqinniffinnik nakkutilliineq

§ 6. Ulloq unnuarlu paaqqinniffinnik Namminersornerullutik Oqartussat pigalugilluunniit ingerlataannik aammalu kommuninit pigineqartunik imaluunniit ulloq unnuarlu paaqqinniffinnik imminnut pigisunik nakkutilliineq Ilaqutariinnermut naalakkersuisoqarfimmit isumagineqassaaq.

§ 7. Nalunaarut manna atuutilerpoq 1. marts 2006-imi.
Imm. 2. Tamanna ilutigalugu isumaginninnermut tunngasunik nakkutilliineq pillugu Namminersornerullutik Oqartussat nalunaarutaat nr. 43 18. december 2001-meersoq atorunnaarsinneqarpoq.

Namminersornerullutik Oqartussat, 16. februar 2006

Aleqa Hammond

/

Martha Lund Olsen