Akiliutissat akiligassanngortut taarsigassarsiallu amiakkuisa isumakkeerneqarnissaannik, taarsigassarsianik allannguinissamut kiisalu allannguiniarluni taarsigassarsinissamut qinnuteqaatit aqunneqartarnerat pillugu Namminersornerullutik Oqartussat nalunaarutaat nr. 2, 26. januar 2006-meersoq

Inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingullermik Inatsisartut peqqussutaatigut nr. 3-kkut, 12. maj 2005-imeersukkut allannguuteqartinneqartumi § 10, imm. 6, § 10a, imm. 6, aamma § 21a, imm. 4 naapertorlugu aalajangersarneqarpoq:

 

Akiliutissanik akiligassanngortunik taarsigassarsiallu amiakkuinik isumakkeerinninneq

§ 1. Taarsigassarsianut inissialiortiternermut tapersiissuteqartarneq pillugu Inatsisartut peqqussutaanni kapitali 4 naapertorlugu taarsigassarsiaritinneqartunut akiliutissanik akiligassanngortunik taarsigassarsiallu amiakkuinik isumakkeerinninnissamut qinnuteqaat A/S Inissiaatileqatigiiffik INI-mut, Naalakkersuisut sinnerlugit imm. 3-mi 4-milu piumasaqaatit naammassineqarsimanerinik misissuisussamut tunniunneqassaaq.
Imm. 2. Taarsigassarsiallit, ukiuni marlunni kingullerni inoqutigiinni ukiumut akileraarutaasussanik 128.000 kr.-it inorlugit isertitaqarsimasutut nalunaarsorsimasut akiliutissanik akiligassanngortunik taarsigassarsiallu amiakkuinik isumakkeerinniffigineqarnissamik qinnuteqarsinnaapput. Qitornamut 18-it inorlugit ukiulimmut angerlarsimaffimmi najugaqartumut, inuit nalunaarsorsimaffiannut nalunaarsorneqarsimasumut ataatsimut isertitanut killissarititat 4.000 kr.-inik qaffanneqassapput, amerlanerpaamilli qitornat arfiniliussapput.
Imm. 3. Qinnuteqaammut ilanngunneqassapput:
1) Qinnuteqartup inoqutigisaasa tamarmik aqqi, inuup normui suliffiilu pillugit paasissutissat.
2) Najugaqarnermut uppernarsaatip assilinera imaluunniit inuit nalunaarsorsimaffianniit allagaq, qinnuteqartup najugarisaanut uppernarsaaffiusoq naqissusigaq.
3) Taarsigassarsiat suut isumakkeerinniffigineqartussatut qinnuteqaatigineqartut pillugit paasissutissat, tassunga ilanngullugit BSU-mit taarsigassarsilluni illuliamut, nammineq illuliamut taarsigassarsiat imaluunniit BSU-mit taarsigassarsilluni illuliamut qinnuteqartup qimassimasaanut akiligassatoqqat akilinngitsuukkat.
4) Ukiuni marlunni kingullerni inoqutigiit tamarmiusut isertitaannut naatsorsuutit inaarnerisa assilinerat.
Imm. 4. Inoqutigiit tamarmiusut isertitaat ukiuni marlunni kingullerni isertitarisimasaannut naleqqiullutik piffissami qinnuteqarfiusumi annertuumik allannguuteqarsimappata, qinnuteqartup piffissami matumani inoqutigiit tamarmiusut isertitaannut uppernarsaat ilanngullugu nassiutissavaa.
Imm. 5. A/S Inissiaatileqatigiiffik INI qinnuteqarfissatut immersugassamik assigiissakkanik sanasinnaavoq.

 

