1. december 2005

KS 2005/10

 

 

Oqaaseqaatit nalinginnaasut

Naalakkersuisut siunnersuutigaat inatsisitigut aalajangerneqassasoq Inatsisartut ingerlanneqarnissartik isumagisinnaassagaat soorlu naalakkersuisut aningaasatigut killissaqartitaasut, taamalu taamaallaat akissaajaatigisassallugit inatsisartut ingerlaannarnissaannut pisariaqartut 2006-imut aningaasat inatsisaata akuerineqavinnissaata tungaanut.

Inuussutissarsiornermut, Nunalerinermut Suliffeqarnermullu naalakkrsuisoqarfiup pisariaqartippaa Inuusstissarsiornerup siuarsarnissaanut aningaasanik Nukiit aqqutigalugit 2006-imi qaammatini siullerni pingasuni tapiissuteqarnissani. Taakkua pisariaqartitat 3,2 mio. kruuniupput tassalu 2006-imut siunertamut tassunga aningaasaliissutit tamakkerlugit. Tapiissutit Inuussutissarsiornermut, Nunalerinermut Suliffeqarnermullu Pisortaqarfimmit aqunneqarput, qinnuteqaatillu nalilersor-nissaannut aningasaliisarnermut ataatsimiititamik siunnersortaasumik pilersitsisinnaallutik assersuutigalugu ilaasortaatitaqarlutik inuussutissarsiutit siuarsarnissaannut selskabi nutaaq, ventureselskabet, KANUKOKA aamma/imaluunniit allat.

Suliffeqarnerup nutarterneranut atatillugu kommunillu ilitsersuivinnik ilisimatitsivinnillu pilersitsinissaannut atatillugu Inuussutissarsiornermut, Nunalerinermut Suliffeqarnermullu naalakkersuisoqarfik ukiup qaammataani siullerni IT-qarnermut akisaajaateqartariaqassaaq. Nalilerneqarpoq aningaasaqarnikkut pisariaqartitsineq tamanna suliffeqarnerup nutartigaaneranut ukiumut aningaassaliissutaareersut 1,9 mio. kruunit iluanni akissaqartinneqassasoq. Edb-li pillugu pilersaarutip aallartinnissaanut immikkut ittumik pisinnaatitsisoqartariaqarpoq.

Naalakkersuisut Aningaaqarnermut ataatsimiititamit akuerineqarlutik angallannikkut Nammi-nersornerullutik Oqartussat sullissinissamik isumaqatigiissutaasa katitigaanerat allanngor-tissimavaat 2006-imiit 2010 ilanngullugu. Angallasseriaatsimi nutaami sullissinissamillu isumaqatigiissutini pingaarnerutitaavoq angallasseriaatsimi piginnaasat atorluarneqarnerulernissaat. Tamatuma ilaatigut kingunerissavaa timmisartut, helikopterit mittarfiillu pigineqareersut atorluarneqarnerulernerat, tamatumani ilanngullugit suluusalinnut mittarfiit, helikopterit mittarfii mikkallartarfiilu. Paamiunut Paamiuniillu helikopterit atorlugit angallassinermut sullissinermut isumaqatigiissut ukiumut 21,5 mio. kruuninik akeqarpoq. Aningaasat taakkua 2008-miit sipaarneqarsinnaalisapput 2006-imi 2007-imilu Paamiuni mittarfiliortoqarpat akilersinnaaneq tunngavigalugu Dash 7 angallatigineqalerluni.

Mittarfiliortiternissaq pillugu inatsisartut inatsisaanni nr. 4-mi 12. juni 1995-imeersumi Paamiuni mittarfiliornissaq inatsisartut akueraat. Maannamulli taamatut mittarfiornissamut akissanik nassaarnissaq ajornarsimavoq. Angallassinikkut aaqqissuussineq nutaq aningaasallu tamatumunnga sillimmatitut immikkoortitaasut atorlugit mittarfiliornissaq akissaqartinneqalersimavoq, taamaalillunilu Narsarsuarmiit Upernavimmut pisortanit tapiiffigineqanngitsumik nunap immikkoortuisa akornanni ilaasunik angallassineq qulakkeerneqarluni.

Paamiuni mittarfiliornissaq november 2005-imi 141 mio. kruuninik akeqassangatinneqarpoq. Tassunga ilanngullugu oqaatigineqassaaq illoqarfimmiit mittarfiup tungaanut aqqusineq naammasipajaarneqa-reersimammat.

2006-imi 2007-imilu mittarfimmut akisaajaatit illuatungilerlugit matuneqassapput angallassinermut akissaajaatit 2007-imiit 2015-mut ikilineratigut. Tamatuma kingunerissavaa ukiuni pineqartuni mittarfimmut akissaajaatit missingersuutinut nikissutaannginnissaat.

