Ukiumut aningaasanut inatsiseqarfiusumut 2006-imut Inatsisartut aningaasanut inatsisigigallagaat nr. 6, 23. september 2005-imeersoq

 

§ 1. Ukiumut aningaasanut inatsiseqarfiusumut 2006-imut Inatsisartut aningaasanut inatsisaata akuersissutigineqarnissaata tungaanut akileraarutit inatsisitigut tunngavillit akilersinniarnissaannut Namminersornerullutillu Oqartussat aningaasatigut isertitaasa allat pigiinnarnissaannut Naalakkersuisut piginnaatinneqarput. Piffissap tamatuma iluani Naalakkersuisut aningaasartuutit Naalakkersuisut, sullissiveqarfiit suliffeqarfiillu ingerlatiinnarneqarnissaannut pisariaqartinneqartut kiisalu suliniutit allat inatsimmik, siornatigut aningaasanut inatsimmik imaluunniit aningaasaliissutitut tunniunneqartut allat akilernissaannut piginnaatinneqarput.

§ 2. Nunamut tamarmut akileraarutip procentia allannguuteqartinnagu 11%-iussasoq aalajangiunneqarpoq. Nunamut tamarmut immikkut akileraarutip allannguuteqartinnagu 26 %-iuinnarnissaa aalajangiunneqarpoq. Sulisitsisut inuussutissarsiutinik ilinniartitaanermut akileqaataassutaannut procenti allannguuteqartinnagu 0,9%-iussasoq aalajangiunneqarpoq. Akiliisitsilluni aallaaniartitsinermi aalisartitsinermilu akitsuutit uumasumut ataatsimut umimammut allannguuteqartinnagu 2000 kr.-imut, uumasumut ataatsimut tuttumut 1.000 kr.-imut, uumasumut ataatsimut puisimut 500 kr.-imut, uumasut aallaaniartakkat aallaaniarsinnaanerannut akuersissut ullut unnuallu arfineq marluk aallartinnerannut 1.000 kr.-imut, aalisarnissamut akuersissut ullormut unnuamut/sapaatip akunneranut/qammammut 75 kr.-imut/200 kr.-imut/500 kr.-imut aalajangiunneqarpoq.

§ 3. Inatsisartut Aningaasaqarnermut Ataatsimiititaliaanit akuerineqartussanngorlugit Inatsisartut imatut piginnaatitsipput:
1) Sanaartukkanut ingerlareersunut katillugit 6 mio. kr.-it angullugit aningaasartuuteqarnerunissamut.
2) Pilersaarusiassatut sulianut aallartinneqareersimasunut katillugit 3,5 mio. kr.-it angullugit aningaasartuuteqarnerunissamut.
3) Namminersornerullutik Oqartussat inissiaataani attartortittakkani aningaasaleeqqinnerit aallartinnissaannut 2006-imi 15 mio. kr.-it angullugit aningaasartuuteqarnerunissamut.

§ 4. Naalakkersuisunit akuerineqartussanngorlugit Inatsisartut imatut piginnaatitsipput:
1) Inissianik attartukkanik tunisineq –5,0 mio. kr. angullugit aamma tassunga atasumik 1,5 mio. kr.-it angullugit aningaasartuuteqarsinnaanermut.
2) Boligstøtti atorlugu illuliat sinneruttut tunineqarnerinut –0,2 mio. kr.-it angullugit.
3) Nammineerluni illuliornissamut neriorsuinernut 27,2 mio. kr.-it angullugit.
4) Boligstøtti atorlugu illuliat iluarsaannissaannut tapiissuteqarnissamik neriorsuinernut 2,0 mio. kr. angullugit.
5) Boligstøtti atorlugu illuliat iluarsaannissaannut immikkullu ittumik aserfallatsaalinissaannut taarsigassarsitsinermut 2,0 mio. kr.-it angullugit.

§ 5. Inatsisartut Naalakkersuisut piginnaatippaat:
1) piareersarnissamut, isumaqatiginninniarnissamut aningaasaqarnermullu ataatsimiititaliap akuersineratigut Arctic Umiaq Line A/S-ip imaluunniit Arctic Umiaq Line A/S-ip ilaanik, ilanngullugit ingerlatsiviit pigineqartut tunineqarnissaannut.
2) Arctic Umiaq Line A/S-imut Naalagaaffimmiit Namminersornerullutillu Oqartussaniit atukkiunneqarsimasut tjenestemandit soraarsinneqarsinnaanerannut atasumik 2006-imi 22 mio. kr.-it angullugit aamma 2007-2009-imi 19,4 mio. kr.-it angullugit aningaasartuuteqarnissamut.

§ 6. Inatsit 1. januar 2006-mi atuutilerpoq.

Namminersornerullutik Oqartussat, ulloq 23. september 2005

Hans Enoksen

/

Josef Motzfeldt