Taarsigassarsianik allannguineq

§ 2. Taarsigassarsianut inissialiortiternermut tapersiissuteqartarneq pillugu Inatsisartut peqqussutaanni kapitali 4 naapertorlugu taarsigassarsiaritinneqartunut akiliutissanik akiligassanngortunik taarsigassarsiallu amiakkuinik allannguinissamut qinnuteqaat A/S Inissiaatileqatigiiffik INI-mut, Naalakkersuisut sinnerlugit imm. 3-mi 4-milu piumasaqaatit naammassineqarsimanerinik misissuisussamut tunniunneqassaaq.
Imm. 2. Taarsigassarsiallit, ukiuni marlunni kingullerni inoqutigiinni ukiumut akileraarutaasussanik 180.000 kr.-it inorlugit isertitaqarsimasutut nalunaarsorsimasut akiliutissanik akiligassanngortunik taarsigassarsiallu amiakkuinik allannguinissamik qinnuteqarsinnaapput. Qitornamut 18-it inorlugit ukiulimmut angerlarsimaffimmi najugaqartumut, inuit nalunaarsorsimaffiannut nalunaarsorneqarsimasumut ataatsimut isertitanut killissarititat 4.000 kr.-inik qaffanneqassapput, amerlanerpaamilli qitornat arfiniliussapput.
Imm. 3. Qinnuteqaammut ilanngunneqassapput:
1) Qinnuteqartup inoqutigisaasa tamarmik aqqi, inuup normui suliffiilu pillugit paasissutissat.
2) Najugaqarnermut uppernarsaatip assilinera imaluunniit inuit nalunaarsorsimaffianniit allagaq, qinnuteqartup najugarisaanut uppernarsaaffiusoq naqissusigaq.
3) Taarsigassarsiat suut allanngortinneqartussatut qinnuteqaatigineqartut pillugit paasissutissat, tassunga ilanngullugit BSU-mit taarsigassarsilluni illuliamut, nammineq illuliamut taarsigassarsiat imaluunniit BSU-mit taarsigassarsilluni illuliamut qinnuteqartup qimassimasaanut akiligassatoqqat akilinngitsuukkat.
4) Ukiuni marlunni kingullerni inoqutigiit tamarmiusut isertitaannut naatsorsuutit inaarnerisa assilinerat.
Imm. 4. Inoqutigiit tamarmiusut isertitaat ukiuni marlunni kingullerni isertitarisimasaannut naleqqiullutik piffissami qinnuteqarfiusumi annertuumik allannguuteqarsimappata, qinnuteqartup piffissami matumani inoqutigiit tamarmiusut isertitaannut uppernarsaat ilanngullugu nassiutissavaa.
Imm. 5. A/S Inissiaatileqatigiiffik INI qinnuteqarfissatut immersugassamik assigiissakkanik sanasinnaavoq.

 

Allannguiniarluni taarsigassarsiat

§ 3. Taarsigassarsianik inissialiortiternermut tapersiissuteqartarneq pillugu Inatsisartut peqqussutaanni kapitali 4 naapertorlugu taarsigassarsiaritinneqartunik allannguiniarluni taarsigassarsinissamik qinnuteqaat A/S Inissiaatileqatigiiffik INI-mut, Naalakkersuisut sinnerlugit imm. 3-mi 4-milu piumasaqaatit naammassineqarsimanerinik misissuisussamut tunniunneqassaaq.
Imm. 2. Taarsigassarsiallit akiliutissanik akiligassanngortunik taarsigassarsiallu amiakkuinik allannguiniarlutik taarsigassarsinissamik qinnuteqarsinnaapput.
Imm. 3. Qinnuteqaammut ilanngunneqassapput:
1) Qinnuteqartup inoqutigisaasa tamarmik aqqi, inuup normui suliffiilu pillugit paasissutissat.
2) Najugaqarnermut uppernarsaatip assilinera imaluunniit inuit nalunaarsorsimaffianniit allagaq, qinnuteqartup najugarisaanut uppernarsaaffiusoq naqissusigaq.
3) Taarsigassarsiat suut allanngortinneqarnissaannut qinnuteqaatigineqartut pillugit paasissutissat, tassunga ilanngullugit BSU-mit taarsigassarsilluni illuliamut, nammineq illuliamut taarsigassarsiat imaluunniit BSU-mit taarsigassarsilluni illuliamut qinnuteqartup qimassimasaanut akiligassatoqqat akilinngitsuukkat.
4) Ukiuni marlunni kingullerni inoqutigiit tamarmiusut isertitaannut naatsorsuutit inaarnerisa assilinerat.
5) Qinnuteqartup inoqutaasalu aningaasanut angerlarsimaffimmi atugassanut missingersuutaat.
Imm. 4. Inoqutigiit tamarmiusut isertitaat ukiuni marlunni kingullerni isertitarisimasaannut naleqqiullutik piffissami qinnuteqarfiusumi annertuumik allannguuteqarsimappata, qinnuteqartup piffissami matumani inoqutigiit tamarmiusut isertitaannut uppernarsaat ilanngullugu nassiutissavaa.
Imm. 5. A/S Inissiaatileqatigiiffik INI qinnuteqarfissatut immersugassamik assigiissakkanik sanasinnaavoq.