Mittarfiup 2007-p naalernrani atorneqalernissaanut tunngatillugu helikopterillu atorlugit ingerlatsinerup 2007-imiilli sipaarfigineqalernissaa eqqarsaatigalugu januar 2006-imi immikkuualuttortai ilanngullugit pilersaarusiornermut suliarinnittussarsiuussinermullu aningaasaliinissaq pisariaqarpoq pisortat aningaasaliisartut akurrsinissaat apeqqutaalluni. Naalakkersuisut siunniuppaat 136 mio. kruunit sinneruttut AIS 2006-imi 2006-imut 2007-imullu inissinniarlugit tamatumuunakkut inatsisartut upernaamut aningaasat inatsisaat pillugu isumaqatigiinniarnissami inaarutaasumik isummernissamut periarfissillugit.

Tamanna tunngavigalugu Naalakkersuisut siunnersuutigaat ukiut 2005/2006-p nikinneranniilli Paamiuni mittarfissap annikitsualuttai ilanngullugit pilersaarusiorneqarnera suliarinnittussar-siuunneqarneralu aallartinneqassasoq 5 mio. kruunit anngullugit akissaajaatitalimmik.

Aningaasat inatsisigigallagaanni siunnersuutigineqarpoq Sisimiut eqqaanni Tasersuarmi erngup nukinga atorlugu nukissiorfiliornissap suliarinerata nanginnissaanut kiisalu Nuup eqqaani Utoqqarmiut Kangerluarsunguanni nukkisorfimmi turbinit pingajussaata ivertinneqarnissaanut aningaasanik imikkoortitsisoqassasoq.

Inuiaqatigiit aningaasaqarnerannut pitsaaqutissatut ilimagineqartut saniatigut tamatuma kingune-rissavaa inuiaqatigiit imminut napatissinnaalernermut ikaarsariarnerat ikummatissamik nunanit allanit tikisitamik isumalluuteqarnerup annikillineratigut. Aamma erngup nukingata atorneqarneru-lernera avatangiisitigut pitsaaqutissaqarpoq.

Tamanna maannakkut inaarutaasumik aalajangiiffigineqarsinnaanngilaq kingunerissalluguli Inatsisartut UKA 2006-imi ilisimasaqassuseq tunngavigalugu aalajangiisinnaanerulernissaat.

Erngup nukingata annertusinissaanut atatillugu aningaasat inatsiserigallagaanni katillugu 11 mio. kruunit pisariaqartinneqarput.

Aaqqissugaanermut ataatsimiititap isumaliutissiissutaanut tunngatillugu kommunit angalanernut ataatsimiinnernullu 2006-imi aningaasartuuteqartussaapput ilaatigut kommunit kattunnissaat oqallisigalugulu timitalimmik isumaqatigiinniutiginiarlugu. Tamatumani aallaqqaatitut ilaavoq borgmesterit kommunaldirektørillu sapaatip akunnerani 9-mi Nuummut ataatsimiigiarlutik angala-nissaat. Tamatuma kingornatigut kommunit immikkut ittumik angalasariaqassapput kattunnissat timitalimmik isumaqatigiinniutiginiarlugit.

Pingaartumik Qaanaap Ittoqqortoormiillu kommunii nunatsinni inissisimanermik kinguneranik immikkut ittumik angalanernut akissaajaateqartussaapput aningaasarliornertik patsisigalugu akileruminaatsitaminnik. Taamaattumik siunnersuutigineqarpoq 0,2 mio. kruunit aningaasaliissutissatut immikkoortinneqasasut. Tapiissutit ataasiaannartumik tapiissutitut tunniunneqassapput kommuninut marluusunut avillugit.

Kalaallit Nunaat 1995-imi WTO-mut ilaasortanngorpoq. Nunatsinni Naalakkersuisut WTO-mi peqataanikkut kalaallit nunanut allanut niuernnikkut soqutigisaat eqeersimaarlutik isumagisimavaat WTO-milu niuernikkut malittarisassat ataatsimoorussat kalaallit inuutissarsiornerannut inuiaqatigiillu aningaasaqarnerannut ataatsimut isigalugu atorluarniarsimallugit. 2001-imi Naalakkersuisut aalajangerput Kalaallit Nunaanni malittarisassat WTO-p malittarisassaanut naleqqussarneqassasut. Tamatuma kingornatigut suleqqinnissamut arlalinnik inassuteqartoqarsimavoq pingaarnerit marluullutik: Naalakkersuisutta nammineq susassaqarfimminni imaaliinnarlugit inatsisiliarisaat aammalu inatsisit nalunaarutigineqartariaqartut (nalunaarsugassat) imaluunniit malittarisassanit ataatsimoorussanit immikkoortittariaqavissut.

Nalunaarsugaalernissap aallartinnissaanut qinnuteqaat kingusinnerpaamik 20. december 2005-imi WTO-p allaffeqarfianut tunniunneqareersimassaaq.Taamaanngippat Kalaallit Nunaat 2009-mut utaqqigallartariaqassaaq.

WTO-mi nalunaarsugaanissamut 650.000 kruunit tikillugit atortariaqassapput, inatsisit nutsernerannut 50.000 kruunit 600.000 kruunillu inatsisilerituut inatsisinik misissueqqissaarnissaanut atorneqartussaassallutik. Tassalu aningaasat taakkua 2006-imut aningaasat inatsisigigallagaannut ilanngunneqarnissaat qinnutigineqarpoq.

2005-imut aningaasat inatsisaanni isumaqatigiissutinut tunngasutigut akissaajaatinut sillimmatinik immikkoortitsisoqarsimavoq 2005-2008-mut ukiumut 5 mio. kruuninik. 2005-ip ingerlanerani isumaqatigiissutaareersut tunngavigalugit, aningaasat ukiuat akimorlugu aningaasaliissutit ilaat atorneqartussaasut naatsorsuutaareerpoq. Ilimagisariaqarpoq 2006-imi qaammatini siullerni pingasuni aningaasanik amerlanerusunik atuisoqartariaqassasoq isumaqatigiissutaasimasut kingunerisaannik. Siunnersuutigineqarpoq atuisinnaatitaaneq sillimmatinit 5 mio. kruuninit matuneqassasoq.

2005-imut aningaasat inatsisaanni Naalakkersuisut anguniakkanut kontomut 10.13-imut, Namminersornerullutik Oqartussat suliffeqarfiutaat, pisinnaatitaapput Royal Arctic Bygdeservice A/S-ip Royal Arctic Line A/S-imiit KNI A/S-imut tunniunnissaanut.

Siunnersuummut tunngaviuvoq Naalakkersuisut tunngaviusumik isummersimammata nunaqarfiit sullinneqarneranni suliassat arlallit KNI A/S-ip ataani katersorneqassasut. Nunaqarfinnik sullissinermi suliassat ataatsimoortinneqarnissaata kinguneraa Royal Arctic Bygdeservice A/S-ip KNI A/S-ip ataanut inissinneqarnissaa.

Anguniagaavoq qulakkeerumallugu nunaqarfiit sullinneqarnerata pitsaanerulernissaa, sullissinermi suliassat assigiingitsut ataqatigiiaarluarnerunissaat inuiaqatigiillu akissaajaataasa apparnissaat. Nunaqarfinni suliassat pineqartut selskabimut ataatsimut katersorneqarneratigut naatsorsuu-tigineqarpoq pisariillisaanikkut iluanaaruteqartoqassasoq taamalu iniaqatigiit sipaaruteqassasut. Suliassat pineqartut pitsaanerusumik ataqatigiiaarneratigut sullissineq pitsaanerulersinneqarsinnaavoq minnerunngitsumik nunaqarfiit umiarsuarnik tikinneqartarneratigut.

Royal Arctic Line A/S KNI A/S-ilu 1.1. 2006-imi tunniussinissamut piareersarsimmapput, taamaattumillu tunniussinissaq inatsisaartut aningaasaliissutinut 2006-imi inatsisigigallagaannut ilanngunniarneqarpoq.

 

Siunnersuutip aalajangersagartaanut ataasiakkaanut oqaseqaatit

§ 1-imut

Nr. 1-imut

Imm. 2-mi Inatsisartut pisinnaatinnneqarput akornusersugaanngitsumik taaneqarsinnaa-sumik Namminersornerullutik Oqartussat ingerlataasa ingerlatiinnarnissaannut. Naatsorsuu-tigineqarpoq isertitat taamaaginnassasut akissaajaatillu akilerneqassasut 2005-imi aningaasaliissu-taasut aallaavigalugit.

Imm. 3-mi siunertaavoq Naalakkersuisut tunngavissikkumallugit inuiaqatigiit aningaasaqarnerat aallaavigalugu akissaajaateqarnissamut.

Inuussutissarsiutit siuarsarnissaannut tapiissutinut akissaajaatit akilerneqassapput aningaasat inatsisaanni 2005-imi malittarisassat aningaasaliinermullu tunngaviusut kontomi pingaarnermi 64.10.16-imiittut, Aningaasalersuinikkut tapiisarneq, naapertorlugit.