§ 4. Qinnuteqartoq taarsigassarsianik allannguiniarluni qinnuteqarnerminut atatillugu A/S Inissiaatileqatigiiffik INI-mit ikiorneqarluni akiitsunik akilersuinissamut pilersaarusiussaaq, tassanilu akiitsut piffissami sukumiisumik aalajangersarneqartumi qanoq akilersorneqarnissaat aalajangersarneqassaaq.
Imm. 2. Piffissani aalajangersimasuni akiligassat ilanngaaseriikkat, akiitsut akilersornissaannut pilersaarummi aalajangersarneqartut inoqutigiit qaammammut isertitaasa akileraaruseriikkat 1/3-iinit annertunerussanngillat, piffissarlu akilersuiffiusussaq ukiunit 33-nit sivisunerusunngorlugu aalajangerneqassanani.

 

Qinnuteqaatinik aqutsineq

§ 5. A/S Inissiaatileqatigiiffik INI-p qinnuteqaammik tigusinermini qinnuteqartup paasissutissatut nassiussai, tak. § 1, imm. 3 aamma 4, § 2, imm. 3 og 4, aamma § 3, imm. 3 aamma 4, misissussavai.
Imm. 2. Qinnuteqaat §§ 1, 2 imaluunniit 3 malillugu tamakkiisumik suliarineqarsimanngippat, A/S Inissiaatileqatigiiffik INI-p pisariaqanngitsumik kinguarsaanani qinnuteqartoq tamanna pillugu nalunaarfigissavaa, paasissutissanillu amigaataasunik nassiussinissamut sapaatit akunnerinik sisamanik piffissalissallugu.
Imm. 3. Qinnuteqartoq akilinngitsuukkanik akiligassaqarsimappat A/S Inissiaatileqatigiiffik INI sapinngisaminik ukiuni ataasiakkaani akilinngitsuukkanik akiitsoqarnermut tunngasut akiitsullu ineriartornerat, kiisalu ukiuni pineqartuni qinnuteqartup inoqutaasalu isertitaat pillugit nassuiaasiussaaq.

§ 6. A/S Inissiaatileqatigiiffik INI-p qinnuteqaat qinnuteqartup paasissutissatut ilanngussai ilanngullugit Naalakkersuisunut aalajangiiffigisassanngorlugu nassiutissavaa.
Imm. 2. A/S Inissiaatileqatigiiffik INI pissutsit makku pillugit Naalakkersuisunut ilisimatitsissuteqassaaq.
1) Illup pisoqaassusia.
2) Illup atortulersugaanera, tassunga ilanngullugu illu innaallagiaqarnersoq, naqitsineq atorneqarnersoq imeqartinneqarnersoq imermulluunniit tankeqarnersoq, uuliatortumik kiassaateqarnersoq imaluunniit uuliatortumik kissarsuuteqarnersoq.
3) Illup qanoq innera tamakkiisoq, soorlu assit immersukkalluunniit atorlugit takussutissiornikkut.
4) Taarsigasarsiat amiakkuisa annertussusaat.
5) Piffissamut aalajangersimasumut akiliutaasartut annertussusaat.
6) Taarsigassarsiallip maannamut akiliisarneranut nassuiaat, akiitsunik akilinngitsuugaqartoqarsimappat taakku ukiumut agguagaanerat ilanngullugu.
7) Akiligassanngortitanik akiliisitsiniarluni maannamut misiliinerusarsimasut.
8) Najukkami pisortat inissiani attartortittakkani inissaqartitsinerat.
9) Inissiaatileqatigiiffiup illup tunineqarsinnaaneranut periarfissat misilittagarisimasinnaasai.
10) Illup kommunimut tunniunneqarsinnaaneranut periarfissat.

§ 7. Naalakkersuisut akiliutissanik akiligassanngortunik taarsigassarsiallu amiakkuinik isumakkeerinninnissamut, taarsigassarsianik allannguinissamut imaluunniit akiliutissanik akiligassanngortunik taarsigassarsiallu amiakkuinik allannguinissamut qinnuteqaat pilllugu aalajangiinerat qinnuteqartumut toqqaannartumik nalunaarutigineqassaaq, assilineralu A/S Inissiaatileqatigiiffik INI-mut nassiunneqassaaq, tassanngaanniit taarsigassarsiat uppernarsarneqarnissaannut aamma Nunatta Eqqartuussiviani nalunaarsorneqarnissaannut pisariaqartinneqartut isumagineqartussaammata.

§ 8. Nalunaarut 1. marts 2006-imi atuutilerpoq.
Imm. 2. Tamatumunnga peqatigitillugu akiliutissat akiligassanngortut taarsigassarsiallu amiakkuisa isumakkeerneqarnissaannik qinnuteqaatinik aqutsineq pillugu Namminersornerullutik Oqartussat nalunaarutaat nr. 10, 18. april 2002-meersoq atorunnaarsinneqarpoq.

Namminersornerullutik Oqartussat, ulloq 26. januar 2006

Jørgen Wæver Johansen

/

Dorthe Johannsen