Nr. 2-mut

§ 4-p allnngortinnissaanut siunnersuummi anguniagaavoq Naalakkersuisut tunngavissikkumallugit inuiaqatigiit aningaasaqarnerat mianeralugu pisariaqarsorinartunut aningaasaliisarnissamut.

Nr. 6-imi pineqarput innersuussisarnermut nalunaarsugaanermullu sakkussat ineriartortinnerannut piviusunngortinnerannullu akissaajaatit, taakku 2005-imut aningaasat inatsisaanni konto pingaarneq 64.13.14, Suliffeqarnermik iluarsaaqqinneq, tassani aningaasaliissutaasunit kilissarititat iluanni matuneqarnissaat naatsorsuutigineqarluni.

Paamiuni mittarfissap pilersaarusiorneranut sullissisussarsiunneranullu akissaajaatit, takuuk nr. 7, matuniarneqassapput konto pingaarneq nutaamik pilersitaq 89.71.40, Paamiuni mittarfik, atorlugu.

Sisimiuni erngup nukinga atorlugu nukissiorfissap pilersaarusiulerneranut 10 mio. kruunit angullugit akissaajaatit, takuuk nr. 8, matuniarneqassapput atorlugu konto pingaarneq 89.71.40, Nukissiorfiit – sanaartornermut taarsigassarsiarititat, atorlugit.

Nr. 9 naapertorlugu Utoqqarmit Kangerluarsunnguanni Nuup eqqaani turbinit pingajuata ivertinnissaanut piareersaatitut sulianut akissaajaatit 1 mio. kruunit angullugit amerlatigisut matuniarneqassapput konto pingaarneq 89.71.40, Nukissiorfiit – sanaartornermut taarsigassarsiarititat, atorlugit.

Kommunit aaqqissugaanerata nutarterneranut atatillugu angalanernut tapiissutinut akissaajaatit, takuuk nr. 10, matuniarneqassapput atorlugu konto pingaarneq 10.01.07, Kommunit nutarternerat.

Siunnersuut nr. 11 naapertorlugu WTO-mi nalunaarsugaalernissamut akissaajaatit ilanngunniarneqassapput kontomut pingaarnermut 27.01.01-imut, Nunanut allanut Allaffik, allaffissorneq, matuniarneqassallutillu kontomi pingarnermi 20.11.50-imi, Ingerlatsinermut sillimmatit, aningaasat taamaaqataanik ikilineratigut.

Isumaqatigiissutinut akissaajaatit, takuuk nr. 12, akilerniarneqassapput konntomit pingaarnermit 20.11.51-imiit, Isumaqatigiissutinut tunngasunik aningaasartuutissanut sillimmatit. Konto pingaarneq taanna 2005-imut aningaasat inatsisaanni takuneqarsinnaavoq.

Nr. 3-mut

§ 5-ip allannguutissaatut siunnersuummi anguniagaavoq Naalakkersuisut tunngavissikkumallugit Royal Arctic Bygdeservice A/S-ip (RAB A/S) Royal Arctic Line A/S-imiit KNI A/S-imut 1. januar 2006-imi tunniunnissaanut. Naalakkersuisut tunniussinissamut tamatumunnga pisinnaatitaapput aqqutigalugu "angunniiakkanut kontomut 10.13-imut, Namminersornerullutik Oqartussat suliffeqarffiutai" oqaasertaliussaq. Oqaasertaliussaq 2005-imut aningaasat inatsisaannut ilanngunneqarsimavoq.

Tamatumunnga tunngatillugu naatsorsuutigineqarpoq RAB A/S-ip avinneqarnerata kingunerisaa-nik 23,5 mio. kruunit immikkut iluanaarutaassasut. Tamatumani ilanngunneqassapput 2,5 mio. kruunit Namminersornerullutik Oqartussat RAB A/S-ip aktiaataanut akiligaat. Isertitat taakkua isertitatut nalunaarneqassapput kontomi pingaarnermi 10.13.10-mi, Iluanaarutit, aktiaatileqatigiiffinniit tunniussinerit tunisinerillu.

Kontomi pingaarnermi 10.13.11-mi, aktieselskabinut aningaasanngorlugu akissaajaatit, Namminer-sornerullutik Oqartussat RAB A/S-imi aktianut akiliutaat 2,5 mio. kruunit akissaajaatitut nalunaarne-qassapput, 10 mio. kruunillu akissaajaatitut tiguneqassapput Namminersornerullutik Oqartussat RAB A/S-ip tunniunneqarneranut atatillugu KNI A/S-imut aningaasaliissutaasut.

 

§ 2-mut

Siunnersuutigineqarpoq Inatsisartut inatsisaat 1. januar 2006-imiit atortuulersinneqassasoq.